| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. ஹத்தி²ஸாரிபுத்தஸுத்தவண்ணனா
6. Hatthisāriputtasuttavaṇṇanā
60. ச²ட்டே² அபி⁴த⁴ம்மகத²ந்தி அபி⁴த⁴ம்மமிஸ்ஸகங் கத²ங். கத²ங் ஓபாதேதீதி தேஸங் கத²ங் விச்சி²ந்தி³த்வா அத்தனோ கத²ங் கதே²தி. தே²ரானங் பி⁴க்கூ²னந்தி கரணத்தே² ஸாமிவசனங், தே²ரேஹி பி⁴க்கூ²ஹி ஸத்³தி⁴ந்தி அத்தோ². யா ச தே²ரானங் அபி⁴த⁴ம்மகதா², தங் அயம்பி கதே²துங் ஸக்கோதீதி அத்தோ². சேதோபரியாயந்தி சித்தவாரங். இதா⁴தி இமஸ்மிங் லோகே. ஸோரதஸோரதோதி ஸூரதோ விய ஸூரதோ, ஸோரச்சஸமன்னாக³தோ வியாதி அத்தோ². நிவாதனிவாதோதி நிவாதோ விய நிவாதோ, நிவாதவுத்தி வியாதி அத்தோ². உபஸந்துபஸந்தோதி உபஸந்தோ விய உபஸந்தோ . வபகஸ்ஸதேவ ஸத்தா²ராதி ஸத்து² ஸந்திகா அபக³ச்ச²தி. ஸங்ஸட்ட²ஸ்ஸாதி பஞ்சஹி ஸங்ஸக்³கே³ஹி ஸங்ஸட்ட²ஸ்ஸ. விஸ்ஸட்ட²ஸ்ஸாதி விஸ்ஸஜ்ஜிதஸ்ஸ. பாகதஸ்ஸாதி பாகதிந்த்³ரியஸ்ஸ.
60. Chaṭṭhe abhidhammakathanti abhidhammamissakaṃ kathaṃ. Kathaṃ opātetīti tesaṃ kathaṃ vicchinditvā attano kathaṃ katheti. Therānaṃ bhikkhūnanti karaṇatthe sāmivacanaṃ, therehi bhikkhūhi saddhinti attho. Yā ca therānaṃ abhidhammakathā, taṃ ayampi kathetuṃ sakkotīti attho. Cetopariyāyanti cittavāraṃ. Idhāti imasmiṃ loke. Soratasoratoti sūrato viya sūrato, soraccasamannāgato viyāti attho. Nivātanivātoti nivāto viya nivāto, nivātavutti viyāti attho. Upasantupasantoti upasanto viya upasanto . Vapakassateva satthārāti satthu santikā apagacchati. Saṃsaṭṭhassāti pañcahi saṃsaggehi saṃsaṭṭhassa. Vissaṭṭhassāti vissajjitassa. Pākatassāti pākatindriyassa.
கிட்டா²தோ³தி கிட்ட²கா²த³கோ. அந்தரதா⁴பெய்யாதி நாஸெய்ய. கோ³பஸூதி கா³வோ ச அஜிகா ச. ஸிப்பிஸம்பு³கந்தி ஸிப்பியோ ச ஸம்பு³கா ச. ஸக்க²ரகட²லந்தி ஸக்க²ரா ச கட²லானி ச. ஆபி⁴தோ³ஸிகந்தி அபி⁴ஞ்ஞாததோ³ஸங் குத்³ரூஸகபோ⁴ஜனங். நச்சா²தெ³ய்யாதி ந ருச்செய்ய. தத்த² யதே³தங் புரிஸங் பு⁴த்தாவிந்தி உபயோக³வசனங், தங் ஸாமிஅத்தே² த³ட்ட²ப்³ப³ங். அமுங் ஹாவுஸோ, புரிஸந்தி, ஆவுஸோ, அமுங் புரிஸங்.
Kiṭṭhādoti kiṭṭhakhādako. Antaradhāpeyyāti nāseyya. Gopasūti gāvo ca ajikā ca. Sippisambukanti sippiyo ca sambukā ca. Sakkharakaṭhalanti sakkharā ca kaṭhalāni ca. Ābhidosikanti abhiññātadosaṃ kudrūsakabhojanaṃ. Nacchādeyyāti na rucceyya. Tattha yadetaṃ purisaṃ bhuttāvinti upayogavacanaṃ, taṃ sāmiatthe daṭṭhabbaṃ. Amuṃ hāvuso, purisanti, āvuso, amuṃ purisaṃ.
ஸப்³ப³னிமித்தானந்தி ஸப்³பே³ஸங் நிச்சனிமித்தாதீ³னங் நிமித்தானங். அனிமித்தங் சேதோஸமாதி⁴ந்தி ப³லவவிபஸ்ஸனாஸமாதி⁴ங். சீரிகஸத்³தோ³தி ஜ²ல்லிகஸத்³தோ³. ஸரிஸ்ஸதி நெக்க²ம்மஸ்ஸாதி பப்³ப³ஜ்ஜாய கு³ணங் ஸரிஸ்ஸதி. அரஹதங் அஹோஸீதி ப⁴க³வதோ ஸாவகானங் அரஹந்தானங் அந்தரே ஏகோ அரஹா அஹோஸி. அயஞ்ஹி தே²ரோ ஸத்த வாரே கி³ஹீ ஹுத்வா ஸத்த வாரே பப்³ப³ஜி. கிங் காரணா? கஸ்ஸபஸம்மாஸம்பு³த்³த⁴காலே கிரேஸ ஏகஸ்ஸ பி⁴க்கு²னோ கி³ஹிபா⁴வே வண்ணங் கதே²ஸி. ஸோ தேனேவ கம்மேன அரஹத்தஸ்ஸ உபனிஸ்ஸயே விஜ்ஜமானேயேவ ஸத்த வாரே கி³ஹிபா⁴வே ச பப்³ப³ஜ்ஜாய ச ஸஞ்சரந்தோ ஸத்தமே வாரே பப்³ப³ஜித்வா அரஹத்தங் பாபுணீதி.
Sabbanimittānanti sabbesaṃ niccanimittādīnaṃ nimittānaṃ. Animittaṃ cetosamādhinti balavavipassanāsamādhiṃ. Cīrikasaddoti jhallikasaddo. Sarissati nekkhammassāti pabbajjāya guṇaṃ sarissati. Arahataṃ ahosīti bhagavato sāvakānaṃ arahantānaṃ antare eko arahā ahosi. Ayañhi thero satta vāre gihī hutvā satta vāre pabbaji. Kiṃ kāraṇā? Kassapasammāsambuddhakāle kiresa ekassa bhikkhuno gihibhāve vaṇṇaṃ kathesi. So teneva kammena arahattassa upanissaye vijjamāneyeva satta vāre gihibhāve ca pabbajjāya ca sañcaranto sattame vāre pabbajitvā arahattaṃ pāpuṇīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. ஹத்தி²ஸாரிபுத்தஸுத்தங் • 6. Hatthisāriputtasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. ஹத்தி²ஸாரிபுத்தஸுத்தவண்ணனா • 6. Hatthisāriputtasuttavaṇṇanā
