| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (дийгаа) • Aṅguttaranikāya (ṭīkā) |
6. хад̇т̇исаарибуд̇д̇асуд̇д̇аван̣н̣анаа
6. Hatthisāriputtasuttavaṇṇanā
60. чадтз хад̇т̇им̣ саарзд̇ийд̇и хад̇т̇исаарий, д̇асса буд̇д̇од̇и хад̇т̇исаарибуд̇д̇о. со гира саавад̇т̇ияам̣ хад̇т̇иаажарияасса буд̇д̇о бхаг̇авад̇о санд̇игз баб̣б̣аж̇ид̇ваа д̇ийн̣и бидагаани уг̇г̇ахзд̇ваа сукумзсу канд̇хад̇хаад̇уааяад̇анаад̣̇ийсу ад̇т̇анд̇арзсу гусало ахоси. д̇зна вуд̇д̇ам̣ – ‘‘т̇зраанам̣ бхигкуунам̣ абхид̇хаммагат̇ам̣ гат̇знд̇аанам̣ анд̇аранд̇араа гат̇ам̣ обаад̇зд̇ий’’д̇и. д̇ад̇т̇а анд̇аранд̇араа гат̇ам̣ обаад̇зд̇ийд̇и т̇зрзхи вужжамаанасса гат̇аабаб̣анд̇хасса анд̇арз анд̇арз ад̇д̇ано гат̇ам̣ бавзсзд̇ийд̇и ад̇т̇о. бан̃жахи сам̣саг̇г̇зхийд̇и саванасам̣саг̇г̇о, д̣̇ассанасам̣саг̇г̇о, самуллаабасам̣саг̇г̇о, самбхог̇асам̣саг̇г̇о, гааяасам̣саг̇г̇од̇и имзхи бан̃жахи сам̣саг̇г̇зхи. гидтакаад̣̇агод̇и гидтадтаанз уббаннасассан̃хи гидтанд̇и вуд̇д̇ам̣ гааран̣уубажаарзна. сиббияо суд̇д̇ияо. самб̣угаад̇и сан̇камааха.
60. Chaṭṭhe hatthiṃ sāretīti hatthisārī, tassa puttoti hatthisāriputto. So kira sāvatthiyaṃ hatthiācariyassa putto bhagavato santike pabbajitvā tīṇi piṭakāni uggahetvā sukhumesu khandhadhātuāyatanādīsu atthantaresu kusalo ahosi. Tena vuttaṃ – ‘‘therānaṃ bhikkhūnaṃ abhidhammakathaṃ kathentānaṃ antarantarā kathaṃ opātetī’’ti. Tattha antarantarā kathaṃ opātetīti therehi vuccamānassa kathāpabandhassa antare antare attano kathaṃ pavesetīti attho. Pañcahi saṃsaggehīti savanasaṃsaggo, dassanasaṃsaggo, samullāpasaṃsaggo, sambhogasaṃsaggo, kāyasaṃsaggoti imehi pañcahi saṃsaggehi. Kiṭṭhakhādakoti kiṭṭhaṭṭhāne uppannasassañhi kiṭṭhanti vuttaṃ kāraṇūpacārena. Sippiyo suttiyo. Sambukāti saṅkhamāha.
г̇ихибхаавз ван̣н̣ам̣ гат̇зсийд̇и (д̣̇ий. ни. адта. 1.422) гассабасаммаасамб̣уд̣̇д̇хасса гира саасанз д̣̇вз сахааяагаа ахзсум̣, ан̃н̃аман̃н̃ам̣ самаг̇г̇аа згад̇ова саж̇жхааяанд̇и. д̇зсу зго анабхирад̇о г̇ихибхаавз жид̇д̇ам̣ уббаад̣̇зд̇ваа ид̇арасса аарожзси. со г̇ихибхаавз аад̣̇ийнавам̣, баб̣б̣аж̇ж̇ааяа аанисам̣сам̣ д̣̇ассзд̇ваа овад̣̇и. со д̇ам̣ суд̇ваа абхирамид̇ваа буна згад̣̇ивасам̣ д̇аад̣̇исз жид̇д̇з уббаннз д̇ам̣ зд̇ад̣̇авожа – ‘‘маяхам̣, аавусо, зваруубам̣ жид̇д̇ам̣ уббаж̇ж̇ад̇и, имаахам̣ бад̇д̇ажийварам̣ д̇уяхам̣ д̣̇ассаамий’’д̇и. со бад̇д̇ажийваралобхзна д̇асса г̇ихибхаавз аанисам̣сам̣ д̣̇ассзд̇ваа баб̣б̣аж̇ж̇ааяа аад̣̇ийнавам̣ гат̇зси. д̇асса д̇ам̣ суд̇ваава г̇ихибхаавад̇о жид̇д̇ам̣ нивад̇д̇зд̇ваа баб̣б̣аж̇ж̇ааяамзва абхирами. звамзса д̇ад̣̇аа сийлаванд̇асса бхигкуно г̇ихибхаавз аанисам̣сагат̇ааяа гат̇ид̇ад̇д̇аа ид̣̇аани ча ваарз виб̣бхамид̇ваа сад̇д̇амаваарз баб̣б̣аж̇ид̇ваа махаамог̇г̇аллаанасса махаагодтигад̇т̇зрасса жа абхид̇хаммагат̇ам̣ гат̇знд̇аанам̣ анд̇аранд̇араа гат̇ам̣ обаад̇зси. ат̇а нам̣ махаагодтигад̇т̇зро абасаад̣̇зси. со махаасаавагасса гат̇ид̇з бад̇идтаад̇ум̣ асаггонд̇о виб̣бхамид̇ваа г̇ихи ж̇аад̇о. бодтабаад̣̇асса банааяам̣ г̇ихисахааяаго ахоси, д̇асмаа виб̣бхамид̇ваа д̣̇вийхад̇ийхажжаязна бодтабаад̣̇асса санд̇игам̣ г̇ад̇о. ат̇а нам̣ со д̣̇исваа – ‘‘самма, гим̣ д̇аяаа гад̇ам̣, зваруубасса наама сад̇т̇у саасанаа абасагганд̇оси, зхи баб̣б̣аж̇ид̇ум̣ д̣̇аани д̇з ваддад̇ий’’д̇и д̇ам̣ г̇ахзд̇ваа бхаг̇авад̇о санд̇игам̣ аг̇амааси. д̇асмим̣ таанз баб̣б̣аж̇ид̇ваа арахад̇д̇ам̣ баабун̣и. д̇зна вуд̇д̇ам̣ ‘‘сад̇д̇амз ваарз баб̣б̣аж̇ид̇ваа арахад̇д̇ам̣ баабун̣ий’’д̇и.
Gihibhāve vaṇṇaṃ kathesīti (dī. ni. aṭṭha. 1.422) kassapasammāsambuddhassa kira sāsane dve sahāyakā ahesuṃ, aññamaññaṃ samaggā ekatova sajjhāyanti. Tesu eko anabhirato gihibhāve cittaṃ uppādetvā itarassa ārocesi. So gihibhāve ādīnavaṃ, pabbajjāya ānisaṃsaṃ dassetvā ovadi. So taṃ sutvā abhiramitvā puna ekadivasaṃ tādise citte uppanne taṃ etadavoca – ‘‘mayhaṃ, āvuso, evarūpaṃ cittaṃ uppajjati, imāhaṃ pattacīvaraṃ tuyhaṃ dassāmī’’ti. So pattacīvaralobhena tassa gihibhāve ānisaṃsaṃ dassetvā pabbajjāya ādīnavaṃ kathesi. Tassa taṃ sutvāva gihibhāvato cittaṃ nivattetvā pabbajjāyameva abhirami. Evamesa tadā sīlavantassa bhikkhuno gihibhāve ānisaṃsakathāya kathitattā idāni cha vāre vibbhamitvā sattamavāre pabbajitvā mahāmoggallānassa mahākoṭṭhikattherassa ca abhidhammakathaṃ kathentānaṃ antarantarā kathaṃ opātesi. Atha naṃ mahākoṭṭhikatthero apasādesi. So mahāsāvakassa kathite patiṭṭhātuṃ asakkonto vibbhamitvā gihi jāto. Poṭṭhapādassa panāyaṃ gihisahāyako ahosi, tasmā vibbhamitvā dvīhatīhaccayena poṭṭhapādassa santikaṃ gato. Atha naṃ so disvā – ‘‘samma, kiṃ tayā kataṃ, evarūpassa nāma satthu sāsanā apasakkantosi, ehi pabbajituṃ dāni te vaṭṭatī’’ti taṃ gahetvā bhagavato santikaṃ agamāsi. Tasmiṃ ṭhāne pabbajitvā arahattaṃ pāpuṇi. Tena vuttaṃ ‘‘sattame vāre pabbajitvā arahattaṃ pāpuṇī’’ti.
хад̇т̇исаарибуд̇д̇асуд̇д̇аван̣н̣анаа нидтид̇аа.
Hatthisāriputtasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 6. хад̇т̇исаарибуд̇д̇асуд̇д̇ам̣ • 6. Hatthisāriputtasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) / 6. хад̇т̇исаарибуд̇д̇асуд̇д̇аван̣н̣анаа • 6. Hatthisāriputtasuttavaṇṇanā
