| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༦. ཧཏྠིསཱརིཔུཏྟསུཏྟཝཎྞནཱ
6. Hatthisāriputtasuttavaṇṇanā
༦༠. ཚཊྛེ ཧཏྠིཾ སཱརེཏཱིཏི ཧཏྠིསཱརཱི, ཏསྶ པུཏྟོཏི ཧཏྠིསཱརིཔུཏྟོ། སོ ཀིར སཱཝཏྠིཡཾ ཧཏྠིཨཱཙརིཡསྶ པུཏྟོ བྷགཝཏོ སནྟིཀེ པབྦཛིཏྭཱ ཏཱིཎི པིཊཀཱནི ཨུགྒཧེཏྭཱ སུཁུམེསུ ཁནྡྷདྷཱཏུཨཱཡཏནཱདཱིསུ ཨཏྠནྟརེསུ ཀུསལོ ཨཧོསི། ཏེན ཝུཏྟཾ – ‘‘ཐེརཱནཾ བྷིཀྑཱུནཾ ཨབྷིདྷམྨཀཐཾ ཀཐེནྟཱནཾ ཨནྟརནྟརཱ ཀཐཾ ཨོཔཱཏེཏཱི’’ཏི། ཏཏྠ ཨནྟརནྟརཱ ཀཐཾ ཨོཔཱཏེཏཱིཏི ཐེརེཧི ཝུཙྩམཱནསྶ ཀཐཱཔབནྡྷསྶ ཨནྟརེ ཨནྟརེ ཨཏྟནོ ཀཐཾ པཝེསེཏཱིཏི ཨཏྠོ། པཉྩཧི སཾསགྒེཧཱིཏི སཝནསཾསགྒོ, དསྶནསཾསགྒོ, སམུལླཱཔསཾསགྒོ, སམྦྷོགསཾསགྒོ, ཀཱཡསཾསགྒོཏི ཨིམེཧི པཉྩཧི སཾསགྒེཧི། ཀིཊྛཁཱདཀོཏི ཀིཊྛཊྛཱནེ ཨུཔྤནྣསསྶཉྷི ཀིཊྛནྟི ཝུཏྟཾ ཀཱརཎཱུཔཙཱརེན། སིཔྤིཡོ སུཏྟིཡོ། སམྦུཀཱཏི སངྑམཱཧ།
60. Chaṭṭhe hatthiṃ sāretīti hatthisārī, tassa puttoti hatthisāriputto. So kira sāvatthiyaṃ hatthiācariyassa putto bhagavato santike pabbajitvā tīṇi piṭakāni uggahetvā sukhumesu khandhadhātuāyatanādīsu atthantaresu kusalo ahosi. Tena vuttaṃ – ‘‘therānaṃ bhikkhūnaṃ abhidhammakathaṃ kathentānaṃ antarantarā kathaṃ opātetī’’ti. Tattha antarantarā kathaṃ opātetīti therehi vuccamānassa kathāpabandhassa antare antare attano kathaṃ pavesetīti attho. Pañcahi saṃsaggehīti savanasaṃsaggo, dassanasaṃsaggo, samullāpasaṃsaggo, sambhogasaṃsaggo, kāyasaṃsaggoti imehi pañcahi saṃsaggehi. Kiṭṭhakhādakoti kiṭṭhaṭṭhāne uppannasassañhi kiṭṭhanti vuttaṃ kāraṇūpacārena. Sippiyo suttiyo. Sambukāti saṅkhamāha.
གིཧིབྷཱཝེ ཝཎྞཾ ཀཐེསཱིཏི (དཱི॰ ནི॰ ཨཊྛ॰ ༡.༤༢༢) ཀསྶཔསམྨཱསམྦུདྡྷསྶ ཀིར སཱསནེ དྭེ སཧཱཡཀཱ ཨཧེསུཾ, ཨཉྙམཉྙཾ སམགྒཱ ཨེཀཏོཝ སཛ྄ཛྷཱཡནྟི། ཏེསུ ཨེཀོ ཨནབྷིརཏོ གིཧིབྷཱཝེ ཙིཏྟཾ ཨུཔྤཱདེཏྭཱ ཨིཏརསྶ ཨཱརོཙེསི། སོ གིཧིབྷཱཝེ ཨཱདཱིནཝཾ, པབྦཛྫཱཡ ཨཱནིསཾསཾ དསྶེཏྭཱ ཨོཝདི། སོ ཏཾ སུཏྭཱ ཨབྷིརམིཏྭཱ པུན ཨེཀདིཝསཾ ཏཱདིསེ ཙིཏྟེ ཨུཔྤནྣེ ཏཾ ཨེཏདཝོཙ – ‘‘མཡ྄ཧཾ, ཨཱཝུསོ, ཨེཝརཱུཔཾ ཙིཏྟཾ ཨུཔྤཛྫཏི, ཨིམཱཧཾ པཏྟཙཱིཝརཾ ཏུཡ྄ཧཾ དསྶཱམཱི’’ཏི། སོ པཏྟཙཱིཝརལོབྷེན ཏསྶ གིཧིབྷཱཝེ ཨཱནིསཾསཾ དསྶེཏྭཱ པབྦཛྫཱཡ ཨཱདཱིནཝཾ ཀཐེསི། ཏསྶ ཏཾ སུཏྭཱཝ གིཧིབྷཱཝཏོ ཙིཏྟཾ ནིཝཏྟེཏྭཱ པབྦཛྫཱཡམེཝ ཨབྷིརམི། ཨེཝམེས ཏདཱ སཱིལཝནྟསྶ བྷིཀྑུནོ གིཧིབྷཱཝེ ཨཱནིསཾསཀཐཱཡ ཀཐིཏཏྟཱ ཨིདཱནི ཚ ཝཱརེ ཝིབྦྷམིཏྭཱ སཏྟམཝཱརེ པབྦཛིཏྭཱ མཧཱམོགྒལླཱནསྶ མཧཱཀོཊྛིཀཏྠེརསྶ ཙ ཨབྷིདྷམྨཀཐཾ ཀཐེནྟཱནཾ ཨནྟརནྟརཱ ཀཐཾ ཨོཔཱཏེསི། ཨཐ ནཾ མཧཱཀོཊྛིཀཏྠེརོ ཨཔསཱདེསི། སོ མཧཱསཱཝཀསྶ ཀཐིཏེ པཏིཊྛཱཏུཾ ཨསཀྐོནྟོ ཝིབྦྷམིཏྭཱ གིཧི ཛཱཏོ། པོཊྛཔཱདསྶ པནཱཡཾ གིཧིསཧཱཡཀོ ཨཧོསི, ཏསྨཱ ཝིབྦྷམིཏྭཱ དྭཱིཧཏཱིཧཙྩཡེན པོཊྛཔཱདསྶ སནྟིཀཾ གཏོ། ཨཐ ནཾ སོ དིསྭཱ – ‘‘སམྨ, ཀིཾ ཏཡཱ ཀཏཾ, ཨེཝརཱུཔསྶ ནཱམ སཏྠུ སཱསནཱ ཨཔསཀྐནྟོསི, ཨེཧི པབྦཛིཏུཾ དཱནི ཏེ ཝཊྚཏཱི’’ཏི ཏཾ གཧེཏྭཱ བྷགཝཏོ སནྟིཀཾ ཨགམཱསི། ཏསྨིཾ ཋཱནེ པབྦཛིཏྭཱ ཨརཧཏྟཾ པཱཔུཎི། ཏེན ཝུཏྟཾ ‘‘སཏྟམེ ཝཱརེ པབྦཛིཏྭཱ ཨརཧཏྟཾ པཱཔུཎཱི’’ཏི།
Gihibhāve vaṇṇaṃ kathesīti (dī. ni. aṭṭha. 1.422) kassapasammāsambuddhassa kira sāsane dve sahāyakā ahesuṃ, aññamaññaṃ samaggā ekatova sajjhāyanti. Tesu eko anabhirato gihibhāve cittaṃ uppādetvā itarassa ārocesi. So gihibhāve ādīnavaṃ, pabbajjāya ānisaṃsaṃ dassetvā ovadi. So taṃ sutvā abhiramitvā puna ekadivasaṃ tādise citte uppanne taṃ etadavoca – ‘‘mayhaṃ, āvuso, evarūpaṃ cittaṃ uppajjati, imāhaṃ pattacīvaraṃ tuyhaṃ dassāmī’’ti. So pattacīvaralobhena tassa gihibhāve ānisaṃsaṃ dassetvā pabbajjāya ādīnavaṃ kathesi. Tassa taṃ sutvāva gihibhāvato cittaṃ nivattetvā pabbajjāyameva abhirami. Evamesa tadā sīlavantassa bhikkhuno gihibhāve ānisaṃsakathāya kathitattā idāni cha vāre vibbhamitvā sattamavāre pabbajitvā mahāmoggallānassa mahākoṭṭhikattherassa ca abhidhammakathaṃ kathentānaṃ antarantarā kathaṃ opātesi. Atha naṃ mahākoṭṭhikatthero apasādesi. So mahāsāvakassa kathite patiṭṭhātuṃ asakkonto vibbhamitvā gihi jāto. Poṭṭhapādassa panāyaṃ gihisahāyako ahosi, tasmā vibbhamitvā dvīhatīhaccayena poṭṭhapādassa santikaṃ gato. Atha naṃ so disvā – ‘‘samma, kiṃ tayā kataṃ, evarūpassa nāma satthu sāsanā apasakkantosi, ehi pabbajituṃ dāni te vaṭṭatī’’ti taṃ gahetvā bhagavato santikaṃ agamāsi. Tasmiṃ ṭhāne pabbajitvā arahattaṃ pāpuṇi. Tena vuttaṃ ‘‘sattame vāre pabbajitvā arahattaṃ pāpuṇī’’ti.
ཧཏྠིསཱརིཔུཏྟསུཏྟཝཎྞནཱ ནིཊྛིཏཱ།
Hatthisāriputtasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༦. ཧཏྠིསཱརིཔུཏྟསུཏྟཾ • 6. Hatthisāriputtasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༦. ཧཏྠིསཱརིཔུཏྟསུཏྟཝཎྞནཱ • 6. Hatthisāriputtasuttavaṇṇanā
