| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৭. হেতুসুত্তৰণ্ণনা
7. Hetusuttavaṇṇanā
২১২. উভযেনাতি হেতুপচ্চযপটিসেধৰচনেন। সংকিলেসপচ্চযন্তি সংকিলিসনস্স মলীনভাৰস্স কারণং। ৰিসুদ্ধিপচ্চযন্তি সংকিলেসতো ৰিসুদ্ধিযা ৰোদানস্স কারণং। নত্থি বলন্তি সত্তানং দিট্ঠধম্মিকসম্পরাযিকনিব্বানসম্পত্তিআৰহং বলং নাম কিঞ্চি নত্থি। তেনাহ ‘‘যম্হী’’তিআদি। নিদস্সনমত্তঞ্চেতং, সংকিলেসিকম্পি চাযং পটিক্খিপতেৰ। অঞ্ঞমঞ্ঞৰেৰচনানীতি তস্সা তস্সা কিরিযায উস্সন্নট্ঠেন বলং, সূরৰীরভাৰাৰহট্ঠেন ৰীরিযং, তমেৰ দল়্হগ্গাহভাৰতো পোরিসং ধুরং ৰহন্তেন পৰত্তেতব্বতো পুরিসথামো, পরং পরং ঠানং অক্কমনপ্পৰত্তিযা পুরিসপরক্কমোতি ৰুত্তোতি ৰেদিতব্বং।
212.Ubhayenāti hetupaccayapaṭisedhavacanena. Saṃkilesapaccayanti saṃkilisanassa malīnabhāvassa kāraṇaṃ. Visuddhipaccayanti saṃkilesato visuddhiyā vodānassa kāraṇaṃ. Natthi balanti sattānaṃ diṭṭhadhammikasamparāyikanibbānasampattiāvahaṃ balaṃ nāma kiñci natthi. Tenāha ‘‘yamhī’’tiādi. Nidassanamattañcetaṃ, saṃkilesikampi cāyaṃ paṭikkhipateva. Aññamaññavevacanānīti tassā tassā kiriyāya ussannaṭṭhena balaṃ, sūravīrabhāvāvahaṭṭhena vīriyaṃ, tameva daḷhaggāhabhāvato porisaṃ dhuraṃ vahantena pavattetabbato purisathāmo, paraṃ paraṃ ṭhānaṃ akkamanappavattiyā purisaparakkamoti vuttoti veditabbaṃ.
সত্ৰযোগতো, রূপাদীসু ৰা সত্ততায সত্তা, পাণনতো অস্সাসনপস্সাসনৰসেন পৰত্তিযা পাণা, তে পন সো একিন্দ্রিযাদিৰসেন ৰিভজিত্ৰা ৰদতীতি আহ ‘‘একিন্দ্রিযো’’তিআদি। অণ্ডকোসাদীসু ভৰনতো ভূতাতি ৰুচ্চন্তীতি আহ ‘‘অণ্ড…পে॰… ৰদন্তী’’তি। জীৰনতো পাণং ধারেন্তা ৰিয ৰড্ঢনতো জীৰাতি সালিযৰাদিকে ৰদন্তি। নত্থি এতেসং সংকিলেসৰিসুদ্ধীসু ৰসোতি অৰসা। নত্থি তেসং বলং ৰীরিযন্তি অবলা অৰীরিযা। নিযততাতি অচ্ছেজ্জসুত্তাৰুতাভেজ্জমণিনো ৰিয নিযতপ্পৰত্তিতায গতিজাতিবন্ধাপৰগ্গৰসেন নিযমো। তত্থ তত্থ গমনন্তি ছন্নং অভিজাতীনং ৰসেন তাসু তাসু গতীসু উপগমনং। সমৰাযেন সমাগমো সঙ্গতি। সভাৰোযেৰাতি যথা কণ্টকস্স তিক্খতা, কপিত্থফলানং পরিমণ্ডলতা , মিগপক্খীনং ৰিচিত্তাকারতা, এৰং সব্বস্সপি লোকস্স হেতুপচ্চযেহি ৰিনা তথা তথা পরিণামো, অযং সভাৰো এৰ অকিত্তিমো এৰ। তেনাহ ‘‘যেন হী’’তিআদি। ছল়ভিজাতিযো পরতো ৰিত্থারীযন্তি। সুখঞ্চ দুক্খঞ্চ পটিসংৰেদেন্তীতি ৰদন্তা অদুক্খমসুখভূভিং সব্বেন সব্বং ন জানন্তীতি উল্লিঙ্গেন্তো ‘‘অঞ্ঞা সুখদুক্খভূমি নত্থীতি দস্সেন্তী’’তি আহ।
Satvayogato, rūpādīsu vā sattatāya sattā, pāṇanato assāsanapassāsanavasena pavattiyā pāṇā, te pana so ekindriyādivasena vibhajitvā vadatīti āha ‘‘ekindriyo’’tiādi. Aṇḍakosādīsu bhavanato bhūtāti vuccantīti āha ‘‘aṇḍa…pe… vadantī’’ti. Jīvanato pāṇaṃ dhārentā viya vaḍḍhanato jīvāti sāliyavādike vadanti. Natthi etesaṃ saṃkilesavisuddhīsu vasoti avasā. Natthi tesaṃ balaṃ vīriyanti abalā avīriyā. Niyatatāti acchejjasuttāvutābhejjamaṇino viya niyatappavattitāya gatijātibandhāpavaggavasena niyamo. Tattha tattha gamananti channaṃ abhijātīnaṃ vasena tāsu tāsu gatīsu upagamanaṃ. Samavāyena samāgamo saṅgati. Sabhāvoyevāti yathā kaṇṭakassa tikkhatā, kapitthaphalānaṃ parimaṇḍalatā , migapakkhīnaṃ vicittākāratā, evaṃ sabbassapi lokassa hetupaccayehi vinā tathā tathā pariṇāmo, ayaṃ sabhāvo eva akittimo eva. Tenāha ‘‘yena hī’’tiādi. Chaḷabhijātiyo parato vitthārīyanti. Sukhañca dukkhañca paṭisaṃvedentīti vadantā adukkhamasukhabhūbhiṃ sabbena sabbaṃ na jānantīti ulliṅgento ‘‘aññā sukhadukkhabhūmi natthīti dassentī’’ti āha.
হেতুসুত্তৰণ্ণনা নিট্ঠিতা।
Hetusuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৭. হেতুসুত্তং • 7. Hetusuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৭. হেতুসুত্তৰণ্ণনা • 7. Hetusuttavaṇṇanā
