Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā

    9. ஹேவத்தி²கதா²வண்ணனா

    9. Hevatthikathāvaṇṇanā

    304. இதா³னி ஹேவத்தி²கதா² நாம ஹோதி. தத்த² யேஸங் ‘‘ஸப்³பே³பி அதீதாதி³பே⁴தா³ த⁴ம்மா ரூபாதி³வஸேன அத்தி², அதீதங் அனாக³தபச்சுப்பன்னவஸேன, அனாக³தபச்சுப்பன்னானி வா அதீதாதி³வஸேன நத்தி²; தஸ்மா ஸப்³ப³மேவித³ங் ஏவங் அத்தி² ஏவங் நத்தீ²’’தி லத்³தி⁴, ஸெய்யதா²பி ஏதரஹி வுத்தப்பபே⁴தா³னங் அந்த⁴கானங்; தே ஸந்தா⁴ய அதீதங் அத்தீ²தி புச்சா² ஸகவாதி³ஸ்ஸ. ஹேவத்தி² ஹேவ நத்தீ²தி விஸ்ஸஜ்ஜனங் பரவாதி³ஸ்ஸ. தத்த² ஹேவாதி ஏவங் . அத² நங் ஸகவாதீ³ ‘‘யதி³ அதீதோவ ஏவங் அத்தி², ஏவங் நத்தீ²தி லத்³தி⁴, ஏவங் ஸந்தே ஸோயேவ அத்தி², ஸோயேவ நத்தி² நாமா’’தி புச்ச²ந்தோ ஸேவத்தி², ஸேவ நத்தீ²தி ஆஹ. இதரோ தேனேவ ஸபா⁴வேன அத்தி²தங், தேனேவ நத்தி²தங் ஸந்தா⁴ய படிக்கி²பதி. து³தியங் புட்டோ² ஸகபா⁴வேனேவ அத்தி²தங், பரபா⁴வேனேவ நத்தி²தங் ஸந்தா⁴ய படிஜானாதி. ததோ பரங் அத்த²ட்டோ² நத்த²ட்டோ²தி அத்தி²ஸபா⁴வோ நத்தி²ஸபா⁴வோ நாம ஹோதீதி புச்ச²தி. இமினாவுபாயேன ஸப்³ப³வாரேஸு அத்தோ² வேதி³தப்³போ³. பரியோஸானே பன ‘‘தேன ஹி அதீதங் ஹேவத்தி², ஹேவ நத்தீ²’’தி ச ‘‘தேன ஹி ரூபங் ஹேவத்தி², ஹேவ நத்தீ²’’தி சாதிஆதீ³னி வத்வா கிஞ்சாபி பரவாதி³னா லத்³தி⁴ பதிட்டா²பிதா, அயோனிஸோ பதிட்டா²பிதத்தா பனேஸா அப்பதிட்டா²பிதாயேவாதி.

    304. Idāni hevatthikathā nāma hoti. Tattha yesaṃ ‘‘sabbepi atītādibhedā dhammā rūpādivasena atthi, atītaṃ anāgatapaccuppannavasena, anāgatapaccuppannāni vā atītādivasena natthi; tasmā sabbamevidaṃ evaṃ atthi evaṃ natthī’’ti laddhi, seyyathāpi etarahi vuttappabhedānaṃ andhakānaṃ; te sandhāya atītaṃ atthīti pucchā sakavādissa. Hevatthi heva natthīti vissajjanaṃ paravādissa. Tattha hevāti evaṃ . Atha naṃ sakavādī ‘‘yadi atītova evaṃ atthi, evaṃ natthīti laddhi, evaṃ sante soyeva atthi, soyeva natthi nāmā’’ti pucchanto sevatthi, seva natthīti āha. Itaro teneva sabhāvena atthitaṃ, teneva natthitaṃ sandhāya paṭikkhipati. Dutiyaṃ puṭṭho sakabhāveneva atthitaṃ, parabhāveneva natthitaṃ sandhāya paṭijānāti. Tato paraṃ atthaṭṭho natthaṭṭhoti atthisabhāvo natthisabhāvo nāma hotīti pucchati. Imināvupāyena sabbavāresu attho veditabbo. Pariyosāne pana ‘‘tena hi atītaṃ hevatthi, heva natthī’’ti ca ‘‘tena hi rūpaṃ hevatthi, heva natthī’’ti cātiādīni vatvā kiñcāpi paravādinā laddhi patiṭṭhāpitā, ayoniso patiṭṭhāpitattā panesā appatiṭṭhāpitāyevāti.

    ஹேவத்தி²கதா²வண்ணனா.

    Hevatthikathāvaṇṇanā.

    மஹாவக்³கோ³ நிட்டி²தோ.

    Mahāvaggo niṭṭhito.







    Related texts:



    திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / 9. ஹேவத்தி²கதா² • 9. Hevatthikathā

    டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 9. ஹேவத்தி²கதா²வண்ணனா • 9. Hevatthikathāvaṇṇanā

    டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 9. ஹேவத்தி²கதா²வண்ணனா • 9. Hevatthikathāvaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact