| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৯. হেৰত্থিকথাৰণ্ণনা
9. Hevatthikathāvaṇṇanā
৩০৪. ইদানি হেৰত্থিকথা নাম হোতি। তত্থ যেসং ‘‘সব্বেপি অতীতাদিভেদা ধম্মা রূপাদিৰসেন অত্থি, অতীতং অনাগতপচ্চুপ্পন্নৰসেন, অনাগতপচ্চুপ্পন্নানি ৰা অতীতাদিৰসেন নত্থি; তস্মা সব্বমেৰিদং এৰং অত্থি এৰং নত্থী’’তি লদ্ধি, সেয্যথাপি এতরহি ৰুত্তপ্পভেদানং অন্ধকানং; তে সন্ধায অতীতং অত্থীতি পুচ্ছা সকৰাদিস্স। হেৰত্থি হেৰ নত্থীতি ৰিস্সজ্জনং পরৰাদিস্স। তত্থ হেৰাতি এৰং । অথ নং সকৰাদী ‘‘যদি অতীতোৰ এৰং অত্থি, এৰং নত্থীতি লদ্ধি, এৰং সন্তে সোযেৰ অত্থি, সোযেৰ নত্থি নামা’’তি পুচ্ছন্তো সেৰত্থি, সেৰ নত্থীতি আহ। ইতরো তেনেৰ সভাৰেন অত্থিতং, তেনেৰ নত্থিতং সন্ধায পটিক্খিপতি। দুতিযং পুট্ঠো সকভাৰেনেৰ অত্থিতং, পরভাৰেনেৰ নত্থিতং সন্ধায পটিজানাতি। ততো পরং অত্থট্ঠো নত্থট্ঠোতি অত্থিসভাৰো নত্থিসভাৰো নাম হোতীতি পুচ্ছতি। ইমিনাৰুপাযেন সব্বৰারেসু অত্থো ৰেদিতব্বো। পরিযোসানে পন ‘‘তেন হি অতীতং হেৰত্থি, হেৰ নত্থী’’তি চ ‘‘তেন হি রূপং হেৰত্থি, হেৰ নত্থী’’তি চাতিআদীনি ৰত্ৰা কিঞ্চাপি পরৰাদিনা লদ্ধি পতিট্ঠাপিতা, অযোনিসো পতিট্ঠাপিতত্তা পনেসা অপ্পতিট্ঠাপিতাযেৰাতি।
304. Idāni hevatthikathā nāma hoti. Tattha yesaṃ ‘‘sabbepi atītādibhedā dhammā rūpādivasena atthi, atītaṃ anāgatapaccuppannavasena, anāgatapaccuppannāni vā atītādivasena natthi; tasmā sabbamevidaṃ evaṃ atthi evaṃ natthī’’ti laddhi, seyyathāpi etarahi vuttappabhedānaṃ andhakānaṃ; te sandhāya atītaṃ atthīti pucchā sakavādissa. Hevatthi heva natthīti vissajjanaṃ paravādissa. Tattha hevāti evaṃ . Atha naṃ sakavādī ‘‘yadi atītova evaṃ atthi, evaṃ natthīti laddhi, evaṃ sante soyeva atthi, soyeva natthi nāmā’’ti pucchanto sevatthi, seva natthīti āha. Itaro teneva sabhāvena atthitaṃ, teneva natthitaṃ sandhāya paṭikkhipati. Dutiyaṃ puṭṭho sakabhāveneva atthitaṃ, parabhāveneva natthitaṃ sandhāya paṭijānāti. Tato paraṃ atthaṭṭho natthaṭṭhoti atthisabhāvo natthisabhāvo nāma hotīti pucchati. Imināvupāyena sabbavāresu attho veditabbo. Pariyosāne pana ‘‘tena hi atītaṃ hevatthi, heva natthī’’ti ca ‘‘tena hi rūpaṃ hevatthi, heva natthī’’ti cātiādīni vatvā kiñcāpi paravādinā laddhi patiṭṭhāpitā, ayoniso patiṭṭhāpitattā panesā appatiṭṭhāpitāyevāti.
হেৰত্থিকথাৰণ্ণনা।
Hevatthikathāvaṇṇanā.
মহাৰগ্গো নিট্ঠিতো।
Mahāvaggo niṭṭhito.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / ৯. হেৰত্থিকথা • 9. Hevatthikathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৯. হেৰত্থিকথাৰণ্ণনা • 9. Hevatthikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৯. হেৰত্থিকথাৰণ্ণনা • 9. Hevatthikathāvaṇṇanā
