| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. பொ³ஜ்ஜ²ங்க³ஸங்யுத்தங்
2. Bojjhaṅgasaṃyuttaṃ
1. பப்³ப³தவக்³கோ³
1. Pabbatavaggo
1. ஹிமவந்தஸுத்தங்
1. Himavantasuttaṃ
182. ஸாவத்தி²னிதா³னங் . ‘‘ஸெய்யதா²பி, பி⁴க்க²வே, ஹிமவந்தங் பப்³ப³தராஜானங் நிஸ்ஸாய நாகா³ காயங் வட்³டெ⁴ந்தி, ப³லங் கா³ஹெந்தி; தே தத்த² காயங் வட்³டெ⁴த்வா ப³லங் கா³ஹெத்வா குஸொப்³பே⁴ ஓதரந்தி, குஸொப்³பே⁴ ஓதரித்வா மஹாஸொப்³பே⁴ ஓதரந்தி, மஹாஸொப்³பே⁴ ஓதரித்வா குன்னதி³யோ ஓதரந்தி, குன்னதி³யோ ஓதரித்வா மஹானதி³யோ ஓதரந்தி, மஹானதி³யோ ஓதரித்வா மஹாஸமுத்³த³ஸாக³ரங் ஓதரந்தி; தே தத்த² மஹந்தத்தங் வேபுல்லத்தங் ஆபஜ்ஜந்தி காயேன; ஏவமேவ கோ², பி⁴க்க²வே, பி⁴க்கு² ஸீலங் நிஸ்ஸாய ஸீலே பதிட்டா²ய ஸத்த பொ³ஜ்ஜ²ங்கே³ பா⁴வெந்தோ ஸத்த பொ³ஜ்ஜ²ங்கே³ ப³ஹுலீகரொந்தோ மஹந்தத்தங் வேபுல்லத்தங் பாபுணாதி த⁴ம்மேஸு. கத²ஞ்ச, பி⁴க்க²வே, பி⁴க்கு² ஸீலங் நிஸ்ஸாய ஸீலே பதிட்டா²ய ஸத்த பொ³ஜ்ஜ²ங்கே³ பா⁴வெந்தோ ஸத்த பொ³ஜ்ஜ²ங்கே³ ப³ஹுலீகரொந்தோ மஹந்தத்தங் வேபுல்லத்தங் பாபுணாதி த⁴ம்மேஸூதி? இத⁴, பி⁴க்க²வே, பி⁴க்கு² ஸதிஸம்பொ³ஜ்ஜ²ங்க³ங் பா⁴வேதி விவேகனிஸ்ஸிதங் விராக³னிஸ்ஸிதங் நிரோத⁴னிஸ்ஸிதங் வொஸ்ஸக்³க³பரிணாமிங்; த⁴ம்மவிசயஸம்பொ³ஜ்ஜ²ங்க³ங் பா⁴வேதி…பே॰… வீரியஸம்பொ³ஜ்ஜ²ங்க³ங் பா⁴வேதி…பே॰… பீதிஸம்பொ³ஜ்ஜ²ங்க³ங் பா⁴வேதி…பே॰… பஸ்ஸத்³தி⁴ஸம்பொ³ஜ்ஜ²ங்க³ங் பா⁴வேதி…பே॰… ஸமாதி⁴ஸம்பொ³ஜ்ஜ²ங்க³ங் பா⁴வேதி…பே॰… உபெக்கா²ஸம்பொ³ஜ்ஜ²ங்க³ங் பா⁴வேதி விவேகனிஸ்ஸிதங் விராக³னிஸ்ஸிதங் நிரோத⁴னிஸ்ஸிதங் வொஸ்ஸக்³க³பரிணாமிங். ஏவங் கோ², பி⁴க்க²வே, பி⁴க்கு² ஸீலங் நிஸ்ஸாய ஸீலே பதிட்டா²ய ஸத்த பொ³ஜ்ஜ²ங்கே³ பா⁴வெந்தோ ஸத்த பொ³ஜ்ஜ²ங்கே³ ப³ஹுலீகரொந்தோ மஹந்தத்தங் வேபுல்லத்தங் பாபுணாதி த⁴ம்மேஸூ’’தி. பட²மங்.
182. Sāvatthinidānaṃ . ‘‘Seyyathāpi, bhikkhave, himavantaṃ pabbatarājānaṃ nissāya nāgā kāyaṃ vaḍḍhenti, balaṃ gāhenti; te tattha kāyaṃ vaḍḍhetvā balaṃ gāhetvā kusobbhe otaranti, kusobbhe otaritvā mahāsobbhe otaranti, mahāsobbhe otaritvā kunnadiyo otaranti, kunnadiyo otaritvā mahānadiyo otaranti, mahānadiyo otaritvā mahāsamuddasāgaraṃ otaranti; te tattha mahantattaṃ vepullattaṃ āpajjanti kāyena; evameva kho, bhikkhave, bhikkhu sīlaṃ nissāya sīle patiṭṭhāya satta bojjhaṅge bhāvento satta bojjhaṅge bahulīkaronto mahantattaṃ vepullattaṃ pāpuṇāti dhammesu. Kathañca, bhikkhave, bhikkhu sīlaṃ nissāya sīle patiṭṭhāya satta bojjhaṅge bhāvento satta bojjhaṅge bahulīkaronto mahantattaṃ vepullattaṃ pāpuṇāti dhammesūti? Idha, bhikkhave, bhikkhu satisambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ; dhammavicayasambojjhaṅgaṃ bhāveti…pe… vīriyasambojjhaṅgaṃ bhāveti…pe… pītisambojjhaṅgaṃ bhāveti…pe… passaddhisambojjhaṅgaṃ bhāveti…pe… samādhisambojjhaṅgaṃ bhāveti…pe… upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Evaṃ kho, bhikkhave, bhikkhu sīlaṃ nissāya sīle patiṭṭhāya satta bojjhaṅge bhāvento satta bojjhaṅge bahulīkaronto mahantattaṃ vepullattaṃ pāpuṇāti dhammesū’’ti. Paṭhamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1. ஹிமவந்தஸுத்தவண்ணனா • 1. Himavantasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1.ஹிமவந்தஸுத்தவண்ணனா • 1.Himavantasuttavaṇṇanā
