| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. பொ³ஜ்ஜ²ங்க³ஸங்யுத்தங்
2. Bojjhaṅgasaṃyuttaṃ
1. பப்³ப³தவக்³கோ³
1. Pabbatavaggo
1. ஹிமவந்தஸுத்தவண்ணனா
1. Himavantasuttavaṇṇanā
182. பொ³ஜ்ஜ²ங்க³ஸங்யுத்தஸ்ஸ பட²மே நாகா³தி இமேபி மஹாஸமுத்³த³பிட்டே² ஊமிஅந்தரவாஸினோவ, ந விமானட்ட²கனாகா³. தேஸங் ஹிமவந்தங் நிஸ்ஸாய காயவட்³ட⁴னாதி³ஸப்³ப³ங் ஹெட்டா² வுத்தனயேனேவ வேதி³தப்³ப³ங். பொ³ஜ்ஜ²ங்கே³தி எத்த² போ³தி⁴யா, போ³தி⁴ஸ்ஸ வா அங்கா³தி பொ³ஜ்ஜ²ங்கா³. கிங் வுத்தங் ஹோதி? யா ஹி அயங் த⁴ம்மஸாமக்³கீ³, யாய லோகியலோகுத்தரமக்³க³க்க²ணே உப்பஜ்ஜமானாய லீனுத்³த⁴ச்சபதிட்டா²னாயூஹன காமஸுக²த்தகிலமதா²னுயோக³உச்சே²த³ஸஸ்ஸதாபி⁴னிவேஸாதீ³னங் அனேகேஸங் உபத்³த³வானங் படிபக்க²பூ⁴தாய ஸதித⁴ம்மவிசயவீரியபீதிபஸ்ஸத்³தி⁴ஸமாதி⁴உபெக்கா²ஸங்கா²தாய த⁴ம்மஸாமக்³கி³யா அரியஸாவகோ பு³ஜ்ஜ²தீதி கத்வா போ³தீ⁴தி வுச்சதி. பு³ஜ்ஜ²தீதி கிலேஸஸந்தானநித்³தா³ய உட்ட²ஹதி, சத்தாரி வா அரியஸச்சானி படிவிஜ்ஜ²தி, நிப்³பா³னமேவ வா ஸச்சி²கரோதீதி வுத்தங் ஹோதி. யதா²ஹ ‘‘ஸத்த பொ³ஜ்ஜ²ங்கே³ பா⁴வெத்வா அனுத்தரங் ஸம்மாஸம்போ³தி⁴ங் அபி⁴ஸம்பு³த்³தோ⁴’’தி (ஸங்॰ நி॰ 5.378; தீ³॰ நி॰ 3.143). தஸ்ஸா த⁴ம்மஸாமக்³கி³ஸங்கா²தாய போ³தி⁴யா அங்கா³தி பொ³ஜ்ஜ²ங்கா³ ஜா²னங்க³மக்³க³ங்கா³த³யோ விய. யோபேஸ யதா²வுத்தப்பகாராய ஏதாய த⁴ம்மஸாமக்³கி³யா பு³ஜ்ஜ²தீதி கத்வா அரியஸாவகோ போ³தீ⁴தி வுச்சதி, தஸ்ஸ போ³தி⁴ஸ்ஸ அங்கா³திபி பொ³ஜ்ஜ²ங்கா³ ஸேனங்க³ரத²ங்கா³த³யோ விய. தேனாஹு அட்ட²கதா²சரியா – ‘‘பு³ஜ்ஜ²னகஸ்ஸ புக்³க³லஸ்ஸ அங்கா³தி வா பொ³ஜ்ஜ²ங்கா³’’தி.
182. Bojjhaṅgasaṃyuttassa paṭhame nāgāti imepi mahāsamuddapiṭṭhe ūmiantaravāsinova, na vimānaṭṭhakanāgā. Tesaṃ himavantaṃ nissāya kāyavaḍḍhanādisabbaṃ heṭṭhā vuttanayeneva veditabbaṃ. Bojjhaṅgeti ettha bodhiyā, bodhissa vā aṅgāti bojjhaṅgā. Kiṃ vuttaṃ hoti? Yā hi ayaṃ dhammasāmaggī, yāya lokiyalokuttaramaggakkhaṇe uppajjamānāya līnuddhaccapatiṭṭhānāyūhana kāmasukhattakilamathānuyogaucchedasassatābhinivesādīnaṃ anekesaṃ upaddavānaṃ paṭipakkhabhūtāya satidhammavicayavīriyapītipassaddhisamādhiupekkhāsaṅkhātāya dhammasāmaggiyā ariyasāvako bujjhatīti katvā bodhīti vuccati. Bujjhatīti kilesasantānaniddāya uṭṭhahati, cattāri vā ariyasaccāni paṭivijjhati, nibbānameva vā sacchikarotīti vuttaṃ hoti. Yathāha ‘‘satta bojjhaṅge bhāvetvā anuttaraṃ sammāsambodhiṃ abhisambuddho’’ti (saṃ. ni. 5.378; dī. ni. 3.143). Tassā dhammasāmaggisaṅkhātāya bodhiyā aṅgāti bojjhaṅgā jhānaṅgamaggaṅgādayo viya. Yopesa yathāvuttappakārāya etāya dhammasāmaggiyā bujjhatīti katvā ariyasāvako bodhīti vuccati, tassa bodhissa aṅgātipi bojjhaṅgā senaṅgarathaṅgādayo viya. Tenāhu aṭṭhakathācariyā – ‘‘bujjhanakassa puggalassa aṅgāti vā bojjhaṅgā’’ti.
அபிச ‘‘பொ³ஜ்ஜ²ங்கா³தி கேனட்டே²ன பொ³ஜ்ஜ²ங்கா³? போ³தா⁴ய ஸங்வத்தந்தீதி பொ³ஜ்ஜ²ங்கா³, பு³ஜ்ஜ²ந்தீதி பொ³ஜ்ஜ²ங்கா³, அனுபு³ஜ்ஜ²ந்தீதி பொ³ஜ்ஜ²ங்கா³, படிபு³ஜ்ஜ²ந்தீதி பொ³ஜ்ஜ²ங்கா³, ஸம்பு³ஜ்ஜ²ந்தீதி பொ³ஜ்ஜ²ங்கா³’’இச்சாதி³னா (படி॰ ம॰ 2.17) படிஸம்பி⁴தா³னயேனாபி பொ³ஜ்ஜ²ங்க³த்தோ² வேதி³தப்³போ³.
Apica ‘‘bojjhaṅgāti kenaṭṭhena bojjhaṅgā? Bodhāya saṃvattantīti bojjhaṅgā, bujjhantīti bojjhaṅgā, anubujjhantīti bojjhaṅgā, paṭibujjhantīti bojjhaṅgā, sambujjhantīti bojjhaṅgā’’iccādinā (paṭi. ma. 2.17) paṭisambhidānayenāpi bojjhaṅgattho veditabbo.
ஸதிஸம்பொ³ஜ்ஜ²ங்க³ந்திஆதீ³ஸு பன பஸத்தோ² ஸுந்த³ரோ ச பொ³ஜ்ஜ²ங்கோ³தி ஸம்பொ³ஜ்ஜ²ங்கோ³. ஸதியேவ ஸம்பொ³ஜ்ஜ²ங்கோ³தி ஸதிஸம்பொ³ஜ்ஜ²ங்கோ³, தங் ஸதிஸம்பொ³ஜ்ஜ²ங்க³ந்தி ஏவங் ஸப்³ப³த்த² அத்தோ² வேதி³தப்³போ³. பா⁴வேதீதி வட்³டே⁴தி, அத்தனோ சித்தஸந்தானே புனப்புனங் ஜனேதி, அபி⁴னிப்³ப³த்தேதீதி அத்தோ². விவேகனிஸ்ஸிதந்திஆதீ³னி கோஸலஸங்யுத்தே ‘‘ஸம்மாதி³ட்டி²ங் பா⁴வேதி விவேகனிஸ்ஸித’’ந்தி எத்த² வுத்தனயேனேவ வேதி³தப்³பா³னி.
Satisambojjhaṅgantiādīsu pana pasattho sundaro ca bojjhaṅgoti sambojjhaṅgo. Satiyeva sambojjhaṅgoti satisambojjhaṅgo, taṃ satisambojjhaṅganti evaṃ sabbattha attho veditabbo. Bhāvetīti vaḍḍheti, attano cittasantāne punappunaṃ janeti, abhinibbattetīti attho. Vivekanissitantiādīni kosalasaṃyutte ‘‘sammādiṭṭhiṃ bhāveti vivekanissita’’nti ettha vuttanayeneva veditabbāni.
அயங் பன விஸேஸோ – தத்த² தத³ங்க³விவேகனிஸ்ஸிதங், ஸமுச்சே²த³விவேகனிஸ்ஸிதங், நிஸ்ஸரணவிவேகனிஸ்ஸிதந்தி, விவேகத்தயமேவ வுத்தங், பொ³ஜ்ஜ²ங்க³பா⁴வனங் பத்வா பன பஞ்சவித⁴விவேகனிஸ்ஸிதம்பி ஏகே வண்ணயந்தி. தே ஹி ந கேவலங் ப³லவவிபஸ்ஸனாமக்³க³ப²லக்க²ணேஸு ஏவ பொ³ஜ்ஜ²ங்கே³ உத்³த⁴ரந்தி விபஸ்ஸனாபாத³க-கஸிணஜ்ஜா²ன-ஆனாபானாஸுப⁴-ப்³ரஹ்மவிஹாரஜ்ஜா²னேஸுபி உத்³த⁴ரந்தி, ந ச படிஸித்³தா⁴ அட்ட²கதா²சரியேஹி. தஸ்மா தேஸங் மதேன ஏதேஸங் ஜா²னானங் பவத்திக்க²ணே கிச்சதோ ஏவ விக்க²ம்ப⁴னவிவேகனிஸ்ஸிதங். யதா² ச விபஸ்ஸனாக்க²ணே ‘‘அஜ்ஜா²ஸயதோ நிஸ்ஸரணவிவேகனிஸ்ஸித’’ந்தி வுத்தங், ஏவங் படிபஸ்ஸத்³தி⁴விவேகனிஸ்ஸிதம்பி பா⁴வேதீதி வத்துங் வட்டதி. ஸேஸமெத்த² ஹெட்டா² வுத்தனயமேவ.
Ayaṃ pana viseso – tattha tadaṅgavivekanissitaṃ, samucchedavivekanissitaṃ, nissaraṇavivekanissitanti, vivekattayameva vuttaṃ, bojjhaṅgabhāvanaṃ patvā pana pañcavidhavivekanissitampi eke vaṇṇayanti. Te hi na kevalaṃ balavavipassanāmaggaphalakkhaṇesu eva bojjhaṅge uddharanti vipassanāpādaka-kasiṇajjhāna-ānāpānāsubha-brahmavihārajjhānesupi uddharanti, na ca paṭisiddhā aṭṭhakathācariyehi. Tasmā tesaṃ matena etesaṃ jhānānaṃ pavattikkhaṇe kiccato eva vikkhambhanavivekanissitaṃ. Yathā ca vipassanākkhaṇe ‘‘ajjhāsayato nissaraṇavivekanissita’’nti vuttaṃ, evaṃ paṭipassaddhivivekanissitampi bhāvetīti vattuṃ vaṭṭati. Sesamettha heṭṭhā vuttanayameva.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. ஹிமவந்தஸுத்தங் • 1. Himavantasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1.ஹிமவந்தஸுத்தவண்ணனா • 1.Himavantasuttavaṇṇanā
