| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๔. หิมวนฺตสุตฺตวณฺณนา
4. Himavantasuttavaṇṇanā
๒๔. จตุเตฺถ ปทาเลยฺยาติ ภิเนฺทยฺยฯ ฉวายาติ ลามิกายฯ สมาธิสฺส สมาปตฺติกุสโล โหตีติ อาหารสปฺปายอุตุสปฺปายานิ ปริคฺคเหตฺวา สมาธิํ สมาปชฺชิตุํ กุสโล โหติ เฉโก สมโตฺถ ปฎิพโลฯ สมาธิสฺส ฐิติกุสโลติ สมาธิสฺส ฐิติยํ กุสโล, สมาธิํ ฐเปตุํ สโกฺกตีติ อโตฺถฯ สมาธิสฺส วุฎฺฐานกุสโลติ สมาธิสฺส วุฎฺฐาเน กุสโล, ยถาปริเจฺฉเทน วุฎฺฐาตุํ สโกฺกตีติ อโตฺถฯ สมาธิสฺส กลฺลิตกุสโลติ สมาธิสฺส กลฺลตาย กุสโล, สมาธิจิตฺตํ หาเสตุํ กลฺลํ กาตุํ สโกฺกตีติ อโตฺถฯ สมาธิสฺส โคจรกุสโลติ สมาธิสฺส อสปฺปาเย อนุปการเก ธเมฺม วเชฺชตฺวา สปฺปาเย อุปการเก เสวโนฺตปิ, ‘‘อยํ สมาธินิมิตฺตารมฺมโณ อยํ ลกฺขณารมฺมโณ’’ติ ชานโนฺตปิ สมาธิสฺส โคจรกุสโล นาม โหติฯ สมาธิสฺส อภินีหารกุสโลติ อุปริอุปริสมาปตฺติสมาปชฺชนตฺถาย ปฐมชฺฌานาทิสมาธิํ อภินีหริตุํ สโกฺกโนฺต สมาธิสฺส อภินีหารกุสโล นาม โหติฯ โส ปฐมชฺฌานา วุฎฺฐาย ทุติยํ สมาปชฺชติ, ทุติยชฺฌานา…เป.… ตติยชฺฌานา วุฎฺฐาย จตุตฺถํ สมาปชฺชตีติฯ
24. Catutthe padāleyyāti bhindeyya. Chavāyāti lāmikāya. Samādhissa samāpattikusalo hotīti āhārasappāyautusappāyāni pariggahetvā samādhiṃ samāpajjituṃ kusalo hoti cheko samattho paṭibalo. Samādhissa ṭhitikusaloti samādhissa ṭhitiyaṃ kusalo, samādhiṃ ṭhapetuṃ sakkotīti attho. Samādhissa vuṭṭhānakusaloti samādhissa vuṭṭhāne kusalo, yathāparicchedena vuṭṭhātuṃ sakkotīti attho. Samādhissa kallitakusaloti samādhissa kallatāya kusalo, samādhicittaṃ hāsetuṃ kallaṃ kātuṃ sakkotīti attho. Samādhissa gocarakusaloti samādhissa asappāye anupakārake dhamme vajjetvā sappāye upakārake sevantopi, ‘‘ayaṃ samādhinimittārammaṇo ayaṃ lakkhaṇārammaṇo’’ti jānantopi samādhissa gocarakusalo nāma hoti. Samādhissa abhinīhārakusaloti upariuparisamāpattisamāpajjanatthāya paṭhamajjhānādisamādhiṃ abhinīharituṃ sakkonto samādhissa abhinīhārakusalo nāma hoti. So paṭhamajjhānā vuṭṭhāya dutiyaṃ samāpajjati, dutiyajjhānā…pe… tatiyajjhānā vuṭṭhāya catutthaṃ samāpajjatīti.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๔. หิมวนฺตสุตฺตํ • 4. Himavantasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๔. หิมวนฺตสุตฺตวณฺณนา • 4. Himavantasuttavaṇṇanā
