| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
4. හිමවන්‌තසුත්‌තවණ්‌ණනා
4. Himavantasuttavaṇṇanā
24. චතුත්‌ථෙ පදාලෙය්‍යාති භින්‌දෙය්‍ය. ඡවායාති ලාමිකාය. සමාධිස්‌ස සමාපත්‌තිකුසලො හොතීති ආහාරසප්‌පායඋතුසප්‌පායානි පරිග්‌ගහෙත්‌වා සමාධිං සමාපජ්‌ජිතුං කුසලො හොති ඡෙකො සමත්‌ථො පටිබලො. සමාධිස්‌ස ඨිතිකුසලොති සමාධිස්‌ස ඨිතියං කුසලො, සමාධිං ඨපෙතුං සක්‌කොතීති අත්‌ථො. සමාධිස්‌ස වුට්‌ඨානකුසලොති සමාධිස්‌ස වුට්‌ඨානෙ කුසලො, යථාපරිච්‌ඡෙදෙන වුට්‌ඨාතුං සක්‌කොතීති අත්‌ථො. සමාධිස්‌ස කල්‌ලිතකුසලොති සමාධිස්‌ස කල්‌ලතාය කුසලො, සමාධිචිත්‌තං හාසෙතුං කල්‌ලං කාතුං සක්‌කොතීති අත්‌ථො. සමාධිස්‌ස ගොචරකුසලොති සමාධිස්‌ස අසප්‌පායෙ අනුපකාරකෙ ධම්‌මෙ වජ්‌ජෙත්‌වා සප්‌පායෙ උපකාරකෙ සෙවන්‌තොපි, ‘‘අයං සමාධිනිමිත්‌තාරම්‌මණො අයං ලක්‌ඛණාරම්‌මණො’’ති ජානන්‌තොපි සමාධිස්‌ස ගොචරකුසලො නාම හොති. සමාධිස්‌ස අභිනීහාරකුසලොති උපරිඋපරිසමාපත්‌තිසමාපජ්‌ජනත්‌ථාය පඨමජ්‌ඣානාදිසමාධිං අභිනීහරිතුං සක්‌කොන්‌තො සමාධිස්‌ස අභිනීහාරකුසලො නාම හොති. සො පඨමජ්‌ඣානා වුට්‌ඨාය දුතියං සමාපජ්‌ජති, දුතියජ්‌ඣානා…පෙ.… තතියජ්‌ඣානා වුට්‌ඨාය චතුත්‌ථං සමාපජ්‌ජතීති.
24. Catutthe padāleyyāti bhindeyya. Chavāyāti lāmikāya. Samādhissa samāpattikusalo hotīti āhārasappāyautusappāyāni pariggahetvā samādhiṃ samāpajjituṃ kusalo hoti cheko samattho paṭibalo. Samādhissa ṭhitikusaloti samādhissa ṭhitiyaṃ kusalo, samādhiṃ ṭhapetuṃ sakkotīti attho. Samādhissa vuṭṭhānakusaloti samādhissa vuṭṭhāne kusalo, yathāparicchedena vuṭṭhātuṃ sakkotīti attho. Samādhissa kallitakusaloti samādhissa kallatāya kusalo, samādhicittaṃ hāsetuṃ kallaṃ kātuṃ sakkotīti attho. Samādhissa gocarakusaloti samādhissa asappāye anupakārake dhamme vajjetvā sappāye upakārake sevantopi, ‘‘ayaṃ samādhinimittārammaṇo ayaṃ lakkhaṇārammaṇo’’ti jānantopi samādhissa gocarakusalo nāma hoti. Samādhissa abhinīhārakusaloti upariuparisamāpattisamāpajjanatthāya paṭhamajjhānādisamādhiṃ abhinīharituṃ sakkonto samādhissa abhinīhārakusalo nāma hoti. So paṭhamajjhānā vuṭṭhāya dutiyaṃ samāpajjati, dutiyajjhānā…pe… tatiyajjhānā vuṭṭhāya catutthaṃ samāpajjatīti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 4. හිමවන්‌තසුත්‌තං • 4. Himavantasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 4. හිමවන්‌තසුත්‌තවණ්‌ණනා • 4. Himavantasuttavaṇṇanā
