Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya

४. हीनाधिमुत्तिकसुत्तं

4. Hīnādhimuttikasuttaṃ

९८. सावत्थियं विहरति…पे॰… ‘‘धातुसोव ¹, भिक्खवे, सत्ता संसन्दन्ति समेन्ति। हीनाधिमुत्तिका हीनाधिमुत्तिकेहि सद्धिं संसन्दन्ति समेन्ति; कल्याणाधिमुत्तिका कल्याणाधिमुत्तिकेहि सद्धिं संसन्दन्ति समेन्ति’’।

98. Sāvatthiyaṃ viharati…pe… ‘‘dhātusova ², bhikkhave, sattā saṃsandanti samenti. Hīnādhimuttikā hīnādhimuttikehi saddhiṃ saṃsandanti samenti; kalyāṇādhimuttikā kalyāṇādhimuttikehi saddhiṃ saṃsandanti samenti’’.

‘‘अतीतम्पि खो ³, भिक्खवे, अद्धानं धातुसोव ⁴ सत्ता संसन्दिंसु समिंसु। हीनाधिमुत्तिका हीनाधिमुत्तिकेहि सद्धिं संसन्दिंसु समिंसु; कल्याणाधिमुत्तिका कल्याणाधिमुत्तिकेहि सद्धिं संसन्दिंसु समिंसु।

‘‘Atītampi kho ⁵, bhikkhave, addhānaṃ dhātusova ⁶ sattā saṃsandiṃsu samiṃsu. Hīnādhimuttikā hīnādhimuttikehi saddhiṃ saṃsandiṃsu samiṃsu; kalyāṇādhimuttikā kalyāṇādhimuttikehi saddhiṃ saṃsandiṃsu samiṃsu.

‘‘अनागतम्पि खो ⁷, भिक्खवे, अद्धानं धातुसोव ⁸ सत्ता संसन्दिस्सन्ति समेस्सन्ति। हीनाधिमुत्तिका हीनाधिमुत्तिकेहि सद्धिं संसन्दिस्सन्ति समेस्सन्ति; कल्याणाधिमुत्तिका कल्याणाधिमुत्तिकेहि सद्धिं संसन्दिस्सन्ति समेस्सन्ति।

‘‘Anāgatampi kho ⁹, bhikkhave, addhānaṃ dhātusova ¹⁰ sattā saṃsandissanti samessanti. Hīnādhimuttikā hīnādhimuttikehi saddhiṃ saṃsandissanti samessanti; kalyāṇādhimuttikā kalyāṇādhimuttikehi saddhiṃ saṃsandissanti samessanti.

‘‘एतरहिपि खो ¹¹, भिक्खवे, पच्‍चुप्पन्‍नं अद्धानं धातुसोव ¹² सत्ता संसन्दन्ति समेन्ति। हीनाधिमुत्तिका हीनाधिमुत्तिकेहि सद्धिं संसन्दन्ति समेन्ति; कल्याणाधिमुत्तिका कल्याणाधिमुत्तिकेहि सद्धिं संसन्दन्ति समेन्ती’’ति। चतुत्थं।

‘‘Etarahipi kho ¹³, bhikkhave, paccuppannaṃ addhānaṃ dhātusova ¹⁴ sattā saṃsandanti samenti. Hīnādhimuttikā hīnādhimuttikehi saddhiṃ saṃsandanti samenti; kalyāṇādhimuttikā kalyāṇādhimuttikehi saddhiṃ saṃsandanti samentī’’ti. Catutthaṃ.

Next: ५. चङ्कमसुत्तं • 5. Caṅkamasuttaṃ

Footnotes:

1. धातुसो (सी॰ पी॰) अयञ्‍च पठमारम्भवाक्येयेव, न सब्बत्थ। तीसु पन अद्धासु च उपमासंसन्दननिगमनट्ठाने च इदं पाठनानत्तं नत्थि

2. dhātuso (sī. pī.) ayañca paṭhamārambhavākyeyeva, na sabbattha. tīsu pana addhāsu ca upamāsaṃsandananigamanaṭṭhāne ca idaṃ pāṭhanānattaṃ natthi

3. खोसद्दो सी॰ स्या॰ कं॰ पी॰ पोत्थकेसु नत्थि

4. ईदिसेसु ठानेसु पाठनानत्तं नत्थि

5. khosaddo sī. syā. kaṃ. pī. potthakesu natthi

6. īdisesu ṭhānesu pāṭhanānattaṃ natthi

7. खोसद्दो सी॰ स्या॰ कं॰ पी॰ पोत्थकेसु नत्थि

8. ईदिसेसु ठानेसु पाठनानत्तं नत्थि

9. khosaddo sī. syā. kaṃ. pī. potthakesu natthi

10. īdisesu ṭhānesu pāṭhanānattaṃ natthi

11. खोसद्दो सी॰ स्या॰ कं॰ पी॰ पोत्थकेसु नत्थि

12. ईदिसेसु ठानेसु पाठनानत्तं नत्थि

13. khosaddo sī. syā. kaṃ. pī. potthakesu natthi

14. īdisesu ṭhānesu pāṭhanānattaṃ natthi

Related texts:

अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ४. हीनाधिमुत्तिकसुत्तवण्णना • 4. Hīnādhimuttikasuttavaṇṇanā

टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ४. हीनाधिमुत्तिकसुत्तवण्णना • 4. Hīnādhimuttikasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact