Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya

4. හීනාධිමුත්‌තිකසුත්‌තං

4. Hīnādhimuttikasuttaṃ

98. සාවත්‌ථියං විහරති…පෙ.… ‘‘ධාතුසොව ¹, භික්‌ඛවෙ, සත්‌තා සංසන්‌දන්‌ති සමෙන්‌ති. හීනාධිමුත්‌තිකා හීනාධිමුත්‌තිකෙහි සද්‌ධිං සංසන්‌දන්‌ති සමෙන්‌ති; කල්‍යාණාධිමුත්‌තිකා කල්‍යාණාධිමුත්‌තිකෙහි සද්‌ධිං සංසන්‌දන්‌ති සමෙන්‌ති’’.

98. Sāvatthiyaṃ viharati…pe… ‘‘dhātusova ², bhikkhave, sattā saṃsandanti samenti. Hīnādhimuttikā hīnādhimuttikehi saddhiṃ saṃsandanti samenti; kalyāṇādhimuttikā kalyāṇādhimuttikehi saddhiṃ saṃsandanti samenti’’.

‘‘අතීතම්‌පි ඛො ³, භික්‌ඛවෙ, අද්‌ධානං ධාතුසොව ⁴ සත්‌තා සංසන්‌දිංසු සමිංසු. හීනාධිමුත්‌තිකා හීනාධිමුත්‌තිකෙහි සද්‌ධිං සංසන්‌දිංසු සමිංසු; කල්‍යාණාධිමුත්‌තිකා කල්‍යාණාධිමුත්‌තිකෙහි සද්‌ධිං සංසන්‌දිංසු සමිංසු.

‘‘Atītampi kho ⁵, bhikkhave, addhānaṃ dhātusova ⁶ sattā saṃsandiṃsu samiṃsu. Hīnādhimuttikā hīnādhimuttikehi saddhiṃ saṃsandiṃsu samiṃsu; kalyāṇādhimuttikā kalyāṇādhimuttikehi saddhiṃ saṃsandiṃsu samiṃsu.

‘‘අනාගතම්‌පි ඛො ⁷, භික්‌ඛවෙ, අද්‌ධානං ධාතුසොව ⁸ සත්‌තා සංසන්‌දිස්‌සන්‌ති සමෙස්‌සන්‌ති. හීනාධිමුත්‌තිකා හීනාධිමුත්‌තිකෙහි සද්‌ධිං සංසන්‌දිස්‌සන්‌ති සමෙස්‌සන්‌ති; කල්‍යාණාධිමුත්‌තිකා කල්‍යාණාධිමුත්‌තිකෙහි සද්‌ධිං සංසන්‌දිස්‌සන්‌ති සමෙස්‌සන්‌ති.

‘‘Anāgatampi kho ⁹, bhikkhave, addhānaṃ dhātusova ¹⁰ sattā saṃsandissanti samessanti. Hīnādhimuttikā hīnādhimuttikehi saddhiṃ saṃsandissanti samessanti; kalyāṇādhimuttikā kalyāṇādhimuttikehi saddhiṃ saṃsandissanti samessanti.

‘‘එතරහිපි ඛො ¹¹, භික්‌ඛවෙ, පච්‌චුප්‌පන්‌නං අද්‌ධානං ධාතුසොව ¹² සත්‌තා සංසන්‌දන්‌ති සමෙන්‌ති. හීනාධිමුත්‌තිකා හීනාධිමුත්‌තිකෙහි සද්‌ධිං සංසන්‌දන්‌ති සමෙන්‌ති; කල්‍යාණාධිමුත්‌තිකා කල්‍යාණාධිමුත්‌තිකෙහි සද්‌ධිං සංසන්‌දන්‌ති සමෙන්‌තී’’ති. චතුත්‌ථං.

‘‘Etarahipi kho ¹³, bhikkhave, paccuppannaṃ addhānaṃ dhātusova ¹⁴ sattā saṃsandanti samenti. Hīnādhimuttikā hīnādhimuttikehi saddhiṃ saṃsandanti samenti; kalyāṇādhimuttikā kalyāṇādhimuttikehi saddhiṃ saṃsandanti samentī’’ti. Catutthaṃ.

Next: 5. චඞ්‌කමසුත්‌තං • 5. Caṅkamasuttaṃ

Footnotes:

1. ධාතුසො (සී. පී.) අයඤ්‌ච පඨමාරම්‌භවාක්‍යෙයෙව, න සබ්‌බත්‌ථ. තීසු පන අද්‌ධාසු ච උපමාසංසන්‌දනනිගමනට්‌ඨානෙ ච ඉදං පාඨනානත්‌තං නත්‌ථි

2. dhātuso (sī. pī.) ayañca paṭhamārambhavākyeyeva, na sabbattha. tīsu pana addhāsu ca upamāsaṃsandananigamanaṭṭhāne ca idaṃ pāṭhanānattaṃ natthi

3. ඛොසද්‌දො සී. ස්‍යා. කං. පී. පොත්‌ථකෙසු නත්‌ථි

4. ඊදිසෙසු ඨානෙසු පාඨනානත්‌තං නත්‌ථි

5. khosaddo sī. syā. kaṃ. pī. potthakesu natthi

6. īdisesu ṭhānesu pāṭhanānattaṃ natthi

7. ඛොසද්‌දො සී. ස්‍යා. කං. පී. පොත්‌ථකෙසු නත්‌ථි

8. ඊදිසෙසු ඨානෙසු පාඨනානත්‌තං නත්‌ථි

9. khosaddo sī. syā. kaṃ. pī. potthakesu natthi

10. īdisesu ṭhānesu pāṭhanānattaṃ natthi

11. ඛොසද්‌දො සී. ස්‍යා. කං. පී. පොත්‌ථකෙසු නත්‌ථි

12. ඊදිසෙසු ඨානෙසු පාඨනානත්‌තං නත්‌ථි

13. khosaddo sī. syā. kaṃ. pī. potthakesu natthi

14. īdisesu ṭhānesu pāṭhanānattaṃ natthi

Related texts:

අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 4. හීනාධිමුත්‌තිකසුත්‌තවණ්‌ණනා • 4. Hīnādhimuttikasuttavaṇṇanā

ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 4. හීනාධිමුත්‌තිකසුත්‌තවණ්‌ණනා • 4. Hīnādhimuttikasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact