| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
2. හිරීගාරවසුත්‌තං
2. Hirīgāravasuttaṃ
33. ‘‘ඉමං, භික්‌ඛවෙ, රත්‌තිං අඤ්‌ඤතරා දෙවතා අභික්‌කන්‌තාය රත්‌තියා අභික්‌කන්‌තවණ්‌ණා කෙවලකප්‌පං ජෙතවනං ඔභාසෙත්‌වා යෙනාහං තෙනුපසඞ්‌කමි; උපසඞ්‌කමිත්‌වා මං අභිවාදෙත්‌වා එකමන්‌තං අට්‌ඨාසි. එකමන්‌තං ඨිතා ඛො, භික්‌ඛවෙ, සා දෙවතා මං එතදවොච – ‘සත්‌තිමෙ, භන්‌තෙ, ධම්‌මා භික්‌ඛුනො අපරිහානාය සංවත්‌තන්‌ති. කතමෙ සත්‌ත? සත්‌ථුගාරවතා, ධම්‌මගාරවතා, සඞ්‌ඝගාරවතා, සික්‌ඛාගාරවතා, සමාධිගාරවතා, හිරිගාරවතා, ඔත්‌තප්‌පගාරවතා. ඉමෙ ඛො, භන්‌තෙ, සත්‌ත ධම්‌මා භික්‌ඛුනො අපරිහානාය සංවත්‌තන්‌තී’ති. ඉදමවොච, භික්‌ඛවෙ, සා දෙවතා. ඉදං වත්‌වා මං අභිවාදෙත්‌වා පදක්‌ඛිණං කත්‌වා තත්‌ථෙවන්‌තරධායී’’ති.
33. ‘‘Imaṃ, bhikkhave, rattiṃ aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yenāhaṃ tenupasaṅkami; upasaṅkamitvā maṃ abhivādetvā ekamantaṃ aṭṭhāsi. Ekamantaṃ ṭhitā kho, bhikkhave, sā devatā maṃ etadavoca – ‘sattime, bhante, dhammā bhikkhuno aparihānāya saṃvattanti. Katame satta? Satthugāravatā, dhammagāravatā, saṅghagāravatā, sikkhāgāravatā, samādhigāravatā, hirigāravatā, ottappagāravatā. Ime kho, bhante, satta dhammā bhikkhuno aparihānāya saṃvattantī’ti. Idamavoca, bhikkhave, sā devatā. Idaṃ vatvā maṃ abhivādetvā padakkhiṇaṃ katvā tatthevantaradhāyī’’ti.
‘‘සත්‌ථුගරු ධම්‌මගරු, සඞ්‌ඝෙ ච තිබ්‌බගාරවො;
‘‘Satthugaru dhammagaru, saṅghe ca tibbagāravo;
සමාධිගරු ආතාපී, සික්‌ඛාය තිබ්‌බගාරවො.
Samādhigaru ātāpī, sikkhāya tibbagāravo.
‘‘හිරි ඔත්‌තප්‌පසම්‌පන්‌නො, සප්‌පතිස්‌සො සගාරවො;
‘‘Hiri ottappasampanno, sappatisso sagāravo;
අභබ්‌බො පරිහානාය, නිබ්‌බානස්‌සෙව සන්‌තිකෙ’’ති. දුතියං;
Abhabbo parihānāya, nibbānasseva santike’’ti. dutiyaṃ;
