| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
7. மஹாவக்³கோ³
7. Mahāvaggo
1-2. ஹிரிஒத்தப்பஸுத்தாதி³வண்ணனா
1-2. Hiriottappasuttādivaṇṇanā
65-66. ஸத்தமஸ்ஸ பட²மங் உத்தானமேவ. து³தியே தயோ ஸங்வட்டாதி ஆபோஸங்வட்டோ, தேஜோஸங்வட்டோ, வாயோஸங்வட்டோதி தயோ ஸங்வட்டா. திஸ்ஸோ ஸங்வட்டஸீமாதி ஆப⁴ஸ்ஸரா, ஸுப⁴கிண்ஹா, வேஹப்ப²லாதி திஸ்ஸோ ஸங்வட்டஸீமா. யதா³ ஹி கப்போ தேஜேன ஸங்வட்டதி வினஸ்ஸதி, ததா³ ஆப⁴ஸ்ஸரதோ ஹெட்டா² அக்³கி³னா ட³ய்ஹதி. யதா³ ஆபேன ஸங்வட்டதி, ததா³ ஸுப⁴கிண்ஹதோ ஹெட்டா² உத³கேன விலீயதி. யதா³ வாயுனா ஸங்வட்டதி, ததா³ வேஹப்ப²லதோ ஹெட்டா² வாயுனா வித்³த⁴ங்ஸதி. வித்தா²ரதோ பன ஸதா³பி ஏகங் பு³த்³த⁴க்கெ²த்தங் வினஸ்ஸதி. பு³த்³த⁴க்கெ²த்தங் நாம திவித⁴ங் ஹோதி ஜாதிக்கெ²த்தங் ஆணாக்கெ²த்தங் விஸயக்கெ²த்தந்தி. தத்த² ஜாதிக்கெ²த்தங் நாம த³ஸஸஹஸ்ஸசக்கவாளபரியந்தங் ஹோதி, யங் ததா²க³தஸ்ஸ படிஸந்தி⁴க³ஹணாதீ³ஸு கம்பதி. ஆணாக்கெ²த்தங் கோடிஸஹஸ்ஸசக்கவாளபரியந்தங், யத்த² ரதனஸுத்தங் (கு²॰ பா॰ 6.1 ஆத³யோ; ஸு॰ நி॰ 224 ஆத³யோ) க²ந்த⁴பரித்தங் (அ॰ நி॰ 4.67; சூளவ॰ 251) த⁴ஜக்³க³பரித்தங் (ஸங்॰ நி॰ 1.249). ஆடானாடியபரித்தங் (தீ³॰ நி॰ 3.275 ஆத³யோ), மோரபரித்தந்தி (ஜா॰ 1.2.17-18) இமேஸங் பரித்தானங் ஆனுபா⁴வோ வத்ததி. விஸயக்கெ²த்தங் அனந்தமபரிமாணங், யங் ‘‘யாவதா வா பன ஆகங்கெ²ய்யா’’தி வுத்தங். ஏவமேதேஸு தீஸு பு³த்³த⁴க்கெ²த்தேஸு ஏகங் ஆணாக்கெ²த்தங் வினஸ்ஸதி. தஸ்மிங் பன வினஸ்ஸந்தே ஜாதிக்கெ²த்தங் வினட்ட²மேவ ஹோதி. வினஸ்ஸந்தஞ்ச ஏகதோவ வினஸ்ஸதி, ஸண்ட²ஹந்தம்பி ஏகதோவ ஸண்ட²ஹதி.
65-66. Sattamassa paṭhamaṃ uttānameva. Dutiye tayo saṃvaṭṭāti āposaṃvaṭṭo, tejosaṃvaṭṭo, vāyosaṃvaṭṭoti tayo saṃvaṭṭā. Tisso saṃvaṭṭasīmāti ābhassarā, subhakiṇhā, vehapphalāti tisso saṃvaṭṭasīmā. Yadā hi kappo tejena saṃvaṭṭati vinassati, tadā ābhassarato heṭṭhā agginā ḍayhati. Yadā āpena saṃvaṭṭati, tadā subhakiṇhato heṭṭhā udakena vilīyati. Yadā vāyunā saṃvaṭṭati, tadā vehapphalato heṭṭhā vāyunā viddhaṃsati. Vitthārato pana sadāpi ekaṃ buddhakkhettaṃ vinassati. Buddhakkhettaṃ nāma tividhaṃ hoti jātikkhettaṃ āṇākkhettaṃ visayakkhettanti. Tattha jātikkhettaṃ nāma dasasahassacakkavāḷapariyantaṃ hoti, yaṃ tathāgatassa paṭisandhigahaṇādīsu kampati. Āṇākkhettaṃ koṭisahassacakkavāḷapariyantaṃ, yattha ratanasuttaṃ (khu. pā. 6.1 ādayo; su. ni. 224 ādayo) khandhaparittaṃ (a. ni. 4.67; cūḷava. 251) dhajaggaparittaṃ (saṃ. ni. 1.249). Āṭānāṭiyaparittaṃ (dī. ni. 3.275 ādayo), moraparittanti (jā. 1.2.17-18) imesaṃ parittānaṃ ānubhāvo vattati. Visayakkhettaṃ anantamaparimāṇaṃ, yaṃ ‘‘yāvatā vā pana ākaṅkheyyā’’ti vuttaṃ. Evametesu tīsu buddhakkhettesu ekaṃ āṇākkhettaṃ vinassati. Tasmiṃ pana vinassante jātikkhettaṃ vinaṭṭhameva hoti. Vinassantañca ekatova vinassati, saṇṭhahantampi ekatova saṇṭhahati.
தீணி ஸங்வட்டமூலானீதி ராக³தோ³ஸமோஹஸங்கா²தானி தீணி ஸங்வட்டகாரணானி. ராகா³தீ³ஸு ஹி அகுஸலமூலேஸு உஸ்ஸன்னேஸு லோகோ வினஸ்ஸதி. ததா² ஹி ராகே³ உஸ்ஸன்னதரே அக்³கி³னா வினஸ்ஸதி, தோ³ஸே உஸ்ஸன்னதரே உத³கேன, மோஹே உஸ்ஸன்னதரே வாதேன. கேசி பன ‘‘தோ³ஸே உஸ்ஸன்னதரே அக்³கி³னா, ராகே³ உத³கேனா’’தி வத³ந்தி.
Tīṇi saṃvaṭṭamūlānīti rāgadosamohasaṅkhātāni tīṇi saṃvaṭṭakāraṇāni. Rāgādīsu hi akusalamūlesu ussannesu loko vinassati. Tathā hi rāge ussannatare agginā vinassati, dose ussannatare udakena, mohe ussannatare vātena. Keci pana ‘‘dose ussannatare agginā, rāge udakenā’’ti vadanti.
தீணி கோலாஹலானீதி கப்பகோலாஹலங், பு³த்³த⁴கோலாஹலங், சக்கவத்திகோலாஹலந்தி தீணி கோலாஹலானி. தத்த² ‘‘வஸ்ஸஸதஸஹஸ்ஸமத்த²கே கப்புட்டா²னங் நாம ப⁴விஸ்ஸதீ’’திஆதி³னா தே³வதாஹி உக்³கோ⁴ஸிதஸத்³தோ³ கப்பகோலாஹலங் நாம ஹோதி. ‘‘இதோ வஸ்ஸஸதஸஹஸ்ஸமத்த²கே லோகோ வினஸ்ஸிஸ்ஸதி, மெத்தங், மாரிஸா, பா⁴வேத² கருணங் முதி³தங் உபெக்க²’’ந்தி மனுஸ்ஸபதே² தே³வதா கோ⁴ஸந்தியோ சரந்தி. ‘‘வஸ்ஸஸஹஸ்ஸமத்த²கே பு³த்³தோ⁴ உப்பஜ்ஜிஸ்ஸதீ’’தி பு³த்³த⁴கோலாஹலங் நாம ஹோதி. ‘‘இதோ வஸ்ஸஸஹஸ்ஸமத்த²கே பு³த்³தோ⁴ உப்பஜ்ஜித்வா த⁴ம்மானுத⁴ம்மப்படிபன்னோ ஸங்க⁴ரதனேன பரிவாரிதோ த⁴ம்மங் தே³ஸெந்தோ விசரிஸ்ஸதீ’’தி தே³வதா உக்³கோ⁴ஸந்தி. ‘‘வஸ்ஸஸதமத்த²கே பன சக்கவத்தீ உப்பஜ்ஜிஸ்ஸதீ’’தி சக்கவத்திகோலாஹலங் நாம ஹோதி. ‘‘இதோ வஸ்ஸஸதமத்த²கே ஸத்தரதனஸம்பன்னோ சாதுத்³தீ³பிஸ்ஸரோ ஸஹஸ்ஸபரிவாரோ வேஹாஸங்க³மோ சக்கவத்தீ ராஜா உப்பஜ்ஜிஸ்ஸதீ’’தி தே³வதா உக்³கோ⁴ஸந்தி.
Tīṇi kolāhalānīti kappakolāhalaṃ, buddhakolāhalaṃ, cakkavattikolāhalanti tīṇi kolāhalāni. Tattha ‘‘vassasatasahassamatthake kappuṭṭhānaṃ nāma bhavissatī’’tiādinā devatāhi ugghositasaddo kappakolāhalaṃ nāma hoti. ‘‘Ito vassasatasahassamatthake loko vinassissati, mettaṃ, mārisā, bhāvetha karuṇaṃ muditaṃ upekkha’’nti manussapathe devatā ghosantiyo caranti. ‘‘Vassasahassamatthake buddho uppajjissatī’’ti buddhakolāhalaṃ nāma hoti. ‘‘Ito vassasahassamatthake buddho uppajjitvā dhammānudhammappaṭipanno saṅgharatanena parivārito dhammaṃ desento vicarissatī’’ti devatā ugghosanti. ‘‘Vassasatamatthake pana cakkavattī uppajjissatī’’ti cakkavattikolāhalaṃ nāma hoti. ‘‘Ito vassasatamatthake sattaratanasampanno cātuddīpissaro sahassaparivāro vehāsaṅgamo cakkavattī rājā uppajjissatī’’ti devatā ugghosanti.
அசிரட்டே²ன ந து⁴வாதி உத³கபு³ப்³பு³ளாத³யோ விய ந சிரட்டா²யிதாய து⁴வபா⁴வரஹிதா. அஸ்ஸாஸரஹிதாதி ஸுபினகே பீதபானீயங் விய அனுலித்தசந்த³னங் விய ச அஸ்ஸாஸவிரஹிதா.
Aciraṭṭhena na dhuvāti udakabubbuḷādayo viya na ciraṭṭhāyitāya dhuvabhāvarahitā. Assāsarahitāti supinake pītapānīyaṃ viya anulittacandanaṃ viya ca assāsavirahitā.
உபகப்பனமேகோ⁴தி கப்பவினாஸகமேக⁴ங் ஸந்தா⁴ய வத³தி. யஸ்மிஞ்ஹி ஸமயே கப்போ அக்³கி³னா நஸ்ஸதி, ஆதி³தோவ கப்பவினாஸகமஹாமேகோ⁴ உட்ட²ஹித்வா கோடிஸதஸஹஸ்ஸசக்கவாளே ஏகமஹாவஸ்ஸங் வஸ்ஸதி. மனுஸ்ஸா துட்ட²ஹட்டா² ஸப்³ப³பீ³ஜானி நீஹரித்வா வபந்தி. ஸஸ்ஸேஸு பன கோ³கா²யிதகமத்தேஸு ஜாதேஸு க³த்³ரப⁴ரவங் ரவந்தோ ஏகபி³ந்து³ம்பி ந வஸ்ஸதி, ததா³ பச்சி²ன்னங் பச்சி²ன்னமேவ வஸ்ஸங் ஹோதி. தேனாஹ ‘‘ததா³ நிக்க²ந்தபீ³ஜங்..பே॰… ஏகபி³ந்து³ம்பி தே³வோ ந வஸ்ஸதீ’’தி. ‘‘வஸ்ஸஸதஸஹஸ்ஸ அச்சயேன கப்பவுட்டா²னங் ப⁴விஸ்ஸதீ’’திஆதி³னா தே³வதாஹி வுத்தவசனங் ஸுத்வா யேபு⁴ய்யேன மனுஸ்ஸா ச பு⁴ம்மதே³வதா ச ஸங்வேக³ஜாதா அஞ்ஞமஞ்ஞங் முது³சித்தா ஹுத்வா மெத்தாதீ³னி புஞ்ஞானீ கத்வா தே³வலோகே நிப்³ப³த்தந்தி, அவீசிதோ பட்டா²ய துச்சோ² ஹோதீதி.
Upakappanameghoti kappavināsakameghaṃ sandhāya vadati. Yasmiñhi samaye kappo agginā nassati, āditova kappavināsakamahāmegho uṭṭhahitvā koṭisatasahassacakkavāḷe ekamahāvassaṃ vassati. Manussā tuṭṭhahaṭṭhā sabbabījāni nīharitvā vapanti. Sassesu pana gokhāyitakamattesu jātesu gadrabharavaṃ ravanto ekabindumpi na vassati, tadā pacchinnaṃ pacchinnameva vassaṃ hoti. Tenāha ‘‘tadā nikkhantabījaṃ..pe… ekabindumpi devo na vassatī’’ti. ‘‘Vassasatasahassa accayena kappavuṭṭhānaṃ bhavissatī’’tiādinā devatāhi vuttavacanaṃ sutvā yebhuyyena manussā ca bhummadevatā ca saṃvegajātā aññamaññaṃ muducittā hutvā mettādīni puññānī katvā devaloke nibbattanti, avīcito paṭṭhāya tuccho hotīti.
பஞ்ச பீ³ஜஜாதானீதி மூலபீ³ஜங் க²ந்த⁴பீ³ஜங் ப²ளுபீ³ஜங் அக்³க³பீ³ஜங் பீ³ஜபீ³ஜந்தி பஞ்ச பீ³ஜானி ஜாதானி. தத்த² மூலபீ³ஜந்தி வசா, வசத்தங், ஹலித்³த³ங், ஸிங்கி³வேரந்தி ஏவமாதி³. க²ந்த⁴பீ³ஜந்தி அஸ்ஸத்தோ², நிக்³ரோதோ⁴தி ஏவமாதி³. ப²ளுபீ³ஜந்தி உச்சு², வேளு, நளோதி ஏவமாதி³. அக்³க³பீ³ஜந்தி அஜ்ஜுகங், ப²ணிஜ்ஜகந்தி ஏவமாதி³. பீ³ஜபீ³ஜந்தி வீஹிஆதி³ புப்³ப³ண்ணஞ்சேவ முக்³க³மாஸாதி³அபரண்ணஞ்ச. பச்சயந்தரஸமவாயே விஸதி³ஸுப்பத்தியா விஸேஸகாரணபா⁴வதோ ருஹனஸமத்தே² ஸாரப²லே நிருள்ஹோ பீ³ஜ-ஸத்³தோ³ தத³த்த²ஸித்³தி⁴யா மூலாதீ³ஸுபி கேஸுசி பவத்ததீதி மூலாதி³தோ நிவத்தனத்த²ங் ஏகேன பீ³ஜ-ஸத்³தே³ன விஸேஸெத்வா வுத்தங் ‘‘பீ³ஜபீ³ஜ’’ந்தி ‘‘ரூபரூபங் (விஸுத்³தி⁴॰ 2.449) து³க்க²து³க்க²’’ந்தி (ஸங்॰ நி॰ 4.327) யதா². யதா² ப²லபாகபரியந்தா ஓஸதி⁴ருக்கா² வேளுகத³லிஆத³யோ.
Pañca bījajātānīti mūlabījaṃ khandhabījaṃ phaḷubījaṃ aggabījaṃ bījabījanti pañca bījāni jātāni. Tattha mūlabījanti vacā, vacattaṃ, haliddaṃ, siṅgiveranti evamādi. Khandhabījanti assattho, nigrodhoti evamādi. Phaḷubījanti ucchu, veḷu, naḷoti evamādi. Aggabījanti ajjukaṃ, phaṇijjakanti evamādi. Bījabījanti vīhiādi pubbaṇṇañceva muggamāsādiaparaṇṇañca. Paccayantarasamavāye visadisuppattiyā visesakāraṇabhāvato ruhanasamatthe sāraphale niruḷho bīja-saddo tadatthasiddhiyā mūlādīsupi kesuci pavattatīti mūlādito nivattanatthaṃ ekena bīja-saddena visesetvā vuttaṃ ‘‘bījabīja’’nti ‘‘rūparūpaṃ (visuddhi. 2.449) dukkhadukkha’’nti (saṃ. ni. 4.327) yathā. Yathā phalapākapariyantā osadhirukkhā veḷukadaliādayo.
யங் கதா³சீதிஆதீ³ஸு யந்தி நிபாதமத்தங். கதா³சீதி கிஸ்மிஞ்சி காலே. கரஹசீதி தஸ்ஸேவ வேவசனங். தீ³க⁴ஸ்ஸ அத்³து⁴னோதி தீ³க⁴ஸ்ஸ காலஸ்ஸ. அச்சயேனாதி அதிக்கமேன. ஸேஸமெத்த² உத்தானமேவ.
Yaṃ kadācītiādīsu yanti nipātamattaṃ. Kadācīti kismiñci kāle. Karahacīti tasseva vevacanaṃ. Dīghassa addhunoti dīghassa kālassa. Accayenāti atikkamena. Sesamettha uttānameva.
ஹிரிஒத்தப்பஸுத்தாதி³வண்ணனா நிட்டி²தா.
Hiriottappasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
1. ஹிரீஒத்தப்பஸுத்தங் • 1. Hirīottappasuttaṃ
2. ஸத்தஸூரியஸுத்தங் • 2. Sattasūriyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
1. ஹிரிஒத்தப்பஸுத்தவண்ணனா • 1. Hiriottappasuttavaṇṇanā
2. ஸத்தஸூரியஸுத்தவண்ணனா • 2. Sattasūriyasuttavaṇṇanā
