| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
8. හිරීසුත්‌තවණ්‌ණනා
8. Hirīsuttavaṇṇanā
18. අට්‌ඨමෙ හිරීනිසෙධොති හිරියා අකුසලෙ ධම්‌මෙ නිසෙධෙතීති හිරීනිසෙධො. කොචි ලොකස්‌මිං විජ්‌ජතීති කොචි එවරූපො විජ්‌ජතීති පුච්‌ඡති. යො නින්‌දං අපබොධතීති යො ගරහං අපහරන්‌තො බුජ්‌ඣති. අස්‌සො භද්‍රො කසාමිවාති යථා භද්‍රො අස්‌සාජානීයො කසං අපහරන්‌තො බුජ්‌ඣති, පතොදච්‌ඡායං දිස්‌වා සංවිජ්‌ඣන්‌තො විය කසාය අත්‌තනි නිපාතං න දෙති, එවමෙව යො භික්‌ඛු භූතස්‌ස දසඅක්‌කොසවත්‌ථුනො අත්‌තනි නිපාතං අදදන්‌තො නින්‌දං අපබොධති අපහරන්‌තො බුජ්‌ඣති, එවරූපො කොචි ඛීණාසවො විජ්‌ජතීති පුච්‌ඡති. අභූතක්‌කොසෙන පන පරිමුත්‌තො නාම නත්‌ථි. තනුයාති තනුකා, හිරියා අකුසලෙ ධම්‌මෙ නිසෙධෙත්‌වා චරන්‌තා ඛීණාසවා නාම අප්‌පකාති අත්‌ථො. සදා සතාති නිච්‌චකාලං සතිවෙපුල්‌ලෙන සමන්‌නාගතා. අන්‌තං දුක්‌ඛස්‌ස පප්‌පුය්‍යාති වට්‌ටදුක්‌ඛස්‌ස කොටිං අන්‌තභූතං නිබ්‌බානං පාපුණිත්‌වා. සෙසං වුත්‌තනයමෙවාති.
18. Aṭṭhame hirīnisedhoti hiriyā akusale dhamme nisedhetīti hirīnisedho. Koci lokasmiṃvijjatīti koci evarūpo vijjatīti pucchati. Yo nindaṃ apabodhatīti yo garahaṃ apaharanto bujjhati. Asso bhadro kasāmivāti yathā bhadro assājānīyo kasaṃ apaharanto bujjhati, patodacchāyaṃ disvā saṃvijjhanto viya kasāya attani nipātaṃ na deti, evameva yo bhikkhu bhūtassa dasaakkosavatthuno attani nipātaṃ adadanto nindaṃ apabodhati apaharanto bujjhati, evarūpo koci khīṇāsavo vijjatīti pucchati. Abhūtakkosena pana parimutto nāma natthi. Tanuyāti tanukā, hiriyā akusale dhamme nisedhetvā carantā khīṇāsavā nāma appakāti attho. Sadā satāti niccakālaṃ sativepullena samannāgatā. Antaṃ dukkhassa pappuyyāti vaṭṭadukkhassa koṭiṃ antabhūtaṃ nibbānaṃ pāpuṇitvā. Sesaṃ vuttanayamevāti.
හිරීසුත්‌තවණ්‌ණනා නිට්‌ඨිතා.
Hirīsuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 8. හිරීසුත්‌තං • 8. Hirīsuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 8. හිරීසුත්‌තවණ්‌ණනා • 8. Hirīsuttavaṇṇanā
