| Library / Tipiṭaka / തിപിടക • Tipiṭaka / സംയുത്തനികായ (അട്ഠകഥാ) • Saṃyuttanikāya (aṭṭhakathā) |
൮. ഹിരീസുത്തവണ്ണനാ
8. Hirīsuttavaṇṇanā
൧൮. അട്ഠമേ ഹിരീനിസേധോതി ഹിരിയാ അകുസലേ ധമ്മേ നിസേധേതീതി ഹിരീനിസേധോ. കോചി ലോകസ്മിം വിജ്ജതീതി കോചി ഏവരൂപോ വിജ്ജതീതി പുച്ഛതി. യോ നിന്ദം അപബോധതീതി യോ ഗരഹം അപഹരന്തോ ബുജ്ഝതി. അസ്സോ ഭദ്രോ കസാമിവാതി യഥാ ഭദ്രോ അസ്സാജാനീയോ കസം അപഹരന്തോ ബുജ്ഝതി, പതോദച്ഛായം ദിസ്വാ സംവിജ്ഝന്തോ വിയ കസായ അത്തനി നിപാതം ന ദേതി, ഏവമേവ യോ ഭിക്ഖു ഭൂതസ്സ ദസഅക്കോസവത്ഥുനോ അത്തനി നിപാതം അദദന്തോ നിന്ദം അപബോധതി അപഹരന്തോ ബുജ്ഝതി, ഏവരൂപോ കോചി ഖീണാസവോ വിജ്ജതീതി പുച്ഛതി. അഭൂതക്കോസേന പന പരിമുത്തോ നാമ നത്ഥി. തനുയാതി തനുകാ, ഹിരിയാ അകുസലേ ധമ്മേ നിസേധേത്വാ ചരന്താ ഖീണാസവാ നാമ അപ്പകാതി അത്ഥോ. സദാ സതാതി നിച്ചകാലം സതിവേപുല്ലേന സമന്നാഗതാ. അന്തം ദുക്ഖസ്സ പപ്പുയ്യാതി വട്ടദുക്ഖസ്സ കോടിം അന്തഭൂതം നിബ്ബാനം പാപുണിത്വാ. സേസം വുത്തനയമേവാതി.
18. Aṭṭhame hirīnisedhoti hiriyā akusale dhamme nisedhetīti hirīnisedho. Koci lokasmiṃvijjatīti koci evarūpo vijjatīti pucchati. Yo nindaṃ apabodhatīti yo garahaṃ apaharanto bujjhati. Asso bhadro kasāmivāti yathā bhadro assājānīyo kasaṃ apaharanto bujjhati, patodacchāyaṃ disvā saṃvijjhanto viya kasāya attani nipātaṃ na deti, evameva yo bhikkhu bhūtassa dasaakkosavatthuno attani nipātaṃ adadanto nindaṃ apabodhati apaharanto bujjhati, evarūpo koci khīṇāsavo vijjatīti pucchati. Abhūtakkosena pana parimutto nāma natthi. Tanuyāti tanukā, hiriyā akusale dhamme nisedhetvā carantā khīṇāsavā nāma appakāti attho. Sadā satāti niccakālaṃ sativepullena samannāgatā. Antaṃ dukkhassa pappuyyāti vaṭṭadukkhassa koṭiṃ antabhūtaṃ nibbānaṃ pāpuṇitvā. Sesaṃ vuttanayamevāti.
ഹിരീസുത്തവണ്ണനാ നിട്ഠിതാ.
Hirīsuttavaṇṇanā niṭṭhitā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / സംയുത്തനികായ • Saṃyuttanikāya / ൮. ഹിരീസുത്തം • 8. Hirīsuttaṃ
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൮. ഹിരീസുത്തവണ്ണനാ • 8. Hirīsuttavaṇṇanā
