| Library / Tipiṭaka / តិបិដក • Tipiṭaka / សំយុត្តនិកាយ (អដ្ឋកថា) • Saṃyuttanikāya (aṭṭhakathā) |
២. ទុតិយវគ្គោ
2. Dutiyavaggo
១-២. ឥច្ឆានង្គលសុត្តាទិវណ្ណនា
1-2. Icchānaṅgalasuttādivaṇṇanā
៩៨៧-៩៨៨. ទុតិយវគ្គស្ស បឋមេ ឯវំ ព្យាករេយ្យាថាតិ កស្មា អត្តនោ វិហារសមាបត្តិំ អាចិក្ខតិ? ឧបារម្ភមោចនត្ថំ។ សចេ ហិ តេ ‘‘ន ជានាមា’’តិ វទេយ្យុំ, អថ នេសំ តិត្ថិយា ‘‘តុម្ហេ ‘អសុកសមាបត្តិយា នាម នោ សត្ថា តេមាសំ វិហាសី’តិបិ ន ជានាថ, អថ កស្មា នំ ឧបដ្ឋហន្តា វិហរថា’’តិ ឧបារម្ភំ អារោបេយ្យុំ, តតោ មោចនត្ថំ ឯវមាហ។
987-988. Dutiyavaggassa paṭhame evaṃ byākareyyāthāti kasmā attano vihārasamāpattiṃ ācikkhati? Upārambhamocanatthaṃ. Sace hi te ‘‘na jānāmā’’ti vadeyyuṃ, atha nesaṃ titthiyā ‘‘tumhe ‘asukasamāpattiyā nāma no satthā temāsaṃ vihāsī’tipi na jānātha, atha kasmā naṃ upaṭṭhahantā viharathā’’ti upārambhaṃ āropeyyuṃ, tato mocanatthaṃ evamāha.
អថ កស្មា យថា អញ្ញត្ថ ‘‘សតោវ អស្សសតិ, ទីឃំ វា អស្សសន្តោ’’តិ (ទី. និ. ២.៣៧៤; ម. និ. ១.១០៧; សំ. និ. ៥.៩៧៧) ឯវ-វាការោ វុត្តោ។ ឯវំ ឥធ ន វុត្តោតិ? ឯកន្តសន្តត្តា។ អញ្ញេសញ្ហិ អស្សាសោ វា បាកដោ ហោតិ បស្សាសោ វា, ភគវតោ ឧភយម្បេតំ បាកដមេវ និច្ចំ ឧបដ្ឋិតស្សតិតាយាតិ ឯកន្តសន្តត្តា ន វុត្តោ។ អថ ‘‘សិក្ខាមី’’តិ អវត្វា កស្មា ‘‘អស្សសាមី’’តិ ឯត្តកមេវ វុត្តន្តិ? សិក្ខិតព្ពាភាវា។ សត្ត ហិ សេខា សិក្ខិតព្ពភាវា សេខា នាម, ខីណាសវា សិក្ខិតព្ពាភាវា អសេខា នាម, តថាគតា អសិក្ខិតព្ពា អសេក្ខា នាម នត្ថិ តេសំ សិក្ខិតព្ពកិច្ចន្តិ សិក្ខិតព្ពាភាវា ន វុត្តំ។ ទុតិយំ ឧត្តានមេវ។
Atha kasmā yathā aññattha ‘‘satova assasati, dīghaṃ vā assasanto’’ti (dī. ni. 2.374; ma. ni. 1.107; saṃ. ni. 5.977) eva-vākāro vutto. Evaṃ idha na vuttoti? Ekantasantattā. Aññesañhi assāso vā pākaṭo hoti passāso vā, bhagavato ubhayampetaṃ pākaṭameva niccaṃ upaṭṭhitassatitāyāti ekantasantattā na vutto. Atha ‘‘sikkhāmī’’ti avatvā kasmā ‘‘assasāmī’’ti ettakameva vuttanti? Sikkhitabbābhāvā. Satta hi sekhā sikkhitabbabhāvā sekhā nāma, khīṇāsavā sikkhitabbābhāvā asekhā nāma, tathāgatā asikkhitabbā asekkhā nāma natthi tesaṃ sikkhitabbakiccanti sikkhitabbābhāvā na vuttaṃ. Dutiyaṃ uttānameva.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya
១. ឥច្ឆានង្គលសុត្តំ • 1. Icchānaṅgalasuttaṃ
២. កង្ខេយ្យសុត្តំ • 2. Kaṅkheyyasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១-២. ឥច្ឆានង្គលសុត្តាទិវណ្ណនា • 1-2. Icchānaṅgalasuttādivaṇṇanā
