༡-༥. ཨིཙྪཱསུཏྟཱདིཝཎྞནཱ

1-5. Icchāsuttādivaṇṇanā

༦༡-༦༥. སཏྟམསྶ པཋམཱདཱིནི སུཝིཉྙེཡྻཱནི། པཉྩམེ (དཱི॰ནི॰ཊཱི॰ ༢.༡༧༣) ཨབྷིབྷཝཏཱིཏི ཨབྷིབྷུ, པརིཀམྨཾ, ཉཱཎཾ ཝཱ། ཨབྷིབྷུ ཨཱཡཏནཾ ཨེཏསྶཱཏི ཨབྷིབྷཱཡཏནཾ, ཛྷཱནཾ། ཨབྷིབྷཝིཏབྦཾ ཝཱ ཨཱརམྨཎསངྑཱཏཾ ཨཱཡཏནཾ ཨེཏསྶཱཏི ཨབྷིབྷཱཡཏནཾ། ཨཐ ཝཱ ཨཱརམྨཎཱབྷིབྷཝནཏོ ཨབྷིཏུ ཙ ཏཾ ཨཱཡཏནཉྩ ཡོགིནོ སུཁཝིསེསཱནཾ ཨདྷིཊྛཱནབྷཱཝཏོ མནཱཡཏནདྷམྨཱཡཏནབྷཱཝཏོ ཙཱཏིཔི སསམྤཡུཏྟཛ྄ཛྷཱནཾ ཨབྷིབྷཱཡཏནཾ། ཏེནཱཧ ‘‘ཨབྷིབྷཝནཀཱརཎཱནཱི’’ཏིཨཱདི། ཏཱནི ཧཱིཏི ཨབྷིབྷཱཡཏནསཉྙིཏཱནི ཛྷཱནཱནི། ‘‘པུགྒལསྶ ཉཱཎུཏྟརིཡཏཱཡཱ’’ཏི ཨིདཾ ཨུབྷཡཏྠཱཔི ཡོཛེཏབྦཾ། ཀཐཾ? པཊིཔཀྑབྷཱཝེན པཙྩནཱིཀདྷམྨེ ཨབྷིབྷཝནྟི པུགྒལསྶ ཉཱཎུཏྟརིཡཏཱཡ ཨཱརམྨཎཱནི ཨབྷིབྷཝནྟི། ཉཱཎབལེནེཝ ཧི ཨཱརམྨཎཱབྷིབྷཝནཾ ཝིཡ པཊིཔཀྑཱབྷིབྷཝོཔཱིཏི།

61-65. Sattamassa paṭhamādīni suviññeyyāni. Pañcame (dī.ni.ṭī. 2.173) abhibhavatīti abhibhu, parikammaṃ, ñāṇaṃ vā. Abhibhu āyatanaṃ etassāti abhibhāyatanaṃ, jhānaṃ. Abhibhavitabbaṃ vā ārammaṇasaṅkhātaṃ āyatanaṃ etassāti abhibhāyatanaṃ. Atha vā ārammaṇābhibhavanato abhitu ca taṃ āyatanañca yogino sukhavisesānaṃ adhiṭṭhānabhāvato manāyatanadhammāyatanabhāvato cātipi sasampayuttajjhānaṃ abhibhāyatanaṃ. Tenāha ‘‘abhibhavanakāraṇānī’’tiādi. Tāni hīti abhibhāyatanasaññitāni jhānāni. ‘‘Puggalassa ñāṇuttariyatāyā’’ti idaṃ ubhayatthāpi yojetabbaṃ. Kathaṃ? Paṭipakkhabhāvena paccanīkadhamme abhibhavanti puggalassa ñāṇuttariyatāya ārammaṇāni abhibhavanti. Ñāṇabaleneva hi ārammaṇābhibhavanaṃ viya paṭipakkhābhibhavopīti.

པརིཀམྨཝསེན ཨཛ྄ཛྷཏྟཾ རཱུཔསཉྙཱི, ན ཨཔྤནཱཝསེན། ན ཧི པཊིབྷཱགནིམིཏྟཱརམྨཎཱ ཨཔྤནཱ ཨཛ྄ཛྷཏྟཝིསཡཱ སམྦྷཝཏི། ཏཾ པན ཨཛ྄ཛྷཏྟཔརིཀམྨཝསེན ལདྡྷཾ ཀསིཎནིམིཏྟཾ ཨཝིསུདྡྷམེཝ ཧོཏི, ན བཧིདྡྷཱཔརིཀམྨཝསེན ལདྡྷཾ ཝིཡ ཝིསུདྡྷཾ།

Parikammavasenaajjhattaṃ rūpasaññī, na appanāvasena. Na hi paṭibhāganimittārammaṇā appanā ajjhattavisayā sambhavati. Taṃ pana ajjhattaparikammavasena laddhaṃ kasiṇanimittaṃ avisuddhameva hoti, na bahiddhāparikammavasena laddhaṃ viya visuddhaṃ.

པརིཏྟཱནཱིཏི ཡཐཱལདྡྷཱནི སུཔྤསརཱཝམཏྟཱནི། ཏེནཱཧ ‘‘ཨཝཌྜྷིཏཱནཱི’’ཏི། པརིཏྟཝསེནེཝཱཏི ཝཎྞཝསེན ཨཱབྷོགེ ཝིཛྫམཱནེཔི པརིཏྟཝསེནེཝ ཨིདཾ ཨབྷིབྷཱཡཏནཾ ཝུཏྟཾ། པརིཏྟཏཱ ཧེཏྠ ཨབྷིབྷཝནསྶ ཀཱརཎཾ། ཝཎྞཱབྷོགེ སཏིཔི ཨསཏིཔི ཨབྷིབྷཱཡཏནབྷཱཝནཱ ནཱམ ཏིཀྑཔཉྙསྶེཝ སམྦྷཝཏི, ན ཨིཏརསྶཱཏི ཨཱཧ ‘‘ཉཱཎུཏྟརིཀོ པུགྒལོ’’ཏི། ཨབྷིབྷཝིཏྭཱ སམཱཔཛྫཏཱིཏི ཨེཏྠ ཨབྷིབྷཝནཾ སམཱཔཛྫནཉྩ ཨུཔཙཱརཛ྄ཛྷཱནཱདྷིགམསམནནྟརམེཝ ཨཔྤནཱཛྷཱནུཔྤཱདནནྟི ཨཱཧ ‘‘སཧ ནིམིཏྟུཔྤཱདེནེཝེཏྠ ཨཔྤནཾ པཱཔེཏཱི’’ཏི། སཧ ནིམིཏྟུཔྤཱདེནཱཏི ཙ ཨཔྤནཱཔརིཝཱསཱབྷཱཝསྶ ལཀྑཎཝཙནམེཏཾ། ཡོ ‘‘ཁིཔྤཱབྷིཉྙོ’’ཏི ཝུཙྩཏི, ཏཏོཔི ཉཱཎུཏྟརསྶེཝ ཨབྷིབྷཱཡཏནབྷཱཝནཱ། ཨེཏྠཱཏི ཨེཏསྨིཾ ནིམིཏྟེ། ཨཔྤནཾ པཱཔེཏཱིཏི བྷཱཝནཾ ཨཔྤནཾ ནེཏི།

Parittānīti yathāladdhāni suppasarāvamattāni. Tenāha ‘‘avaḍḍhitānī’’ti. Parittavasenevāti vaṇṇavasena ābhoge vijjamānepi parittavaseneva idaṃ abhibhāyatanaṃ vuttaṃ. Parittatā hettha abhibhavanassa kāraṇaṃ. Vaṇṇābhoge satipi asatipi abhibhāyatanabhāvanā nāma tikkhapaññasseva sambhavati, na itarassāti āha ‘‘ñāṇuttariko puggalo’’ti. Abhibhavitvā samāpajjatīti ettha abhibhavanaṃ samāpajjanañca upacārajjhānādhigamasamanantarameva appanājhānuppādananti āha ‘‘saha nimittuppādenevettha appanaṃ pāpetī’’ti. Saha nimittuppādenāti ca appanāparivāsābhāvassa lakkhaṇavacanametaṃ. Yo ‘‘khippābhiñño’’ti vuccati, tatopi ñāṇuttarasseva abhibhāyatanabhāvanā. Etthāti etasmiṃ nimitte. Appanaṃ pāpetīti bhāvanaṃ appanaṃ neti.

ཨེཏྠ ཙ ཀེཙི ‘‘ཨུཔྤནྣེ ཨུཔཙཱརཛ྄ཛྷཱནེ ཏཾ ཨཱརབྦྷ ཡེ ཧེཊྛིམནྟེན དྭེ ཏཡོ ཛཝནཝཱརཱ པཝཏྟནྟི, ཏེ ཨུཔཙཱརཛ྄ཛྷཱནཔཀྑིཀཱ ཨེཝ, ཏདནནྟརཉྩ བྷཝངྒཔརིཝཱསེན ཨུཔཙཱརཱསེཝནཱཡ ཙ ཝིནཱ ཨཔྤནཱ ཧོཏི, སཧ ནིམིཏྟུཔྤཱདེནེཝ ཨཔྤནཾ པཱཔེཏཱི’’ཏི ཝདནྟི, ཏཾ ཏེསཾ མཏིམཏྟཾ། ན ཧི པཱརིཝཱསིཀཀམྨེན ཨཔྤནཱཝཱརོ ཨིཙྪིཏོ, ནཱཔི མཧགྒཏཔྤམཱཎཛ྄ཛྷཱནེསུ ཝིཡ ཨུཔཙཱརཛ྄ཛྷཱནེ ཨེཀནྟཏོ པཙྩཝེཀྑཎཱ ཨིཙྪིཏབྦཱ, ཏསྨཱ ཨུཔཙཱརཛ྄ཛྷཱནཱདྷིགམཏོ པརཾ ཀཏིཔཡབྷཝངྒཙིཏྟཱཝསཱནེ ཨཔྤནཾ པཱཔུཎནྟོ ‘‘སཧ ནིམིཏྟུཔྤཱདེནེཝེཏྠ ཨཔྤནཾ པཱཔེཏཱི’’ཏི ཝུཏྟོ། ‘‘སཧ ནིམིཏྟུཔྤཱདེནཱ’’ཏི ཙ ཨདྷིཔྤཱཡིཀམིདཾ ཝཙནཾ, ན ནཱིཏཏྠཾ། ཨདྷིཔྤཱཡོ ཝུཏྟནཡེནེཝ ཝེདིཏབྦོ།

Ettha ca keci ‘‘uppanne upacārajjhāne taṃ ārabbha ye heṭṭhimantena dve tayo javanavārā pavattanti, te upacārajjhānapakkhikā eva, tadanantarañca bhavaṅgaparivāsena upacārāsevanāya ca vinā appanā hoti, saha nimittuppādeneva appanaṃ pāpetī’’ti vadanti, taṃ tesaṃ matimattaṃ. Na hi pārivāsikakammena appanāvāro icchito, nāpi mahaggatappamāṇajjhānesu viya upacārajjhāne ekantato paccavekkhaṇā icchitabbā, tasmā upacārajjhānādhigamato paraṃ katipayabhavaṅgacittāvasāne appanaṃ pāpuṇanto ‘‘saha nimittuppādenevettha appanaṃ pāpetī’’ti vutto. ‘‘Saha nimittuppādenā’’ti ca adhippāyikamidaṃ vacanaṃ, na nītatthaṃ. Adhippāyo vuttanayeneva veditabbo.

ན ཨནྟོསམཱཔཏྟིཡཾ ཏདཱ ཏཐཱརཱུཔསྶ ཨཱབྷོགསྶ ཨསམྦྷཝཏོ, སམཱཔཏྟིཏོ ཝུཊྛིཏསྶ ཨཱབྷོགོ པུབྦབྷཱགབྷཱཝནཱཡ ཝསེན ཛྷཱནཀྑཎེ པཝཏྟཾ ཨབྷིབྷཝནཱཀཱརཾ གཧེཏྭཱ པཝཏྟོཏི དཊྛབྦཾ། ཨབྷིདྷམྨཊྛཀཐཱཡཾ (དྷ॰ ས॰ ཨཊྛ॰ ༢༠༤) པན ‘‘ཨིམིནཱ པནསྶ པུབྦབྷོགོ ཀཐིཏོ’’ཏི ཝུཏྟཾ། ཨནྟོསམཱཔཏྟིཡཾ ཏཐཱ ཨཱབྷོགཱབྷཱཝེ ཀསྨཱ ‘‘ཛྷཱནསཉྙཱཡཔཱི’’ཏི ཝུཏྟནྟི ཨཱཧ ‘‘ཨབྷིབྷཝན…པེ॰… ཨཏྠཱི’’ཏི།

Na antosamāpattiyaṃ tadā tathārūpassa ābhogassa asambhavato, samāpattito vuṭṭhitassa ābhogo pubbabhāgabhāvanāya vasena jhānakkhaṇe pavattaṃ abhibhavanākāraṃ gahetvā pavattoti daṭṭhabbaṃ. Abhidhammaṭṭhakathāyaṃ (dha. sa. aṭṭha. 204) pana ‘‘iminā panassa pubbabhogo kathito’’ti vuttaṃ. Antosamāpattiyaṃ tathā ābhogābhāve kasmā ‘‘jhānasaññāyapī’’ti vuttanti āha ‘‘abhibhavana…pe… atthī’’ti.

ཝཌྜྷིཏཔྤམཱཎཱནཱིཏི ཝིཔུལཔྤམཱཎཱནཱིཏི ཨཏྠོ, ན ཨེཀངྒུལདྭངྒུལཱདིཝསེན ཝཌྜྷིཾ པཱཔིཏཱནཱིཏི ཏཐཱཝཌྜྷནསྶེཝེཏྠ ཨསམྦྷཝཏོ། ཏེནཱཧ ‘‘མཧནྟཱནཱི’’ཏི། བྷཏྟཝཌྜྷིཏཀནྟི བྷུཉྫནབྷཱཛནེ ཝཌྜྷིཏྭཱ དིནྣཾ བྷཏྟཾ, ཨེཀཱསནེ པུརིསེན བྷུཉྫིཏབྦབྷཏྟཏོ ཨུཔཌྜྷབྷཏྟནྟི ཨཏྠོ།

Vaḍḍhitappamāṇānīti vipulappamāṇānīti attho, na ekaṅguladvaṅgulādivasena vaḍḍhiṃ pāpitānīti tathāvaḍḍhanassevettha asambhavato. Tenāha ‘‘mahantānī’’ti. Bhattavaḍḍhitakanti bhuñjanabhājane vaḍḍhitvā dinnaṃ bhattaṃ, ekāsane purisena bhuñjitabbabhattato upaḍḍhabhattanti attho.

རཱུཔེ སཉྙཱ རཱུཔསཉྙཱ, སཱ ཨསྶ ཨཏྠཱིཏི རཱུཔསཉྙཱི, ན རཱུཔསཉྙཱི ཨརཱུཔསཉྙཱི། སཉྙཱསཱིསེན ཛྷཱནཾ ཝདཏི། རཱུཔསཉྙཱཡ ཨནུཔྤཱདནམེཝེཏྠ ཨལཱབྷིཏཱ། བཧིདྡྷཱཝ ཨུཔྤནྣནྟི བཧིདྡྷཱཝཏྠུསྨིཾཡེཝ ཨུཔྤནྣཾ། ཨབྷིདྷམྨེ (དྷ॰ ས॰ ༢༠༤-༢༠༩) པན ‘‘ཨཛ྄ཛྷཏྟཾ ཨརཱུཔསཉྙཱི བཧིདྡྷཱ རཱུཔཱནི པསྶཏི པརིཏྟཱནི སུཝཎྞདུབྦཎྞཱནི, ཨཔྤམཱཎཱནི སུཝཎྞདུབྦཎྞཱནཱི’’ཏི ཨེཝཾ ཙཏུནྣཾ ཨབྷིབྷཱཡཏནཱནཾ ཨཱགཏཏྟཱ ཨབྷིདྷམྨཊྛཀཐཱཡཾ ‘‘ཀསྨཱ པན ཡཐཱ སུཏྟནྟེ ཨཛ྄ཛྷཏྟཾ རཱུཔསཉྙཱི ཨེཀོ བཧིདྡྷཱ རཱུཔཱནི པསྶཏི པརིཏྟཱནཱིཏིཨཱདི ཝུཏྟཾ, ཨེཝཾ ཨཝཏྭཱ ཨིདྷ ཙཏཱུསུཔི ཨབྷིབྷཱཡཏནེསུ ཨཛ྄ཛྷཏྟཾ ཨརཱུཔསཉྙིཏཱཝ ཝུཏྟཱ’’ཏི ཙོདནཾ ཀཏྭཱ ‘‘ཨཛ྄ཛྷཏྟརཱུཔཱནཾ ཨནབྷིབྷཝནཱིཡཏོ’’ཏི ཀཱརཎཾ ཝཏྭཱ ‘‘ཏཏྠ ཝཱ ཨིདྷ ཝཱ བཧིདྡྷཱ རཱུཔཱནེཝ ཨབྷིབྷཝིཏབྦཱནི, ཏསྨཱ ཏཱནི ནིཡམཏོཝ ཝཏྟབྦཱནཱིཏི ཏཏྲཱཔི ཨིདྷཱཔི ཝུཏྟཱནི, ‘ཨཛ྄ཛྷཏྟཾ རཱུཔསཉྙཱི’ཏི ཨིདཾ པན སཏྠུ དེསནཱཝིལཱསམཏྟམེཝཱ’’ཏི ཝུཏྟཾ།

Rūpe saññā rūpasaññā, sā assa atthīti rūpasaññī, na rūpasaññī arūpasaññī. Saññāsīsena jhānaṃ vadati. Rūpasaññāya anuppādanamevettha alābhitā. Bahiddhāva uppannanti bahiddhāvatthusmiṃyeva uppannaṃ. Abhidhamme (dha. sa. 204-209) pana ‘‘ajjhattaṃ arūpasaññī bahiddhā rūpāni passati parittāni suvaṇṇadubbaṇṇāni, appamāṇāni suvaṇṇadubbaṇṇānī’’ti evaṃ catunnaṃ abhibhāyatanānaṃ āgatattā abhidhammaṭṭhakathāyaṃ ‘‘kasmā pana yathā suttante ajjhattaṃ rūpasaññī eko bahiddhā rūpāni passati parittānītiādi vuttaṃ, evaṃ avatvā idha catūsupi abhibhāyatanesu ajjhattaṃ arūpasaññitāva vuttā’’ti codanaṃ katvā ‘‘ajjhattarūpānaṃ anabhibhavanīyato’’ti kāraṇaṃ vatvā ‘‘tattha vā idha vā bahiddhā rūpāneva abhibhavitabbāni, tasmā tāni niyamatova vattabbānīti tatrāpi idhāpi vuttāni, ‘ajjhattaṃ rūpasaññī’ti idaṃ pana satthu desanāvilāsamattamevā’’ti vuttaṃ.

ཨེཏྠ ཙ ཝཎྞཱབྷོགརཧིཏཱནི སཧིཏཱནི ཙ སབྦཱནི ‘‘པརིཏྟཱནི སུཝཎྞདུབྦཎྞཱནཱི’’ཏི ཝུཏྟཱནི, ཏཐཱ ‘‘ཨཔྤམཱཎཱནི སུཝཎྞདུབྦཎྞཱནཱི’’ཏི། ཨཏྠི ཧི སོ པརིཡཱཡོ ‘‘པརིཏྟཱནི ཨབྷིབྷུཡྻ, ཏཱནི ཙེ ཀདཱཙི ཝཎྞཝསེན ཨཱབྷུཛིཏཱནི ཧོནྟི སུཝཎྞདུབྦཎྞཱནི ཨབྷིབྷུཡྻཱ’’ཏི། པརིཡཱཡཀཐཱ ཧི སུཏྟནྟདེསནཱཏི། ཨབྷིདྷམྨེ པན ནིཔྤརིཡཱཡདེསནཏྟཱ ཝཎྞཱབྷོགརཧིཏཱནི ཝིསུཾ ཝུཏྟཱནི, ཏཐཱ སཧིཏཱནི། ཨཏྠི ཧི ཨུབྷཡཏྠ ཨབྷིབྷཝནཝིསེསོཏི, ཏཐཱ ཨིདྷ པརིཡཱཡདེསནཏྟཱ ཝིམོཀྑཱནམྤི ཨབྷིབྷཝནཔརིཡཱཡོ ཨཏྠཱིཏི ‘‘ཨཛ྄ཛྷཏྟཾ རཱུཔསཉྙཱི’’ཏིཨཱདིནཱ པཋམདུཏིཡཨབྷིབྷཱཡཏནེསུ པཋམཝིམོཀྑོ, ཏཏིཡཙཏུཏྠཨབྷིབྷཱཡཏནེསུ དུཏིཡཝིམོཀྑོ, ཝཎྞཱབྷིབྷཱཡཏནེསུ ཏཏིཡཝིམོཀྑོ ཙ ཨབྷིབྷཝནཔྤཝཏྟིཏོ སངྒཧིཏོ། ཨབྷིདྷམྨེ (དྷ॰ ས॰ ༢༠༤-༢༠༩, ༢༤༧-༢༤༩) པན ནིཔྤརིཡཱཡདེསནཏྟཱ ཝིམོཀྑཱབྷིབྷཱཡཏནཱནི ཨསངྐརཏོ དསྶེཏུཾ ཝིམོཀྑེ ཝཛྫེཏྭཱ ཨབྷིབྷཱཡཏནཱནི ཀཐིཏཱནི། སབྦཱནི ཙ ཝིམོཀྑཀིཙྩཱནི ཛྷཱནཱནི ཝིམོཀྑདེསནཱཡཾ ཝུཏྟཱནི། ཏདེཏཾ ‘‘ཨཛ྄ཛྷཏྟཾ རཱུཔསཉྙཱི’’ཏི ཨཱགཏསྶ ཨབྷིབྷཱཡཏནདྭཡསྶ ཨབྷིདྷམྨེ ཨབྷིབྷཱཡཏནེསུ ཨཝཙནཏོ ‘‘རཱུཔཱི རཱུཔཱནི པསྶཏཱི’’ཏིཨཱདཱིནཉྩ སབྦཝིམོཀྑཀིཙྩསཱདྷཱརཎཝཙནབྷཱཝཏོ ཝཝཏྠཱནཾ ཀཏནྟི ཝིཉྙཱཡཏི། ‘‘ཨཛ྄ཛྷཏྟརཱུཔཱནཾ ཨནབྷིབྷཝནཱིཡཏོ’’ཏི ཨིདཾ ཨབྷིདྷམྨེ ཀཏྠཙིཔི ‘‘ཨཛ྄ཛྷཏྟཾ རཱུཔཱནི པསྶཏཱི’’ཏི ཨཝཏྭཱ སབྦཏྠ ཡཾ ཝུཏྟཾ ‘‘བཧིདྡྷཱ རཱུཔཱནི པསྶཏཱི’’ཏི, ཏསྶ ཀཱརཎཝཙནཾ། ཏེན ཡཾ ཨཉྙཧེཏུཀཾ, ཏཾ ཏེན ཧེཏུནཱ ཝུཏྟཾ། ཡཾ པན དེསནཱཝིལཱསཧེཏུཀཾ ཨཛ྄ཛྷཏྟཾ ཨརཱུཔསཉྙིཏཱཡ ཨེཝ ཨབྷིདྷམྨེ ཝཙནཾ, ན ཏསྶ ཨཉྙཾ ཀཱརཎཾ མགྒིཏབྦནྟི དསྶེཏི།

Ettha ca vaṇṇābhogarahitāni sahitāni ca sabbāni ‘‘parittāni suvaṇṇadubbaṇṇānī’’ti vuttāni, tathā ‘‘appamāṇāni suvaṇṇadubbaṇṇānī’’ti. Atthi hi so pariyāyo ‘‘parittāni abhibhuyya, tāni ce kadāci vaṇṇavasena ābhujitāni honti suvaṇṇadubbaṇṇāni abhibhuyyā’’ti. Pariyāyakathā hi suttantadesanāti. Abhidhamme pana nippariyāyadesanattā vaṇṇābhogarahitāni visuṃ vuttāni, tathā sahitāni. Atthi hi ubhayattha abhibhavanavisesoti, tathā idha pariyāyadesanattā vimokkhānampi abhibhavanapariyāyo atthīti ‘‘ajjhattaṃ rūpasaññī’’tiādinā paṭhamadutiyaabhibhāyatanesu paṭhamavimokkho, tatiyacatutthaabhibhāyatanesu dutiyavimokkho, vaṇṇābhibhāyatanesu tatiyavimokkho ca abhibhavanappavattito saṅgahito. Abhidhamme (dha. sa. 204-209, 247-249) pana nippariyāyadesanattā vimokkhābhibhāyatanāni asaṅkarato dassetuṃ vimokkhe vajjetvā abhibhāyatanāni kathitāni. Sabbāni ca vimokkhakiccāni jhānāni vimokkhadesanāyaṃ vuttāni. Tadetaṃ ‘‘ajjhattaṃ rūpasaññī’’ti āgatassa abhibhāyatanadvayassa abhidhamme abhibhāyatanesu avacanato ‘‘rūpī rūpāni passatī’’tiādīnañca sabbavimokkhakiccasādhāraṇavacanabhāvato vavatthānaṃ katanti viññāyati. ‘‘Ajjhattarūpānaṃ anabhibhavanīyato’’ti idaṃ abhidhamme katthacipi ‘‘ajjhattaṃ rūpāni passatī’’ti avatvā sabbattha yaṃ vuttaṃ ‘‘bahiddhā rūpāni passatī’’ti, tassa kāraṇavacanaṃ. Tena yaṃ aññahetukaṃ, taṃ tena hetunā vuttaṃ. Yaṃ pana desanāvilāsahetukaṃ ajjhattaṃ arūpasaññitāya eva abhidhamme vacanaṃ, na tassa aññaṃ kāraṇaṃ maggitabbanti dasseti.

ཨཛ྄ཛྷཏྟརཱུཔཱནཾ ཨནབྷིབྷཝནཱིཡཏཱ ཙ ཏེསཾ བཧིདྡྷཱརཱུཔཱནཾ ཝིཡ ཨཝིབྷཱུཏཏྟཱ དེསནཱཝིལཱསོ ཙ ཡཐཱཝུཏྟཝཝཏྠཱནཝསེན ཝེདིཏབྦོ ཝེནེཡྻཛ྄ཛྷཱསཡཝསེན ཝིཛྫམཱནཔརིཡཱཡཀཐཱབྷཱཝཏོ། ‘‘སུཝཎྞདུབྦཎྞཱནཱི’’ཏི ཨེཏེནེཝ སིདྡྷཏྟཱ ན ནཱིལཱདིཨབྷིབྷཱཡཏནཱནི ཝཏྟབྦཱནཱིཏི ཙེ? ཏཾ ན། ནཱིལཱདཱིསུ ཀཏཱདྷིཀཱརཱནཾ ནཱིལཱདིབྷཱཝསྶེཝ ཨབྷིབྷཝནཀཱརཎཏྟཱ། ན ཧི ཏེསཾ པརིསུདྡྷཱཔརིསུདྡྷཝཎྞཱནཾ པརིཏྟཏཱ ཝཱ ཨཔྤམཱཎཏཱ ཝཱ ཨབྷིབྷཝནཀཱརཎཾ, ཨཐ ཁོ ནཱིལཱདིབྷཱཝོ ཨེཝཱཏི། ཨེཏེསུ ཙ པརིཏྟཱདིཀསིཎརཱུཔེསུ ཡཾ ཡཾ ཙརིཏསྶ ཨིམཱནི ཨབྷིབྷཱཡཏནཱནི ཨིཛ྄ཛྷནྟི, ཏཾ དསྶེཏུཾ ‘‘ཨིམེསུ པནཱ’’ཏིཨཱདི ཝུཏྟཾ། སབྦསངྒཱཧིཀཝསེནཱཏི ནཱིལཝཎྞནཱིལནིདསྶནནཱིལནིབྷཱསཱནཾ སཱདྷཱརཎཝསེན། ཝཎྞཝསེནཱཏི སབྷཱཝཝཎྞཝསེན། ནིདསྶནཝསེནཱཏི པསྶིཏབྦཏཱཝསེན ཙཀྑུཝིཉྙཱཎཱདིཝིཉྙཱཎཝཱིཐིཡཱ གཧེཏབྦཏཱཝསེན། ཨོབྷཱསཝསེནཱཏི སཔྤབྷཱསཏཱཡ ཨཝབྷཱསནཝསེན།

Ajjhattarūpānaṃ anabhibhavanīyatā ca tesaṃ bahiddhārūpānaṃ viya avibhūtattā desanāvilāso ca yathāvuttavavatthānavasena veditabbo veneyyajjhāsayavasena vijjamānapariyāyakathābhāvato. ‘‘Suvaṇṇadubbaṇṇānī’’ti eteneva siddhattā na nīlādiabhibhāyatanāni vattabbānīti ce? Taṃ na. Nīlādīsu katādhikārānaṃ nīlādibhāvasseva abhibhavanakāraṇattā. Na hi tesaṃ parisuddhāparisuddhavaṇṇānaṃ parittatā vā appamāṇatā vā abhibhavanakāraṇaṃ, atha kho nīlādibhāvo evāti. Etesu ca parittādikasiṇarūpesu yaṃ yaṃ caritassa imāni abhibhāyatanāni ijjhanti, taṃ dassetuṃ ‘‘imesu panā’’tiādi vuttaṃ. Sabbasaṅgāhikavasenāti nīlavaṇṇanīlanidassananīlanibhāsānaṃ sādhāraṇavasena. Vaṇṇavasenāti sabhāvavaṇṇavasena. Nidassanavasenāti passitabbatāvasena cakkhuviññāṇādiviññāṇavīthiyā gahetabbatāvasena. Obhāsavasenāti sappabhāsatāya avabhāsanavasena.

ཨིཙྪཱསུཏྟཱདིཝཎྞནཱ ནིཊྛིཏཱ།

Icchāsuttādivaṇṇanā niṭṭhitā.

Next: ༦. ཝིམོཀྑསུཏྟཝཎྞནཱ • 6. Vimokkhasuttavaṇṇanā

Related texts:

ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya
༡. ཨིཙྪཱསུཏྟཾ • 1. Icchāsuttaṃ
༢. ཨལཾསུཏྟཾ • 2. Alaṃsuttaṃ
༣. སཾཁིཏྟསུཏྟཾ • 3. Saṃkhittasuttaṃ
༤. གཡཱསཱིསསུཏྟཾ • 4. Gayāsīsasuttaṃ
༥. ཨབྷིབྷཱཡཏནསུཏྟཾ • 5. Abhibhāyatanasuttaṃ

ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā)
༡. ཨིཙྪཱསུཏྟཝཎྞནཱ • 1. Icchāsuttavaṇṇanā
༢. ཨལཾསུཏྟཝཎྞནཱ • 2. Alaṃsuttavaṇṇanā
༣. སཾཁིཏྟསུཏྟཝཎྞནཱ • 3. Saṃkhittasuttavaṇṇanā
༤. གཡཱསཱིསསུཏྟཝཎྞནཱ • 4. Gayāsīsasuttavaṇṇanā
༥. ཨབྷིབྷཱཡཏནསུཏྟཝཎྞནཱ • 5. Abhibhāyatanasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact