| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၆. ဣဒံ ဒုက္ခန္တိကထာဝဏ္ဏနာ
6. Idaṃ dukkhantikathāvaṇṇanā
၆၁၈-၈၂၀. ဣဒာနိ ဣဒံ ဒုက္ခန္တိကထာ နာမ ဟောတိ။ တတ္ထ ယေသံ ‘‘လောကုတ္တရမဂ္ဂက္ခဏေ ယောဂာဝစရော ဣဒံ ဒုက္ခန္တိ ဝာစံ ဘာသတိ, ဧဝမသ္သ ဣဒံ ဒုက္ခန္တိ ဝာစံ ဘာသတော စ ဣဒံ ဒုက္ခန္တိ ဉာဏံ ပဝတ္တတီ’’တိ လဒ္ဓိ, သေယ္ယထာပိ အန္ဓကာနံ; တေ သန္ဓာယ ပုစ္ဆာ သကဝာဒိသ္သ, မဂ္ဂက္ခဏေ တထာ ဝာစာဘာသနံ ဉာဏပ္ပဝတ္တိဉ္စ သန္ဓာယ ပဋိညာ ဣတရသ္သ။ ယသ္မာ ပန သော သေသသစ္စပဋိသံယုတ္တံ ဝာစံ ပုထုဇ္ဇနောဝ ဘာသတိ , န စ တသ္သ တထာ ဉာဏပ္ပဝတ္တီတိ ဣစ္ဆတိ, တသ္မာ သမုဒယာဒိပဉ္ဟေသု ပဋိက္ခိပတိ။ ရူပံ အနိစ္စန္တိအာဒိ ဒုက္ခပရိယာယဒသ္သနဝသေန ဝုတ္တံ။ ဣတရော ပန သကသမယေ တာဒိသံ ဝောဟာရံ အပသ္သန္တော ပဋိက္ခိပတိ။ ဣတိ စ ဒန္တိ စာတိအာဒိ ယဒိ တသ္သ ဒုက္ခေ ဉာဏံ ပဝတ္တတိ, ဣ-ကာရ ဒံ-ကာရ ဒု-ကာရ ခ-ကာရေသု ပဋိပာဋိယာ စတူဟိ ဉာဏေဟိ ပဝတ္တိတဗ္ဗန္တိ ဒသ္သေတုံ ဝုတ္တံ။ ဣတရော ပန တထာ န ဣစ္ဆတိ, တသ္မာ ပဋိက္ခိပတိ။
618-620. Idāni idaṃ dukkhantikathā nāma hoti. Tattha yesaṃ ‘‘lokuttaramaggakkhaṇe yogāvacaro idaṃ dukkhanti vācaṃ bhāsati, evamassa idaṃ dukkhanti vācaṃ bhāsato ca idaṃ dukkhanti ñāṇaṃ pavattatī’’ti laddhi, seyyathāpi andhakānaṃ; te sandhāya pucchā sakavādissa, maggakkhaṇe tathā vācābhāsanaṃ ñāṇappavattiñca sandhāya paṭiññā itarassa. Yasmā pana so sesasaccapaṭisaṃyuttaṃ vācaṃ puthujjanova bhāsati , na ca tassa tathā ñāṇappavattīti icchati, tasmā samudayādipañhesu paṭikkhipati. Rūpaṃ aniccantiādi dukkhapariyāyadassanavasena vuttaṃ. Itaro pana sakasamaye tādisaṃ vohāraṃ apassanto paṭikkhipati. Iti ca danti cātiādi yadi tassa dukkhe ñāṇaṃ pavattati, i-kāra daṃ-kāra du-kāra kha-kāresu paṭipāṭiyā catūhi ñāṇehi pavattitabbanti dassetuṃ vuttaṃ. Itaro pana tathā na icchati, tasmā paṭikkhipati.
ဣဒံ ဒုက္ခန္တိကထာဝဏ္ဏနာ။
Idaṃ dukkhantikathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၁၁၁) ၆. ဣဒံ ဒုက္ခန္တိကထာ • (111) 6. Idaṃ dukkhantikathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၆. ဣဒံဒုက္ခန္တိကထာဝဏ္ဏနာ • 6. Idaṃdukkhantikathāvaṇṇanā
