| Library / Tipiṭaka / ཏིཔིཊཀ • Tipiṭaka / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā |
༦. ཨིདཾ དུཀྑནྟིཀཐཱཝཎྞནཱ
6. Idaṃ dukkhantikathāvaṇṇanā
༦༡༨-༨༢༠. ཨིདཱནི ཨིདཾ དུཀྑནྟིཀཐཱ ནཱམ ཧོཏི། ཏཏྠ ཡེསཾ ‘‘ལོཀུཏྟརམགྒཀྑཎེ ཡོགཱཝཙརོ ཨིདཾ དུཀྑནྟི ཝཱཙཾ བྷཱསཏི, ཨེཝམསྶ ཨིདཾ དུཀྑནྟི ཝཱཙཾ བྷཱསཏོ ཙ ཨིདཾ དུཀྑནྟི ཉཱཎཾ པཝཏྟཏཱི’’ཏི ལདྡྷི, སེཡྻཐཱཔི ཨནྡྷཀཱནཾ; ཏེ སནྡྷཱཡ པུཙྪཱ སཀཝཱདིསྶ, མགྒཀྑཎེ ཏཐཱ ཝཱཙཱབྷཱསནཾ ཉཱཎཔྤཝཏྟིཉྩ སནྡྷཱཡ པཊིཉྙཱ ཨིཏརསྶ། ཡསྨཱ པན སོ སེསསཙྩཔཊིསཾཡུཏྟཾ ཝཱཙཾ པུཐུཛྫནོཝ བྷཱསཏི , ན ཙ ཏསྶ ཏཐཱ ཉཱཎཔྤཝཏྟཱིཏི ཨིཙྪཏི, ཏསྨཱ སམུདཡཱདིཔཉྷེསུ པཊིཀྑིཔཏི། རཱུཔཾ ཨནིཙྩནྟིཨཱདི དུཀྑཔརིཡཱཡདསྶནཝསེན ཝུཏྟཾ། ཨིཏརོ པན སཀསམཡེ ཏཱདིསཾ ཝོཧཱརཾ ཨཔསྶནྟོ པཊིཀྑིཔཏི། ཨིཏི ཙ དནྟི ཙཱཏིཨཱདི ཡདི ཏསྶ དུཀྑེ ཉཱཎཾ པཝཏྟཏི, ཨི-ཀཱར དཾ-ཀཱར དུ-ཀཱར ཁ-ཀཱརེསུ པཊིཔཱཊིཡཱ ཙཏཱུཧི ཉཱཎེཧི པཝཏྟིཏབྦནྟི དསྶེཏུཾ ཝུཏྟཾ། ཨིཏརོ པན ཏཐཱ ན ཨིཙྪཏི, ཏསྨཱ པཊིཀྑིཔཏི།
618-620. Idāni idaṃ dukkhantikathā nāma hoti. Tattha yesaṃ ‘‘lokuttaramaggakkhaṇe yogāvacaro idaṃ dukkhanti vācaṃ bhāsati, evamassa idaṃ dukkhanti vācaṃ bhāsato ca idaṃ dukkhanti ñāṇaṃ pavattatī’’ti laddhi, seyyathāpi andhakānaṃ; te sandhāya pucchā sakavādissa, maggakkhaṇe tathā vācābhāsanaṃ ñāṇappavattiñca sandhāya paṭiññā itarassa. Yasmā pana so sesasaccapaṭisaṃyuttaṃ vācaṃ puthujjanova bhāsati , na ca tassa tathā ñāṇappavattīti icchati, tasmā samudayādipañhesu paṭikkhipati. Rūpaṃ aniccantiādi dukkhapariyāyadassanavasena vuttaṃ. Itaro pana sakasamaye tādisaṃ vohāraṃ apassanto paṭikkhipati. Iti ca danti cātiādi yadi tassa dukkhe ñāṇaṃ pavattati, i-kāra daṃ-kāra du-kāra kha-kāresu paṭipāṭiyā catūhi ñāṇehi pavattitabbanti dassetuṃ vuttaṃ. Itaro pana tathā na icchati, tasmā paṭikkhipati.
ཨིདཾ དུཀྑནྟིཀཐཱཝཎྞནཱ།
Idaṃ dukkhantikathāvaṇṇanā.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / ཀཐཱཝཏྠུཔཱལི༹ • Kathāvatthupāḷi / (༡༡༡) ༦. ཨིདཾ དུཀྑནྟིཀཐཱ • (111) 6. Idaṃ dukkhantikathā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༦. ཨིདཾདུཀྑནྟིཀཐཱཝཎྞནཱ • 6. Idaṃdukkhantikathāvaṇṇanā
