| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
9. இத்³தா⁴தி³தே³ஸனாஸுத்தங்
9. Iddhādidesanāsuttaṃ
831. ‘‘இத்³தி⁴ங் வோ, பி⁴க்க²வே, தே³ஸெஸ்ஸாமி இத்³தி⁴பாத³ஞ்ச இத்³தி⁴பாத³பா⁴வனஞ்ச இத்³தி⁴பாத³பா⁴வனாகா³மினிஞ்ச படிபத³ங். தங் ஸுணாத².
831. ‘‘Iddhiṃ vo, bhikkhave, desessāmi iddhipādañca iddhipādabhāvanañca iddhipādabhāvanāgāminiñca paṭipadaṃ. Taṃ suṇātha.
‘‘கதமா ச, பி⁴க்க²வே, இத்³தி⁴? இத⁴, பி⁴க்க²வே, பி⁴க்கு² அனேகவிஹிதங் இத்³தி⁴வித⁴ங் பச்சனுபோ⁴தி – ஏகோபி ஹுத்வா ப³ஹுதா⁴ ஹோதி, ப³ஹுதா⁴பி ஹுத்வா ஏகோ ஹோதி…பே॰… யாவ ப்³ரஹ்மலோகாபி காயேன வஸங் வத்தேதி – அயங் வுச்சதி, பி⁴க்க²வே, இத்³தி⁴.
‘‘Katamā ca, bhikkhave, iddhi? Idha, bhikkhave, bhikkhu anekavihitaṃ iddhividhaṃ paccanubhoti – ekopi hutvā bahudhā hoti, bahudhāpi hutvā eko hoti…pe… yāva brahmalokāpi kāyena vasaṃ vatteti – ayaṃ vuccati, bhikkhave, iddhi.
‘‘கதமோ ச, பி⁴க்க²வே, இத்³தி⁴பாதோ³? யோ ஸோ, பி⁴க்க²வே, மக்³கோ³ யா படிபதா³ இத்³தி⁴லாபா⁴ய இத்³தி⁴படிலாபா⁴ய ஸங்வத்ததி – அயங் வுச்சதி, பி⁴க்க²வே, இத்³தி⁴பாதோ³.
‘‘Katamo ca, bhikkhave, iddhipādo? Yo so, bhikkhave, maggo yā paṭipadā iddhilābhāya iddhipaṭilābhāya saṃvattati – ayaṃ vuccati, bhikkhave, iddhipādo.
‘‘கதமா ச, பி⁴க்க²வே, இத்³தி⁴பாத³பா⁴வனா? இத⁴, பி⁴க்க²வே, பி⁴க்கு² ச²ந்த³ஸமாதி⁴ப்பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி, வீரியஸமாதி⁴…பே॰… சித்தஸமாதி⁴ …பே॰… வீமங்ஸாஸமாதி⁴ப்பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி – அயங் வுச்சதி, பி⁴க்க²வே, இத்³தி⁴பாத³பா⁴வனா.
‘‘Katamā ca, bhikkhave, iddhipādabhāvanā? Idha, bhikkhave, bhikkhu chandasamādhippadhānasaṅkhārasamannāgataṃ iddhipādaṃ bhāveti, vīriyasamādhi…pe… cittasamādhi …pe… vīmaṃsāsamādhippadhānasaṅkhārasamannāgataṃ iddhipādaṃ bhāveti – ayaṃ vuccati, bhikkhave, iddhipādabhāvanā.
‘‘கதமா ச, பி⁴க்க²வே, இத்³தி⁴பாத³பா⁴வனாகா³மினீ படிபதா³? அயமேவ அரியோ அட்ட²ங்கி³கோ மக்³கோ³, ஸெய்யதி²த³ங் – ஸம்மாதி³ட்டி², ஸம்மாஸங்கப்போ, ஸம்மாவாசா, ஸம்மாகம்மந்தோ, ஸம்மாஆஜீவோ, ஸம்மாவாயாமோ, ஸம்மாஸதி, ஸம்மாஸமாதி⁴ – அயங் வுச்சதி, பி⁴க்க²வே, இத்³தி⁴பாத³பா⁴வனாகா³மினீ படிபதா³’’தி. நவமங்.
‘‘Katamā ca, bhikkhave, iddhipādabhāvanāgāminī paṭipadā? Ayameva ariyo aṭṭhaṅgiko maggo, seyyathidaṃ – sammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi – ayaṃ vuccati, bhikkhave, iddhipādabhāvanāgāminī paṭipadā’’ti. Navamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9. இத்³தா⁴தி³தே³ஸனாஸுத்தவண்ணனா • 9. Iddhādidesanāsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. இத்³தா⁴தி³தே³ஸனாஸுத்தவண்ணனா • 9. Iddhādidesanāsuttavaṇṇanā
