| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
10. இத்³தி⁴ப³லத³ஸ்ஸனபஞ்ஹோ
10. Iddhibaladassanapañho
10. ‘‘ப⁴ந்தே நாக³ஸேன, பா⁴ஸிதம்பேதங் ப⁴க³வதா ‘ததா²க³தஸ்ஸ கோ², ஆனந்த³, சத்தாரோ இத்³தி⁴பாதா³ பா⁴விதா ப³ஹுலீகதா யானீகதா வத்து²கதா அனுட்டி²தா பரிசிதா ஸுஸமாரத்³தா⁴, ஸோ ஆகங்க²மானோ, ஆனந்த³, ததா²க³தோ கப்பங் வா திட்டெ²ய்ய கப்பாவஸேஸங் வா’தி. புன ச ப⁴ணிதங் ‘இதோ திண்ணங் மாஸானங் அச்சயேன ததா²க³தோ பரினிப்³பா³யிஸ்ஸதீ’தி. யதி³, ப⁴ந்தே நாக³ஸேன, ப⁴க³வதா ப⁴ணிதங் ‘ததா²க³தஸ்ஸ கோ², ஆனந்த³, சத்தாரோ இத்³தி⁴பாதா³ பா⁴விதா…பே॰… கப்பாவஸேஸங் வா’தி, தேன ஹி தேமாஸபரிச்சே²தோ³ மிச்சா². யதி³, ப⁴ந்தே, ததா²க³தேன ப⁴ணிதங் ‘இதோ திண்ணங் மாஸானங் அச்சயேன ததா²க³தோ பரினிப்³பா³யிஸ்ஸதீ’தி, தேன ஹி ‘‘ததா²க³தஸ்ஸ கோ², ஆனந்த³, சத்தாரோ இத்³தி⁴பாதா³ பா⁴விதா…பே॰… கப்பாவஸேஸங் வா’தி தம்பி வசனங் மிச்சா². நத்தி² ததா²க³தானங் அட்டா²னே க³ஜ்ஜிதங். அமோக⁴வசனா பு³த்³தா⁴ ப⁴க³வந்தோ தத²வசனா அத்³வெஜ்ஜ²வசனா. அயம்பி உப⁴தோ கோடிகோ பஞ்ஹோ க³ம்பீ⁴ரோ ஸுனிபுணோ து³ன்னிஜ்ஜா²பயோ தவானுப்பத்தோ, பி⁴ந்தே³தங் தி³ட்டி²ஜாலங், ஏகங்ஸே ட²பய, பி⁴ந்த³ பரவாத³’’ந்தி.
10. ‘‘Bhante nāgasena, bhāsitampetaṃ bhagavatā ‘tathāgatassa kho, ānanda, cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā, so ākaṅkhamāno, ānanda, tathāgato kappaṃ vā tiṭṭheyya kappāvasesaṃ vā’ti. Puna ca bhaṇitaṃ ‘ito tiṇṇaṃ māsānaṃ accayena tathāgato parinibbāyissatī’ti. Yadi, bhante nāgasena, bhagavatā bhaṇitaṃ ‘tathāgatassa kho, ānanda, cattāro iddhipādā bhāvitā…pe… kappāvasesaṃ vā’ti, tena hi temāsaparicchedo micchā. Yadi, bhante, tathāgatena bhaṇitaṃ ‘ito tiṇṇaṃ māsānaṃ accayena tathāgato parinibbāyissatī’ti, tena hi ‘‘tathāgatassa kho, ānanda, cattāro iddhipādā bhāvitā…pe… kappāvasesaṃ vā’ti tampi vacanaṃ micchā. Natthi tathāgatānaṃ aṭṭhāne gajjitaṃ. Amoghavacanā buddhā bhagavanto tathavacanā advejjhavacanā. Ayampi ubhato koṭiko pañho gambhīro sunipuṇo dunnijjhāpayo tavānuppatto, bhindetaṃ diṭṭhijālaṃ, ekaṃse ṭhapaya, bhinda paravāda’’nti.
‘‘பா⁴ஸிதம்பேதங், மஹாராஜ, ப⁴க³வதா ‘ததா²க³தஸ்ஸ கோ², ஆனந்த³, சத்தாரோ இத்³தி⁴பாதா³ பா⁴விதா…பே॰… கப்பாவஸேஸங் வா’தி, தேமாஸபரிச்சே²தோ³ ச ப⁴ணிதோ, ஸோ ச பன கப்போ ஆயுகப்போ வுச்சதி. ந, மஹாராஜ, ப⁴க³வா அத்தனோ ப³லங் கித்தயமானோ ஏவமாஹ, இத்³தி⁴ப³லங் பன மஹாராஜ, ப⁴க³வா பரிகித்தயமானோ ஏவமாஹ ‘ததா²க³தஸ்ஸ கோ², ஆனந்த³, சத்தாரோ இத்³தி⁴பாதா³ பா⁴விதா…பே॰… கப்பாவஸேஸங் வா’தி.
‘‘Bhāsitampetaṃ, mahārāja, bhagavatā ‘tathāgatassa kho, ānanda, cattāro iddhipādā bhāvitā…pe… kappāvasesaṃ vā’ti, temāsaparicchedo ca bhaṇito, so ca pana kappo āyukappo vuccati. Na, mahārāja, bhagavā attano balaṃ kittayamāno evamāha, iddhibalaṃ pana mahārāja, bhagavā parikittayamāno evamāha ‘tathāgatassa kho, ānanda, cattāro iddhipādā bhāvitā…pe… kappāvasesaṃ vā’ti.
‘‘யதா², மஹாராஜ, ரஞ்ஞோ அஸ்ஸாஜானீயோ ப⁴வெய்ய ஸீக⁴க³தி அனிலஜவோ, தஸ்ஸ ராஜா ஜவப³லங் பரிகித்தயந்தோ ஸனேக³மஜானபத³ப⁴டப³லப்³ராஹ்மணக³ஹபதிகஅமச்சஜனமஜ்ஜே² ஏவங் வதெ³ய்ய ‘ஆகங்க²மானோ மே, போ⁴, அயங் ஹயவரோ ஸாக³ரஜலபரியந்தங் மஹிங் அனுவிசரித்வா க²ணேன இதா⁴க³ச்செ²ய்யா’தி, ந ச தங் ஜவக³திங் தஸ்ஸங் பரிஸாயங் த³ஸ்ஸெய்ய, விஜ்ஜதி ச ஸோ ஜவோ தஸ்ஸ, ஸமத்தோ² ச ஸோ க²ணேன ஸாக³ரஜலபரியந்தங் மஹிங் அனுவிசரிதுங். ஏவமேவ கோ², மஹாராஜ, ப⁴க³வா அத்தனோ இத்³தி⁴ப³லங் பரிகித்தயமானோ ஏவமாஹ, தம்பி தேவிஜ்ஜானங் ச²ளபி⁴ஞ்ஞானங் அரஹந்தானங் விமலகீ²ணாஸவானங் தே³வமனுஸ்ஸானஞ்ச மஜ்ஜே² நிஸீதி³த்வா ப⁴ணிதங் ‘ததா²க³தஸ்ஸ கோ², ஆனந்த³, சத்தாரோ இத்³தி⁴பாதா³ பா⁴விதா ப³ஹுலீகதா யானீகதா வத்து²கதா அனுட்டி²தா பரிசிதா ஸுஸமாரத்³தா⁴, ஸோ ஆகங்க²மானோ, ஆனந்த³, ததா²க³தோ கப்பங் வா திட்டெ²ய்ய கப்பாவஸேஸங் வா’தி. விஜ்ஜதி ச தங், மஹாராஜ, இத்³தி⁴ப³லங் ப⁴க³வதோ, ஸமத்தோ² ச ப⁴க³வா இத்³தி⁴ப³லேன கப்பங் வா டா²துங் கப்பாவஸேஸங் வா, ந ச ப⁴க³வா தங் இத்³தி⁴ப³லங் தஸ்ஸங் பரிஸாயங் த³ஸ்ஸேதி, அனத்தி²கோ, மஹாராஜ, ப⁴க³வா ஸப்³ப³ப⁴வேஹி, க³ரஹிதா ச ததா²க³தஸ்ஸ ஸப்³ப³ப⁴வா. பா⁴ஸிதம்பேதங், மஹாராஜ, ப⁴க³வதா ‘ஸெய்யதா²பி, பி⁴க்க²வே, அப்பமத்தகோபி கூ³தோ² து³க்³க³ந்தோ⁴ ஹோதி . ஏவமேவ கோ² அஹங், பி⁴க்க²வே, அப்பமத்தகம்பி ப⁴வங் ந வண்ணேமி அந்தமஸோ அச்ச²ராஸங்கா⁴தமத்தம்பீ’தி அபி நு கோ², மஹாராஜ, ப⁴க³வா ஸப்³ப³ப⁴வக³தியோனியோ கூ³த²ஸமங் தி³ஸ்வா இத்³தி⁴ப³லங் நிஸ்ஸாய ப⁴வேஸு ச²ந்த³ராக³ங் கரெய்யா’’தி? ‘‘ந ஹி ப⁴ந்தே’’தி. ‘‘தேன ஹி, மஹாராஜ, ப⁴க³வா இத்³தி⁴ப³லங் பரிகித்தயமானோ ஏவரூபங் பு³த்³த⁴ஸீஹனாத³மபி⁴னதீ³’’தி. ‘‘ஸாது⁴, ப⁴ந்தே நாக³ஸேன, ஏவமேதங் ததா² ஸம்படிச்சா²மீ’’தி.
‘‘Yathā, mahārāja, rañño assājānīyo bhaveyya sīghagati anilajavo, tassa rājā javabalaṃ parikittayanto sanegamajānapadabhaṭabalabrāhmaṇagahapatikaamaccajanamajjhe evaṃ vadeyya ‘ākaṅkhamāno me, bho, ayaṃ hayavaro sāgarajalapariyantaṃ mahiṃ anuvicaritvā khaṇena idhāgaccheyyā’ti, na ca taṃ javagatiṃ tassaṃ parisāyaṃ dasseyya, vijjati ca so javo tassa, samattho ca so khaṇena sāgarajalapariyantaṃ mahiṃ anuvicarituṃ. Evameva kho, mahārāja, bhagavā attano iddhibalaṃ parikittayamāno evamāha, tampi tevijjānaṃ chaḷabhiññānaṃ arahantānaṃ vimalakhīṇāsavānaṃ devamanussānañca majjhe nisīditvā bhaṇitaṃ ‘tathāgatassa kho, ānanda, cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā, so ākaṅkhamāno, ānanda, tathāgato kappaṃ vā tiṭṭheyya kappāvasesaṃ vā’ti. Vijjati ca taṃ, mahārāja, iddhibalaṃ bhagavato, samattho ca bhagavā iddhibalena kappaṃ vā ṭhātuṃ kappāvasesaṃ vā, na ca bhagavā taṃ iddhibalaṃ tassaṃ parisāyaṃ dasseti, anatthiko, mahārāja, bhagavā sabbabhavehi, garahitā ca tathāgatassa sabbabhavā. Bhāsitampetaṃ, mahārāja, bhagavatā ‘seyyathāpi, bhikkhave, appamattakopi gūtho duggandho hoti . Evameva kho ahaṃ, bhikkhave, appamattakampi bhavaṃ na vaṇṇemi antamaso accharāsaṅghātamattampī’ti api nu kho, mahārāja, bhagavā sabbabhavagatiyoniyo gūthasamaṃ disvā iddhibalaṃ nissāya bhavesu chandarāgaṃ kareyyā’’ti? ‘‘Na hi bhante’’ti. ‘‘Tena hi, mahārāja, bhagavā iddhibalaṃ parikittayamāno evarūpaṃ buddhasīhanādamabhinadī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
இத்³தி⁴ப³லத³ஸ்ஸனபஞ்ஹோ த³ஸமோ.
Iddhibaladassanapañho dasamo.
இத்³தி⁴ப³லவக்³கோ³ பட²மோ.
Iddhibalavaggo paṭhamo.
இமஸ்மிங் வக்³கே³ த³ஸ பஞ்ஹா.
Imasmiṃ vagge dasa pañhā.
