| Library / Tipiṭaka / திபிடக • Tipiṭaka / கதா²வத்து²பாளி • Kathāvatthupāḷi |
11. ஏகாத³ஸமவக்³கோ³
11. Ekādasamavaggo
(112) 7. இத்³தி⁴ப³லகதா²
(112) 7. Iddhibalakathā
621. இத்³தி⁴ப³லேன ஸமன்னாக³தோ கப்பங் திட்டெ²ய்யாதி? ஆமந்தா. இத்³தி⁴மயிகோ ஸோ ஆயு, இத்³தி⁴மயிகா ஸா க³தி, இத்³தி⁴மயிகோ ஸோ அத்தபா⁴வப்படிலாபோ⁴தி? ந ஹேவங் வத்தப்³பே³…பே॰….
621. Iddhibalena samannāgato kappaṃ tiṭṭheyyāti? Āmantā. Iddhimayiko so āyu, iddhimayikā sā gati, iddhimayiko so attabhāvappaṭilābhoti? Na hevaṃ vattabbe…pe….
இத்³தி⁴ப³லேன ஸமன்னாக³தோ கப்பங் திட்டெ²ய்யாதி? ஆமந்தா. அதீதங் கப்பங் திட்டெ²ய்ய, அனாக³தங் கப்பங் திட்டெ²ய்யாதி? ந ஹேவங் வத்தப்³பே³…பே॰… இத்³தி⁴ப³லேன ஸமன்னாக³தோ கப்பங் திட்டெ²ய்யாதி? ஆமந்தா. த்³வே கப்பே திட்டெ²ய்ய, தயோ கப்பே திட்டெ²ய்ய, சத்தாரோ கப்பே திட்டெ²ய்யாதி? ந ஹேவங் வத்தப்³பே³…பே॰… இத்³தி⁴ப³லேன ஸமன்னாக³தோ கப்பங் திட்டெ²ய்யாதி? ஆமந்தா. ஸதி ஜீவிதே ஜீவிதாவஸேஸே திட்டெ²ய்ய, அஸதி ஜீவிதே ஜீவிதாவஸேஸே திட்டெ²ய்யாதி? ஸதி ஜீவிதே ஜீவிதாவஸேஸே திட்டெ²ய்யாதி. ஹஞ்சி ஸதி ஜீவிதே ஜீவிதாவஸேஸே திட்டெ²ய்ய, நோ ச வத ரே வத்தப்³பே³ – ‘‘இத்³தி⁴ப³லேன ஸமன்னாக³தோ கப்பங் திட்டெ²ய்யா’’தி. அஸதி ஜீவிதே ஜீவிதாவஸேஸே திட்டெ²ய்யாதி, மதோ திட்டெ²ய்ய, காலங்கதோ திட்டெ²ய்யாதி? ந ஹேவங் வத்தப்³பே³…பே॰….
Iddhibalena samannāgato kappaṃ tiṭṭheyyāti? Āmantā. Atītaṃ kappaṃ tiṭṭheyya, anāgataṃ kappaṃ tiṭṭheyyāti? Na hevaṃ vattabbe…pe… iddhibalena samannāgato kappaṃ tiṭṭheyyāti? Āmantā. Dve kappe tiṭṭheyya, tayo kappe tiṭṭheyya, cattāro kappe tiṭṭheyyāti? Na hevaṃ vattabbe…pe… iddhibalena samannāgato kappaṃ tiṭṭheyyāti? Āmantā. Sati jīvite jīvitāvasese tiṭṭheyya, asati jīvite jīvitāvasese tiṭṭheyyāti? Sati jīvite jīvitāvasese tiṭṭheyyāti. Hañci sati jīvite jīvitāvasese tiṭṭheyya, no ca vata re vattabbe – ‘‘iddhibalena samannāgato kappaṃ tiṭṭheyyā’’ti. Asati jīvite jīvitāvasese tiṭṭheyyāti, mato tiṭṭheyya, kālaṅkato tiṭṭheyyāti? Na hevaṃ vattabbe…pe….
622. இத்³தி⁴ப³லேன ஸமன்னாக³தோ கப்பங் திட்டெ²ய்யாதி? ஆமந்தா. உப்பன்னோ ப²ஸ்ஸோ மா நிருஜ்ஜீ²தி லப்³பா⁴ இத்³தி⁴யா பக்³க³ஹேதுந்தி? ந ஹேவங் வத்தப்³பே³…பே॰… உப்பன்னா வேத³னா…பே॰… உப்பன்னா ஸஞ்ஞா …பே॰… உப்பன்னா சேதனா…பே॰… உப்பன்னங் சித்தங்… உப்பன்னா ஸத்³தா⁴… உப்பன்னங் வீரியங்… உப்பன்னா ஸதி… உப்பன்னோ ஸமாதி⁴ …பே॰… உப்பன்னா பஞ்ஞா மா நிருஜ்ஜீ²தி லப்³பா⁴ இத்³தி⁴யா பக்³க³ஹேதுந்தி? ந ஹேவங் வத்தப்³பே³…பே॰….
622. Iddhibalena samannāgato kappaṃ tiṭṭheyyāti? Āmantā. Uppanno phasso mā nirujjhīti labbhā iddhiyā paggahetunti? Na hevaṃ vattabbe…pe… uppannā vedanā…pe… uppannā saññā …pe… uppannā cetanā…pe… uppannaṃ cittaṃ… uppannā saddhā… uppannaṃ vīriyaṃ… uppannā sati… uppanno samādhi …pe… uppannā paññā mā nirujjhīti labbhā iddhiyā paggahetunti? Na hevaṃ vattabbe…pe….
இத்³தி⁴ப³லேன ஸமன்னாக³தோ கப்பங் திட்டெ²ய்யாதி? ஆமந்தா. ரூபங் நிச்சங் ஹோதூதி லப்³பா⁴ இத்³தி⁴யா பக்³க³ஹேதுந்தி? ந ஹேவங் வத்தப்³பே³…பே॰… வேத³னா…பே॰… ஸஞ்ஞா… ஸங்கா²ரா… விஞ்ஞாணங் நிச்சங் ஹோதூதி லப்³பா⁴ இத்³தி⁴யா பக்³க³ஹேதுந்தி? ந ஹேவங் வத்தப்³பே³…பே॰….
Iddhibalena samannāgato kappaṃ tiṭṭheyyāti? Āmantā. Rūpaṃ niccaṃ hotūti labbhā iddhiyā paggahetunti? Na hevaṃ vattabbe…pe… vedanā…pe… saññā… saṅkhārā… viññāṇaṃ niccaṃ hotūti labbhā iddhiyā paggahetunti? Na hevaṃ vattabbe…pe….
இத்³தி⁴ப³லேன ஸமன்னாக³தோ கப்பங் திட்டெ²ய்யாதி? ஆமந்தா. ஜாதித⁴ம்மா ஸத்தா மா ஜாயிங்ஸூதி லப்³பா⁴ இத்³தி⁴யா பக்³க³ஹேதுந்தி? ந ஹேவங் வத்தப்³பே³…பே॰… ஜராத⁴ம்மா ஸத்தா மா ஜீரிங்ஸூதி…பே॰… ப்³யாதி⁴த⁴ம்மா ஸத்தா மா ப்³யாதி⁴யிங்ஸூதி…பே॰… மரணத⁴ம்மா ஸத்தா மா மீயிங்ஸூதி லப்³பா⁴ இத்³தி⁴யா பக்³க³ஹேதுந்தி? ந ஹேவங் வத்தப்³பே³…பே॰….
Iddhibalena samannāgato kappaṃ tiṭṭheyyāti? Āmantā. Jātidhammā sattā mā jāyiṃsūti labbhā iddhiyā paggahetunti? Na hevaṃ vattabbe…pe… jarādhammā sattā mā jīriṃsūti…pe… byādhidhammā sattā mā byādhiyiṃsūti…pe… maraṇadhammā sattā mā mīyiṃsūti labbhā iddhiyā paggahetunti? Na hevaṃ vattabbe…pe….
623. ந வத்தப்³ப³ங் – ‘‘இத்³தி⁴ப³லேன ஸமன்னாக³தோ கப்பங் திட்டெ²ய்யா’’தி? ஆமந்தா. நனு வுத்தங் ப⁴க³வதா – ‘‘யஸ்ஸ கஸ்ஸசி, ஆனந்த³, சத்தாரோ இத்³தி⁴பாதா³ பா⁴விதா ப³ஹுலீகதா யானீகதா வத்து²கதா அனுட்டி²தா பரிசிதா ஸுஸமாரத்³தா⁴, ஸோ ஆகங்க²மானோ கப்பங் வா திட்டெ²ய்ய கப்பாவஸேஸங் வா’’தி 1! அத்தே²வ ஸுத்தந்தோதி? ஆமந்தா. தேன ஹி இத்³தி⁴ப³லேன ஸமன்னாக³தோ கப்பங் திட்டெ²ய்யாதி.
623. Na vattabbaṃ – ‘‘iddhibalena samannāgato kappaṃ tiṭṭheyyā’’ti? Āmantā. Nanu vuttaṃ bhagavatā – ‘‘yassa kassaci, ānanda, cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā, so ākaṅkhamāno kappaṃ vā tiṭṭheyya kappāvasesaṃ vā’’ti 2! Attheva suttantoti? Āmantā. Tena hi iddhibalena samannāgato kappaṃ tiṭṭheyyāti.
624. இத்³தி⁴ப³லேன ஸமன்னாக³தோ கப்பங் திட்டெ²ய்யாதி? ஆமந்தா. நனு வுத்தங் ப⁴க³வதா – ‘‘சதுன்னங், பி⁴க்க²வே, த⁴ம்மானங் நத்தி² கோசி பாடிபோ⁴கோ³ ஸமணோ வா ப்³ராஹ்மணோ வா தே³வோ வா மாரோ வா ப்³ரஹ்மா வா கோசி வா லோகஸ்மிங்! கதமேஸங் சதுன்னங்? ஜராத⁴ம்மோ ‘‘மா ஜீரீ’’தி நத்தி² கோசி பாடிபோ⁴கோ³ ஸமணோ வா ப்³ராஹ்மணோ வா தே³வோ வா மாரோ வா ப்³ரஹ்மா வா கோசி வா லோகஸ்மிங். ப்³யாதி⁴த⁴ம்மோ ‘‘மா ப்³யாதி⁴யீ’’தி…பே॰… மரணத⁴ம்மோ ‘‘மா மீயீ’’தி…பே॰… யானி கோ² பன தானி புப்³பே³ கதானி பாபகானி கம்மானி ஸங்கிலேஸிகானி போனொப்³ப⁴விகானி 3 ஸத³ரானி 4 து³க்க²விபாகானி ஆயதிங் ஜாதிஜராமரணியானி தேஸங் விபாகோ ‘‘மா நிப்³ப³த்தீ’’தி நத்தி² கோசி பாடிபோ⁴கோ³ ஸமணோ வா ப்³ராஹ்மணோ வா தே³வோ வா மாரோ வா ப்³ரஹ்மா வா கோசி வா லோகஸ்மிங். இமேஸங் கோ², பி⁴க்க²வே, சதுன்னங் த⁴ம்மானங் நத்தி² கோசி பாடிபோ⁴கோ³ ஸமணோ வா ப்³ராஹ்மணோ வா தே³வோ வா மாரோ வா ப்³ரஹ்மா வா கோசி வா லோகஸ்மி’’ந்தி 5. அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ங் – ‘‘இத்³தி⁴ப³லேன ஸமன்னாக³தோ கப்பங் திட்டெ²ய்யா’’தி.
624. Iddhibalena samannāgato kappaṃ tiṭṭheyyāti? Āmantā. Nanu vuttaṃ bhagavatā – ‘‘catunnaṃ, bhikkhave, dhammānaṃ natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmiṃ! Katamesaṃ catunnaṃ? Jarādhammo ‘‘mā jīrī’’ti natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmiṃ. Byādhidhammo ‘‘mā byādhiyī’’ti…pe… maraṇadhammo ‘‘mā mīyī’’ti…pe… yāni kho pana tāni pubbe katāni pāpakāni kammāni saṃkilesikāni ponobbhavikāni 6 sadarāni 7 dukkhavipākāni āyatiṃ jātijarāmaraṇiyāni tesaṃ vipāko ‘‘mā nibbattī’’ti natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmiṃ. Imesaṃ kho, bhikkhave, catunnaṃ dhammānaṃ natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmi’’nti 8. Attheva suttantoti? Āmantā. Tena hi na vattabbaṃ – ‘‘iddhibalena samannāgato kappaṃ tiṭṭheyyā’’ti.
இத்³தி⁴ப³லகதா² நிட்டி²தா.
Iddhibalakathā niṭṭhitā.
Footnotes:
Related texts:
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 7. இத்³தி⁴ப³லகதா²வண்ணனா • 7. Iddhibalakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 7. இத்³தி⁴ப³லகதா²வண்ணனா • 7. Iddhibalakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 7. இத்³தி⁴ப³லகதா²வண்ணனா • 7. Iddhibalakathāvaṇṇanā
