| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
১১. একাদসমৰগ্গো
11. Ekādasamavaggo
(১১২) ৭. ইদ্ধিবলকথা
(112) 7. Iddhibalakathā
৬২১. ইদ্ধিবলেন সমন্নাগতো কপ্পং তিট্ঠেয্যাতি? আমন্তা। ইদ্ধিমযিকো সো আযু, ইদ্ধিমযিকা সা গতি, ইদ্ধিমযিকো সো অত্তভাৰপ্পটিলাভোতি? ন হেৰং ৰত্তব্বে…পে॰…।
621. Iddhibalena samannāgato kappaṃ tiṭṭheyyāti? Āmantā. Iddhimayiko so āyu, iddhimayikā sā gati, iddhimayiko so attabhāvappaṭilābhoti? Na hevaṃ vattabbe…pe….
ইদ্ধিবলেন সমন্নাগতো কপ্পং তিট্ঠেয্যাতি? আমন্তা। অতীতং কপ্পং তিট্ঠেয্য, অনাগতং কপ্পং তিট্ঠেয্যাতি? ন হেৰং ৰত্তব্বে…পে॰… ইদ্ধিবলেন সমন্নাগতো কপ্পং তিট্ঠেয্যাতি? আমন্তা। দ্ৰে কপ্পে তিট্ঠেয্য, তযো কপ্পে তিট্ঠেয্য, চত্তারো কপ্পে তিট্ঠেয্যাতি? ন হেৰং ৰত্তব্বে…পে॰… ইদ্ধিবলেন সমন্নাগতো কপ্পং তিট্ঠেয্যাতি? আমন্তা। সতি জীৰিতে জীৰিতাৰসেসে তিট্ঠেয্য, অসতি জীৰিতে জীৰিতাৰসেসে তিট্ঠেয্যাতি? সতি জীৰিতে জীৰিতাৰসেসে তিট্ঠেয্যাতি। হঞ্চি সতি জীৰিতে জীৰিতাৰসেসে তিট্ঠেয্য, নো চ ৰত রে ৰত্তব্বে – ‘‘ইদ্ধিবলেন সমন্নাগতো কপ্পং তিট্ঠেয্যা’’তি। অসতি জীৰিতে জীৰিতাৰসেসে তিট্ঠেয্যাতি, মতো তিট্ঠেয্য, কালঙ্কতো তিট্ঠেয্যাতি? ন হেৰং ৰত্তব্বে…পে॰…।
Iddhibalena samannāgato kappaṃ tiṭṭheyyāti? Āmantā. Atītaṃ kappaṃ tiṭṭheyya, anāgataṃ kappaṃ tiṭṭheyyāti? Na hevaṃ vattabbe…pe… iddhibalena samannāgato kappaṃ tiṭṭheyyāti? Āmantā. Dve kappe tiṭṭheyya, tayo kappe tiṭṭheyya, cattāro kappe tiṭṭheyyāti? Na hevaṃ vattabbe…pe… iddhibalena samannāgato kappaṃ tiṭṭheyyāti? Āmantā. Sati jīvite jīvitāvasese tiṭṭheyya, asati jīvite jīvitāvasese tiṭṭheyyāti? Sati jīvite jīvitāvasese tiṭṭheyyāti. Hañci sati jīvite jīvitāvasese tiṭṭheyya, no ca vata re vattabbe – ‘‘iddhibalena samannāgato kappaṃ tiṭṭheyyā’’ti. Asati jīvite jīvitāvasese tiṭṭheyyāti, mato tiṭṭheyya, kālaṅkato tiṭṭheyyāti? Na hevaṃ vattabbe…pe….
৬২২. ইদ্ধিবলেন সমন্নাগতো কপ্পং তিট্ঠেয্যাতি? আমন্তা। উপ্পন্নো ফস্সো মা নিরুজ্ঝীতি লব্ভা ইদ্ধিযা পগ্গহেতুন্তি? ন হেৰং ৰত্তব্বে…পে॰… উপ্পন্না ৰেদনা…পে॰… উপ্পন্না সঞ্ঞা …পে॰… উপ্পন্না চেতনা…পে॰… উপ্পন্নং চিত্তং… উপ্পন্না সদ্ধা… উপ্পন্নং ৰীরিযং… উপ্পন্না সতি… উপ্পন্নো সমাধি …পে॰… উপ্পন্না পঞ্ঞা মা নিরুজ্ঝীতি লব্ভা ইদ্ধিযা পগ্গহেতুন্তি? ন হেৰং ৰত্তব্বে…পে॰…।
622. Iddhibalena samannāgato kappaṃ tiṭṭheyyāti? Āmantā. Uppanno phasso mā nirujjhīti labbhā iddhiyā paggahetunti? Na hevaṃ vattabbe…pe… uppannā vedanā…pe… uppannā saññā …pe… uppannā cetanā…pe… uppannaṃ cittaṃ… uppannā saddhā… uppannaṃ vīriyaṃ… uppannā sati… uppanno samādhi …pe… uppannā paññā mā nirujjhīti labbhā iddhiyā paggahetunti? Na hevaṃ vattabbe…pe….
ইদ্ধিবলেন সমন্নাগতো কপ্পং তিট্ঠেয্যাতি? আমন্তা। রূপং নিচ্চং হোতূতি লব্ভা ইদ্ধিযা পগ্গহেতুন্তি? ন হেৰং ৰত্তব্বে…পে॰… ৰেদনা…পে॰… সঞ্ঞা… সঙ্খারা… ৰিঞ্ঞাণং নিচ্চং হোতূতি লব্ভা ইদ্ধিযা পগ্গহেতুন্তি? ন হেৰং ৰত্তব্বে…পে॰…।
Iddhibalena samannāgato kappaṃ tiṭṭheyyāti? Āmantā. Rūpaṃ niccaṃ hotūti labbhā iddhiyā paggahetunti? Na hevaṃ vattabbe…pe… vedanā…pe… saññā… saṅkhārā… viññāṇaṃ niccaṃ hotūti labbhā iddhiyā paggahetunti? Na hevaṃ vattabbe…pe….
ইদ্ধিবলেন সমন্নাগতো কপ্পং তিট্ঠেয্যাতি? আমন্তা। জাতিধম্মা সত্তা মা জাযিংসূতি লব্ভা ইদ্ধিযা পগ্গহেতুন্তি? ন হেৰং ৰত্তব্বে…পে॰… জরাধম্মা সত্তা মা জীরিংসূতি…পে॰… ব্যাধিধম্মা সত্তা মা ব্যাধিযিংসূতি…পে॰… মরণধম্মা সত্তা মা মীযিংসূতি লব্ভা ইদ্ধিযা পগ্গহেতুন্তি? ন হেৰং ৰত্তব্বে…পে॰…।
Iddhibalena samannāgato kappaṃ tiṭṭheyyāti? Āmantā. Jātidhammā sattā mā jāyiṃsūti labbhā iddhiyā paggahetunti? Na hevaṃ vattabbe…pe… jarādhammā sattā mā jīriṃsūti…pe… byādhidhammā sattā mā byādhiyiṃsūti…pe… maraṇadhammā sattā mā mīyiṃsūti labbhā iddhiyā paggahetunti? Na hevaṃ vattabbe…pe….
৬২৩. ন ৰত্তব্বং – ‘‘ইদ্ধিবলেন সমন্নাগতো কপ্পং তিট্ঠেয্যা’’তি? আমন্তা। ননু ৰুত্তং ভগৰতা – ‘‘যস্স কস্সচি, আনন্দ, চত্তারো ইদ্ধিপাদা ভাৰিতা বহুলীকতা যানীকতা ৰত্থুকতা অনুট্ঠিতা পরিচিতা সুসমারদ্ধা, সো আকঙ্খমানো কপ্পং ৰা তিট্ঠেয্য কপ্পাৰসেসং ৰা’’তি 1! অত্থেৰ সুত্তন্তোতি? আমন্তা। তেন হি ইদ্ধিবলেন সমন্নাগতো কপ্পং তিট্ঠেয্যাতি।
623. Na vattabbaṃ – ‘‘iddhibalena samannāgato kappaṃ tiṭṭheyyā’’ti? Āmantā. Nanu vuttaṃ bhagavatā – ‘‘yassa kassaci, ānanda, cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā, so ākaṅkhamāno kappaṃ vā tiṭṭheyya kappāvasesaṃ vā’’ti 2! Attheva suttantoti? Āmantā. Tena hi iddhibalena samannāgato kappaṃ tiṭṭheyyāti.
৬২৪. ইদ্ধিবলেন সমন্নাগতো কপ্পং তিট্ঠেয্যাতি? আমন্তা। ননু ৰুত্তং ভগৰতা – ‘‘চতুন্নং, ভিক্খৰে, ধম্মানং নত্থি কোচি পাটিভোগো সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মিং! কতমেসং চতুন্নং? জরাধম্মো ‘‘মা জীরী’’তি নত্থি কোচি পাটিভোগো সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মিং। ব্যাধিধম্মো ‘‘মা ব্যাধিযী’’তি…পে॰… মরণধম্মো ‘‘মা মীযী’’তি…পে॰… যানি খো পন তানি পুব্বে কতানি পাপকানি কম্মানি সংকিলেসিকানি পোনোব্ভৰিকানি 3 সদরানি 4 দুক্খৰিপাকানি আযতিং জাতিজরামরণিযানি তেসং ৰিপাকো ‘‘মা নিব্বত্তী’’তি নত্থি কোচি পাটিভোগো সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মিং। ইমেসং খো, ভিক্খৰে, চতুন্নং ধম্মানং নত্থি কোচি পাটিভোগো সমণো ৰা ব্রাহ্মণো ৰা দেৰো ৰা মারো ৰা ব্রহ্মা ৰা কোচি ৰা লোকস্মি’’ন্তি 5। অত্থেৰ সুত্তন্তোতি? আমন্তা। তেন হি ন ৰত্তব্বং – ‘‘ইদ্ধিবলেন সমন্নাগতো কপ্পং তিট্ঠেয্যা’’তি।
624. Iddhibalena samannāgato kappaṃ tiṭṭheyyāti? Āmantā. Nanu vuttaṃ bhagavatā – ‘‘catunnaṃ, bhikkhave, dhammānaṃ natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmiṃ! Katamesaṃ catunnaṃ? Jarādhammo ‘‘mā jīrī’’ti natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmiṃ. Byādhidhammo ‘‘mā byādhiyī’’ti…pe… maraṇadhammo ‘‘mā mīyī’’ti…pe… yāni kho pana tāni pubbe katāni pāpakāni kammāni saṃkilesikāni ponobbhavikāni 6 sadarāni 7 dukkhavipākāni āyatiṃ jātijarāmaraṇiyāni tesaṃ vipāko ‘‘mā nibbattī’’ti natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmiṃ. Imesaṃ kho, bhikkhave, catunnaṃ dhammānaṃ natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmi’’nti 8. Attheva suttantoti? Āmantā. Tena hi na vattabbaṃ – ‘‘iddhibalena samannāgato kappaṃ tiṭṭheyyā’’ti.
ইদ্ধিবলকথা নিট্ঠিতা।
Iddhibalakathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৭. ইদ্ধিবলকথাৰণ্ণনা • 7. Iddhibalakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৭. ইদ্ধিবলকথাৰণ্ণনা • 7. Iddhibalakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৭. ইদ্ধিবলকথাৰণ্ণনা • 7. Iddhibalakathāvaṇṇanā
