| Library / Tipiṭaka / ติปิฎก • Tipiṭaka / กถาวตฺถุปาฬิ • Kathāvatthupāḷi |
๑๑. เอกาทสมวโคฺค
11. Ekādasamavaggo
(๑๑๒) ๗. อิทฺธิพลกถา
(112) 7. Iddhibalakathā
๖๒๑. อิทฺธิพเลน สมนฺนาคโต กปฺปํ ติเฎฺฐยฺยาติ? อามนฺตาฯ อิทฺธิมยิโก โส อายุ, อิทฺธิมยิกา สา คติ, อิทฺธิมยิโก โส อตฺตภาวปฺปฎิลาโภติ? น เหวํ วตฺตเพฺพ…เป.…ฯ
621. Iddhibalena samannāgato kappaṃ tiṭṭheyyāti? Āmantā. Iddhimayiko so āyu, iddhimayikā sā gati, iddhimayiko so attabhāvappaṭilābhoti? Na hevaṃ vattabbe…pe….
อิทฺธิพเลน สมนฺนาคโต กปฺปํ ติเฎฺฐยฺยาติ? อามนฺตาฯ อตีตํ กปฺปํ ติเฎฺฐยฺย, อนาคตํ กปฺปํ ติเฎฺฐยฺยาติ? น เหวํ วตฺตเพฺพ…เป.… อิทฺธิพเลน สมนฺนาคโต กปฺปํ ติเฎฺฐยฺยาติ? อามนฺตาฯ เทฺว กเปฺป ติเฎฺฐยฺย, ตโย กเปฺป ติเฎฺฐยฺย, จตฺตาโร กเปฺป ติเฎฺฐยฺยาติ? น เหวํ วตฺตเพฺพ…เป.… อิทฺธิพเลน สมนฺนาคโต กปฺปํ ติเฎฺฐยฺยาติ? อามนฺตาฯ สติ ชีวิเต ชีวิตาวเสเส ติเฎฺฐยฺย, อสติ ชีวิเต ชีวิตาวเสเส ติเฎฺฐยฺยาติ? สติ ชีวิเต ชีวิตาวเสเส ติเฎฺฐยฺยาติฯ หญฺจิ สติ ชีวิเต ชีวิตาวเสเส ติเฎฺฐยฺย, โน จ วต เร วตฺตเพฺพ – ‘‘อิทฺธิพเลน สมนฺนาคโต กปฺปํ ติเฎฺฐยฺยา’’ติฯ อสติ ชีวิเต ชีวิตาวเสเส ติเฎฺฐยฺยาติ, มโต ติเฎฺฐยฺย, กาลงฺกโต ติเฎฺฐยฺยาติ? น เหวํ วตฺตเพฺพ…เป.…ฯ
Iddhibalena samannāgato kappaṃ tiṭṭheyyāti? Āmantā. Atītaṃ kappaṃ tiṭṭheyya, anāgataṃ kappaṃ tiṭṭheyyāti? Na hevaṃ vattabbe…pe… iddhibalena samannāgato kappaṃ tiṭṭheyyāti? Āmantā. Dve kappe tiṭṭheyya, tayo kappe tiṭṭheyya, cattāro kappe tiṭṭheyyāti? Na hevaṃ vattabbe…pe… iddhibalena samannāgato kappaṃ tiṭṭheyyāti? Āmantā. Sati jīvite jīvitāvasese tiṭṭheyya, asati jīvite jīvitāvasese tiṭṭheyyāti? Sati jīvite jīvitāvasese tiṭṭheyyāti. Hañci sati jīvite jīvitāvasese tiṭṭheyya, no ca vata re vattabbe – ‘‘iddhibalena samannāgato kappaṃ tiṭṭheyyā’’ti. Asati jīvite jīvitāvasese tiṭṭheyyāti, mato tiṭṭheyya, kālaṅkato tiṭṭheyyāti? Na hevaṃ vattabbe…pe….
๖๒๒. อิทฺธิพเลน สมนฺนาคโต กปฺปํ ติเฎฺฐยฺยาติ? อามนฺตาฯ อุปฺปโนฺน ผโสฺส มา นิรุชฺฌีติ ลพฺภา อิทฺธิยา ปคฺคเหตุนฺติ? น เหวํ วตฺตเพฺพ…เป.… อุปฺปนฺนา เวทนา…เป.… อุปฺปนฺนา สญฺญา …เป.… อุปฺปนฺนา เจตนา…เป.… อุปฺปนฺนํ จิตฺตํ… อุปฺปนฺนา สทฺธา… อุปฺปนฺนํ วีริยํ… อุปฺปนฺนา สติ… อุปฺปโนฺน สมาธิ …เป.… อุปฺปนฺนา ปญฺญา มา นิรุชฺฌีติ ลพฺภา อิทฺธิยา ปคฺคเหตุนฺติ? น เหวํ วตฺตเพฺพ…เป.…ฯ
622. Iddhibalena samannāgato kappaṃ tiṭṭheyyāti? Āmantā. Uppanno phasso mā nirujjhīti labbhā iddhiyā paggahetunti? Na hevaṃ vattabbe…pe… uppannā vedanā…pe… uppannā saññā …pe… uppannā cetanā…pe… uppannaṃ cittaṃ… uppannā saddhā… uppannaṃ vīriyaṃ… uppannā sati… uppanno samādhi …pe… uppannā paññā mā nirujjhīti labbhā iddhiyā paggahetunti? Na hevaṃ vattabbe…pe….
อิทฺธิพเลน สมนฺนาคโต กปฺปํ ติเฎฺฐยฺยาติ? อามนฺตาฯ รูปํ นิจฺจํ โหตูติ ลพฺภา อิทฺธิยา ปคฺคเหตุนฺติ? น เหวํ วตฺตเพฺพ…เป.… เวทนา…เป.… สญฺญา… สงฺขารา… วิญฺญาณํ นิจฺจํ โหตูติ ลพฺภา อิทฺธิยา ปคฺคเหตุนฺติ? น เหวํ วตฺตเพฺพ…เป.…ฯ
Iddhibalena samannāgato kappaṃ tiṭṭheyyāti? Āmantā. Rūpaṃ niccaṃ hotūti labbhā iddhiyā paggahetunti? Na hevaṃ vattabbe…pe… vedanā…pe… saññā… saṅkhārā… viññāṇaṃ niccaṃ hotūti labbhā iddhiyā paggahetunti? Na hevaṃ vattabbe…pe….
อิทฺธิพเลน สมนฺนาคโต กปฺปํ ติเฎฺฐยฺยาติ? อามนฺตาฯ ชาติธมฺมา สตฺตา มา ชายิํสูติ ลพฺภา อิทฺธิยา ปคฺคเหตุนฺติ? น เหวํ วตฺตเพฺพ…เป.… ชราธมฺมา สตฺตา มา ชีริํสูติ…เป.… พฺยาธิธมฺมา สตฺตา มา พฺยาธิยิํสูติ…เป.… มรณธมฺมา สตฺตา มา มียิํสูติ ลพฺภา อิทฺธิยา ปคฺคเหตุนฺติ? น เหวํ วตฺตเพฺพ…เป.…ฯ
Iddhibalena samannāgato kappaṃ tiṭṭheyyāti? Āmantā. Jātidhammā sattā mā jāyiṃsūti labbhā iddhiyā paggahetunti? Na hevaṃ vattabbe…pe… jarādhammā sattā mā jīriṃsūti…pe… byādhidhammā sattā mā byādhiyiṃsūti…pe… maraṇadhammā sattā mā mīyiṃsūti labbhā iddhiyā paggahetunti? Na hevaṃ vattabbe…pe….
๖๒๓. น วตฺตพฺพํ – ‘‘อิทฺธิพเลน สมนฺนาคโต กปฺปํ ติเฎฺฐยฺยา’’ติ? อามนฺตาฯ นนุ วุตฺตํ ภควตา – ‘‘ยสฺส กสฺสจิ, อานนฺท, จตฺตาโร อิทฺธิปาทา ภาวิตา พหุลีกตา ยานีกตา วตฺถุกตา อนุฎฺฐิตา ปริจิตา สุสมารทฺธา, โส อากงฺขมาโน กปฺปํ วา ติเฎฺฐยฺย กปฺปาวเสสํ วา’’ติ 1! อเตฺถว สุตฺตโนฺตติ? อามนฺตาฯ เตน หิ อิทฺธิพเลน สมนฺนาคโต กปฺปํ ติเฎฺฐยฺยาติฯ
623. Na vattabbaṃ – ‘‘iddhibalena samannāgato kappaṃ tiṭṭheyyā’’ti? Āmantā. Nanu vuttaṃ bhagavatā – ‘‘yassa kassaci, ānanda, cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā, so ākaṅkhamāno kappaṃ vā tiṭṭheyya kappāvasesaṃ vā’’ti 2! Attheva suttantoti? Āmantā. Tena hi iddhibalena samannāgato kappaṃ tiṭṭheyyāti.
๖๒๔. อิทฺธิพเลน สมนฺนาคโต กปฺปํ ติเฎฺฐยฺยาติ? อามนฺตาฯ นนุ วุตฺตํ ภควตา – ‘‘จตุนฺนํ, ภิกฺขเว, ธมฺมานํ นตฺถิ โกจิ ปาฎิโภโค สมโณ วา พฺราหฺมโณ วา เทโว วา มาโร วา พฺรหฺมา วา โกจิ วา โลกสฺมิํ! กตเมสํ จตุนฺนํ? ชราธโมฺม ‘‘มา ชีรี’’ติ นตฺถิ โกจิ ปาฎิโภโค สมโณ วา พฺราหฺมโณ วา เทโว วา มาโร วา พฺรหฺมา วา โกจิ วา โลกสฺมิํฯ พฺยาธิธโมฺม ‘‘มา พฺยาธิยี’’ติ…เป.… มรณธโมฺม ‘‘มา มียี’’ติ…เป.… ยานิ โข ปน ตานิ ปุเพฺพ กตานิ ปาปกานิ กมฺมานิ สํกิเลสิกานิ โปโนพฺภวิกานิ 3 สทรานิ 4 ทุกฺขวิปากานิ อายติํ ชาติชรามรณิยานิ เตสํ วิปาโก ‘‘มา นิพฺพตฺตี’’ติ นตฺถิ โกจิ ปาฎิโภโค สมโณ วา พฺราหฺมโณ วา เทโว วา มาโร วา พฺรหฺมา วา โกจิ วา โลกสฺมิํฯ อิเมสํ โข, ภิกฺขเว, จตุนฺนํ ธมฺมานํ นตฺถิ โกจิ ปาฎิโภโค สมโณ วา พฺราหฺมโณ วา เทโว วา มาโร วา พฺรหฺมา วา โกจิ วา โลกสฺมิ’’นฺติ 5ฯ อเตฺถว สุตฺตโนฺตติ? อามนฺตาฯ เตน หิ น วตฺตพฺพํ – ‘‘อิทฺธิพเลน สมนฺนาคโต กปฺปํ ติเฎฺฐยฺยา’’ติฯ
624. Iddhibalena samannāgato kappaṃ tiṭṭheyyāti? Āmantā. Nanu vuttaṃ bhagavatā – ‘‘catunnaṃ, bhikkhave, dhammānaṃ natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmiṃ! Katamesaṃ catunnaṃ? Jarādhammo ‘‘mā jīrī’’ti natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmiṃ. Byādhidhammo ‘‘mā byādhiyī’’ti…pe… maraṇadhammo ‘‘mā mīyī’’ti…pe… yāni kho pana tāni pubbe katāni pāpakāni kammāni saṃkilesikāni ponobbhavikāni 6 sadarāni 7 dukkhavipākāni āyatiṃ jātijarāmaraṇiyāni tesaṃ vipāko ‘‘mā nibbattī’’ti natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmiṃ. Imesaṃ kho, bhikkhave, catunnaṃ dhammānaṃ natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmi’’nti 8. Attheva suttantoti? Āmantā. Tena hi na vattabbaṃ – ‘‘iddhibalena samannāgato kappaṃ tiṭṭheyyā’’ti.
อิทฺธิพลกถา นิฎฺฐิตาฯ
Iddhibalakathā niṭṭhitā.
Footnotes:
Related texts:
อฎฺฐกถา • Aṭṭhakathā / อภิธมฺมปิฎก (อฎฺฐกถา) • Abhidhammapiṭaka (aṭṭhakathā) / ปญฺจปกรณ-อฎฺฐกถา • Pañcapakaraṇa-aṭṭhakathā / ๗. อิทฺธิพลกถาวณฺณนา • 7. Iddhibalakathāvaṇṇanā
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ปญฺจปกรณ-มูลฎีกา • Pañcapakaraṇa-mūlaṭīkā / ๗. อิทฺธิพลกถาวณฺณนา • 7. Iddhibalakathāvaṇṇanā
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ปญฺจปกรณ-อนุฎีกา • Pañcapakaraṇa-anuṭīkā / ๗. อิทฺธิพลกถาวณฺณนา • 7. Iddhibalakathāvaṇṇanā
