| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
១១. ឯកាទសមវគ្គោ
11. Ekādasamavaggo
(១១២) ៧. ឥទ្ធិពលកថា
(112) 7. Iddhibalakathā
៦២១. ឥទ្ធិពលេន សមន្នាគតោ កប្បំ តិដ្ឋេយ្យាតិ? អាមន្តា។ ឥទ្ធិមយិកោ សោ អាយុ, ឥទ្ធិមយិកា សា គតិ, ឥទ្ធិមយិកោ សោ អត្តភាវប្បដិលាភោតិ? ន ហេវំ វត្តព្ពេ…បេ.…។
621. Iddhibalena samannāgato kappaṃ tiṭṭheyyāti? Āmantā. Iddhimayiko so āyu, iddhimayikā sā gati, iddhimayiko so attabhāvappaṭilābhoti? Na hevaṃ vattabbe…pe….
ឥទ្ធិពលេន សមន្នាគតោ កប្បំ តិដ្ឋេយ្យាតិ? អាមន្តា។ អតីតំ កប្បំ តិដ្ឋេយ្យ, អនាគតំ កប្បំ តិដ្ឋេយ្យាតិ? ន ហេវំ វត្តព្ពេ…បេ.… ឥទ្ធិពលេន សមន្នាគតោ កប្បំ តិដ្ឋេយ្យាតិ? អាមន្តា។ ទ្វេ កប្បេ តិដ្ឋេយ្យ, តយោ កប្បេ តិដ្ឋេយ្យ, ចត្តារោ កប្បេ តិដ្ឋេយ្យាតិ? ន ហេវំ វត្តព្ពេ…បេ.… ឥទ្ធិពលេន សមន្នាគតោ កប្បំ តិដ្ឋេយ្យាតិ? អាមន្តា។ សតិ ជីវិតេ ជីវិតាវសេសេ តិដ្ឋេយ្យ, អសតិ ជីវិតេ ជីវិតាវសេសេ តិដ្ឋេយ្យាតិ? សតិ ជីវិតេ ជីវិតាវសេសេ តិដ្ឋេយ្យាតិ។ ហញ្ចិ សតិ ជីវិតេ ជីវិតាវសេសេ តិដ្ឋេយ្យ, នោ ច វត រេ វត្តព្ពេ – ‘‘ឥទ្ធិពលេន សមន្នាគតោ កប្បំ តិដ្ឋេយ្យា’’តិ។ អសតិ ជីវិតេ ជីវិតាវសេសេ តិដ្ឋេយ្យាតិ, មតោ តិដ្ឋេយ្យ, កាលង្កតោ តិដ្ឋេយ្យាតិ? ន ហេវំ វត្តព្ពេ…បេ.…។
Iddhibalena samannāgato kappaṃ tiṭṭheyyāti? Āmantā. Atītaṃ kappaṃ tiṭṭheyya, anāgataṃ kappaṃ tiṭṭheyyāti? Na hevaṃ vattabbe…pe… iddhibalena samannāgato kappaṃ tiṭṭheyyāti? Āmantā. Dve kappe tiṭṭheyya, tayo kappe tiṭṭheyya, cattāro kappe tiṭṭheyyāti? Na hevaṃ vattabbe…pe… iddhibalena samannāgato kappaṃ tiṭṭheyyāti? Āmantā. Sati jīvite jīvitāvasese tiṭṭheyya, asati jīvite jīvitāvasese tiṭṭheyyāti? Sati jīvite jīvitāvasese tiṭṭheyyāti. Hañci sati jīvite jīvitāvasese tiṭṭheyya, no ca vata re vattabbe – ‘‘iddhibalena samannāgato kappaṃ tiṭṭheyyā’’ti. Asati jīvite jīvitāvasese tiṭṭheyyāti, mato tiṭṭheyya, kālaṅkato tiṭṭheyyāti? Na hevaṃ vattabbe…pe….
៦២២. ឥទ្ធិពលេន សមន្នាគតោ កប្បំ តិដ្ឋេយ្យាតិ? អាមន្តា។ ឧប្បន្នោ ផស្សោ មា និរុជ្ឈីតិ លព្ភា ឥទ្ធិយា បគ្គហេតុន្តិ? ន ហេវំ វត្តព្ពេ…បេ.… ឧប្បន្នា វេទនា…បេ.… ឧប្បន្នា សញ្ញា …បេ.… ឧប្បន្នា ចេតនា…បេ.… ឧប្បន្នំ ចិត្តំ… ឧប្បន្នា សទ្ធា… ឧប្បន្នំ វីរិយំ… ឧប្បន្នា សតិ… ឧប្បន្នោ សមាធិ …បេ.… ឧប្បន្នា បញ្ញា មា និរុជ្ឈីតិ លព្ភា ឥទ្ធិយា បគ្គហេតុន្តិ? ន ហេវំ វត្តព្ពេ…បេ.…។
622. Iddhibalena samannāgato kappaṃ tiṭṭheyyāti? Āmantā. Uppanno phasso mā nirujjhīti labbhā iddhiyā paggahetunti? Na hevaṃ vattabbe…pe… uppannā vedanā…pe… uppannā saññā …pe… uppannā cetanā…pe… uppannaṃ cittaṃ… uppannā saddhā… uppannaṃ vīriyaṃ… uppannā sati… uppanno samādhi …pe… uppannā paññā mā nirujjhīti labbhā iddhiyā paggahetunti? Na hevaṃ vattabbe…pe….
ឥទ្ធិពលេន សមន្នាគតោ កប្បំ តិដ្ឋេយ្យាតិ? អាមន្តា។ រូបំ និច្ចំ ហោតូតិ លព្ភា ឥទ្ធិយា បគ្គហេតុន្តិ? ន ហេវំ វត្តព្ពេ…បេ.… វេទនា…បេ.… សញ្ញា… សង្ខារា… វិញ្ញាណំ និច្ចំ ហោតូតិ លព្ភា ឥទ្ធិយា បគ្គហេតុន្តិ? ន ហេវំ វត្តព្ពេ…បេ.…។
Iddhibalena samannāgato kappaṃ tiṭṭheyyāti? Āmantā. Rūpaṃ niccaṃ hotūti labbhā iddhiyā paggahetunti? Na hevaṃ vattabbe…pe… vedanā…pe… saññā… saṅkhārā… viññāṇaṃ niccaṃ hotūti labbhā iddhiyā paggahetunti? Na hevaṃ vattabbe…pe….
ឥទ្ធិពលេន សមន្នាគតោ កប្បំ តិដ្ឋេយ្យាតិ? អាមន្តា។ ជាតិធម្មា សត្តា មា ជាយិំសូតិ លព្ភា ឥទ្ធិយា បគ្គហេតុន្តិ? ន ហេវំ វត្តព្ពេ…បេ.… ជរាធម្មា សត្តា មា ជីរិំសូតិ…បេ.… ព្យាធិធម្មា សត្តា មា ព្យាធិយិំសូតិ…បេ.… មរណធម្មា សត្តា មា មីយិំសូតិ លព្ភា ឥទ្ធិយា បគ្គហេតុន្តិ? ន ហេវំ វត្តព្ពេ…បេ.…។
Iddhibalena samannāgato kappaṃ tiṭṭheyyāti? Āmantā. Jātidhammā sattā mā jāyiṃsūti labbhā iddhiyā paggahetunti? Na hevaṃ vattabbe…pe… jarādhammā sattā mā jīriṃsūti…pe… byādhidhammā sattā mā byādhiyiṃsūti…pe… maraṇadhammā sattā mā mīyiṃsūti labbhā iddhiyā paggahetunti? Na hevaṃ vattabbe…pe….
៦២៣. ន វត្តព្ពំ – ‘‘ឥទ្ធិពលេន សមន្នាគតោ កប្បំ តិដ្ឋេយ្យា’’តិ? អាមន្តា។ ននុ វុត្តំ ភគវតា – ‘‘យស្ស កស្សចិ, អានន្ទ, ចត្តារោ ឥទ្ធិបាទា ភាវិតា ពហុលីកតា យានីកតា វត្ថុកតា អនុដ្ឋិតា បរិចិតា សុសមារទ្ធា, សោ អាកង្ខមានោ កប្បំ វា តិដ្ឋេយ្យ កប្បាវសេសំ វា’’តិ 1! អត្ថេវ សុត្តន្តោតិ? អាមន្តា។ តេន ហិ ឥទ្ធិពលេន សមន្នាគតោ កប្បំ តិដ្ឋេយ្យាតិ។
623. Na vattabbaṃ – ‘‘iddhibalena samannāgato kappaṃ tiṭṭheyyā’’ti? Āmantā. Nanu vuttaṃ bhagavatā – ‘‘yassa kassaci, ānanda, cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā, so ākaṅkhamāno kappaṃ vā tiṭṭheyya kappāvasesaṃ vā’’ti 2! Attheva suttantoti? Āmantā. Tena hi iddhibalena samannāgato kappaṃ tiṭṭheyyāti.
៦២៤. ឥទ្ធិពលេន សមន្នាគតោ កប្បំ តិដ្ឋេយ្យាតិ? អាមន្តា។ ននុ វុត្តំ ភគវតា – ‘‘ចតុន្នំ, ភិក្ខវេ, ធម្មានំ នត្ថិ កោចិ បាដិភោគោ សមណោ វា ព្រាហ្មណោ វា ទេវោ វា មារោ វា ព្រហ្មា វា កោចិ វា លោកស្មិំ! កតមេសំ ចតុន្នំ? ជរាធម្មោ ‘‘មា ជីរី’’តិ នត្ថិ កោចិ បាដិភោគោ សមណោ វា ព្រាហ្មណោ វា ទេវោ វា មារោ វា ព្រហ្មា វា កោចិ វា លោកស្មិំ។ ព្យាធិធម្មោ ‘‘មា ព្យាធិយី’’តិ…បេ.… មរណធម្មោ ‘‘មា មីយី’’តិ…បេ.… យានិ ខោ បន តានិ បុព្ពេ កតានិ បាបកានិ កម្មានិ សំកិលេសិកានិ បោនោព្ភវិកានិ 3 សទរានិ 4 ទុក្ខវិបាកានិ អាយតិំ ជាតិជរាមរណិយានិ តេសំ វិបាកោ ‘‘មា និព្ពត្តី’’តិ នត្ថិ កោចិ បាដិភោគោ សមណោ វា ព្រាហ្មណោ វា ទេវោ វា មារោ វា ព្រហ្មា វា កោចិ វា លោកស្មិំ។ ឥមេសំ ខោ, ភិក្ខវេ, ចតុន្នំ ធម្មានំ នត្ថិ កោចិ បាដិភោគោ សមណោ វា ព្រាហ្មណោ វា ទេវោ វា មារោ វា ព្រហ្មា វា កោចិ វា លោកស្មិ’’ន្តិ 5។ អត្ថេវ សុត្តន្តោតិ? អាមន្តា។ តេន ហិ ន វត្តព្ពំ – ‘‘ឥទ្ធិពលេន សមន្នាគតោ កប្បំ តិដ្ឋេយ្យា’’តិ។
624. Iddhibalena samannāgato kappaṃ tiṭṭheyyāti? Āmantā. Nanu vuttaṃ bhagavatā – ‘‘catunnaṃ, bhikkhave, dhammānaṃ natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmiṃ! Katamesaṃ catunnaṃ? Jarādhammo ‘‘mā jīrī’’ti natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmiṃ. Byādhidhammo ‘‘mā byādhiyī’’ti…pe… maraṇadhammo ‘‘mā mīyī’’ti…pe… yāni kho pana tāni pubbe katāni pāpakāni kammāni saṃkilesikāni ponobbhavikāni 6 sadarāni 7 dukkhavipākāni āyatiṃ jātijarāmaraṇiyāni tesaṃ vipāko ‘‘mā nibbattī’’ti natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmiṃ. Imesaṃ kho, bhikkhave, catunnaṃ dhammānaṃ natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmi’’nti 8. Attheva suttantoti? Āmantā. Tena hi na vattabbaṃ – ‘‘iddhibalena samannāgato kappaṃ tiṭṭheyyā’’ti.
ឥទ្ធិពលកថា និដ្ឋិតា។
Iddhibalakathā niṭṭhitā.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៧. ឥទ្ធិពលកថាវណ្ណនា • 7. Iddhibalakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៧. ឥទ្ធិពលកថាវណ្ណនា • 7. Iddhibalakathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៧. ឥទ្ធិពលកថាវណ្ណនា • 7. Iddhibalakathāvaṇṇanā
