| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၁၁. ဧကာဒသမဝဂ္ဂော
11. Ekādasamavaggo
(၁၁၂) ၇. ဣဒ္ဓိဗလကထာ
(112) 7. Iddhibalakathā
၆၂၁. ဣဒ္ဓိဗလေန သမန္နာဂတော ကပ္ပံ တိဋ္ဌေယ္ယာတိ? အာမန္တာ။ ဣဒ္ဓိမယိကော သော အာယု, ဣဒ္ဓိမယိကာ သာ ဂတိ, ဣဒ္ဓိမယိကော သော အတ္တဘာဝပ္ပဋိလာဘောတိ? န ဟေဝံ ဝတ္တဗ္ဗေ။ပေ.။။
621. Iddhibalena samannāgato kappaṃ tiṭṭheyyāti? Āmantā. Iddhimayiko so āyu, iddhimayikā sā gati, iddhimayiko so attabhāvappaṭilābhoti? Na hevaṃ vattabbe…pe….
ဣဒ္ဓိဗလေန သမန္နာဂတော ကပ္ပံ တိဋ္ဌေယ္ယာတိ? အာမန္တာ။ အတီတံ ကပ္ပံ တိဋ္ဌေယ္ယ, အနာဂတံ ကပ္ပံ တိဋ္ဌေယ္ယာတိ? န ဟေဝံ ဝတ္တဗ္ဗေ။ပေ.။ ဣဒ္ဓိဗလေန သမန္နာဂတော ကပ္ပံ တိဋ္ဌေယ္ယာတိ? အာမန္တာ။ ဒ္ဝေ ကပ္ပေ တိဋ္ဌေယ္ယ, တယော ကပ္ပေ တိဋ္ဌေယ္ယ, စတ္တာရော ကပ္ပေ တိဋ္ဌေယ္ယာတိ? န ဟေဝံ ဝတ္တဗ္ဗေ။ပေ.။ ဣဒ္ဓိဗလေန သမန္နာဂတော ကပ္ပံ တိဋ္ဌေယ္ယာတိ? အာမန္တာ။ သတိ ဇီဝိတေ ဇီဝိတာဝသေသေ တိဋ္ဌေယ္ယ, အသတိ ဇီဝိတေ ဇီဝိတာဝသေသေ တိဋ္ဌေယ္ယာတိ? သတိ ဇီဝိတေ ဇီဝိတာဝသေသေ တိဋ္ဌေယ္ယာတိ။ ဟဉ္စိ သတိ ဇီဝိတေ ဇီဝိတာဝသေသေ တိဋ္ဌေယ္ယ, နော စ ဝတ ရေ ဝတ္တဗ္ဗေ – ‘‘ဣဒ္ဓိဗလေန သမန္နာဂတော ကပ္ပံ တိဋ္ဌေယ္ယာ’’တိ။ အသတိ ဇီဝိတေ ဇီဝိတာဝသေသေ တိဋ္ဌေယ္ယာတိ, မတော တိဋ္ဌေယ္ယ, ကာလင္ကတော တိဋ္ဌေယ္ယာတိ? န ဟေဝံ ဝတ္တဗ္ဗေ။ပေ.။။
Iddhibalena samannāgato kappaṃ tiṭṭheyyāti? Āmantā. Atītaṃ kappaṃ tiṭṭheyya, anāgataṃ kappaṃ tiṭṭheyyāti? Na hevaṃ vattabbe…pe… iddhibalena samannāgato kappaṃ tiṭṭheyyāti? Āmantā. Dve kappe tiṭṭheyya, tayo kappe tiṭṭheyya, cattāro kappe tiṭṭheyyāti? Na hevaṃ vattabbe…pe… iddhibalena samannāgato kappaṃ tiṭṭheyyāti? Āmantā. Sati jīvite jīvitāvasese tiṭṭheyya, asati jīvite jīvitāvasese tiṭṭheyyāti? Sati jīvite jīvitāvasese tiṭṭheyyāti. Hañci sati jīvite jīvitāvasese tiṭṭheyya, no ca vata re vattabbe – ‘‘iddhibalena samannāgato kappaṃ tiṭṭheyyā’’ti. Asati jīvite jīvitāvasese tiṭṭheyyāti, mato tiṭṭheyya, kālaṅkato tiṭṭheyyāti? Na hevaṃ vattabbe…pe….
၆၂၂. ဣဒ္ဓိဗလေန သမန္နာဂတော ကပ္ပံ တိဋ္ဌေယ္ယာတိ? အာမန္တာ။ ဥပ္ပန္နော ဖသ္သော မာ နိရုဇ္ဈီတိ လဗ္ဘာ ဣဒ္ဓိယာ ပဂ္ဂဟေတုန္တိ? န ဟေဝံ ဝတ္တဗ္ဗေ။ပေ.။ ဥပ္ပန္နာ ဝေဒနာ။ပေ.။ ဥပ္ပန္နာ သညာ ။ပေ.။ ဥပ္ပန္နာ စေတနာ။ပေ.။ ဥပ္ပန္နံ စိတ္တံ။ ဥပ္ပန္နာ သဒ္ဓာ။ ဥပ္ပန္နံ ဝီရိယံ။ ဥပ္ပန္နာ သတိ။ ဥပ္ပန္နော သမာဓိ ။ပေ.။ ဥပ္ပန္နာ ပညာ မာ နိရုဇ္ဈီတိ လဗ္ဘာ ဣဒ္ဓိယာ ပဂ္ဂဟေတုန္တိ? န ဟေဝံ ဝတ္တဗ္ဗေ။ပေ.။။
622. Iddhibalena samannāgato kappaṃ tiṭṭheyyāti? Āmantā. Uppanno phasso mā nirujjhīti labbhā iddhiyā paggahetunti? Na hevaṃ vattabbe…pe… uppannā vedanā…pe… uppannā saññā …pe… uppannā cetanā…pe… uppannaṃ cittaṃ… uppannā saddhā… uppannaṃ vīriyaṃ… uppannā sati… uppanno samādhi …pe… uppannā paññā mā nirujjhīti labbhā iddhiyā paggahetunti? Na hevaṃ vattabbe…pe….
ဣဒ္ဓိဗလေန သမန္နာဂတော ကပ္ပံ တိဋ္ဌေယ္ယာတိ? အာမန္တာ။ ရူပံ နိစ္စံ ဟောတူတိ လဗ္ဘာ ဣဒ္ဓိယာ ပဂ္ဂဟေတုန္တိ? န ဟေဝံ ဝတ္တဗ္ဗေ။ပေ.။ ဝေဒနာ။ပေ.။ သညာ။ သင္ခာရာ။ ဝိညာဏံ နိစ္စံ ဟောတူတိ လဗ္ဘာ ဣဒ္ဓိယာ ပဂ္ဂဟေတုန္တိ? န ဟေဝံ ဝတ္တဗ္ဗေ။ပေ.။။
Iddhibalena samannāgato kappaṃ tiṭṭheyyāti? Āmantā. Rūpaṃ niccaṃ hotūti labbhā iddhiyā paggahetunti? Na hevaṃ vattabbe…pe… vedanā…pe… saññā… saṅkhārā… viññāṇaṃ niccaṃ hotūti labbhā iddhiyā paggahetunti? Na hevaṃ vattabbe…pe….
ဣဒ္ဓိဗလေန သမန္နာဂတော ကပ္ပံ တိဋ္ဌေယ္ယာတိ? အာမန္တာ။ ဇာတိဓမ္မာ သတ္တာ မာ ဇာယိံသူတိ လဗ္ဘာ ဣဒ္ဓိယာ ပဂ္ဂဟေတုန္တိ? န ဟေဝံ ဝတ္တဗ္ဗေ။ပေ.။ ဇရာဓမ္မာ သတ္တာ မာ ဇီရိံသူတိ။ပေ.။ ဗ္ယာဓိဓမ္မာ သတ္တာ မာ ဗ္ယာဓိယိံသူတိ။ပေ.။ မရဏဓမ္မာ သတ္တာ မာ မီယိံသူတိ လဗ္ဘာ ဣဒ္ဓိယာ ပဂ္ဂဟေတုန္တိ? န ဟေဝံ ဝတ္တဗ္ဗေ။ပေ.။။
Iddhibalena samannāgato kappaṃ tiṭṭheyyāti? Āmantā. Jātidhammā sattā mā jāyiṃsūti labbhā iddhiyā paggahetunti? Na hevaṃ vattabbe…pe… jarādhammā sattā mā jīriṃsūti…pe… byādhidhammā sattā mā byādhiyiṃsūti…pe… maraṇadhammā sattā mā mīyiṃsūti labbhā iddhiyā paggahetunti? Na hevaṃ vattabbe…pe….
၆၂၃. န ဝတ္တဗ္ဗံ – ‘‘ဣဒ္ဓိဗလေန သမန္နာဂတော ကပ္ပံ တိဋ္ဌေယ္ယာ’’တိ? အာမန္တာ။ နနု ဝုတ္တံ ဘဂဝတာ – ‘‘ယသ္သ ကသ္သစိ, အာနန္ဒ, စတ္တာရော ဣဒ္ဓိပာဒာ ဘာဝိတာ ဗဟုလီကတာ ယာနီကတာ ဝတ္ထုကတာ အနုဋ္ဌိတာ ပရိစိတာ သုသမာရဒ္ဓာ, သော အာကင္ခမာနော ကပ္ပံ ဝာ တိဋ္ဌေယ္ယ ကပ္ပာဝသေသံ ဝာ’’တိ 1! အတ္ထေဝ သုတ္တန္တောတိ? အာမန္တာ။ တေန ဟိ ဣဒ္ဓိဗလေန သမန္နာဂတော ကပ္ပံ တိဋ္ဌေယ္ယာတိ။
623. Na vattabbaṃ – ‘‘iddhibalena samannāgato kappaṃ tiṭṭheyyā’’ti? Āmantā. Nanu vuttaṃ bhagavatā – ‘‘yassa kassaci, ānanda, cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā, so ākaṅkhamāno kappaṃ vā tiṭṭheyya kappāvasesaṃ vā’’ti 2! Attheva suttantoti? Āmantā. Tena hi iddhibalena samannāgato kappaṃ tiṭṭheyyāti.
၆၂၄. ဣဒ္ဓိဗလေန သမန္နာဂတော ကပ္ပံ တိဋ္ဌေယ္ယာတိ? အာမန္တာ။ နနု ဝုတ္တံ ဘဂဝတာ – ‘‘စတုန္နံ, ဘိက္ခဝေ, ဓမ္မာနံ နတ္ထိ ကောစိ ပာဋိဘောဂော သမဏော ဝာ ဗ္ရာဟ္မဏော ဝာ ဒေဝော ဝာ မာရော ဝာ ဗ္ရဟ္မာ ဝာ ကောစိ ဝာ လောကသ္မိံ! ကတမေသံ စတုန္နံ? ဇရာဓမ္မော ‘‘မာ ဇီရီ’’တိ နတ္ထိ ကောစိ ပာဋိဘောဂော သမဏော ဝာ ဗ္ရာဟ္မဏော ဝာ ဒေဝော ဝာ မာရော ဝာ ဗ္ရဟ္မာ ဝာ ကောစိ ဝာ လောကသ္မိံ။ ဗ္ယာဓိဓမ္မော ‘‘မာ ဗ္ယာဓိယီ’’တိ။ပေ.။ မရဏဓမ္မော ‘‘မာ မီယီ’’တိ။ပေ.။ ယာနိ ခော ပန တာနိ ပုဗ္ဗေ ကတာနိ ပာပကာနိ ကမ္မာနိ သံကိလေသိကာနိ ပောနောဗ္ဘဝိကာနိ 3 သဒရာနိ 4 ဒုက္ခဝိပာကာနိ အာယတိံ ဇာတိဇရာမရဏိယာနိ တေသံ ဝိပာကော ‘‘မာ နိဗ္ဗတ္တီ’’တိ နတ္ထိ ကောစိ ပာဋိဘောဂော သမဏော ဝာ ဗ္ရာဟ္မဏော ဝာ ဒေဝော ဝာ မာရော ဝာ ဗ္ရဟ္မာ ဝာ ကောစိ ဝာ လောကသ္မိံ။ ဣမေသံ ခော, ဘိက္ခဝေ, စတုန္နံ ဓမ္မာနံ နတ္ထိ ကောစိ ပာဋိဘောဂော သမဏော ဝာ ဗ္ရာဟ္မဏော ဝာ ဒေဝော ဝာ မာရော ဝာ ဗ္ရဟ္မာ ဝာ ကောစိ ဝာ လောကသ္မိ’’န္တိ 5။ အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ဣဒ္ဓိဗလေန သမန္နာဂတော ကပ္ပံ တိဋ္ဌေယ္ယာ’’တိ။
624. Iddhibalena samannāgato kappaṃ tiṭṭheyyāti? Āmantā. Nanu vuttaṃ bhagavatā – ‘‘catunnaṃ, bhikkhave, dhammānaṃ natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmiṃ! Katamesaṃ catunnaṃ? Jarādhammo ‘‘mā jīrī’’ti natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmiṃ. Byādhidhammo ‘‘mā byādhiyī’’ti…pe… maraṇadhammo ‘‘mā mīyī’’ti…pe… yāni kho pana tāni pubbe katāni pāpakāni kammāni saṃkilesikāni ponobbhavikāni 6 sadarāni 7 dukkhavipākāni āyatiṃ jātijarāmaraṇiyāni tesaṃ vipāko ‘‘mā nibbattī’’ti natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmiṃ. Imesaṃ kho, bhikkhave, catunnaṃ dhammānaṃ natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmi’’nti 8. Attheva suttantoti? Āmantā. Tena hi na vattabbaṃ – ‘‘iddhibalena samannāgato kappaṃ tiṭṭheyyā’’ti.
ဣဒ္ဓိဗလကထာ နိဋ္ဌိတာ။
Iddhibalakathā niṭṭhitā.
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၇. ဣဒ္ဓိဗလကထာဝဏ္ဏနာ • 7. Iddhibalakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၇. ဣဒ္ဓိဗလကထာဝဏ္ဏနာ • 7. Iddhibalakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၇. ဣဒ္ဓိဗလကထာဝဏ္ဏနာ • 7. Iddhibalakathāvaṇṇanā
