Library / Tipiṭaka / ཏིཔིཊཀ • Tipiṭaka / ཀཐཱཝཏྠུཔཱལི༹ • Kathāvatthupāḷi

    ༡༡. ཨེཀཱདསམཝགྒོ

    11. Ekādasamavaggo

    (༡༡༢) ༧. ཨིདྡྷིབལཀཐཱ

    (112) 7. Iddhibalakathā

    ༦༢༡. ཨིདྡྷིབལེན སམནྣཱགཏོ ཀཔྤཾ ཏིཊྛེཡྻཱཏི? ཨཱམནྟཱ། ཨིདྡྷིམཡིཀོ སོ ཨཱཡུ, ཨིདྡྷིམཡིཀཱ སཱ གཏི, ཨིདྡྷིམཡིཀོ སོ ཨཏྟབྷཱཝཔྤཊིལཱབྷོཏི? ན ཧེཝཾ ཝཏྟབྦེ…པེ॰…།

    621. Iddhibalena samannāgato kappaṃ tiṭṭheyyāti? Āmantā. Iddhimayiko so āyu, iddhimayikā sā gati, iddhimayiko so attabhāvappaṭilābhoti? Na hevaṃ vattabbe…pe….

    ཨིདྡྷིབལེན སམནྣཱགཏོ ཀཔྤཾ ཏིཊྛེཡྻཱཏི? ཨཱམནྟཱ། ཨཏཱིཏཾ ཀཔྤཾ ཏིཊྛེཡྻ, ཨནཱགཏཾ ཀཔྤཾ ཏིཊྛེཡྻཱཏི? ན ཧེཝཾ ཝཏྟབྦེ…པེ॰… ཨིདྡྷིབལེན སམནྣཱགཏོ ཀཔྤཾ ཏིཊྛེཡྻཱཏི? ཨཱམནྟཱ། དྭེ ཀཔྤེ ཏིཊྛེཡྻ, ཏཡོ ཀཔྤེ ཏིཊྛེཡྻ, ཙཏྟཱརོ ཀཔྤེ ཏིཊྛེཡྻཱཏི? ན ཧེཝཾ ཝཏྟབྦེ…པེ॰… ཨིདྡྷིབལེན སམནྣཱགཏོ ཀཔྤཾ ཏིཊྛེཡྻཱཏི? ཨཱམནྟཱ། སཏི ཛཱིཝིཏེ ཛཱིཝིཏཱཝསེསེ ཏིཊྛེཡྻ, ཨསཏི ཛཱིཝིཏེ ཛཱིཝིཏཱཝསེསེ ཏིཊྛེཡྻཱཏི? སཏི ཛཱིཝིཏེ ཛཱིཝིཏཱཝསེསེ ཏིཊྛེཡྻཱཏི། ཧཉྩི སཏི ཛཱིཝིཏེ ཛཱིཝིཏཱཝསེསེ ཏིཊྛེཡྻ, ནོ ཙ ཝཏ རེ ཝཏྟབྦེ – ‘‘ཨིདྡྷིབལེན སམནྣཱགཏོ ཀཔྤཾ ཏིཊྛེཡྻཱ’’ཏི། ཨསཏི ཛཱིཝིཏེ ཛཱིཝིཏཱཝསེསེ ཏིཊྛེཡྻཱཏི, མཏོ ཏིཊྛེཡྻ, ཀཱལངྐཏོ ཏིཊྛེཡྻཱཏི? ན ཧེཝཾ ཝཏྟབྦེ…པེ॰…།

    Iddhibalena samannāgato kappaṃ tiṭṭheyyāti? Āmantā. Atītaṃ kappaṃ tiṭṭheyya, anāgataṃ kappaṃ tiṭṭheyyāti? Na hevaṃ vattabbe…pe… iddhibalena samannāgato kappaṃ tiṭṭheyyāti? Āmantā. Dve kappe tiṭṭheyya, tayo kappe tiṭṭheyya, cattāro kappe tiṭṭheyyāti? Na hevaṃ vattabbe…pe… iddhibalena samannāgato kappaṃ tiṭṭheyyāti? Āmantā. Sati jīvite jīvitāvasese tiṭṭheyya, asati jīvite jīvitāvasese tiṭṭheyyāti? Sati jīvite jīvitāvasese tiṭṭheyyāti. Hañci sati jīvite jīvitāvasese tiṭṭheyya, no ca vata re vattabbe – ‘‘iddhibalena samannāgato kappaṃ tiṭṭheyyā’’ti. Asati jīvite jīvitāvasese tiṭṭheyyāti, mato tiṭṭheyya, kālaṅkato tiṭṭheyyāti? Na hevaṃ vattabbe…pe….

    ༦༢༢. ཨིདྡྷིབལེན སམནྣཱགཏོ ཀཔྤཾ ཏིཊྛེཡྻཱཏི? ཨཱམནྟཱ། ཨུཔྤནྣོ ཕསྶོ མཱ ནིརུཛ྄ཛྷཱིཏི ལབྦྷཱ ཨིདྡྷིཡཱ པགྒཧེཏུནྟི? ན ཧེཝཾ ཝཏྟབྦེ…པེ॰… ཨུཔྤནྣཱ ཝེདནཱ…པེ॰… ཨུཔྤནྣཱ སཉྙཱ …པེ॰… ཨུཔྤནྣཱ ཙེཏནཱ…པེ॰… ཨུཔྤནྣཾ ཙིཏྟཾ… ཨུཔྤནྣཱ སདྡྷཱ… ཨུཔྤནྣཾ ཝཱིརིཡཾ… ཨུཔྤནྣཱ སཏི… ཨུཔྤནྣོ སམཱདྷི …པེ॰… ཨུཔྤནྣཱ པཉྙཱ མཱ ནིརུཛ྄ཛྷཱིཏི ལབྦྷཱ ཨིདྡྷིཡཱ པགྒཧེཏུནྟི? ན ཧེཝཾ ཝཏྟབྦེ…པེ॰…།

    622. Iddhibalena samannāgato kappaṃ tiṭṭheyyāti? Āmantā. Uppanno phasso mā nirujjhīti labbhā iddhiyā paggahetunti? Na hevaṃ vattabbe…pe… uppannā vedanā…pe… uppannā saññā …pe… uppannā cetanā…pe… uppannaṃ cittaṃ… uppannā saddhā… uppannaṃ vīriyaṃ… uppannā sati… uppanno samādhi …pe… uppannā paññā mā nirujjhīti labbhā iddhiyā paggahetunti? Na hevaṃ vattabbe…pe….

    ཨིདྡྷིབལེན སམནྣཱགཏོ ཀཔྤཾ ཏིཊྛེཡྻཱཏི? ཨཱམནྟཱ། རཱུཔཾ ནིཙྩཾ ཧོཏཱུཏི ལབྦྷཱ ཨིདྡྷིཡཱ པགྒཧེཏུནྟི? ན ཧེཝཾ ཝཏྟབྦེ…པེ॰… ཝེདནཱ…པེ॰… སཉྙཱ… སངྑཱརཱ… ཝིཉྙཱཎཾ ནིཙྩཾ ཧོཏཱུཏི ལབྦྷཱ ཨིདྡྷིཡཱ པགྒཧེཏུནྟི? ན ཧེཝཾ ཝཏྟབྦེ…པེ॰…།

    Iddhibalena samannāgato kappaṃ tiṭṭheyyāti? Āmantā. Rūpaṃ niccaṃ hotūti labbhā iddhiyā paggahetunti? Na hevaṃ vattabbe…pe… vedanā…pe… saññā… saṅkhārā… viññāṇaṃ niccaṃ hotūti labbhā iddhiyā paggahetunti? Na hevaṃ vattabbe…pe….

    ཨིདྡྷིབལེན སམནྣཱགཏོ ཀཔྤཾ ཏིཊྛེཡྻཱཏི? ཨཱམནྟཱ། ཛཱཏིདྷམྨཱ སཏྟཱ མཱ ཛཱཡིཾསཱུཏི ལབྦྷཱ ཨིདྡྷིཡཱ པགྒཧེཏུནྟི? ན ཧེཝཾ ཝཏྟབྦེ…པེ॰… ཛརཱདྷམྨཱ སཏྟཱ མཱ ཛཱིརིཾསཱུཏི…པེ॰… བྱཱདྷིདྷམྨཱ སཏྟཱ མཱ བྱཱདྷིཡིཾསཱུཏི…པེ॰… མརཎདྷམྨཱ སཏྟཱ མཱ མཱིཡིཾསཱུཏི ལབྦྷཱ ཨིདྡྷིཡཱ པགྒཧེཏུནྟི? ན ཧེཝཾ ཝཏྟབྦེ…པེ॰…།

    Iddhibalena samannāgato kappaṃ tiṭṭheyyāti? Āmantā. Jātidhammā sattā mā jāyiṃsūti labbhā iddhiyā paggahetunti? Na hevaṃ vattabbe…pe… jarādhammā sattā mā jīriṃsūti…pe… byādhidhammā sattā mā byādhiyiṃsūti…pe… maraṇadhammā sattā mā mīyiṃsūti labbhā iddhiyā paggahetunti? Na hevaṃ vattabbe…pe….

    ༦༢༣. ན ཝཏྟབྦཾ – ‘‘ཨིདྡྷིབལེན སམནྣཱགཏོ ཀཔྤཾ ཏིཊྛེཡྻཱ’’ཏི? ཨཱམནྟཱ། ནནུ ཝུཏྟཾ བྷགཝཏཱ – ‘‘ཡསྶ ཀསྶཙི, ཨཱནནྡ, ཙཏྟཱརོ ཨིདྡྷིཔཱདཱ བྷཱཝིཏཱ བཧུལཱིཀཏཱ ཡཱནཱིཀཏཱ ཝཏྠུཀཏཱ ཨནུཊྛིཏཱ པརིཙིཏཱ སུསམཱརདྡྷཱ, སོ ཨཱཀངྑམཱནོ ཀཔྤཾ ཝཱ ཏིཊྛེཡྻ ཀཔྤཱཝསེསཾ ཝཱ’’ཏི 1! ཨཏྠེཝ སུཏྟནྟོཏི? ཨཱམནྟཱ། ཏེན ཧི ཨིདྡྷིབལེན སམནྣཱགཏོ ཀཔྤཾ ཏིཊྛེཡྻཱཏི།

    623. Na vattabbaṃ – ‘‘iddhibalena samannāgato kappaṃ tiṭṭheyyā’’ti? Āmantā. Nanu vuttaṃ bhagavatā – ‘‘yassa kassaci, ānanda, cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā, so ākaṅkhamāno kappaṃ vā tiṭṭheyya kappāvasesaṃ vā’’ti 2! Attheva suttantoti? Āmantā. Tena hi iddhibalena samannāgato kappaṃ tiṭṭheyyāti.

    ༦༢༤. ཨིདྡྷིབལེན སམནྣཱགཏོ ཀཔྤཾ ཏིཊྛེཡྻཱཏི? ཨཱམནྟཱ། ནནུ ཝུཏྟཾ བྷགཝཏཱ – ‘‘ཙཏུནྣཾ, བྷིཀྑཝེ, དྷམྨཱནཾ ནཏྠི ཀོཙི པཱཊིབྷོགོ སམཎོ ཝཱ བྲཱཧྨཎོ ཝཱ དེཝོ ཝཱ མཱརོ ཝཱ བྲཧྨཱ ཝཱ ཀོཙི ཝཱ ལོཀསྨིཾ! ཀཏམེསཾ ཙཏུནྣཾ? ཛརཱདྷམྨོ ‘‘མཱ ཛཱིརཱི’’ཏི ནཏྠི ཀོཙི པཱཊིབྷོགོ སམཎོ ཝཱ བྲཱཧྨཎོ ཝཱ དེཝོ ཝཱ མཱརོ ཝཱ བྲཧྨཱ ཝཱ ཀོཙི ཝཱ ལོཀསྨིཾ། བྱཱདྷིདྷམྨོ ‘‘མཱ བྱཱདྷིཡཱི’’ཏི…པེ॰… མརཎདྷམྨོ ‘‘མཱ མཱིཡཱི’’ཏི…པེ॰… ཡཱནི ཁོ པན ཏཱནི པུབྦེ ཀཏཱནི པཱཔཀཱནི ཀམྨཱནི སཾཀིལེསིཀཱནི པོནོབྦྷཝིཀཱནི 3 སདརཱནི 4 དུཀྑཝིཔཱཀཱནི ཨཱཡཏིཾ ཛཱཏིཛརཱམརཎིཡཱནི ཏེསཾ ཝིཔཱཀོ ‘‘མཱ ནིབྦཏྟཱི’’ཏི ནཏྠི ཀོཙི པཱཊིབྷོགོ སམཎོ ཝཱ བྲཱཧྨཎོ ཝཱ དེཝོ ཝཱ མཱརོ ཝཱ བྲཧྨཱ ཝཱ ཀོཙི ཝཱ ལོཀསྨིཾ། ཨིམེསཾ ཁོ, བྷིཀྑཝེ, ཙཏུནྣཾ དྷམྨཱནཾ ནཏྠི ཀོཙི པཱཊིབྷོགོ སམཎོ ཝཱ བྲཱཧྨཎོ ཝཱ དེཝོ ཝཱ མཱརོ ཝཱ བྲཧྨཱ ཝཱ ཀོཙི ཝཱ ལོཀསྨི’’ནྟི 5། ཨཏྠེཝ སུཏྟནྟོཏི? ཨཱམནྟཱ། ཏེན ཧི ན ཝཏྟབྦཾ – ‘‘ཨིདྡྷིབལེན སམནྣཱགཏོ ཀཔྤཾ ཏིཊྛེཡྻཱ’’ཏི།

    624. Iddhibalena samannāgato kappaṃ tiṭṭheyyāti? Āmantā. Nanu vuttaṃ bhagavatā – ‘‘catunnaṃ, bhikkhave, dhammānaṃ natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmiṃ! Katamesaṃ catunnaṃ? Jarādhammo ‘‘mā jīrī’’ti natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmiṃ. Byādhidhammo ‘‘mā byādhiyī’’ti…pe… maraṇadhammo ‘‘mā mīyī’’ti…pe… yāni kho pana tāni pubbe katāni pāpakāni kammāni saṃkilesikāni ponobbhavikāni 6 sadarāni 7 dukkhavipākāni āyatiṃ jātijarāmaraṇiyāni tesaṃ vipāko ‘‘mā nibbattī’’ti natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmiṃ. Imesaṃ kho, bhikkhave, catunnaṃ dhammānaṃ natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmi’’nti 8. Attheva suttantoti? Āmantā. Tena hi na vattabbaṃ – ‘‘iddhibalena samannāgato kappaṃ tiṭṭheyyā’’ti.

    ཨིདྡྷིབལཀཐཱ ནིཊྛིཏཱ།

    Iddhibalakathā niṭṭhitā.




    Next: (༡༡༣) ༨. སམཱདྷིཀཐཱ • (113) 8. Samādhikathā




    Footnotes:
    1. དཱི॰ ནི॰ ༢.༡༦༦; སཾ॰ ནི॰ ༥.༨༢༢; ཨུདཱ॰ ༥༡
    2. dī. ni. 2.166; saṃ. ni. 5.822; udā. 51
    3. པོནོབྷཝིཀཱནི (སཱི॰ པཱི॰)
    4. ནིསྶཱརཱནི (སཱི॰ པཱི॰ ཀ॰), དུཀྑུདྲཡཱནི (སྱཱ॰)
    5. ཨ॰ ནི॰ ༤.༡༨༢
    6. ponobhavikāni (sī. pī.)
    7. nissārāni (sī. pī. ka.), dukkhudrayāni (syā.)
    8. a. ni. 4.182



    Related texts:



    ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༧. ཨིདྡྷིབལཀཐཱཝཎྞནཱ • 7. Iddhibalakathāvaṇṇanā

    ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༧. ཨིདྡྷིབལཀཐཱཝཎྞནཱ • 7. Iddhibalakathāvaṇṇanā

    ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༧. ཨིདྡྷིབལཀཐཱཝཎྞནཱ • 7. Iddhibalakathāvaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact