| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
7. இத்³தி⁴ப³லகதா²வண்ணனா
7. Iddhibalakathāvaṇṇanā
621-624. இதா³னி இத்³தி⁴ப³லகதா² நாம ஹோதி. தத்த² இத்³தி⁴பாத³பா⁴வனானிஸங்ஸஸ்ஸ அத்த²ங் அயோனிஸோ க³ஹெத்வா ‘‘இத்³தி⁴ப³லேன ஸமன்னாக³தோ கப்பங் திட்டெ²ய்யா’’தி யேஸங் லத்³தி⁴, ஸெய்யதா²பி மஹாஸங்கி⁴கானங்; தே ஸந்தா⁴ய இத்³தி⁴ப³லேன ஸமன்னாக³தோ கப்பங் திட்டெ²ய்யாதி புச்சா² ஸகவாதி³ஸ்ஸ. தத்த² கப்போ நாம மஹாகப்போ, கப்பேகதே³ஸோ, ஆயுகப்போதி திவிதோ⁴. ‘‘சத்தாரிமானி, பி⁴க்க²வே, கப்பஸ்ஸ அஸங்க்²யெய்யானீ’’தி (அ॰ நி॰ 4.156) எத்த² ஹி மஹாகப்போவ கப்போதி வுத்தோ. ‘‘ப்³ரஹ்மகாயிகானங் தே³வானங் கப்போ ஆயுப்பமாண’’ந்தி (அ॰ நி॰ 4.123) எத்த² கப்பேகதே³ஸா. ‘‘கப்பங் நிரயம்ஹி பச்சதி, கப்பங் ஸக்³க³ம்ஹி மோத³தீ’’தி (சூளவ॰ 354) எத்த² ஆயுகப்போ. ஆயுகப்பனங் ஆயுவிதா⁴னங் கம்மஸ்ஸ விபாகவஸேன வா வஸ்ஸக³ணனாய வா ஆயுபரிச்சே²தோ³தி அத்தோ². தேஸு மஹாகப்பங் ஸந்தா⁴ய புச்ச²தி, இதரோ படிஜானாதி.
621-624. Idāni iddhibalakathā nāma hoti. Tattha iddhipādabhāvanānisaṃsassa atthaṃ ayoniso gahetvā ‘‘iddhibalena samannāgato kappaṃ tiṭṭheyyā’’ti yesaṃ laddhi, seyyathāpi mahāsaṃghikānaṃ; te sandhāya iddhibalena samannāgato kappaṃ tiṭṭheyyāti pucchā sakavādissa. Tattha kappo nāma mahākappo, kappekadeso, āyukappoti tividho. ‘‘Cattārimāni, bhikkhave, kappassa asaṅkhyeyyānī’’ti (a. ni. 4.156) ettha hi mahākappova kappoti vutto. ‘‘Brahmakāyikānaṃ devānaṃ kappo āyuppamāṇa’’nti (a. ni. 4.123) ettha kappekadesā. ‘‘Kappaṃ nirayamhi paccati, kappaṃ saggamhi modatī’’ti (cūḷava. 354) ettha āyukappo. Āyukappanaṃ āyuvidhānaṃ kammassa vipākavasena vā vassagaṇanāya vā āyuparicchedoti attho. Tesu mahākappaṃ sandhāya pucchati, itaro paṭijānāti.
அத² நங் ஸகவாதீ³ ‘‘ஸசே தே இத்³தி⁴ப³லேன ஸமன்னாக³தோ, ‘யோ சிரங் ஜீவதி, ஸோ வஸ்ஸஸதங் அப்பங் வா பி⁴ய்யோ’தி (ஸங்॰ நி॰ 2.143) ஏவங் பரிச்சி²ன்னா ஆயுகப்பா உத்³த⁴ங் மஹாகப்பங் வா மஹாகப்பேகதே³ஸங் வா ஜீவெய்ய இத்³தி⁴மயிகேனஸ்ஸ ஆயுனா ப⁴விதப்³ப³’’ந்தி சோதே³துங் இத்³தி⁴மயிகோ ஸோ ஆயூதிஆதி³மாஹ. இதரோ ‘‘ஜீவிதிந்த்³ரியங் நாம இத்³தி⁴மயிகங் நத்தி², கம்மஸமுட்டா²னமேவா’’தி வுத்தத்தா படிக்கி²பதி. கோ பனெத்த² இத்³தி⁴மதோ விஸேஸோ, நனு அனித்³தி⁴மாபி ஆயுகப்பங் திட்டெ²ய்யாதி? அயங் விஸேஸோ – இத்³தி⁴மா ஹி யாவதாயுகங் ஜீவிதப்பவத்தியா அந்தராயகரே த⁴ம்மே இத்³தி⁴ப³லேன படிபா³ஹித்வா அந்தரா அகாலமரணங் நிவாரேதுங் ஸக்கோதி, அனித்³தி⁴மதோ ஏதங் ப³லங் நத்தி². அயமேதேஸங் விஸேஸோ.
Atha naṃ sakavādī ‘‘sace te iddhibalena samannāgato, ‘yo ciraṃ jīvati, so vassasataṃ appaṃ vā bhiyyo’ti (saṃ. ni. 2.143) evaṃ paricchinnā āyukappā uddhaṃ mahākappaṃ vā mahākappekadesaṃ vā jīveyya iddhimayikenassa āyunā bhavitabba’’nti codetuṃ iddhimayiko so āyūtiādimāha. Itaro ‘‘jīvitindriyaṃ nāma iddhimayikaṃ natthi, kammasamuṭṭhānamevā’’ti vuttattā paṭikkhipati. Ko panettha iddhimato viseso, nanu aniddhimāpi āyukappaṃ tiṭṭheyyāti? Ayaṃ viseso – iddhimā hi yāvatāyukaṃ jīvitappavattiyā antarāyakare dhamme iddhibalena paṭibāhitvā antarā akālamaraṇaṃ nivāretuṃ sakkoti, aniddhimato etaṃ balaṃ natthi. Ayametesaṃ viseso.
அதீதங் அனாக³தந்தி இத³ங் அவிஸேஸேன கப்பங் திட்டெ²ய்யாதி படிஞ்ஞாதத்தா சோதே³தி. த்³வே கப்பேதிஆதி³ ‘‘யதி³ இத்³தி⁴மா ஜீவிதபரிச்சே²த³ங் அதிக்கமிதுங் ஸக்கோதி, ந கேவலங் ஏகங் அனேகேபி கப்பே திட்டெ²ய்யா’’தி சோத³னத்த²ங் வுத்தங். உப்பன்னோ ப²ஸ்ஸோதிஆதி³ ந ஸப்³ப³ங் இத்³தி⁴யா லப்³ப⁴தி, இத்³தி⁴யா அவிஸயோபி அத்தீ²தி த³ஸ்ஸேதுங் வுத்தங். ஸேஸமெத்த² உத்தானத்த²மேவாதி.
Atītaṃ anāgatanti idaṃ avisesena kappaṃ tiṭṭheyyāti paṭiññātattā codeti. Dve kappetiādi ‘‘yadi iddhimā jīvitaparicchedaṃ atikkamituṃ sakkoti, na kevalaṃ ekaṃ anekepi kappe tiṭṭheyyā’’ti codanatthaṃ vuttaṃ. Uppanno phassotiādi na sabbaṃ iddhiyā labbhati, iddhiyā avisayopi atthīti dassetuṃ vuttaṃ. Sesamettha uttānatthamevāti.
இத்³தி⁴ப³லகதா²வண்ணனா.
Iddhibalakathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (112) 7. இத்³தி⁴ப³லகதா² • (112) 7. Iddhibalakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 7. இத்³தி⁴ப³லகதா²வண்ணனா • 7. Iddhibalakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 7. இத்³தி⁴ப³லகதா²வண்ணனா • 7. Iddhibalakathāvaṇṇanā
