| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৭. ইদ্ধিবলকথাৰণ্ণনা
7. Iddhibalakathāvaṇṇanā
৬২১-৬২৪. ইদানি ইদ্ধিবলকথা নাম হোতি। তত্থ ইদ্ধিপাদভাৰনানিসংসস্স অত্থং অযোনিসো গহেত্ৰা ‘‘ইদ্ধিবলেন সমন্নাগতো কপ্পং তিট্ঠেয্যা’’তি যেসং লদ্ধি, সেয্যথাপি মহাসংঘিকানং; তে সন্ধায ইদ্ধিবলেন সমন্নাগতো কপ্পং তিট্ঠেয্যাতি পুচ্ছা সকৰাদিস্স। তত্থ কপ্পো নাম মহাকপ্পো, কপ্পেকদেসো, আযুকপ্পোতি তিৰিধো। ‘‘চত্তারিমানি, ভিক্খৰে, কপ্পস্স অসঙ্খ্যেয্যানী’’তি (অ॰ নি॰ ৪.১৫৬) এত্থ হি মহাকপ্পোৰ কপ্পোতি ৰুত্তো। ‘‘ব্রহ্মকাযিকানং দেৰানং কপ্পো আযুপ্পমাণ’’ন্তি (অ॰ নি॰ ৪.১২৩) এত্থ কপ্পেকদেসা। ‘‘কপ্পং নিরযম্হি পচ্চতি, কপ্পং সগ্গম্হি মোদতী’’তি (চূল়ৰ॰ ৩৫৪) এত্থ আযুকপ্পো। আযুকপ্পনং আযুৰিধানং কম্মস্স ৰিপাকৰসেন ৰা ৰস্সগণনায ৰা আযুপরিচ্ছেদোতি অত্থো। তেসু মহাকপ্পং সন্ধায পুচ্ছতি, ইতরো পটিজানাতি।
621-624. Idāni iddhibalakathā nāma hoti. Tattha iddhipādabhāvanānisaṃsassa atthaṃ ayoniso gahetvā ‘‘iddhibalena samannāgato kappaṃ tiṭṭheyyā’’ti yesaṃ laddhi, seyyathāpi mahāsaṃghikānaṃ; te sandhāya iddhibalena samannāgato kappaṃ tiṭṭheyyāti pucchā sakavādissa. Tattha kappo nāma mahākappo, kappekadeso, āyukappoti tividho. ‘‘Cattārimāni, bhikkhave, kappassa asaṅkhyeyyānī’’ti (a. ni. 4.156) ettha hi mahākappova kappoti vutto. ‘‘Brahmakāyikānaṃ devānaṃ kappo āyuppamāṇa’’nti (a. ni. 4.123) ettha kappekadesā. ‘‘Kappaṃ nirayamhi paccati, kappaṃ saggamhi modatī’’ti (cūḷava. 354) ettha āyukappo. Āyukappanaṃ āyuvidhānaṃ kammassa vipākavasena vā vassagaṇanāya vā āyuparicchedoti attho. Tesu mahākappaṃ sandhāya pucchati, itaro paṭijānāti.
অথ নং সকৰাদী ‘‘সচে তে ইদ্ধিবলেন সমন্নাগতো, ‘যো চিরং জীৰতি, সো ৰস্সসতং অপ্পং ৰা ভিয্যো’তি (সং॰ নি॰ ২.১৪৩) এৰং পরিচ্ছিন্না আযুকপ্পা উদ্ধং মহাকপ্পং ৰা মহাকপ্পেকদেসং ৰা জীৰেয্য ইদ্ধিমযিকেনস্স আযুনা ভৰিতব্ব’’ন্তি চোদেতুং ইদ্ধিমযিকো সো আযূতিআদিমাহ। ইতরো ‘‘জীৰিতিন্দ্রিযং নাম ইদ্ধিমযিকং নত্থি, কম্মসমুট্ঠানমেৰা’’তি ৰুত্তত্তা পটিক্খিপতি। কো পনেত্থ ইদ্ধিমতো ৰিসেসো, ননু অনিদ্ধিমাপি আযুকপ্পং তিট্ঠেয্যাতি? অযং ৰিসেসো – ইদ্ধিমা হি যাৰতাযুকং জীৰিতপ্পৰত্তিযা অন্তরাযকরে ধম্মে ইদ্ধিবলেন পটিবাহিত্ৰা অন্তরা অকালমরণং নিৰারেতুং সক্কোতি, অনিদ্ধিমতো এতং বলং নত্থি। অযমেতেসং ৰিসেসো।
Atha naṃ sakavādī ‘‘sace te iddhibalena samannāgato, ‘yo ciraṃ jīvati, so vassasataṃ appaṃ vā bhiyyo’ti (saṃ. ni. 2.143) evaṃ paricchinnā āyukappā uddhaṃ mahākappaṃ vā mahākappekadesaṃ vā jīveyya iddhimayikenassa āyunā bhavitabba’’nti codetuṃ iddhimayiko so āyūtiādimāha. Itaro ‘‘jīvitindriyaṃ nāma iddhimayikaṃ natthi, kammasamuṭṭhānamevā’’ti vuttattā paṭikkhipati. Ko panettha iddhimato viseso, nanu aniddhimāpi āyukappaṃ tiṭṭheyyāti? Ayaṃ viseso – iddhimā hi yāvatāyukaṃ jīvitappavattiyā antarāyakare dhamme iddhibalena paṭibāhitvā antarā akālamaraṇaṃ nivāretuṃ sakkoti, aniddhimato etaṃ balaṃ natthi. Ayametesaṃ viseso.
অতীতং অনাগতন্তি ইদং অৰিসেসেন কপ্পং তিট্ঠেয্যাতি পটিঞ্ঞাতত্তা চোদেতি। দ্ৰে কপ্পেতিআদি ‘‘যদি ইদ্ধিমা জীৰিতপরিচ্ছেদং অতিক্কমিতুং সক্কোতি, ন কেৰলং একং অনেকেপি কপ্পে তিট্ঠেয্যা’’তি চোদনত্থং ৰুত্তং। উপ্পন্নো ফস্সোতিআদি ন সব্বং ইদ্ধিযা লব্ভতি, ইদ্ধিযা অৰিসযোপি অত্থীতি দস্সেতুং ৰুত্তং। সেসমেত্থ উত্তানত্থমেৰাতি।
Atītaṃ anāgatanti idaṃ avisesena kappaṃ tiṭṭheyyāti paṭiññātattā codeti. Dve kappetiādi ‘‘yadi iddhimā jīvitaparicchedaṃ atikkamituṃ sakkoti, na kevalaṃ ekaṃ anekepi kappe tiṭṭheyyā’’ti codanatthaṃ vuttaṃ. Uppanno phassotiādi na sabbaṃ iddhiyā labbhati, iddhiyā avisayopi atthīti dassetuṃ vuttaṃ. Sesamettha uttānatthamevāti.
ইদ্ধিবলকথাৰণ্ণনা।
Iddhibalakathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (১১২) ৭. ইদ্ধিবলকথা • (112) 7. Iddhibalakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৭. ইদ্ধিবলকথাৰণ্ণনা • 7. Iddhibalakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৭. ইদ্ধিবলকথাৰণ্ণনা • 7. Iddhibalakathāvaṇṇanā
