| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
4. ஸப்³ப³ஞ்ஞுதஞாணவக்³கோ³
4. Sabbaññutañāṇavaggo
1. இத்³தி⁴கம்மவிபாகபஞ்ஹோ
1. Iddhikammavipākapañho
1. ‘‘ப⁴ந்தே நாக³ஸேன, பா⁴ஸிதம்பேதங் ப⁴க³வதா ‘ஏதத³க்³க³ங், பி⁴க்க²வே, மம ஸாவகானங் பி⁴க்கூ²னங் இத்³தி⁴மந்தானங் யதி³த³ங் மஹாமொக்³க³ல்லானோ’தி. புன ச கிர ஸோ லகு³ளேஹி பரிபோதி²தோ பி⁴ன்னஸீஸோ ஸஞ்சுண்ணிதட்டி²மங்ஸத⁴மனிசி²ன்னபரிக³த்தோ பரினிப்³பு³தோ 1. யதி³, ப⁴ந்தே நாக³ஸேன, தே²ரோ மஹாமொக்³க³ல்லானோ இத்³தி⁴யா கோடிங் க³தோ, தேன ஹி லகு³ளேஹி போதி²தோ பரினிப்³பு³தோதி யங் வசனங், தங் மிச்சா². யதி³ லகு³ளேஹி பரிபோதி²தோ பரினிப்³பு³தோ, தேன ஹி இத்³தி⁴யா கோடிங் க³தோதி தம்பி வசனங் மிச்சா². கிங் ந ஸமத்தோ² இத்³தி⁴யா அத்தனோ உபகா⁴தங் அபனயிதுங், ஸதே³வகஸ்ஸபி லோகஸ்ஸ படிஸரணங் ப⁴விதுங் அரஹோதி? அயம்பி உப⁴தோ கோடிகோ பஞ்ஹோ தவானுப்பத்தோ, ஸோ தயா நிப்³பா³ஹிதப்³போ³’’தி.
1. ‘‘Bhante nāgasena, bhāsitampetaṃ bhagavatā ‘etadaggaṃ, bhikkhave, mama sāvakānaṃ bhikkhūnaṃ iddhimantānaṃ yadidaṃ mahāmoggallāno’ti. Puna ca kira so laguḷehi paripothito bhinnasīso sañcuṇṇitaṭṭhimaṃsadhamanichinnaparigatto parinibbuto 2. Yadi, bhante nāgasena, thero mahāmoggallāno iddhiyā koṭiṃ gato, tena hi laguḷehi pothito parinibbutoti yaṃ vacanaṃ, taṃ micchā. Yadi laguḷehi paripothito parinibbuto, tena hi iddhiyā koṭiṃ gatoti tampi vacanaṃ micchā. Kiṃ na samattho iddhiyā attano upaghātaṃ apanayituṃ, sadevakassapi lokassa paṭisaraṇaṃ bhavituṃ arahoti? Ayampi ubhato koṭiko pañho tavānuppatto, so tayā nibbāhitabbo’’ti.
‘‘பா⁴ஸிதம்பேதங், மஹாராஜ, ப⁴க³வதா ‘ஏதத³க்³க³ங், பி⁴க்க²வே, மம ஸாவகானங் பி⁴க்கூ²னங் இத்³தி⁴மந்தானங் யதி³த³ங் மஹாமொக்³க³ல்லானோ’தி. ஆயஸ்மா ச மஹாமொக்³க³ல்லானோ லகு³ளஹதோ பரினிப்³பு³தோ, தஞ்ச பன கம்மாதி⁴க்³க³ஹிதேனா’’தி.
‘‘Bhāsitampetaṃ, mahārāja, bhagavatā ‘etadaggaṃ, bhikkhave, mama sāvakānaṃ bhikkhūnaṃ iddhimantānaṃ yadidaṃ mahāmoggallāno’ti. Āyasmā ca mahāmoggallāno laguḷahato parinibbuto, tañca pana kammādhiggahitenā’’ti.
‘‘நனு, ப⁴ந்தே நாக³ஸேன, இத்³தி⁴மதோ இத்³தி⁴விஸயோபி கம்மவிபாகோபி த்³வே அசிந்தியா, அசிந்தியேன அசிந்தியங் அபனயிதப்³ப³ங். யதா² நாம, ப⁴ந்தே, கேசி ப²லகாமா கபித்தே²ன கபித்த²ங் போதெ²ந்தி, அம்பே³ன அம்ப³ங் போதெ²ந்தி, ஏவமேவ கோ², ப⁴ந்தே நாக³ஸேன, அசிந்தியேன அசிந்தியங் போத²யித்வா அபனேதப்³ப³’’ந்தி? ‘‘அசிந்தியானம்பி, மஹாராஜ, ஏகங் அதி⁴மத்தங் ப³லவதரங், யதா², மஹாராஜ, மஹியா ராஜானோ ஹொந்தி ஸமஜச்சா, ஸமஜச்சானம்பி தேஸங் ஏகோ ஸப்³பே³ அபி⁴ப⁴வித்வா ஆணங் பவத்தேதி. ஏவமேவ கோ², மஹாராஜ, தேஸங் அசிந்தியானங் கம்மவிபாகங் யேவ அதி⁴மத்தங் ப³லவதரங், கம்மவிபாகங் யேவ ஸப்³பே³ அபி⁴ப⁴விய ஆணங் பவத்தேதி, கம்மாதி⁴க்³க³ஹிதஸ்ஸ அவஸேஸா கிரியா ஓகாஸங் ந லப⁴ந்தி.
‘‘Nanu, bhante nāgasena, iddhimato iddhivisayopi kammavipākopi dve acintiyā, acintiyena acintiyaṃ apanayitabbaṃ. Yathā nāma, bhante, keci phalakāmā kapitthena kapitthaṃ pothenti, ambena ambaṃ pothenti, evameva kho, bhante nāgasena, acintiyena acintiyaṃ pothayitvā apanetabba’’nti? ‘‘Acintiyānampi, mahārāja, ekaṃ adhimattaṃ balavataraṃ, yathā, mahārāja, mahiyā rājāno honti samajaccā, samajaccānampi tesaṃ eko sabbe abhibhavitvā āṇaṃ pavatteti. Evameva kho, mahārāja, tesaṃ acintiyānaṃ kammavipākaṃ yeva adhimattaṃ balavataraṃ, kammavipākaṃ yeva sabbe abhibhaviya āṇaṃ pavatteti, kammādhiggahitassa avasesā kiriyā okāsaṃ na labhanti.
‘‘இத⁴ பன, மஹாராஜ, கோசி புரிஸோ கிஸ்மிஞ்சிதே³வ பகரணே அபரஜ்ஜ²தி, ந தஸ்ஸ மாதா வா பிதா வா ப⁴கி³னீ வா பா⁴தரோ வா ஸகீ² வா ஸஹாயகா வா 3 தாயந்தி, அத² கோ² ராஜா யேவ தத்த² அபி⁴ப⁴விய ஆணங் பவத்தேதி. கிங் தத்த² காரணங்? அபராதி⁴கதா. ஏவமேவ கோ², மஹாராஜ, தேஸங் அசிந்தியானங் கம்மவிபாகங் யேவ அதி⁴மத்தங் ப³லவதரங், கம்மவிபாகங் யேவ ஸப்³பே³ அபி⁴ப⁴விய ஆணங் பவத்தேதி, கம்மாதி⁴க்³க³ஹிதஸ்ஸ அவஸேஸா கிரியா ஓகாஸங் ந லப⁴ந்தி.
‘‘Idha pana, mahārāja, koci puriso kismiñcideva pakaraṇe aparajjhati, na tassa mātā vā pitā vā bhaginī vā bhātaro vā sakhī vā sahāyakā vā 4 tāyanti, atha kho rājā yeva tattha abhibhaviya āṇaṃ pavatteti. Kiṃ tattha kāraṇaṃ? Aparādhikatā. Evameva kho, mahārāja, tesaṃ acintiyānaṃ kammavipākaṃ yeva adhimattaṃ balavataraṃ, kammavipākaṃ yeva sabbe abhibhaviya āṇaṃ pavatteti, kammādhiggahitassa avasesā kiriyā okāsaṃ na labhanti.
‘‘யதா² வா பன, மஹாராஜ, மஹியா த³வடா³ஹே ஸமுட்டி²தே க⁴டஸஹஸ்ஸம்பி உத³கங் ந ஸக்கோதி நிப்³பா³பேதுங், அத² கோ² அக்³கி³ யேவ தத்த² அபி⁴ப⁴விய ஆணங் பவத்தேதி. கிங் தத்த² காரணங்? ப³லவதா தேஜஸ்ஸ. ஏவமேவ கோ², மஹாராஜ, தேஸங் அசிந்தியானங் கம்மவிபாகங் யேவ அதி⁴மத்தங் ப³லவதரங், கம்மவிபாகங் யேவ ஸப்³பே³ அபி⁴ப⁴விய ஆணங் பவத்தேதி, கம்மாதி⁴க்³க³ஹிதஸ்ஸ அவஸேஸா கிரியா ஓகாஸங் ந லப⁴ந்தி, தஸ்மா, மஹாராஜ, ஆயஸ்மதோ மஹாமொக்³க³ல்லானஸ்ஸ கம்மாதி⁴க்³க³ஹிதஸ்ஸ லகு³ளேஹி போதி²யமானஸ்ஸ இத்³தி⁴யா ஸமன்னாஹாரோ நாஹோஸீ’’தி. ‘‘ஸாது⁴, ப⁴ந்தே நாக³ஸேன, ஏவமேதங் ததா² ஸம்படிச்சா²மீ’’தி.
‘‘Yathā vā pana, mahārāja, mahiyā davaḍāhe samuṭṭhite ghaṭasahassampi udakaṃ na sakkoti nibbāpetuṃ, atha kho aggi yeva tattha abhibhaviya āṇaṃ pavatteti. Kiṃ tattha kāraṇaṃ? Balavatā tejassa. Evameva kho, mahārāja, tesaṃ acintiyānaṃ kammavipākaṃ yeva adhimattaṃ balavataraṃ, kammavipākaṃ yeva sabbe abhibhaviya āṇaṃ pavatteti, kammādhiggahitassa avasesā kiriyā okāsaṃ na labhanti, tasmā, mahārāja, āyasmato mahāmoggallānassa kammādhiggahitassa laguḷehi pothiyamānassa iddhiyā samannāhāro nāhosī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
இத்³தி⁴கம்மவிபாகபஞ்ஹோ பட²மோ.
Iddhikammavipākapañho paṭhamo.
Footnotes:
