| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༤. སབྦཉྙུཏཉཱཎཝགྒོ
4. Sabbaññutañāṇavaggo
༡. ཨིདྡྷིཀམྨཝིཔཱཀཔཉྷོ
1. Iddhikammavipākapañho
༡. ‘‘བྷནྟེ ནཱགསེན, བྷཱསིཏམྤེཏཾ བྷགཝཏཱ ‘ཨེཏདགྒཾ, བྷིཀྑཝེ, མམ སཱཝཀཱནཾ བྷིཀྑཱུནཾ ཨིདྡྷིམནྟཱནཾ ཡདིདཾ མཧཱམོགྒལླཱནོ’ཏི། པུན ཙ ཀིར སོ ལགུལེ༹ཧི པརིཔོཐིཏོ བྷིནྣསཱིསོ སཉྩུཎྞིཏཊྛིམཾསདྷམནིཚིནྣཔརིགཏྟོ པརིནིབྦུཏོ 1། ཡདི, བྷནྟེ ནཱགསེན, ཐེརོ མཧཱམོགྒལླཱནོ ཨིདྡྷིཡཱ ཀོཊིཾ གཏོ, ཏེན ཧི ལགུལེ༹ཧི པོཐིཏོ པརིནིབྦུཏོཏི ཡཾ ཝཙནཾ, ཏཾ མིཙྪཱ། ཡདི ལགུལེ༹ཧི པརིཔོཐིཏོ པརིནིབྦུཏོ, ཏེན ཧི ཨིདྡྷིཡཱ ཀོཊིཾ གཏོཏི ཏམྤི ཝཙནཾ མིཙྪཱ། ཀིཾ ན སམཏྠོ ཨིདྡྷིཡཱ ཨཏྟནོ ཨུཔགྷཱཏཾ ཨཔནཡིཏུཾ, སདེཝཀསྶཔི ལོཀསྶ པཊིསརཎཾ བྷཝིཏུཾ ཨརཧོཏི? ཨཡམྤི ཨུབྷཏོ ཀོཊིཀོ པཉྷོ ཏཝཱནུཔྤཏྟོ, སོ ཏཡཱ ནིབྦཱཧིཏབྦོ’’ཏི།
1. ‘‘Bhante nāgasena, bhāsitampetaṃ bhagavatā ‘etadaggaṃ, bhikkhave, mama sāvakānaṃ bhikkhūnaṃ iddhimantānaṃ yadidaṃ mahāmoggallāno’ti. Puna ca kira so laguḷehi paripothito bhinnasīso sañcuṇṇitaṭṭhimaṃsadhamanichinnaparigatto parinibbuto 2. Yadi, bhante nāgasena, thero mahāmoggallāno iddhiyā koṭiṃ gato, tena hi laguḷehi pothito parinibbutoti yaṃ vacanaṃ, taṃ micchā. Yadi laguḷehi paripothito parinibbuto, tena hi iddhiyā koṭiṃ gatoti tampi vacanaṃ micchā. Kiṃ na samattho iddhiyā attano upaghātaṃ apanayituṃ, sadevakassapi lokassa paṭisaraṇaṃ bhavituṃ arahoti? Ayampi ubhato koṭiko pañho tavānuppatto, so tayā nibbāhitabbo’’ti.
‘‘བྷཱསིཏམྤེཏཾ, མཧཱརཱཛ, བྷགཝཏཱ ‘ཨེཏདགྒཾ, བྷིཀྑཝེ, མམ སཱཝཀཱནཾ བྷིཀྑཱུནཾ ཨིདྡྷིམནྟཱནཾ ཡདིདཾ མཧཱམོགྒལླཱནོ’ཏི། ཨཱཡསྨཱ ཙ མཧཱམོགྒལླཱནོ ལགུལ༹ཧཏོ པརིནིབྦུཏོ, ཏཉྩ པན ཀམྨཱདྷིགྒཧིཏེནཱ’’ཏི།
‘‘Bhāsitampetaṃ, mahārāja, bhagavatā ‘etadaggaṃ, bhikkhave, mama sāvakānaṃ bhikkhūnaṃ iddhimantānaṃ yadidaṃ mahāmoggallāno’ti. Āyasmā ca mahāmoggallāno laguḷahato parinibbuto, tañca pana kammādhiggahitenā’’ti.
‘‘ནནུ, བྷནྟེ ནཱགསེན, ཨིདྡྷིམཏོ ཨིདྡྷིཝིསཡོཔི ཀམྨཝིཔཱཀོཔི དྭེ ཨཙིནྟིཡཱ, ཨཙིནྟིཡེན ཨཙིནྟིཡཾ ཨཔནཡིཏབྦཾ། ཡཐཱ ནཱམ, བྷནྟེ, ཀེཙི ཕལཀཱམཱ ཀཔིཏྠེན ཀཔིཏྠཾ པོཐེནྟི, ཨམྦེན ཨམྦཾ པོཐེནྟི, ཨེཝམེཝ ཁོ, བྷནྟེ ནཱགསེན, ཨཙིནྟིཡེན ཨཙིནྟིཡཾ པོཐཡིཏྭཱ ཨཔནེཏབྦ’’ནྟི? ‘‘ཨཙིནྟིཡཱནམྤི, མཧཱརཱཛ, ཨེཀཾ ཨདྷིམཏྟཾ བལཝཏརཾ, ཡཐཱ, མཧཱརཱཛ, མཧིཡཱ རཱཛཱནོ ཧོནྟི སམཛཙྩཱ, སམཛཙྩཱནམྤི ཏེསཾ ཨེཀོ སབྦེ ཨབྷིབྷཝིཏྭཱ ཨཱཎཾ པཝཏྟེཏི། ཨེཝམེཝ ཁོ, མཧཱརཱཛ, ཏེསཾ ཨཙིནྟིཡཱནཾ ཀམྨཝིཔཱཀཾ ཡེཝ ཨདྷིམཏྟཾ བལཝཏརཾ, ཀམྨཝིཔཱཀཾ ཡེཝ སབྦེ ཨབྷིབྷཝིཡ ཨཱཎཾ པཝཏྟེཏི, ཀམྨཱདྷིགྒཧིཏསྶ ཨཝསེསཱ ཀིརིཡཱ ཨོཀཱསཾ ན ལབྷནྟི།
‘‘Nanu, bhante nāgasena, iddhimato iddhivisayopi kammavipākopi dve acintiyā, acintiyena acintiyaṃ apanayitabbaṃ. Yathā nāma, bhante, keci phalakāmā kapitthena kapitthaṃ pothenti, ambena ambaṃ pothenti, evameva kho, bhante nāgasena, acintiyena acintiyaṃ pothayitvā apanetabba’’nti? ‘‘Acintiyānampi, mahārāja, ekaṃ adhimattaṃ balavataraṃ, yathā, mahārāja, mahiyā rājāno honti samajaccā, samajaccānampi tesaṃ eko sabbe abhibhavitvā āṇaṃ pavatteti. Evameva kho, mahārāja, tesaṃ acintiyānaṃ kammavipākaṃ yeva adhimattaṃ balavataraṃ, kammavipākaṃ yeva sabbe abhibhaviya āṇaṃ pavatteti, kammādhiggahitassa avasesā kiriyā okāsaṃ na labhanti.
‘‘ཨིདྷ པན, མཧཱརཱཛ, ཀོཙི པུརིསོ ཀིསྨིཉྩིདེཝ པཀརཎེ ཨཔརཛ྄ཛྷཏི, ན ཏསྶ མཱཏཱ ཝཱ པིཏཱ ཝཱ བྷགིནཱི ཝཱ བྷཱཏརོ ཝཱ སཁཱི ཝཱ སཧཱཡཀཱ ཝཱ 3 ཏཱཡནྟི, ཨཐ ཁོ རཱཛཱ ཡེཝ ཏཏྠ ཨབྷིབྷཝིཡ ཨཱཎཾ པཝཏྟེཏི། ཀིཾ ཏཏྠ ཀཱརཎཾ? ཨཔརཱདྷིཀཏཱ། ཨེཝམེཝ ཁོ, མཧཱརཱཛ, ཏེསཾ ཨཙིནྟིཡཱནཾ ཀམྨཝིཔཱཀཾ ཡེཝ ཨདྷིམཏྟཾ བལཝཏརཾ, ཀམྨཝིཔཱཀཾ ཡེཝ སབྦེ ཨབྷིབྷཝིཡ ཨཱཎཾ པཝཏྟེཏི, ཀམྨཱདྷིགྒཧིཏསྶ ཨཝསེསཱ ཀིརིཡཱ ཨོཀཱསཾ ན ལབྷནྟི།
‘‘Idha pana, mahārāja, koci puriso kismiñcideva pakaraṇe aparajjhati, na tassa mātā vā pitā vā bhaginī vā bhātaro vā sakhī vā sahāyakā vā 4 tāyanti, atha kho rājā yeva tattha abhibhaviya āṇaṃ pavatteti. Kiṃ tattha kāraṇaṃ? Aparādhikatā. Evameva kho, mahārāja, tesaṃ acintiyānaṃ kammavipākaṃ yeva adhimattaṃ balavataraṃ, kammavipākaṃ yeva sabbe abhibhaviya āṇaṃ pavatteti, kammādhiggahitassa avasesā kiriyā okāsaṃ na labhanti.
‘‘ཡཐཱ ཝཱ པན, མཧཱརཱཛ, མཧིཡཱ དཝཌཱཧེ སམུཊྛིཏེ གྷཊསཧསྶམྤི ཨུདཀཾ ན སཀྐོཏི ནིབྦཱཔེཏུཾ, ཨཐ ཁོ ཨགྒི ཡེཝ ཏཏྠ ཨབྷིབྷཝིཡ ཨཱཎཾ པཝཏྟེཏི། ཀིཾ ཏཏྠ ཀཱརཎཾ? བལཝཏཱ ཏེཛསྶ། ཨེཝམེཝ ཁོ, མཧཱརཱཛ, ཏེསཾ ཨཙིནྟིཡཱནཾ ཀམྨཝིཔཱཀཾ ཡེཝ ཨདྷིམཏྟཾ བལཝཏརཾ, ཀམྨཝིཔཱཀཾ ཡེཝ སབྦེ ཨབྷིབྷཝིཡ ཨཱཎཾ པཝཏྟེཏི, ཀམྨཱདྷིགྒཧིཏསྶ ཨཝསེསཱ ཀིརིཡཱ ཨོཀཱསཾ ན ལབྷནྟི, ཏསྨཱ, མཧཱརཱཛ, ཨཱཡསྨཏོ མཧཱམོགྒལླཱནསྶ ཀམྨཱདྷིགྒཧིཏསྶ ལགུལེ༹ཧི པོཐིཡམཱནསྶ ཨིདྡྷིཡཱ སམནྣཱཧཱརོ ནཱཧོསཱི’’ཏི། ‘‘སཱདྷུ, བྷནྟེ ནཱགསེན, ཨེཝམེཏཾ ཏཐཱ སམྤཊིཙྪཱམཱི’’ཏི།
‘‘Yathā vā pana, mahārāja, mahiyā davaḍāhe samuṭṭhite ghaṭasahassampi udakaṃ na sakkoti nibbāpetuṃ, atha kho aggi yeva tattha abhibhaviya āṇaṃ pavatteti. Kiṃ tattha kāraṇaṃ? Balavatā tejassa. Evameva kho, mahārāja, tesaṃ acintiyānaṃ kammavipākaṃ yeva adhimattaṃ balavataraṃ, kammavipākaṃ yeva sabbe abhibhaviya āṇaṃ pavatteti, kammādhiggahitassa avasesā kiriyā okāsaṃ na labhanti, tasmā, mahārāja, āyasmato mahāmoggallānassa kammādhiggahitassa laguḷehi pothiyamānassa iddhiyā samannāhāro nāhosī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
ཨིདྡྷིཀམྨཝིཔཱཀཔཉྷོ པཋམོ།
Iddhikammavipākapañho paṭhamo.
Footnotes:
