| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
21. එකවීසතිමවග්‌ගො
21. Ekavīsatimavaggo
(203) 4. ඉද්‌ධිකථා
(203) 4. Iddhikathā
883. අත්‌ථි අධිප්‌පායඉද්‌ධි බුද්‌ධානං වා සාවකානං වාති? ආමන්‌තා. ‘‘නිච්‌චපණ්‌ණා රුක්‌ඛා හොන්‌තූ’’ති – අත්‌ථි අධිප්‌පායඉද්‌ධි බුද්‌ධානං වා සාවකානං වාති? න හෙවං වත්‌තබ්‌බෙ…පෙ.… නිච්‌චපුප්‌ඵා රුක්‌ඛා හොන්‌තු…පෙ.… නිච්‌චඵලිකා රුක්‌ඛා හොන්‌තු… නිච්‌චං ජුණ්‌හං හොතු… නිච්‌චං ඛෙමං හොතු… නිච්‌චං සුභික්‌ඛං හොතු… ‘‘නිච්‌චං සුවත්‌ථි 1 හොතූ’’ති – අත්‌ථි අධිප්‌පායඉද්‌ධි බුද්‌ධානං වා සාවකානං වාති? න හෙවං වත්‌තබ්‌බෙ…පෙ.….
883. Atthi adhippāyaiddhi buddhānaṃ vā sāvakānaṃ vāti? Āmantā. ‘‘Niccapaṇṇā rukkhā hontū’’ti – atthi adhippāyaiddhi buddhānaṃ vā sāvakānaṃ vāti? Na hevaṃ vattabbe…pe… niccapupphā rukkhā hontu…pe… niccaphalikā rukkhā hontu… niccaṃ juṇhaṃ hotu… niccaṃ khemaṃ hotu… niccaṃ subhikkhaṃ hotu… ‘‘niccaṃ suvatthi 2 hotū’’ti – atthi adhippāyaiddhi buddhānaṃ vā sāvakānaṃ vāti? Na hevaṃ vattabbe…pe….
අත්‌ථි අධිප්‌පායඉද්‌ධි බුද්‌ධානං වා සාවකානං වාති? ආමන්‌තා . ‘‘උප්‌පන්‌නො ඵස්‌සො මා නිරුජ්‌ඣී’’ති – අත්‌ථි අධිප්‌පායඉද්‌ධි බුද්‌ධානං වා සාවකානං වාති? න හෙවං වත්‌තබ්‌බෙ…පෙ.….
Atthi adhippāyaiddhi buddhānaṃ vā sāvakānaṃ vāti? Āmantā . ‘‘Uppanno phasso mā nirujjhī’’ti – atthi adhippāyaiddhi buddhānaṃ vā sāvakānaṃ vāti? Na hevaṃ vattabbe…pe….
උප්‌පන්‌නා වෙදනා…පෙ.… සඤ්‌ඤා… චෙතනා… චිත්‌තං… සද්‌ධා… වීරියං… සති… සමාධි…පෙ.… පඤ්‌ඤා මා නිරුජ්‌ඣීති – අත්‌ථි අධිප්‌පායඉද්‌ධි බුද්‌ධානං වා සාවකානං වාති? න හෙවං වත්‌තබ්‌බෙ…පෙ.….
Uppannā vedanā…pe… saññā… cetanā… cittaṃ… saddhā… vīriyaṃ… sati… samādhi…pe… paññā mā nirujjhīti – atthi adhippāyaiddhi buddhānaṃ vā sāvakānaṃ vāti? Na hevaṃ vattabbe…pe….
අත්‌ථි අධිප්‌පායඉද්‌ධි බුද්‌ධානං වා සාවකානං වාති? ආමන්‌තා. ‘‘රූපං නිච්‌චං හොතූ’’ති – අත්‌ථි අධිප්‌පායඉද්‌ධි… වෙදනා…පෙ.… සඤ්‌ඤා…පෙ.… සඞ්‌ඛාරා…පෙ.… ‘‘විඤ්‌ඤාණං නිච්‌චං හොතූ’’ති – අත්‌ථි අධිප්‌පායඉද්‌ධි බුද්‌ධානං වා සාවකානං වාති? න හෙවං වත්‌තබ්‌බෙ…පෙ.….
Atthi adhippāyaiddhi buddhānaṃ vā sāvakānaṃ vāti? Āmantā. ‘‘Rūpaṃ niccaṃ hotū’’ti – atthi adhippāyaiddhi… vedanā…pe… saññā…pe… saṅkhārā…pe… ‘‘viññāṇaṃ niccaṃ hotū’’ti – atthi adhippāyaiddhi buddhānaṃ vā sāvakānaṃ vāti? Na hevaṃ vattabbe…pe….
අත්‌ථි අධිප්‌පායඉද්‌ධි බුද්‌ධානං වා සාවකානං වාති? ආමන්‌තා. ‘‘ජාතිධම්‌මා සත්‌තා මා ජායිංසූ’’ති අත්‌ථි…පෙ.… ‘‘ජරාධම්‌මා සත්‌තා මා ජීරිංසූ’’ති…පෙ.… ‘‘බ්‍යාධිධම්‌මා සත්‌තා මා බ්‍යාධියිංසූ’’ති…පෙ.… ‘‘මරණධම්‌මා සත්‌තා මා මීයිංසූ’’ති – අත්‌ථි අධිප්‌පායඉද්‌ධි බුද්‌ධානං වා සාවකානං වාති? න හෙවං වත්‌තබ්‌බෙ…පෙ.….
Atthi adhippāyaiddhi buddhānaṃ vā sāvakānaṃ vāti? Āmantā. ‘‘Jātidhammā sattā mā jāyiṃsū’’ti atthi…pe… ‘‘jarādhammā sattā mā jīriṃsū’’ti…pe… ‘‘byādhidhammā sattā mā byādhiyiṃsū’’ti…pe… ‘‘maraṇadhammā sattā mā mīyiṃsū’’ti – atthi adhippāyaiddhi buddhānaṃ vā sāvakānaṃ vāti? Na hevaṃ vattabbe…pe….
884. න වත්‌තබ්‌බං – ‘‘අත්‌ථි අධිප්‌පායඉද්‌ධි බුද්‌ධානං වා සාවකානං වා’’ති? ආමන්‌තා . නනු ආයස්‌මා පිලින්‌දවච්‌ඡො රඤ්‌ඤො මාගධස්‌ස සෙනියස්‌ස බිම්‌බිසාරස්‌ස පාසාදං ‘‘සුවණ්‌ණ’’න්‌ත්‌වෙව අධිමුච්‌චි, සුවණ්‌ණො ච පන ආසීති 3? ආමන්‌තා. හඤ්‌චි ආයස්‌මා පිලින්‌දවච්‌ඡො රඤ්‌ඤො මාගධස්‌ස සෙනියස්‌ස බිම්‌බිසාරස්‌ස පාසාදං සුවණ්‌ණන්‌ත්‌වෙව අධිමුච්‌චි, සුවණ්‌ණො ච පන ආසි, තෙන වත රෙ වත්‌තබ්‌බෙ – ‘‘අත්‌ථි අධිප්‌පායඉද්‌ධි බුද්‌ධානං වා සාවකානං වා’’ති.
884. Na vattabbaṃ – ‘‘atthi adhippāyaiddhi buddhānaṃ vā sāvakānaṃ vā’’ti? Āmantā . Nanu āyasmā pilindavaccho rañño māgadhassa seniyassa bimbisārassa pāsādaṃ ‘‘suvaṇṇa’’ntveva adhimucci, suvaṇṇo ca pana āsīti 4? Āmantā. Hañci āyasmā pilindavaccho rañño māgadhassa seniyassa bimbisārassa pāsādaṃ suvaṇṇantveva adhimucci, suvaṇṇo ca pana āsi, tena vata re vattabbe – ‘‘atthi adhippāyaiddhi buddhānaṃ vā sāvakānaṃ vā’’ti.
ඉද්‌ධිකථා නිට්‌ඨිතා.
Iddhikathā niṭṭhitā.
Footnotes:
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 4. ඉද්‌ධිකථාවණ්‌ණනා • 4. Iddhikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 4. ඉද්‌ධිකථාවණ්‌ණනා • 4. Iddhikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 4. ඉද්‌ධිකථාවණ්‌ණනා • 4. Iddhikathāvaṇṇanā
