| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༢. ཨིདྡྷིཀཐཱ
2. Iddhikathā
༩. ཀཱ ཨིདྡྷི? ཀཏི ཨིདྡྷིཡོ? ཨིདྡྷིཡཱ ཀཏི བྷཱུམིཡོ, ཀཏི པཱདཱ, ཀཏི པདཱནི, ཀཏི མཱུལཱནི? ཀཱ ཨིདྡྷཱིཏི? ཨིཛ྄ཛྷནཊྛེན ཨིདྡྷི། ཀཏི ཨིདྡྷིཡོཏི? དས ཨིདྡྷིཡོ། ཨིདྡྷིཡཱ ཀཏི བྷཱུམིཡོཏི? ཨིདྡྷིཡཱ ཙཏསྶོ བྷཱུམིཡོ, ཙཏྟཱརོ པཱདཱ, ཨཊྛ པདཱནི, སོལ༹ས མཱུལཱནི།
9. Kā iddhi? Kati iddhiyo? Iddhiyā kati bhūmiyo, kati pādā, kati padāni, kati mūlāni? Kā iddhīti? Ijjhanaṭṭhena iddhi. Kati iddhiyoti? Dasa iddhiyo. Iddhiyā kati bhūmiyoti? Iddhiyā catasso bhūmiyo, cattāro pādā, aṭṭha padāni, soḷasa mūlāni.
༡༠. ཀཏམཱ དས ཨིདྡྷིཡོ? ཨདྷིཊྛཱནཱ ཨིདྡྷི, ཝིཀུབྦནཱ ཨིདྡྷི, མནོམཡཱ ཨིདྡྷི, ཉཱཎཝིཔྥཱརཱ ཨིདྡྷི, སམཱདྷིཝིཔྥཱརཱ ཨིདྡྷི, ཨརིཡཱ ཨིདྡྷི, ཀམྨཝིཔཱཀཛཱ ཨིདྡྷི, པུཉྙཝཏོ ཨིདྡྷི, ཝིཛྫཱམཡཱ ཨིདྡྷི, ཏཏྠ ཏཏྠ སམྨཱ པཡོགཔཙྩཡཱ 1 ཨིཛ྄ཛྷནཊྛེན ཨིདྡྷི།
10. Katamā dasa iddhiyo? Adhiṭṭhānā iddhi, vikubbanā iddhi, manomayā iddhi, ñāṇavipphārā iddhi, samādhivipphārā iddhi, ariyā iddhi, kammavipākajā iddhi, puññavato iddhi, vijjāmayā iddhi, tattha tattha sammā payogapaccayā 2 ijjhanaṭṭhena iddhi.
ཨིདྡྷིཡཱ ཀཏམཱ ཙཏསྶོ བྷཱུམིཡོ? ཝིཝེཀཛཱབྷཱུམི པཋམཾ ཛྷཱནཾ, པཱིཏིསུཁབྷཱུམི དུཏིཡཾ ཛྷཱནཾ, ཨུཔེཀྑཱསུཁབྷཱུམི ཏཏིཡཾ ཛྷཱནཾ, ཨདུཀྑམསུཁཱབྷཱུམི ཙཏུཏྠཾ ཛྷཱནཾ། ཨིདྡྷིཡཱ ཨིམཱ ཙཏསྶོ བྷཱུམིཡོ ཨིདྡྷིལཱབྷཱཡ ཨིདྡྷིཔཊིལཱབྷཱཡ ཨིདྡྷིཝིཀུབྦནཏཱཡ ཨིདྡྷིཝིསཝིཏཱཡ ཨིདྡྷིཝསཱིབྷཱཝཱཡ ཨིདྡྷིཝེསཱརཛྫཱཡ སཾཝཏྟནྟཱིཏི།
Iddhiyā katamā catasso bhūmiyo? Vivekajābhūmi paṭhamaṃ jhānaṃ, pītisukhabhūmi dutiyaṃ jhānaṃ, upekkhāsukhabhūmi tatiyaṃ jhānaṃ, adukkhamasukhābhūmi catutthaṃ jhānaṃ. Iddhiyā imā catasso bhūmiyo iddhilābhāya iddhipaṭilābhāya iddhivikubbanatāya iddhivisavitāya iddhivasībhāvāya iddhivesārajjāya saṃvattantīti.
ཨིདྡྷིཡཱ ཀཏམེ ཙཏྟཱརོ པཱདཱ? ཨིདྷ བྷིཀྑུ ཚནྡསམཱདྷིཔདྷཱནསངྑཱརསམནྣཱགཏཾ ཨིདྡྷིཔཱདཾ བྷཱཝེཏི, ཙིཏྟསམཱདྷིཔདྷཱནསངྑཱརསམནྣཱགཏཾ ཨིདྡྷིཔཱདཾ བྷཱཝེཏི, ཝཱིརིཡསམཱདྷིཔདྷཱནསངྑཱརསམནྣཱགཏཾ ཨིདྡྷིཔཱདཾ བྷཱཝེཏི, ཝཱིམཾསཱསམཱདྷིཔདྷཱནསངྑཱརསམནྣཱགཏཾ ཨིདྡྷིཔཱདཾ བྷཱཝེཏི། ཨིདྡྷིཡཱ ཨིམེ ཙཏྟཱརོ པཱདཱ ཨིདྡྷིལཱབྷཱཡ ཨིདྡྷིཔཊིལཱབྷཱཡ ཨིདྡྷིཝིཀུབྦནཏཱཡ ཨིདྡྷིཝིསཝིཏཱཡ ཨིདྡྷིཝསཱིབྷཱཝཱཡ ཨིདྡྷིཝེསཱརཛྫཱཡ སཾཝཏྟནྟཱིཏི།
Iddhiyā katame cattāro pādā? Idha bhikkhu chandasamādhipadhānasaṅkhārasamannāgataṃ iddhipādaṃ bhāveti, cittasamādhipadhānasaṅkhārasamannāgataṃ iddhipādaṃ bhāveti, vīriyasamādhipadhānasaṅkhārasamannāgataṃ iddhipādaṃ bhāveti, vīmaṃsāsamādhipadhānasaṅkhārasamannāgataṃ iddhipādaṃ bhāveti. Iddhiyā ime cattāro pādā iddhilābhāya iddhipaṭilābhāya iddhivikubbanatāya iddhivisavitāya iddhivasībhāvāya iddhivesārajjāya saṃvattantīti.
ཨིདྡྷིཡཱ ཀཏམཱནི ཨཊྛ པདཱནི? ཚནྡཾ ཙེ བྷིཀྑུ ནིསྶཱཡ ལབྷཏི སམཱདྷིཾ, ལབྷཏི ཙིཏྟསྶ ཨེཀགྒཏཾ། ཚནྡོ ན སམཱདྷི, སམཱདྷི ན ཚནྡོ། ཨཉྙོ ཚནྡོ, ཨཉྙོ སམཱདྷི། ཝཱིརིཡཾ ཙེ བྷིཀྑུ ནིསྶཱཡ ལབྷཏི སམཱདྷིཾ, ལབྷཏི ཙིཏྟསྶ ཨེཀགྒཏཾ། ཝཱིརིཡཾ ན སམཱདྷི, སམཱདྷི ན ཝཱིརིཡཾ། ཨཉྙཾ ཝཱིརིཡཾ, ཨཉྙོ སམཱདྷི། ཙིཏྟཾ ཙེ བྷིཀྑུ ནིསྶཱཡ ལབྷཏི སམཱདྷིཾ, ལབྷཏི ཙིཏྟསྶ ཨེཀགྒཏཾ། ཙིཏྟཾ ན སམཱདྷི, སམཱདྷི ན ཙིཏྟཾ། ཨཉྙཾ ཙིཏྟཾ, ཨཉྙོ སམཱདྷི། ཝཱིམཾསཾ ཙེ བྷིཀྑུ ནིསྶཱཡ ལབྷཏི སམཱདྷིཾ, ལབྷཏི ཙིཏྟསྶ ཨེཀགྒཏཾ། ཝཱིམཾསཱ ན སམཱདྷི, སམཱདྷི ན ཝཱིམཾསཱ། ཨཉྙཱ ཝཱིམཾསཱ, ཨཉྙོ སམཱདྷི། ཨིདྡྷིཡཱ ཨིམཱནི ཨཊྛ པདཱནི ཨིདྡྷིལཱབྷཱཡ ཨིདྡྷིཔཊིལཱབྷཱཡ ཨིདྡྷིཝིཀུབྦནཏཱཡ ཨིདྡྷིཝིསཝིཏཱཡ ཨིདྡྷིཝསཱིབྷཱཝཱཡ ཨིདྡྷིཝེསཱརཛྫཱཡ སཾཝཏྟནྟཱིཏི།
Iddhiyā katamāni aṭṭha padāni? Chandaṃ ce bhikkhu nissāya labhati samādhiṃ, labhati cittassa ekaggataṃ. Chando na samādhi, samādhi na chando. Añño chando, añño samādhi. Vīriyaṃ ce bhikkhu nissāya labhati samādhiṃ, labhati cittassa ekaggataṃ. Vīriyaṃ na samādhi, samādhi na vīriyaṃ. Aññaṃ vīriyaṃ, añño samādhi. Cittaṃ ce bhikkhu nissāya labhati samādhiṃ, labhati cittassa ekaggataṃ. Cittaṃ na samādhi, samādhi na cittaṃ. Aññaṃ cittaṃ, añño samādhi. Vīmaṃsaṃ ce bhikkhu nissāya labhati samādhiṃ, labhati cittassa ekaggataṃ. Vīmaṃsā na samādhi, samādhi na vīmaṃsā. Aññā vīmaṃsā, añño samādhi. Iddhiyā imāni aṭṭha padāni iddhilābhāya iddhipaṭilābhāya iddhivikubbanatāya iddhivisavitāya iddhivasībhāvāya iddhivesārajjāya saṃvattantīti.
ཨིདྡྷིཡཱ ཀཏམཱནི སོལ༹ས མཱུལཱནི? ཨནོནཏཾ 3 ཙིཏྟཾ ཀོསཛྫེ ན ཨིཉྫཏཱིཏི – ཨཱནེཉྫཾ། ཨནུནྣཏཾ 4 ཙིཏྟཾ ཨུདྡྷཙྩེ ན ཨིཉྫཏཱིཏི – ཨཱནེཉྫཾ། ཨནབྷིནཏཾ ཙིཏྟཾ རཱགེ ན ཨིཉྫཏཱིཏི – ཨཱནེཉྫཾ། ཨནཔནཏཾ ཙིཏྟཾ བྱཱཔཱདེ ན ཨིཉྫཏཱིཏི – ཨཱནེཉྫཾ། ཨནིསྶིཏཾ ཙིཏྟཾ དིཊྛིཡཱ ན ཨིཉྫཏཱིཏི – ཨཱནེཉྫཾ། ཨཔྤཊིབདྡྷཾ ཙིཏྟཾ ཚནྡརཱགེ ན ཨིཉྫཏཱིཏི – ཨཱནེཉྫཾ། ཝིཔྤམུཏྟཾ ཙིཏྟཾ ཀཱམརཱགེ ན ཨིཉྫཏཱིཏི – ཨཱནེཉྫཾ ། ཝིསཉྙུཏྟཾ ཙིཏྟཾ ཀིལེསེ ན ཨིཉྫཏཱིཏི – ཨཱནེཉྫཾ། ཝིམརིཡཱདིཀཏཾ ཙིཏྟཾ ཀིལེསམརིཡཱདེ ན ཨིཉྫཏཱིཏི – ཨཱནེཉྫཾ། ཨེཀཏྟགཏཾ 5 ཙིཏྟཾ ནཱནཏྟཀིལེསེཧི 6 ན ཨིཉྫཏཱིཏི – ཨཱནེཉྫཾ། སདྡྷཱཡ པརིགྒཧིཏཾ ཙིཏྟཾ ཨསྶདྡྷིཡེ ན ཨིཉྫཏཱིཏི – ཨཱནེཉྫཾ། ཝཱིརིཡེན པརིགྒཧིཏཾ ཙིཏྟཾ ཀོསཛྫེ ན ཨིཉྫཏཱིཏི – ཨཱནེཉྫཾ། སཏིཡཱ པརིགྒཧིཏཾ ཙིཏྟཾ པམཱདེ ན ཨིཉྫཏཱིཏི – ཨཱནེཉྫཾ། སམཱདྷིནཱ པརིགྒཧིཏཾ ཙིཏྟཾ ཨུདྡྷཙྩེ ན ཨིཉྫཏཱིཏི – ཨཱནེཉྫཾ། པཉྙཱཡ པརིགྒཧིཏཾ ཙིཏྟཾ ཨཝིཛྫཱཡ ན ཨིཉྫཏཱིཏི – ཨཱནེཉྫཾ། ཨོབྷཱསགཏཾ ཙིཏྟཾ ཨཝིཛྫནྡྷཀཱརེ ན ཨིཉྫཏཱིཏི – ཨཱནེཉྫཾ། ཨིདྡྷིཡཱ ཨིམཱནི སོལ༹ས མཱུལཱནི ཨིདྡྷིལཱབྷཱཡ ཨིདྡྷིཔཊིལཱབྷཱཡ ཨིདྡྷིཝིཀུབྦནཏཱཡ ཨིདྡྷིཝིསཝིཏཱཡ ཨིདྡྷིཝསཱིབྷཱཝཱཡ ཨིདྡྷིཝེསཱརཛྫཱཡ སཾཝཏྟནྟཱིཏི།
Iddhiyā katamāni soḷasa mūlāni? Anonataṃ 7 cittaṃ kosajje na iñjatīti – āneñjaṃ. Anunnataṃ 8 cittaṃ uddhacce na iñjatīti – āneñjaṃ. Anabhinataṃ cittaṃ rāge na iñjatīti – āneñjaṃ. Anapanataṃ cittaṃ byāpāde na iñjatīti – āneñjaṃ. Anissitaṃ cittaṃ diṭṭhiyā na iñjatīti – āneñjaṃ. Appaṭibaddhaṃ cittaṃ chandarāge na iñjatīti – āneñjaṃ. Vippamuttaṃ cittaṃ kāmarāge na iñjatīti – āneñjaṃ . Visaññuttaṃ cittaṃ kilese na iñjatīti – āneñjaṃ. Vimariyādikataṃ cittaṃ kilesamariyāde na iñjatīti – āneñjaṃ. Ekattagataṃ 9 cittaṃ nānattakilesehi 10 na iñjatīti – āneñjaṃ. Saddhāya pariggahitaṃ cittaṃ assaddhiye na iñjatīti – āneñjaṃ. Vīriyena pariggahitaṃ cittaṃ kosajje na iñjatīti – āneñjaṃ. Satiyā pariggahitaṃ cittaṃ pamāde na iñjatīti – āneñjaṃ. Samādhinā pariggahitaṃ cittaṃ uddhacce na iñjatīti – āneñjaṃ. Paññāya pariggahitaṃ cittaṃ avijjāya na iñjatīti – āneñjaṃ. Obhāsagataṃ cittaṃ avijjandhakāre na iñjatīti – āneñjaṃ. Iddhiyā imāni soḷasa mūlāni iddhilābhāya iddhipaṭilābhāya iddhivikubbanatāya iddhivisavitāya iddhivasībhāvāya iddhivesārajjāya saṃvattantīti.
དསཨིདྡྷིནིདྡེསོ
Dasaiddhiniddeso
༡༠. ཀཏམཱ ཨདྷིཊྛཱནཱ ཨིདྡྷི? ཨིདྷ བྷིཀྑུ ཨནེཀཝིཧིཏཾ ཨིདྡྷིཝིདྷཾ པཙྩནུབྷོཏི – ཨེཀོཔི ཧུཏྭཱ བཧུདྷཱ ཧོཏི, བཧུདྷཱཔི ཧུཏྭཱ ཨེཀོ ཧོཏི; ཨཱཝིབྷཱཝཾ ཏིརོབྷཱཝཾ; ཏིརོཀུཊྚཾ ཏིརོཔཱཀཱརཾ ཏིརོཔབྦཏཾ ཨསཛྫམཱནོ གཙྪཏི, སེཡྻཐཱཔི ཨཱཀཱསེ། པཐཝིཡཱཔི ཨུམྨུཛྫནིམུཛྫཾ ཀརོཏི, སེཡྻཐཱཔི ཨུདཀེ། ཨུདཀེཔི ཨབྷིཛྫམཱནེ 11 གཙྪཏི, སེཡྻཐཱཔི པཐཝིཡཾ། ཨཱཀཱསེཔི པལླངྐེན ཀམཏི, སེཡྻཐཱཔི པཀྑཱི སཀུཎོ། ཨིམེཔི ཙནྡིམསཱུརིཡེ ཨེཝཾམཧིདྡྷིཀེ ཨེཝཾམཧཱནུབྷཱཝེ པཱཎིནཱ པརཱམསཏི པརིམཛྫཏི། ཡཱཝ བྲཧྨལོཀཱཔི ཀཱཡེན ཝསཾ ཝཏྟེཏཱིཏི།
10. Katamā adhiṭṭhānā iddhi? Idha bhikkhu anekavihitaṃ iddhividhaṃ paccanubhoti – ekopi hutvā bahudhā hoti, bahudhāpi hutvā eko hoti; āvibhāvaṃ tirobhāvaṃ; tirokuṭṭaṃ tiropākāraṃ tiropabbataṃ asajjamāno gacchati, seyyathāpi ākāse. Pathaviyāpi ummujjanimujjaṃ karoti, seyyathāpi udake. Udakepi abhijjamāne 12 gacchati, seyyathāpi pathaviyaṃ. Ākāsepi pallaṅkena kamati, seyyathāpi pakkhī sakuṇo. Imepi candimasūriye evaṃmahiddhike evaṃmahānubhāve pāṇinā parāmasati parimajjati. Yāva brahmalokāpi kāyena vasaṃ vattetīti.
ཨིདྷཱཏི ཨིམིསྶཱ དིཊྛིཡཱ ཨིམིསྶཱ ཁནྟིཡཱ ཨིམིསྶཱ རུཙིཡཱ ཨིམསྨིཾ ཨཱདཱཡེ ཨིམསྨིཾ དྷམྨེ ཨིམསྨིཾ ཝིནཡེ ཨིམསྨིཾ དྷམྨཝིནཡེ ཨིམསྨིཾ པཱཝཙནེ ཨིམསྨིཾ བྲཧྨཙརིཡེ ཨིམསྨིཾ སཏྠུསཱསནེ། ཏེན ཝུཙྩཏི – ‘‘ཨིདྷཱ’’ཏི། བྷིཀྑཱུཏི པུཐུཛྫནཀལྱཱཎཀོ ཝཱ ཧོཏི བྷིཀྑུ སེཁོ ཝཱ ཨརཧཱ ཝཱ ཨཀུཔྤདྷམྨོ། ཨནེཀཝིཧིཏཾ ཨིདྡྷིཝིདྷཾ པཙྩནུབྷོཏཱིཏི ནཱནཔྤཀཱརཾ ཨིདྡྷིཝིདྷཾ པཙྩནུབྷོཏི། ཨེཀོཔི ཧུཏྭཱ བཧུདྷཱ ཧོཏཱིཏི པཀཏིཡཱ ཨེཀོ བཧུཀཾ ཨཱཝཛྫཏི, སཏཾ ཝཱ སཧསྶཾ ཝཱ སཏསཧསྶཾ ཝཱ ཨཱཝཛྫཏི། ཨཱཝཛྫིཏྭཱ ཉཱཎེན ཨདྷིཊྛཱཏི – ‘‘བཧུལོ ཧོམཱི’’ཏི 13། བཧུལོ ཧོཏི། ཡཐཱཡསྨཱ ཙཱུལ༹པནྠཀོ 14 ཨེཀོཔི ཧུཏྭཱ བཧུདྷཱ ཧོཏི, ཨེཝམེཝཾ སོ ཨིདྡྷིམཱ ཙེཏོཝསིཔྤཏྟོ ཨེཀོཔི ཧུཏྭཱ བཧུདྷཱ ཧོཏི། བཧུདྷཱཔི ཧུཏྭཱ ཨེཀོ ཧོཏཱིཏི པཀཏིཡཱ བཧུཀོ ཨེཀཾ ཨཱཝཛྫཏི; ཨཱཝཛྫིཏྭཱ ཉཱཎེན ཨདྷིཊྛཱཏི – ‘‘ཨེཀོ ཧོམཱི’’ཏི། ཨེཀོ ཧོཏི། ཡཐཱཡསྨཱ ཙཱུལ༹པནྠཀོ བཧུདྷཱཔི ཧུཏྭཱ ཨེཀོ ཧོཏི, ཨེཝམེཝཾ སོ ཨིདྡྷིམཱ ཙེཏོཝསིཔྤཏྟོ བཧུདྷཱཔི ཧུཏྭཱ ཨེཀོ ཧོཏི།
Idhāti imissā diṭṭhiyā imissā khantiyā imissā ruciyā imasmiṃ ādāye imasmiṃ dhamme imasmiṃ vinaye imasmiṃ dhammavinaye imasmiṃ pāvacane imasmiṃ brahmacariye imasmiṃ satthusāsane. Tena vuccati – ‘‘idhā’’ti. Bhikkhūti puthujjanakalyāṇako vā hoti bhikkhu sekho vā arahā vā akuppadhammo. Anekavihitaṃ iddhividhaṃ paccanubhotīti nānappakāraṃ iddhividhaṃ paccanubhoti. Ekopi hutvā bahudhā hotīti pakatiyā eko bahukaṃ āvajjati, sataṃ vā sahassaṃ vā satasahassaṃ vā āvajjati. Āvajjitvā ñāṇena adhiṭṭhāti – ‘‘bahulo homī’’ti 15. Bahulo hoti. Yathāyasmā cūḷapanthako 16 ekopi hutvā bahudhā hoti, evamevaṃ so iddhimā cetovasippatto ekopi hutvā bahudhā hoti. Bahudhāpi hutvā eko hotīti pakatiyā bahuko ekaṃ āvajjati; āvajjitvā ñāṇena adhiṭṭhāti – ‘‘eko homī’’ti. Eko hoti. Yathāyasmā cūḷapanthako bahudhāpi hutvā eko hoti, evamevaṃ so iddhimā cetovasippatto bahudhāpi hutvā eko hoti.
༡༡. ཨཱཝིབྷཱཝནྟི ཀེནཙི ཨནཱཝཊཾ ཧོཏི ཨཔྤཊིཙྪནྣཾ ཝིཝཊཾ པཱཀཊཾ། ཏིརོབྷཱཝནྟི ཀེནཙི ཨཱཝཊཾ ཧོཏི པཊིཙྪནྣཾ པིཧིཏཾ པཊིཀུཛྫིཏཾ། ཏིརོཀུཊྚཾ ཏིརོཔཱཀཱརཾ ཏིརོཔབྦཏཾ ཨསཛྫམཱནོ གཙྪཏི, སེཡྻཐཱཔི ཨཱཀཱསེཏི པཀཏིཡཱ ཨཱཀཱསཀསིཎསམཱཔཏྟིཡཱ ལཱབྷཱི ཧོཏི། ཏིརོཀུཊྚཾ ཏིརོཔཱཀཱརཾ ཏིརོཔབྦཏཾ ཨཱཝཛྫཏི། ཨཱཝཛྫིཏྭཱ ཉཱཎེན ཨདྷིཊྛཱཏི – ‘‘ཨཱཀཱསོ ཧོཏཱུ’’ཏི། ཨཱཀཱསོ ཧོཏི། ཏིརོཀུཊྚཾ ཏིརོཔཱཀཱརཾ ཏིརོཔབྦཏཾ ཨསཛྫམཱནོ གཙྪཏི། ཡཐཱ མནུསྶཱ པཀཏིཡཱ ཨནིདྡྷིམནྟོ ཀེནཙི ཨནཱཝཊེ ཨཔརིཀྑིཏྟེ ཨསཛྫམཱནཱ གཙྪནྟི, ཨེཝམེཝཾ སོ ཨིདྡྷིམཱ ཙེཏོཝསིཔྤཏྟོ ཏིརོཀུཊྚཾ ཏིརོཔཱཀཱརཾ ཏིརོཔབྦཏཾ ཨསཛྫམཱནོ གཙྪཏི, སེཡྻཐཱཔི ཨཱཀཱསེ།
11.Āvibhāvanti kenaci anāvaṭaṃ hoti appaṭicchannaṃ vivaṭaṃ pākaṭaṃ. Tirobhāvanti kenaci āvaṭaṃ hoti paṭicchannaṃ pihitaṃ paṭikujjitaṃ. Tirokuṭṭaṃtiropākāraṃ tiropabbataṃ asajjamāno gacchati, seyyathāpiākāseti pakatiyā ākāsakasiṇasamāpattiyā lābhī hoti. Tirokuṭṭaṃ tiropākāraṃ tiropabbataṃ āvajjati. Āvajjitvā ñāṇena adhiṭṭhāti – ‘‘ākāso hotū’’ti. Ākāso hoti. Tirokuṭṭaṃ tiropākāraṃ tiropabbataṃ asajjamāno gacchati. Yathā manussā pakatiyā aniddhimanto kenaci anāvaṭe aparikkhitte asajjamānā gacchanti, evamevaṃ so iddhimā cetovasippatto tirokuṭṭaṃ tiropākāraṃ tiropabbataṃ asajjamāno gacchati, seyyathāpi ākāse.
པཐཝིཡཱཔི ཨུམྨུཛྫནིམུཛྫཾ ཀརོཏི, སེཡྻཐཱཔི ཨུདཀེཏི པཀཏིཡཱ ཨཱཔོཀསིཎསམཱཔཏྟིཡཱ ལཱབྷཱི ཧོཏི། པཐཝིཾ ཨཱཝཛྫཏི། ཨཱཝཛྫིཏྭཱ ཉཱཎེན ཨདྷིཊྛཱཏི – ‘‘ཨུདཀཾ ཧོཏཱུ’’ཏི། ཨུདཀཾ ཧོཏི། སོ པཐཝིཡཱ ཨུམྨུཛྫནིམུཛྫཾ ཀརོཏི། ཡཐཱ མནུསྶཱ པཀཏིཡཱ ཨནིདྡྷིམནྟོ ཨུདཀེ ཨུམྨུཛྫནིམུཛྫཾ ཀརོནྟི, ཨེཝམེཝཾ སོ ཨིདྡྷིམཱ ཙེཏོཝསིཔྤཏྟོ པཐཝིཡཱ ཨུམྨུཛྫནིམུཛྫཾ ཀརོཏི, སེཡྻཐཱཔི ཨུདཀེ།
Pathaviyāpi ummujjanimujjaṃ karoti, seyyathāpi udaketi pakatiyā āpokasiṇasamāpattiyā lābhī hoti. Pathaviṃ āvajjati. Āvajjitvā ñāṇena adhiṭṭhāti – ‘‘udakaṃ hotū’’ti. Udakaṃ hoti. So pathaviyā ummujjanimujjaṃ karoti. Yathā manussā pakatiyā aniddhimanto udake ummujjanimujjaṃ karonti, evamevaṃ so iddhimā cetovasippatto pathaviyā ummujjanimujjaṃ karoti, seyyathāpi udake.
ཨུདཀེཔི ཨབྷིཛྫམཱནེ གཙྪཏི, སེཡྻཐཱཔི པཐཝིཡནྟི པཀཏིཡཱ པཐཝཱིཀསིཎསམཱཔཏྟིཡཱ ལཱབྷཱི ཧོཏི། ཨུདཀཾ ཨཱཝཛྫཏི། ཨཱཝཛྫིཏྭཱ ཉཱཎེན ཨདྷིཊྛཱཏི – ‘‘པཐཝཱི ཧོཏཱུ’’ཏི། པཐཝཱི ཧོཏི། སོ ཨབྷིཛྫམཱནེ ཨུདཀེ གཙྪཏི། ཡཐཱ མནུསྶཱ པཀཏིཡཱ ཨནིདྡྷིམནྟོ ཨབྷིཛྫམཱནཱཡ པཐཝིཡཱ གཙྪནྟི, ཨེཝམེཝཾ སོ ཨིདྡྷིམཱ ཙེཏོཝསིཔྤཏྟོ ཨབྷིཛྫམཱནེ ཨུདཀེ གཙྪཏི, སེཡྻཐཱཔི པཐཝིཡཾ།
Udakepiabhijjamāne gacchati, seyyathāpi pathaviyanti pakatiyā pathavīkasiṇasamāpattiyā lābhī hoti. Udakaṃ āvajjati. Āvajjitvā ñāṇena adhiṭṭhāti – ‘‘pathavī hotū’’ti. Pathavī hoti. So abhijjamāne udake gacchati. Yathā manussā pakatiyā aniddhimanto abhijjamānāya pathaviyā gacchanti, evamevaṃ so iddhimā cetovasippatto abhijjamāne udake gacchati, seyyathāpi pathaviyaṃ.
ཨཱཀཱསེཔི པལླངྐེན ཀམཏི, སེཡྻཐཱཔི པཀྑཱི སཀུཎོཏི པཀཏིཡཱ པཐཝཱིཀསིཎསམཱཔཏྟིཡཱ ལཱབྷཱི ཧོཏི། ཨཱཀཱསཾ ཨཱཝཛྫཏི ། ཨཱཝཛྫིཏྭཱ ཉཱཎེན ཨདྷིཊྛཱཏི – ‘‘པཐཝཱི ཧོཏཱུ’’ཏི། པཐཝཱི ཧོཏི། སོ ཨཱཀཱསེ ཨནྟལིཀྑེ ཙངྐམཏིཔི ཏིཊྛཏིཔི ནིསཱིདཏིཔི སེཡྻམྤི ཀཔྤེཏི། ཡཐཱ མནུསྶཱ པཀཏིཡཱ ཨནིདྡྷིམནྟོ པཐཝིཡཱ ཙངྐམནྟིཔི ཏིཊྛནྟིཔི ནིསཱིདནྟིཔི སེཡྻམྤི ཀཔྤེནྟི, ཨེཝམེཝཾ སོ ཨིདྡྷིམཱ ཙེཏོཝསིཔྤཏྟོ ཨཱཀཱསེ ཨནྟལིཀྑེ ཙངྐམཏིཔི ཏིཊྛཏིཔི ནིསཱིདཏིཔི སེཡྻམྤི ཀཔྤེཏི, སེཡྻཐཱཔི པཀྑཱི སཀུཎོ།
Ākāsepi pallaṅkena kamati, seyyathāpi pakkhī sakuṇoti pakatiyā pathavīkasiṇasamāpattiyā lābhī hoti. Ākāsaṃ āvajjati . Āvajjitvā ñāṇena adhiṭṭhāti – ‘‘pathavī hotū’’ti. Pathavī hoti. So ākāse antalikkhe caṅkamatipi tiṭṭhatipi nisīdatipi seyyampi kappeti. Yathā manussā pakatiyā aniddhimanto pathaviyā caṅkamantipi tiṭṭhantipi nisīdantipi seyyampi kappenti, evamevaṃ so iddhimā cetovasippatto ākāse antalikkhe caṅkamatipi tiṭṭhatipi nisīdatipi seyyampi kappeti, seyyathāpi pakkhī sakuṇo.
༡༢. ཨིམེཔི ཙནྡིམསཱུརིཡེ ཨེཝཾམཧིདྡྷིཀེ ཨེཝཾམཧཱནུབྷཱཝེ པཱཎིནཱ པརཱམསཏི པརིམཛྫཏཱིཏི ཨིདྷ སོ ཨིདྡྷིམཱ ཙེཏོཝསིཔྤཏྟོ ནིསིནྣཀོ ཝཱ ནིཔནྣཀོ ཝཱ ཙནྡིམསཱུརིཡེ ཨཱཝཛྫཏི། ཨཱཝཛྫིཏྭཱ ཉཱཎེན ཨདྷིཊྛཱཏི – ‘‘ཧཏྠཔཱསེ ཧོཏཱུ’’ཏི། ཧཏྠཔཱསེ ཧོཏི། སོ ནིསིནྣཀོ ཝཱ ནིཔནྣཀོ ཝཱ ཙནྡིམསཱུརིཡེ པཱཎིནཱ ཨཱམསཏི པརཱམསཏི པརིམཛྫཏི། ཡཐཱ མནུསྶཱ པཀཏིཡཱ ཨནིདྡྷིམནྟོ ཀིཉྩིདེཝ རཱུཔགཏཾ ཧཏྠཔཱསེ ཨཱམསནྟི པརཱམསནྟི པརིམཛྫནྟི, ཨེཝམེཝཾ སོ ཨིདྡྷིམཱ ཙེཏོཝསིཔྤཏྟོ ནིསིནྣཀོ ཝཱ ནིཔནྣཀོ ཝཱ ཙནྡིམསཱུརིཡེ པཱཎིནཱ ཨཱམསཏི པརཱམསཏི པརིམཛྫཏི།
12.Imepi candimasūriye evaṃmahiddhike evaṃmahānubhāve pāṇinā parāmasati parimajjatīti idha so iddhimā cetovasippatto nisinnako vā nipannako vā candimasūriye āvajjati. Āvajjitvā ñāṇena adhiṭṭhāti – ‘‘hatthapāse hotū’’ti. Hatthapāse hoti. So nisinnako vā nipannako vā candimasūriye pāṇinā āmasati parāmasati parimajjati. Yathā manussā pakatiyā aniddhimanto kiñcideva rūpagataṃ hatthapāse āmasanti parāmasanti parimajjanti, evamevaṃ so iddhimā cetovasippatto nisinnako vā nipannako vā candimasūriye pāṇinā āmasati parāmasati parimajjati.
ཡཱཝ བྲཧྨལོཀཱཔི ཀཱཡེན ཝསཾ ཝཏྟེཏཱིཏི སཙེ སོ ཨིདྡྷིམཱ ཙེཏོཝསིཔྤཏྟོ བྲཧྨལོཀཾ གནྟུཀཱམོ ཧོཏི, དཱུརེཔི སནྟིཀེ ཨདྷིཊྛཱཏི – ‘‘སནྟིཀེ ཧོཏཱུ’’ཏི། སནྟིཀེ ཧོཏི། སནྟིཀེཔི དཱུརེ ཨདྷིཊྛཱཏི – ‘‘དཱུརེ ཧོཏཱུ’’ཏི། དཱུརེ ཧོཏི། བཧུཀམྤི ཐོཀཾ ཨདྷིཊྛཱཏི – ‘‘ཐོཀཾ ཧོཏཱུ’’ཏི། ཐོཀཾ ཧོཏི། ཐོཀམྤི བཧུཀཾ ཨདྷིཊྛཱཏི – ‘‘བཧུཀཾ ཧོཏཱུ’’ཏི། བཧུཀཾ ཧོཏི། དིབྦེན ཙཀྑུནཱ ཏསྶ བྲཧྨུནོ རཱུཔཾ པསྶཏི། དིབྦཱཡ སོཏདྷཱཏུཡཱ ཏསྶ བྲཧྨུནོ སདྡཾ སུཎཱཏི། ཙེཏོཔརིཡཉཱཎེན ཏསྶ བྲཧྨུནོ ཙིཏྟཾ པཛཱནཱཏི། སཙེ སོ ཨིདྡྷིམཱ ཙེཏོཝསིཔྤཏྟོ དིསྶམཱནེན ཀཱཡེན བྲཧྨལོཀཾ གནྟུཀཱམོ ཧོཏི, ཀཱཡཝསེན ཙིཏྟཾ པརིཎཱམེཏི, ཀཱཡཝསེན ཙིཏྟཾ ཨདྷིཊྛཱཏི། ཀཱཡཝསེན ཙིཏྟཾ པརིཎཱམེཏྭཱ, ཀཱཡཝསེན ཙིཏྟཾ ཨདྷིཊྛཧིཏྭཱ, སུཁསཉྙཉྩ ལཧུསཉྙཉྩ ཨོཀྐམིཏྭཱ དིསྶམཱནེན ཀཱཡེན བྲཧྨལོཀཾ གཙྪཏི། སཙེ སོ ཨིདྡྷིམཱ ཙེཏོཝསིཔྤཏྟོ ཨདིསྶམཱནེན ཀཱཡེན བྲཧྨལོཀཾ གནྟུཀཱམོ ཧོཏི, ཙིཏྟཝསེན ཀཱཡཾ པརིཎཱམེཏི, ཙིཏྟཝསེན ཀཱཡཾ ཨདྷིཊྛཱཏི། ཙིཏྟཝསེན ཀཱཡཾ པརིཎཱམེཏྭཱ, ཙིཏྟཝསེན ཀཱཡཾ ཨདྷིཊྛཧིཏྭཱ སུཁསཉྙཉྩ ལཧུསཉྙཉྩ ཨོཀྐམིཏྭཱ ཨདིསྶམཱནེན ཀཱཡེན བྲཧྨལོཀཾ གཙྪཏི། སོ ཏསྶ བྲཧྨུནོ པུརཏོ རཱུཔིཾ 17 ཨབྷིནིམྨིནཱཏི མནོམཡཾ སབྦངྒཔཙྩངྒིཾ 18 ཨཧཱིནིནྡྲིཡཾ། སཙེ སོ ཨིདྡྷིམཱ ཙངྐམཏི, ནིམྨིཏོཔི ཏཏྠ ཙངྐམཏི། སཙེ སོ ཨིདྡྷིམཱ ཏིཊྛཏི, ནིམྨིཏོཔི ཏཏྠ ཏིཊྛཏི། སཙེ སོ ཨིདྡྷིམཱ ནིསཱིདཏི, ནིམྨིཏོཔི ཏཏྠ ནིསཱིདཏི། སཙེ སོ ཨིདྡྷིམཱ སེཡྻཾ ཀཔྤེཏི, ནིམྨིཏོཔི ཏཏྠ སེཡྻཾ ཀཔྤེཏི། སཙེ སོ ཨིདྡྷིམཱ དྷཱུམཱཡཏི, ནིམྨིཏོཔི ཏཏྠ དྷཱུམཱཡཏི། སཙེ སོ ཨིདྡྷིམཱ པཛྫལཏི, ནིམྨིཏོཔི ཏཏྠ པཛྫལཏི། སཙེ སོ ཨིདྡྷིམཱ དྷམྨཾ བྷཱསཏི, ནིམྨིཏོཔི ཏཏྠ དྷམྨཾ བྷཱསཏི། སཙེ སོ ཨིདྡྷིམཱ པཉྷཾ པུཙྪཏི, ནིམྨིཏོཔི ཏཏྠ པཉྷཾ པུཙྪཏི། སཙེ སོ ཨིདྡྷིམཱ པཉྷཾ པུཊྛོ ཝིསཛྫེཏི, ནིམྨིཏོཔི ཏཏྠ པཉྷཾ པུཊྛོ ཝིསཛྫེཏི། སཙེ སོ ཨིདྡྷིམཱ ཏེན བྲཧྨུནཱ སདྡྷིཾ སནྟིཊྛཏི སལླཔཏི སཱཀཙྪཾ སམཱཔཛྫཏི, ནིམྨིཏོཔི ཏཏྠ ཏེན བྲཧྨུནཱ སདྡྷིཾ སནྟིཊྛཏི སལླཔཏི སཱཀཙྪཾ སམཱཔཛྫཏི། ཡཉྙདེཝ སོ ཨིདྡྷིམཱ ཀརོཏི, ཏཾ ཏདེཝ ཧི སོ ནིམྨིཏོ ཀརོཏཱིཏི – ཨཡཾ ཨདྷིཊྛཱནཱ ཨིདྡྷི།
Yāva brahmalokāpi kāyena vasaṃ vattetīti sace so iddhimā cetovasippatto brahmalokaṃ gantukāmo hoti, dūrepi santike adhiṭṭhāti – ‘‘santike hotū’’ti. Santike hoti. Santikepi dūre adhiṭṭhāti – ‘‘dūre hotū’’ti. Dūre hoti. Bahukampi thokaṃ adhiṭṭhāti – ‘‘thokaṃ hotū’’ti. Thokaṃ hoti. Thokampi bahukaṃ adhiṭṭhāti – ‘‘bahukaṃ hotū’’ti. Bahukaṃ hoti. Dibbena cakkhunā tassa brahmuno rūpaṃ passati. Dibbāya sotadhātuyā tassa brahmuno saddaṃ suṇāti. Cetopariyañāṇena tassa brahmuno cittaṃ pajānāti. Sace so iddhimā cetovasippatto dissamānena kāyena brahmalokaṃ gantukāmo hoti, kāyavasena cittaṃ pariṇāmeti, kāyavasena cittaṃ adhiṭṭhāti. Kāyavasena cittaṃ pariṇāmetvā, kāyavasena cittaṃ adhiṭṭhahitvā, sukhasaññañca lahusaññañca okkamitvā dissamānena kāyena brahmalokaṃ gacchati. Sace so iddhimā cetovasippatto adissamānena kāyena brahmalokaṃ gantukāmo hoti, cittavasena kāyaṃ pariṇāmeti, cittavasena kāyaṃ adhiṭṭhāti. Cittavasena kāyaṃ pariṇāmetvā, cittavasena kāyaṃ adhiṭṭhahitvā sukhasaññañca lahusaññañca okkamitvā adissamānena kāyena brahmalokaṃ gacchati. So tassa brahmuno purato rūpiṃ 19 abhinimmināti manomayaṃ sabbaṅgapaccaṅgiṃ 20 ahīnindriyaṃ. Sace so iddhimā caṅkamati, nimmitopi tattha caṅkamati. Sace so iddhimā tiṭṭhati, nimmitopi tattha tiṭṭhati. Sace so iddhimā nisīdati, nimmitopi tattha nisīdati. Sace so iddhimā seyyaṃ kappeti, nimmitopi tattha seyyaṃ kappeti. Sace so iddhimā dhūmāyati, nimmitopi tattha dhūmāyati. Sace so iddhimā pajjalati, nimmitopi tattha pajjalati. Sace so iddhimā dhammaṃ bhāsati, nimmitopi tattha dhammaṃ bhāsati. Sace so iddhimā pañhaṃ pucchati, nimmitopi tattha pañhaṃ pucchati. Sace so iddhimā pañhaṃ puṭṭho visajjeti, nimmitopi tattha pañhaṃ puṭṭho visajjeti. Sace so iddhimā tena brahmunā saddhiṃ santiṭṭhati sallapati sākacchaṃ samāpajjati, nimmitopi tattha tena brahmunā saddhiṃ santiṭṭhati sallapati sākacchaṃ samāpajjati. Yaññadeva so iddhimā karoti, taṃ tadeva hi so nimmito karotīti – ayaṃ adhiṭṭhānā iddhi.
༡༣. ཀཏམཱ ཝིཀུབྦནཱ ཨིདྡྷི? སིཁིསྶ བྷགཝཏོ ཨརཧཏོ སམྨཱསམྦུདྡྷསྶ ཨབྷིབྷཱུ ནཱམ སཱཝཀོ བྲཧྨལོཀེ ཋིཏོ སཧསྶིལོཀདྷཱཏུཾ 21 སརེན ཝིཉྙཱཔེསི། སོ དིསྶམཱནེནཔི ཀཱཡེན དྷམྨཾ དེསེསི; ཨདིསྶམཱནེནཔི ཀཱཡེན དྷམྨཾ དེསེསི; དིསྶམཱནེནཔི ཧེཊྛིམེན ཨུཔཌྜྷཀཱཡེན ཨདིསྶམཱནེནཔི ཨུཔརིམེན ཨུཔཌྜྷཀཱཡེན དྷམྨཾ དེསེསི། དིསྶམཱནེནཔི ཨུཔརིམེན ཨུཔཌྜྷཀཱཡེན, ཨདིསྶམཱནེནཔི ཧེཊྛིམེན ཨུཔཌྜྷཀཱཡེན དྷམྨཾ དེསེསི། སོ པཀཏིཝཎྞཾ ཝིཛཧིཏྭཱ ཀུམཱརཀཝཎྞཾ ཝཱ དསྶེཏི, ནཱགཝཎྞཾ ཝཱ དསྶེཏི, སུཔཎྞཝཎྞཾ ཝཱ དསྶེཏི, ཡཀྑཝཎྞཾ ཝཱ དསྶེཏི, ཨིནྡཝཎྞཾ ཝཱ 22 དསྶེཏི, དེཝཝཎྞཾ ཝཱ དསྶེཏི , བྲཧྨཝཎྞཾ ཝཱ དསྶེཏི, སམུདྡཝཎྞཾ ཝཱ དསྶེཏི, པབྦཏཝཎྞཾ ཝཱ དསྶེཏི, ཝནཝཎྞཾ ཝཱ དསྶེཏི, སཱིཧཝཎྞཾ ཝཱ དསྶེཏི, བྱགྒྷཝཎྞཾ ཝཱ དསྶེཏི, དཱིཔིཝཎྞཾ ཝཱ དསྶེཏི, ཧཏྠིམྤི དསྶེཏི, ཨསྶམྤི དསྶེཏི, རཐམྤི དསྶེཏི, པཏྟིམྤི དསྶེཏི, ཝིཝིདྷམྤི སེནཱབྱཱུཧཾ དསྶེཏཱིཏི – ཨཡཾ ཝིཀུབྦནཱ ཨིདྡྷི།
13. Katamā vikubbanā iddhi? Sikhissa bhagavato arahato sammāsambuddhassa abhibhū nāma sāvako brahmaloke ṭhito sahassilokadhātuṃ 23 sarena viññāpesi. So dissamānenapi kāyena dhammaṃ desesi; adissamānenapi kāyena dhammaṃ desesi; dissamānenapi heṭṭhimena upaḍḍhakāyena adissamānenapi uparimena upaḍḍhakāyena dhammaṃ desesi. Dissamānenapi uparimena upaḍḍhakāyena, adissamānenapi heṭṭhimena upaḍḍhakāyena dhammaṃ desesi. So pakativaṇṇaṃ vijahitvā kumārakavaṇṇaṃ vā dasseti, nāgavaṇṇaṃ vā dasseti, supaṇṇavaṇṇaṃ vā dasseti, yakkhavaṇṇaṃ vā dasseti, indavaṇṇaṃ vā 24 dasseti, devavaṇṇaṃ vā dasseti , brahmavaṇṇaṃ vā dasseti, samuddavaṇṇaṃ vā dasseti, pabbatavaṇṇaṃ vā dasseti, vanavaṇṇaṃ vā dasseti, sīhavaṇṇaṃ vā dasseti, byagghavaṇṇaṃ vā dasseti, dīpivaṇṇaṃ vā dasseti, hatthimpi dasseti, assampi dasseti, rathampi dasseti, pattimpi dasseti, vividhampi senābyūhaṃ dassetīti – ayaṃ vikubbanā iddhi.
༡༤. ཀཏམཱ མནོམཡཱ ཨིདྡྷི? ཨིདྷ བྷིཀྑུ ཨིམམྷཱ ཀཱཡཱ ཨཉྙཾ ཀཱཡཾ ཨབྷིནིམྨིནཱཏི རཱུཔིཾ མནོམཡཾ སབྦངྒཔཙྩངྒིཾ ཨཧཱིནིནྡྲིཡཾ། སེཡྻཐཱཔི པུརིསོ མུཉྫམྷཱ ཨཱིསིཀཾ པཝཱཧེཡྻ། ཏསྶ ཨེཝམསྶ – ‘‘ཨཡཾ མུཉྫོ, ཨཡཾ ཨཱིསིཀཱ། ཨཉྙོ མུཉྫོ, ཨཉྙཱ ཨཱིསིཀཱ། མུཉྫམྷཱ ཏྭེཝ ཨཱིསིཀཱ པཝཱལ༹ྷཱ’’ཏི། སེཡྻཐཱ ཝཱ པན པུརིསོ ཨསིཾ ཀོསིཡཱ པཝཱཧེཡྻ། ཏསྶ ཨེཝམསྶ – ‘‘ཨཡཾ ཨསི, ཨཡཾ ཀོསི། ཨཉྙོ ཨསི, ཨཉྙཱ ཀོསི། ཀོསིཡཱ ཏྭེཝ ཨསི པཝཱལ༹ྷོ’’ཏི། སེཡྻཐཱ ཝཱ པན པུརིསོ ཨཧིཾ ཀརཎྜཱ ཨུདྡྷརེཡྻ། ཏསྶ ཨེཝམསྶ – ‘‘ཨཡཾ ཨཧི, ཨཡཾ ཀརཎྜོ། ཨཉྙོ ཨཧི, ཨཉྙོ ཀརཎྜོ། ཀརཎྜཱ ཏྭེཝ ཨཧི ཨུབྦྷཏོ’’ཏི། ཨེཝམེཝཾ བྷིཀྑུ ཨིམམྷཱ ཀཱཡཱ ཨཉྙཾ ཀཱཡཾ ཨབྷིནིམྨིནཱཏི རཱུཔིཾ མནོམཡཾ སབྦངྒཔཙྩངྒིཾ ཨཧཱིནིནྡྲིཡཾ། ཨཡཾ མནོམཡཱ ཨིདྡྷི།
14. Katamā manomayā iddhi? Idha bhikkhu imamhā kāyā aññaṃ kāyaṃ abhinimmināti rūpiṃ manomayaṃ sabbaṅgapaccaṅgiṃ ahīnindriyaṃ. Seyyathāpi puriso muñjamhā īsikaṃ pavāheyya. Tassa evamassa – ‘‘ayaṃ muñjo, ayaṃ īsikā. Añño muñjo, aññā īsikā. Muñjamhā tveva īsikā pavāḷhā’’ti. Seyyathā vā pana puriso asiṃ kosiyā pavāheyya. Tassa evamassa – ‘‘ayaṃ asi, ayaṃ kosi. Añño asi, aññā kosi. Kosiyā tveva asi pavāḷho’’ti. Seyyathā vā pana puriso ahiṃ karaṇḍā uddhareyya. Tassa evamassa – ‘‘ayaṃ ahi, ayaṃ karaṇḍo. Añño ahi, añño karaṇḍo. Karaṇḍā tveva ahi ubbhato’’ti. Evamevaṃ bhikkhu imamhā kāyā aññaṃ kāyaṃ abhinimmināti rūpiṃ manomayaṃ sabbaṅgapaccaṅgiṃ ahīnindriyaṃ. Ayaṃ manomayā iddhi.
༡༥. ཀཏམཱ ཉཱཎཝིཔྥཱརཱ ཨིདྡྷི? ཨནིཙྩཱནུཔསྶནཱ ནིཙྩསཉྙཱཡ པཧཱནཊྛོ ཨིཛ྄ཛྷཏཱིཏི – ཉཱཎཝིཔྥཱརཱ ཨིདྡྷི། དུཀྑཱནུཔསྶནཱ སུཁསཉྙཱཡ… ཨནཏྟཱནུཔསྶནཱ ཨཏྟསཉྙཱཡ… ནིབྦིདཱནུཔསྶནཱཡ ནནྡིཡཱ… ཝིརཱགཱནུཔསྶནཱཡ རཱགསྶ… ནིརོདྷཱནུཔསྶནཱཡ སམུདཡསྶ… པཊིནིསྶགྒཱནུཔསྶནཱཡ ཨཱདཱནསྶ པཧཱནཊྛོ ཨིཛ྄ཛྷཏཱིཏི – ཉཱཎཝིཔྥཱརཱ ཨིདྡྷི། ཨཱཡསྨཏོ བཱཀུལསྶ ཉཱཎཝིཔྥཱརཱ ཨིདྡྷི, ཨཱཡསྨཏོ སཾཀིཙྩསྶ ཉཱཎཝིཔྥཱརཱ ཨིདྡྷི, ཨཱཡསྨཏོ བྷཱུཏཔཱལསྶ ཉཱཎཝིཔྥཱརཱ ཨིདྡྷི། ཨཡཾ ཉཱཎཝིཔྥཱརཱ ཨིདྡྷི།
15. Katamā ñāṇavipphārā iddhi? Aniccānupassanā niccasaññāya pahānaṭṭho ijjhatīti – ñāṇavipphārā iddhi. Dukkhānupassanā sukhasaññāya… anattānupassanā attasaññāya… nibbidānupassanāya nandiyā… virāgānupassanāya rāgassa… nirodhānupassanāya samudayassa… paṭinissaggānupassanāya ādānassa pahānaṭṭho ijjhatīti – ñāṇavipphārā iddhi. Āyasmato bākulassa ñāṇavipphārā iddhi, āyasmato saṃkiccassa ñāṇavipphārā iddhi, āyasmato bhūtapālassa ñāṇavipphārā iddhi. Ayaṃ ñāṇavipphārā iddhi.
༡༦. ཀཏམཱ སམཱདྷིཝིཔྥཱརཱ ཨིདྡྷི? པཋམེན ཛྷཱནེན ནཱིཝརཎཱནཾ པཧཱནཊྛོ ཨིཛ྄ཛྷཏཱིཏི – སམཱདྷིཝིཔྥཱརཱ ཨིདྡྷི། དུཏིཡེན ཛྷཱནེན ཝིཏཀྐཝིཙཱརཱནཾ པཧཱནཊྛོ ཨིཛ྄ཛྷཏཱིཏི – སམཱདྷིཝིཔྥཱརཱ ཨིདྡྷི། ཏཏིཡེན ཛྷཱནེན པཱིཏིཡཱ པཧཱནཊྛོ ཨིཛ྄ཛྷཏཱིཏི…པེ॰… ཙཏུཏྠེན ཛྷཱནེན སུཁདུཀྑཱནཾ པཧཱནཊྛོ ཨིཛ྄ཛྷཏཱིཏི…པེ॰… ཨཱཀཱསཱནཉྩཱཡཏནསམཱཔཏྟིཡཱ རཱུཔསཉྙཱཡ པཊིགྷསཉྙཱཡ ནཱནཏྟསཉྙཱཡ པཧཱནཊྛོ ཨིཛ྄ཛྷཏཱིཏི…པེ॰… ཝིཉྙཱཎཉྩཱཡཏནསམཱཔཏྟིཡཱ ཨཱཀཱསཱནཉྩཱཡཏནསཉྙཱཡ པཧཱནཊྛོ ཨིཛ྄ཛྷཏཱིཏི…པེ॰… ཨཱཀིཉྩཉྙཱཡཏནསམཱཔཏྟིཡཱ ཝིཉྙཱཎཉྩཱཡཏནསཉྙཱཡ པཧཱནཊྛོ ཨིཛ྄ཛྷཏཱིཏི…པེ॰… ནེཝསཉྙཱནཱསཉྙཱཡཏནསམཱཔཏྟིཡཱ ཨཱཀིཉྩཉྙཱཡཏནསཉྙཱཡ པཧཱནཊྛོ ཨིཛ྄ཛྷཏཱིཏི – སམཱདྷིཝིཔྥཱརཱ ཨིདྡྷི། ཨཱཡསྨཏོ སཱརིཔུཏྟསྶ སམཱདྷིཝིཔྥཱརཱ ཨིདྡྷི, ཨཱཡསྨཏོ སཉྫཱིཝསྶ སམཱདྷིཝིཔྥཱརཱ ཨིདྡྷི , ཨཱཡསྨཏོ ཁཱཎུཀོཎྜཉྙསྶ སམཱདྷིཝིཔྥཱརཱ ཨིདྡྷི, ཨུཏྟརཱཡ ཨུཔཱསིཀཱཡ སམཱདྷིཝིཔྥཱརཱ ཨིདྡྷི, སཱམཱཝཏིཡཱ ཨུཔཱསིཀཱཡ སམཱདྷིཝིཔྥཱརཱ ཨིདྡྷི། ཨཡཾ སམཱདྷིཝིཔྥཱརཱ ཨིདྡྷི།
16. Katamā samādhivipphārā iddhi? Paṭhamena jhānena nīvaraṇānaṃ pahānaṭṭho ijjhatīti – samādhivipphārā iddhi. Dutiyena jhānena vitakkavicārānaṃ pahānaṭṭho ijjhatīti – samādhivipphārā iddhi. Tatiyena jhānena pītiyā pahānaṭṭho ijjhatīti…pe… catutthena jhānena sukhadukkhānaṃ pahānaṭṭho ijjhatīti…pe… ākāsānañcāyatanasamāpattiyā rūpasaññāya paṭighasaññāya nānattasaññāya pahānaṭṭho ijjhatīti…pe… viññāṇañcāyatanasamāpattiyā ākāsānañcāyatanasaññāya pahānaṭṭho ijjhatīti…pe… ākiñcaññāyatanasamāpattiyā viññāṇañcāyatanasaññāya pahānaṭṭho ijjhatīti…pe… nevasaññānāsaññāyatanasamāpattiyā ākiñcaññāyatanasaññāya pahānaṭṭho ijjhatīti – samādhivipphārā iddhi. Āyasmato sāriputtassa samādhivipphārā iddhi, āyasmato sañjīvassa samādhivipphārā iddhi , āyasmato khāṇukoṇḍaññassa samādhivipphārā iddhi, uttarāya upāsikāya samādhivipphārā iddhi, sāmāvatiyā upāsikāya samādhivipphārā iddhi. Ayaṃ samādhivipphārā iddhi.
༡༧. ཀཏམཱ ཨརིཡཱ ཨིདྡྷི? ཨིདྷ བྷིཀྑུ 25 སཙེ ཨཱཀངྑཏི – ‘‘པཊིཀཱུལེ ཨཔྤཊིཀཱུལསཉྙཱི ཝིཧརེཡྻ’’ནྟི, ཨཔྤཊིཀཱུལསཉྙཱི ཏཏྠ ཝིཧརཏི། སཙེ ཨཱཀངྑཏི – ‘‘ཨཔྤཊིཀཱུལེ པཊིཀཱུལསཉྙཱི ཝིཧརེཡྻ’’ནྟི, པཊིཀཱུལསཉྙཱི ཏཏྠ ཝིཧརཏི། སཙེ ཨཱཀངྑཏི – ‘‘པཊིཀཱུལེ ཙ ཨཔྤཊིཀཱུལེ ཙ ཨཔྤཊིཀཱུལསཉྙཱི ཝིཧརེཡྻ’’ནྟི, ཨཔྤཊིཀཱུལསཉྙཱི ཏཏྠ ཝིཧརཏི། སཙེ ཨཱཀངྑཏི – ‘‘ཨཔྤཊིཀཱུལེ ཙ པཊིཀཱུལེ ཙ པཊིཀཱུལསཉྙཱི ཝིཧརེཡྻ’’ནྟི, པཊིཀཱུལསཉྙཱི ཏཏྠ ཝིཧརཏི། སཙེ ཨཱཀངྑཏི – ‘‘པཊིཀཱུལེ ཙ ཨཔྤཊིཀཱུལེ ཙ ཏདུབྷཡཾ ཨབྷིནིཝཛྫེཏྭཱ ཨུཔེཀྑཀོ ཝིཧརེཡྻཾ སཏོ སམྤཛཱནོ’’ཏི, ཨུཔེཀྑཀོ ཏཏྠ ཝིཧརཏི སཏོ སམྤཛཱནོ།
17. Katamā ariyā iddhi? Idha bhikkhu 26 sace ākaṅkhati – ‘‘paṭikūle appaṭikūlasaññī vihareyya’’nti, appaṭikūlasaññī tattha viharati. Sace ākaṅkhati – ‘‘appaṭikūle paṭikūlasaññī vihareyya’’nti, paṭikūlasaññī tattha viharati. Sace ākaṅkhati – ‘‘paṭikūle ca appaṭikūle ca appaṭikūlasaññī vihareyya’’nti, appaṭikūlasaññī tattha viharati. Sace ākaṅkhati – ‘‘appaṭikūle ca paṭikūle ca paṭikūlasaññī vihareyya’’nti, paṭikūlasaññī tattha viharati. Sace ākaṅkhati – ‘‘paṭikūle ca appaṭikūle ca tadubhayaṃ abhinivajjetvā upekkhako vihareyyaṃ sato sampajāno’’ti, upekkhako tattha viharati sato sampajāno.
ཀཐཾ པཊིཀཱུལེ ཨཔྤཊིཀཱུལསཉྙཱི ཝིཧརཏི? ཨནིཊྛསྨིཾ ཝཏྠུསྨིཾ མེཏྟཱཡ ཝཱ ཕརཏི, དྷཱཏུཏོ ཝཱ ཨུཔསཾཧརཏི། ཨེཝཾ པཊིཀཱུལེ ཨཔྤཊིཀཱུལསཉྙཱི ཝིཧརཏི།
Kathaṃ paṭikūle appaṭikūlasaññī viharati? Aniṭṭhasmiṃ vatthusmiṃ mettāya vā pharati, dhātuto vā upasaṃharati. Evaṃ paṭikūle appaṭikūlasaññī viharati.
ཀཐཾ ཨཔྤཊིཀཱུལེ པཊིཀཱུལསཉྙཱི ཝིཧརཏི? ཨིཊྛསྨིཾ ཝཏྠུསྨིཾ ཨསུབྷཱཡ ཝཱ ཕརཏི, ཨནིཙྩཏོ ཝཱ ཨུཔསཾཧརཏི། ཨེཝཾ ཨཔྤཊིཀཱུལེ པཊིཀཱུལསཉྙཱི ཝིཧརཏི།
Kathaṃ appaṭikūle paṭikūlasaññī viharati? Iṭṭhasmiṃ vatthusmiṃ asubhāya vā pharati, aniccato vā upasaṃharati. Evaṃ appaṭikūle paṭikūlasaññī viharati.
ཀཐཾ པཊིཀཱུལེ ཙ ཨཔྤཊིཀཱུལེ ཙ ཨཔྤཊིཀཱུལསཉྙཱི ཝིཧརཏི? ཨནིཊྛསྨིཉྩ ཨིཊྛསྨིཉྩ ཝཏྠུསྨིཾ མེཏྟཱཡ ཝཱ ཕརཏི, དྷཱཏུཏོ ཝཱ ཨུཔསཾཧརཏི། ཨེཝཾ པཊིཀཱུལེ ཙ ཨཔྤཊིཀཱུལེ ཙ ཨཔྤཊིཀཱུལསཉྙཱི ཝིཧརཏི །
Kathaṃ paṭikūle ca appaṭikūle ca appaṭikūlasaññī viharati? Aniṭṭhasmiñca iṭṭhasmiñca vatthusmiṃ mettāya vā pharati, dhātuto vā upasaṃharati. Evaṃ paṭikūle ca appaṭikūle ca appaṭikūlasaññī viharati .
ཀཐཾ ཨཔྤཊིཀཱུལེ ཙ པཊིཀཱུལེ ཙ པཊིཀཱུལསཉྙཱི ཝིཧརཏི? ཨིཊྛསྨིཉྩ ཨནིཊྛསྨིཉྩ ཝཏྠུསྨིཾ ཨསུབྷཱཡ ཝཱ ཕརཏི, ཨནིཙྩཏོ ཝཱ ཨུཔསཾཧརཏི། ཨེཝཾ ཨཔྤཊིཀཱུལེ ཙ པཊིཀཱུལེ ཙ པཊིཀཱུལསཉྙཱི ཝིཧརཏི།
Kathaṃ appaṭikūle ca paṭikūle ca paṭikūlasaññī viharati? Iṭṭhasmiñca aniṭṭhasmiñca vatthusmiṃ asubhāya vā pharati, aniccato vā upasaṃharati. Evaṃ appaṭikūle ca paṭikūle ca paṭikūlasaññī viharati.
ཀཐཾ པཊིཀཱུལེ ཙ ཨཔྤཊིཀཱུལེ ཙ ཏདུབྷཡཾ ཨབྷིནིཝཛྫེཏྭཱ ཨུཔེཀྑཀོ ཝིཧརཏི སཏོ སམྤཛཱནོ? ཨིདྷ བྷིཀྑུ ཙཀྑུནཱ རཱུཔཾ དིསྭཱ ནེཝ སུམནོ ཧོཏི ན དུམྨནོ, ཨུཔེཀྑཀོ ཝིཧརཏི སཏོ སམྤཛཱནོ། སོཏེན སདྡཾ སུཏྭཱ…པེ॰… གྷཱནེན གནྡྷཾ གྷཱཡིཏྭཱ… ཛིཝ྄ཧཱཡ རསཾ སཱཡིཏྭཱ… ཀཱཡེན ཕོཊྛབྦཾ ཕུསིཏྭཱ… མནསཱ དྷམྨཾ ཝིཉྙཱཡ ནེཝ སུམནོ ཧོཏི ན དུམྨནོ, ཨུཔེཀྑཀོ ཝིཧརཏི སཏོ སམྤཛཱནོ། ཨེཝཾ པཊིཀཱུལེ ཙ ཨཔྤཊིཀཱུལེ ཙ ཏདུབྷཡཾ ཨབྷིནིཝཛྫེཏྭཱ ཨུཔེཀྑཀོ ཝིཧརཏི སཏོ སམྤཛཱནོ། ཨཡཾ ཨརིཡཱ ཨིདྡྷི།
Kathaṃ paṭikūle ca appaṭikūle ca tadubhayaṃ abhinivajjetvāupekkhako viharati sato sampajāno? Idha bhikkhu cakkhunā rūpaṃ disvā neva sumano hoti na dummano, upekkhako viharati sato sampajāno. Sotena saddaṃ sutvā…pe… ghānena gandhaṃ ghāyitvā… jivhāya rasaṃ sāyitvā… kāyena phoṭṭhabbaṃ phusitvā… manasā dhammaṃ viññāya neva sumano hoti na dummano, upekkhako viharati sato sampajāno. Evaṃ paṭikūle ca appaṭikūle ca tadubhayaṃ abhinivajjetvā upekkhako viharati sato sampajāno. Ayaṃ ariyā iddhi.
༡༨. ཀཏམཱ ཀམྨཝིཔཱཀཛཱ ཨིདྡྷི? སབྦེསཾ པཀྑཱིནཾ, སབྦེསཾ དེཝཱནཾ, ཨེཀཙྩཱནཾ མནུསྶཱནཾ, ཨེཀཙྩཱནཾ ཝིནིཔཱཏིཀཱནཾ། ཨཡཾ ཀམྨཝིཔཱཀཛཱ ཨིདྡྷི།
18. Katamā kammavipākajā iddhi? Sabbesaṃ pakkhīnaṃ, sabbesaṃ devānaṃ, ekaccānaṃ manussānaṃ, ekaccānaṃ vinipātikānaṃ. Ayaṃ kammavipākajā iddhi.
ཀཏམཱ པུཉྙཝཏོ ཨིདྡྷི? རཱཛཱ ཙཀྐཝཏྟཱི 27 ཝེཧཱསཾ གཙྪཏི སདྡྷིཾ ཙཏུརངྒིནིཡཱ སེནཱཡ, ཨནྟམསོ ཨསྶབནྡྷགོཔུརིསེ 28 ཨུཔཱདཱཡ། ཛོཏིཀསྶ གཧཔཏིསྶ པུཉྙཝཏོ ཨིདྡྷི, ཛཊིལསྶ གཧཔཏིསྶ པུཉྙཝཏོ ཨིདྡྷི, མེཎྜཀསྶ གཧཔཏིསྶ པུཉྙཝཏོ ཨིདྡྷི, གྷོསིཏསྶ གཧཔཏིསྶ པུཉྙཝཏོ ཨིདྡྷི, པཉྩནྣཾ མཧཱཔུཉྙཱནཾ པུཉྙཝཏོ ཨིདྡྷི། ཨཡཾ པུཉྙཝཏོ ཨིདྡྷི།
Katamā puññavato iddhi? Rājā cakkavattī 29 vehāsaṃ gacchati saddhiṃ caturaṅginiyā senāya, antamaso assabandhagopurise 30 upādāya. Jotikassa gahapatissa puññavato iddhi, jaṭilassa gahapatissa puññavato iddhi, meṇḍakassa gahapatissa puññavato iddhi, ghositassa gahapatissa puññavato iddhi, pañcannaṃ mahāpuññānaṃ puññavato iddhi. Ayaṃ puññavato iddhi.
ཀཏམཱ ཝིཛྫཱམཡཱ ཨིདྡྷི? ཝིཛྫཱདྷརཱ ཝིཛྫཾ པརིཛཔྤེཏྭཱ ཝེཧཱསཾ གཙྪནྟི, ཨཱཀཱསེ ཨནྟལིཀྑེ ཧཏྠིམྤི དསྶེནྟི, ཨསྶམྤི དསྶེནྟི, རཐམྤི དསྶེནྟི, པཏྟིམྤི དསྶེནྟི, ཝིཝིདྷམྤི སེནཱབྱཱུཧཾ དསྶེནྟི། ཨཡཾ ཝིཛྫཱམཡཱ ཨིདྡྷི།
Katamā vijjāmayā iddhi? Vijjādharā vijjaṃ parijappetvā vehāsaṃ gacchanti, ākāse antalikkhe hatthimpi dassenti, assampi dassenti, rathampi dassenti, pattimpi dassenti, vividhampi senābyūhaṃ dassenti. Ayaṃ vijjāmayā iddhi.
ཀཐཾ ཏཏྠ ཏཏྠ སམྨཱ པཡོགཔཙྩཡཱ ཨིཛ྄ཛྷནཊྛེན ཨིདྡྷི? ནེཀྑམྨེན ཀཱམཙྪནྡསྶ པཧཱནཊྛོ ཨིཛ྄ཛྷཏཱིཏི – ཏཏྠ ཏཏྠ སམྨཱ པཡོགཔཙྩཡཱ ཨིཛ྄ཛྷནཊྛེན ཨིདྡྷི། ཨབྱཱཔཱདེན བྱཱཔཱདསྶ པཧཱནཊྛོ ཨིཛ྄ཛྷཏཱིཏི – ཏཏྠ ཏཏྠ སམྨཱ པཡོགཔཙྩཡཱ ཨིཛ྄ཛྷནཊྛེན ཨིདྡྷི…པེ॰… ཨརཧཏྟམགྒེན སབྦཀིལེསཱནཾ པཧཱནཊྛོ ཨིཛ྄ཛྷཏཱིཏི – ཏཏྠ ཏཏྠ སམྨཱ པཡོགཔཙྩཡཱ ཨིཛ྄ཛྷནཊྛེན ཨིདྡྷི། ཨེཝཾ ཏཏྠ ཏཏྠ སམྨཱ པཡོགཔཙྩཡཱ ཨིཛ྄ཛྷནཊྛེན ཨིདྡྷི། ཨིམཱ དས ཨིདྡྷིཡོ།
Kathaṃ tattha tattha sammā payogapaccayā ijjhanaṭṭhena iddhi? Nekkhammena kāmacchandassa pahānaṭṭho ijjhatīti – tattha tattha sammā payogapaccayā ijjhanaṭṭhena iddhi. Abyāpādena byāpādassa pahānaṭṭho ijjhatīti – tattha tattha sammā payogapaccayā ijjhanaṭṭhena iddhi…pe… arahattamaggena sabbakilesānaṃ pahānaṭṭho ijjhatīti – tattha tattha sammā payogapaccayā ijjhanaṭṭhena iddhi. Evaṃ tattha tattha sammā payogapaccayā ijjhanaṭṭhena iddhi. Imā dasa iddhiyo.
ཨིདྡྷིཀཐཱ ནིཊྛིཏཱ།
Iddhikathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ཨིདྡྷིཀཐཱཝཎྞནཱ • Iddhikathāvaṇṇanā
