Library / Tipiṭaka / তিপিটক • Tipiṭaka / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā

    ২. ইদ্ধিকথা

    2. Iddhikathā

    ইদ্ধিকথাৰণ্ণনা

    Iddhikathāvaṇṇanā

    ৯. ইদানি পঞ্ঞাকথায অনন্তরং পঞ্ঞানুভাৰং দস্সেন্তেন কথিতায ইদ্ধিকথায অপুব্বত্থানুৰণ্ণনা। তত্থ পুচ্ছাসু তাৰ কা ইদ্ধীতি সভাৰপুচ্ছা। কতি ইদ্ধিযোতি পভেদপুচ্ছা। কতি ভূমিযোতি সম্ভারপুচ্ছা। কতি পাদাতি পতিট্ঠপুচ্ছা। কতি পদানীতি আসন্নকারণপুচ্ছা। কতি মূলানীতি আদিকারণপুচ্ছা। ৰিসজ্জনেসু ইজ্ঝনট্ঠেন ইদ্ধীতি নিপ্ফত্তিঅত্থেন পটিলাভট্ঠেন চাতি অত্থো। যঞ্হি নিপ্ফজ্জতি পটিলব্ভতি চ, তং ইজ্ঝতীতি ৰুচ্চতি। যথাহ – ‘‘কামং কামযমানস্স, তস্স চেতং সমিজ্ঝতী’’তি (সু॰ নি॰ ৭৭২)। ‘‘নেক্খম্মং ইজ্ঝতীতি ইদ্ধি, পটিহরতীতি পাটিহারিয’’ন্তিআদি (পটি॰ ম॰ ৩.৩২)। অপরো নযো – ইজ্ঝনট্ঠেন ইদ্ধি, উপাযসম্পদাযেতং অধিৰচনং। উপাযসম্পদা হি ইজ্ঝতি অধিপ্পেতফলপ্পসৰনতো। যথাহ – ‘‘অযং খো, চিত্তো গহপতি, সীলৰা কল্যাণধম্মো, সচে পণিদহিস্সতি ‘অনাগতমদ্ধানং রাজা অস্সং চক্কৰত্তী’তি। ইজ্ঝিস্সতি হি সীলৰতো চেতোপণিধি ৰিসুদ্ধত্তা’’তি (সং॰ নি॰ ৪.৩৫২)। অপরো নযো – এতায সত্তা ইজ্ঝন্তীতি ইদ্ধি। ইজ্ঝন্তীতি ইদ্ধা ৰুদ্ধা উক্কংসগতা হোন্তীতি ৰুত্তং হোতি।

    9. Idāni paññākathāya anantaraṃ paññānubhāvaṃ dassentena kathitāya iddhikathāya apubbatthānuvaṇṇanā. Tattha pucchāsu tāva kā iddhīti sabhāvapucchā. Kati iddhiyoti pabhedapucchā. Kati bhūmiyoti sambhārapucchā. Kati pādāti patiṭṭhapucchā. Kati padānīti āsannakāraṇapucchā. Kati mūlānīti ādikāraṇapucchā. Visajjanesu ijjhanaṭṭhena iddhīti nipphattiatthena paṭilābhaṭṭhena cāti attho. Yañhi nipphajjati paṭilabbhati ca, taṃ ijjhatīti vuccati. Yathāha – ‘‘kāmaṃ kāmayamānassa, tassa cetaṃ samijjhatī’’ti (su. ni. 772). ‘‘Nekkhammaṃ ijjhatīti iddhi, paṭiharatīti pāṭihāriya’’ntiādi (paṭi. ma. 3.32). Aparo nayo – ijjhanaṭṭhena iddhi, upāyasampadāyetaṃ adhivacanaṃ. Upāyasampadā hi ijjhati adhippetaphalappasavanato. Yathāha – ‘‘ayaṃ kho, citto gahapati, sīlavā kalyāṇadhammo, sace paṇidahissati ‘anāgatamaddhānaṃ rājā assaṃ cakkavattī’ti. Ijjhissati hi sīlavato cetopaṇidhi visuddhattā’’ti (saṃ. ni. 4.352). Aparo nayo – etāya sattā ijjhantīti iddhi. Ijjhantīti iddhā vuddhā ukkaṃsagatā hontīti vuttaṃ hoti.

    ১০. দসসু ইদ্ধীসু অধিট্ঠানৰসেন নিপ্ফন্নত্তা অধিট্ঠানা ইদ্ধি। পকতিৰণ্ণৰিজহনৰিকারৰসেন পৰত্তত্তা ৰিকুব্বনা ইদ্ধি। সরীরব্ভন্তরে অঞ্ঞস্স মনোমযস্স সরীরস্স নিপ্ফত্তিৰসেন পৰত্তত্তা মনোমযা ইদ্ধি। ঞাণপ্পৰত্তিতো পুব্বে ৰা পচ্ছা ৰা তংখণে ৰা ঞাণানুভাৰনিব্বত্তো ৰিসেসো ঞাণৰিপ্ফারা ইদ্ধি। সমাধিতো পুব্বে ৰা পচ্ছা ৰা তংখণে ৰা সমথানুভাৰনিব্বত্তো ৰিসেসো সমাধিৰিপ্ফারা ইদ্ধি। চেতোৰসিপ্পত্তানং অরিযানংযেৰ সম্ভৰতো অরিযা ইদ্ধি। কম্মৰিপাকৰসেন জাতো ৰিসেসো কম্মৰিপাকজা ইদ্ধি। পুব্বে কতপুঞ্ঞস্স জাতো ৰিসেসো পুঞ্ঞৰতো ইদ্ধি। ৰিজ্জায জাতো ৰিসেসো ৰিজ্জামযা ইদ্ধি। তেন তেন সম্মাপযোগেন তস্স তস্স কম্মস্স ইজ্ঝনং তত্থ তত্থ সম্মাপযোগপচ্চযা ইজ্ঝনট্ঠেন ইদ্ধি।

    10. Dasasu iddhīsu adhiṭṭhānavasena nipphannattā adhiṭṭhānā iddhi. Pakativaṇṇavijahanavikāravasena pavattattā vikubbanā iddhi. Sarīrabbhantare aññassa manomayassa sarīrassa nipphattivasena pavattattā manomayā iddhi. Ñāṇappavattito pubbe vā pacchā vā taṃkhaṇe vā ñāṇānubhāvanibbatto viseso ñāṇavipphārā iddhi. Samādhito pubbe vā pacchā vā taṃkhaṇe vā samathānubhāvanibbatto viseso samādhivipphārā iddhi. Cetovasippattānaṃ ariyānaṃyeva sambhavato ariyā iddhi. Kammavipākavasena jāto viseso kammavipākajā iddhi. Pubbe katapuññassa jāto viseso puññavato iddhi. Vijjāya jāto viseso vijjāmayā iddhi. Tena tena sammāpayogena tassa tassa kammassa ijjhanaṃ tattha tattha sammāpayogapaccayā ijjhanaṭṭhena iddhi.

    ইদ্ধিযা চতস্সো ভূমিযোতি অৰিসেসেত্ৰা ৰুত্তেপি যথালাভৰসেন অধিট্ঠানৰিকুব্বনমনোমযিদ্ধিযা এৰ ভূমিযো, ন সেসানং। ৰিৰেকজা ভূমীতি ৰিৰেকতো ৰা ৰিৰেকে ৰা জাতা ৰিৰেকজা ভূমি। পীতিসুখভূমীতি পীতিসুখযুত্তা ভূমি। উপেক্খাসুখভূমীতি তত্রমজ্ঝত্তুপেক্খায চ সুখেন চ যুত্তা ভূমি। অদুক্খমসুখাভূমীতি অদুক্খমসুখৰেদনাযুত্তা ভূমি। তেসু পঠমদুতিযানি ঝানানি পীতিফরণতা, তীণি ঝানানি সুখফরণতা, চতুত্থজ্ঝানং চেতোফরণতা। এত্থ চ পুরিমানি তীণি ঝানানি যস্মা পীতিফরণেন চ সুখফরণেন চ সুখসঞ্ঞঞ্চ লহুসঞ্ঞঞ্চ ওক্কমিত্ৰা লহুমুদুকম্মঞ্ঞকাযো হুত্ৰা ইদ্ধিং পাপুণাতি, তস্মা ইমিনা পরিযাযেন ইদ্ধিলাভায সংৰত্তনতো সম্ভারভূমিযোতি ৰেদিতব্বানি। চতুত্থজ্ঝানং পন ইদ্ধিলাভায পকতিভূমিযেৰ। ইদ্ধিলাভাযাতি অত্তনো সন্তানে পাতুভাৰৰসেন ইদ্ধীনং লাভায। ইদ্ধিপটিলাভাযাতি পরিহীনানং ৰা ইদ্ধীনং ৰীরিযারম্ভৰসেন পুন লাভায, উপসগ্গৰসেন ৰা পদং ৰড্ঢিতং। ইদ্ধিৰিকুব্বনতাযাতি ইদ্ধিযা ৰিৰিধকরণভাৰায। ইদ্ধিৰিসৰিতাযাতি ৰিৰিধং ৰিসেসং সৰতি জনেতি পৰত্তেতীতি ৰিসৰী, ৰিৰিধং সৰনং ৰা অস্স অত্থীতি ৰিসৰী, তস্স ভাৰো ৰিসৰিতা। তস্সা ৰিসৰিতায, ইদ্ধিযা ৰিৰিধৰিসেসপৰত্তনভাৰাযাতি অত্থো। ইদ্ধিৰসীভাৰাযাতি ইদ্ধিযা ইস্সরভাৰায। ইদ্ধিৰেসারজ্জাযাতি ইদ্ধিৰিসারদভাৰায। ইদ্ধিপাদা ঞাণকথাযং ৰুত্তত্থা।

    Iddhiyācatasso bhūmiyoti avisesetvā vuttepi yathālābhavasena adhiṭṭhānavikubbanamanomayiddhiyā eva bhūmiyo, na sesānaṃ. Vivekajā bhūmīti vivekato vā viveke vā jātā vivekajā bhūmi. Pītisukhabhūmīti pītisukhayuttā bhūmi. Upekkhāsukhabhūmīti tatramajjhattupekkhāya ca sukhena ca yuttā bhūmi. Adukkhamasukhābhūmīti adukkhamasukhavedanāyuttā bhūmi. Tesu paṭhamadutiyāni jhānāni pītipharaṇatā, tīṇi jhānāni sukhapharaṇatā, catutthajjhānaṃ cetopharaṇatā. Ettha ca purimāni tīṇi jhānāni yasmā pītipharaṇena ca sukhapharaṇena ca sukhasaññañca lahusaññañca okkamitvā lahumudukammaññakāyo hutvā iddhiṃ pāpuṇāti, tasmā iminā pariyāyena iddhilābhāya saṃvattanato sambhārabhūmiyoti veditabbāni. Catutthajjhānaṃ pana iddhilābhāya pakatibhūmiyeva. Iddhilābhāyāti attano santāne pātubhāvavasena iddhīnaṃ lābhāya. Iddhipaṭilābhāyāti parihīnānaṃ vā iddhīnaṃ vīriyārambhavasena puna lābhāya, upasaggavasena vā padaṃ vaḍḍhitaṃ. Iddhivikubbanatāyāti iddhiyā vividhakaraṇabhāvāya. Iddhivisavitāyāti vividhaṃ visesaṃ savati janeti pavattetīti visavī, vividhaṃ savanaṃ vā assa atthīti visavī, tassa bhāvo visavitā. Tassā visavitāya, iddhiyā vividhavisesapavattanabhāvāyāti attho. Iddhivasībhāvāyāti iddhiyā issarabhāvāya. Iddhivesārajjāyāti iddhivisāradabhāvāya. Iddhipādā ñāṇakathāyaṃ vuttatthā.

    ছন্দং চে ভিক্খু নিস্সাযাতি যদি ভিক্খু ছন্দং নিস্সায ছন্দং অধিপতিং করিত্ৰা। লভতি সমাধিন্তি সমাধিং পটিলভতি নিব্বত্তেতি। সেসেসুপি এসেৰ নযো। তত্থ ছন্দৰীরিযচিত্তৰীমংসা চত্তারি পদানি, তংসম্পযুত্তা চত্তারো সমাধী চত্তারি পদানীতি এৰং অট্ঠ পদানি। যস্মা পন ইদ্ধিমুপ্পাদেতুকামতাছন্দো সমাধিনা একতো নিযুত্তোৰ ইদ্ধিলাভায সংৰত্ততি, তথা ৰীরিযাদযো, তস্মা ইমানি অট্ঠ পদানি ৰুত্তানীতি ৰেদিতব্বানি।

    Chandaṃce bhikkhu nissāyāti yadi bhikkhu chandaṃ nissāya chandaṃ adhipatiṃ karitvā. Labhati samādhinti samādhiṃ paṭilabhati nibbatteti. Sesesupi eseva nayo. Tattha chandavīriyacittavīmaṃsā cattāri padāni, taṃsampayuttā cattāro samādhī cattāri padānīti evaṃ aṭṭha padāni. Yasmā pana iddhimuppādetukāmatāchando samādhinā ekato niyuttova iddhilābhāya saṃvattati, tathā vīriyādayo, tasmā imāni aṭṭha padāni vuttānīti veditabbāni.

    যং তং ভগৰতা অভিঞ্ঞা উপ্পাদেতুকামস্স যোগিনো কত্তব্বযোগৰিধিং দস্সেন্তেন ‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে’’তি (দী॰ নি॰ ১.২৩৮) চিত্তস্স আনেঞ্জং ৰুত্তং, তং থেরো সোল়সধা দস্সেন্তো সোল়সমূলানীতিআদিমাহ। তত্থ অনোনতন্তি কোসজ্জৰসেন অনোনতং, অসল্লীনন্তি অত্থো। অনুন্নতন্তি উদ্ধচ্চৰসেন উদ্ধং ন আরুল়্হং, অনুদ্ধতন্তি অত্থো। অনভিনতন্তি লোভৰসেন ন অভিনতং, অনল্লীনন্তি অত্থো। অভিকামতায নতং অভিনতন্তি, ইদং তাদিসং ন হোতীতি ৰুত্তং হোতি। রাগেতি সঙ্খারৰত্থুকেন লোভেন। অনপনতন্তি দোসৰসেন ন অপনতং, ন ঘট্টনন্তি অত্থো। ‘‘নতং নতী’’তি অত্থতো একং। অপগতনতন্তি অপনতং, ইদং তাদিসং ন হোতীতি ৰুত্তং হোতি। অনিস্সিতন্তি অনত্ততো দিট্ঠত্তা দিট্ঠিৰসেন ‘‘অত্তা’’তি ৰা ‘‘অত্তনিয’’ন্তি ৰা কিঞ্চি ন নিস্সিতং। অপ্পটিবদ্ধন্তি পচ্চুপকারাসাৰসেন নপ্পটিবদ্ধং। ছন্দরাগেতি সত্তৰত্থুকেন লোভেন। ৰিপ্পমুত্তন্তি ৰিক্খম্ভনৰিমুত্তিৰসেন কামরাগতো ৰিপ্পমুত্তং। অথ ৰা পঞ্চৰিমুত্তিৰসেন কামরাগতো ৰিপ্পমুত্তং। অথ ৰা পঞ্চৰিমুত্তিৰসেন ততো ততো পটিপক্খতো ৰিপ্পমুত্তং। ইদং পুথুজ্জনসেখাসেখানম্পি অভিঞ্ঞায উপ্পাদনতো নিরোধসমাপত্তিঞাণে ‘‘সোল়সহি ঞাণচরিযাহী’’তি (পটি॰ ম॰ ১.৮৪) ৰুত্তনযেন উক্কট্ঠপরিচ্ছেদেন ৰুত্তং, যথালাভৰসেন পন গহেতব্বং। কামরাগেতি মেথুনরাগেন। ৰিসঞ্ঞুত্তন্তি ৰিক্খম্ভনতো সেসকিলেসেহি ৰিসংযুত্তং, উক্কট্ঠনযেন সমুচ্ছেদতো ৰা ৰিপ্পযুত্তং। কিলেসেতি সেসকিলেসেন। ৰিমরিযাদিকতন্তি ৰিক্খম্ভিতব্বমরিযাদৰসেন ৰিগতকিলেসমরিযাদং কতং, তেন তেন মগ্গেন পহাতব্বমরিযাদৰসেন ৰা ৰিগতকিলেসমরিযাদং কতং। কিলেসমরিযাদেতি তেন তেন পহীনেন কিলেসমরিযাদেন। লিঙ্গৰিপল্লাসো চেত্থ দট্ঠব্বো। একত্তগতন্তি একারম্মণগতং। নানত্তকিলেসেহীতি নানারম্মণে পৰত্তমানেহি কিলেসেহি। ইদং আরম্মণমপেক্খিত্ৰা ৰুত্তং, ‘‘অনোনত’’ন্তিআদি পন কিলেসে এৰ অপেক্খিত্ৰা। ওভাসগতন্তি পঞ্ঞায ৰিসদপ্পৰত্তিৰসেন পঞ্ঞোভাসং গতং। অৰিজ্জন্ধকারেতি বলৰঅৰিজ্জায। চতস্সো চ ভূমিযো সোল়স চ মূলানি ইদ্ধিযা পুব্বভাগৰসেন ৰুত্তানি, চত্তারো চ পাদা অট্ঠ চ পদানি পুব্বভাগৰসেন চ সম্পযোগৰসেন চ ৰুত্তানীতি।

    Yaṃ taṃ bhagavatā abhiññā uppādetukāmassa yogino kattabbayogavidhiṃ dassentena ‘‘so evaṃ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte’’ti (dī. ni. 1.238) cittassa āneñjaṃ vuttaṃ, taṃ thero soḷasadhā dassento soḷasamūlānītiādimāha. Tattha anonatanti kosajjavasena anonataṃ, asallīnanti attho. Anunnatanti uddhaccavasena uddhaṃ na āruḷhaṃ, anuddhatanti attho. Anabhinatanti lobhavasena na abhinataṃ, anallīnanti attho. Abhikāmatāya nataṃ abhinatanti, idaṃ tādisaṃ na hotīti vuttaṃ hoti. Rāgeti saṅkhāravatthukena lobhena. Anapanatanti dosavasena na apanataṃ, na ghaṭṭananti attho. ‘‘Nataṃ natī’’ti atthato ekaṃ. Apagatanatanti apanataṃ, idaṃ tādisaṃ na hotīti vuttaṃ hoti. Anissitanti anattato diṭṭhattā diṭṭhivasena ‘‘attā’’ti vā ‘‘attaniya’’nti vā kiñci na nissitaṃ. Appaṭibaddhanti paccupakārāsāvasena nappaṭibaddhaṃ. Chandarāgeti sattavatthukena lobhena. Vippamuttanti vikkhambhanavimuttivasena kāmarāgato vippamuttaṃ. Atha vā pañcavimuttivasena kāmarāgato vippamuttaṃ. Atha vā pañcavimuttivasena tato tato paṭipakkhato vippamuttaṃ. Idaṃ puthujjanasekhāsekhānampi abhiññāya uppādanato nirodhasamāpattiñāṇe ‘‘soḷasahi ñāṇacariyāhī’’ti (paṭi. ma. 1.84) vuttanayena ukkaṭṭhaparicchedena vuttaṃ, yathālābhavasena pana gahetabbaṃ. Kāmarāgeti methunarāgena. Visaññuttanti vikkhambhanato sesakilesehi visaṃyuttaṃ, ukkaṭṭhanayena samucchedato vā vippayuttaṃ. Kileseti sesakilesena. Vimariyādikatanti vikkhambhitabbamariyādavasena vigatakilesamariyādaṃ kataṃ, tena tena maggena pahātabbamariyādavasena vā vigatakilesamariyādaṃ kataṃ. Kilesamariyādeti tena tena pahīnena kilesamariyādena. Liṅgavipallāso cettha daṭṭhabbo. Ekattagatanti ekārammaṇagataṃ. Nānattakilesehīti nānārammaṇe pavattamānehi kilesehi. Idaṃ ārammaṇamapekkhitvā vuttaṃ, ‘‘anonata’’ntiādi pana kilese eva apekkhitvā. Obhāsagatanti paññāya visadappavattivasena paññobhāsaṃ gataṃ. Avijjandhakāreti balavaavijjāya. Catasso ca bhūmiyo soḷasa ca mūlāni iddhiyā pubbabhāgavasena vuttāni, cattāro ca pādā aṭṭha ca padāni pubbabhāgavasena ca sampayogavasena ca vuttānīti.

    ১০. এৰং ইদ্ধিযা ভূমিপাদপদমূলভূতে ধম্মে দস্সেত্ৰা ইদানি তা ইদ্ধিযো দস্সেন্তো কতমা অধিট্ঠানা ইদ্ধীতিআদিমাহ। তত্থ উদ্দেসপদানং অত্থো ইদ্ধিৰিধঞাণনিদ্দেসে ৰুত্তোযেৰ। ইধ ভিক্খূতি ইমস্মিং সাসনে ভিক্খু। তেন সব্বপকারৰসেন ইদ্ধিৰিধকারকস্স অঞ্ঞত্থ অভাৰং দীপেতি। ইমেসং দ্ৰিন্নং পদানং নিদ্দেসো হেট্ঠা ৰুত্তত্থো। তেনেৰ চ ইদ্ধিযা ভূমিপাদপদমূলভূতেহি ধম্মেহি সমন্নাগতো ৰিসুদ্ধিমগ্গে (ৰিসুদ্ধি॰ ২.৩৬৫-৩৬৬) ৰুত্তেহি চুদ্দসহি পন্নরসহি ৰা আকারেহি পরিদমিতচিত্ততা চ ছন্দাদিএকেকাধিপতিসমাপজ্জনৰসেন আৰজ্জনাদিৰসীভাৰৰসেন চ মুদুকম্মঞ্ঞকতচিত্ততা চ ৰুত্তা হোতি। বলৰপুব্বযোগসম্পন্নো পুব্বযোগসম্পত্তিযা অরহত্তপটিলাভেনেৰ পটিলদ্ধাভিঞ্ঞাদিগুণো ভিক্খু ভূমিআদীহি ধম্মেহি সমন্নাগতো হোতীতি কত্ৰা সোপি ৰুত্তোৰ হোতি।

    10. Evaṃ iddhiyā bhūmipādapadamūlabhūte dhamme dassetvā idāni tā iddhiyo dassento katamā adhiṭṭhānā iddhītiādimāha. Tattha uddesapadānaṃ attho iddhividhañāṇaniddese vuttoyeva. Idha bhikkhūti imasmiṃ sāsane bhikkhu. Tena sabbapakāravasena iddhividhakārakassa aññattha abhāvaṃ dīpeti. Imesaṃ dvinnaṃ padānaṃ niddeso heṭṭhā vuttattho. Teneva ca iddhiyā bhūmipādapadamūlabhūtehi dhammehi samannāgato visuddhimagge (visuddhi. 2.365-366) vuttehi cuddasahi pannarasahi vā ākārehi paridamitacittatā ca chandādiekekādhipatisamāpajjanavasena āvajjanādivasībhāvavasena ca mudukammaññakatacittatā ca vuttā hoti. Balavapubbayogasampanno pubbayogasampattiyā arahattapaṭilābheneva paṭiladdhābhiññādiguṇo bhikkhu bhūmiādīhi dhammehi samannāgato hotīti katvā sopi vuttova hoti.

    বহুকং আৰজ্জতীতি পথৰীকসিণারম্মণং অভিঞ্ঞাপাদকং চতুত্থজ্ঝানং সমাপজ্জিত্ৰা ৰুট্ঠায সচে সতং ইচ্ছতি, ‘‘সতং হোমি, সতং হোমী’’তি পরিকম্মকরণৰসেন আৰজ্জতি। আৰজ্জিত্ৰা ঞাণেন অধিট্ঠাতীতি এৰং পরিকম্মং কত্ৰা অভিঞ্ঞাঞাণেন অধিট্ঠাতি। এত্থ পরিকম্মং কত্ৰা পুন পাদকজ্ঝানসমাপজ্জনং ন ৰুত্তং। কিঞ্চাপি ন ৰুত্তং, অথ খো অট্ঠকথাযং (ৰিসুদ্ধি॰ ২.৩৮৬) ‘‘আৰজ্জতীতি পরিকম্মৰসেনেৰ ৰুত্তং, আৰজ্জিত্ৰা ঞাণেন অধিট্ঠাতীতি অভিঞ্ঞাঞাণৰসেন ৰুত্তং, তস্মা বহুকং আৰজ্জতি, ততো তেসং পরিকম্মচিত্তানং অৰসানে সমাপজ্জতি, সমাপত্তিতো ৰুট্ঠহিত্ৰা পুন ‘বহুকো হোমী’তি আৰজ্জিত্ৰা ততো পরং পৰত্তানং তিণ্ণং চতুন্নং ৰা পুব্বভাগচিত্তানং অনন্তরা উপ্পন্নেন সন্নিট্ঠাপনৰসেন অধিট্ঠানন্তি লদ্ধনামেন একেনেৰ অভিঞ্ঞাঞাণেন অধিট্ঠাতীতি এৰমেত্থ অত্থো দট্ঠব্বো’’তি ৰুত্তত্তা এৰমেৰ দট্ঠব্বং। যথা ‘‘ভুঞ্জিত্ৰা সযতী’’তি ৰুত্তে পানীযং অপিৰিত্ৰা হত্থধোৰনাদীনি অকত্ৰা ভুত্তানন্তরমেৰ সযতীতি অত্থো ন হোতীতি অন্তরা সন্তেসুপি অঞ্ঞেসু কিচ্চেসু ‘‘ভুত্ৰা সযতী’’তি ৰুচ্চতি, এৰমিধাপীতি দট্ঠব্বং। পঠমং পাদকজ্ঝানসমাপজ্জনম্পি হি পাল়িযং অৰুত্তমেৰাতি। তেন পন অধিট্ঠানঞাণেন সহেৰ সতং হোতি। সহস্সেপি সতসহস্সেপি এসেৰ নযো। সচে এৰং ন ইজ্ঝতি, পুন পরিকম্মং কত্ৰা দুতিযম্পি সমাপজ্জিত্ৰা ৰুট্ঠায অধিট্ঠাতব্বং। সংযুত্তট্ঠকথাযঞ্হি ‘‘একৰারং দ্ৰিৰারং সমাপজ্জিতুং ৰট্টতী’’তি ৰুত্তং। তত্থ পাদকজ্ঝানচিত্তং নিমিত্তারম্মণং, পরিকম্মচিত্তানি সতারম্মণানি ৰা সহস্সারম্মণানি ৰা। তানি চ খো ৰণ্ণৰসেন, ন পণ্ণত্তিৰসেন। অধিট্ঠানচিত্তম্পি তথেৰ সতারম্মণং ৰা সহস্সারম্মণং ৰা। তং পুব্বে ৰুত্তঅপ্পনাচিত্তমিৰ গোত্রভুঅনন্তরং একমেৰ উপ্পজ্জতি রূপাৰচরচতুত্থজ্ঝানিকং।

    Bahukaṃ āvajjatīti pathavīkasiṇārammaṇaṃ abhiññāpādakaṃ catutthajjhānaṃ samāpajjitvā vuṭṭhāya sace sataṃ icchati, ‘‘sataṃ homi, sataṃ homī’’ti parikammakaraṇavasena āvajjati. Āvajjitvāñāṇena adhiṭṭhātīti evaṃ parikammaṃ katvā abhiññāñāṇena adhiṭṭhāti. Ettha parikammaṃ katvā puna pādakajjhānasamāpajjanaṃ na vuttaṃ. Kiñcāpi na vuttaṃ, atha kho aṭṭhakathāyaṃ (visuddhi. 2.386) ‘‘āvajjatīti parikammavaseneva vuttaṃ, āvajjitvā ñāṇena adhiṭṭhātīti abhiññāñāṇavasena vuttaṃ, tasmā bahukaṃ āvajjati, tato tesaṃ parikammacittānaṃ avasāne samāpajjati, samāpattito vuṭṭhahitvā puna ‘bahuko homī’ti āvajjitvā tato paraṃ pavattānaṃ tiṇṇaṃ catunnaṃ vā pubbabhāgacittānaṃ anantarā uppannena sanniṭṭhāpanavasena adhiṭṭhānanti laddhanāmena ekeneva abhiññāñāṇena adhiṭṭhātīti evamettha attho daṭṭhabbo’’ti vuttattā evameva daṭṭhabbaṃ. Yathā ‘‘bhuñjitvā sayatī’’ti vutte pānīyaṃ apivitvā hatthadhovanādīni akatvā bhuttānantarameva sayatīti attho na hotīti antarā santesupi aññesu kiccesu ‘‘bhutvā sayatī’’ti vuccati, evamidhāpīti daṭṭhabbaṃ. Paṭhamaṃ pādakajjhānasamāpajjanampi hi pāḷiyaṃ avuttamevāti. Tena pana adhiṭṭhānañāṇena saheva sataṃ hoti. Sahassepi satasahassepi eseva nayo. Sace evaṃ na ijjhati, puna parikammaṃ katvā dutiyampi samāpajjitvā vuṭṭhāya adhiṭṭhātabbaṃ. Saṃyuttaṭṭhakathāyañhi ‘‘ekavāraṃ dvivāraṃ samāpajjituṃ vaṭṭatī’’ti vuttaṃ. Tattha pādakajjhānacittaṃ nimittārammaṇaṃ, parikammacittāni satārammaṇāni vā sahassārammaṇāni vā. Tāni ca kho vaṇṇavasena, na paṇṇattivasena. Adhiṭṭhānacittampi tatheva satārammaṇaṃ vā sahassārammaṇaṃ vā. Taṃ pubbe vuttaappanācittamiva gotrabhuanantaraṃ ekameva uppajjati rūpāvacaracatutthajjhānikaṃ.

    যথাযস্মা চূল়পন্থকো একোপি হুত্ৰা বহুধা হোতীতি বহুধাভাৰস্স কাযসক্খিদস্সনত্থং ৰুত্তং। ৰত্তমানৰচনং পনেত্থ থেরস্স তথাকরণপকতিকত্তা তস্স ধরমানকালত্তা চ কতন্তি ৰেদিতব্বং। একো হোতীতি ৰারেপি এসেৰ নযো।

    Yathāyasmā cūḷapanthako ekopi hutvā bahudhā hotīti bahudhābhāvassa kāyasakkhidassanatthaṃ vuttaṃ. Vattamānavacanaṃ panettha therassa tathākaraṇapakatikattā tassa dharamānakālattā ca katanti veditabbaṃ. Eko hotīti vārepi eseva nayo.

    তত্রিদং ৰত্থু (ৰিসুদ্ধি॰ ২.৩৮৬) – তে দ্ৰে ভাতরো কির থেরা পন্থে জাতত্তা ‘‘পন্থকা’’তি নামং লভিংসু। তেসু জেট্ঠো মহাপন্থকো পব্বজিত্ৰা সহ পটিসম্ভিদাহি অরহত্তং পাপুণি। সো অরহা হুত্ৰা চূল়পন্থকং পব্বাজেত্ৰা –

    Tatridaṃ vatthu (visuddhi. 2.386) – te dve bhātaro kira therā panthe jātattā ‘‘panthakā’’ti nāmaṃ labhiṃsu. Tesu jeṭṭho mahāpanthako pabbajitvā saha paṭisambhidāhi arahattaṃ pāpuṇi. So arahā hutvā cūḷapanthakaṃ pabbājetvā –

    ‘‘পদুমং যথা কোকনদং সুগন্ধং, পাতো সিযা ফুল্লমৰীতগন্ধং।

    ‘‘Padumaṃ yathā kokanadaṃ sugandhaṃ, pāto siyā phullamavītagandhaṃ;

    অঙ্গীরসং পস্স ৰিরোচমানং, তপন্তমাদিচ্চমিৰন্তলিক্খে’’তি॥ (অ॰ নি॰ ৫.১৯৫; সং॰ নি॰ ১.১২৩) –

    Aṅgīrasaṃ passa virocamānaṃ, tapantamādiccamivantalikkhe’’ti. (a. ni. 5.195; saṃ. ni. 1.123) –

    ইমং গাথং অদাসি। সো তং চতূহি মাসেহি পগুণং কাতুং নাসক্খি। অথ নং থেরো ‘‘অভব্বো ত্ৰং ইমস্মিং সাসনে, নিক্খম ইতো’’তি আহ। তস্মিঞ্চ কালে থেরো ভত্তুদ্দেসকো হোতি। জীৰকো কোমারভচ্চো বহুং মালাগন্ধৰিলেপনং আদায অত্তনো অম্বৰনং গন্ত্ৰা সত্থারং পূজেত্ৰা ধম্মং সুত্ৰা দসবলং ৰন্দিত্ৰা থেরং উপসঙ্কমিত্ৰা ‘‘স্ৰে, ভন্তে, বুদ্ধপ্পমুখানি পঞ্চ ভিক্খুসতানি আদায অম্হাকং নিৰেসনে ভিক্খং গণ্হথা’’তি আহ। থেরোপি ‘‘ঠপেত্ৰা চূল়পন্থকং সেসানং অধিৰাসেমী’’তি আহ। তং সুত্ৰা চূল়পন্থকো ভিয্যোসো মত্তায দোমনস্সপ্পত্তো হুত্ৰা পুনদিৰসে পাতোৰ ৰিহারা নিক্খমিত্ৰা সাসনে সাপেক্খতায ৰিহারদ্ৰারকোট্ঠকে রোদমানো অট্ঠাসি।

    Imaṃ gāthaṃ adāsi. So taṃ catūhi māsehi paguṇaṃ kātuṃ nāsakkhi. Atha naṃ thero ‘‘abhabbo tvaṃ imasmiṃ sāsane, nikkhama ito’’ti āha. Tasmiñca kāle thero bhattuddesako hoti. Jīvako komārabhacco bahuṃ mālāgandhavilepanaṃ ādāya attano ambavanaṃ gantvā satthāraṃ pūjetvā dhammaṃ sutvā dasabalaṃ vanditvā theraṃ upasaṅkamitvā ‘‘sve, bhante, buddhappamukhāni pañca bhikkhusatāni ādāya amhākaṃ nivesane bhikkhaṃ gaṇhathā’’ti āha. Theropi ‘‘ṭhapetvā cūḷapanthakaṃ sesānaṃ adhivāsemī’’ti āha. Taṃ sutvā cūḷapanthako bhiyyoso mattāya domanassappatto hutvā punadivase pātova vihārā nikkhamitvā sāsane sāpekkhatāya vihāradvārakoṭṭhake rodamāno aṭṭhāsi.

    ভগৰা তস্স উপনিস্সযং দিস্ৰা তং উপসঙ্কমিত্ৰা ‘‘কস্মা রোদসী’’তি আহ। সো তং পৰত্তিং আচিক্খি। ভগৰা ‘‘ন সজ্ঝাযং কাতুং অসক্কোন্তো মম সাসনে অভব্বো নাম হোতি, মা সোচি, পন্থকা’’তি চক্কচিত্ততলেন পাণিনা তস্স সীসং পরামসিত্ৰা তং বাহাযং গহেত্ৰা ৰিহারং পৰিসিত্ৰা গন্ধকুটিপমুখে নিসীদাপেত্ৰা ইদ্ধিযা অভিসঙ্খতং পরিসুদ্ধং পিলোতিকখণ্ডং ‘‘ইমং পিলোতিকং ‘রজোহরণং রজোহরণ’ন্তি হত্থেন পরিমজ্জন্তো নিসীদ, পন্থকা’’তি ৰত্ৰা তস্স পিলোতিকখণ্ডং দত্ৰা কালে আরোচিতে ভিক্খুসঙ্ঘপরিৰুতো জীৰকস্স গেহং গন্ত্ৰা পঞ্ঞত্তাসনে নিসীদি। তস্স তং পিলোতিকখণ্ডং তথাপরিমজ্জন্তস্স কিলিট্ঠং হুত্ৰা কমেন কাল়ৰণ্ণং অহোসি। সো ‘‘ইদং পরিসুদ্ধং পিলোতিকখণ্ডং, নত্থেত্থ দোসো, অত্তভাৰং নিস্সায পনাযং দোসো’’তি সঞ্ঞং পটিলভিত্ৰা পঞ্চসু খন্ধেসু ঞাণং ওতারেত্ৰা ৰিপস্সনং ৰড্ঢেসি। অথস্স ভগৰা ওভাসং ৰিস্সজ্জেত্ৰা পুরতো নিসিন্নো ৰিয পঞ্ঞাযমানরূপো হুত্ৰা ইমা ওভাসগাথা অভাসি –

    Bhagavā tassa upanissayaṃ disvā taṃ upasaṅkamitvā ‘‘kasmā rodasī’’ti āha. So taṃ pavattiṃ ācikkhi. Bhagavā ‘‘na sajjhāyaṃ kātuṃ asakkonto mama sāsane abhabbo nāma hoti, mā soci, panthakā’’ti cakkacittatalena pāṇinā tassa sīsaṃ parāmasitvā taṃ bāhāyaṃ gahetvā vihāraṃ pavisitvā gandhakuṭipamukhe nisīdāpetvā iddhiyā abhisaṅkhataṃ parisuddhaṃ pilotikakhaṇḍaṃ ‘‘imaṃ pilotikaṃ ‘rajoharaṇaṃ rajoharaṇa’nti hatthena parimajjanto nisīda, panthakā’’ti vatvā tassa pilotikakhaṇḍaṃ datvā kāle ārocite bhikkhusaṅghaparivuto jīvakassa gehaṃ gantvā paññattāsane nisīdi. Tassa taṃ pilotikakhaṇḍaṃ tathāparimajjantassa kiliṭṭhaṃ hutvā kamena kāḷavaṇṇaṃ ahosi. So ‘‘idaṃ parisuddhaṃ pilotikakhaṇḍaṃ, natthettha doso, attabhāvaṃ nissāya panāyaṃ doso’’ti saññaṃ paṭilabhitvā pañcasu khandhesu ñāṇaṃ otāretvā vipassanaṃ vaḍḍhesi. Athassa bhagavā obhāsaṃ vissajjetvā purato nisinno viya paññāyamānarūpo hutvā imā obhāsagāthā abhāsi –

    ‘‘রাগো রজো ন চ পন রেণু ৰুচ্চতি, রাগস্সেতং অধিৰচনং রজোতি।

    ‘‘Rāgo rajo na ca pana reṇu vuccati, rāgassetaṃ adhivacanaṃ rajoti;

    এতং রজং ৰিপ্পজহিত্ৰ ভিক্খৰো, ৰিহরন্তি তে ৰিগতরজস্স সাসনে॥

    Etaṃ rajaṃ vippajahitva bhikkhavo, viharanti te vigatarajassa sāsane.

    ‘‘দোসো…পে॰… সাসনে॥

    ‘‘Doso…pe… sāsane.

    ‘‘মোহো রজো ন চ পন রেণু ৰুচ্চতি, মোহস্সেতং অধিৰচনং রজোতি।

    ‘‘Moho rajo na ca pana reṇu vuccati, mohassetaṃ adhivacanaṃ rajoti;

    এতং রজং ৰিপ্পজহিত্ৰ ভিক্খৰো, ৰিহরন্তি তে ৰিগতরজস্স সাসনে॥ (মহানি॰ ২০৯)।

    Etaṃ rajaṃ vippajahitva bhikkhavo, viharanti te vigatarajassa sāsane. (mahāni. 209);

    ‘‘অধিচেতসো অপ্পমজ্জতো, মুনিনো মোনপথেসু সিক্খতো।

    ‘‘Adhicetaso appamajjato, munino monapathesu sikkhato;

    সোকা ন ভৰন্তি তাদিনো, উপসন্তস্স সদা সতীমতো’’তি॥ (উদা॰ ৩৭)।

    Sokā na bhavanti tādino, upasantassa sadā satīmato’’ti. (udā. 37);

    গাথাপরিযোসানে থেরো সহ পটিসম্ভিদাহি অরহত্তং পাপুণি। সো মনোমযজ্ঝানলাভী হুত্ৰা একো হুত্ৰা বহুধা, বহুধা হুত্ৰা একো ভৰিতুং সমত্থো অহোসি। অরহত্তমগ্গেনেৰস্স তীণি পিটকানি ছ চ অভিঞ্ঞা আগমিংসু।

    Gāthāpariyosāne thero saha paṭisambhidāhi arahattaṃ pāpuṇi. So manomayajjhānalābhī hutvā eko hutvā bahudhā, bahudhā hutvā eko bhavituṃ samattho ahosi. Arahattamaggenevassa tīṇi piṭakāni cha ca abhiññā āgamiṃsu.

    জীৰকোপি খো দসবলস্স দক্খিণোদকং উপনামেসি। সত্থা পত্তং হত্থেন পিদহিত্ৰা ‘‘কিং ভন্তে’’তি পুট্ঠো ‘‘ৰিহারে একো ভিক্খু অত্থি, জীৰকা’’তি আহ। সো পুরিসং পেসেসি ‘‘গচ্ছ অয্যং গহেত্ৰা সীঘং এহী’’তি। চূল়পন্থকত্থেরো তস্স পুরিসস্স পুরে আগমনাযেৰ ভাতরং অত্তনো পত্তৰিসেসং ঞাপেতুকামো ভিক্খুসহস্সং নিম্মিনিত্ৰা একম্পি একেন অসদিসং, একস্সাপি চ চীৰরৰিচারণাদিসামণককম্মং অঞ্ঞেন অসদিসং অকাসি। পুরিসো গন্ত্ৰা ৰিহারে বহূ ভিক্খূ দিস্ৰা পচ্চাগন্ত্ৰা ‘‘বহূ, ভন্তে, ৰিহারে ভিক্খূ, পক্কোসিতব্বং অয্যং ন পস্সামী’’তি জীৰকস্স কথেসি। জীৰকো সত্থারং পুচ্ছিত্ৰা তস্স নামং ৰত্ৰা পুন তং পেসেসি। সো গন্ত্ৰা ‘‘চূল়পন্থকো নাম কতরো ভন্তে’’তি পুচ্ছি। ‘‘অহং চূল়পন্থকো, অহং চূল়পন্থকো’’তি সকিংযেৰ মুখসহস্সং কথেসি। সো পুন গন্ত্ৰা ‘‘সব্বেপি কির চূল়পন্থকা, অহং পক্কোসিতব্বং ন জানামী’’তি আহ। জীৰকো পটিৰিদ্ধসচ্চতায ‘‘ইদ্ধিমা ভিক্খূ’’তি নযতো অঞ্ঞাসি। ভগৰা আহ – ‘‘গচ্ছ, যং পঠমং পস্সসি, তং চীৰরকণ্ণে গহেত্ৰা সত্থা তং আমন্তেতীতি ৰত্ৰা আনেহী’’তি। সো গন্ত্ৰা তথা অকাসি। তাৰদেৰ সব্বেপি নিম্মিতা অন্তরধাযিংসু। থেরো তং উয্যোজেত্ৰা মুখধোৰনাদিসরীরকিচ্চং নিট্ঠপেত্ৰা পঠমতরং গন্ত্ৰা পঞ্ঞত্তাসনে নিসীদি। তস্মিং খণে সত্থা দক্খিণোদকং গণ্হিত্ৰা ভত্তকিচ্চং কত্ৰা চূল়পন্থকত্থেরেনেৰ ভত্তানুমোদনং ধম্মকথং কথাপেসি। থেরো দীঘমজ্ঝিমাগমপ্পমাণং ধম্মকথং কথেসীতি।

    Jīvakopi kho dasabalassa dakkhiṇodakaṃ upanāmesi. Satthā pattaṃ hatthena pidahitvā ‘‘kiṃ bhante’’ti puṭṭho ‘‘vihāre eko bhikkhu atthi, jīvakā’’ti āha. So purisaṃ pesesi ‘‘gaccha ayyaṃ gahetvā sīghaṃ ehī’’ti. Cūḷapanthakatthero tassa purisassa pure āgamanāyeva bhātaraṃ attano pattavisesaṃ ñāpetukāmo bhikkhusahassaṃ nimminitvā ekampi ekena asadisaṃ, ekassāpi ca cīvaravicāraṇādisāmaṇakakammaṃ aññena asadisaṃ akāsi. Puriso gantvā vihāre bahū bhikkhū disvā paccāgantvā ‘‘bahū, bhante, vihāre bhikkhū, pakkositabbaṃ ayyaṃ na passāmī’’ti jīvakassa kathesi. Jīvako satthāraṃ pucchitvā tassa nāmaṃ vatvā puna taṃ pesesi. So gantvā ‘‘cūḷapanthako nāma kataro bhante’’ti pucchi. ‘‘Ahaṃ cūḷapanthako, ahaṃ cūḷapanthako’’ti sakiṃyeva mukhasahassaṃ kathesi. So puna gantvā ‘‘sabbepi kira cūḷapanthakā, ahaṃ pakkositabbaṃ na jānāmī’’ti āha. Jīvako paṭividdhasaccatāya ‘‘iddhimā bhikkhū’’ti nayato aññāsi. Bhagavā āha – ‘‘gaccha, yaṃ paṭhamaṃ passasi, taṃ cīvarakaṇṇe gahetvā satthā taṃ āmantetīti vatvā ānehī’’ti. So gantvā tathā akāsi. Tāvadeva sabbepi nimmitā antaradhāyiṃsu. Thero taṃ uyyojetvā mukhadhovanādisarīrakiccaṃ niṭṭhapetvā paṭhamataraṃ gantvā paññattāsane nisīdi. Tasmiṃ khaṇe satthā dakkhiṇodakaṃ gaṇhitvā bhattakiccaṃ katvā cūḷapanthakatthereneva bhattānumodanaṃ dhammakathaṃ kathāpesi. Thero dīghamajjhimāgamappamāṇaṃ dhammakathaṃ kathesīti.

    অঞ্ঞে ভিক্খূ অধিট্ঠানেন মনোমযং কাযং অভিনিম্মিনিত্ৰা তযো ৰা চত্তারো ৰা অভিনিম্মিনন্তি, বহুকে একসদিসেযেৰ চ কত্ৰা নিম্মিনন্তি একৰিধমেৰ কম্মং কুরুমানে। চূল়পন্থকত্থেরো পন একাৰজ্জনেনেৰ ভিক্খুসহস্সং মাপেসি। দ্ৰেপি জনে ন একসদিসে অকাসি, ন একৰিধং কম্মং কুরুমানে। তস্মা মনোমযং কাযং অভিনিম্মিনন্তানং অগ্গো নাম জাতো। অঞ্ঞে পন বহূ অনিযমেত্ৰা নিম্মিতা ইদ্ধিমতা সদিসাৰ হোন্তি। ঠাননিসজ্জাদীসু চ ভাসিততুণ্হীভাৰাদীসু চ যং যং ইদ্ধিমা করোতি, তং তদেৰ করোন্তি। সচে পন নানাৰণ্ণং কাতুকামো হোতি কেচি পঠমৰযে কেচি মজ্ঝিমৰযে কেচি পচ্ছিমৰযে, তথা দীঘকেসে উপড্ঢমুণ্ডে মুণ্ডে মিস্সককেসে উপড্ঢরত্তচীৰরে পণ্ডুকচীৰরে পদভাণধম্মকথাসরভঞ্ঞপঞ্হাপুচ্ছনপঞ্হাৰিসজ্জনরজনপচনচীৰরসিব্বনধোৰনাদীনি করোন্তে অপরেপি ৰা নানপ্পকারকে কাতুকামো হোতি, তেন পাদকজ্ঝানতো ৰুট্ঠায ‘‘এত্তকা ভিক্খূ পঠমৰযা হোন্তূ’’তিআদিনা নযেন পরিকম্মং কত্ৰা পুন সমাপজ্জিত্ৰা ৰুট্ঠায অধিট্ঠাতব্বং, অধিট্ঠানচিত্তেন সদ্ধিং ইচ্ছিতিচ্ছিতপ্পকারাযেৰ হোন্তীতি। এসেৰ নযো বহুধাপি হুত্ৰা একো হোতীতিআদীসু।

    Aññe bhikkhū adhiṭṭhānena manomayaṃ kāyaṃ abhinimminitvā tayo vā cattāro vā abhinimminanti, bahuke ekasadiseyeva ca katvā nimminanti ekavidhameva kammaṃ kurumāne. Cūḷapanthakatthero pana ekāvajjaneneva bhikkhusahassaṃ māpesi. Dvepi jane na ekasadise akāsi, na ekavidhaṃ kammaṃ kurumāne. Tasmā manomayaṃ kāyaṃ abhinimminantānaṃ aggo nāma jāto. Aññe pana bahū aniyametvā nimmitā iddhimatā sadisāva honti. Ṭhānanisajjādīsu ca bhāsitatuṇhībhāvādīsu ca yaṃ yaṃ iddhimā karoti, taṃ tadeva karonti. Sace pana nānāvaṇṇaṃ kātukāmo hoti keci paṭhamavaye keci majjhimavaye keci pacchimavaye, tathā dīghakese upaḍḍhamuṇḍe muṇḍe missakakese upaḍḍharattacīvare paṇḍukacīvare padabhāṇadhammakathāsarabhaññapañhāpucchanapañhāvisajjanarajanapacanacīvarasibbanadhovanādīni karonte aparepi vā nānappakārake kātukāmo hoti, tena pādakajjhānato vuṭṭhāya ‘‘ettakā bhikkhū paṭhamavayā hontū’’tiādinā nayena parikammaṃ katvā puna samāpajjitvā vuṭṭhāya adhiṭṭhātabbaṃ, adhiṭṭhānacittena saddhiṃ icchiticchitappakārāyeva hontīti. Eseva nayo bahudhāpi hutvā eko hotītiādīsu.

    অযং পন ৰিসেসো – পকতিযা বহুকোতি নিম্মিতকালব্ভন্তরে নিম্মিতপকতিযা বহুকো। ইমিনা চ ভিক্খুনা এৰং বহুভাৰং নিম্মিনিত্ৰা পুন ‘‘একোৰ হুত্ৰা চঙ্কমিস্সামি, সজ্ঝাযং করিস্সামি, পঞ্হং পুচ্ছিস্সামী’’তি চিন্তেত্ৰা ৰা, ‘‘অযং ৰিহারো অপ্পভিক্খুকো, সচে কেচি আগমিস্সন্তি ‘কুতো ইমে এত্তকা একসদিসা ভিক্খূ, অদ্ধা থেরস্স এস আনুভাৰো’তি মং জানিস্সন্তী’’তি অপ্পিচ্ছতায ৰা অন্তরাৰ ‘‘একো হোমী’’তি ইচ্ছন্তেন পাদকজ্ঝানং সমাপজ্জিত্ৰা ৰুট্ঠায ‘‘একো হোমী’’তি পরিকম্মং কত্ৰা পুন সমাপজ্জিত্ৰা ৰুট্ঠায ‘‘একো হোমী’’তি অধিট্ঠাতব্বং। অধিট্ঠানচিত্তেন সদ্ধিংযেৰ একো হোতি। এৰং অকরোন্তো পন যথাপরিচ্ছিন্নকালৰসেন সযমেৰ একো হোতি।

    Ayaṃ pana viseso – pakatiyā bahukoti nimmitakālabbhantare nimmitapakatiyā bahuko. Iminā ca bhikkhunā evaṃ bahubhāvaṃ nimminitvā puna ‘‘ekova hutvā caṅkamissāmi, sajjhāyaṃ karissāmi, pañhaṃ pucchissāmī’’ti cintetvā vā, ‘‘ayaṃ vihāro appabhikkhuko, sace keci āgamissanti ‘kuto ime ettakā ekasadisā bhikkhū, addhā therassa esa ānubhāvo’ti maṃ jānissantī’’ti appicchatāya vā antarāva ‘‘eko homī’’ti icchantena pādakajjhānaṃ samāpajjitvā vuṭṭhāya ‘‘eko homī’’ti parikammaṃ katvā puna samāpajjitvā vuṭṭhāya ‘‘eko homī’’ti adhiṭṭhātabbaṃ. Adhiṭṭhānacittena saddhiṃyeva eko hoti. Evaṃ akaronto pana yathāparicchinnakālavasena sayameva eko hoti.

    ১১. আৰিভাৰন্তি পদং নিক্খিপিত্ৰা কেনচি অনাৰটং হোতীতি ৰুত্তত্তা কেনচি অনাৰটপদেন আৰিভাৰপদস্স পাকটভাৰত্থো ৰুত্তো। ‘‘হোতী’’তি পদেন ‘‘করোতী’’তি পাঠসেসো ৰুত্তো হোতি। পাকটং হোন্তঞ্হি আৰিভাৰে কতে হোতি। কেনচি অনাৰটন্তি কুট্টাদিনা যেন কেনচি অনাৰটং আৰরণৰিরহিতং। অপ্পটিচ্ছন্নন্তি উপরিতো অচ্ছাদিতং। তদেৰ অনাৰটত্তা ৰিৰটং। অপ্পটিচ্ছন্নত্তা পাকটং। তিরোভাৰন্তি অন্তরিতভাৰং করোতি। আৰটংযেৰ তেন আৰরণেন পিহিতং। পটিচ্ছন্নংযেৰ তেন পটিচ্ছাদনেন পটিকুজ্জিতং।

    11.Āvibhāvanti padaṃ nikkhipitvā kenaci anāvaṭaṃ hotīti vuttattā kenaci anāvaṭapadena āvibhāvapadassa pākaṭabhāvattho vutto. ‘‘Hotī’’ti padena ‘‘karotī’’ti pāṭhaseso vutto hoti. Pākaṭaṃ hontañhi āvibhāve kate hoti. Kenaci anāvaṭanti kuṭṭādinā yena kenaci anāvaṭaṃ āvaraṇavirahitaṃ. Appaṭicchannanti uparito acchāditaṃ. Tadeva anāvaṭattā vivaṭaṃ. Appaṭicchannattā pākaṭaṃ. Tirobhāvanti antaritabhāvaṃ karoti. Āvaṭaṃyeva tena āvaraṇena pihitaṃ. Paṭicchannaṃyeva tena paṭicchādanena paṭikujjitaṃ.

    আকাসকসিণসমাপত্তিযাতি পরিচ্ছেদাকাসকসিণে উপ্পাদিতায চতুত্থজ্ঝানসমাপত্তিযা। লাভীতি লাভো অস্স অত্থীতি লাভী। অপরিক্খিত্তেতি কেনচি সমন্ততো অপরিক্খিত্তে পদেসে। ইধ আকাসকসিণস্সেৰ ৰুত্তত্তা তত্থ ভাৰিতমেৰ ঝানং আকাসকরণস্স পচ্চযো হোতি, ন অঞ্ঞন্তি দট্ঠব্বং। উপরিআপোকসিণাদীসুপি তদারম্মণমেৰ ঝানং দট্ঠব্বং, ন অঞ্ঞং । পথৰিং আৰজ্জতি, উদকং আৰজ্জতি, আকাসং আৰজ্জতীতি পকতিপথৰীউদকআকাসে আৰজ্জতি। অন্তলিক্খেতি তস্স আকাসস্স পথৰিতো দূরাকাসভাৰং দীপেতি।

    Ākāsakasiṇasamāpattiyāti paricchedākāsakasiṇe uppāditāya catutthajjhānasamāpattiyā. Lābhīti lābho assa atthīti lābhī. Aparikkhitteti kenaci samantato aparikkhitte padese. Idha ākāsakasiṇasseva vuttattā tattha bhāvitameva jhānaṃ ākāsakaraṇassa paccayo hoti, na aññanti daṭṭhabbaṃ. Upariāpokasiṇādīsupi tadārammaṇameva jhānaṃ daṭṭhabbaṃ, na aññaṃ . Pathaviṃ āvajjati, udakaṃ āvajjati, ākāsaṃ āvajjatīti pakatipathavīudakaākāse āvajjati. Antalikkheti tassa ākāsassa pathavito dūrākāsabhāvaṃ dīpeti.

    ১২. চন্দিমসূরিযপরিমজ্জনে কসিণনিযমং অকত্ৰা ‘‘ইদ্ধিমা চেতোৰসিপ্পত্তো’’তি অৰিসেসেন ৰুত্তত্তা নত্থেত্থ কসিণসমাপত্তিনিযমোতি ৰেদিতব্বং। নিসিন্নকো ৰা নিপন্নকো ৰাতি নিসিন্নো ৰা নিপন্নো ৰা। ইমেহেৰ ইতরইরিযাপথদ্ৰযম্পি ৰুত্তমেৰ হোতি। হত্থপাসে হোতূতি হত্থসমীপে হোতু। হত্থপস্সে হোতূতিপি পাঠো। ইদং তথা কাতুকামস্স ৰসেন ৰুত্তং। অযং পন তত্থ গন্ত্ৰাপি হত্থং ৰড্ঢেত্ৰাপি আমসতি। আমসতীতি ঈসকং ফুসতি। পরামসতীতি বাল়্হং ফুসতি। পরিমজ্জতীতি সমন্ততো ফুসতি। রূপগতন্তি হত্থপাসে ঠিতরূপমেৰ।

    12. Candimasūriyaparimajjane kasiṇaniyamaṃ akatvā ‘‘iddhimā cetovasippatto’’ti avisesena vuttattā natthettha kasiṇasamāpattiniyamoti veditabbaṃ. Nisinnako vā nipannako vāti nisinno vā nipanno vā. Imeheva itarairiyāpathadvayampi vuttameva hoti. Hatthapāse hotūti hatthasamīpe hotu. Hatthapasse hotūtipi pāṭho. Idaṃ tathā kātukāmassa vasena vuttaṃ. Ayaṃ pana tattha gantvāpi hatthaṃ vaḍḍhetvāpi āmasati. Āmasatīti īsakaṃ phusati. Parāmasatīti bāḷhaṃ phusati. Parimajjatīti samantato phusati. Rūpagatanti hatthapāse ṭhitarūpameva.

    দূরেপি সন্তিকে অধিট্ঠাতীতি পাদকজ্ঝানতো ৰুট্ঠায দূরে দেৰলোকং ৰা ব্রহ্মলোকং ৰা আৰজ্জতি ‘‘সন্তিকে হোতূ’’তি। আৰজ্জিত্ৰা পরিকম্মং কত্ৰা পুন সমাপজ্জিত্ৰা ৰুট্ঠায ঞাণেন অধিট্ঠাতি ‘‘সন্তিকে হোতূ’’তি। সন্তিকে হোতি। এস নযো সেসপদেসুপি। ব্রহ্মলোকং পন গন্তুকামস্স দূরস্স সন্তিককরণং ৰত্ৰা ব্রহ্মলোকগমনস্স অনুপকারম্পি ইমায ইদ্ধিযা ইজ্ঝমানৰিসেসং দস্সেন্তো সন্তিকেপীতিআদিমাহ। তত্থ ন কেৰলং থোককরণবহুকরণমেৰ, ‘‘অমধুরং মধুর’’ন্তিআদীসুপি যং যং ইচ্ছতি, তং সব্বং ইদ্ধিমতো ইজ্ঝতি। অপরো নযো – দূরেপি সন্তিকে অধিট্ঠাতীতি দূরে ব্রহ্মলোকং ৰা মনুস্সলোকস্স সন্তিকে অধিট্ঠাতি। সন্তিকেপি দূরে অধিট্ঠাতীতি সন্তিকে মনুস্সলোকং ৰা দূরে ব্রহ্মলোকে অধিট্ঠাতি। বহুকম্পি থোকং অধিট্ঠাতীতি সচে ব্রহ্মানো বহূ সন্নিপতিতা হোন্তি, মহাঅত্তভাৰত্তা দস্সনূপচারং সৰনূপচারং পজহন্তি, দস্সনূপচারে চ সৰনূপচারে চ একজ্ঝং সঙ্খিপিত্ৰা বহুকম্পি থোকন্তি অধিট্ঠাতি। থোকম্পি বহুকং অধিট্ঠাতীতি সচে মহাপরিৰারেন গন্তুকামো হোতি, এককত্তা থোকং অত্তানং বহুকং অধিট্ঠহিত্ৰা মহাপরিৰারো গচ্ছতীতি এৰমেত্থ অত্থো দট্ঠব্বো। এৰং সতি চতুব্বিধম্পি তং ব্রহ্মলোকগমনে উপকারো হোতি।

    Dūrepi santike adhiṭṭhātīti pādakajjhānato vuṭṭhāya dūre devalokaṃ vā brahmalokaṃ vā āvajjati ‘‘santike hotū’’ti. Āvajjitvā parikammaṃ katvā puna samāpajjitvā vuṭṭhāya ñāṇena adhiṭṭhāti ‘‘santike hotū’’ti. Santike hoti. Esa nayo sesapadesupi. Brahmalokaṃ pana gantukāmassa dūrassa santikakaraṇaṃ vatvā brahmalokagamanassa anupakārampi imāya iddhiyā ijjhamānavisesaṃ dassento santikepītiādimāha. Tattha na kevalaṃ thokakaraṇabahukaraṇameva, ‘‘amadhuraṃ madhura’’ntiādīsupi yaṃ yaṃ icchati, taṃ sabbaṃ iddhimato ijjhati. Aparo nayo – dūrepi santike adhiṭṭhātīti dūre brahmalokaṃ vā manussalokassa santike adhiṭṭhāti. Santikepi dūre adhiṭṭhātīti santike manussalokaṃ vā dūre brahmaloke adhiṭṭhāti. Bahukampi thokaṃ adhiṭṭhātīti sace brahmāno bahū sannipatitā honti, mahāattabhāvattā dassanūpacāraṃ savanūpacāraṃ pajahanti, dassanūpacāre ca savanūpacāre ca ekajjhaṃ saṅkhipitvā bahukampi thokanti adhiṭṭhāti. Thokampi bahukaṃ adhiṭṭhātīti sace mahāparivārena gantukāmo hoti, ekakattā thokaṃ attānaṃ bahukaṃ adhiṭṭhahitvā mahāparivāro gacchatīti evamettha attho daṭṭhabbo. Evaṃ sati catubbidhampi taṃ brahmalokagamane upakāro hoti.

    দিব্বেন চক্খুনা তস্স ব্রহ্মুনো রূপং পস্সতীতি ইধ ঠিতো আলোকং ৰড্ঢেত্ৰা যস্স ব্রহ্মুনো রূপং দট্ঠুকামো, দিব্বেন চক্খুনা তস্স ব্রহ্মুনো রূপং পস্সতি। ইধেৰ ঠিতো দিব্বায সোতধাতুযা তস্স ব্রহ্মুনো ভাসমানস্স সদ্দং সুণাতি। চেতোপরিযঞাণেন তস্স ব্রহ্মুনো চিত্তং পজানাতি। দিস্সমানেনাতি চক্খুনা পেক্খিযমানেন। কাযৰসেন চিত্তং পরিণামেতীতি রূপকাযস্স ৰসেন চিত্তং পরিণামেতি। পাদকজ্ঝানচিত্তং গহেত্ৰা কাযে আরোপেতি, কাযানুগতিকং করোতি দন্ধগমনং। কাযগমনঞ্হি দন্ধং হোতি। অধিট্ঠাতীতি তস্সেৰ ৰেৰচনং, সন্নিট্ঠাপেতীতি অত্থো। সুখসঞ্ঞঞ্চ লহুসঞ্ঞঞ্চ ওক্কমিত্ৰাতি পাদকজ্ঝানারম্মণেন ইদ্ধিচিত্তেন সহজাতং সুখসঞ্ঞঞ্চ লহুসঞ্ঞঞ্চ ওক্কমিত্ৰা পৰিসিত্ৰা ফুসিত্ৰা পাপুণিত্ৰা। সুখসঞ্ঞা চ নাম উপেক্খাসম্পযুত্তসঞ্ঞা। উপেক্খা হি সন্তং সুখন্তি ৰুত্তা, সাযেৰ সঞ্ঞা নীৰরণেহি চেৰ ৰিতক্কাদিপচ্চনীকেহি চ ৰিমুত্তত্তা লহুসঞ্ঞাতিপি ৰেদিতব্বা। তং ওক্কন্তস্স পনস্স করজকাযোপি তূলপিচু ৰিয সল্লহুকো হোতি। সো এৰং ৰাতক্খিত্ততূলপিচুনা ৰিয সল্লহুকেন দিস্সমানেন কাযেন ব্রহ্মলোকং গচ্ছতি। এৰং গচ্ছন্তো চ সচে ইচ্ছতি, পথৰীকসিণৰসেন আকাসে মগ্গং নিম্মিনিত্ৰা পদসা গচ্ছতি। সচে ইচ্ছতি, আকাসে পথৰীকসিণৰসেনেৰ পদে পদে পদুমং নিম্মিনিত্ৰা পদুমে পদুমে পদং নিক্খিপন্তো পদসা গচ্ছতি। সচে ইচ্ছতি, ৰাযোকসিণৰসেন ৰাতং অধিট্ঠহিত্ৰা তূলপিচু ৰিয ৰাযুনা গচ্ছতি। অপিচ গন্তুকামতাৰ এত্থ পমাণং। সতি হি গন্তুকামতায এৰংকতচিত্তাধিট্ঠানো অধিট্ঠানৰেগক্খিত্তোৰ সো জিযাৰেগক্খিত্তো সরো ৰিয দিস্সমানো গচ্ছতি।

    Dibbena cakkhunā tassa brahmuno rūpaṃ passatīti idha ṭhito ālokaṃ vaḍḍhetvā yassa brahmuno rūpaṃ daṭṭhukāmo, dibbena cakkhunā tassa brahmuno rūpaṃ passati. Idheva ṭhito dibbāya sotadhātuyā tassa brahmuno bhāsamānassa saddaṃ suṇāti. Cetopariyañāṇena tassa brahmuno cittaṃ pajānāti. Dissamānenāti cakkhunā pekkhiyamānena. Kāyavasena cittaṃ pariṇāmetīti rūpakāyassa vasena cittaṃ pariṇāmeti. Pādakajjhānacittaṃ gahetvā kāye āropeti, kāyānugatikaṃ karoti dandhagamanaṃ. Kāyagamanañhi dandhaṃ hoti. Adhiṭṭhātīti tasseva vevacanaṃ, sanniṭṭhāpetīti attho. Sukhasaññañca lahusaññañca okkamitvāti pādakajjhānārammaṇena iddhicittena sahajātaṃ sukhasaññañca lahusaññañca okkamitvā pavisitvā phusitvā pāpuṇitvā. Sukhasaññā ca nāma upekkhāsampayuttasaññā. Upekkhā hi santaṃ sukhanti vuttā, sāyeva saññā nīvaraṇehi ceva vitakkādipaccanīkehi ca vimuttattā lahusaññātipi veditabbā. Taṃ okkantassa panassa karajakāyopi tūlapicu viya sallahuko hoti. So evaṃ vātakkhittatūlapicunā viya sallahukena dissamānena kāyena brahmalokaṃ gacchati. Evaṃ gacchanto ca sace icchati, pathavīkasiṇavasena ākāse maggaṃ nimminitvā padasā gacchati. Sace icchati, ākāse pathavīkasiṇavaseneva pade pade padumaṃ nimminitvā padume padume padaṃ nikkhipanto padasā gacchati. Sace icchati, vāyokasiṇavasena vātaṃ adhiṭṭhahitvā tūlapicu viya vāyunā gacchati. Apica gantukāmatāva ettha pamāṇaṃ. Sati hi gantukāmatāya evaṃkatacittādhiṭṭhāno adhiṭṭhānavegakkhittova so jiyāvegakkhitto saro viya dissamāno gacchati.

    চিত্তৰসেন কাযং পরিণামেতীতি করজকাযং গহেত্ৰা পাদকজ্ঝানচিত্তে আরোপেতি, চিত্তানুগতিকং করোতি সীঘগমনং। চিত্তগমনঞ্হি সীঘং হোতি। সুখসঞ্ঞঞ্চ লহুসঞ্ঞঞ্চ ওক্কমিত্ৰাতি রূপকাযারম্মণেন ইদ্ধিচিত্তেন সহজাতং সুখসঞ্ঞঞ্চ লহুসঞ্ঞঞ্চ। সেসং ৰুত্তনযেনেৰ ৰেদিতব্বং। ইদং পন চিত্তগমনমেৰ হোতি। এৰং অদিস্সমানেন কাযেন গচ্ছন্তো পনাযং কিং তস্সাধিট্ঠানচিত্তস্স উপ্পাদক্খণে গচ্ছতি? উদাহু ঠিতিক্খণে ভঙ্গক্খণে ৰাতি ৰুত্তে ‘‘তীসুপি খণেসু গচ্ছতী’’তি থেরো আহ। কিং পন সো সযং গচ্ছতি, নিম্মিতং পেসেতীতি? যথারুচি করোতি। ইধ পনস্স সযং গমনমেৰ আগতং।

    Cittavasena kāyaṃ pariṇāmetīti karajakāyaṃ gahetvā pādakajjhānacitte āropeti, cittānugatikaṃ karoti sīghagamanaṃ. Cittagamanañhi sīghaṃ hoti. Sukhasaññañca lahusaññañca okkamitvāti rūpakāyārammaṇena iddhicittena sahajātaṃ sukhasaññañca lahusaññañca. Sesaṃ vuttanayeneva veditabbaṃ. Idaṃ pana cittagamanameva hoti. Evaṃ adissamānena kāyena gacchanto panāyaṃ kiṃ tassādhiṭṭhānacittassa uppādakkhaṇe gacchati? Udāhu ṭhitikkhaṇe bhaṅgakkhaṇe vāti vutte ‘‘tīsupi khaṇesu gacchatī’’ti thero āha. Kiṃ pana so sayaṃ gacchati, nimmitaṃ pesetīti? Yathāruci karoti. Idha panassa sayaṃ gamanameva āgataṃ.

    মনোমযন্তি অধিট্ঠানমনেন নিম্মিতত্তা মনোমযং। সব্বঙ্গপচ্চঙ্গন্তি সব্বঅঙ্গপচ্চঙ্গৰন্তং। অহীনিন্দ্রিযন্তি ইদং চক্খুসোতাদীনং সণ্ঠানৰসেন ৰুত্তং, নিম্মিতরূপে পন পসাদো নাম নত্থি। সচে সো ইদ্ধিমা চঙ্কমতি, নিম্মিতোপি তত্থ চঙ্কমতীতিআদি সব্বং সাৰকনিম্মিতং সন্ধায ৰুত্তং। বুদ্ধনিম্মিতা পন যং যং ভগৰা করোতি, তং তম্পি করোন্তি, ভগৰতো চিত্তৰসেন অঞ্ঞম্পি করোন্তীতি। ধূমাযতি পজ্জলতীতি তেজোকসিণৰসেন। ধম্মং ভাসতীতিআদীনি তীণি অনিযমেত্ৰা ৰুত্তানি। সন্তিট্ঠতীতি সঙ্গম্ম তিট্ঠতি। সল্লপতীতি সঙ্গম্ম লপতি। সাকচ্ছং সমাপজ্জতীতি অঞ্ঞমঞ্ঞস্স উত্তরপচ্চুত্তরদানৰসেন সংকথং করোতি। এত্থ চ যং সো ইদ্ধিমা ইধেৰ ঠিতো দিব্বেন চক্খুনা রূপং পস্সতি, দিব্বায সোতধাতুযা সদ্দং সুণাতি, চেতোপরিযঞাণেন চিত্তং পজানাতি, যম্পি সো ইধেৰ ঠিতো তেন ব্রহ্মুনা সদ্ধিং সন্তিট্ঠতি , সল্লপতি, সাকচ্ছং সমাপজ্জতি, যম্পিস্স ‘‘দূরেপি সন্তিকে অধিট্ঠাতী’’তিআদিকং অধিট্ঠানং, যম্পি সো দিস্সমানেন ৰা অদিস্সমানেন ৰা কাযেন ব্রহ্মলোকং গচ্ছতি, এত্তাৰতা ন কাযেন ৰসং ৰত্তেতি। যঞ্চ খো ‘‘সো তস্স ব্রহ্মুনো পুরতো রূপিং অভিনিম্মিনাতী’’তিআদিনা নযেন ৰুত্তৰিধানং আপজ্জতি, এত্তাৰতা কাযেন ৰসং ৰত্তেতি নাম। সেসং পন কাযেন ৰসৰত্তনায পুব্বভাগদস্সনত্থং ৰুত্তন্তি। অযং তাৰ অধিট্ঠানা ইদ্ধি।

    Manomayanti adhiṭṭhānamanena nimmitattā manomayaṃ. Sabbaṅgapaccaṅganti sabbaaṅgapaccaṅgavantaṃ. Ahīnindriyanti idaṃ cakkhusotādīnaṃ saṇṭhānavasena vuttaṃ, nimmitarūpe pana pasādo nāma natthi. Sace so iddhimā caṅkamati, nimmitopi tattha caṅkamatītiādi sabbaṃ sāvakanimmitaṃ sandhāya vuttaṃ. Buddhanimmitā pana yaṃ yaṃ bhagavā karoti, taṃ tampi karonti, bhagavato cittavasena aññampi karontīti. Dhūmāyati pajjalatīti tejokasiṇavasena. Dhammaṃ bhāsatītiādīni tīṇi aniyametvā vuttāni. Santiṭṭhatīti saṅgamma tiṭṭhati. Sallapatīti saṅgamma lapati. Sākacchaṃ samāpajjatīti aññamaññassa uttarapaccuttaradānavasena saṃkathaṃ karoti. Ettha ca yaṃ so iddhimā idheva ṭhito dibbena cakkhunā rūpaṃ passati, dibbāya sotadhātuyā saddaṃ suṇāti, cetopariyañāṇena cittaṃ pajānāti, yampi so idheva ṭhito tena brahmunā saddhiṃ santiṭṭhati , sallapati, sākacchaṃ samāpajjati, yampissa ‘‘dūrepi santike adhiṭṭhātī’’tiādikaṃ adhiṭṭhānaṃ, yampi so dissamānena vā adissamānena vā kāyena brahmalokaṃ gacchati, ettāvatā na kāyena vasaṃ vatteti. Yañca kho ‘‘so tassa brahmuno purato rūpiṃ abhinimminātī’’tiādinā nayena vuttavidhānaṃ āpajjati, ettāvatā kāyena vasaṃ vatteti nāma. Sesaṃ pana kāyena vasavattanāya pubbabhāgadassanatthaṃ vuttanti. Ayaṃ tāva adhiṭṭhānā iddhi.

    ১৩. ৰিকুব্বনিদ্ধিনিদ্দেসে সিখিস্স ভগৰতো সাৰকনিদস্সনং ৰিকুব্বনিদ্ধিযা কাযসক্খিপুগ্গলদস্সনত্থং ৰুত্তং। তম্পি দস্সেন্তো পঠমং তাৰ ব্রহ্মলোকে ঠিতো সহস্সিলোকধাতুং সরেন ৰিঞ্ঞাপেসীতি অতিৰিয অচ্ছরিযঅব্ভুতভূতং সহস্সিলোকধাতুযা সদ্দসৰনং অধিট্ঠানিদ্ধিং দস্সেসি। ইদানি তস্স ৰত্থুস্স পরিদীপনত্থমিদং ৰুচ্চতি – ইমস্মা হি কপ্পা একতিংসে কপ্পে সিখী ভগৰা অনন্তরজাতিযা তুসিতপুরতো চৰিত্ৰা অরুণৰতীনগরে অরুণৰতো রঞ্ঞো পভাৰতিযা নাম মহেসিযা কুচ্ছিস্মিং নিব্বত্তিত্ৰা পরিপক্কঞাণো মহাভিনিক্খমনং নিক্খমিত্ৰা বোধিমণ্ডে সব্বঞ্ঞুতঞ্ঞাণং পটিৰিজ্ঝিত্ৰা পৰত্তৰরধম্মচক্কো অরুণৰতিং নিস্সায ৰিহরন্তো একদিৰসং পাতোৰ সরীরপটিজগ্গনং কত্ৰা মহাভিক্খুসঙ্ঘপরিৰারো ‘‘অরুণৰতিং পিণ্ডায পৰিসিস্সামী’’তি নিক্খমিত্ৰা ৰিহারদ্ৰারকোট্ঠকসমীপে ঠিতো অভিভুং নাম অগ্গসাৰকং আমন্তেসি – ‘‘অতিপ্পগো খো, ভিক্খু, অরুণৰতিং পিণ্ডায পৰিসিতুং। যেন অঞ্ঞতরো ব্রহ্মলোকো তেনুপসঙ্কমিস্সামা’’তি। যথাহ –

    13. Vikubbaniddhiniddese sikhissa bhagavato sāvakanidassanaṃ vikubbaniddhiyā kāyasakkhipuggaladassanatthaṃ vuttaṃ. Tampi dassento paṭhamaṃ tāva brahmaloke ṭhito sahassilokadhātuṃ sarena viññāpesīti ativiya acchariyaabbhutabhūtaṃ sahassilokadhātuyā saddasavanaṃ adhiṭṭhāniddhiṃ dassesi. Idāni tassa vatthussa paridīpanatthamidaṃ vuccati – imasmā hi kappā ekatiṃse kappe sikhī bhagavā anantarajātiyā tusitapurato cavitvā aruṇavatīnagare aruṇavato rañño pabhāvatiyā nāma mahesiyā kucchismiṃ nibbattitvā paripakkañāṇo mahābhinikkhamanaṃ nikkhamitvā bodhimaṇḍe sabbaññutaññāṇaṃ paṭivijjhitvā pavattavaradhammacakko aruṇavatiṃ nissāya viharanto ekadivasaṃ pātova sarīrapaṭijagganaṃ katvā mahābhikkhusaṅghaparivāro ‘‘aruṇavatiṃ piṇḍāya pavisissāmī’’ti nikkhamitvā vihāradvārakoṭṭhakasamīpe ṭhito abhibhuṃ nāma aggasāvakaṃ āmantesi – ‘‘atippago kho, bhikkhu, aruṇavatiṃ piṇḍāya pavisituṃ. Yena aññataro brahmaloko tenupasaṅkamissāmā’’ti. Yathāha –

    ‘‘অথ খো, ভিক্খৰে, সিখী ভগৰা অরহং সম্মাসম্বুদ্ধো অভিভুং ভিক্খুং আমন্তেসি – ‘আযাম, ব্রাহ্মণ, যেন অঞ্ঞতরো ব্রহ্মলোকো, তেনুপসঙ্কমিস্সাম যাৰ ভত্তস্স কালো ভৰিস্সতী’তি। ‘এৰং ভন্তে’তি খো, ভিক্খৰে, অভিভূ ভিক্খু সিখিস্স ভগৰতো অরহতো সম্মাসম্বুদ্ধস্স পচ্চস্সোসি। অথ খো, ভিক্খৰে, সিখী চ ভগৰা অভিভূ চ ভিক্খু যেন অঞ্ঞতরো ব্রহ্মলোকো, তেনুপসঙ্কমিংসূ’’তি (সং॰ নি॰ ১.১৮৫)।

    ‘‘Atha kho, bhikkhave, sikhī bhagavā arahaṃ sammāsambuddho abhibhuṃ bhikkhuṃ āmantesi – ‘āyāma, brāhmaṇa, yena aññataro brahmaloko, tenupasaṅkamissāma yāva bhattassa kālo bhavissatī’ti. ‘Evaṃ bhante’ti kho, bhikkhave, abhibhū bhikkhu sikhissa bhagavato arahato sammāsambuddhassa paccassosi. Atha kho, bhikkhave, sikhī ca bhagavā abhibhū ca bhikkhu yena aññataro brahmaloko, tenupasaṅkamiṃsū’’ti (saṃ. ni. 1.185).

    তত্থ মহাব্রহ্মা সম্মাসম্বুদ্ধং দিস্ৰা অত্তমনো পচ্চুগ্গমনং কত্ৰা ব্রহ্মাসনং পঞ্ঞাপেত্ৰা অদাসি। থেরস্সাপি অনুচ্ছৰিকং আসনং পঞ্ঞাপযিংসু। নিসীদি ভগৰা পঞ্ঞত্তে আসনে, থেরোপি অত্তনো পত্তাসনে নিসীদি। মহাব্রহ্মাপি দসবলং ৰন্দিত্ৰা একমন্তং নিসীদি। তেনাহ – অথ খো, ভিক্খৰে, সিখী ভগৰা অরহং সম্মাসম্বুদ্ধো অভিভুং ভিক্খুং আমন্তেসি – ‘‘পটিভাতু, ব্রাহ্মণ, তং ব্রহ্মুনো চ ব্রহ্মপরিসায চ ব্রহ্মপারিসজ্জানঞ্চ ধম্মী কথা’’তি। ‘‘এৰং, ভন্তে’’তি খো, ভিক্খৰে, অভিভূ ভিক্খু সিখিস্স ভগৰতো অরহতো সম্মাসম্বুদ্ধস্স পটিস্সুণিত্ৰা ব্রহ্মুনো চ ব্রহ্মপরিসায চ ব্রহ্মপারিসজ্জানঞ্চ ধম্মকথং কথেসি। থেরে ধম্মকথং কথেন্তে ব্রহ্মানো উজ্ঝাযিংসু ‘‘চিরস্সঞ্চ মযং সত্থু ব্রহ্মলোকাগমনং লভিম্হা, অযঞ্চ ভিক্খু ঠপেত্ৰা সত্থারং সযং ধম্মকথং আরভী’’তি। সত্থা তেসং অনত্তমনভাৰং ঞত্ৰা অভিভুং ভিক্খুং এতদৰোচ – ‘‘উজ্ঝাযন্তি খো তে, ব্রাহ্মণ, ব্রহ্মা চ ব্রহ্মপরিসা চ ব্রহ্মপারিসজ্জা চ। তেন হি, ত্ৰং ব্রাহ্মণ, ভিয্যোসো মত্তায সংৰেজেহী’’তি। থেরো সত্থু ৰচনং সম্পটিচ্ছিত্ৰা অনেকৰিহিতং ইদ্ধিৰিকুব্বনং কত্ৰা সহস্সিলোকধাতুং সরেন ৰিঞ্ঞাপেন্তো –

    Tattha mahābrahmā sammāsambuddhaṃ disvā attamano paccuggamanaṃ katvā brahmāsanaṃ paññāpetvā adāsi. Therassāpi anucchavikaṃ āsanaṃ paññāpayiṃsu. Nisīdi bhagavā paññatte āsane, theropi attano pattāsane nisīdi. Mahābrahmāpi dasabalaṃ vanditvā ekamantaṃ nisīdi. Tenāha – atha kho, bhikkhave, sikhī bhagavā arahaṃ sammāsambuddho abhibhuṃ bhikkhuṃ āmantesi – ‘‘paṭibhātu, brāhmaṇa, taṃ brahmuno ca brahmaparisāya ca brahmapārisajjānañca dhammī kathā’’ti. ‘‘Evaṃ, bhante’’ti kho, bhikkhave, abhibhū bhikkhu sikhissa bhagavato arahato sammāsambuddhassa paṭissuṇitvā brahmuno ca brahmaparisāya ca brahmapārisajjānañca dhammakathaṃ kathesi. There dhammakathaṃ kathente brahmāno ujjhāyiṃsu ‘‘cirassañca mayaṃ satthu brahmalokāgamanaṃ labhimhā, ayañca bhikkhu ṭhapetvā satthāraṃ sayaṃ dhammakathaṃ ārabhī’’ti. Satthā tesaṃ anattamanabhāvaṃ ñatvā abhibhuṃ bhikkhuṃ etadavoca – ‘‘ujjhāyanti kho te, brāhmaṇa, brahmā ca brahmaparisā ca brahmapārisajjā ca. Tena hi, tvaṃ brāhmaṇa, bhiyyoso mattāya saṃvejehī’’ti. Thero satthu vacanaṃ sampaṭicchitvā anekavihitaṃ iddhivikubbanaṃ katvā sahassilokadhātuṃ sarena viññāpento –

    ‘‘আরম্ভথ নিক্কমথ, যুঞ্জথ বুদ্ধসাসনে।

    ‘‘Ārambhatha nikkamatha, yuñjatha buddhasāsane;

    ধুনাথ মচ্চুনো সেনং, নল়াগারংৰ কুঞ্জরো॥

    Dhunātha maccuno senaṃ, naḷāgāraṃva kuñjaro.

    ‘‘যো ইমস্মিং ধম্মৰিনযে, অপ্পমত্তো ৰিহস্সতি।

    ‘‘Yo imasmiṃ dhammavinaye, appamatto vihassati;

    পহায জাতিসংসারং, দুক্খস্সন্তং করিস্সতী’’তি॥ (অ॰ নি॰ ১.১৮৫) –

    Pahāya jātisaṃsāraṃ, dukkhassantaṃ karissatī’’ti. (a. ni. 1.185) –

    ইমং গাথাদ্ৰযং অভাসি।

    Imaṃ gāthādvayaṃ abhāsi.

    কিং পন কত্ৰা থেরো সহস্সিলোকধাতুং সরেন ৰিঞ্ঞাপেসীতি? নীলকসিণং তাৰ সমাপজ্জিত্ৰা ৰুট্ঠায অভিঞ্ঞাঞাণেন চক্কৰাল়সহস্সে সব্বত্থ অন্ধকারং ফরি। ততো ‘‘কিমিদং অন্ধকার’’ন্তি সত্তানং আভোগে উপ্পন্নে আলোককসিণং সমাপজ্জিত্ৰা ৰুট্ঠায আলোকং দস্সেসি। ‘‘কিং আলোকো অয’’ন্তি ৰিচিনন্তানং অত্তানং দস্সেসি। চক্কৰাল়সহস্সে চ দেৰমনুস্সা অঞ্জলিং পগ্গণ্হিত্ৰা থেরংযেৰ নমস্সমানা অট্ঠংসু। থেরো ‘‘মহাজনো ময্হং ধম্মং দেসেন্তস্স সদ্দং সুণাতূ’’তি ইমা গাথা অভাসি। সব্বে ওসটায পরিসায মজ্ঝে নিসীদিত্ৰা ধম্মং দেসেন্তস্স ৰিয সদ্দং অস্সোসুং। অত্থোপি তেসং পাকটো অহোসি। তং ৰিঞ্ঞাপনং সন্ধায ‘‘সরেন ৰিঞ্ঞাপেসী’’তি ৰুত্তং। তেন কতং অনেকৰিহিতং ইদ্ধিৰিকুব্বনং সন্ধায পুন সো দিস্সমানেনপীতিআদি ৰুত্তং। তত্থ ধম্মং দেসেসীতি পঠমং ৰুত্তপ্পকারং ইদ্ধিৰিকুব্বনং দস্সেন্তো ধম্মং দেসেসি, ততো যথাৰুত্তক্কমেন দ্ৰে গাথা ভাসন্তো সরেন ৰিঞ্ঞাপেসীতি ৰেদিতব্বং। দিস্সমানেনপি কাযেনাতিআদীসু চ ইত্থংভূতলক্খণে করণৰচনং, এৰংভূতকাযো হুত্ৰাতি অত্থো।

    Kiṃ pana katvā thero sahassilokadhātuṃ sarena viññāpesīti? Nīlakasiṇaṃ tāva samāpajjitvā vuṭṭhāya abhiññāñāṇena cakkavāḷasahasse sabbattha andhakāraṃ phari. Tato ‘‘kimidaṃ andhakāra’’nti sattānaṃ ābhoge uppanne ālokakasiṇaṃ samāpajjitvā vuṭṭhāya ālokaṃ dassesi. ‘‘Kiṃ āloko aya’’nti vicinantānaṃ attānaṃ dassesi. Cakkavāḷasahasse ca devamanussā añjaliṃ paggaṇhitvā theraṃyeva namassamānā aṭṭhaṃsu. Thero ‘‘mahājano mayhaṃ dhammaṃ desentassa saddaṃ suṇātū’’ti imā gāthā abhāsi. Sabbe osaṭāya parisāya majjhe nisīditvā dhammaṃ desentassa viya saddaṃ assosuṃ. Atthopi tesaṃ pākaṭo ahosi. Taṃ viññāpanaṃ sandhāya ‘‘sarena viññāpesī’’ti vuttaṃ. Tena kataṃ anekavihitaṃ iddhivikubbanaṃ sandhāya puna so dissamānenapītiādi vuttaṃ. Tattha dhammaṃ desesīti paṭhamaṃ vuttappakāraṃ iddhivikubbanaṃ dassento dhammaṃ desesi, tato yathāvuttakkamena dve gāthā bhāsanto sarena viññāpesīti veditabbaṃ. Dissamānenapi kāyenātiādīsu ca itthaṃbhūtalakkhaṇe karaṇavacanaṃ, evaṃbhūtakāyo hutvāti attho.

    ইদানি তং ৰত্থুং দস্সেত্ৰা অঞ্ঞস্সাপি ইদ্ধিমতো ৰিকুব্বনিদ্ধিকরণৰিধানং দস্সেন্তো সো পকতিৰণ্ণং ৰিজহিত্ৰাতিআদিমাহ। তত্থ সোতি হেট্ঠা ৰুত্তৰিধানেন মুদুকম্মঞ্ঞকতচিত্তো সো ইদ্ধিমা ভিক্খু। সচে ৰিকুব্বনিদ্ধিং কাতুকামো হোতি, অত্তনো পকতিৰণ্ণং পকতিসণ্ঠানং ৰিজহিত্ৰা কুমারকৰণ্ণং ৰা দস্সেতি। কথং? পথৰীকসিণারম্মণাভিঞ্ঞাপাদকচতুত্থজ্ঝানতো ৰুট্ঠায ‘‘এৰরূপো কুমারকো হোমী’’তি নিম্মিনিতব্বং কুমারকৰণ্ণং আৰজ্জিত্ৰা কতপরিকম্মাৰসানে পুন সমাপজ্জিত্ৰা ৰুট্ঠায ‘‘এৰরূপো নাম কুমারকো হোমী’’তি অভিঞ্ঞাঞাণেন অধিট্ঠাতি, সহ অধিট্ঠানেন কুমারকো হোতীতি। ৰিসুদ্ধিমগ্গে (ৰিসুদ্ধি॰ ১.১০০) কসিণনিদ্দেসে ‘‘পথৰীকসিণৰসেন একোপি হুত্ৰা বহুধা হোতীতিআদিভাৰো…পে॰… এৰমাদীনি ইজ্ঝন্তী’’তি ৰচনেন ইধ পথৰীকসিণারম্মণং পাদকজ্ঝানং যুজ্জতি। তত্থেৰ পন অভিঞ্ঞানিদ্দেসে ৰিকুব্বনিদ্ধিযা ‘‘পথৰীকসিণাদীসু অঞ্ঞতরারম্মণতো অভিঞ্ঞাপাদকজ্ঝানতো ৰুট্ঠাযা’’তি ৰুত্তং, তত্থেৰ (ৰিসুদ্ধি॰ ২.৩৯৮) চ ‘‘অত্তনো কুমারকৰণ্ণো আৰজ্জিতব্বো’’তি ৰুত্তং, তং নাগাদিনিম্মানে ন যুজ্জতি ৰিয। নাগৰণ্ণাদিনিম্মানেপি এসেৰ নযো।

    Idāni taṃ vatthuṃ dassetvā aññassāpi iddhimato vikubbaniddhikaraṇavidhānaṃ dassento so pakativaṇṇaṃ vijahitvātiādimāha. Tattha soti heṭṭhā vuttavidhānena mudukammaññakatacitto so iddhimā bhikkhu. Sace vikubbaniddhiṃ kātukāmo hoti, attano pakativaṇṇaṃ pakatisaṇṭhānaṃ vijahitvā kumārakavaṇṇaṃ vā dasseti. Kathaṃ? Pathavīkasiṇārammaṇābhiññāpādakacatutthajjhānato vuṭṭhāya ‘‘evarūpo kumārako homī’’ti nimminitabbaṃ kumārakavaṇṇaṃ āvajjitvā kataparikammāvasāne puna samāpajjitvā vuṭṭhāya ‘‘evarūpo nāma kumārako homī’’ti abhiññāñāṇena adhiṭṭhāti, saha adhiṭṭhānena kumārako hotīti. Visuddhimagge (visuddhi. 1.100) kasiṇaniddese ‘‘pathavīkasiṇavasena ekopi hutvā bahudhā hotītiādibhāvo…pe… evamādīni ijjhantī’’ti vacanena idha pathavīkasiṇārammaṇaṃ pādakajjhānaṃ yujjati. Tattheva pana abhiññāniddese vikubbaniddhiyā ‘‘pathavīkasiṇādīsu aññatarārammaṇato abhiññāpādakajjhānato vuṭṭhāyā’’ti vuttaṃ, tattheva (visuddhi. 2.398) ca ‘‘attano kumārakavaṇṇo āvajjitabbo’’ti vuttaṃ, taṃ nāgādinimmāne na yujjati viya. Nāgavaṇṇādinimmānepi eseva nayo.

    তত্থ নাগৰণ্ণন্তি সপ্পসণ্ঠানং। সুপণ্ণৰণ্ণন্তি গরুল়সণ্ঠানং। ইন্দৰণ্ণন্তি সক্কসণ্ঠানং। দেৰৰণ্ণন্তি সেসদেৰসণ্ঠানং। সমুদ্দৰণ্ণং পন আপোকসিণৰসেন ইজ্ঝতি। পত্তিন্তি পদাতিং। ৰিৰিধম্পি সেনাব্যূহন্তি হত্থিআদীনং ৰসেন অনেকৰিহিতং সেনাসমূহং। ৰিসুদ্ধিমগ্গে পন ‘‘হত্থিম্পি দস্সেতীতিআদি পনেত্থ বহিদ্ধাপি হত্থিআদিদস্সনৰসেন ৰুত্তং। তত্থ ‘হত্থী হোমী’তি অনধিট্ঠহিত্ৰা ‘হত্থী হোতূ’তি অধিট্ঠাতব্বং। অস্সাদীসুপি এসেৰ নযো’’তি ৰুত্তং, তং ‘‘পকতিৰণ্ণং ৰিজহিত্ৰা’’তি ৰুত্তমূলপদেন চ ৰিকুব্বনিদ্ধিভাৰেন চ ৰিরুজ্ঝতি। পাল়িযং ৰুত্তক্কমেন হি পকতিৰণ্ণং অৰিজহিত্ৰা অধিট্ঠানৰসেন অঞ্ঞস্স দস্সনং অধিট্ঠানিদ্ধি নাম, পকতিৰণ্ণং ৰিজহিত্ৰা অধিট্ঠানৰসেন অত্তনো অঞ্ঞথাদস্সনং ৰিকুব্বনিদ্ধি নাম।

    Tattha nāgavaṇṇanti sappasaṇṭhānaṃ. Supaṇṇavaṇṇanti garuḷasaṇṭhānaṃ. Indavaṇṇanti sakkasaṇṭhānaṃ. Devavaṇṇanti sesadevasaṇṭhānaṃ. Samuddavaṇṇaṃ pana āpokasiṇavasena ijjhati. Pattinti padātiṃ. Vividhampi senābyūhanti hatthiādīnaṃ vasena anekavihitaṃ senāsamūhaṃ. Visuddhimagge pana ‘‘hatthimpi dassetītiādi panettha bahiddhāpi hatthiādidassanavasena vuttaṃ. Tattha ‘hatthī homī’ti anadhiṭṭhahitvā ‘hatthī hotū’ti adhiṭṭhātabbaṃ. Assādīsupi eseva nayo’’ti vuttaṃ, taṃ ‘‘pakativaṇṇaṃ vijahitvā’’ti vuttamūlapadena ca vikubbaniddhibhāvena ca virujjhati. Pāḷiyaṃ vuttakkamena hi pakativaṇṇaṃ avijahitvā adhiṭṭhānavasena aññassa dassanaṃ adhiṭṭhāniddhi nāma, pakativaṇṇaṃ vijahitvā adhiṭṭhānavasena attano aññathādassanaṃ vikubbaniddhi nāma.

    ১৪. মনোমযিদ্ধিঞাণনিদ্দেসে ইমম্হা কাযা অঞ্ঞং কাযং অভিনিম্মিনাতীতিআদীসু ইদ্ধিমা ভিক্খু মনোমযিদ্ধিং কাতুকামো আকাসকসিণারম্মণপাদকজ্ঝানতো ৰুট্ঠায অত্তনো রূপকাযং তাৰ আৰজ্জিত্ৰা ৰুত্তনযেনেৰ ‘‘সুসিরো হোতূ’’তি অধিট্ঠাতি, সুসিরো হোতি । অথ তস্স অব্ভন্তরে পথৰীকসিণৰসেন অঞ্ঞং কাযং আৰজ্জিত্ৰা পরিকম্মং কত্ৰা ৰুত্তনযেনেৰ অধিট্ঠাতি, তস্স অব্ভন্তরে অঞ্ঞো কাযো হোতি। সো তং মুখতো অব্বূহিত্ৰা বহি ঠপেতি। ইদানি তমত্থং উপমাহি পকাসেন্তো সেয্যথাপীতিআদিমাহ। তত্থ মুঞ্জম্হাতি মুঞ্জতিণম্হা। ঈসিকং পৰাহেয্যাতি কল়ীরং লুঞ্চেয্য। কোসিযাতি কোসকতো। করণ্ডাতি করণ্ডায, পুরাণতচকঞ্চুকতোতি অত্থো। তত্থ চ উদ্ধরেয্যাতি চিত্তেনেৰস্স উদ্ধরণং ৰেদিতব্বং। অযঞ্হি অহি নাম সজাতিযং ঠিতো, কট্ঠন্তরং ৰা রুক্খন্তরং ৰা নিস্সায, তচতো সরীরং নিক্কড্ঢনপযোগসঙ্খাতেন থামেন, সরীরং খাদযমানং ৰিয পুরাণতচং জিগুচ্ছন্তো ইমেহি চতূহি কারণেহি সযমেৰ কঞ্চুকং পজহাতি।

    14. Manomayiddhiñāṇaniddese imamhā kāyā aññaṃ kāyaṃ abhinimminātītiādīsu iddhimā bhikkhu manomayiddhiṃ kātukāmo ākāsakasiṇārammaṇapādakajjhānato vuṭṭhāya attano rūpakāyaṃ tāva āvajjitvā vuttanayeneva ‘‘susiro hotū’’ti adhiṭṭhāti, susiro hoti . Atha tassa abbhantare pathavīkasiṇavasena aññaṃ kāyaṃ āvajjitvā parikammaṃ katvā vuttanayeneva adhiṭṭhāti, tassa abbhantare añño kāyo hoti. So taṃ mukhato abbūhitvā bahi ṭhapeti. Idāni tamatthaṃ upamāhi pakāsento seyyathāpītiādimāha. Tattha muñjamhāti muñjatiṇamhā. Īsikaṃ pavāheyyāti kaḷīraṃ luñceyya. Kosiyāti kosakato. Karaṇḍāti karaṇḍāya, purāṇatacakañcukatoti attho. Tattha ca uddhareyyāti cittenevassa uddharaṇaṃ veditabbaṃ. Ayañhi ahi nāma sajātiyaṃ ṭhito, kaṭṭhantaraṃ vā rukkhantaraṃ vā nissāya, tacato sarīraṃ nikkaḍḍhanapayogasaṅkhātena thāmena, sarīraṃ khādayamānaṃ viya purāṇatacaṃ jigucchanto imehi catūhi kāraṇehi sayameva kañcukaṃ pajahāti.

    এত্থ চ যথা ঈসিকাদযো মুঞ্জাদীহি সদিসা হোন্তি, এৰমিদং মনোমযং রূপং ইদ্ধিমতা সব্বাকারেহি সদিসমেৰ হোতীতি দস্সনত্থং ইমা উপমা ৰুত্তাতি। ‘‘মনোমযেন কাযেন, ইদ্ধিযা উপসঙ্কমী’’তি (থেরগা॰ ৯০১) এত্থ অভিঞ্ঞামনেন কতকাযো মনোমযকাযো নাম। ‘‘অঞ্ঞতরং মনোমযং কাযং উপপজ্জতী’’তি (চূল়ৰ॰ ৩৩৩) এত্থ ঝানমনেন নিব্বিত্তিতকাযো তেন মনেন কতত্তা মনোমযকাযো নাম। ইধ পন অভিঞ্ঞামনেন উপ্পাদিতকাযো তেন মনেন কতত্তা মনোমযকাযো নাম। এৰং সতি অধিট্ঠানিদ্ধিযা ৰিকুব্বনিদ্ধিযা চ কতো মনোমযকাযো নাম হোতীতি চে? হোতিযেৰ। ইধ পন তাসং ৰিসুং ৰিসুং ৰিসেসেন ৰিসেসেত্ৰা অধিট্ঠানিদ্ধি ৰিকুব্বনিদ্ধীতি চ ৰুত্তত্তা অব্ভন্তরতো নিম্মানমেৰ মনোমযিদ্ধি নাম।

    Ettha ca yathā īsikādayo muñjādīhi sadisā honti, evamidaṃ manomayaṃ rūpaṃ iddhimatā sabbākārehi sadisameva hotīti dassanatthaṃ imā upamā vuttāti. ‘‘Manomayena kāyena, iddhiyā upasaṅkamī’’ti (theragā. 901) ettha abhiññāmanena katakāyo manomayakāyo nāma. ‘‘Aññataraṃ manomayaṃ kāyaṃ upapajjatī’’ti (cūḷava. 333) ettha jhānamanena nibbittitakāyo tena manena katattā manomayakāyo nāma. Idha pana abhiññāmanena uppāditakāyo tena manena katattā manomayakāyo nāma. Evaṃ sati adhiṭṭhāniddhiyā vikubbaniddhiyā ca kato manomayakāyo nāma hotīti ce? Hotiyeva. Idha pana tāsaṃ visuṃ visuṃ visesena visesetvā adhiṭṭhāniddhi vikubbaniddhīti ca vuttattā abbhantarato nimmānameva manomayiddhi nāma.

    ১৫. ঞাণৰিপ্ফারিদ্ধিনিদ্দেসে ঞাণস্স ৰিপ্ফারো ৰেগো অস্সা অত্থীতি ঞাণৰিপ্ফারা। এত্থ চ সত্তঅনুপস্সনাৰসেনেৰ ইদ্ধিং দস্সেত্ৰা সেসা যাৰ অরহত্তমগ্গা সঙ্খিত্তাতি ৰেদিতব্বা।

    15. Ñāṇavipphāriddhiniddese ñāṇassa vipphāro vego assā atthīti ñāṇavipphārā. Ettha ca sattaanupassanāvaseneva iddhiṃ dassetvā sesā yāva arahattamaggā saṅkhittāti veditabbā.

    আযস্মতো বাকুলস্স ঞাণৰিপ্ফারা ইদ্ধীতিআদীসু বাকুলত্থেরো তাৰ দ্ৰীসু কুলেসু ৰড্ঢিতত্তা এৰংলদ্ধনামো পুব্ববুদ্ধেসু কতাধিকারো পুঞ্ঞসম্পদায সম্পন্নো থেরো। সো হি মহাসম্পত্তিং অনুভৰমানো দেৰমনুস্সেসু সংসরন্তো অম্হাকং দসবলস্স নিব্বত্তিতো পুরেতরমেৰ কোসম্বিযং সেট্ঠিকুলে নিব্বত্তি। তং জাতকালে মঙ্গলত্থায মহাপরিৰারেন যমুনং নেত্ৰা সপরিৰারা ধাতী নিমুজ্জনুম্মুজ্জনৰসেন কীল়াপেন্তী ন্হাপেতি। একো মহামচ্ছো ‘‘ভক্খো মে অয’’ন্তি মঞ্ঞমানো মুখং ৰিৰরিত্ৰা উপগতো। ধাতী দারকং ছড্ডেত্ৰা পলাতা। মহামচ্ছো তং গিলি। পুঞ্ঞৰা সত্তো সযনগব্ভং পৰিসিত্ৰা নিপন্নো ৰিয ন কিঞ্চি দুক্খং পাপুণি। মচ্ছো দারকস্স তেজেন তত্তকং ফালং গিলিত্ৰা ৰিয দয্হমানো ৰেগেন তিংসযোজনং গন্ত্ৰা বারাণসিৰাসিনো মচ্ছবন্ধস্স জালং পাৰিসি। সো দারকস্স তেজেন জালতো নীহটমত্তোৰ মতো। মচ্ছবন্ধা তং সকলমেৰ অন্তরকাজেন আদায ‘‘সহস্সেন দেমা’’তি নগরে চরন্তা অসীতিকোটিধনস্স অপুত্তকস্স সেট্ঠিস্স ঘরদ্ৰারং গন্ত্ৰা সেট্ঠিভরিযায একেন কহাপণেন অদংসু। সা তং সযমেৰ ফলকে ঠপেত্ৰা পিট্ঠিতো ফালেন্তী মচ্ছকুচ্ছিযং সুৰণ্ণৰণ্ণং দারকং দিস্ৰা ‘‘মচ্ছকুচ্ছিযং মে পুত্তো লদ্ধো’’তি নাদং নদিত্ৰা দারকং আদায সামিকং উপগচ্ছি। সেট্ঠি তাৰদেৰ ভেরিং চরাপেত্ৰা দারকং আদায রঞ্ঞো সন্তিকং আনেত্ৰা তমত্থং আরোচেসি। রাজা ‘‘পুঞ্ঞৰা দারকো, পোসেহি ন’’ন্তি আহ। ইতরম্পি সেট্ঠিকুলং তং পৰত্তিং সুত্ৰা তত্থ গন্ত্ৰা ‘‘অম্হাকং পুত্তো’’তি তং দারকং গণ্হিতুং ৰিৰদি। উভোপি রাজকুলং অগমংসু। রাজা ‘‘দ্ৰিন্নম্পি অপুত্তকং কাতুং ন সক্কা, দ্ৰিন্নম্পি দাযাদো হোতূ’’তি আহ। ততো পট্ঠায দ্ৰেপি কুলানি লাভগ্গযসগ্গপ্পত্তানি অহেসুং। তস্স দ্ৰীহি কুলেহি ৰড্ঢিতত্তা ‘‘বাকুলকুমারো’’তি নামং অকংসু। তস্স ৰিঞ্ঞুতং পত্তস্স দ্ৰীসুপি নগরেসু তযো তযো পাসাদে কারেত্ৰা নাটকানি পচ্চুপট্ঠপেসুং। একেকস্মিং নগরে চত্তারো চত্তারো মাসে ৰসি। তহিং একস্মিং নগরে চত্তারো মাসে ৰুট্ঠস্স সঙ্ঘাটনাৰাসু মণ্ডপং কারেত্ৰা তত্থ নং নাটকেহি সদ্ধিং আরোপেত্ৰা মহাসম্পত্তিং অনুভৰমানং দ্ৰীহি মাসেহি ইতরং নগরং উপড্ঢপথং নেন্তি। ইতরনগরৰাসিনো নাটকাপি ‘‘দ্ৰীহি মাসেহি উপড্ঢপথং আগতো ভৰিস্সতী’’তি তথেৰ পচ্চুগ্গন্ত্ৰা দ্ৰীহি মাসেহি অত্তনো নগরং আনেন্তি। ইতরনাটকা মজ্ঝে নিৰত্তিত্ৰা অত্তনো নগরমেৰ গচ্ছন্তি। তত্থ চত্তারো মাসে ৰসিত্ৰা তেনেৰ নিযামেন পুন ইতরনগরং গচ্ছতি। এৰমস্স সম্পত্তিং অনুভৰন্তস্স অসীতি ৰস্সানি পরিপুণ্ণানি।

    Āyasmatobākulassa ñāṇavipphārā iddhītiādīsu bākulatthero tāva dvīsu kulesu vaḍḍhitattā evaṃladdhanāmo pubbabuddhesu katādhikāro puññasampadāya sampanno thero. So hi mahāsampattiṃ anubhavamāno devamanussesu saṃsaranto amhākaṃ dasabalassa nibbattito puretarameva kosambiyaṃ seṭṭhikule nibbatti. Taṃ jātakāle maṅgalatthāya mahāparivārena yamunaṃ netvā saparivārā dhātī nimujjanummujjanavasena kīḷāpentī nhāpeti. Eko mahāmaccho ‘‘bhakkho me aya’’nti maññamāno mukhaṃ vivaritvā upagato. Dhātī dārakaṃ chaḍḍetvā palātā. Mahāmaccho taṃ gili. Puññavā satto sayanagabbhaṃ pavisitvā nipanno viya na kiñci dukkhaṃ pāpuṇi. Maccho dārakassa tejena tattakaṃ phālaṃ gilitvā viya dayhamāno vegena tiṃsayojanaṃ gantvā bārāṇasivāsino macchabandhassa jālaṃ pāvisi. So dārakassa tejena jālato nīhaṭamattova mato. Macchabandhā taṃ sakalameva antarakājena ādāya ‘‘sahassena demā’’ti nagare carantā asītikoṭidhanassa aputtakassa seṭṭhissa gharadvāraṃ gantvā seṭṭhibhariyāya ekena kahāpaṇena adaṃsu. Sā taṃ sayameva phalake ṭhapetvā piṭṭhito phālentī macchakucchiyaṃ suvaṇṇavaṇṇaṃ dārakaṃ disvā ‘‘macchakucchiyaṃ me putto laddho’’ti nādaṃ naditvā dārakaṃ ādāya sāmikaṃ upagacchi. Seṭṭhi tāvadeva bheriṃ carāpetvā dārakaṃ ādāya rañño santikaṃ ānetvā tamatthaṃ ārocesi. Rājā ‘‘puññavā dārako, posehi na’’nti āha. Itarampi seṭṭhikulaṃ taṃ pavattiṃ sutvā tattha gantvā ‘‘amhākaṃ putto’’ti taṃ dārakaṃ gaṇhituṃ vivadi. Ubhopi rājakulaṃ agamaṃsu. Rājā ‘‘dvinnampi aputtakaṃ kātuṃ na sakkā, dvinnampi dāyādo hotū’’ti āha. Tato paṭṭhāya dvepi kulāni lābhaggayasaggappattāni ahesuṃ. Tassa dvīhi kulehi vaḍḍhitattā ‘‘bākulakumāro’’ti nāmaṃ akaṃsu. Tassa viññutaṃ pattassa dvīsupi nagaresu tayo tayo pāsāde kāretvā nāṭakāni paccupaṭṭhapesuṃ. Ekekasmiṃ nagare cattāro cattāro māse vasi. Tahiṃ ekasmiṃ nagare cattāro māse vuṭṭhassa saṅghāṭanāvāsu maṇḍapaṃ kāretvā tattha naṃ nāṭakehi saddhiṃ āropetvā mahāsampattiṃ anubhavamānaṃ dvīhi māsehi itaraṃ nagaraṃ upaḍḍhapathaṃ nenti. Itaranagaravāsino nāṭakāpi ‘‘dvīhi māsehi upaḍḍhapathaṃ āgato bhavissatī’’ti tatheva paccuggantvā dvīhi māsehi attano nagaraṃ ānenti. Itaranāṭakā majjhe nivattitvā attano nagarameva gacchanti. Tattha cattāro māse vasitvā teneva niyāmena puna itaranagaraṃ gacchati. Evamassa sampattiṃ anubhavantassa asīti vassāni paripuṇṇāni.

    তস্মিং সমযে অম্হাকং বোধিসত্তো সব্বঞ্ঞুতং পাপুণিত্ৰা পৰত্তৰরধম্মচক্কো অনুক্কমেন চারিকং চরন্তো কোসম্বিং পাপুণি। ‘‘বারাণসি’’ন্তি মজ্ঝিমভাণকা। বাকুলসেট্ঠিপি খো ‘‘দসবলো আগতো’’তি সুত্ৰা বহুং গন্ধমালং আদায সত্থু সন্তিকং গন্ত্ৰা ধম্মকথং সুত্ৰা পটিলদ্ধসদ্ধো পব্বজি। সো সত্তাহমেৰ পুথুজ্জনো হুত্ৰা অট্ঠমে অরুণে সহ পটিসম্ভিদাহি অরহত্তং পাপুণি। অথস্স দ্ৰীসু নগরেসু পরিচিতমাতুগামা অত্তনো কুলঘরানি আগন্ত্ৰা তত্থেৰ ৰসমানা চীৰরানি করিত্ৰা পহিণিংসু। থেরো একং অড্ঢমাসং কোসম্বিৰাসীহি পহিতং চীৰরং পরিভুঞ্জতি, একং অড্ঢমাসং বারাণসিৰাসীহীতি এতেনেৰ নিযামেন দ্ৰীসু নগরেসু যং যং উত্তমং, তং তং থেরস্সেৰ আহরীযতি। পব্বজিতস্সাপিস্স সুখেনেৰ অসীতি ৰস্সানি অগমংসু। উভযত্থাপিস্স মুহুত্তমত্তম্পি অপ্পমত্তকোপি আবাধো ন উপ্পন্নপুব্বো। সো পচ্ছিমে কালে বাকুলসুত্তং (ম॰ নি॰ ৩.২০৯ আদযো) কথেত্ৰা পরিনিব্বাযীতি । এৰং মচ্ছকুচ্ছিযং অরোগভাৰো আযস্মতো বাকুলস্স পচ্ছিমভৰিকস্স তেন অত্তভাৰেন পটিলভিতব্বঅরহত্তঞাণানুভাৰেন নিব্বত্তত্তা ঞাণৰিপ্ফারা ইদ্ধি নাম। সুচরিতকম্মফলপ্পত্তস্স পটিসম্ভিদাঞাণস্স আনুভাৰেনাতিপি ৰদন্তি।

    Tasmiṃ samaye amhākaṃ bodhisatto sabbaññutaṃ pāpuṇitvā pavattavaradhammacakko anukkamena cārikaṃ caranto kosambiṃ pāpuṇi. ‘‘Bārāṇasi’’nti majjhimabhāṇakā. Bākulaseṭṭhipi kho ‘‘dasabalo āgato’’ti sutvā bahuṃ gandhamālaṃ ādāya satthu santikaṃ gantvā dhammakathaṃ sutvā paṭiladdhasaddho pabbaji. So sattāhameva puthujjano hutvā aṭṭhame aruṇe saha paṭisambhidāhi arahattaṃ pāpuṇi. Athassa dvīsu nagaresu paricitamātugāmā attano kulagharāni āgantvā tattheva vasamānā cīvarāni karitvā pahiṇiṃsu. Thero ekaṃ aḍḍhamāsaṃ kosambivāsīhi pahitaṃ cīvaraṃ paribhuñjati, ekaṃ aḍḍhamāsaṃ bārāṇasivāsīhīti eteneva niyāmena dvīsu nagaresu yaṃ yaṃ uttamaṃ, taṃ taṃ therasseva āharīyati. Pabbajitassāpissa sukheneva asīti vassāni agamaṃsu. Ubhayatthāpissa muhuttamattampi appamattakopi ābādho na uppannapubbo. So pacchime kāle bākulasuttaṃ (ma. ni. 3.209 ādayo) kathetvā parinibbāyīti . Evaṃ macchakucchiyaṃ arogabhāvo āyasmato bākulassa pacchimabhavikassa tena attabhāvena paṭilabhitabbaarahattañāṇānubhāvena nibbattattā ñāṇavipphārā iddhi nāma. Sucaritakammaphalappattassa paṭisambhidāñāṇassa ānubhāvenātipi vadanti.

    সংকিচ্চত্থেরোপি (ৰিসুদ্ধি॰ ২.৩৭৩) পুব্বে কতপুঞ্ঞো ধম্মসেনাপতিত্থেরস্স উপট্ঠাকস্স সাৰত্থিযং অড্ঢকুলস্স ধীতু কুচ্ছিস্মিং নিব্বত্তি। সা তস্মিং কুচ্ছিগতে একেন ব্যাধিনা তং খণংযেৰ কালমকাসি, তস্সা সরীরে ঝাপিযমানে ঠপেত্ৰা গব্ভমংসং সেসমংসং ঝাপযি। অথস্সা গব্ভমংসং চিতকতো ওতারেত্ৰা দ্ৰীসু তীসু ঠানেসু সূলেহি ৰিজ্ঝিংসু। সূলকোটি দারকস্স অক্খিকোটিং ফুসি। এৰং গব্ভমংসং ৰিজ্ঝিত্ৰা অঙ্গাররাসিম্হি পক্খিপিত্ৰা অঙ্গারেহেৰ পটিচ্ছাদেত্ৰা পক্কমিংসু। গব্ভমংসং ঝাযি, অঙ্গারমত্থকে পন সুৰণ্ণবিম্বসদিসো দারকো পদুমগব্ভে নিপন্নো ৰিয অহোসি। পচ্ছিমভৰিকসত্তস্স হি সিনেরুনা ওত্থরিযমানস্সাপি অরহত্তং অপ্পত্ৰা জীৰিতক্খযো নাম নত্থি। পুনদিৰসে ‘‘চিতকং নিব্বাপেস্সামা’’তি আগতা তথা নিপন্নং দারকং দিস্ৰা অচ্ছরিযব্ভুতচিত্তজাতা দারকং আদায নগরং গন্ত্ৰা নেমিত্তকে পুচ্ছিংসু। নেমিত্তকা ‘‘সচে অযং দারকো অগারং অজ্ঝাৰসিস্সতি, যাৰ সত্তমা কুলপরিৰট্টা ঞাতকা দুগ্গতা ভৰিস্সন্তি। সচে পব্বজিস্সতি, পঞ্চহি সমণসতেহি পরিৰুতো চরিস্সতী’’তি আহংসু। অয্যকা তং দারকং ৰড্ঢেসি। ঞাতকাপি ৰড্ঢিতকালে ‘‘অম্হাকং অয্যস্স সন্তিকে পব্বাজেস্সামা’’তি পোসযিংসু। সো সত্তৰস্সিককালে ‘‘তৰ কুচ্ছিযা ৰসনকালে মাতা তে কালমকাসি, তস্সা সরীরে ঝাপিযমানেপি ত্ৰং ন ঝাযী’’তি কুমারকানং কথং সুত্ৰা ‘‘অহং কির এৰরূপা ভযা মুত্তো, কিং মে ঘরাৰাসেন পব্বজিস্সামী’’তি ঞাতকানং আরোচেসি। তে ‘‘সাধু, তাতা’’তি তং ধম্মসেনাপতিত্থেরস্স সন্তিকং নেত্ৰা ‘‘ভন্তে, ইমং পব্বাজেথা’’তি অদংসু। থেরো তচপঞ্চককম্মট্ঠানং দত্ৰা পব্বাজেসি। সো খুরগ্গেযেৰ সহ পটিসম্ভিদাহি অরহত্তং পাপুণি। পরিপুণ্ণৰস্সো চ উপসম্পদং লভিত্ৰা দসৰস্সো হুত্ৰা পঞ্চসতভিক্খুপরিৰারো ৰিচরীতি। এৰং ৰুত্তনযেনেৰ দারুচিতকায অরোগভাৰো আযস্মতো সংকিচ্চস্স ঞাণৰিপ্ফারা ইদ্ধি নাম।

    Saṃkiccattheropi (visuddhi. 2.373) pubbe katapuñño dhammasenāpatittherassa upaṭṭhākassa sāvatthiyaṃ aḍḍhakulassa dhītu kucchismiṃ nibbatti. Sā tasmiṃ kucchigate ekena byādhinā taṃ khaṇaṃyeva kālamakāsi, tassā sarīre jhāpiyamāne ṭhapetvā gabbhamaṃsaṃ sesamaṃsaṃ jhāpayi. Athassā gabbhamaṃsaṃ citakato otāretvā dvīsu tīsu ṭhānesu sūlehi vijjhiṃsu. Sūlakoṭi dārakassa akkhikoṭiṃ phusi. Evaṃ gabbhamaṃsaṃ vijjhitvā aṅgārarāsimhi pakkhipitvā aṅgāreheva paṭicchādetvā pakkamiṃsu. Gabbhamaṃsaṃ jhāyi, aṅgāramatthake pana suvaṇṇabimbasadiso dārako padumagabbhe nipanno viya ahosi. Pacchimabhavikasattassa hi sinerunā otthariyamānassāpi arahattaṃ appatvā jīvitakkhayo nāma natthi. Punadivase ‘‘citakaṃ nibbāpessāmā’’ti āgatā tathā nipannaṃ dārakaṃ disvā acchariyabbhutacittajātā dārakaṃ ādāya nagaraṃ gantvā nemittake pucchiṃsu. Nemittakā ‘‘sace ayaṃ dārako agāraṃ ajjhāvasissati, yāva sattamā kulaparivaṭṭā ñātakā duggatā bhavissanti. Sace pabbajissati, pañcahi samaṇasatehi parivuto carissatī’’ti āhaṃsu. Ayyakā taṃ dārakaṃ vaḍḍhesi. Ñātakāpi vaḍḍhitakāle ‘‘amhākaṃ ayyassa santike pabbājessāmā’’ti posayiṃsu. So sattavassikakāle ‘‘tava kucchiyā vasanakāle mātā te kālamakāsi, tassā sarīre jhāpiyamānepi tvaṃ na jhāyī’’ti kumārakānaṃ kathaṃ sutvā ‘‘ahaṃ kira evarūpā bhayā mutto, kiṃ me gharāvāsena pabbajissāmī’’ti ñātakānaṃ ārocesi. Te ‘‘sādhu, tātā’’ti taṃ dhammasenāpatittherassa santikaṃ netvā ‘‘bhante, imaṃ pabbājethā’’ti adaṃsu. Thero tacapañcakakammaṭṭhānaṃ datvā pabbājesi. So khuraggeyeva saha paṭisambhidāhi arahattaṃ pāpuṇi. Paripuṇṇavasso ca upasampadaṃ labhitvā dasavasso hutvā pañcasatabhikkhuparivāro vicarīti. Evaṃ vuttanayeneva dārucitakāya arogabhāvo āyasmato saṃkiccassa ñāṇavipphārā iddhi nāma.

    ভূতপালত্থেরোপি (ৰিসুদ্ধি॰ ২.৩৭৩) পুব্বহেতুসম্পন্নো। তস্স পিতা রাজগহে দলিদ্দমনুস্সো। সো তং দারকং গহেত্ৰা দারূনং অত্থায সকটেন অটৰিং গন্ত্ৰা দারুভারং কত্ৰা সাযং নগরদ্ৰারসমীপং পত্তো। অথস্স গোণা যুগং ওস্সজিত্ৰা নগরং পৰিসিংসু। সো সকটমূলে পুত্তকং নিসীদাপেত্ৰা গোণানং অনুপদং গচ্ছন্তো নগরমেৰ পাৰিসি। তস্স অনিক্খন্তস্সেৰ দ্ৰারং পিদহি। দারকো সকলরত্তিং সকটস্স হেট্ঠা নিপজ্জিত্ৰা নিদ্দং ওক্কমি। রাজগহং পকতিযাপি অমনুস্সবহুলং, ইদং পন সুসানসমীপট্ঠানং। ন চ কোচি যক্খো তস্স পচ্ছিমভৰিকস্স দারকস্স উপদ্দৰং কাতুমসক্খি। সো অপরেন সমযেন পব্বজিত্ৰা অরহত্তং পাপুণিত্ৰা ভূতপালত্থেরো নাম অহোসীতি। এৰং ৰাল়যক্খানুচরিতেপি পদেসে ৰুত্তনযেনেৰ অরোগভাৰো আযস্মতো ভূতপালস্স ঞাণৰিপ্ফারা ইদ্ধি নাম।

    Bhūtapālattheropi (visuddhi. 2.373) pubbahetusampanno. Tassa pitā rājagahe daliddamanusso. So taṃ dārakaṃ gahetvā dārūnaṃ atthāya sakaṭena aṭaviṃ gantvā dārubhāraṃ katvā sāyaṃ nagaradvārasamīpaṃ patto. Athassa goṇā yugaṃ ossajitvā nagaraṃ pavisiṃsu. So sakaṭamūle puttakaṃ nisīdāpetvā goṇānaṃ anupadaṃ gacchanto nagarameva pāvisi. Tassa anikkhantasseva dvāraṃ pidahi. Dārako sakalarattiṃ sakaṭassa heṭṭhā nipajjitvā niddaṃ okkami. Rājagahaṃ pakatiyāpi amanussabahulaṃ, idaṃ pana susānasamīpaṭṭhānaṃ. Na ca koci yakkho tassa pacchimabhavikassa dārakassa upaddavaṃ kātumasakkhi. So aparena samayena pabbajitvā arahattaṃ pāpuṇitvā bhūtapālatthero nāma ahosīti. Evaṃ vāḷayakkhānucaritepi padese vuttanayeneva arogabhāvo āyasmato bhūtapālassa ñāṇavipphārā iddhi nāma.

    ১৬. সমাধিৰিপ্ফারিদ্ধিনিদ্দেসে আযস্মতো সারিপুত্তস্স সমাধিৰিপ্ফারা ইদ্ধীতিআদীসু আযস্মতো সারিপুত্তস্স মহামোগ্গল্লানত্থেরেন সদ্ধিং কপোতকন্দরাযং ৰিহরতো জুণ্হায রত্তিযা নৰোরোপিতেহি কেসেহি অজ্ঝোকাসে নিসিন্নস্স একো দুট্ঠযক্খো সহাযকেন যক্খেন ৰারিযমানোপি সীসে পহারং অদাসি। যস্স মেঘস্স ৰিয গজ্জতো সদ্দো অহোসি, থেরো তস্স পহরণসমযে সমাপত্তিং অপ্পেত্ৰা নিসিন্নো হোতি। অথস্স তেন পহারেন ন কোচি আবাধো অহোসি। অযং তস্স আযস্মতো সমাধিৰিপ্ফারা ইদ্ধি। যথাহ –

    16. Samādhivipphāriddhiniddese āyasmato sāriputtassa samādhivipphārā iddhītiādīsu āyasmato sāriputtassa mahāmoggallānattherena saddhiṃ kapotakandarāyaṃ viharato juṇhāya rattiyā navoropitehi kesehi ajjhokāse nisinnassa eko duṭṭhayakkho sahāyakena yakkhena vāriyamānopi sīse pahāraṃ adāsi. Yassa meghassa viya gajjato saddo ahosi, thero tassa paharaṇasamaye samāpattiṃ appetvā nisinno hoti. Athassa tena pahārena na koci ābādho ahosi. Ayaṃ tassa āyasmato samādhivipphārā iddhi. Yathāha –

    ‘‘এৰং মে সুতং (উদা॰ ৩৪) – একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে। তেন খো পন সমযেন আযস্মা চ সারিপুত্তো আযস্মা চ মহামোগ্গল্লানো কপোতকন্দরাযং ৰিহরন্তি। তেন খো পন সমযেন আযস্মা সারিপুত্তো জুণ্হায রত্তিযা নৰোরোপিতেহি কেসেহি অব্ভোকাসে নিসিন্নো হোতি অঞ্ঞতরং সমাধিং সমাপজ্জিত্ৰা।

    ‘‘Evaṃ me sutaṃ (udā. 34) – ekaṃ samayaṃ bhagavā rājagahe viharati veḷuvane kalandakanivāpe. Tena kho pana samayena āyasmā ca sāriputto āyasmā ca mahāmoggallāno kapotakandarāyaṃ viharanti. Tena kho pana samayena āyasmā sāriputto juṇhāya rattiyā navoropitehi kesehi abbhokāse nisinno hoti aññataraṃ samādhiṃ samāpajjitvā.

    ‘‘তেন খো পন সমযেন দ্ৰে যক্খা সহাযকা উত্তরায দিসায দক্খিণং দিসং গচ্ছন্তি কেনচিদেৰ করণীযেন। অদ্দসংসু খো তে যক্খা আযস্মন্তং সারিপুত্তং জুণ্হায রত্তিযা নৰোরোপিতেহি কেসেহি অব্ভোকাসে নিসিন্নং, দিস্ৰান একো যক্খো দুতিযং যক্খং এতদৰোচ – ‘পটিভাতি মং, সম্ম, ইমস্স সমণস্স সীসে পহারং দাতু’ন্তি। এৰং ৰুত্তে সো যক্খো তং যক্খং এতদৰোচ – ‘অলং, সম্ম, মা সমণং আসাদেসি, উল়ারো সো, সম্ম, সমণো মহিদ্ধিকো মহানুভাৰো’তি।

    ‘‘Tena kho pana samayena dve yakkhā sahāyakā uttarāya disāya dakkhiṇaṃ disaṃ gacchanti kenacideva karaṇīyena. Addasaṃsu kho te yakkhā āyasmantaṃ sāriputtaṃ juṇhāya rattiyā navoropitehi kesehi abbhokāse nisinnaṃ, disvāna eko yakkho dutiyaṃ yakkhaṃ etadavoca – ‘paṭibhāti maṃ, samma, imassa samaṇassa sīse pahāraṃ dātu’nti. Evaṃ vutte so yakkho taṃ yakkhaṃ etadavoca – ‘alaṃ, samma, mā samaṇaṃ āsādesi, uḷāro so, samma, samaṇo mahiddhiko mahānubhāvo’ti.

    ‘‘দুতিযম্পি খো…পে॰… ততিযম্পি খো সো যক্খো তং যক্খং এতদৰোচ – ‘পটিভাতি মং, সম্ম, ইমস্স সমণস্স সীসে পহারং দাতু’ন্তি। ততিযম্পি খো সো যক্খো তং যক্খং এতদৰোচ – ‘অলং, সম্ম, মা সমণং আসাদেসি, উল়ারো সো, সম্ম, সমণো মহিদ্ধিকো মহানুভাৰো’তি।

    ‘‘Dutiyampi kho…pe… tatiyampi kho so yakkho taṃ yakkhaṃ etadavoca – ‘paṭibhāti maṃ, samma, imassa samaṇassa sīse pahāraṃ dātu’nti. Tatiyampi kho so yakkho taṃ yakkhaṃ etadavoca – ‘alaṃ, samma, mā samaṇaṃ āsādesi, uḷāro so, samma, samaṇo mahiddhiko mahānubhāvo’ti.

    ‘‘অথ খো সো যক্খো তং যক্খং অনাদিযিত্ৰা আযস্মতো সারিপুত্তস্স সীসে পহারং অদাসি। তাৰ মহাপহারো অহোসি, অপি তেন পহারেন সত্তরতনং ৰা অড্ঢট্ঠমরতনং ৰা নাগং ওসারেয্য, মহন্তং ৰা পব্বতকূটং পদালেয্য। অথ চ পন সো যক্খো ‘দয্হামি দয্হামী’তি তত্থেৰ মহানিরযং অপতাসি।

    ‘‘Atha kho so yakkho taṃ yakkhaṃ anādiyitvā āyasmato sāriputtassa sīse pahāraṃ adāsi. Tāva mahāpahāro ahosi, api tena pahārena sattaratanaṃ vā aḍḍhaṭṭhamaratanaṃ vā nāgaṃ osāreyya, mahantaṃ vā pabbatakūṭaṃ padāleyya. Atha ca pana so yakkho ‘dayhāmi dayhāmī’ti tattheva mahānirayaṃ apatāsi.

    ‘‘অদ্দসা খো আযস্মা মহামোগ্গল্লানো দিব্বেন চক্খুনা ৰিসুদ্ধেন অতিক্কন্তমানুসকেন তেন যক্খেন আযস্মতো সারিপুত্তস্স সীসে পহারং দীযমানং, দিস্ৰা যেন আযস্মা সারিপুত্তো তেনুপসঙ্কমি, উপসঙ্কমিত্ৰা আযস্মন্তং সারিপুত্তং এতদৰোচ – ‘কচ্চি তে, আৰুসো সারিপুত্ত, খমনীযং, কচ্চি যাপনীযং, কচ্চি ন কিঞ্চি দুক্খ’ন্তি। ‘খমনীযং মে, আৰুসো মোগ্গল্লান, যাপনীযং মে, আৰুসো মোগ্গল্লান, অপি চ মে সীসং থোকং দুক্খ’ন্তি।

    ‘‘Addasā kho āyasmā mahāmoggallāno dibbena cakkhunā visuddhena atikkantamānusakena tena yakkhena āyasmato sāriputtassa sīse pahāraṃ dīyamānaṃ, disvā yena āyasmā sāriputto tenupasaṅkami, upasaṅkamitvā āyasmantaṃ sāriputtaṃ etadavoca – ‘kacci te, āvuso sāriputta, khamanīyaṃ, kacci yāpanīyaṃ, kacci na kiñci dukkha’nti. ‘Khamanīyaṃ me, āvuso moggallāna, yāpanīyaṃ me, āvuso moggallāna, api ca me sīsaṃ thokaṃ dukkha’nti.

    ‘‘অচ্ছরিযং, আৰুসো সারিপুত্ত, অব্ভুতং, আৰুসো সারিপুত্ত, যাৰ মহিদ্ধিকো আযস্মা সারিপুত্তো মহানুভাৰো। ইধ তে, আৰুসো সারিপুত্ত, অঞ্ঞতরো যক্খো সীসে পহারং অদাসি। তাৰ মহা পহারো অহোসি, অপি তেন পহারেন সত্তরতনং ৰা অড্ঢট্ঠমরতনং ৰা নাগং ওসারেয্য, মহন্তং ৰা পব্বতকূটং পদালেয্য। অথ চ পনাযস্মা সারিপুত্তো এৰমাহ – ‘খমনীযং মে, আৰুসো মোগ্গল্লান, যাপনীযং মে, আৰুসো মোগ্গল্লান, অপি চ মে সীসং থোকং দুক্খ’ন্তি।

    ‘‘Acchariyaṃ, āvuso sāriputta, abbhutaṃ, āvuso sāriputta, yāva mahiddhiko āyasmā sāriputto mahānubhāvo. Idha te, āvuso sāriputta, aññataro yakkho sīse pahāraṃ adāsi. Tāva mahā pahāro ahosi, api tena pahārena sattaratanaṃ vā aḍḍhaṭṭhamaratanaṃ vā nāgaṃ osāreyya, mahantaṃ vā pabbatakūṭaṃ padāleyya. Atha ca panāyasmā sāriputto evamāha – ‘khamanīyaṃ me, āvuso moggallāna, yāpanīyaṃ me, āvuso moggallāna, api ca me sīsaṃ thokaṃ dukkha’nti.

    ‘‘অচ্ছরিযং, আৰুসো মোগ্গল্লান, অব্ভুতং, আৰুসো মোগ্গল্লান, যাৰ মহিদ্ধিকো আযস্মা মহামোগ্গল্লানো মহানুভাৰো, যত্র হি নাম যক্খম্পি পস্সিস্সতি, মযং পনেতরহি পংসুপিসাচকম্পি ন পস্সামাতি।

    ‘‘Acchariyaṃ, āvuso moggallāna, abbhutaṃ, āvuso moggallāna, yāva mahiddhiko āyasmā mahāmoggallāno mahānubhāvo, yatra hi nāma yakkhampi passissati, mayaṃ panetarahi paṃsupisācakampi na passāmāti.

    ‘‘অস্সোসি খো ভগৰা দিব্বায সোতধাতুযা ৰিসুদ্ধায অতিক্কন্তমানুসিকায তেসং উভিন্নং মহানাগানং ইমং এৰরূপং কথাসল্লাপং।

    ‘‘Assosi kho bhagavā dibbāya sotadhātuyā visuddhāya atikkantamānusikāya tesaṃ ubhinnaṃ mahānāgānaṃ imaṃ evarūpaṃ kathāsallāpaṃ.

    অথ খো ভগৰা এতমত্থং ৰিদিত্ৰা তাযং ৰেলাযং ইমং উদানং উদানেসি –

    Atha kho bhagavā etamatthaṃ viditvā tāyaṃ velāyaṃ imaṃ udānaṃ udānesi –

    ‘‘যস্স সেলূপমং চিত্তং, ঠিতং নানুপকম্পতি।

    ‘‘Yassa selūpamaṃ cittaṃ, ṭhitaṃ nānupakampati;

    ৰিরত্তং রজনীযেসু, কোপনীযে ন কুপ্পতি।

    Virattaṃ rajanīyesu, kopanīye na kuppati;

    যস্সেৰং ভাৰিতং চিত্তং, কুতো তং দুক্খমেস্সতী’’তি॥ (উদা॰ ৩৪)।

    Yassevaṃ bhāvitaṃ cittaṃ, kuto taṃ dukkhamessatī’’ti. (udā. 34);

    এত্থ চ ‘‘কুতো তং দুক্খমেস্সতী’’তি ভগৰতা ৰুত্তৰচনেন ‘‘তেন পহারেন ন কোচি আবাধো অহোসী’’তি অট্ঠকথাৰচনং অতিৰিয সমেতি। তস্মা ‘‘অপিচ মে সীসং থোকং দুক্খ’’ন্তি ৰচনেন দুক্খৰেদনা ন হোতি, সীসস্স পন অকম্মঞ্ঞভাৰং সন্ধায ‘‘দুক্খ’’ন্তি ৰুত্তং। লোকেপি হি অকিচ্ছেন পরিহরিতুং সক্কুণেয্যো সুখসীলো, কিচ্ছেন পরিহরিতুং সক্কুণেয্যো দুক্খসীলোতি ৰুচ্চতি। তম্পি খো অকম্মঞ্ঞতং সমাপত্তিতো ৰুট্ঠিতসমযত্তা অহোসীতি ৰেদিতব্বো। সমাপত্তিঅপ্পিতসমযে হি তম্পি ন ভৰেয্যাতি। ‘‘এতরহি পংসুপিসাচকম্পি ন পস্সামা’’তি দট্ঠুং অসমত্থতায ন ৰুত্তং, অভিঞ্ঞাসু ব্যাপারাভাৰেন ৰুত্তং। থেরো কির ‘‘পচ্ছিমা জনতা পোথুজ্জনিকায ইদ্ধিযা সারসঞ্ঞা মাহেসু’’ন্তি পচ্ছিমং জনতং অনুকম্পমানো যেভুয্যেন ইদ্ধিং ন ৰলঞ্জেসি। থেরগাথায চ –

    Ettha ca ‘‘kuto taṃ dukkhamessatī’’ti bhagavatā vuttavacanena ‘‘tena pahārena na koci ābādho ahosī’’ti aṭṭhakathāvacanaṃ ativiya sameti. Tasmā ‘‘apica me sīsaṃ thokaṃ dukkha’’nti vacanena dukkhavedanā na hoti, sīsassa pana akammaññabhāvaṃ sandhāya ‘‘dukkha’’nti vuttaṃ. Lokepi hi akicchena pariharituṃ sakkuṇeyyo sukhasīlo, kicchena pariharituṃ sakkuṇeyyo dukkhasīloti vuccati. Tampi kho akammaññataṃ samāpattito vuṭṭhitasamayattā ahosīti veditabbo. Samāpattiappitasamaye hi tampi na bhaveyyāti. ‘‘Etarahi paṃsupisācakampi na passāmā’’ti daṭṭhuṃ asamatthatāya na vuttaṃ, abhiññāsu byāpārābhāvena vuttaṃ. Thero kira ‘‘pacchimā janatā pothujjanikāya iddhiyā sārasaññā māhesu’’nti pacchimaṃ janataṃ anukampamāno yebhuyyena iddhiṃ na valañjesi. Theragāthāya ca –

    ‘‘নেৰ পুব্বেনিৰাসায, নপি দিব্বস্স চক্খুনো।

    ‘‘Neva pubbenivāsāya, napi dibbassa cakkhuno;

    চেতোপরিযায ইদ্ধিযা, চুতিযা উপপত্তিযা।

    Cetopariyāya iddhiyā, cutiyā upapattiyā;

    সোতধাতুৰিসুদ্ধিযা, পণিধি মে ন ৰিজ্জতী’’তি॥ (থেরগা॰ ৯৯৬) –

    Sotadhātuvisuddhiyā, paṇidhi me na vijjatī’’ti. (theragā. 996) –

    থেরেন সযমেৰ অভিঞ্ঞাসু পত্থনাভাৰো ৰুত্তো। থেরো পন সত্তসট্ঠিযা সাৰকপারমীঞাণেসু পারমিপ্পত্তোতি।

    Therena sayameva abhiññāsu patthanābhāvo vutto. Thero pana sattasaṭṭhiyā sāvakapāramīñāṇesu pāramippattoti.

    সঞ্জীৰত্থেরং পন ককুসন্ধস্স ভগৰতো দুতিযঅগ্গসাৰকং নিরোধসমাপন্নং ‘‘কালঙ্কতো’’তি সল্লক্খেত্ৰা গোপালকাদযো তিণকট্ঠাদীনি সংকড্ঢিত্ৰা অগ্গিং অদংসু। থেরস্স চীৰরে অংসুমত্তম্পি ন ঝাযিত্থ। অযমস্সাযস্মতো অনুপুব্বসমাপত্তিৰসেন পৰত্তসমথানুভাৰনিব্বত্তত্তা সমাধিৰিপ্ফারা ইদ্ধি। যথাহ –

    Sañjīvattheraṃ pana kakusandhassa bhagavato dutiyaaggasāvakaṃ nirodhasamāpannaṃ ‘‘kālaṅkato’’ti sallakkhetvā gopālakādayo tiṇakaṭṭhādīni saṃkaḍḍhitvā aggiṃ adaṃsu. Therassa cīvare aṃsumattampi na jhāyittha. Ayamassāyasmato anupubbasamāpattivasena pavattasamathānubhāvanibbattattā samādhivipphārā iddhi. Yathāha –

    ‘‘তেন খো পন, পাপিম, সমযেন ককুসন্ধো ভগৰা অরহং সম্মাসম্বুদ্ধো লোকে উপ্পন্নো হোতি। ককুসন্ধস্স খো পন, পাপিম, ভগৰতো অরহতো সম্মাসম্বুদ্ধস্স ৰিধুরসঞ্জীৰং নাম সাৰকযুগং অহোসি অগ্গং ভদ্দযুগং। যাৰতা পন, পাপিম, ককুসন্ধস্স ভগৰতো অরহতো সম্মাসম্বুদ্ধস্স সাৰকা। তেসু ন চ কোচি আযস্মতা ৰিধুরেন সমসমো হোতি যদিদং ধম্মদেসনায। ইমিনা খো এতং, পাপিম, পরিযাযেন আযস্মতো ৰিধুরস্স ৰিধুরোতেৰ সমঞ্ঞা উদপাদি। আযস্মা পন, পাপিম, সঞ্জীৰো অরঞ্ঞগতোপি রুক্খমূলগতোপি সুঞ্ঞাগারগতোপি অপ্পকসিরেনেৰ সঞ্ঞাৰেদযিতনিরোধং সমাপজ্জতি।

    ‘‘Tena kho pana, pāpima, samayena kakusandho bhagavā arahaṃ sammāsambuddho loke uppanno hoti. Kakusandhassa kho pana, pāpima, bhagavato arahato sammāsambuddhassa vidhurasañjīvaṃ nāma sāvakayugaṃ ahosi aggaṃ bhaddayugaṃ. Yāvatā pana, pāpima, kakusandhassa bhagavato arahato sammāsambuddhassa sāvakā. Tesu na ca koci āyasmatā vidhurena samasamo hoti yadidaṃ dhammadesanāya. Iminā kho etaṃ, pāpima, pariyāyena āyasmato vidhurassa vidhuroteva samaññā udapādi. Āyasmā pana, pāpima, sañjīvo araññagatopi rukkhamūlagatopi suññāgāragatopi appakasireneva saññāvedayitanirodhaṃ samāpajjati.

    ‘‘ভূতপুব্বং, পাপিম, আযস্মা সঞ্জীৰো অঞ্ঞতরস্মিং রুক্খমূলে সঞ্ঞাৰেদযিতনিরোধং সমাপন্নো নিসিন্নো হোতি। অদ্দসংসু খো, পাপিম, গোপালকা পসুপালকা কস্সকা পথাৰিনো আযস্মন্তং সঞ্জীৰং অঞ্ঞতরস্মিং রুক্খমূলে সঞ্ঞাৰেদযিতনিরোধং সমাপন্নং, দিস্ৰান তেসং এতদহোসি – ‘অচ্ছরিযং ৰত ভো, অব্ভুতং ৰত ভো, অযং সমণো নিসিন্নকো কালঙ্কতো, হন্দ নং দহামা’তি।

    ‘‘Bhūtapubbaṃ, pāpima, āyasmā sañjīvo aññatarasmiṃ rukkhamūle saññāvedayitanirodhaṃ samāpanno nisinno hoti. Addasaṃsu kho, pāpima, gopālakā pasupālakā kassakā pathāvino āyasmantaṃ sañjīvaṃ aññatarasmiṃ rukkhamūle saññāvedayitanirodhaṃ samāpannaṃ, disvāna tesaṃ etadahosi – ‘acchariyaṃ vata bho, abbhutaṃ vata bho, ayaṃ samaṇo nisinnako kālaṅkato, handa naṃ dahāmā’ti.

    ‘‘অথ খো তে, পাপিম, গোপালকা পসুপালকা কস্সকা পথাৰিনো তিণঞ্চ কট্ঠঞ্চ গোমযঞ্চ সংকড্ঢিত্ৰা আযস্মতো সঞ্জীৰস্স কাযে উপচিনিত্ৰা অগ্গিং দত্ৰা পক্কমিংসু। অথ খো, পাপিম, আযস্মা সঞ্জীৰো তস্সা রত্তিযা অচ্চযেন তায সমাপত্তিযা ৰুট্ঠহিত্ৰা চীৰরানি পপ্ফোটেত্ৰা পুব্বণ্হসমযং নিৰাসেত্ৰা পত্তচীৰরমাদায গামং পিণ্ডায পাৰিসি। অদ্দসংসু খো তে, পাপিম, গোপালকা পসুপালকা কস্সকা পথাৰিনো আযস্মন্তং সঞ্জীৰং পিণ্ডায চরন্তং, দিস্ৰান নেসং এতদহোসি – ‘অচ্ছরিযং ৰত ভো, অব্ভুতং ৰত ভো, অযং সমণো নিসিন্নকোৰ কালঙ্কতো, স্ৰাযং পটিসঞ্জীৰিতো’তি। ইমিনা খো এৰং, পাপিম, পরিযাযেন আযস্মতো সঞ্জীৰস্স সঞ্জীৰোতেৰ সমঞ্ঞা উদপাদী’’তি (ম॰ নি॰ ১.৫০৭)।

    ‘‘Atha kho te, pāpima, gopālakā pasupālakā kassakā pathāvino tiṇañca kaṭṭhañca gomayañca saṃkaḍḍhitvā āyasmato sañjīvassa kāye upacinitvā aggiṃ datvā pakkamiṃsu. Atha kho, pāpima, āyasmā sañjīvo tassā rattiyā accayena tāya samāpattiyā vuṭṭhahitvā cīvarāni papphoṭetvā pubbaṇhasamayaṃ nivāsetvā pattacīvaramādāya gāmaṃ piṇḍāya pāvisi. Addasaṃsu kho te, pāpima, gopālakā pasupālakā kassakā pathāvino āyasmantaṃ sañjīvaṃ piṇḍāya carantaṃ, disvāna nesaṃ etadahosi – ‘acchariyaṃ vata bho, abbhutaṃ vata bho, ayaṃ samaṇo nisinnakova kālaṅkato, svāyaṃ paṭisañjīvito’ti. Iminā kho evaṃ, pāpima, pariyāyena āyasmato sañjīvassa sañjīvoteva samaññā udapādī’’ti (ma. ni. 1.507).

    খাণুকোণ্ডঞ্ঞত্থেরো পন পকতিযাৰ সমাপত্তিবহুলো, সো অঞ্ঞতরস্মিং অরঞ্ঞে রত্তিং সমাপত্তিং অপ্পেত্ৰা নিসীদি, পঞ্চসতা চোরা ভণ্ডকং থেনেত্ৰা গচ্ছন্তা ‘‘ইদানি অম্হাকং অনুপদং গচ্ছন্তা নত্থী’’তি ৰিস্সমিতুকামা ভণ্ডকং ওরোপযমানা ‘‘খাণুকো অয’’ন্তি মঞ্ঞমানা থেরস্সেৰ উপরি সব্বভণ্ডকানি ঠপেসুং। তেসং ৰিস্সমিত্ৰা গচ্ছন্তানং পঠমং ঠপিতভণ্ডকস্স গহণকালে কালপরিচ্ছেদৰসেন থেরো ৰুট্ঠাসি। তে থেরস্স চলনাকারং দিস্ৰা ভীতা ৰিরৰিংসু। থেরো ‘‘মা ভাযথ, উপাসকা, ভিক্খু অহ’’ন্তি আহ। তে আগন্ত্ৰা ৰন্দিত্ৰা থেরগতেন পসাদেন পব্বজিত্ৰা সহ পটিসম্ভিদাহি অরহত্তং পাপুণিংসু। ততো পভুতি চ থেরো খাণুকোণ্ডঞ্ঞত্থেরো নাম অহোসি। অযমেত্থ পঞ্চহি ভণ্ডকসতেহি অজ্ঝোত্থটস্স তস্সাযস্মতো আবাধাভাৰো সমাধিৰিপ্ফারা ইদ্ধি।

    Khāṇukoṇḍaññatthero pana pakatiyāva samāpattibahulo, so aññatarasmiṃ araññe rattiṃ samāpattiṃ appetvā nisīdi, pañcasatā corā bhaṇḍakaṃ thenetvā gacchantā ‘‘idāni amhākaṃ anupadaṃ gacchantā natthī’’ti vissamitukāmā bhaṇḍakaṃ oropayamānā ‘‘khāṇuko aya’’nti maññamānā therasseva upari sabbabhaṇḍakāni ṭhapesuṃ. Tesaṃ vissamitvā gacchantānaṃ paṭhamaṃ ṭhapitabhaṇḍakassa gahaṇakāle kālaparicchedavasena thero vuṭṭhāsi. Te therassa calanākāraṃ disvā bhītā viraviṃsu. Thero ‘‘mā bhāyatha, upāsakā, bhikkhu aha’’nti āha. Te āgantvā vanditvā theragatena pasādena pabbajitvā saha paṭisambhidāhi arahattaṃ pāpuṇiṃsu. Tato pabhuti ca thero khāṇukoṇḍaññatthero nāma ahosi. Ayamettha pañcahi bhaṇḍakasatehi ajjhotthaṭassa tassāyasmato ābādhābhāvo samādhivipphārā iddhi.

    উত্তরা (অ॰ নি॰ অট্ঠ॰ ১.১.২৬২) পন উপাসিকা রাজগহে মহাধনস্স পুণ্ণস্স সেট্ঠিনো ধীতা, কুমারিককালেযেৰ সদ্ধিং মাতাপিতূহি সোতাপত্তিফলং পত্তা, সা ৰযপ্পত্তা রাজগহসেট্ঠিনো মহতা নিবন্ধেন তস্স পুত্তস্স মিচ্ছাদিট্ঠিকস্স দিন্না। সা বুদ্ধদস্সনায ধম্মস্সৰনায বুদ্ধপ্পমুখস্স ভিক্খুসঙ্ঘস্স দানঞ্চ দাতুং ধম্মঞ্চ সোতুং ওকাসং অলভমানা উপদ্দুতা হুত্ৰা তস্মিংযেৰ নগরে সিরিমং নাম গণিকং পক্কোসাপেত্ৰা ওকাসকরণত্থমেৰ পিতু ঘরাৰ আনীতানি পঞ্চদসকহাপণসহস্সানি তস্সা দত্ৰা ‘‘ইমে কহাপণে গহেত্ৰা ইমং অড্ঢমাসং সেট্ঠিপুত্তং পরিচরাহী’’তি তং সামিকস্স অপ্পেত্ৰা সযং উপোসথঙ্গানি অধিট্ঠায ‘‘ইমং অড্ঢমাসং বুদ্ধদস্সনাদীনি লভিস্সামী’’তি তুট্ঠমানসা যাৰ পৰারণায বুদ্ধপ্পমুখং ভিক্খুসঙ্ঘং নিমন্তাপেত্ৰা অড্ঢমাসং মহাদানং অদাসি, পচ্ছাভত্তং মহানসে খজ্জভোজ্জাদীনি সংৰিদহাপেতি। তস্সা সামিকো ‘‘স্ৰে পৰারণা’’তি সিরিমায সহ ৰাতপানে ঠত্ৰা বহি ওলোকেন্তো তং তথাৰিচরন্তিং সেদকিলিন্নং ছারিকায ওকিণ্ণং অঙ্গারমসিমক্খিতং দিস্ৰা ‘‘অত্তনো সম্পত্তিং অভুঞ্জিত্ৰা কুসলং নাম করোতি বালা’’তি হসি। উত্তরাপি তং ওলোকেত্ৰা ‘‘সম্পরাযত্থং কুসলং ন করোতি বালো’’তি হসি।

    Uttarā (a. ni. aṭṭha. 1.1.262) pana upāsikā rājagahe mahādhanassa puṇṇassa seṭṭhino dhītā, kumārikakāleyeva saddhiṃ mātāpitūhi sotāpattiphalaṃ pattā, sā vayappattā rājagahaseṭṭhino mahatā nibandhena tassa puttassa micchādiṭṭhikassa dinnā. Sā buddhadassanāya dhammassavanāya buddhappamukhassa bhikkhusaṅghassa dānañca dātuṃ dhammañca sotuṃ okāsaṃ alabhamānā upaddutā hutvā tasmiṃyeva nagare sirimaṃ nāma gaṇikaṃ pakkosāpetvā okāsakaraṇatthameva pitu gharāva ānītāni pañcadasakahāpaṇasahassāni tassā datvā ‘‘ime kahāpaṇe gahetvā imaṃ aḍḍhamāsaṃ seṭṭhiputtaṃ paricarāhī’’ti taṃ sāmikassa appetvā sayaṃ uposathaṅgāni adhiṭṭhāya ‘‘imaṃ aḍḍhamāsaṃ buddhadassanādīni labhissāmī’’ti tuṭṭhamānasā yāva pavāraṇāya buddhappamukhaṃ bhikkhusaṅghaṃ nimantāpetvā aḍḍhamāsaṃ mahādānaṃ adāsi, pacchābhattaṃ mahānase khajjabhojjādīni saṃvidahāpeti. Tassā sāmiko ‘‘sve pavāraṇā’’ti sirimāya saha vātapāne ṭhatvā bahi olokento taṃ tathāvicarantiṃ sedakilinnaṃ chārikāya okiṇṇaṃ aṅgāramasimakkhitaṃ disvā ‘‘attano sampattiṃ abhuñjitvā kusalaṃ nāma karoti bālā’’ti hasi. Uttarāpi taṃ oloketvā ‘‘samparāyatthaṃ kusalaṃ na karoti bālo’’ti hasi.

    সিরিমা উভিন্নম্পি তং কিরিযং দিস্ৰা ‘‘অহং ঘরসামিনী’’তি মঞ্ঞমানা ইস্সাপকতা উত্তরায কুজ্ঝিত্ৰা ‘‘দুক্খং উপ্পাদেস্সামী’’তি পাসাদা ওতরতি। উত্তরা তং ঞত্ৰা পীঠকে নিসীদিত্ৰা তং মেত্তেন চিত্তেন ফরি। সিরিমা পাসাদা ওরুয্হ মহানসং পৰিসিত্ৰা পূৰপচনতো উল়ুঙ্কপূরং পক্কুথিতং সপ্পিং গহেত্ৰা তস্সা মত্থকে ওকিরি। তং পদুমিনিপণ্ণে সীতূদকং ৰিয ৰিনিৰট্টেত্ৰা অগমাসি। দাসিযো সিরিমং হত্থেহি পাদেহি পোথেত্ৰা ভূমিযং পাতেসুং। উত্তরা মেত্তাঝানতো ৰুট্ঠায দাসিযো ৰারেসি। সিরিমা উত্তরং খমাপেসি। উত্তরা ‘‘স্ৰে সত্থু পুরতো খমাপেহী’’তি ৰত্ৰা তায কাযৰেয্যাৰটিকং যাচিতায ব্যঞ্জনসম্পাদনং আচিক্খি। সা তং সম্পাদেত্ৰা অত্তনো পরিৰারা পঞ্চসতা গণিকাযো সসঙ্ঘং সত্থারং পরিৰিসিত্ৰা ‘‘খমাপনসহাযিকা হোথা’’তি ৰত্ৰা পুনদিৰসে তথা তাহি গণিকাহি সদ্ধিং সত্থু ভত্তকিচ্চাৰসানে সত্থারং ৰন্দিত্ৰা ‘‘অহং ভগৰা উত্তরায অপরজ্ঝিং, খমতু মে উত্তরা’’তি আহ। সত্থা ‘‘খম, উত্তরে’’তি ৰত্ৰা ‘‘খমামি, ভগৰা’’তি ৰুত্তে ‘‘অক্কোধেন জিনে কোধ’’ন্তিআদিকং (ধ॰ প॰ ২২৩) ধম্মং দেসেসি। উত্তরা পুরেতরমেৰ সামিকঞ্চ সস্সুসসুরে চ সত্থু সন্তিকে উপনেসি। দেসনাৰসানে তে চ তযো জনা, সব্বা চ গণিকাযো সোতাপত্তিফলে পতিট্ঠহিংসূতি। এৰং উত্তরায উপাসিকায পক্কুথিতসপ্পিনা পীল়াভাৰো সমাধিৰিপ্ফারা ইদ্ধি।

    Sirimā ubhinnampi taṃ kiriyaṃ disvā ‘‘ahaṃ gharasāminī’’ti maññamānā issāpakatā uttarāya kujjhitvā ‘‘dukkhaṃ uppādessāmī’’ti pāsādā otarati. Uttarā taṃ ñatvā pīṭhake nisīditvā taṃ mettena cittena phari. Sirimā pāsādā oruyha mahānasaṃ pavisitvā pūvapacanato uḷuṅkapūraṃ pakkuthitaṃ sappiṃ gahetvā tassā matthake okiri. Taṃ paduminipaṇṇe sītūdakaṃ viya vinivaṭṭetvā agamāsi. Dāsiyo sirimaṃ hatthehi pādehi pothetvā bhūmiyaṃ pātesuṃ. Uttarā mettājhānato vuṭṭhāya dāsiyo vāresi. Sirimā uttaraṃ khamāpesi. Uttarā ‘‘sve satthu purato khamāpehī’’ti vatvā tāya kāyaveyyāvaṭikaṃ yācitāya byañjanasampādanaṃ ācikkhi. Sā taṃ sampādetvā attano parivārā pañcasatā gaṇikāyo sasaṅghaṃ satthāraṃ parivisitvā ‘‘khamāpanasahāyikā hothā’’ti vatvā punadivase tathā tāhi gaṇikāhi saddhiṃ satthu bhattakiccāvasāne satthāraṃ vanditvā ‘‘ahaṃ bhagavā uttarāya aparajjhiṃ, khamatu me uttarā’’ti āha. Satthā ‘‘khama, uttare’’ti vatvā ‘‘khamāmi, bhagavā’’ti vutte ‘‘akkodhena jine kodha’’ntiādikaṃ (dha. pa. 223) dhammaṃ desesi. Uttarā puretarameva sāmikañca sassusasure ca satthu santike upanesi. Desanāvasāne te ca tayo janā, sabbā ca gaṇikāyo sotāpattiphale patiṭṭhahiṃsūti. Evaṃ uttarāya upāsikāya pakkuthitasappinā pīḷābhāvo samādhivipphārā iddhi.

    সামাৰতী উপাসিকা নাম কোসম্বিযং উদেনস্স রঞ্ঞো অগ্গমহেসী। তস্স হি রঞ্ঞো পঞ্চসতপঞ্চসতইত্থিপরিৰারা তিস্সো অগ্গমহেসিযো অহেসুং। তাসং সামাৰতী ভদ্দিযনগরে ভদ্দিযসেট্ঠিনো ধীতা। পিতরি কালঙ্কতে পিতু সহাযকস্স কোসম্বিযং ঘোসিতসেট্ঠিনো ঘরে পঞ্চসতইত্থিপরিৰারৰড্ঢিতং ৰযপ্পত্তং রাজা দিস্ৰা সঞ্জাতসিনেহো সপরিৰারমত্তনো ঘরং নেত্ৰা অভিসেকট্ঠানং অদাসি। চণ্ডপজ্জোতস্স রঞ্ঞো ধীতা ৰাসুলদত্তা নাম একা মহেসী। মাগণ্ডিযব্রাহ্মণস্স ধীতা ভগৰতো পাদপরিচারিকং কত্ৰা পিতরা দিয্যমানা –

    Sāmāvatīupāsikā nāma kosambiyaṃ udenassa rañño aggamahesī. Tassa hi rañño pañcasatapañcasataitthiparivārā tisso aggamahesiyo ahesuṃ. Tāsaṃ sāmāvatī bhaddiyanagare bhaddiyaseṭṭhino dhītā. Pitari kālaṅkate pitu sahāyakassa kosambiyaṃ ghositaseṭṭhino ghare pañcasataitthiparivāravaḍḍhitaṃ vayappattaṃ rājā disvā sañjātasineho saparivāramattano gharaṃ netvā abhisekaṭṭhānaṃ adāsi. Caṇḍapajjotassa rañño dhītā vāsuladattā nāma ekā mahesī. Māgaṇḍiyabrāhmaṇassa dhītā bhagavato pādaparicārikaṃ katvā pitarā diyyamānā –

    ‘‘দিস্ৰান তণ্হং অরতিং রগঞ্চ, নাহোসি ছন্দো অপি মেথুনস্মিং।

    ‘‘Disvāna taṇhaṃ aratiṃ ragañca, nāhosi chando api methunasmiṃ;

    কিমেৰিদং মুত্তকরীসপুণ্ণং, পাদাপি নং সম্ফুসিতুং ন ইচ্ছে’’তি॥ (সু॰ নি॰ ৮৪১) –

    Kimevidaṃ muttakarīsapuṇṇaṃ, pādāpi naṃ samphusituṃ na icche’’ti. (su. ni. 841) –

    ভগৰতা ভাসিতং গাথং সুত্ৰা ভগৰতি আঘাতং বন্ধি। তস্সা মাতাপিতরো মাগণ্ডিযসুত্তদেসনাৰসানে অনাগামিফলং পত্ৰা পব্বজিত্ৰা অরহত্তং পাপুণিংসু। তস্সা চূল়পিতা মাগণ্ডিযো তং কোসম্বিং নেত্ৰা রঞ্ঞো অদাসি। সা রঞ্ঞো একা মহেসী।

    Bhagavatā bhāsitaṃ gāthaṃ sutvā bhagavati āghātaṃ bandhi. Tassā mātāpitaro māgaṇḍiyasuttadesanāvasāne anāgāmiphalaṃ patvā pabbajitvā arahattaṃ pāpuṇiṃsu. Tassā cūḷapitā māgaṇḍiyo taṃ kosambiṃ netvā rañño adāsi. Sā rañño ekā mahesī.

    অথ খো ঘোসিতসেট্ঠি কুক্কুটসেট্ঠি পাৰারিকসেট্ঠীতি তযো সেট্ঠিনো লোকে তথাগতুপ্পাদং সুত্ৰা জেতৰনং সত্থু সন্তিকং গন্ত্ৰা ধম্মং সুত্ৰা সোতাপত্তিফলং পত্ৰা অড্ঢমাসং বুদ্ধপ্পমুখস্স ভিক্খুসঙ্ঘস্স মহাদানং দত্ৰা সত্থু কোসম্বিগমনং আযাচিত্ৰা কোসম্বিং গন্ত্ৰা ঘোসিতারামো কুক্কুটারামো পাৰারিকারামোতি তযো জনা তযো আরামে কারাপেত্ৰা অনুপুব্বেন তত্থ আগতং সত্থারং পটিপাটিযা একেকস্মিং দিৰসে একেকস্মিং ৰিহারে ৰসাপেত্ৰা একেকো সসঙ্ঘস্স ভগৰতো মহাদানমদাসি। অথেকদিৰসং তেসং উপট্ঠাকো সুমনো নাম মালাকারো সেট্ঠিনো আযাচিত্ৰা সসঙ্ঘং সত্থারং ভোজেতুং অত্তনো ঘরে নিসীদাপেসি। তস্মিং খণে সামাৰতিযা পরিচারিকা খুজ্জুত্তরা নাম দাসী অট্ঠ কহাপণে গহেত্ৰা তস্স ঘরং অগমাসি। সো ‘‘সসঙ্ঘস্স তাৰ সত্থুনো পরিৰেসনসহাযা হোহী’’তি আহ। সা তথা কত্ৰা সত্থু ভত্তকিচ্চাৰসানে ধম্মদেসনং সুত্ৰা সোতাপন্না হুত্ৰা অঞ্ঞদা চত্তারো কহাপণে অত্তনো আদিযন্তী অদিন্নং আদিযিতুং অভব্বত্তা অট্ঠহি কহাপণেহি পুপ্ফানি আদায সামাৰতিযা উপনামেসি। তায পুপ্ফানং বহুভাৰকারণং পুট্ঠা মুসা ভণিতুং অভব্বত্তা যথাসভাৰং আহ। ‘‘অজ্জ কস্মা ন গণ্হী’’তি ৰুত্তা ‘‘সম্মাসম্বুদ্ধস্স ধম্মং সুত্ৰা অমতং সচ্ছাকাসি’’ন্তি আহ। ‘‘অম্ম উত্তরে, তং ধম্মং অম্হাকম্পি কথেহী’’তি। ‘‘তেন হি মং ন্হাপেত্ৰা সুদ্ধং ৰত্থযুগং দত্ৰা উচ্চে আসনে নিসীদাপেত্ৰা সব্বা নীচাসনেসু নিসীদথা’’তি আহ। তা সব্বাপি তথা করিংসু। সা সেখপটিসম্ভিদপ্পত্তা অরিযসাৰিকা একং ৰত্থং নিৰাসেত্ৰা একং উত্তরাসঙ্গং কত্ৰা বীজনিং গহেত্ৰা তাসং ধম্মং দেসেসি। সামাৰতী চ পঞ্চসতা চ ইত্থিযো সোতাপত্তিফলং পাপুণিংসু। তা সব্বাপি খুজ্জুত্তরং ৰন্দিত্ৰা ‘‘অম্ম, অজ্জতো পট্ঠায ৰেয্যাৰচ্চং অকত্ৰা অম্হাকং মাতুট্ঠানে আচরিযট্ঠানে চ ঠত্ৰা সত্থারা দেসিতদেসিতং ধম্মং সুত্ৰা অম্হাকং কথেহী’’তি আহংসু। সা তথা করোন্তী অপরভাগে তিপিটকধরা হুত্ৰা সত্থারা বহুস্সুতানং উপাসিকানং অগ্গট্ঠানে ঠপিতা অগ্গট্ঠানং লভি। সামাৰতিমিস্সিকা বুদ্ধস্স দস্সনং পিহেন্তি, দসবলে অন্তরৰীথিং পটিপন্নে ৰাতপানেসু অপ্পহোন্তেসু ভিত্তিং ভিন্দিত্ৰা সত্থারং ওলোকেন্তি, ৰন্দনপূজনঞ্চ করোন্তি।

    Atha kho ghositaseṭṭhi kukkuṭaseṭṭhi pāvārikaseṭṭhīti tayo seṭṭhino loke tathāgatuppādaṃ sutvā jetavanaṃ satthu santikaṃ gantvā dhammaṃ sutvā sotāpattiphalaṃ patvā aḍḍhamāsaṃ buddhappamukhassa bhikkhusaṅghassa mahādānaṃ datvā satthu kosambigamanaṃ āyācitvā kosambiṃ gantvā ghositārāmo kukkuṭārāmo pāvārikārāmoti tayo janā tayo ārāme kārāpetvā anupubbena tattha āgataṃ satthāraṃ paṭipāṭiyā ekekasmiṃ divase ekekasmiṃ vihāre vasāpetvā ekeko sasaṅghassa bhagavato mahādānamadāsi. Athekadivasaṃ tesaṃ upaṭṭhāko sumano nāma mālākāro seṭṭhino āyācitvā sasaṅghaṃ satthāraṃ bhojetuṃ attano ghare nisīdāpesi. Tasmiṃ khaṇe sāmāvatiyā paricārikā khujjuttarā nāma dāsī aṭṭha kahāpaṇe gahetvā tassa gharaṃ agamāsi. So ‘‘sasaṅghassa tāva satthuno parivesanasahāyā hohī’’ti āha. Sā tathā katvā satthu bhattakiccāvasāne dhammadesanaṃ sutvā sotāpannā hutvā aññadā cattāro kahāpaṇe attano ādiyantī adinnaṃ ādiyituṃ abhabbattā aṭṭhahi kahāpaṇehi pupphāni ādāya sāmāvatiyā upanāmesi. Tāya pupphānaṃ bahubhāvakāraṇaṃ puṭṭhā musā bhaṇituṃ abhabbattā yathāsabhāvaṃ āha. ‘‘Ajja kasmā na gaṇhī’’ti vuttā ‘‘sammāsambuddhassa dhammaṃ sutvā amataṃ sacchākāsi’’nti āha. ‘‘Amma uttare, taṃ dhammaṃ amhākampi kathehī’’ti. ‘‘Tena hi maṃ nhāpetvā suddhaṃ vatthayugaṃ datvā ucce āsane nisīdāpetvā sabbā nīcāsanesu nisīdathā’’ti āha. Tā sabbāpi tathā kariṃsu. Sā sekhapaṭisambhidappattā ariyasāvikā ekaṃ vatthaṃ nivāsetvā ekaṃ uttarāsaṅgaṃ katvā bījaniṃ gahetvā tāsaṃ dhammaṃ desesi. Sāmāvatī ca pañcasatā ca itthiyo sotāpattiphalaṃ pāpuṇiṃsu. Tā sabbāpi khujjuttaraṃ vanditvā ‘‘amma, ajjato paṭṭhāya veyyāvaccaṃ akatvā amhākaṃ mātuṭṭhāne ācariyaṭṭhāne ca ṭhatvā satthārā desitadesitaṃ dhammaṃ sutvā amhākaṃ kathehī’’ti āhaṃsu. Sā tathā karontī aparabhāge tipiṭakadharā hutvā satthārā bahussutānaṃ upāsikānaṃ aggaṭṭhāne ṭhapitā aggaṭṭhānaṃ labhi. Sāmāvatimissikā buddhassa dassanaṃ pihenti, dasabale antaravīthiṃ paṭipanne vātapānesu appahontesu bhittiṃ bhinditvā satthāraṃ olokenti, vandanapūjanañca karonti.

    মাগণ্ডিযা তত্থ গতা তানি ছিদ্দানি দিস্ৰা তত্থ কারণং পুচ্ছন্তী সত্থু আগতভাৰং ঞত্ৰা ভগৰতি আঘাতেন তাসম্পি কুজ্ঝিত্ৰা ‘‘মহারাজ, সামাৰতিমিস্সিকানং বহিদ্ধা পত্থনা অত্থি, ভিত্তিং ভিন্দিত্ৰা সমণং গোতমং ওলোকেন্তি, কতিপাহেন তং মারেস্সন্তী’’তি রাজানং আহ। রাজা ছিদ্দানি দিস্ৰাপি তস্সা ৰচনং ন সদ্দহি, উদ্ধচ্ছিদ্দকৰাতপানানি কারাপেসি। পুন মাগণ্ডিযা রাজানং তাসু ভিন্দিতুকামা অট্ঠ সজীৰকুক্কুটে আহরাপেত্ৰা ‘‘মহারাজ, তাসং ৰীমংসনত্থং ইমে কুক্কুটে মারেত্ৰা ‘মমত্থায পচাহী’তি পেসেহী’’তি আহ। রাজা তথা পেসেসি। তায ‘‘পাণাতিপাতং ন করোমা’’তি ৰুত্তে পুন ‘‘তস্স সমণস্স গোতমস্স পচিত্ৰা পেসেহী’’তি আহ। রঞ্ঞা তথা পেসিতে মাগণ্ডিযা অট্ঠ মারিতকুক্কুটে তথা ৰত্ৰা পেসেসি। সামাৰতী পচিত্ৰা দসবলস্স পাহেসি। মাগণ্ডিযা তেনপি রাজানং কোপেতুং নাসক্খি।

    Māgaṇḍiyā tattha gatā tāni chiddāni disvā tattha kāraṇaṃ pucchantī satthu āgatabhāvaṃ ñatvā bhagavati āghātena tāsampi kujjhitvā ‘‘mahārāja, sāmāvatimissikānaṃ bahiddhā patthanā atthi, bhittiṃ bhinditvā samaṇaṃ gotamaṃ olokenti, katipāhena taṃ māressantī’’ti rājānaṃ āha. Rājā chiddāni disvāpi tassā vacanaṃ na saddahi, uddhacchiddakavātapānāni kārāpesi. Puna māgaṇḍiyā rājānaṃ tāsu bhinditukāmā aṭṭha sajīvakukkuṭe āharāpetvā ‘‘mahārāja, tāsaṃ vīmaṃsanatthaṃ ime kukkuṭe māretvā ‘mamatthāya pacāhī’ti pesehī’’ti āha. Rājā tathā pesesi. Tāya ‘‘pāṇātipātaṃ na karomā’’ti vutte puna ‘‘tassa samaṇassa gotamassa pacitvā pesehī’’ti āha. Raññā tathā pesite māgaṇḍiyā aṭṭha māritakukkuṭe tathā vatvā pesesi. Sāmāvatī pacitvā dasabalassa pāhesi. Māgaṇḍiyā tenapi rājānaṃ kopetuṃ nāsakkhi.

    রাজা পন তীসু মহেসীসু একেকিস্সা ৰসনট্ঠানে সত্ত সত্ত দিৰসানি ৰসতি। রাজা অত্তনো গমনট্ঠানং হত্থিকন্তৰীণং আদায গচ্ছতি। মাগণ্ডিযা রঞ্ঞো সামাৰতিযা পাসাদগমনকালে দাঠা অগদেন ধোৰাপেত্ৰা ৰেল়ুপব্বে পক্খিপাপেত্ৰা একং কণ্হসপ্পপোতকং আহরাপেত্ৰা অন্তোৰীণায পক্খিপিত্ৰা মালাগুল়কেন ছিদ্দং পিদহি। তং রঞ্ঞো তত্থ গতকালে অপরাপরং ৰিচরন্তী ৰিয হুত্ৰা ৰীণাছিদ্দতো মালাগুল়কং অপনেসি। সপ্পো নিক্খমিত্ৰা পস্সসন্তো ফণং কত্ৰা সযনপিট্ঠে নিপজ্জি। সা আহ – ‘‘ধী সপ্পো’’তি মহাসদ্দমকাসি। রাজা সপ্পং দিস্ৰা কুজ্ঝি। সামাৰতী রঞ্ঞো কুদ্ধভাৰং ঞত্ৰা পঞ্চন্নং ইত্থিসতানং সঞ্ঞমদাসি ‘‘অজ্জ ওধিসকমেত্তাফরণেন রাজানং ফরথা’’তি। সযম্পি তথা অকাসি। রাজা সহস্সথামধনুং আদায জিযং পোঠেত্ৰা সামাৰতিং ধুরে কত্ৰা সব্বা তা ইত্থিযো পটিপাটিযা ঠপাপেত্ৰা ৰিসপীতং খুরপ্পং সন্নয্হিত্ৰা ধনুং পূরেত্ৰা অট্ঠাসি। খুরপ্পং নেৰ খিপিতুং , ন ওরোপিতুং সক্কোতি, গত্তেহি সেদা মুচ্চন্তি, সরীরং ৰেধতি, মুখতো খেল়ো পততি, গণ্হিতব্বগহণং ন পস্সতি, অথ নং সামাৰতী ‘‘কিং, মহারাজ, কিলমসী’’তি আহ। ‘‘আম, দেৰি, কিলমামি, অৰস্সযো মে হোহী’’তি। ‘‘সাধু, মহারাজ, খুরপ্পং পথৰীমুখং করোহী’’তি। রাজা তথা অকাসি। সা ‘‘রঞ্ঞো হত্থতো খুরপ্পং মুচ্চতূ’’তি অধিট্ঠাসি। তস্মিং খণে খুরপ্পং মুচ্চি। রাজা তংখণঞ্ঞেৰ উদকে নিমুজ্জিত্ৰা অল্লৰত্থো অল্লকেসো সামাৰতিযা পাদেসু নিপতিত্ৰা ‘‘খম, দেৰি, ময্হং –

    Rājā pana tīsu mahesīsu ekekissā vasanaṭṭhāne satta satta divasāni vasati. Rājā attano gamanaṭṭhānaṃ hatthikantavīṇaṃ ādāya gacchati. Māgaṇḍiyā rañño sāmāvatiyā pāsādagamanakāle dāṭhā agadena dhovāpetvā veḷupabbe pakkhipāpetvā ekaṃ kaṇhasappapotakaṃ āharāpetvā antovīṇāya pakkhipitvā mālāguḷakena chiddaṃ pidahi. Taṃ rañño tattha gatakāle aparāparaṃ vicarantī viya hutvā vīṇāchiddato mālāguḷakaṃ apanesi. Sappo nikkhamitvā passasanto phaṇaṃ katvā sayanapiṭṭhe nipajji. Sā āha – ‘‘dhī sappo’’ti mahāsaddamakāsi. Rājā sappaṃ disvā kujjhi. Sāmāvatī rañño kuddhabhāvaṃ ñatvā pañcannaṃ itthisatānaṃ saññamadāsi ‘‘ajja odhisakamettāpharaṇena rājānaṃ pharathā’’ti. Sayampi tathā akāsi. Rājā sahassathāmadhanuṃ ādāya jiyaṃ poṭhetvā sāmāvatiṃ dhure katvā sabbā tā itthiyo paṭipāṭiyā ṭhapāpetvā visapītaṃ khurappaṃ sannayhitvā dhanuṃ pūretvā aṭṭhāsi. Khurappaṃ neva khipituṃ , na oropituṃ sakkoti, gattehi sedā muccanti, sarīraṃ vedhati, mukhato kheḷo patati, gaṇhitabbagahaṇaṃ na passati, atha naṃ sāmāvatī ‘‘kiṃ, mahārāja, kilamasī’’ti āha. ‘‘Āma, devi, kilamāmi, avassayo me hohī’’ti. ‘‘Sādhu, mahārāja, khurappaṃ pathavīmukhaṃ karohī’’ti. Rājā tathā akāsi. Sā ‘‘rañño hatthato khurappaṃ muccatū’’ti adhiṭṭhāsi. Tasmiṃ khaṇe khurappaṃ mucci. Rājā taṃkhaṇaññeva udake nimujjitvā allavattho allakeso sāmāvatiyā pādesu nipatitvā ‘‘khama, devi, mayhaṃ –

    ‘সম্মুয্হামি পমুয্হামি, সব্বা মুয্হন্তি মে দিসা।

    ‘Sammuyhāmi pamuyhāmi, sabbā muyhanti me disā;

    সামাৰতী মং তাযস্সু, ত্ৰঞ্চ মে সরণং ভৰা’’’তি॥ – আহ।

    Sāmāvatī maṃ tāyassu, tvañca me saraṇaṃ bhavā’’’ti. – āha;

    সামাৰতী –

    Sāmāvatī –

    ‘‘মা মং ত্ৰং সরণং গচ্ছ, যমহং সরণং গতা।

    ‘‘Mā maṃ tvaṃ saraṇaṃ gaccha, yamahaṃ saraṇaṃ gatā;

    সরণং গচ্ছ তং বুদ্ধং, ত্ৰঞ্চ মে সরণং ভৰা’’তি॥ –

    Saraṇaṃ gaccha taṃ buddhaṃ, tvañca me saraṇaṃ bhavā’’ti. –

    আহ। রাজা ‘‘তেন হি তং সরণং গচ্ছামি সত্থারঞ্চ, ৰরঞ্চ তে দম্মী’’তি আহ। সা ‘‘ৰরো গহিতো হোতু, মহারাজা’’তি আহ। রাজা সত্থারং উপসঙ্কমিত্ৰা সরণং গন্ত্ৰা নিমন্তেত্ৰা বুদ্ধপ্পমুখস্স সঙ্ঘস্স সত্তাহং মহাদানং দত্ৰা ‘‘সামাৰতিং ৰরং গণ্হাহী’’তি আহ। ‘‘সাধু, মহারাজ, ইমং মে ৰরং দেহি, সত্থা পঞ্চহি ভিক্খুসতেহি সদ্ধিং ইধাগচ্ছতু, ধম্মং সোস্সামী’’তি আহ। রাজা সত্থারং ৰন্দিত্ৰা ‘‘ভন্তে, পঞ্চহি ভিক্খুসতেহি সদ্ধিং নিবদ্ধং ইধাগচ্ছথ, সামাৰতিমিস্সিকা ‘ধম্মং সোস্সামা’তি ৰদন্তী’’তি আহ। সত্থা ‘‘মহারাজ, বুদ্ধানং নাম একট্ঠানং নিবদ্ধং গন্তুং ন ৰট্টতি, মহাজনোপি পচ্চাসীসতী’’তি আহ। ‘‘তেন হি, ভন্তে, ভিক্খূ আণাপেথা’’তি। সত্থা আনন্দত্থেরং আণাপেসি। থেরো পঞ্চ ভিক্খুসতানি আদায নিবদ্ধং রাজকুলং গচ্ছতি। তাপি দেৰীপমুখা ইত্থিযো থেরং ভোজেত্ৰা ধম্মং সুণিংসু। সামাৰতিঞ্চ সত্থা মেত্তাৰিহারীনং উপাসিকানং অগ্গট্ঠানে ঠপেসীতি। এৰং রঞ্ঞো খুরপ্পং মুঞ্চিতুং অৰিসহনভাৰো সামাৰতিযা উপাসিকায সমাধিৰিপ্ফারা ইদ্ধীতি । এত্থ চ অৰেচ্চপ্পসাদেন ৰা ওকপ্পনপসাদেন ৰা রতনত্তযসরণগমনেন ৰা রতনত্তযং উপাসতীতি উপাসিকাতি ৰুচ্চতীতি।

    Āha. Rājā ‘‘tena hi taṃ saraṇaṃ gacchāmi satthārañca, varañca te dammī’’ti āha. Sā ‘‘varo gahito hotu, mahārājā’’ti āha. Rājā satthāraṃ upasaṅkamitvā saraṇaṃ gantvā nimantetvā buddhappamukhassa saṅghassa sattāhaṃ mahādānaṃ datvā ‘‘sāmāvatiṃ varaṃ gaṇhāhī’’ti āha. ‘‘Sādhu, mahārāja, imaṃ me varaṃ dehi, satthā pañcahi bhikkhusatehi saddhiṃ idhāgacchatu, dhammaṃ sossāmī’’ti āha. Rājā satthāraṃ vanditvā ‘‘bhante, pañcahi bhikkhusatehi saddhiṃ nibaddhaṃ idhāgacchatha, sāmāvatimissikā ‘dhammaṃ sossāmā’ti vadantī’’ti āha. Satthā ‘‘mahārāja, buddhānaṃ nāma ekaṭṭhānaṃ nibaddhaṃ gantuṃ na vaṭṭati, mahājanopi paccāsīsatī’’ti āha. ‘‘Tena hi, bhante, bhikkhū āṇāpethā’’ti. Satthā ānandattheraṃ āṇāpesi. Thero pañca bhikkhusatāni ādāya nibaddhaṃ rājakulaṃ gacchati. Tāpi devīpamukhā itthiyo theraṃ bhojetvā dhammaṃ suṇiṃsu. Sāmāvatiñca satthā mettāvihārīnaṃ upāsikānaṃ aggaṭṭhāne ṭhapesīti. Evaṃ rañño khurappaṃ muñcituṃ avisahanabhāvo sāmāvatiyā upāsikāya samādhivipphārā iddhīti . Ettha ca aveccappasādena vā okappanapasādena vā ratanattayasaraṇagamanena vā ratanattayaṃ upāsatīti upāsikāti vuccatīti.

    ১৭. অরিযিদ্ধিনিদ্দেসে অরিযা ইদ্ধীতি চেতোৰসিপ্পত্তানং খীণাসৰঅরিযানংযেৰ সম্ভৰতো অরিযা ইদ্ধীতি ৰুচ্চতীতি। ইধ ভিক্খূতি ইমস্মিং সাসনে খীণাসৰো ভিক্খু। অনিট্ঠে ৰত্থুস্মিন্তি আরম্মণপকতিযা অমনাপে ৰত্থুস্মিং সত্তে ৰা সঙ্খারে ৰা। মেত্তায ৰা ফরতীতি সত্তো চে হোতি, মেত্তাভাৰনায ফরতি। ধাতুতো ৰা উপসংহরতীতি সঙ্খারো চে হোতি, ‘‘ধাতুমত্ত’’ন্তি ধাতুমনসিকারং উপসংহরতি। সত্তেপি ধাতূপসংহারো ৰট্টতি। অসুভায ৰা ফরতীতি সত্তো চে, অসুভভাৰনায ফরতি। অনিচ্চতো ৰা উপসংহরতীতি সঙ্খারো চে, ‘‘অনিচ্চ’’ন্তি মনসিকারং উপসংহরতি। তদুভযন্তি তং উভযং। উপেক্খকোতি ছল়ঙ্গুপেক্খায উপেক্খকো। সতোতি সতিৰেপুল্লপ্পত্তত্তা। সম্পজানোতি পঞ্ঞায সম্পজানকারিত্তা। চক্খুনা রূপং দিস্ৰাতি কারণৰসেন চক্খূতি লদ্ধৰোহারেন রূপদস্সনসমত্থেন চক্খুৰিঞ্ঞাণেন রূপং দিস্ৰা। পোরাণা পনাহু – ‘‘চক্খু রূপং ন পস্সতি অচিত্তকত্তা, চিত্তং ন পস্সতি অচক্খুকত্তা, দ্ৰারারম্মণসঙ্ঘট্টনে পন পসাদৰত্থুকেন চিত্তেন পস্সতি। ঈদিসী পনেসা ‘ধনুনা ৰিজ্ঝতী’তিআদীসু ৰিয সসম্ভারকথা নাম হোতি। তস্মা চক্খুৰিঞ্ঞাণেন রূপং দিস্ৰাতি অযমেত্থ অত্থো’’তি (ধ॰ স॰ অট্ঠ॰ ১৩৫২)। অথ ৰা চক্খুনা করণভূতেন রূপং দিস্ৰাতি অত্থো। নেৰ সুমনো হোতীতি গেহসিতসোমনস্সপটিক্খেপো, ন কিরিযভূতায সোমনস্সৰেদনায। ন দুম্মনোতি সব্বদোমনস্সপটিক্খেপো। উপেক্খকো ৰিহরতীতি ইট্ঠানিট্ঠারম্মণাপাথে পরিসুদ্ধপকতিভাৰাৰিজহনাকারভূতায ছসু দ্ৰারেসু পৰত্তনতো ‘‘ছল়ঙ্গুপেক্খা’’তি লদ্ধনামায তত্রমজ্ঝত্তুপেক্খায উপেক্খকো ৰিহরতি। সোতেন সদ্দং সুত্ৰাতিআদীসুপি এসেৰ নযো।

    17. Ariyiddhiniddese ariyā iddhīti cetovasippattānaṃ khīṇāsavaariyānaṃyeva sambhavato ariyā iddhīti vuccatīti. Idha bhikkhūti imasmiṃ sāsane khīṇāsavo bhikkhu. Aniṭṭhe vatthusminti ārammaṇapakatiyā amanāpe vatthusmiṃ satte vā saṅkhāre vā. Mettāya vā pharatīti satto ce hoti, mettābhāvanāya pharati. Dhātuto vā upasaṃharatīti saṅkhāro ce hoti, ‘‘dhātumatta’’nti dhātumanasikāraṃ upasaṃharati. Sattepi dhātūpasaṃhāro vaṭṭati. Asubhāya vā pharatīti satto ce, asubhabhāvanāya pharati. Aniccato vā upasaṃharatīti saṅkhāro ce, ‘‘anicca’’nti manasikāraṃ upasaṃharati. Tadubhayanti taṃ ubhayaṃ. Upekkhakoti chaḷaṅgupekkhāya upekkhako. Satoti sativepullappattattā. Sampajānoti paññāya sampajānakārittā. Cakkhunā rūpaṃ disvāti kāraṇavasena cakkhūti laddhavohārena rūpadassanasamatthena cakkhuviññāṇena rūpaṃ disvā. Porāṇā panāhu – ‘‘cakkhu rūpaṃ na passati acittakattā, cittaṃ na passati acakkhukattā, dvārārammaṇasaṅghaṭṭane pana pasādavatthukena cittena passati. Īdisī panesā ‘dhanunā vijjhatī’tiādīsu viya sasambhārakathā nāma hoti. Tasmā cakkhuviññāṇena rūpaṃ disvāti ayamettha attho’’ti (dha. sa. aṭṭha. 1352). Atha vā cakkhunā karaṇabhūtena rūpaṃ disvāti attho. Neva sumano hotīti gehasitasomanassapaṭikkhepo, na kiriyabhūtāya somanassavedanāya. Na dummanoti sabbadomanassapaṭikkhepo. Upekkhako viharatīti iṭṭhāniṭṭhārammaṇāpāthe parisuddhapakatibhāvāvijahanākārabhūtāya chasu dvāresu pavattanato ‘‘chaḷaṅgupekkhā’’ti laddhanāmāya tatramajjhattupekkhāya upekkhako viharati. Sotena saddaṃ sutvātiādīsupi eseva nayo.

    ১৮. কম্মৰিপাকজিদ্ধিনিদ্দেসে সব্বেসং পক্খীনন্তি সব্বেসং পক্খিজাতানং ঝানাভিঞ্ঞা ৰিনাযেৰ আকাসেন গমনং। তথা সব্বেসং দেৰানং আকাসগমনং দস্সনাদীনি চ। একচ্চানং মনুস্সানন্তি পঠমকপ্পিকানং মনুস্সানং। একচ্চানং ৰিনিপাতিকানন্তি পিযঙ্করমাতা পুনব্বসুমাতা ফুস্সমিত্তা ধম্মগুত্তাতিএৰমাদীনং সুখসমুস্সযতো ৰিনিপতিতত্তা ৰিনিপাতিকানং অঞ্ঞেসঞ্চ পেতানং নাগসুপণ্ণানঞ্চ আকাসগমনাদিকং কম্মৰিপাকজা ইদ্ধি।

    18. Kammavipākajiddhiniddese sabbesaṃ pakkhīnanti sabbesaṃ pakkhijātānaṃ jhānābhiññā vināyeva ākāsena gamanaṃ. Tathā sabbesaṃ devānaṃ ākāsagamanaṃ dassanādīni ca. Ekaccānaṃ manussānanti paṭhamakappikānaṃ manussānaṃ. Ekaccānaṃ vinipātikānanti piyaṅkaramātā punabbasumātā phussamittā dhammaguttātievamādīnaṃ sukhasamussayato vinipatitattā vinipātikānaṃ aññesañca petānaṃ nāgasupaṇṇānañca ākāsagamanādikaṃ kammavipākajā iddhi.

    পুঞ্ঞৰতো ইদ্ধিনিদ্দেসে রাজাতি ধম্মেন পরেসং রঞ্জনতো রাজা। রতনচক্কং ৰত্তেতীতি চক্কৰত্তী। ৰেহাসং গচ্ছতীতি অচ্চন্তসংযোগত্থে উপযোগৰচনং। চতুরঙ্গিনিযাতি হত্থিঅস্সরথপত্তিসঙ্খাতচতুঅঙ্গৰতিযা। সেনাতি তেসং সমূহমত্তমেৰ। অন্তমসোতি হেট্ঠিমন্ততো। অস্সবন্ধা নাম অস্সানং রক্খকা। গোপুরিসা নাম গুন্নং রক্খকা। উপাদাযাতি অৰিস্সজ্জেত্ৰা। এৰং তেসং ৰেহাসগমনঞ্চ পুঞ্ঞৰতো ইদ্ধীতি অত্থো।

    Puññavato iddhiniddese rājāti dhammena paresaṃ rañjanato rājā. Ratanacakkaṃ vattetīti cakkavattī. Vehāsaṃ gacchatīti accantasaṃyogatthe upayogavacanaṃ. Caturaṅginiyāti hatthiassarathapattisaṅkhātacatuaṅgavatiyā. Senāti tesaṃ samūhamattameva. Antamasoti heṭṭhimantato. Assabandhā nāma assānaṃ rakkhakā. Gopurisā nāma gunnaṃ rakkhakā. Upādāyāti avissajjetvā. Evaṃ tesaṃ vehāsagamanañca puññavato iddhīti attho.

    জোতিকস্স গহপতিস্স পুঞ্ঞৰতো ইদ্ধীতি জোতিকো নাম পুব্বে পচ্চেকবুদ্ধেসু কতাধিকারো রাজগহনগরে সেট্ঠি। তস্স কির জাতদিৰসে সকলনগরে সব্বাৰুধানি জলিংসু, সব্বেসং কাযারুল়্হানি আভরণানিপি পজ্জলিতানি ৰিয ওভাসং মুঞ্চিংসু, নগরং একপজ্জোতং অহোসি। অথস্স নামগ্গহণদিৰসে সকলনগরস্স একজোতিভূতত্তা জোতিকোতি নামং করিংসু। অথস্স ৰযপ্পত্তকালে গেহকরণত্থায ভূমিতলে সোধিযমানে সক্কো দেৰরাজা আগন্ত্ৰা সোল়সকরীসমত্তে ঠানে পথৰিং ভিন্দিত্ৰা সত্তরতনমযং সত্তভূমিকং পাসাদং উট্ঠাপেসি, পাসাদং পরিক্খিপিত্ৰা সত্তরতনমযে সত্তদ্ৰারকোট্ঠকযুত্তে সত্তপাকারে উট্ঠাপেসি, পাকারপরিযন্তে চতুসট্ঠি কপ্পরুক্খে উট্ঠাপেসি, পাসাদস্স চতূসু কণ্ণেসু যোজনিকতিগাৰুতিকদ্ৰিগাৰুতিকএকগাৰুতিকা চতস্সো নিধিকুম্ভিযো উট্ঠাপেসি। পাসাদস্স চতূসু কণ্ণেসু তরুণতালক্খন্ধপ্পমাণা চতস্সো সুৰণ্ণমযা উচ্ছুযট্ঠিযো নিব্বত্তিংসু। তাসং মণিমযানি পত্তানি সুৰণ্ণমযানি পব্বানি অহেসুং। সত্তসু দ্ৰারকোট্ঠকেসু একেকস্মিং একদ্ৰিতিচতুপঞ্চছসত্তযক্খসহস্সপরিৰারা সত্ত যক্খা আরক্খং গণ্হিংসু।

    Jotikassagahapatissa puññavato iddhīti jotiko nāma pubbe paccekabuddhesu katādhikāro rājagahanagare seṭṭhi. Tassa kira jātadivase sakalanagare sabbāvudhāni jaliṃsu, sabbesaṃ kāyāruḷhāni ābharaṇānipi pajjalitāni viya obhāsaṃ muñciṃsu, nagaraṃ ekapajjotaṃ ahosi. Athassa nāmaggahaṇadivase sakalanagarassa ekajotibhūtattā jotikoti nāmaṃ kariṃsu. Athassa vayappattakāle gehakaraṇatthāya bhūmitale sodhiyamāne sakko devarājā āgantvā soḷasakarīsamatte ṭhāne pathaviṃ bhinditvā sattaratanamayaṃ sattabhūmikaṃ pāsādaṃ uṭṭhāpesi, pāsādaṃ parikkhipitvā sattaratanamaye sattadvārakoṭṭhakayutte sattapākāre uṭṭhāpesi, pākārapariyante catusaṭṭhi kapparukkhe uṭṭhāpesi, pāsādassa catūsu kaṇṇesu yojanikatigāvutikadvigāvutikaekagāvutikā catasso nidhikumbhiyo uṭṭhāpesi. Pāsādassa catūsu kaṇṇesu taruṇatālakkhandhappamāṇā catasso suvaṇṇamayā ucchuyaṭṭhiyo nibbattiṃsu. Tāsaṃ maṇimayāni pattāni suvaṇṇamayāni pabbāni ahesuṃ. Sattasu dvārakoṭṭhakesu ekekasmiṃ ekadviticatupañcachasattayakkhasahassaparivārā satta yakkhā ārakkhaṃ gaṇhiṃsu.

    বিম্বিসারমহারাজা পাসাদাদীনং উট্ঠানং সুত্ৰা সেট্ঠিছত্তং পহিণি। সো জোতিকসেট্ঠীতি সকলজম্বুদীপে পাকটো হুত্ৰা উত্তরকুরুতো দেৰতাহি আনেত্ৰা সিরিগব্ভে নিসীদাপিতায একঞ্চ তণ্ডুলনাল়িং তযো চ জোতিপাসাণে গহেত্ৰা আগতায ভরিযায সদ্ধিং তস্মিং পাসাদে মহাসম্পত্তিং অনুভৰন্তো ৰসি। তেসং যাৰজীৰং তায একতণ্ডুলনাল়িযা ভত্তং পহোসি। সচে কির তে সকটসতম্পি তণ্ডুলানং পূরেতুকামা হোন্তি, সা তণ্ডুলনাল়িযেৰ হুত্ৰা তিট্ঠতি। ভত্তপচনকালে তণ্ডুলে উক্খলিযং পক্খিপিত্ৰা তেসং পাসাণানং উপরি ঠপেন্তি। পাসাণা তাৰদেৰ পজ্জলিত্ৰা ভত্তে পক্কমত্তে নিব্বাযন্তি। তেনেৰ সঞ্ঞাণেন ভত্তস্স পক্কভাৰং জানন্তি। সূপেয্যাদিপচনকালেপি এসেৰ নযো। এৰং তেসং জোতিপাসাণেহি আহারো পচ্চতি, মণিআলোকেন ৰসন্তি। অগ্গিস্স ৰা দীপস্স ৰা ওভাসমেৰ ন জানিংসু। জোতিকস্স কির এৰরূপা সম্পত্তীতি সকলজম্বুদীপে পাকটো অহোসি। মহাজনো যানাদীহি দস্সনত্থায আগচ্ছতি। জোতিকসেট্ঠি আগতাগতানং উত্তরকুরুতণ্ডুলানং ভত্তং দাপেতি, ‘‘কপ্পরুক্খেহি ৰত্থাভরণানি গণ্হন্তূ’’তি আণাপেতি, ‘‘গাৰুতিকনিধিকুম্ভিযা মুখং ৰিৰরাপেত্ৰা যাপনমত্তং গণ্হন্তূ’’তি আণাপেতি। সকলজম্বুদীপৰাসিকেসু ধনং গহেত্ৰা গচ্ছন্তেসু নিধিকুম্ভিযা অঙ্গুলমত্তম্পি ঊনং নাহোসীতি অযমস্স পুঞ্ঞৰতো ইদ্ধি।

    Bimbisāramahārājā pāsādādīnaṃ uṭṭhānaṃ sutvā seṭṭhichattaṃ pahiṇi. So jotikaseṭṭhīti sakalajambudīpe pākaṭo hutvā uttarakuruto devatāhi ānetvā sirigabbhe nisīdāpitāya ekañca taṇḍulanāḷiṃ tayo ca jotipāsāṇe gahetvā āgatāya bhariyāya saddhiṃ tasmiṃ pāsāde mahāsampattiṃ anubhavanto vasi. Tesaṃ yāvajīvaṃ tāya ekataṇḍulanāḷiyā bhattaṃ pahosi. Sace kira te sakaṭasatampi taṇḍulānaṃ pūretukāmā honti, sā taṇḍulanāḷiyeva hutvā tiṭṭhati. Bhattapacanakāle taṇḍule ukkhaliyaṃ pakkhipitvā tesaṃ pāsāṇānaṃ upari ṭhapenti. Pāsāṇā tāvadeva pajjalitvā bhatte pakkamatte nibbāyanti. Teneva saññāṇena bhattassa pakkabhāvaṃ jānanti. Sūpeyyādipacanakālepi eseva nayo. Evaṃ tesaṃ jotipāsāṇehi āhāro paccati, maṇiālokena vasanti. Aggissa vā dīpassa vā obhāsameva na jāniṃsu. Jotikassa kira evarūpā sampattīti sakalajambudīpe pākaṭo ahosi. Mahājano yānādīhi dassanatthāya āgacchati. Jotikaseṭṭhi āgatāgatānaṃ uttarakurutaṇḍulānaṃ bhattaṃ dāpeti, ‘‘kapparukkhehi vatthābharaṇāni gaṇhantū’’ti āṇāpeti, ‘‘gāvutikanidhikumbhiyā mukhaṃ vivarāpetvā yāpanamattaṃ gaṇhantū’’ti āṇāpeti. Sakalajambudīpavāsikesu dhanaṃ gahetvā gacchantesu nidhikumbhiyā aṅgulamattampi ūnaṃ nāhosīti ayamassa puññavato iddhi.

    জটিলস্স গহপতিস্স পুঞ্ঞৰতো ইদ্ধীতি জটিলো নাম কস্সপস্স ভগৰতো ধাতুচেতিযে কতাধিকারো তক্কসিলাযং সেট্ঠি। তস্স কির মাতা বারাণসিযং সেট্ঠিধীতা অভিরূপা অহোসি । তং পন্নরসসোল়সৰস্সুদ্দেসিককালে আরক্খনত্থায সত্তভূমিকস্স পাসাদস্স উপরিতলে ৰাসযিংসু। তং একদিৰসং ৰাতপানং ৰিৰরিত্ৰা বহি ওলোকিযমানং আকাসেন গচ্ছন্তো ৰিজ্জাধরো দিস্ৰা উপ্পন্নসিনেহো ৰাতপানেন পৰিসিত্ৰা তায সদ্ধিং সন্থৰমকাসি। সা তেন গব্ভং গণ্হি। অথ নং দাসী দিস্ৰা ‘‘অম্ম, কিং ইদ’’ন্তি ৰত্ৰা ‘‘হোতু, কস্সচি মা আচিক্খী’’তি ৰুত্তা ভযেন তুণ্হী অহোসি। সাপি দসমে মাসে পুত্তং ৰিজাযিত্ৰা নৰভাজনং আহরাপেত্ৰা তত্থ তং দারকং নিপজ্জাপেত্ৰা তং ভাজনং পিদহিত্ৰা উপরি পুপ্ফদামানি ঠপেত্ৰা ‘‘ইমং সীসেন উক্খিপিত্ৰা গন্ত্ৰা গঙ্গায ৰিস্সজ্জেহি, ‘কিং ইদ’ন্তি চ পুট্ঠা ‘অয্যায মে বলিকম্ম’ন্তি ৰদেয্যাসী’’তি দাসিং আণাপেসি। সা তথা অকাসি। হেট্ঠাগঙ্গাযপি দ্ৰে ইত্থিযো ন্হাযমানা তং ভাজনং উদকেন আহরিযমানং দিস্ৰা একা ‘‘ময্হেতং ভাজন’’ন্তি আহ। একা ‘‘যং এতস্স অন্তো, তং ময্হ’’ন্তি ৰত্ৰা ভাজনে সম্পত্তে তং আদায থলে ঠপেত্ৰা ৰিৰরিত্ৰা দারকং দিস্ৰা একা ‘‘মম ভাজন’’ন্তি ৰুত্তত্তা ‘‘দারকো মমেৰ হোতী’’তি আহ। একা ‘‘যং ভাজনস্স অন্তো, তং মমা’’তি ৰুত্তত্তা ‘‘মম দারকো’’তি আহ। তা ৰিৰদমানা ৰিনিচ্ছযং গন্ত্ৰা অমচ্চেসু ৰিনিচ্ছিতুং অসক্কোন্তেসু রঞ্ঞো সন্তিকং অগমংসু। রাজা তাসং ৰচনং সুত্ৰা ‘‘ত্ৰং দারকং গণ্হ, ত্ৰং ভাজন’’ন্তি আহ। যায পন দারকো লদ্ধো, সা মহাকচ্চাযনত্থেরস্স উপট্ঠাযিকা হোতি। সা তং দারকং ‘‘থেরস্স সন্তিকে পব্বাজেস্সামী’’তি পোসেসি। তস্স জাতদিৰসে গব্ভমলস্স ধোৰিত্ৰা অনপনীতত্তা কেসা জটিতা হুত্ৰা অট্ঠংসু। তেনস্স জটিলোতেৰ নামং অকংসু।

    Jaṭilassa gahapatissa puññavato iddhīti jaṭilo nāma kassapassa bhagavato dhātucetiye katādhikāro takkasilāyaṃ seṭṭhi. Tassa kira mātā bārāṇasiyaṃ seṭṭhidhītā abhirūpā ahosi . Taṃ pannarasasoḷasavassuddesikakāle ārakkhanatthāya sattabhūmikassa pāsādassa uparitale vāsayiṃsu. Taṃ ekadivasaṃ vātapānaṃ vivaritvā bahi olokiyamānaṃ ākāsena gacchanto vijjādharo disvā uppannasineho vātapānena pavisitvā tāya saddhiṃ santhavamakāsi. Sā tena gabbhaṃ gaṇhi. Atha naṃ dāsī disvā ‘‘amma, kiṃ ida’’nti vatvā ‘‘hotu, kassaci mā ācikkhī’’ti vuttā bhayena tuṇhī ahosi. Sāpi dasame māse puttaṃ vijāyitvā navabhājanaṃ āharāpetvā tattha taṃ dārakaṃ nipajjāpetvā taṃ bhājanaṃ pidahitvā upari pupphadāmāni ṭhapetvā ‘‘imaṃ sīsena ukkhipitvā gantvā gaṅgāya vissajjehi, ‘kiṃ ida’nti ca puṭṭhā ‘ayyāya me balikamma’nti vadeyyāsī’’ti dāsiṃ āṇāpesi. Sā tathā akāsi. Heṭṭhāgaṅgāyapi dve itthiyo nhāyamānā taṃ bhājanaṃ udakena āhariyamānaṃ disvā ekā ‘‘mayhetaṃ bhājana’’nti āha. Ekā ‘‘yaṃ etassa anto, taṃ mayha’’nti vatvā bhājane sampatte taṃ ādāya thale ṭhapetvā vivaritvā dārakaṃ disvā ekā ‘‘mama bhājana’’nti vuttattā ‘‘dārako mameva hotī’’ti āha. Ekā ‘‘yaṃ bhājanassa anto, taṃ mamā’’ti vuttattā ‘‘mama dārako’’ti āha. Tā vivadamānā vinicchayaṃ gantvā amaccesu vinicchituṃ asakkontesu rañño santikaṃ agamaṃsu. Rājā tāsaṃ vacanaṃ sutvā ‘‘tvaṃ dārakaṃ gaṇha, tvaṃ bhājana’’nti āha. Yāya pana dārako laddho, sā mahākaccāyanattherassa upaṭṭhāyikā hoti. Sā taṃ dārakaṃ ‘‘therassa santike pabbājessāmī’’ti posesi. Tassa jātadivase gabbhamalassa dhovitvā anapanītattā kesā jaṭitā hutvā aṭṭhaṃsu. Tenassa jaṭiloteva nāmaṃ akaṃsu.

    তস্স পদসা ৰিচরণকালে থেরো তং গেহং পিণ্ডায পাৰিসি। উপাসিকা থেরং নিসীদাপেত্ৰা আহারমদাসি। থেরো দারকং দিস্ৰা ‘‘উপাসিকে, দারকো তে লদ্ধো’’তি পুচ্ছি। ‘‘আম, ভন্তে, ইমাহং তুম্হাকং সন্তিকে পব্বাজেস্সন্তি পোসেসি’’ন্তি আহ। থেরো ‘‘সাধূ’’তি তং আদায গচ্ছন্তো ‘‘অত্থি নু খো ইমস্স গিহিসম্পত্তিং অনুভৰিতুং পুঞ্ঞকম্ম’’ন্তি ওলোকেন্তো ‘‘মহাপুঞ্ঞো সত্তো মহাসম্পত্তিং অনুভৰিস্সতি, দহরো এৰ চ তাৰ, ঞাণম্পি তাৰস্স পরিপাকং ন গচ্ছতী’’তি চিন্তেত্ৰা তং আদায তক্কসিলাযং একস্স উপট্ঠাকস্স গেহং অগমাসি। সো থেরং ৰন্দিত্ৰা ঠিতো দারকং দিস্ৰা ‘‘দারকো, ভন্তে, লদ্ধো’’তি পুচ্ছি। ‘‘আম, উপাসক, পব্বজিস্সতি, দহরো তাৰ তৰ সন্তিকে হোতূ’’তি। সো ‘‘সাধু, ভন্তে’’তি তং পুত্তট্ঠানে ঠপেত্ৰা পটিজগ্গি। তস্স পন গেহে দ্ৰাদস ৰস্সানি ভণ্ডকং উস্সন্নং হোতি। সো গামন্তরং গচ্ছন্তো সব্বম্পি তং ভণ্ডকং আপণং আহরিত্ৰা তস্স তস্স ভণ্ডকস্স মূলং আচিক্খিত্ৰা ‘‘ইদঞ্চিদঞ্চ এত্তকং নাম ধনং গহেত্ৰা দদেয্যাসী’’তি ৰত্ৰা পক্কামি।

    Tassa padasā vicaraṇakāle thero taṃ gehaṃ piṇḍāya pāvisi. Upāsikā theraṃ nisīdāpetvā āhāramadāsi. Thero dārakaṃ disvā ‘‘upāsike, dārako te laddho’’ti pucchi. ‘‘Āma, bhante, imāhaṃ tumhākaṃ santike pabbājessanti posesi’’nti āha. Thero ‘‘sādhū’’ti taṃ ādāya gacchanto ‘‘atthi nu kho imassa gihisampattiṃ anubhavituṃ puññakamma’’nti olokento ‘‘mahāpuñño satto mahāsampattiṃ anubhavissati, daharo eva ca tāva, ñāṇampi tāvassa paripākaṃ na gacchatī’’ti cintetvā taṃ ādāya takkasilāyaṃ ekassa upaṭṭhākassa gehaṃ agamāsi. So theraṃ vanditvā ṭhito dārakaṃ disvā ‘‘dārako, bhante, laddho’’ti pucchi. ‘‘Āma, upāsaka, pabbajissati, daharo tāva tava santike hotū’’ti. So ‘‘sādhu, bhante’’ti taṃ puttaṭṭhāne ṭhapetvā paṭijaggi. Tassa pana gehe dvādasa vassāni bhaṇḍakaṃ ussannaṃ hoti. So gāmantaraṃ gacchanto sabbampi taṃ bhaṇḍakaṃ āpaṇaṃ āharitvā tassa tassa bhaṇḍakassa mūlaṃ ācikkhitvā ‘‘idañcidañca ettakaṃ nāma dhanaṃ gahetvā dadeyyāsī’’ti vatvā pakkāmi.

    তং দিৰসং নগরপরিগ্গাহিকা দেৰতা অন্তমসো জীরকমরিচমত্তকেনাপি অত্থিকে তস্সেৰ আপণাভিমুখে করিংসু। সো দ্ৰাদস ৰস্সানি উস্সন্নভণ্ডকং একদিৰসেনেৰ ৰিক্কিণি। কুটুম্বিকো আগন্ত্ৰা আপণে কিঞ্চি অদিস্ৰা ‘‘সব্বং তে, তাত, ভণ্ডকং নাসিত’’ন্তি আহ। ‘‘ন নাসিতং, তাত, সব্বং তুম্হেহি ৰুত্তনযেন ৰিক্কিণিতং, ইদং অসুকস্স মূলং, ইদং অসুকস্স মূল’’ন্তি সব্বমূলং তস্সেৰ অপ্পেসি। কুটুম্বিকো পসীদিত্ৰা ‘‘অনগ্ঘো পুরিসো যত্থ কত্থচি জীৰিতুং সমত্থো’’তি অত্তনো ৰযপ্পত্তং ধীতরং তস্স দত্ৰা ‘‘গেহমস্স করোথা’’তি পুরিসে আণাপেত্ৰা নিট্ঠিতে গেহে ‘‘গচ্ছথ তুম্হে, অত্তনো গেহে ৰসথা’’তি আহ। অথস্স গেহপৰিসনকালে একেন পাদেন উম্মারে অক্কন্তমত্তে গেহস্স পচ্ছিমভাগে ভূমিট্ঠানে অসীতিহত্থো সুৰণ্ণপব্বতো উট্ঠহি। রাজা কির জটিলস্স গেহে ভূমিং ভিন্দিত্ৰা সুৰণ্ণপব্বতো উট্ঠিতোতি সুত্ৰা তস্স সেট্ঠিছত্তং পেসেসি। সো জটিলসেট্ঠি নাম অহোসীতি অযমস্স পুঞ্ঞৰতো ইদ্ধি।

    Taṃ divasaṃ nagarapariggāhikā devatā antamaso jīrakamaricamattakenāpi atthike tasseva āpaṇābhimukhe kariṃsu. So dvādasa vassāni ussannabhaṇḍakaṃ ekadivaseneva vikkiṇi. Kuṭumbiko āgantvā āpaṇe kiñci adisvā ‘‘sabbaṃ te, tāta, bhaṇḍakaṃ nāsita’’nti āha. ‘‘Na nāsitaṃ, tāta, sabbaṃ tumhehi vuttanayena vikkiṇitaṃ, idaṃ asukassa mūlaṃ, idaṃ asukassa mūla’’nti sabbamūlaṃ tasseva appesi. Kuṭumbiko pasīditvā ‘‘anaggho puriso yattha katthaci jīvituṃ samattho’’ti attano vayappattaṃ dhītaraṃ tassa datvā ‘‘gehamassa karothā’’ti purise āṇāpetvā niṭṭhite gehe ‘‘gacchatha tumhe, attano gehe vasathā’’ti āha. Athassa gehapavisanakāle ekena pādena ummāre akkantamatte gehassa pacchimabhāge bhūmiṭṭhāne asītihattho suvaṇṇapabbato uṭṭhahi. Rājā kira jaṭilassa gehe bhūmiṃ bhinditvā suvaṇṇapabbato uṭṭhitoti sutvā tassa seṭṭhichattaṃ pesesi. So jaṭilaseṭṭhi nāma ahosīti ayamassa puññavato iddhi.

    মেণ্ডকস্স সেট্ঠিস্স পুঞ্ঞৰতো ইদ্ধীতি (মহাৰ॰ ২৯৬) মেণ্ডকো নাম ৰিপস্সিম্হি ভগৰতি কতাধিকারো মগধরট্ঠে ভদ্দিযনগরে সেট্ঠি। তস্স কির পচ্ছিমগেহে অট্ঠকরীসমত্তে ঠানে হত্থিঅস্সউসভপ্পমাণা সুৰণ্ণমেণ্ডকা পথৰিং ভিন্দিত্ৰা পিট্ঠিযা পিট্ঠিং পহরমানা উট্ঠহিংসু, তেসং মুখেসু পঞ্চৰণ্ণানং সুত্তানং গেণ্ডুকা পক্খিত্তা হোন্তি। সপ্পিতেলমধুফাণিতাদীহি চ ৰত্থচ্ছাদনহিরঞ্ঞসুৰণ্ণাদীহি চ অত্থে সতি তেসং মুখতো গেণ্ডুকং অপনেন্তি। একস্সপি মেণ্ডকস্স মুখতো সকলজম্বুদীপৰাসীনং পহোনকং সপ্পিতেলমধুফাণিতৰত্থচ্ছাদনহিরঞ্ঞসুৰণ্ণং নিক্খমতি। ততো পট্ঠাযেস মেণ্ডকসেট্ঠীতি পঞ্ঞাযীতি অযমস্স পুঞ্ঞৰতো ইদ্ধি।

    Meṇḍakassa seṭṭhissa puññavato iddhīti (mahāva. 296) meṇḍako nāma vipassimhi bhagavati katādhikāro magadharaṭṭhe bhaddiyanagare seṭṭhi. Tassa kira pacchimagehe aṭṭhakarīsamatte ṭhāne hatthiassausabhappamāṇā suvaṇṇameṇḍakā pathaviṃ bhinditvā piṭṭhiyā piṭṭhiṃ paharamānā uṭṭhahiṃsu, tesaṃ mukhesu pañcavaṇṇānaṃ suttānaṃ geṇḍukā pakkhittā honti. Sappitelamadhuphāṇitādīhi ca vatthacchādanahiraññasuvaṇṇādīhi ca atthe sati tesaṃ mukhato geṇḍukaṃ apanenti. Ekassapi meṇḍakassa mukhato sakalajambudīpavāsīnaṃ pahonakaṃ sappitelamadhuphāṇitavatthacchādanahiraññasuvaṇṇaṃ nikkhamati. Tato paṭṭhāyesa meṇḍakaseṭṭhīti paññāyīti ayamassa puññavato iddhi.

    ঘোসিতস্স গহপতিস্স পুঞ্ঞৰতো ইদ্ধীতি ঘোসিতো (অ॰ নি॰ অট্ঠ॰ ১.১.২৬০-২৬১) নাম পচ্চেকসম্বুদ্ধে কতাধিকারো সক্করট্ঠে কোসম্বিযং সেট্ঠি। সো কির দেৰলোকতো চৰিত্ৰা কোসম্বিযং নগরসোভিনিযা কুচ্ছিস্মিং নিব্বত্তি। সা তং ৰিজাতদিৰসে সুপ্পে সযাপেত্ৰা সঙ্কারকূটে ছড্ডাপেসি। দারকং কাকসুনখা পরিৰারেত্ৰা নিসীদিংসু। একো পুরিসো তং দিস্ৰাৰ পুত্তসঞ্ঞং পটিলভিত্ৰা ‘‘পুত্তো মে লদ্ধো’’তি গেহং নেসি। তদা কোসম্বিকসেট্ঠি পুরোহিতং দিস্ৰা ‘‘কিং, আচরিয, অজ্জ তে তিথিকরণনক্খত্তাদযো ওলোকিতা’’তি পুচ্ছিত্ৰা ‘‘আম, মহাসেট্ঠী’’তি ৰুত্তে ‘‘জনপদস্স কিং ভৰিস্সতী’’তি পুচ্ছি। ‘‘ইমস্মিং নগরে অজ্জ জাতদারকো জেট্ঠসেট্ঠি ভৰিস্সতী’’তি আহ। তদা সেট্ঠিনো ভরিযা গরুগব্ভা হোতি, তস্মা সো সীঘং গেহং পেসেসি ‘‘গচ্ছ, জানাহি নং ৰিজাতা ৰা, ন ৰা’’তি। ‘‘ন ৰিজাতা’’তি সুত্ৰা গেহং গন্ত্ৰা কাল়িং নাম দাসিং পক্কোসিত্ৰা সহস্সং দত্ৰা ‘‘গচ্ছ, ইমস্মিং নগরে উপধারেত্ৰা অজ্জ জাতদারকং গণ্হিত্ৰা এহী’’তি আহ। সা উপধারেন্তী তং গেহং গন্ত্ৰা তং দারকং তং দিৰসং জাতং ঞত্ৰা সহস্সং দত্ৰা আনেত্ৰা সেট্ঠিনো দস্সেসি। সেট্ঠি ‘‘সচে মে ধীতা জাযিস্সতি, তায নং সদ্ধিং নিৰাসেত্ৰা সেট্ঠিট্ঠানস্স সামিকং করিস্সামি। সচে পুত্তো জাযিস্সতি, ঘাতেস্সামি ন’’ন্তি চিন্তেত্ৰা তং গেহে ৰড্ঢাপেসি।

    Ghositassagahapatissa puññavato iddhīti ghosito (a. ni. aṭṭha. 1.1.260-261) nāma paccekasambuddhe katādhikāro sakkaraṭṭhe kosambiyaṃ seṭṭhi. So kira devalokato cavitvā kosambiyaṃ nagarasobhiniyā kucchismiṃ nibbatti. Sā taṃ vijātadivase suppe sayāpetvā saṅkārakūṭe chaḍḍāpesi. Dārakaṃ kākasunakhā parivāretvā nisīdiṃsu. Eko puriso taṃ disvāva puttasaññaṃ paṭilabhitvā ‘‘putto me laddho’’ti gehaṃ nesi. Tadā kosambikaseṭṭhi purohitaṃ disvā ‘‘kiṃ, ācariya, ajja te tithikaraṇanakkhattādayo olokitā’’ti pucchitvā ‘‘āma, mahāseṭṭhī’’ti vutte ‘‘janapadassa kiṃ bhavissatī’’ti pucchi. ‘‘Imasmiṃ nagare ajja jātadārako jeṭṭhaseṭṭhi bhavissatī’’ti āha. Tadā seṭṭhino bhariyā garugabbhā hoti, tasmā so sīghaṃ gehaṃ pesesi ‘‘gaccha, jānāhi naṃ vijātā vā, na vā’’ti. ‘‘Na vijātā’’ti sutvā gehaṃ gantvā kāḷiṃ nāma dāsiṃ pakkositvā sahassaṃ datvā ‘‘gaccha, imasmiṃ nagare upadhāretvā ajja jātadārakaṃ gaṇhitvā ehī’’ti āha. Sā upadhārentī taṃ gehaṃ gantvā taṃ dārakaṃ taṃ divasaṃ jātaṃ ñatvā sahassaṃ datvā ānetvā seṭṭhino dassesi. Seṭṭhi ‘‘sace me dhītā jāyissati, tāya naṃ saddhiṃ nivāsetvā seṭṭhiṭṭhānassa sāmikaṃ karissāmi. Sace putto jāyissati, ghātessāmi na’’nti cintetvā taṃ gehe vaḍḍhāpesi.

    অথস্স ভরিযা কতিপাহচ্চযেন পুত্তং ৰিজাযি। সেট্ঠি ‘‘ইমস্মিং অসতি মম পুত্তো সেট্ঠিট্ঠানং লভিস্সতি। ইদানেৰ নং মারেতুং ৰট্টতী’’তি কাল়িং আমন্তেত্ৰা ‘‘গচ্ছ জে, ৰজতো গুন্নং নিক্খমনৰেলায ৰজদ্ৰারমজ্ঝে ইমং তিরিযং নিপজ্জাপেহি, গাৰিযো নং মদ্দিত্ৰা মারেস্সন্তি, মদ্দিতামদ্দিতভাৰং পনস্স ঞত্ৰা এহী’’তি আহ। সা গন্ত্ৰা গোপালকেন ৰজদ্ৰারে ৰিৰটমত্তেযেৰ তং তথা নিপজ্জাপেসি। গোগণজেট্ঠকো উসভো অঞ্ঞস্মিং কালে সব্বপচ্ছা নিক্খমন্তোপি তংদিৰসং সব্বপঠমং নিক্খমিত্ৰা দারকং চতুন্নং পাদানং অন্তরে কত্ৰা অট্ঠাসি। অনেকসতা গাৰো উসভস্স দ্ৰে পস্সানি ঘংসন্তিযো নিক্খমিংসু। গোপালকোপি ‘‘অযং উসভো পুব্বে সব্বপচ্ছা নিক্খমতি, অজ্জ পন পঠমং নিক্খমিত্ৰা দ্ৰারমজ্ঝে নিচ্চলোৰ ঠিতো, কিং নু খো এত’’ন্তি চিন্তেত্ৰা গন্ত্ৰা তস্স হেট্ঠা নিপন্নং দারকং দিস্ৰা পুত্তসিনেহং পটিলভিত্ৰা ‘‘পুত্তো মে লদ্ধো’’তি গেহং নেসি।

    Athassa bhariyā katipāhaccayena puttaṃ vijāyi. Seṭṭhi ‘‘imasmiṃ asati mama putto seṭṭhiṭṭhānaṃ labhissati. Idāneva naṃ māretuṃ vaṭṭatī’’ti kāḷiṃ āmantetvā ‘‘gaccha je, vajato gunnaṃ nikkhamanavelāya vajadvāramajjhe imaṃ tiriyaṃ nipajjāpehi, gāviyo naṃ madditvā māressanti, madditāmadditabhāvaṃ panassa ñatvā ehī’’ti āha. Sā gantvā gopālakena vajadvāre vivaṭamatteyeva taṃ tathā nipajjāpesi. Gogaṇajeṭṭhako usabho aññasmiṃ kāle sabbapacchā nikkhamantopi taṃdivasaṃ sabbapaṭhamaṃ nikkhamitvā dārakaṃ catunnaṃ pādānaṃ antare katvā aṭṭhāsi. Anekasatā gāvo usabhassa dve passāni ghaṃsantiyo nikkhamiṃsu. Gopālakopi ‘‘ayaṃ usabho pubbe sabbapacchā nikkhamati, ajja pana paṭhamaṃ nikkhamitvā dvāramajjhe niccalova ṭhito, kiṃ nu kho eta’’nti cintetvā gantvā tassa heṭṭhā nipannaṃ dārakaṃ disvā puttasinehaṃ paṭilabhitvā ‘‘putto me laddho’’ti gehaṃ nesi.

    কাল়ী গন্ত্ৰা সেট্ঠিনা পুচ্ছিতা তমত্থং আরোচেত্ৰা ‘‘গচ্ছ, নং পুন ইমং সহস্সং দত্ৰা আনেহী’’তি ৰুত্তা পুন আনেত্ৰা অদাসি। অথ নং সেট্ঠি আহ – ‘‘অম্ম কাল়ি, ইমস্মিং নগরে পঞ্চসকটসতানি পচ্চূসকালে উট্ঠায ৰাণিজ্জায গচ্ছন্তি, ত্ৰং ইমং নেত্ৰা চক্কমগ্গে নিপজ্জাপেহি, গোণা ৰা নং মদ্দিস্সন্তি, চক্কং ৰা ছিন্দিস্সতি, পৰত্তিঞ্চস্স ঞত্ৰা আগচ্ছেয্যাসী’’তি। সা গন্ত্ৰা চক্কমগ্গে নিপজ্জাপেসি। সাকটিকজেট্ঠকো পুরতো অহোসি। অথস্স গোণা তং ঠানং পত্ৰা ধুরং ছড্ডেসুং, পুনপ্পুনং আরোপেত্ৰা পাজিযমানাপি পুরতো ন গচ্ছিংসু। এৰং তস্স তেহি সদ্ধিং ৰাযমন্তস্সেৰ অরুণং উট্ঠহি। সো ‘‘কিং নাম গোণা করিংসূ’’তি মগ্গং ওলোকেন্তো দারকং দিস্ৰা ‘‘ভারিযং ৰত কম্ম’’ন্তি চিন্তেত্ৰা ‘‘পুত্তো মে লদ্ধো’’তি তুট্ঠমানসো তং গেহং নেসি।

    Kāḷī gantvā seṭṭhinā pucchitā tamatthaṃ ārocetvā ‘‘gaccha, naṃ puna imaṃ sahassaṃ datvā ānehī’’ti vuttā puna ānetvā adāsi. Atha naṃ seṭṭhi āha – ‘‘amma kāḷi, imasmiṃ nagare pañcasakaṭasatāni paccūsakāle uṭṭhāya vāṇijjāya gacchanti, tvaṃ imaṃ netvā cakkamagge nipajjāpehi, goṇā vā naṃ maddissanti, cakkaṃ vā chindissati, pavattiñcassa ñatvā āgaccheyyāsī’’ti. Sā gantvā cakkamagge nipajjāpesi. Sākaṭikajeṭṭhako purato ahosi. Athassa goṇā taṃ ṭhānaṃ patvā dhuraṃ chaḍḍesuṃ, punappunaṃ āropetvā pājiyamānāpi purato na gacchiṃsu. Evaṃ tassa tehi saddhiṃ vāyamantasseva aruṇaṃ uṭṭhahi. So ‘‘kiṃ nāma goṇā kariṃsū’’ti maggaṃ olokento dārakaṃ disvā ‘‘bhāriyaṃ vata kamma’’nti cintetvā ‘‘putto me laddho’’ti tuṭṭhamānaso taṃ gehaṃ nesi.

    কাল়ীপি গন্ত্ৰা সেট্ঠিনা পুচ্ছিতা তং পৰত্তিং আচিক্খিত্ৰা ‘‘গচ্ছ, নং পুন সহস্সং দত্ৰা আনেহী’’তি ৰুত্তা তথা অকাসি। অথ নং সেট্ঠি আহ – ‘‘ইদানি নং আমকসুসানং নেত্ৰা গচ্ছন্তরে নিপজ্জাপেহি, তত্থ সুনখাদীহি খাদিতো, অমনুস্সেন ৰা পহটো মরিস্সতি, মতামতভাৰঞ্চস্স জানিত্ৰা আগচ্ছেয্যাসী’’তি। সা তং নেত্ৰা তত্থ নিপজ্জাপেত্ৰা একমন্তে অট্ঠাসি। তং সুনখাদযো ৰা অমনুস্সো ৰা উপসঙ্কমিতুং নাসক্খিংসু। অথেকো অজপালো অজা গোচরং নেন্তো সুসানপস্সেন গচ্ছতি। একা অজা পণ্ণানি খাদমানা গচ্ছন্তরং পৰিসিত্ৰা দারকং দিস্ৰা জণ্ণুকেহি ঠত্ৰা দারকস্স থনং অদাসি। অজপালকেন ‘‘হে হে’’তি সদ্দে কতেপি ন নিক্খমি। সো ‘‘যট্ঠিযা নং পহরিত্ৰা নীহরিস্সামী’’তি গচ্ছন্তরং পৰিট্ঠো জণ্ণুকেহি ঠত্ৰা দারকং খীরং পাযন্তিং দিস্ৰা দারকে পুত্তসিনেহং পটিলভিত্ৰা ‘‘পুত্তো মে লদ্ধো’’তি আদায পক্কামি।

    Kāḷīpi gantvā seṭṭhinā pucchitā taṃ pavattiṃ ācikkhitvā ‘‘gaccha, naṃ puna sahassaṃ datvā ānehī’’ti vuttā tathā akāsi. Atha naṃ seṭṭhi āha – ‘‘idāni naṃ āmakasusānaṃ netvā gacchantare nipajjāpehi, tattha sunakhādīhi khādito, amanussena vā pahaṭo marissati, matāmatabhāvañcassa jānitvā āgaccheyyāsī’’ti. Sā taṃ netvā tattha nipajjāpetvā ekamante aṭṭhāsi. Taṃ sunakhādayo vā amanusso vā upasaṅkamituṃ nāsakkhiṃsu. Atheko ajapālo ajā gocaraṃ nento susānapassena gacchati. Ekā ajā paṇṇāni khādamānā gacchantaraṃ pavisitvā dārakaṃ disvā jaṇṇukehi ṭhatvā dārakassa thanaṃ adāsi. Ajapālakena ‘‘he he’’ti sadde katepi na nikkhami. So ‘‘yaṭṭhiyā naṃ paharitvā nīharissāmī’’ti gacchantaraṃ paviṭṭho jaṇṇukehi ṭhatvā dārakaṃ khīraṃ pāyantiṃ disvā dārake puttasinehaṃ paṭilabhitvā ‘‘putto me laddho’’ti ādāya pakkāmi.

    কাল়ী গন্ত্ৰা সেট্ঠিনা পুচ্ছিতা তং পৰত্তিং আচিক্খিত্ৰা ‘‘গচ্ছ, নং পুন সহস্সং দত্ৰা আনেহী’’তি ৰুত্তা তথা অকাসি। অয নং সেট্ঠি আহ – ‘‘অম্ম, ইমং আদায চোরপপাতপব্বতং অভিরুহিত্ৰা পপাতে খিপ, পব্বতকুচ্ছিযং পটিহঞ্ঞমানো খণ্ডাখণ্ডিকো হুত্ৰা ভূমিযং পতিস্সতি, মতামতভাৰঞ্চস্স ঞত্ৰা আগচ্ছেয্যাসী’’তি। সা তং তথা নেত্ৰা পব্বতমত্থকে ঠত্ৰা খিপি। তং খো পন পব্বতকুচ্ছিং নিস্সায মহাৰেল়ুগুম্বো পব্বতানুসারেনেৰ ৰড্ঢি, তস্স মত্থকং ঘনজাতো জিঞ্জুকগুম্বো অৰত্থরি। দারকো পতন্তো কোজৰে ৰিয তস্মিং পতি। তং দিৰসঞ্চ নল়কারজেট্ঠকস্স ৰেণুবলি পত্তো হোতি। সো পুত্তেন সদ্ধিং গন্ত্ৰা তং ৰেল়ুগুম্বং ছিন্দিতুং আরভি। তস্মিং চলিতে দারকো সদ্দমকাসি। সো দারকসদ্দো ৰিযাতি একেন পস্সেন অভিরুহিত্ৰা তং দিস্ৰা ‘‘পুত্তো মে লদ্ধো’’তি তুট্ঠচিত্তো আদায গতো। কাল়ী গন্ত্ৰা সেট্ঠিনা পুচ্ছিতা তং পৰত্তিং আচিক্খিত্ৰা ‘‘গচ্ছ, নং পুন সহস্সং দত্ৰা আনেহী’’তি ৰুত্তা তথা অকাসি।

    Kāḷī gantvā seṭṭhinā pucchitā taṃ pavattiṃ ācikkhitvā ‘‘gaccha, naṃ puna sahassaṃ datvā ānehī’’ti vuttā tathā akāsi. Aya naṃ seṭṭhi āha – ‘‘amma, imaṃ ādāya corapapātapabbataṃ abhiruhitvā papāte khipa, pabbatakucchiyaṃ paṭihaññamāno khaṇḍākhaṇḍiko hutvā bhūmiyaṃ patissati, matāmatabhāvañcassa ñatvā āgaccheyyāsī’’ti. Sā taṃ tathā netvā pabbatamatthake ṭhatvā khipi. Taṃ kho pana pabbatakucchiṃ nissāya mahāveḷugumbo pabbatānusāreneva vaḍḍhi, tassa matthakaṃ ghanajāto jiñjukagumbo avatthari. Dārako patanto kojave viya tasmiṃ pati. Taṃ divasañca naḷakārajeṭṭhakassa veṇubali patto hoti. So puttena saddhiṃ gantvā taṃ veḷugumbaṃ chindituṃ ārabhi. Tasmiṃ calite dārako saddamakāsi. So dārakasaddo viyāti ekena passena abhiruhitvā taṃ disvā ‘‘putto me laddho’’ti tuṭṭhacitto ādāya gato. Kāḷī gantvā seṭṭhinā pucchitā taṃ pavattiṃ ācikkhitvā ‘‘gaccha, naṃ puna sahassaṃ datvā ānehī’’ti vuttā tathā akāsi.

    সেট্ঠিনো ইদঞ্চিদঞ্চ করোন্তস্সেৰ দারকো ৰড্ঢিতো। মহাঘোসৰচনত্তা চস্স ঘোসিতোতেৰ নামং অহোসি। সো সেট্ঠিনো অক্খিম্হি কণ্টকো ৰিয খাযি, উজুকং ওলোকেতুম্পি ন ৰিসহি। অথস্স মরণূপাযং চিন্তেন্তো অত্তনো কুম্ভকারস্স সন্তিকং গন্ত্ৰা তস্স ‘‘কদা আৰাপং আলিম্পেস্সসী’’তি পুচ্ছিত্ৰা ‘‘স্ৰে’’তি ৰুত্তে ‘‘তেন হি ইদং সহস্সং গণ্হিত্ৰা মমেকং কম্মং করোহী’’তি আহ। ‘‘কিং সামী’’তি? ‘‘একো মে অৰজাতপুত্তো অত্থি, তং তৰ সন্তিকং পেসিস্সামি, অথ নং গব্ভং পৰেসেত্ৰা তিণ্হায ৰাসিযা খণ্ডাখণ্ডিকং ছিন্দিত্ৰা চাটিযং পক্খিপিত্ৰা আৰাপে পৰেসেয্যাসীতি। ইদং তে সহস্সং সচ্চকারসদিসং, উত্তরিং পন তে কত্তব্বযুত্তকং পচ্ছা করিস্সামী’’তি। কুম্ভকারো ‘‘সাধূ’’তি সম্পটিচ্ছি।

    Seṭṭhino idañcidañca karontasseva dārako vaḍḍhito. Mahāghosavacanattā cassa ghositoteva nāmaṃ ahosi. So seṭṭhino akkhimhi kaṇṭako viya khāyi, ujukaṃ oloketumpi na visahi. Athassa maraṇūpāyaṃ cintento attano kumbhakārassa santikaṃ gantvā tassa ‘‘kadā āvāpaṃ ālimpessasī’’ti pucchitvā ‘‘sve’’ti vutte ‘‘tena hi idaṃ sahassaṃ gaṇhitvā mamekaṃ kammaṃ karohī’’ti āha. ‘‘Kiṃ sāmī’’ti? ‘‘Eko me avajātaputto atthi, taṃ tava santikaṃ pesissāmi, atha naṃ gabbhaṃ pavesetvā tiṇhāya vāsiyā khaṇḍākhaṇḍikaṃ chinditvā cāṭiyaṃ pakkhipitvā āvāpe paveseyyāsīti. Idaṃ te sahassaṃ saccakārasadisaṃ, uttariṃ pana te kattabbayuttakaṃ pacchā karissāmī’’ti. Kumbhakāro ‘‘sādhū’’ti sampaṭicchi.

    সেট্ঠি পুনদিৰসে ঘোসিতং পক্কোসিত্ৰা ‘‘হিয্যো মযা কুম্ভকারো একং কম্মং আণত্তো, এহি , ত্ৰং তাত, তস্স সন্তিকং গন্ত্ৰা এৰং ৰদেহি ‘হিয্যো কির মে পিতরা আণত্তং কম্মং নিপ্ফাদেহী’’’তি পহিণি। সো ‘‘সাধূ’’তি অগমাসি। তং তত্থ গচ্ছন্তং ইতরো সেট্ঠিনো পুত্তো দারকেহি সদ্ধিং গুল়ককীল়ং কীল়ন্তো দিস্ৰা পক্কোসিত্ৰা ‘‘কুহিং গচ্ছসী’’তি পুচ্ছিত্ৰা পিতু সাসনং গহেত্ৰা ‘‘কুম্ভকারস্স সন্তিক’’ন্তি ৰুত্তে ‘‘অহং তত্থ গমিস্সামি, ইমে মং দারকা বহুলক্খং জিনিংসু, তং মে পটিজিনিত্ৰা দেহী’’তি আহ। ‘‘অহং পিতু ভাযামী’’তি। ‘‘মা ভাযি, ভাতিক, অহং তং সাসনং হরিস্সামী’’তি। ‘‘বহূহি জিতো যাৰাহং আগচ্ছামি, তাৰ মে লক্খং পটিজিনাহী’’তি। ঘোসিতো কির গুল়ককীল়াযং ছেকো, তেন নং এৰং নিবন্ধি। সোপি তং ‘‘তেন হি গন্ত্ৰা কুম্ভকারং ৰদেহি ‘পিতরা কির মে হিয্যো একং কম্মং আণত্তং, তং নিপ্ফাদেহী’’’তি উয্যোজেসি। সো তস্স সন্তিকং গন্ত্ৰা তথা অৰচ। অথ নং কুম্ভকারো সেট্ঠিনা ৰুত্তনিযামেন মারেত্ৰা আৰাপে খিপি। ঘোসিতোপি দিৰসভাগং কীল়িত্ৰা সাযন্হসমযেৰ গেহং গন্ত্ৰা ‘‘কিং, তাত, ন গতোসী’’তি ৰুত্তে অত্তনো অগতকারণঞ্চ কনিট্ঠস্স গতকারণঞ্চ আরোচেসি। সেট্ঠি ‘‘ধী ধী’’তি মহাৰিরৰং ৰিরৰিত্ৰা সকলসরীরে পক্কুথিতলোহিতো ৰিয হুত্ৰা ‘‘অম্ভো কুম্ভকার, মা নাসযি, মা নাসযী’’তি বাহা পগ্গয্হ কন্দন্তো তস্স সন্তিকং অগমাসি। কুম্ভকারো তং তথা আগচ্ছন্তং দিস্ৰা ‘‘সামি, মা সদ্দং করি, কম্মং নিপ্ফন্ন’’ন্তি আহ। সো পব্বতেন ৰিয মহন্তেন সোকেন অৰত্থটো হুত্ৰা অনপ্পকং দোমনস্সং পটিসংৰেদেসি।

    Seṭṭhi punadivase ghositaṃ pakkositvā ‘‘hiyyo mayā kumbhakāro ekaṃ kammaṃ āṇatto, ehi , tvaṃ tāta, tassa santikaṃ gantvā evaṃ vadehi ‘hiyyo kira me pitarā āṇattaṃ kammaṃ nipphādehī’’’ti pahiṇi. So ‘‘sādhū’’ti agamāsi. Taṃ tattha gacchantaṃ itaro seṭṭhino putto dārakehi saddhiṃ guḷakakīḷaṃ kīḷanto disvā pakkositvā ‘‘kuhiṃ gacchasī’’ti pucchitvā pitu sāsanaṃ gahetvā ‘‘kumbhakārassa santika’’nti vutte ‘‘ahaṃ tattha gamissāmi, ime maṃ dārakā bahulakkhaṃ jiniṃsu, taṃ me paṭijinitvā dehī’’ti āha. ‘‘Ahaṃ pitu bhāyāmī’’ti. ‘‘Mā bhāyi, bhātika, ahaṃ taṃ sāsanaṃ harissāmī’’ti. ‘‘Bahūhi jito yāvāhaṃ āgacchāmi, tāva me lakkhaṃ paṭijināhī’’ti. Ghosito kira guḷakakīḷāyaṃ cheko, tena naṃ evaṃ nibandhi. Sopi taṃ ‘‘tena hi gantvā kumbhakāraṃ vadehi ‘pitarā kira me hiyyo ekaṃ kammaṃ āṇattaṃ, taṃ nipphādehī’’’ti uyyojesi. So tassa santikaṃ gantvā tathā avaca. Atha naṃ kumbhakāro seṭṭhinā vuttaniyāmena māretvā āvāpe khipi. Ghositopi divasabhāgaṃ kīḷitvā sāyanhasamayeva gehaṃ gantvā ‘‘kiṃ, tāta, na gatosī’’ti vutte attano agatakāraṇañca kaniṭṭhassa gatakāraṇañca ārocesi. Seṭṭhi ‘‘dhī dhī’’ti mahāviravaṃ viravitvā sakalasarīre pakkuthitalohito viya hutvā ‘‘ambho kumbhakāra, mā nāsayi, mā nāsayī’’ti bāhā paggayha kandanto tassa santikaṃ agamāsi. Kumbhakāro taṃ tathā āgacchantaṃ disvā ‘‘sāmi, mā saddaṃ kari, kammaṃ nipphanna’’nti āha. So pabbatena viya mahantena sokena avatthaṭo hutvā anappakaṃ domanassaṃ paṭisaṃvedesi.

    এৰং সন্তেপি পন সেট্ঠি তং উজুকং ওলোকেতুং ন সক্কোতি। ‘‘কিন্তি নং মারেয্য’’ন্তি চিন্তেন্তো ‘‘মম গামসতে আযুত্তকস্স সন্তিকং পেসেত্ৰা মারাপেস্সামী’’তি উপাযং দিস্ৰা ‘‘অযং মে অৰজাতপুত্তো, ইমং মারেত্ৰা ৰচ্চকূপে খিপতু, এৰঞ্চ কতে অহং মাতুলস্স কত্তব্বযুত্তকং জানিস্সামী’’তি তস্স পণ্ণং লিখিত্ৰা ‘‘তাত ঘোসিত, অম্হাকং গামসতে আযুত্তকো অত্থি, ইমং পণ্ণং হরিত্ৰা তস্স দেহী’’তি ৰত্ৰা পণ্ণং তস্স দুস্সন্তে বন্ধি। সো পন অক্খরসমযং ন জানাতি। দহরকালতো পট্ঠায হি তং মারাপেন্তোৰ সেট্ঠি মারেতুং নাসক্খি, কিং অক্খরসমযং সিক্খাপেস্সতি। সো অত্তনো মরণপণ্ণমেৰ দুস্সন্তে বন্ধিত্ৰা নিক্খমন্তো আহ – ‘‘পাথেয্যং মে, তাত, নত্থী’’তি। ‘‘পাথেয্যেন কম্মং নত্থি, অন্তরামগ্গে অসুকগামে নাম মম সহাযকো সেট্ঠি অত্থি, তস্স ঘরে পাতরাসং কত্ৰা পুরতো গচ্ছা’’তি। সো ‘‘সাধূ’’তি পিতরং ৰন্দিত্ৰা নিক্খন্তো তং গামং পত্ৰা সেট্ঠিঘরং পুচ্ছিত্ৰা গন্ত্ৰা সেট্ঠিজাযং পস্সি। ‘‘কুতো আগতোসী’’তি চ ৰুত্তে ‘‘অন্তোনগরতো’’তি আহ। ‘‘কস্স পুত্তোসী’’তি? ‘‘তুম্হাকং সহাযসেট্ঠিনো, অম্মা’’তি। ‘‘ত্ৰংসি ঘোসিতো নামা’’তি? ‘‘আম, অম্মা’’তি। তস্সা সহ দস্সনেনেৰ তস্মিং পুত্তসিনেহো উপ্পজ্জি। সেট্ঠিনো পনেকা ধীতা অত্থি পন্নরসসোল়সৰস্সুদ্দেসিকা অভিরূপা পাসাদিকা, তং রক্খিতুং একমেৰ পেসনকারিকং দাসিং দত্ৰা সত্তভূমিকস্স পাসাদস্স উপরিমতলে সিরিগব্ভে ৰসাপেন্তি। সেট্ঠিধীতা তস্মিং খণে তং দাসিং অন্তরাপণং পেসেসি। অথ নং সেট্ঠিজাযা দিস্ৰা ‘‘কুহিং গচ্ছসী’’তি পুচ্ছিত্ৰা ‘‘অয্যধীতায পেসনেনা’’তি ৰুত্তে ‘‘ইতো তাৰ এহি, তিট্ঠতু পেসনং, পুত্তস্স মে পীঠকং অত্থরিত্ৰা উদকং আহরিত্ৰা পাদে ধোৰিত্ৰা তেলং মক্খিত্ৰা সযনং অত্থরিত্ৰা দেহি, পচ্ছা পেসনং করিস্সসী’’তি আহ। সা তথা অকাসি।

    Evaṃ santepi pana seṭṭhi taṃ ujukaṃ oloketuṃ na sakkoti. ‘‘Kinti naṃ māreyya’’nti cintento ‘‘mama gāmasate āyuttakassa santikaṃ pesetvā mārāpessāmī’’ti upāyaṃ disvā ‘‘ayaṃ me avajātaputto, imaṃ māretvā vaccakūpe khipatu, evañca kate ahaṃ mātulassa kattabbayuttakaṃ jānissāmī’’ti tassa paṇṇaṃ likhitvā ‘‘tāta ghosita, amhākaṃ gāmasate āyuttako atthi, imaṃ paṇṇaṃ haritvā tassa dehī’’ti vatvā paṇṇaṃ tassa dussante bandhi. So pana akkharasamayaṃ na jānāti. Daharakālato paṭṭhāya hi taṃ mārāpentova seṭṭhi māretuṃ nāsakkhi, kiṃ akkharasamayaṃ sikkhāpessati. So attano maraṇapaṇṇameva dussante bandhitvā nikkhamanto āha – ‘‘pātheyyaṃ me, tāta, natthī’’ti. ‘‘Pātheyyena kammaṃ natthi, antarāmagge asukagāme nāma mama sahāyako seṭṭhi atthi, tassa ghare pātarāsaṃ katvā purato gacchā’’ti. So ‘‘sādhū’’ti pitaraṃ vanditvā nikkhanto taṃ gāmaṃ patvā seṭṭhigharaṃ pucchitvā gantvā seṭṭhijāyaṃ passi. ‘‘Kuto āgatosī’’ti ca vutte ‘‘antonagarato’’ti āha. ‘‘Kassa puttosī’’ti? ‘‘Tumhākaṃ sahāyaseṭṭhino, ammā’’ti. ‘‘Tvaṃsi ghosito nāmā’’ti? ‘‘Āma, ammā’’ti. Tassā saha dassaneneva tasmiṃ puttasineho uppajji. Seṭṭhino panekā dhītā atthi pannarasasoḷasavassuddesikā abhirūpā pāsādikā, taṃ rakkhituṃ ekameva pesanakārikaṃ dāsiṃ datvā sattabhūmikassa pāsādassa uparimatale sirigabbhe vasāpenti. Seṭṭhidhītā tasmiṃ khaṇe taṃ dāsiṃ antarāpaṇaṃ pesesi. Atha naṃ seṭṭhijāyā disvā ‘‘kuhiṃ gacchasī’’ti pucchitvā ‘‘ayyadhītāya pesanenā’’ti vutte ‘‘ito tāva ehi, tiṭṭhatu pesanaṃ, puttassa me pīṭhakaṃ attharitvā udakaṃ āharitvā pāde dhovitvā telaṃ makkhitvā sayanaṃ attharitvā dehi, pacchā pesanaṃ karissasī’’ti āha. Sā tathā akāsi.

    অথ নং চিরেনাগতং সেট্ঠিধীতা সন্তজ্জেসি। অথ নং সা আহ – ‘‘মা মে কুজ্ঝি, সেট্ঠিপুত্তো ঘোসিতো আগতো, তস্স ইদঞ্চিদঞ্চ কত্ৰা তত্থ গন্ত্ৰা আগতাম্হী’’তি। সেট্ঠিধীতায ‘‘সেট্ঠিপুত্তো ঘোসিতো’’তি নামং সুত্ৰাৰ পুব্বসন্নিৰাসৰসেন পেমং ছৰিআদীনি ছিন্দিত্ৰা অট্ঠিমিঞ্জং আহচ্চ ঠিতং। অথ নং পুচ্ছি ‘‘কুহিং সো অম্মা’’তি? ‘‘সযনে নিপন্নো নিদ্দাযতী’’তি । ‘‘অত্থি পনস্স হত্থে কিঞ্চী’’তি? ‘‘দুস্সন্তে পণ্ণং অত্থী’’তি। সা ‘‘কিং পণ্ণং নু খো এত’’ন্তি তস্মিং নিদ্দাযন্তে মাতাপিতূনং অঞ্ঞৰিহিততায অপস্সন্তানং ওতরিত্ৰা তস্স সন্তিকং গন্ত্ৰা তং পণ্ণং মোচেত্ৰা আদায অত্তনো গব্ভং পৰিসিত্ৰা দ্ৰারং পিধায ৰাতপানং ৰিৰরিত্ৰা অক্খরসমযে কুসলতায তং পণ্ণং ৰাচেত্ৰা ‘‘অহো ৰত বালো অত্তনো মরণপণ্ণং দুস্সন্তে বন্ধিত্ৰা ৰিচরতি, সচে মযা ন দিট্ঠং অস্স, নত্থি তস্স জীৰিত’’ন্তি। তং পণ্ণং ফালেত্ৰা নাসেত্ৰা সেট্ঠিস্স ৰচনেন অপরং পণ্ণং লিখি – ‘‘অযং মম পুত্তো ঘোসিতো নাম, গামসততো পণ্ণাকারং আহরাপেত্ৰা ইমস্স জনপদসেট্ঠিনো ধীতরা সদ্ধিং মঙ্গলং কত্ৰা অত্তনো ৰসনগামস্স মজ্ঝে দ্ৰিভূমিকং গেহং কারেত্ৰা পাকারপরিক্খেপেন চেৰ পুরিসগুত্তীহি চ সুসংৰিহিতারক্খং করোতু, ময্হং ইদঞ্চিদঞ্চ মযা কতন্তি সাসনং পেসেতু। এৰং কতে অহং মাতুলস্স কত্তব্বযুত্তকং জানিস্সামী’’তি লিখিত্ৰা চ পণ্ণং সঙ্ঘরিত্ৰা দুস্সন্তেযেৰস্স বন্ধি।

    Atha naṃ cirenāgataṃ seṭṭhidhītā santajjesi. Atha naṃ sā āha – ‘‘mā me kujjhi, seṭṭhiputto ghosito āgato, tassa idañcidañca katvā tattha gantvā āgatāmhī’’ti. Seṭṭhidhītāya ‘‘seṭṭhiputto ghosito’’ti nāmaṃ sutvāva pubbasannivāsavasena pemaṃ chaviādīni chinditvā aṭṭhimiñjaṃ āhacca ṭhitaṃ. Atha naṃ pucchi ‘‘kuhiṃ so ammā’’ti? ‘‘Sayane nipanno niddāyatī’’ti . ‘‘Atthi panassa hatthe kiñcī’’ti? ‘‘Dussante paṇṇaṃ atthī’’ti. Sā ‘‘kiṃ paṇṇaṃ nu kho eta’’nti tasmiṃ niddāyante mātāpitūnaṃ aññavihitatāya apassantānaṃ otaritvā tassa santikaṃ gantvā taṃ paṇṇaṃ mocetvā ādāya attano gabbhaṃ pavisitvā dvāraṃ pidhāya vātapānaṃ vivaritvā akkharasamaye kusalatāya taṃ paṇṇaṃ vācetvā ‘‘aho vata bālo attano maraṇapaṇṇaṃ dussante bandhitvā vicarati, sace mayā na diṭṭhaṃ assa, natthi tassa jīvita’’nti. Taṃ paṇṇaṃ phāletvā nāsetvā seṭṭhissa vacanena aparaṃ paṇṇaṃ likhi – ‘‘ayaṃ mama putto ghosito nāma, gāmasatato paṇṇākāraṃ āharāpetvā imassa janapadaseṭṭhino dhītarā saddhiṃ maṅgalaṃ katvā attano vasanagāmassa majjhe dvibhūmikaṃ gehaṃ kāretvā pākāraparikkhepena ceva purisaguttīhi ca susaṃvihitārakkhaṃ karotu, mayhaṃ idañcidañca mayā katanti sāsanaṃ pesetu. Evaṃ kate ahaṃ mātulassa kattabbayuttakaṃ jānissāmī’’ti likhitvā ca paṇṇaṃ saṅgharitvā dussanteyevassa bandhi.

    সো দিৰসভাগং নিদ্দাযিত্ৰা উট্ঠায ভুঞ্জিত্ৰা পক্কামি, পুনদিৰসে পাতোৰ তং গামং গন্ত্ৰা আযুত্তকং গামকিচ্চং করোন্তমেৰ পস্সি। সো তং দিস্ৰা ‘‘কিং তাতা’’তি পুচ্ছিত্ৰা ‘‘পিতরা মে তুম্হাকং পণ্ণং পেসিত’’ন্তি ৰুত্তে পণ্ণং গহেত্ৰা ৰাচেত্ৰা তুট্ঠমানসো ‘‘পস্সথ, ভো, মম সামিনো মযি সিনেহং কত্ৰা জেট্ঠপুত্তস্স মঙ্গলং করোতূ’’তি মম সন্তিকং পহিণি। ‘‘সীঘং দারুআদীনি আহরথা’’তি গহপতিকে আণাপেত্ৰা গামমজ্ঝে ৰুত্তপ্পকারং গেহং কারাপেত্ৰা গামসততো পণ্ণাকারং আহরাপেত্ৰা জনপদসেট্ঠিনো ধীতরং আনেত্ৰা মঙ্গলং কত্ৰা সেট্ঠিস্স সাসনং পহিণি ‘‘ইদঞ্চিদঞ্চ মযা কত’’ন্তি।

    So divasabhāgaṃ niddāyitvā uṭṭhāya bhuñjitvā pakkāmi, punadivase pātova taṃ gāmaṃ gantvā āyuttakaṃ gāmakiccaṃ karontameva passi. So taṃ disvā ‘‘kiṃ tātā’’ti pucchitvā ‘‘pitarā me tumhākaṃ paṇṇaṃ pesita’’nti vutte paṇṇaṃ gahetvā vācetvā tuṭṭhamānaso ‘‘passatha, bho, mama sāmino mayi sinehaṃ katvā jeṭṭhaputtassa maṅgalaṃ karotū’’ti mama santikaṃ pahiṇi. ‘‘Sīghaṃ dāruādīni āharathā’’ti gahapatike āṇāpetvā gāmamajjhe vuttappakāraṃ gehaṃ kārāpetvā gāmasatato paṇṇākāraṃ āharāpetvā janapadaseṭṭhino dhītaraṃ ānetvā maṅgalaṃ katvā seṭṭhissa sāsanaṃ pahiṇi ‘‘idañcidañca mayā kata’’nti.

    তং সুত্ৰা সেট্ঠিনো ‘‘যং কারেমি, তং ন হোতি। যং ন কারেমি, তং হোতী’’তি মহন্তং দোমনস্সং উপ্পজ্জি। পুত্তসোকেন সদ্ধিং সো সোকো একতো হুত্ৰা কুচ্ছিদাহং উপ্পাদেত্ৰা অতিসারং জনেসি। সেট্ঠিধীতাপি ‘‘সচে কোচি সেট্ঠিনো সন্তিকা আগচ্ছতি, মম অকথেত্ৰা সেট্ঠিপুত্তস্স পঠমতরং মা কথেথা’’তি আণাপেসি। সেট্ঠিপি খো ‘‘ন দানি দুট্ঠপুত্তং মম সাপতেয্যস্স সামিকং করিস্সামী’’তি চিন্তেত্ৰা একং আযুত্তকং আহ – ‘‘মাতুল, পুত্তং মে দট্ঠুকামোম্হি, একং পাদমূলিকং পেসেত্ৰা একং পণ্ণং লিখিত্ৰা পেসেত্ৰা মম পুত্তং পক্কোসাপেহী’’তি। সো ‘‘সাধূ’’তি পণ্ণং দত্ৰা একং পুরিসং পেসেসি। সেট্ঠিধীতা সেট্ঠিস্স বলৰগিলানকালে ঘোসিতকুমারং আদায অগমাসি। সেট্ঠি কালমকাসি। রাজা পিতরি কালঙ্কতে পিতরা ভুত্তভোগং দত্ৰা সব্বসতেন সেট্ঠিট্ঠানং অদাসি। ঘোসিতসেট্ঠি নাম হুত্ৰা মহাসম্পত্তিযং ঠিতো সেট্ঠিধীতায কাল়িযা ৰচনেন আদিতো পট্ঠায সত্তসু ঠানেসু অত্তনো মরণমুত্তভাৰং ঞত্ৰা দেৰসিকং সতসহস্সং ৰিস্সজ্জেত্ৰা দানং পট্ঠপেসীতি। এৰমস্স সত্তসু ঠানেসু অরোগভাৰো পুঞ্ঞৰতো ইদ্ধি। তত্থ গহন্তি গেহং ৰুচ্চতি, গহে পতি গহপতি। মহাসালকুলে অধিপতিস্সেতং নামং। কেসুচি পোত্থকেসু ঘোসিতানন্তরং মেণ্ডকো লিখিতো।

    Taṃ sutvā seṭṭhino ‘‘yaṃ kāremi, taṃ na hoti. Yaṃ na kāremi, taṃ hotī’’ti mahantaṃ domanassaṃ uppajji. Puttasokena saddhiṃ so soko ekato hutvā kucchidāhaṃ uppādetvā atisāraṃ janesi. Seṭṭhidhītāpi ‘‘sace koci seṭṭhino santikā āgacchati, mama akathetvā seṭṭhiputtassa paṭhamataraṃ mā kathethā’’ti āṇāpesi. Seṭṭhipi kho ‘‘na dāni duṭṭhaputtaṃ mama sāpateyyassa sāmikaṃ karissāmī’’ti cintetvā ekaṃ āyuttakaṃ āha – ‘‘mātula, puttaṃ me daṭṭhukāmomhi, ekaṃ pādamūlikaṃ pesetvā ekaṃ paṇṇaṃ likhitvā pesetvā mama puttaṃ pakkosāpehī’’ti. So ‘‘sādhū’’ti paṇṇaṃ datvā ekaṃ purisaṃ pesesi. Seṭṭhidhītā seṭṭhissa balavagilānakāle ghositakumāraṃ ādāya agamāsi. Seṭṭhi kālamakāsi. Rājā pitari kālaṅkate pitarā bhuttabhogaṃ datvā sabbasatena seṭṭhiṭṭhānaṃ adāsi. Ghositaseṭṭhi nāma hutvā mahāsampattiyaṃ ṭhito seṭṭhidhītāya kāḷiyā vacanena ādito paṭṭhāya sattasu ṭhānesu attano maraṇamuttabhāvaṃ ñatvā devasikaṃ satasahassaṃ vissajjetvā dānaṃ paṭṭhapesīti. Evamassa sattasu ṭhānesu arogabhāvo puññavato iddhi. Tattha gahanti gehaṃ vuccati, gahe pati gahapati. Mahāsālakule adhipatissetaṃ nāmaṃ. Kesuci potthakesu ghositānantaraṃ meṇḍako likhito.

    পঞ্চন্নং মহাপুঞ্ঞানং পুঞ্ঞৰতো ইদ্ধীতি এত্থ পুঞ্ঞিদ্ধি পঞ্চন্নং মহাপুঞ্ঞানং দট্ঠব্বাতি অত্থো। পঞ্চ মহাপুঞ্ঞা নাম মেণ্ডকসেট্ঠি, তস্স ভরিযা চন্দপদুমা, পুত্তো ধনঞ্চযসেট্ঠি, সুণিসা সুমনদেৰী, দোসো পুণ্ণো নামাতি ইমে পঞ্চ জনা পচ্চেকসম্বুদ্ধে কতাধিকারা। তেসু মেণ্ডকসেট্ঠি অড্ঢতেরসানি কোট্ঠসতানি সোধাপেত্ৰা সীসং ন্হাতো দ্ৰারে নিসীদিত্ৰা উদ্ধং উল্লোকেতি, আকাসতো রত্তসালিধারা ওপতিত্ৰা সব্বকোট্ঠে পূরেতি। তস্স ভরিযা তণ্ডুলং একনাল়িমত্তং গহেত্ৰা ভত্তং পচাপেত্ৰা একস্মিং সূপব্যঞ্জনকে সূপং কারেত্ৰা সব্বালঙ্কারপটিমণ্ডিতা দ্ৰারকোট্ঠকে পঞ্ঞত্তাসনে নিসীদিত্ৰা ‘‘সব্বে ভত্তেন অত্থিকা আগচ্ছন্তূ’’তি ঘোসাপেত্ৰা পক্কোসাপেত্ৰা সুৰণ্ণকটচ্ছুং আদায আগতাগতানং উপনীতভাজনানি পূরেত্ৰা দেতি, সকলদিৰসম্পি দেন্তিযা কটচ্ছুনা সকিং গহিতট্ঠানমত্তমেৰ পঞ্ঞাযতি। তস্স পুত্তো সীসং ন্হাতো সহস্সত্থৰিকং আদায ‘‘কহাপণেহি অত্থিকা আগচ্ছন্তূ’’তি ঘোসাপেত্ৰা আগতাগতানং গহিতভাজনানি পূরেত্ৰা দেতি। থৰিকায কহাপণসহস্সমেৰ হোতি। তস্স সুণিসা সব্বালঙ্কারপটিমণ্ডিতা চতুদোণিকং ৰীহিপিটকং আদায আসনে নিসিন্না ‘‘বীজভত্তেন অত্থিকা আগচ্ছন্তূ’’তি ঘোসাপেত্ৰা আগতাগতানং গহিতভাজনানি পূরেত্ৰা দেতি, পিটকং যথাপূরিতমেৰ হোতি। তস্স দাসো সব্বালঙ্কারপটিমণ্ডিতো সুৰণ্ণযুগে সুৰণ্ণযোত্তেহি গোণে যোজেত্ৰা সুৰণ্ণপতোদযট্ঠিং আদায গোণানং গন্ধপঞ্চঙ্গুলিকানি দত্ৰা ৰিসাণেসু সুৰণ্ণকোসকে পটিমুঞ্চিত্ৰা খেত্তং গন্ত্ৰা পাজেতি , ইতো তিস্সো, ইতো তিস্সো, মজ্ঝে একাতি সত্ত সীতাযো ভিজ্জিত্ৰা গচ্ছন্তি। জম্বুদীপৰাসিনো ভত্তবীজহিরঞ্ঞসুৰণ্ণাদীসু যথারুচিতং সেট্ঠিগেহতোযেৰ গণ্হিংসু। অনুক্কমেন পন ভদ্দিযনগরং অনুপ্পত্তে ভগৰতি ভগৰতো ধম্মদেসনায পঞ্চ মহাপুঞ্ঞা চ ধনঞ্চযসেট্ঠিস্স ধীতা ৰিসাখা চ সোতাপত্তিফলং পাপুণিংসু। অযং পন নেসং পঞ্চন্নং মহাপুঞ্ঞানং পুঞ্ঞৰতো ইদ্ধি। সঙ্খেপেন পন পরিপাকগতে পুঞ্ঞসম্ভারে ইজ্ঝনকৰিসেসো পুঞ্ঞৰতো ইদ্ধি।

    Pañcannaṃ mahāpuññānaṃ puññavato iddhīti ettha puññiddhi pañcannaṃ mahāpuññānaṃ daṭṭhabbāti attho. Pañca mahāpuññā nāma meṇḍakaseṭṭhi, tassa bhariyā candapadumā, putto dhanañcayaseṭṭhi, suṇisā sumanadevī, doso puṇṇo nāmāti ime pañca janā paccekasambuddhe katādhikārā. Tesu meṇḍakaseṭṭhi aḍḍhaterasāni koṭṭhasatāni sodhāpetvā sīsaṃ nhāto dvāre nisīditvā uddhaṃ ulloketi, ākāsato rattasālidhārā opatitvā sabbakoṭṭhe pūreti. Tassa bhariyā taṇḍulaṃ ekanāḷimattaṃ gahetvā bhattaṃ pacāpetvā ekasmiṃ sūpabyañjanake sūpaṃ kāretvā sabbālaṅkārapaṭimaṇḍitā dvārakoṭṭhake paññattāsane nisīditvā ‘‘sabbe bhattena atthikā āgacchantū’’ti ghosāpetvā pakkosāpetvā suvaṇṇakaṭacchuṃ ādāya āgatāgatānaṃ upanītabhājanāni pūretvā deti, sakaladivasampi dentiyā kaṭacchunā sakiṃ gahitaṭṭhānamattameva paññāyati. Tassa putto sīsaṃ nhāto sahassatthavikaṃ ādāya ‘‘kahāpaṇehi atthikā āgacchantū’’ti ghosāpetvā āgatāgatānaṃ gahitabhājanāni pūretvā deti. Thavikāya kahāpaṇasahassameva hoti. Tassa suṇisā sabbālaṅkārapaṭimaṇḍitā catudoṇikaṃ vīhipiṭakaṃ ādāya āsane nisinnā ‘‘bījabhattena atthikā āgacchantū’’ti ghosāpetvā āgatāgatānaṃ gahitabhājanāni pūretvā deti, piṭakaṃ yathāpūritameva hoti. Tassa dāso sabbālaṅkārapaṭimaṇḍito suvaṇṇayuge suvaṇṇayottehi goṇe yojetvā suvaṇṇapatodayaṭṭhiṃ ādāya goṇānaṃ gandhapañcaṅgulikāni datvā visāṇesu suvaṇṇakosake paṭimuñcitvā khettaṃ gantvā pājeti , ito tisso, ito tisso, majjhe ekāti satta sītāyo bhijjitvā gacchanti. Jambudīpavāsino bhattabījahiraññasuvaṇṇādīsu yathārucitaṃ seṭṭhigehatoyeva gaṇhiṃsu. Anukkamena pana bhaddiyanagaraṃ anuppatte bhagavati bhagavato dhammadesanāya pañca mahāpuññā ca dhanañcayaseṭṭhissa dhītā visākhā ca sotāpattiphalaṃ pāpuṇiṃsu. Ayaṃ pana nesaṃ pañcannaṃ mahāpuññānaṃ puññavato iddhi. Saṅkhepena pana paripākagate puññasambhāre ijjhanakaviseso puññavato iddhi.

    ৰিজ্জামযিদ্ধিনিদ্দেসে ইজ্ঝনাকারং গন্ধারিৰিজ্জং ৰা উপচারসিদ্ধং পত্থিতসিদ্ধং অঞ্ঞং ৰা ৰিজ্জং ধারেন্তীতি ৰিজ্জাধরা। ৰিজ্জং পরিজপ্পেত্ৰাতি যথোপচারং ৰিজ্জং মুখেন পরিৰত্তেত্ৰা। সেসং ৰুত্তত্থমেৰাতি।

    Vijjāmayiddhiniddese ijjhanākāraṃ gandhārivijjaṃ vā upacārasiddhaṃ patthitasiddhaṃ aññaṃ vā vijjaṃ dhārentīti vijjādharā. Vijjaṃ parijappetvāti yathopacāraṃ vijjaṃ mukhena parivattetvā. Sesaṃ vuttatthamevāti.

    সম্মাপযোগিদ্ধিনিদ্দেসে ইজ্ঝনাকারমত্তং পুচ্ছিত্ৰা অঞ্ঞস্স ৰিসেসস্স অভাৰতো ‘‘কতমা’’তি অপুচ্ছিত্ৰা পকারমত্তমেৰ পুচ্ছন্তেন ‘‘কথ’’ন্তি পুচ্ছা কতা, তথেৰ ‘‘এৰ’’ন্তি নিগমনং কতং। এত্থ চ পটিপত্তিসঙ্খাতস্সেৰ সম্মাপযোগস্স দীপনৰসেন পুরিমপাল়িসদিসাৰ পাল়ি আগতা। অট্ঠকথাযং পন সকটব্যূহাদিকরণৰসেন যংকিঞ্চি সংৰিদহনং যংকিঞ্চি সিপ্পকম্মং যংকিঞ্চি ৰেজ্জকম্মং তিণ্ণং ৰেদানং উগ্গহণং তিণ্ণং পিটকানং উগ্গহণং, অন্তমসো কসনৰপনাদীনি উপাদায তং তং কম্মং কত্ৰা নিব্বত্তৰিসেসো তত্থ তত্থ সম্মাপযোগপচ্চযা ইজ্ঝনট্ঠেন ইদ্ধীতি আগতাতি।

    Sammāpayogiddhiniddese ijjhanākāramattaṃ pucchitvā aññassa visesassa abhāvato ‘‘katamā’’ti apucchitvā pakāramattameva pucchantena ‘‘katha’’nti pucchā katā, tatheva ‘‘eva’’nti nigamanaṃ kataṃ. Ettha ca paṭipattisaṅkhātasseva sammāpayogassa dīpanavasena purimapāḷisadisāva pāḷi āgatā. Aṭṭhakathāyaṃ pana sakaṭabyūhādikaraṇavasena yaṃkiñci saṃvidahanaṃ yaṃkiñci sippakammaṃ yaṃkiñci vejjakammaṃ tiṇṇaṃ vedānaṃ uggahaṇaṃ tiṇṇaṃ piṭakānaṃ uggahaṇaṃ, antamaso kasanavapanādīni upādāya taṃ taṃ kammaṃ katvā nibbattaviseso tattha tattha sammāpayogapaccayā ijjhanaṭṭhena iddhīti āgatāti.

    ইদ্ধিকথাৰণ্ণনা নিট্ঠিতা।

    Iddhikathāvaṇṇanā niṭṭhitā.




    Next: ৩. অভিসমযকথা • 3. Abhisamayakathā




    Related texts:



    তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / পটিসম্ভিদামগ্গপাল়ি • Paṭisambhidāmaggapāḷi / ২. ইদ্ধিকথা • 2. Iddhikathā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact