| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၄. ဣဒ္ဓိကထာဝဏ္ဏနာ
4. Iddhikathāvaṇṇanā
၈၈၃-၈၈၄. ဣဒာနိ ဣဒ္ဓိကထာ နာမ ဟောတိ။ တတ္ထ ဣဒ္ဓိ နာမေသာ ကတ္ထစိ ဣဇ္ဈတိ, ကတ္ထစိ န ဣဇ္ဈတိ, အနိစ္စာဒီနံ နိစ္စာဒိကရဏေ ဧကန္တေနေဝ န ဣဇ္ဈတိ။ သဘာဂသန္တတိံ ပန ပရိဝတ္တေတ္ဝာ ဝိသဘာဂသန္တတိကရဏေ ဝာ သဘာဂသန္တတိဝသေနေဝ စိရတရပ္ပဝတ္တနေ ဝာ ယေသံ အတ္ထာယ ကရိယတိ, တေသံ ပုညာဒီနိ ကာရဏာနိ နိသ္သာယ ကတ္ထစိ ဣဇ္ဈတိ, ဘိက္ခူနံ အတ္ထာယ ပာနီယသ္သ သပ္ပိခီရာဒိကရဏေ ဝိယ မဟာဓာတုနိဓာနေ ဒီပာဒီနံ စိရသန္တာနပ္ပဝတ္တနေ ဝိယ စာတိ ဣဒံ သကသမယေ သန္နိဋ္ဌာနံ။ ယံ ပန အာယသ္မာ ပိလိန္ဒဝစ္ဆော ရညော ပာသာဒံ သုဝဏ္ဏန္တ္ဝေဝ အဓိမုစ္စိ, တံ နိသ္သာယ ယေသံ ‘‘အတ္ထိ အဓိပ္ပာယဣဒ္ဓီ’’တိ လဒ္ဓိ, သေယ္ယထာပိ အန္ဓကာနံ; တေ သန္ဓာယ အတ္ထိ အဓိပ္ပာယဣဒ္ဓီတိ ပုစ္ဆာ သကဝာဒိသ္သ။ တတ္ထ အဓိပ္ပာယဣဒ္ဓီတိ အဓိပ္ပာယဣဒ္ဓိ, ယထာဓိပ္ပာယံ ဣဇ္ဈနဣဒ္ဓီတိ အတ္ထော။ အာမန္တာတိ လဒ္ဓိမတ္တေ ဌတ္ဝာ ပဋိညာ ပရဝာဒိသ္သ။ အထ နံ အနိစ္စာဒီနံ နိစ္စာဒိတာယ အနုယုဉ္ဇိတုံ နိစ္စပဏ္ဏာ ရုက္ခာ ဟောန္တူတိအာဒိမာဟ။ သေသမေတ္ထ ဥတ္တာနတ္ထမေဝ။ လဒ္ဓိပတိဋ္ဌာပနေ သုဝဏ္ဏော စ ပနာသီတိ ရညော ပုညူပနိသ္သယေန အာသိ, န ကေဝလံ ထေရသ္သ အဓိပ္ပာယေနေဝ။ တသ္မာ အသာဓကမေတန္တိ။
883-884. Idāni iddhikathā nāma hoti. Tattha iddhi nāmesā katthaci ijjhati, katthaci na ijjhati, aniccādīnaṃ niccādikaraṇe ekanteneva na ijjhati. Sabhāgasantatiṃ pana parivattetvā visabhāgasantatikaraṇe vā sabhāgasantativaseneva ciratarappavattane vā yesaṃ atthāya kariyati, tesaṃ puññādīni kāraṇāni nissāya katthaci ijjhati, bhikkhūnaṃ atthāya pānīyassa sappikhīrādikaraṇe viya mahādhātunidhāne dīpādīnaṃ cirasantānappavattane viya cāti idaṃ sakasamaye sanniṭṭhānaṃ. Yaṃ pana āyasmā pilindavaccho rañño pāsādaṃ suvaṇṇantveva adhimucci, taṃ nissāya yesaṃ ‘‘atthi adhippāyaiddhī’’ti laddhi, seyyathāpi andhakānaṃ; te sandhāya atthi adhippāyaiddhīti pucchā sakavādissa. Tattha adhippāyaiddhīti adhippāyaiddhi, yathādhippāyaṃ ijjhanaiddhīti attho. Āmantāti laddhimatte ṭhatvā paṭiññā paravādissa. Atha naṃ aniccādīnaṃ niccāditāya anuyuñjituṃ niccapaṇṇā rukkhā hontūtiādimāha. Sesamettha uttānatthameva. Laddhipatiṭṭhāpane suvaṇṇo ca panāsīti rañño puññūpanissayena āsi, na kevalaṃ therassa adhippāyeneva. Tasmā asādhakametanti.
ဣဒ္ဓိကထာဝဏ္ဏနာ။
Iddhikathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၂၀၃) ၄. ဣဒ္ဓိကထာ • (203) 4. Iddhikathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၄. ဣဒ္ဓိကထာဝဏ္ဏနာ • 4. Iddhikathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၄. ဣဒ္ဓိကထာဝဏ္ဏနာ • 4. Iddhikathāvaṇṇanā
