| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೪. ಇದ್ಧಿಕಥಾವಣ್ಣನಾ
4. Iddhikathāvaṇṇanā
೮೮೩-೮೮೪. ಇದಾನಿ ಇದ್ಧಿಕಥಾ ನಾಮ ಹೋತಿ। ತತ್ಥ ಇದ್ಧಿ ನಾಮೇಸಾ ಕತ್ಥಚಿ ಇಜ್ಝತಿ, ಕತ್ಥಚಿ ನ ಇಜ್ಝತಿ, ಅನಿಚ್ಚಾದೀನಂ ನಿಚ್ಚಾದಿಕರಣೇ ಏಕನ್ತೇನೇವ ನ ಇಜ್ಝತಿ। ಸಭಾಗಸನ್ತತಿಂ ಪನ ಪರಿವತ್ತೇತ್ವಾ ವಿಸಭಾಗಸನ್ತತಿಕರಣೇ ವಾ ಸಭಾಗಸನ್ತತಿವಸೇನೇವ ಚಿರತರಪ್ಪವತ್ತನೇ ವಾ ಯೇಸಂ ಅತ್ಥಾಯ ಕರಿಯತಿ, ತೇಸಂ ಪುಞ್ಞಾದೀನಿ ಕಾರಣಾನಿ ನಿಸ್ಸಾಯ ಕತ್ಥಚಿ ಇಜ್ಝತಿ, ಭಿಕ್ಖೂನಂ ಅತ್ಥಾಯ ಪಾನೀಯಸ್ಸ ಸಪ್ಪಿಖೀರಾದಿಕರಣೇ ವಿಯ ಮಹಾಧಾತುನಿಧಾನೇ ದೀಪಾದೀನಂ ಚಿರಸನ್ತಾನಪ್ಪವತ್ತನೇ ವಿಯ ಚಾತಿ ಇದಂ ಸಕಸಮಯೇ ಸನ್ನಿಟ್ಠಾನಂ। ಯಂ ಪನ ಆಯಸ್ಮಾ ಪಿಲಿನ್ದವಚ್ಛೋ ರಞ್ಞೋ ಪಾಸಾದಂ ಸುವಣ್ಣನ್ತ್ವೇವ ಅಧಿಮುಚ್ಚಿ, ತಂ ನಿಸ್ಸಾಯ ಯೇಸಂ ‘‘ಅತ್ಥಿ ಅಧಿಪ್ಪಾಯಇದ್ಧೀ’’ತಿ ಲದ್ಧಿ, ಸೇಯ್ಯಥಾಪಿ ಅನ್ಧಕಾನಂ; ತೇ ಸನ್ಧಾಯ ಅತ್ಥಿ ಅಧಿಪ್ಪಾಯಇದ್ಧೀತಿ ಪುಚ್ಛಾ ಸಕವಾದಿಸ್ಸ। ತತ್ಥ ಅಧಿಪ್ಪಾಯಇದ್ಧೀತಿ ಅಧಿಪ್ಪಾಯಇದ್ಧಿ, ಯಥಾಧಿಪ್ಪಾಯಂ ಇಜ್ಝನಇದ್ಧೀತಿ ಅತ್ಥೋ। ಆಮನ್ತಾತಿ ಲದ್ಧಿಮತ್ತೇ ಠತ್ವಾ ಪಟಿಞ್ಞಾ ಪರವಾದಿಸ್ಸ। ಅಥ ನಂ ಅನಿಚ್ಚಾದೀನಂ ನಿಚ್ಚಾದಿತಾಯ ಅನುಯುಞ್ಜಿತುಂ ನಿಚ್ಚಪಣ್ಣಾ ರುಕ್ಖಾ ಹೋನ್ತೂತಿಆದಿಮಾಹ। ಸೇಸಮೇತ್ಥ ಉತ್ತಾನತ್ಥಮೇವ। ಲದ್ಧಿಪತಿಟ್ಠಾಪನೇ ಸುವಣ್ಣೋ ಚ ಪನಾಸೀತಿ ರಞ್ಞೋ ಪುಞ್ಞೂಪನಿಸ್ಸಯೇನ ಆಸಿ, ನ ಕೇವಲಂ ಥೇರಸ್ಸ ಅಧಿಪ್ಪಾಯೇನೇವ। ತಸ್ಮಾ ಅಸಾಧಕಮೇತನ್ತಿ।
883-884. Idāni iddhikathā nāma hoti. Tattha iddhi nāmesā katthaci ijjhati, katthaci na ijjhati, aniccādīnaṃ niccādikaraṇe ekanteneva na ijjhati. Sabhāgasantatiṃ pana parivattetvā visabhāgasantatikaraṇe vā sabhāgasantativaseneva ciratarappavattane vā yesaṃ atthāya kariyati, tesaṃ puññādīni kāraṇāni nissāya katthaci ijjhati, bhikkhūnaṃ atthāya pānīyassa sappikhīrādikaraṇe viya mahādhātunidhāne dīpādīnaṃ cirasantānappavattane viya cāti idaṃ sakasamaye sanniṭṭhānaṃ. Yaṃ pana āyasmā pilindavaccho rañño pāsādaṃ suvaṇṇantveva adhimucci, taṃ nissāya yesaṃ ‘‘atthi adhippāyaiddhī’’ti laddhi, seyyathāpi andhakānaṃ; te sandhāya atthi adhippāyaiddhīti pucchā sakavādissa. Tattha adhippāyaiddhīti adhippāyaiddhi, yathādhippāyaṃ ijjhanaiddhīti attho. Āmantāti laddhimatte ṭhatvā paṭiññā paravādissa. Atha naṃ aniccādīnaṃ niccāditāya anuyuñjituṃ niccapaṇṇā rukkhā hontūtiādimāha. Sesamettha uttānatthameva. Laddhipatiṭṭhāpane suvaṇṇo ca panāsīti rañño puññūpanissayena āsi, na kevalaṃ therassa adhippāyeneva. Tasmā asādhakametanti.
ಇದ್ಧಿಕಥಾವಣ್ಣನಾ।
Iddhikathāvaṇṇanā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / (೨೦೩) ೪. ಇದ್ಧಿಕಥಾ • (203) 4. Iddhikathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೪. ಇದ್ಧಿಕಥಾವಣ್ಣನಾ • 4. Iddhikathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೪. ಇದ್ಧಿಕಥಾವಣ್ಣನಾ • 4. Iddhikathāvaṇṇanā
