| Library / Tipiṭaka / ཏིཔིཊཀ • Tipiṭaka / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā |
༤. ཨིདྡྷིཀཐཱཝཎྞནཱ
4. Iddhikathāvaṇṇanā
༨༨༣-༨༨༤. ཨིདཱནི ཨིདྡྷིཀཐཱ ནཱམ ཧོཏི། ཏཏྠ ཨིདྡྷི ནཱམེསཱ ཀཏྠཙི ཨིཛ྄ཛྷཏི, ཀཏྠཙི ན ཨིཛ྄ཛྷཏི, ཨནིཙྩཱདཱིནཾ ནིཙྩཱདིཀརཎེ ཨེཀནྟེནེཝ ན ཨིཛ྄ཛྷཏི། སབྷཱགསནྟཏིཾ པན པརིཝཏྟེཏྭཱ ཝིསབྷཱགསནྟཏིཀརཎེ ཝཱ སབྷཱགསནྟཏིཝསེནེཝ ཙིརཏརཔྤཝཏྟནེ ཝཱ ཡེསཾ ཨཏྠཱཡ ཀརིཡཏི, ཏེསཾ པུཉྙཱདཱིནི ཀཱརཎཱནི ནིསྶཱཡ ཀཏྠཙི ཨིཛ྄ཛྷཏི, བྷིཀྑཱུནཾ ཨཏྠཱཡ པཱནཱིཡསྶ སཔྤིཁཱིརཱདིཀརཎེ ཝིཡ མཧཱདྷཱཏུནིདྷཱནེ དཱིཔཱདཱིནཾ ཙིརསནྟཱནཔྤཝཏྟནེ ཝིཡ ཙཱཏི ཨིདཾ སཀསམཡེ སནྣིཊྛཱནཾ། ཡཾ པན ཨཱཡསྨཱ པིལིནྡཝཙྪོ རཉྙོ པཱསཱདཾ སུཝཎྞནྟྭེཝ ཨདྷིམུཙྩི, ཏཾ ནིསྶཱཡ ཡེསཾ ‘‘ཨཏྠི ཨདྷིཔྤཱཡཨིདྡྷཱི’’ཏི ལདྡྷི, སེཡྻཐཱཔི ཨནྡྷཀཱནཾ; ཏེ སནྡྷཱཡ ཨཏྠི ཨདྷིཔྤཱཡཨིདྡྷཱིཏི པུཙྪཱ སཀཝཱདིསྶ། ཏཏྠ ཨདྷིཔྤཱཡཨིདྡྷཱིཏི ཨདྷིཔྤཱཡཨིདྡྷི, ཡཐཱདྷིཔྤཱཡཾ ཨིཛ྄ཛྷནཨིདྡྷཱིཏི ཨཏྠོ། ཨཱམནྟཱཏི ལདྡྷིམཏྟེ ཋཏྭཱ པཊིཉྙཱ པརཝཱདིསྶ། ཨཐ ནཾ ཨནིཙྩཱདཱིནཾ ནིཙྩཱདིཏཱཡ ཨནུཡུཉྫིཏུཾ ནིཙྩཔཎྞཱ རུཀྑཱ ཧོནྟཱུཏིཨཱདིམཱཧ། སེསམེཏྠ ཨུཏྟཱནཏྠམེཝ། ལདྡྷིཔཏིཊྛཱཔནེ སུཝཎྞོ ཙ པནཱསཱིཏི རཉྙོ པུཉྙཱུཔནིསྶཡེན ཨཱསི, ན ཀེཝལཾ ཐེརསྶ ཨདྷིཔྤཱཡེནེཝ། ཏསྨཱ ཨསཱདྷཀམེཏནྟི།
883-884. Idāni iddhikathā nāma hoti. Tattha iddhi nāmesā katthaci ijjhati, katthaci na ijjhati, aniccādīnaṃ niccādikaraṇe ekanteneva na ijjhati. Sabhāgasantatiṃ pana parivattetvā visabhāgasantatikaraṇe vā sabhāgasantativaseneva ciratarappavattane vā yesaṃ atthāya kariyati, tesaṃ puññādīni kāraṇāni nissāya katthaci ijjhati, bhikkhūnaṃ atthāya pānīyassa sappikhīrādikaraṇe viya mahādhātunidhāne dīpādīnaṃ cirasantānappavattane viya cāti idaṃ sakasamaye sanniṭṭhānaṃ. Yaṃ pana āyasmā pilindavaccho rañño pāsādaṃ suvaṇṇantveva adhimucci, taṃ nissāya yesaṃ ‘‘atthi adhippāyaiddhī’’ti laddhi, seyyathāpi andhakānaṃ; te sandhāya atthi adhippāyaiddhīti pucchā sakavādissa. Tattha adhippāyaiddhīti adhippāyaiddhi, yathādhippāyaṃ ijjhanaiddhīti attho. Āmantāti laddhimatte ṭhatvā paṭiññā paravādissa. Atha naṃ aniccādīnaṃ niccāditāya anuyuñjituṃ niccapaṇṇā rukkhā hontūtiādimāha. Sesamettha uttānatthameva. Laddhipatiṭṭhāpane suvaṇṇo ca panāsīti rañño puññūpanissayena āsi, na kevalaṃ therassa adhippāyeneva. Tasmā asādhakametanti.
ཨིདྡྷིཀཐཱཝཎྞནཱ།
Iddhikathāvaṇṇanā.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / ཀཐཱཝཏྠུཔཱལི༹ • Kathāvatthupāḷi / (༢༠༣) ༤. ཨིདྡྷིཀཐཱ • (203) 4. Iddhikathā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༤. ཨིདྡྷིཀཐཱཝཎྞནཱ • 4. Iddhikathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༤. ཨིདྡྷིཀཐཱཝཎྞནཱ • 4. Iddhikathāvaṇṇanā
