| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৩. ইদ্ধিপাদৰারো
3. Iddhipādavāro
৪২. ‘‘‘অযং ছন্দসমাধিপধানসঙ্খারসমন্নাগতো ইদ্ধিপাদো’তি মে , ভিক্খৰে পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি। ‘সো খো পনাযং ছন্দসমাধিপধানসঙ্খারসমন্নাগতো ইদ্ধিপাদো ভাৰেতব্বো’তি মে, ভিক্খৰে…পে॰… ভাৰিতোতি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি।
42. ‘‘‘Ayaṃ chandasamādhipadhānasaṅkhārasamannāgato iddhipādo’ti me , bhikkhave pubbe ananussutesu dhammesu cakkhuṃ udapādi…pe… āloko udapādi. ‘So kho panāyaṃ chandasamādhipadhānasaṅkhārasamannāgato iddhipādo bhāvetabbo’ti me, bhikkhave…pe… bhāvitoti me, bhikkhave, pubbe ananussutesu dhammesu cakkhuṃ udapādi…pe… āloko udapādi.
‘‘অযং ৰীরিযসমাধি…পে॰… অযং চিত্তসমাধি…পে॰… অযং ৰীমংসাসমাধিপধানসঙ্খারসমন্নাগতো ইদ্ধিপাদোতি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি। সো খো পনাযং ৰীমংসাসমাধিপধানসঙ্খারসমন্নাগতো ইদ্ধিপাদো ভাৰেতব্বোতি মে, ভিক্খৰে…পে॰… ভাৰিতোতি মে, ভিক্খৰে, পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি’’।
‘‘Ayaṃ vīriyasamādhi…pe… ayaṃ cittasamādhi…pe… ayaṃ vīmaṃsāsamādhipadhānasaṅkhārasamannāgato iddhipādoti me, bhikkhave, pubbe ananussutesu dhammesu cakkhuṃ udapādi…pe… āloko udapādi. So kho panāyaṃ vīmaṃsāsamādhipadhānasaṅkhārasamannāgato iddhipādo bhāvetabboti me, bhikkhave…pe… bhāvitoti me, bhikkhave, pubbe ananussutesu dhammesu cakkhuṃ udapādi…pe… āloko udapādi’’.
অযং ছন্দসমাধিপধানসঙ্খারসমন্নাগতো ইদ্ধিপাদোতি পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি…পে॰… সো খো পনাযং ছন্দসমাধিপধানসঙ্খারসমন্নাগতো ইদ্ধিপাদো ভাৰেতব্বোতি…পে॰… ভাৰিতোতি পুব্বে অননুস্সুতেসু ধম্মেসু চক্খুং উদপাদি, ঞাণং উদপাদি, পঞ্ঞা উদপাদি, ৰিজ্জা উদপাদি, আলোকো উদপাদি।
Ayaṃ chandasamādhipadhānasaṅkhārasamannāgato iddhipādoti pubbe ananussutesu dhammesu cakkhuṃ udapādi…pe… āloko udapādi…pe… so kho panāyaṃ chandasamādhipadhānasaṅkhārasamannāgato iddhipādo bhāvetabboti…pe… bhāvitoti pubbe ananussutesu dhammesu cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi.
চক্খুং উদপাদীতি – কেনট্ঠেন? ঞাণং উদপাদীতি – কেনট্ঠেন? পঞ্ঞা উদপাদীতি – কেনট্ঠেন? ৰিজ্জা উদপাদীতি – কেনট্ঠেন? আলোকো উদপাদীতি – কেনট্ঠেন? চক্খুং উদপাদীতি – দস্সনট্ঠেন। ঞাণং উদপাদীতি – ঞাতট্ঠেন। পঞ্ঞা উদপাদীতি – পজাননট্ঠেন। ৰিজ্জা উদপাদীতি – পটিৰেধট্ঠেন। আলোকো উদপাদীতি – ওভাসট্ঠেন।
Cakkhuṃ udapādīti – kenaṭṭhena? Ñāṇaṃ udapādīti – kenaṭṭhena? Paññā udapādīti – kenaṭṭhena? Vijjā udapādīti – kenaṭṭhena? Āloko udapādīti – kenaṭṭhena? Cakkhuṃ udapādīti – dassanaṭṭhena. Ñāṇaṃ udapādīti – ñātaṭṭhena. Paññāudapādīti – pajānanaṭṭhena. Vijjā udapādīti – paṭivedhaṭṭhena. Āloko udapādīti – obhāsaṭṭhena.
চক্খুং ধম্মো, দস্সনট্ঠো অত্থো। ঞাণং ধম্মো, ঞাতট্ঠো অত্থো। পঞ্ঞা ধম্মো, পজাননট্ঠো অত্থো। ৰিজ্জা ধম্মো, পটিৰেধট্ঠো অত্থো। আলোকো ধম্মো, ওভাসট্ঠো অত্থো। ইমে পঞ্চ ধম্মা পঞ্চ অত্থা ছন্দৰত্থুকা ইদ্ধিপাদৰত্থুকা ইদ্ধিপাদারম্মণা ইদ্ধিপাদগোচরা ইদ্ধিপাদসঙ্গহিতা ইদ্ধিপাদপরিযাপন্না ইদ্ধিপাদে সমুদাগতা ইদ্ধিপাদে ঠিতা ইদ্ধিপাদে পতিট্ঠিতা।
Cakkhuṃ dhammo, dassanaṭṭho attho. Ñāṇaṃ dhammo, ñātaṭṭho attho. Paññā dhammo, pajānanaṭṭho attho. Vijjā dhammo, paṭivedhaṭṭho attho. Āloko dhammo, obhāsaṭṭho attho. Ime pañca dhammā pañca atthā chandavatthukā iddhipādavatthukā iddhipādārammaṇā iddhipādagocarā iddhipādasaṅgahitā iddhipādapariyāpannā iddhipāde samudāgatā iddhipāde ṭhitā iddhipāde patiṭṭhitā.
ধম্মচক্কন্তি কেনট্ঠেন ধম্মচক্কং? ধম্মঞ্চ পৰত্তেতি চক্কঞ্চাতি – ধম্মচক্কং। চক্কঞ্চ পৰত্তেতি ধম্মঞ্চাতি – ধম্মচক্কং। ধম্মেন পৰত্তেতীতি – ধম্মচক্কং। ধম্মচরিযায পৰত্তেতীতি – ধম্মচক্কং। ধম্মে ঠিতো পৰত্তেতীতি – ধম্মচক্কং। ধম্মে পতিট্ঠিতো পৰত্তেতীতি – ধম্মচক্কং। ধম্মে পতিট্ঠাপেন্তো পৰত্তেতীতি – ধম্মচক্কং। ধম্মে ৰসিপ্পত্তো পৰত্তেতীতি – ধম্মচক্কং। ধম্মে ৰসিং পাপেন্তো পৰত্তেতীতি – ধম্মচক্কং। ধম্মে পারমিপ্পত্তো পৰত্তেতীতি – ধম্মচক্কং। ধম্মে পারমিং পাপেন্তো পৰত্তেতীতি – ধম্মচক্কং…পে॰… ধম্মং অপচাযমানো পৰত্তেতীতি – ধম্মচক্কং। ধম্মদ্ধজো পৰত্তেতীতি – ধম্মচক্কং। ধম্মকেতু পৰত্তেতীতি – ধম্মচক্কং। ধম্মাধিপতেয্যো পৰত্তেতীতি – ধম্মচক্কং। তং খো পন ধম্মচক্কং অপ্পটিৰত্তিযং সমণেন ৰা ব্রাহ্মণেন ৰা দেৰেন ৰা মারেন ৰা ব্রহ্মুনা ৰা কেনচি ৰা লোকস্মিন্তি – ধম্মচক্কং।
Dhammacakkanti kenaṭṭhena dhammacakkaṃ? Dhammañca pavatteti cakkañcāti – dhammacakkaṃ. Cakkañca pavatteti dhammañcāti – dhammacakkaṃ. Dhammena pavattetīti – dhammacakkaṃ. Dhammacariyāya pavattetīti – dhammacakkaṃ. Dhamme ṭhito pavattetīti – dhammacakkaṃ. Dhamme patiṭṭhito pavattetīti – dhammacakkaṃ. Dhamme patiṭṭhāpento pavattetīti – dhammacakkaṃ. Dhamme vasippatto pavattetīti – dhammacakkaṃ. Dhamme vasiṃ pāpento pavattetīti – dhammacakkaṃ. Dhamme pāramippatto pavattetīti – dhammacakkaṃ. Dhamme pāramiṃ pāpento pavattetīti – dhammacakkaṃ…pe… dhammaṃ apacāyamāno pavattetīti – dhammacakkaṃ. Dhammaddhajo pavattetīti – dhammacakkaṃ. Dhammaketu pavattetīti – dhammacakkaṃ. Dhammādhipateyyo pavattetīti – dhammacakkaṃ. Taṃ kho pana dhammacakkaṃ appaṭivattiyaṃ samaṇena vā brāhmaṇena vā devena vā mārena vā brahmunā vā kenaci vā lokasminti – dhammacakkaṃ.
সদ্ধিন্দ্রিযং ধম্মো। তং ধম্মং পৰত্তেতীতি – ধম্মচক্কং…পে॰… অমতোগধং নিব্বানং পরিযোসানট্ঠেন ধম্মো। তং ধম্মং পৰত্তেতীতি – ধম্মচক্কং।
Saddhindriyaṃ dhammo. Taṃ dhammaṃ pavattetīti – dhammacakkaṃ…pe… amatogadhaṃ nibbānaṃ pariyosānaṭṭhena dhammo. Taṃ dhammaṃ pavattetīti – dhammacakkaṃ.
অযং ৰীরিযসমাধিপধানসঙ্খারসমন্নাগতো ইদ্ধিপাদোতি পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি…পে॰… সো খো পনাযং ৰীরিযসমাধিপধানসঙ্খারসমন্নাগতো ইদ্ধিপাদো ভাৰেতব্বোতি…পে॰… ভাৰিতোতি পুব্বে অননুস্সুতেসু ধম্মেসু চক্খুং উদপাদি…পে॰… আলোকো উদপাদি।
Ayaṃ vīriyasamādhipadhānasaṅkhārasamannāgato iddhipādoti pubbe ananussutesu dhammesu cakkhuṃ udapādi…pe… āloko udapādi…pe… so kho panāyaṃ vīriyasamādhipadhānasaṅkhārasamannāgato iddhipādo bhāvetabboti…pe… bhāvitoti pubbe ananussutesu dhammesu cakkhuṃ udapādi…pe… āloko udapādi.
চক্খুং উদপাদীতি – কেনট্ঠেন…পে॰… আলোকো উদপাদীতি – কেনট্ঠেন? চক্খুং উদপাদীতি – দস্সনট্ঠেন…পে॰… আলোকো উদপাদীতি – ওভাসট্ঠেন।
Cakkhuṃ udapādīti – kenaṭṭhena…pe… āloko udapādīti – kenaṭṭhena? Cakkhuṃ udapādīti – dassanaṭṭhena…pe… āloko udapādīti – obhāsaṭṭhena.
চক্খুং ধম্মো, দস্সনট্ঠো অত্থো…পে॰… আলোকো ধম্মো, ওভাসট্ঠো অত্থো। ইমে পঞ্চ ধম্মা পঞ্চ অত্থা ৰীরিযৰত্থুকা ইদ্ধিপাদৰত্থুকা…পে॰… চিত্তৰত্থুকা ইদ্ধিপাদৰত্থুকা… ৰীমংসাৰত্থুকা ইদ্ধিপাদৰত্থুকা ইদ্ধিপাদারম্মণা ইদ্ধিপাদগোচরা ইদ্ধিপাদসঙ্গহিতা ইদ্ধিপাদপরিযাপন্না ইদ্ধিপাদে সমুদাগতা ইদ্ধিপাদে ঠিতা ইদ্ধিপাদে পতিট্ঠিতা ।
Cakkhuṃ dhammo, dassanaṭṭho attho…pe… āloko dhammo, obhāsaṭṭho attho. Ime pañca dhammā pañca atthā vīriyavatthukā iddhipādavatthukā…pe… cittavatthukā iddhipādavatthukā… vīmaṃsāvatthukā iddhipādavatthukā iddhipādārammaṇā iddhipādagocarā iddhipādasaṅgahitā iddhipādapariyāpannā iddhipāde samudāgatā iddhipāde ṭhitā iddhipāde patiṭṭhitā .
ধম্মচক্কন্তি কেনট্ঠেন ধম্মচক্কং? ধম্মঞ্চ পৰত্তেতি চক্কঞ্চাতি – ধম্মচক্কং। চক্কঞ্চ পৰত্তেতি ধম্মঞ্চাতি – ধম্মচক্কং। ধম্মেন পৰত্তেতীতি – ধম্মচক্কং। ধম্মচরিযায পৰত্তেতীতি – ধম্মচক্কং। ধম্মে ঠিতো পৰত্তেতীতি – ধম্মচক্কং। ধম্মে পতিট্ঠিতো পৰত্তেতীতি – ধম্মচক্কং…পে॰… অমতোগধং নিব্বানং পরিযোসানট্ঠেন ধম্মো। তং ধম্মং পৰত্তেতীতি – ধম্মচক্কন্তি।
Dhammacakkanti kenaṭṭhena dhammacakkaṃ? Dhammañca pavatteti cakkañcāti – dhammacakkaṃ. Cakkañca pavatteti dhammañcāti – dhammacakkaṃ. Dhammena pavattetīti – dhammacakkaṃ. Dhammacariyāya pavattetīti – dhammacakkaṃ. Dhamme ṭhito pavattetīti – dhammacakkaṃ. Dhamme patiṭṭhito pavattetīti – dhammacakkaṃ…pe… amatogadhaṃ nibbānaṃ pariyosānaṭṭhena dhammo. Taṃ dhammaṃ pavattetīti – dhammacakkanti.
ধম্মচক্ককথা নিট্ঠিতা।
Dhammacakkakathā niṭṭhitā.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ২-৩. সতিপট্ঠানৰারাদিৰণ্ণনা • 2-3. Satipaṭṭhānavārādivaṇṇanā
