| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. இத்³தி⁴பதே³ஸஸுத்தங்
5. Iddhipadesasuttaṃ
817. ‘‘யே ஹி கேசி, பி⁴க்க²வே, அதீதமத்³தா⁴னங் ஸமணா வா ப்³ராஹ்மணா வா இத்³தி⁴பதே³ஸங் அபி⁴னிப்பா²தே³ஸுங் ஸப்³பே³ தே சதுன்னங் இத்³தி⁴பாதா³னங் பா⁴விதத்தா ப³ஹுலீகதத்தா. யே ஹி கேசி , பி⁴க்க²வே, அனாக³தமத்³தா⁴னங் ஸமணா வா ப்³ராஹ்மணா வா இத்³தி⁴பதே³ஸங் அபி⁴னிப்பா²தெ³ஸ்ஸந்தி ஸப்³பே³ தே சதுன்னங் இத்³தி⁴பாதா³னங் பா⁴விதத்தா ப³ஹுலீகதத்தா. யே ஹி கேசி, பி⁴க்க²வே, ஏதரஹி ஸமணா வா ப்³ராஹ்மணா வா இத்³தி⁴பதே³ஸங் அபி⁴னிப்பா²தெ³ந்தி ஸப்³பே³ தே சதுன்னங் இத்³தி⁴பாதா³னங் பா⁴விதத்தா ப³ஹுலீகதத்தா.
817. ‘‘Ye hi keci, bhikkhave, atītamaddhānaṃ samaṇā vā brāhmaṇā vā iddhipadesaṃ abhinipphādesuṃ sabbe te catunnaṃ iddhipādānaṃ bhāvitattā bahulīkatattā. Ye hi keci , bhikkhave, anāgatamaddhānaṃ samaṇā vā brāhmaṇā vā iddhipadesaṃ abhinipphādessanti sabbe te catunnaṃ iddhipādānaṃ bhāvitattā bahulīkatattā. Ye hi keci, bhikkhave, etarahi samaṇā vā brāhmaṇā vā iddhipadesaṃ abhinipphādenti sabbe te catunnaṃ iddhipādānaṃ bhāvitattā bahulīkatattā.
‘‘கதமேஸங் சதுன்னங்? இத⁴, பி⁴க்க²வே, பி⁴க்கு² ச²ந்த³ஸமாதி⁴ப்பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி, வீரியஸமாதி⁴…பே॰… சித்தஸமாதி⁴…பே॰… வீமங்ஸாஸமாதி⁴ப்பதா⁴னஸங்கா²ரஸமன்னாக³தங் இத்³தி⁴பாத³ங் பா⁴வேதி. யே ஹி கேசி, பி⁴க்க²வே, அதீதமத்³தா⁴னங் ஸமணா வா ப்³ராஹ்மணா வா இத்³தி⁴பதே³ஸங் அபி⁴னிப்பா²தே³ஸுங், ஸப்³பே³ தே இமேஸங்யேவ சதுன்னங் இத்³தி⁴பாதா³னங் பா⁴விதத்தா ப³ஹுலீகதத்தா. யே ஹி கேசி, பி⁴க்க²வே, அனாக³தமத்³தா⁴னங் ஸமணா வா ப்³ராஹ்மணா வா இத்³தி⁴பதே³ஸங் அபி⁴னிப்பா²தெ³ஸ்ஸந்தி, ஸப்³பே³ தே இமேஸங்யேவ சதுன்னங் இத்³தி⁴பாதா³னங் பா⁴விதத்தா ப³ஹுலீகதத்தா. யே ஹி கேசி, பி⁴க்க²வே, ஏதரஹி ஸமணா வா ப்³ராஹ்மணா வா இத்³தி⁴பதே³ஸங் அபி⁴னிப்பா²தெ³ந்தி, ஸப்³பே³ தே இமேஸங்யேவ சதுன்னங் இத்³தி⁴பாதா³னங் பா⁴விதத்தா ப³ஹுலீகதத்தா’’தி. பஞ்சமங்.
‘‘Katamesaṃ catunnaṃ? Idha, bhikkhave, bhikkhu chandasamādhippadhānasaṅkhārasamannāgataṃ iddhipādaṃ bhāveti, vīriyasamādhi…pe… cittasamādhi…pe… vīmaṃsāsamādhippadhānasaṅkhārasamannāgataṃ iddhipādaṃ bhāveti. Ye hi keci, bhikkhave, atītamaddhānaṃ samaṇā vā brāhmaṇā vā iddhipadesaṃ abhinipphādesuṃ, sabbe te imesaṃyeva catunnaṃ iddhipādānaṃ bhāvitattā bahulīkatattā. Ye hi keci, bhikkhave, anāgatamaddhānaṃ samaṇā vā brāhmaṇā vā iddhipadesaṃ abhinipphādessanti, sabbe te imesaṃyeva catunnaṃ iddhipādānaṃ bhāvitattā bahulīkatattā. Ye hi keci, bhikkhave, etarahi samaṇā vā brāhmaṇā vā iddhipadesaṃ abhinipphādenti, sabbe te imesaṃyeva catunnaṃ iddhipādānaṃ bhāvitattā bahulīkatattā’’ti. Pañcamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. இத்³தி⁴பதே³ஸஸுத்தவண்ணனா • 5. Iddhipadesasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. இத்³தி⁴பதே³ஸஸுத்தவண்ணனா • 5. Iddhipadesasuttavaṇṇanā
