| Library / Tipiṭaka / д̇ибидага • Tipiṭaka / бадисамбхид̣̇аамаг̇г̇а-адтагат̇аа • Paṭisambhidāmagga-aṭṭhakathā |
50. ид̣̇д̇хивид̇хан̃аан̣анид̣̇д̣̇зсаван̣н̣анаа
50. Iddhividhañāṇaniddesavaṇṇanā
101. ид̣̇д̇хивид̇хан̃аан̣анид̣̇д̣̇зсам̣ ид̇ха бхигкууд̇и имасмим̣ саасанз бхигку. чанд̣̇асамаад̇хибад̇хаанасан̇каарасаманнааг̇ад̇анд̇и зд̇т̇а чанд̣̇ахзд̇уго самаад̇хи, чанд̣̇аад̇хиго ваа самаад̇хи чанд̣̇асамаад̇хи, гад̇д̇угамяад̇аачанд̣̇ам̣ ад̇хибад̇им̣ гарид̇ваа бадилад̣̇д̇хасамаад̇хиссзд̇ам̣ ад̇хиважанам̣. бад̇хаанабхууд̇аа сан̇каараа бад̇хаанасан̇каараа, жад̇угижжасаад̇хагасса саммаббад̇хаанавийрияассзд̇ам̣ ад̇хиважанам̣. жад̇угижжасаад̇ханавасзна б̣ахуважанам̣ гад̇ам̣. саманнааг̇ад̇анд̇и чанд̣̇асамаад̇хинаа жа бад̇хаанасан̇каарзхи жа убзд̇ам̣. ид̣̇д̇хибаад̣̇анд̇и нибпад̇д̇ибарияааязна ваа иж̇жханадтзна, иж̇жханд̇и зд̇ааяа сад̇д̇аа ид̣̇д̇хаа вуд̣̇д̇хаа уггам̣саг̇ад̇аа хонд̇ийд̇и иминаа ваа барияааязна ид̣̇д̇хийд̇и сан̇кам̣ г̇ад̇аанам̣ убажаараж̇жхаанаад̣̇игусалажид̇д̇асамбаяуд̇д̇аанам̣ чанд̣̇асамаад̇хибад̇хаанасан̇каараанам̣ ад̇хидтаанадтзна баад̣̇абхууд̇ам̣ сзсажид̇д̇ажзд̇асигараасинд̇и ад̇т̇о. вуд̇д̇ан̃хи ид̣̇д̇хибаад̣̇авибхан̇г̇з суд̇д̇анд̇абхааж̇анийяз ‘‘ид̣̇д̇хибаад̣̇од̇и д̇ат̇аабхууд̇асса взд̣̇анаагканд̇хо…бз… вин̃н̃аан̣агканд̇хо’’д̇и (вибха. 434). абхид̇хаммабхааж̇анийяз жа ‘‘ид̣̇д̇хибаад̣̇од̇и д̇ат̇аабхууд̇асса пассо взд̣̇анаа…бз… баг̇г̇аахо авигкзбо’’д̇и (вибха. 447) вуд̇д̇ам̣. д̇асмаа ‘‘сзсажид̇д̇ажзд̇асигарааси’’нд̇и зд̇т̇а? чанд̣̇асамаад̇хибад̇хаанасан̇каарзсу згзгам̣ ид̣̇д̇хим̣ гад̇ваа д̣̇вийхи д̣̇вийхи саха сзсаважанам̣ гад̇анд̇и взд̣̇ид̇аб̣б̣ам̣. зван̃хи жад̇д̇ааро канд̇хаа саб̣б̣з жа пассаад̣̇аяо д̇хаммаа сан̇г̇ахид̇аа хонд̇и. иминаа наязна сзсзсуби ад̇т̇о взд̣̇ид̇аб̣б̣о. яат̇зва хи чанд̣̇ам̣ ад̇хибад̇им̣ гарид̇ваа бадилад̣̇д̇хасамаад̇хи чанд̣̇асамаад̇хийд̇и вуд̇д̇о, звам̣ вийрияам̣ жид̇д̇ам̣ виймам̣сам̣ ад̇хибад̇им̣ гарид̇ваа бадилад̣̇д̇хасамаад̇хи виймам̣саасамаад̇хийд̇и вужжад̇и. звамзгзгасмим̣ ид̣̇д̇хибаад̣̇з чанд̣̇аад̣̇аяо вийрияаад̣̇аяо жид̇д̇аад̣̇аяо виймам̣саад̣̇аяод̇и д̇аяо д̇аяо д̇хаммаа ид̣̇д̇хийби хонд̇и ид̣̇д̇хибаад̣̇ааби, сзсаа бана самбаяуд̇д̇агаа жад̇д̇ааро канд̇хаа ид̣̇д̇хибаад̣̇ааязва . яасмаа ваа имз д̇аяо д̇аяо д̇хаммаа самбаяуд̇д̇агзхи жад̇уухи канд̇хзхи сад̣̇д̇хим̣язва иж̇жханд̇и, на винаа д̇зхи, д̇асмаа д̇зна барияааязна саб̣б̣з жад̇д̇аароби канд̇хаа иж̇жханадтзна ид̣̇д̇хи наама хонд̇и, бад̇идтадтзна баад̣̇аа наамаад̇иби взд̣̇ид̇аб̣б̣ам̣.
101. Iddhividhañāṇaniddesaṃ idha bhikkhūti imasmiṃ sāsane bhikkhu. Chandasamādhipadhānasaṅkhārasamannāgatanti ettha chandahetuko samādhi, chandādhiko vā samādhi chandasamādhi, kattukamyatāchandaṃ adhipatiṃ karitvā paṭiladdhasamādhissetaṃ adhivacanaṃ. Padhānabhūtā saṅkhārā padhānasaṅkhārā, catukiccasādhakassa sammappadhānavīriyassetaṃ adhivacanaṃ. Catukiccasādhanavasena bahuvacanaṃ kataṃ. Samannāgatanti chandasamādhinā ca padhānasaṅkhārehi ca upetaṃ. Iddhipādanti nipphattipariyāyena vā ijjhanaṭṭhena, ijjhanti etāya sattā iddhā vuddhā ukkaṃsagatā hontīti iminā vā pariyāyena iddhīti saṅkhaṃ gatānaṃ upacārajjhānādikusalacittasampayuttānaṃ chandasamādhipadhānasaṅkhārānaṃ adhiṭṭhānaṭṭhena pādabhūtaṃ sesacittacetasikarāsinti attho. Vuttañhi iddhipādavibhaṅge suttantabhājanīye ‘‘iddhipādoti tathābhūtassa vedanākkhandho…pe… viññāṇakkhandho’’ti (vibha. 434). Abhidhammabhājanīye ca ‘‘iddhipādoti tathābhūtassa phasso vedanā…pe… paggāho avikkhepo’’ti (vibha. 447) vuttaṃ. Tasmā ‘‘sesacittacetasikarāsi’’nti ettha? Chandasamādhipadhānasaṅkhāresu ekekaṃ iddhiṃ katvā dvīhi dvīhi saha sesavacanaṃ katanti veditabbaṃ. Evañhi cattāro khandhā sabbe ca phassādayo dhammā saṅgahitā honti. Iminā nayena sesesupi attho veditabbo. Yatheva hi chandaṃ adhipatiṃ karitvā paṭiladdhasamādhi chandasamādhīti vutto, evaṃ vīriyaṃ cittaṃ vīmaṃsaṃ adhipatiṃ karitvā paṭiladdhasamādhi vīmaṃsāsamādhīti vuccati. Evamekekasmiṃ iddhipāde chandādayo vīriyādayo cittādayo vīmaṃsādayoti tayo tayo dhammā iddhīpi honti iddhipādāpi, sesā pana sampayuttakā cattāro khandhā iddhipādāyeva . Yasmā vā ime tayo tayo dhammā sampayuttakehi catūhi khandhehi saddhiṃyeva ijjhanti, na vinā tehi, tasmā tena pariyāyena sabbe cattāropi khandhā ijjhanaṭṭhena iddhi nāma honti, patiṭṭhaṭṭhena pādā nāmātipi veditabbaṃ.
вийрияасамаад̇хибад̇хаанасан̇каарасаманнааг̇ад̇анд̇и зд̇т̇а бана вийрияанд̇и жа бад̇хаанасан̇каарод̇и жа згоязва. гасмаа д̣̇вид̇хаа вуд̇д̇анд̇и жз? вийрияасса ад̇хибад̇ибхаавад̣̇ассанавасзнзд̇т̇а батамам̣ вийрияаг̇г̇ахан̣ам̣ гад̇ам̣, д̇ассзва жад̇угижжасаад̇хагад̇д̇ад̣̇ассанад̇т̇ам̣ бад̇хаанасан̇каараважанам̣ гад̇ам̣. звам̣ д̣̇вид̇хаа вуд̇д̇ад̇д̇аа зва жзд̇т̇ааби д̇аяо д̇аяо д̇хаммаад̇и вуд̇д̇ам̣. гзжи бана ‘‘вибхан̇г̇з ‘ид̣̇д̇хийд̇и яаа д̇зсам̣ д̇зсам̣ д̇хаммаанам̣ ид̣̇д̇хи самид̣̇д̇хи иж̇жханаа самиж̇жханаа’д̇и (вибха. 434) вуд̇д̇ад̇д̇аа ид̣̇д̇хи наама анибпаннаа, ид̣̇д̇хибаад̣̇о нибпанно’’д̇и вад̣̇анд̇и. ид̇ха бана ид̣̇д̇хиби ид̣̇д̇хибаад̣̇оби нибпанно лагкан̣аб̣бхаахад̇од̇и саннидтаанам̣ гад̇ам̣. ид̣̇д̇хи самид̣̇д̇хийд̇иаад̣̇ийхи иж̇жханаагаарзна д̇хаммаа зва вуд̇д̇аад̇и взд̣̇ид̇аб̣б̣ам̣.
Vīriyasamādhipadhānasaṅkhārasamannāgatanti ettha pana vīriyanti ca padhānasaṅkhāroti ca ekoyeva. Kasmā dvidhā vuttanti ce? Vīriyassa adhipatibhāvadassanavasenettha paṭhamaṃ vīriyaggahaṇaṃ kataṃ, tasseva catukiccasādhakattadassanatthaṃ padhānasaṅkhāravacanaṃ kataṃ. Evaṃ dvidhā vuttattā eva cetthāpi tayo tayo dhammāti vuttaṃ. Keci pana ‘‘vibhaṅge ‘iddhīti yā tesaṃ tesaṃ dhammānaṃ iddhi samiddhi ijjhanā samijjhanā’ti (vibha. 434) vuttattā iddhi nāma anipphannā, iddhipādo nipphanno’’ti vadanti. Idha pana iddhipi iddhipādopi nipphanno lakkhaṇabbhāhatoti sanniṭṭhānaṃ kataṃ. Iddhi samiddhītiādīhi ijjhanākārena dhammā eva vuttāti veditabbaṃ.
бхаавзд̇ийд̇и аасзвад̇и. суд̇д̇анд̇абхааж̇анийяз (вибха. 431 аад̣̇аяо) вияа ид̇хааби ид̣̇д̇хибаад̣̇абхааванаа логияаа зва. д̇асмаа ид̣̇д̇хивид̇хам̣ д̇аава самбаад̣̇зд̇угаамо логияам̣ ид̣̇д̇хибаад̣̇ам̣ бхаавзнд̇о бат̇авийгасин̣аад̣̇ийсу адтасу гасин̣зсу ад̇хигад̇авасиббад̇д̇аадтасамаабад̇д̇иго гасин̣аануломад̇о гасин̣абадиломад̇о гасин̣аануломабадиломад̇о жхаанаануломад̇о жхаанабадиломад̇о жхаанаануломабадиломад̇о жхаанугганд̇игад̇о гасин̣угганд̇игад̇о жхаанагасин̣угганд̇игад̇о ан̇г̇асан̇ганд̇игад̇о аарамман̣асан̇ганд̇игад̇о ан̇г̇аарамман̣асан̇ганд̇игад̇о ан̇г̇ававад̇т̇аанад̇о аарамман̣ававад̇т̇аанад̇од̇и имзхи жуд̣̇д̣̇асахи аагаарзхи жид̇д̇ам̣ барид̣̇амзд̇ваа чанд̣̇асийсавийрияасийсажид̇д̇асийсавиймам̣саасийсавасзна бунаббунам̣ жхаанам̣ самаабаж̇ж̇ад̇и. ан̇г̇аарамман̣ававад̇т̇аанамби гзжи ижчанд̇и. буб̣б̣ахзд̇усамбаннзна бана гасин̣зсу жад̇уггаж̇жхаанамад̇д̇з жин̣н̣авасинааби гаад̇ум̣ ваддад̇ийд̇и д̇ам̣ д̇ам̣ ид̣̇д̇хибаад̣̇ам̣ самаад̇хим̣ бхаавзнд̇о ‘‘ануббаннаанам̣ баабагаанам̣ агусалаанам̣ д̇хаммаанам̣ ануббаад̣̇ааяаа’’д̇иаад̣̇игам̣ (вибха. 432) жад̇уббагаарам̣ вийрияам̣ ад̇хидтаад̇и, д̇асса жа хаанивуд̣̇д̇хияо н̃ад̇ваа вийрияасамад̇ам̣ ад̇хидтаад̇и. со звам̣ жад̇уусу ид̣̇д̇хибаад̣̇зсу жид̇д̇ам̣ барибхаавзд̇ваа ид̣̇д̇хивид̇хам̣ самбаад̣̇зд̇и.
Bhāvetīti āsevati. Suttantabhājanīye (vibha. 431 ādayo) viya idhāpi iddhipādabhāvanā lokiyā eva. Tasmā iddhividhaṃ tāva sampādetukāmo lokiyaṃ iddhipādaṃ bhāvento pathavīkasiṇādīsu aṭṭhasu kasiṇesu adhikatavasippattaaṭṭhasamāpattiko kasiṇānulomato kasiṇapaṭilomato kasiṇānulomapaṭilomato jhānānulomato jhānapaṭilomato jhānānulomapaṭilomato jhānukkantikato kasiṇukkantikato jhānakasiṇukkantikato aṅgasaṅkantikato ārammaṇasaṅkantikato aṅgārammaṇasaṅkantikato aṅgavavatthānato ārammaṇavavatthānatoti imehi cuddasahi ākārehi cittaṃ paridametvā chandasīsavīriyasīsacittasīsavīmaṃsāsīsavasena punappunaṃ jhānaṃ samāpajjati. Aṅgārammaṇavavatthānampi keci icchanti. Pubbahetusampannena pana kasiṇesu catukkajjhānamatte ciṇṇavasināpi kātuṃ vaṭṭatīti taṃ taṃ iddhipādaṃ samādhiṃ bhāvento ‘‘anuppannānaṃ pāpakānaṃ akusalānaṃ dhammānaṃ anuppādāyā’’tiādikaṃ (vibha. 432) catuppakāraṃ vīriyaṃ adhiṭṭhāti, tassa ca hānivuddhiyo ñatvā vīriyasamataṃ adhiṭṭhāti. So evaṃ catūsu iddhipādesu cittaṃ paribhāvetvā iddhividhaṃ sampādeti.
со имзсу жад̇уусу ид̣̇д̇хибаад̣̇зсууд̇иаад̣̇ийсу сод̇и со бхаавид̇ажад̇урид̣̇д̇хибаад̣̇о бхигку. жад̇уусу ид̣̇д̇хибаад̣̇зсу жид̇д̇ам̣ барибхаавзд̇ийд̇и бунаббунам̣ чанд̣̇аад̣̇ийсу згзгам̣ ад̇хибад̇им̣ гад̇ваа жхаанасамаабаж̇ж̇анавасзна д̇зсу жид̇д̇ам̣ барибхаавзд̇и наама, чанд̣̇аад̣̇иваасанам̣ г̇аахаабзд̇ийд̇и ад̇т̇о. барид̣̇амзд̇ийд̇и ниб̣б̣исзванам̣ гарод̇и. буримам̣ бажчимасса гааран̣аважанам̣. барибхаавид̇ан̃хи жид̇д̇ам̣ барид̣̇амид̇ам̣ ход̇ийд̇и. муд̣̇ум̣ гарод̇ийд̇и д̇ат̇аа д̣̇анд̇ам̣ жид̇д̇ам̣ васиббад̇д̇ам̣ гарод̇и. васз вад̇д̇амаанан̃хи жид̇д̇ам̣ ‘‘муд̣̇уу’’д̇и вужжад̇и. гамманияанд̇и гаммагкамам̣ гаммаяог̇г̇ам̣ гарод̇и. муд̣̇у хи жид̇д̇ам̣ гамманияам̣ ход̇и суд̇ханд̇амива суван̣н̣ам̣, ид̇ха бана ид̣̇д̇хивид̇хагаммагкамам̣. сод̇и со барибхаавид̇ажид̇д̇о бхигку. гааяамби жид̇д̇з самод̣̇ахад̇ийд̇иаад̣̇и ид̣̇д̇хигаран̣агаалз яат̇аасукам̣ жид̇д̇ажаарасса иж̇жханад̇т̇ам̣ яог̇авид̇хаанам̣ д̣̇ассзд̇ум̣ вуд̇д̇ам̣. д̇ад̇т̇а гааяамби жид̇д̇з самод̣̇ахад̇ийд̇и ад̇д̇ано гараж̇агааяамби баад̣̇агаж̇жхаанажид̇д̇з самод̣̇ахад̇и бавзсзд̇и ааробзд̇и, гааяам̣ жид̇д̇аануг̇ад̇игам̣ гарод̇ийд̇и ад̇т̇о. звам̣ гаран̣ам̣ ад̣̇иссамаанзна гааязна г̇аманасса убагаарааяа ход̇и. жид̇д̇амби гааяз самод̣̇ахад̇ийд̇и баад̣̇агаж̇жхаанажид̇д̇ам̣ ад̇д̇ано гараж̇агааяз самод̣̇ахад̇и ааробзд̇и , жид̇д̇амби гааяаануг̇ад̇игам̣ гарод̇ийд̇и ад̇т̇о. звам̣ гаран̣ам̣ д̣̇иссамаанзна гааязна г̇аманасса убагаарааяа ход̇и. самаад̣̇ахад̇ийд̇иби баато, бад̇идтаабзд̇ийд̇и ад̇т̇о. гааяавасзна жид̇д̇ам̣ барин̣аамзд̇ийд̇и баад̣̇агаж̇жхаанажид̇д̇ам̣ г̇ахзд̇ваа гараж̇агааяз ааробзд̇и гааяаануг̇ад̇игам̣ гарод̇и, ид̣̇ам̣ жид̇д̇ам̣ гааяз самод̣̇аханасса взважанам̣. жид̇д̇авасзна гааяам̣ барин̣аамзд̇ийд̇и гараж̇агааяам̣ г̇ахзд̇ваа баад̣̇агаж̇жхаанажид̇д̇з ааробзд̇и, жид̇д̇аануг̇ад̇игам̣ гарод̇и, ид̣̇ам̣ гааяам̣ жид̇д̇з самод̣̇аханасса взважанам̣. ад̇хидтаад̇ийд̇и ‘‘звам̣ ход̇уу’’д̇и ад̇хидтаад̇и. самод̣̇аханасса ад̇т̇авиваран̣ад̇т̇ам̣ барин̣аамо вуд̇д̇о, барин̣аамасса ад̇т̇авиваран̣ад̇т̇ам̣ ад̇хидтаанам̣ вуд̇д̇ам̣. яасмаа самод̣̇ахад̇ийд̇и муулабад̣̇ам̣, барин̣аамзд̇и ад̇хидтаад̇ийд̇и д̇асса ад̇т̇анид̣̇д̣̇зсабад̣̇аани , д̇асмаа д̇зсам̣ д̣̇виннам̣язва бад̣̇аанам̣ васзна барин̣аамзд̇ваад̇и ад̇хидтахид̇ваад̇и вуд̇д̇ам̣, на вуд̇д̇ам̣ самод̣̇ахид̇ваад̇и.
Soimesu catūsu iddhipādesūtiādīsu soti so bhāvitacaturiddhipādo bhikkhu. Catūsu iddhipādesu cittaṃ paribhāvetīti punappunaṃ chandādīsu ekekaṃ adhipatiṃ katvā jhānasamāpajjanavasena tesu cittaṃ paribhāveti nāma, chandādivāsanaṃ gāhāpetīti attho. Paridametīti nibbisevanaṃ karoti. Purimaṃ pacchimassa kāraṇavacanaṃ. Paribhāvitañhi cittaṃ paridamitaṃ hotīti. Muduṃ karotīti tathā dantaṃ cittaṃ vasippattaṃ karoti. Vase vattamānañhi cittaṃ ‘‘mudū’’ti vuccati. Kammaniyanti kammakkhamaṃ kammayoggaṃ karoti. Mudu hi cittaṃ kammaniyaṃ hoti sudhantamiva suvaṇṇaṃ, idha pana iddhividhakammakkhamaṃ. Soti so paribhāvitacitto bhikkhu. Kāyampi citte samodahatītiādi iddhikaraṇakāle yathāsukhaṃ cittacārassa ijjhanatthaṃ yogavidhānaṃ dassetuṃ vuttaṃ. Tattha kāyampi citte samodahatīti attano karajakāyampi pādakajjhānacitte samodahati paveseti āropeti, kāyaṃ cittānugatikaṃ karotīti attho. Evaṃ karaṇaṃ adissamānena kāyena gamanassa upakārāya hoti. Cittampi kāye samodahatīti pādakajjhānacittaṃ attano karajakāye samodahati āropeti , cittampi kāyānugatikaṃ karotīti attho. Evaṃ karaṇaṃ dissamānena kāyena gamanassa upakārāya hoti. Samādahatītipi pāṭho, patiṭṭhāpetīti attho. Kāyavasena cittaṃ pariṇāmetīti pādakajjhānacittaṃ gahetvā karajakāye āropeti kāyānugatikaṃ karoti, idaṃ cittaṃ kāye samodahanassa vevacanaṃ. Cittavasena kāyaṃ pariṇāmetīti karajakāyaṃ gahetvā pādakajjhānacitte āropeti, cittānugatikaṃ karoti, idaṃ kāyaṃ citte samodahanassa vevacanaṃ. Adhiṭṭhātīti ‘‘evaṃ hotū’’ti adhiṭṭhāti. Samodahanassa atthavivaraṇatthaṃ pariṇāmo vutto, pariṇāmassa atthavivaraṇatthaṃ adhiṭṭhānaṃ vuttaṃ. Yasmā samodahatīti mūlapadaṃ, pariṇāmeti adhiṭṭhātīti tassa atthaniddesapadāni , tasmā tesaṃ dvinnaṃyeva padānaṃ vasena pariṇāmetvāti adhiṭṭhahitvāti vuttaṃ, na vuttaṃ samodahitvāti.
сукасан̃н̃ан̃жа лахусан̃н̃ан̃жа гааяз оггамид̇ваа вихарад̇ийд̇и жад̇уд̇т̇аж̇жхаанзна сахаж̇аад̇асукасан̃н̃ан̃жа лахусан̃н̃ан̃жа самаабаж̇ж̇анавасзна гараж̇агааяз оггамид̇ваа бавзсзд̇ваа вихарад̇и. д̇ааяа сан̃н̃ааяа огганд̇агааяасса банасса гараж̇агааяоби д̇уулабижу вияа лахуго ход̇и. сод̇и со гад̇аяог̇авид̇хаано бхигку. д̇ат̇аабхаавид̇зна жид̇д̇знаад̇и ид̇т̇амбхууд̇алагкан̣з гаран̣аважанам̣, хзд̇уад̇т̇з ваа, д̇ат̇аабхаавид̇зна жид̇д̇зна хзд̇убхууд̇знаад̇и ад̇т̇о. барисуд̣̇д̇хзнаад̇и убзгкаасад̇ибаарисуд̣̇д̇хибхаавад̇о барисуд̣̇д̇хзна. барисуд̣̇д̇хад̇д̇ааязва барияод̣̇аад̇зна, бабхассарзнаад̇и ад̇т̇о. ид̣̇д̇хивид̇хан̃аан̣ааяаад̇и ид̣̇д̇хигодтаасз, ид̣̇д̇хивигаббз ваа н̃аан̣ад̇т̇ааяа. жид̇д̇ам̣ абхинийхарад̇ийд̇и со бхигку вуд̇д̇аббагааравасзна д̇асмим̣ жид̇д̇з абхин̃н̃аабаад̣̇агз ж̇аад̇з ид̣̇д̇хивид̇хан̃аан̣аад̇хиг̇амад̇т̇ааяа баригаммажид̇д̇ам̣ абхинийхарад̇и, гасин̣аарамман̣ад̇о абанзд̇ваа ид̣̇д̇хивид̇хаабхимукам̣ бзсзд̇и. абхининнаамзд̇ийд̇и ад̇хиг̇анд̇аб̣б̣аид̣̇д̇хибон̣ам̣ ид̣̇д̇хибаб̣бхаарам̣ гарод̇и. сод̇и со звам̣ гад̇ажид̇д̇аабхинийхааро бхигку. анзгавихид̇анд̇и анзгавид̇хам̣ наанаббагаарагам̣. ид̣̇д̇хивид̇ханд̇и ид̣̇д̇хигодтаасам̣, ид̣̇д̇хивигаббам̣ ваа. бажжанубход̇ийд̇и бажжанубхавад̇и, пассзд̇и сажчигарод̇и баабун̣аад̇ийд̇и ад̇т̇о.
Sukhasaññañca lahusaññañca kāye okkamitvā viharatīti catutthajjhānena sahajātasukhasaññañca lahusaññañca samāpajjanavasena karajakāye okkamitvā pavesetvā viharati. Tāya saññāya okkantakāyassa panassa karajakāyopi tūlapicu viya lahuko hoti. Soti so katayogavidhāno bhikkhu. Tathābhāvitena cittenāti itthambhūtalakkhaṇe karaṇavacanaṃ, hetuatthe vā, tathābhāvitena cittena hetubhūtenāti attho. Parisuddhenāti upekkhāsatipārisuddhibhāvato parisuddhena. Parisuddhattāyeva pariyodātena, pabhassarenāti attho. Iddhividhañāṇāyāti iddhikoṭṭhāse, iddhivikappe vā ñāṇatthāya. Cittaṃ abhinīharatīti so bhikkhu vuttappakāravasena tasmiṃ citte abhiññāpādake jāte iddhividhañāṇādhigamatthāya parikammacittaṃ abhinīharati, kasiṇārammaṇato apanetvā iddhividhābhimukhaṃ peseti. Abhininnāmetīti adhigantabbaiddhipoṇaṃ iddhipabbhāraṃ karoti. Soti so evaṃ katacittābhinīhāro bhikkhu. Anekavihitanti anekavidhaṃ nānappakārakaṃ. Iddhividhanti iddhikoṭṭhāsaṃ, iddhivikappaṃ vā. Paccanubhotīti paccanubhavati, phasseti sacchikaroti pāpuṇātīti attho.
102. ид̣̇аанисса анзгавихид̇абхаавам̣ д̣̇ассзнд̇о згоби худ̇ваад̇иаад̣̇имааха. д̇ад̇т̇а згоби худ̇ваад̇и ид̣̇д̇хигаран̣ад̇о буб̣б̣з багад̇ияаа згоби худ̇ваа. б̣ахуд̇хаа ход̇ийд̇и б̣ахуннам̣ санд̇игз жан̇гамид̇угаамо ваа, саж̇жхааяам̣ ваа гад̇д̇угаамо, бан̃хам̣ ваа бужчид̇угаамо худ̇ваа сад̇амби сахассамби ход̇и. гат̇ам̣ банааяамзвам̣ ход̇и? ид̣̇д̇хияаа бхуумибаад̣̇абад̣̇амуулабхууд̇з д̇хаммз самбаад̣̇зд̇ваа абхин̃н̃аабаад̣̇агаж̇жхаанам̣ самаабаж̇ж̇ид̇ваа вудтааяа сажз сад̇ам̣ ижчад̇и, ‘‘сад̇ам̣ хоми сад̇ам̣ хомий’’д̇и баригаммам̣ гад̇ваа буна баад̣̇агаж̇жхаанам̣ самаабаж̇ж̇ид̇ваа вудтааяа ад̇хидтаад̇и. ад̇хидтаанажид̇д̇зна сахзва сад̇ам̣ ход̇и. сахассаад̣̇ийсуби зсзва наяо. сажз звам̣ на иж̇жхад̇и, буна баригаммам̣ гад̇ваа д̣̇уд̇ияамби самаабаж̇ж̇ид̇ваа вудтааяа ад̇хидтаад̇аб̣б̣ам̣. сам̣яуд̇д̇адтагат̇ааяан̃хи ‘‘згаваарам̣ д̣̇взваарам̣ самаабаж̇ж̇ид̇ум̣ ваддад̇ий’’д̇и вуд̇д̇ам̣. д̇ад̇т̇а баад̣̇агаж̇жхаанажид̇д̇ам̣ нимид̇д̇аарамман̣ам̣, баригаммажид̇д̇аани сад̇аарамман̣аани ваа сахассаарамман̣аани ваа. д̇аани жа ко ван̣н̣авасзнзва, но бан̣н̣ад̇д̇ивасзна. ад̇хидтаанажид̇д̇амби д̇ат̇зва сад̇аарамман̣ам̣ ваа сахассаарамман̣ам̣ ваа, д̇ам̣ батамаббанаажид̇д̇амива г̇од̇рабхуананд̇арам̣ згамзва уббаж̇ж̇ад̇и руубааважаражад̇уд̇т̇аж̇жхаанигам̣ . д̇ад̇т̇а яз д̇з б̣ахуу ниммид̇аа, д̇з анияамзд̇ваа ниммид̇ад̇д̇аа ид̣̇д̇химад̇аа сад̣̇исаава хонд̇и. таананисаж̇ж̇аад̣̇ийсу ваа бхаасид̇ад̇ун̣хийбхааваад̣̇ийсу ваа яам̣ яам̣ ид̣̇д̇химаа гарод̇и, д̇ам̣д̇ад̣̇зва гаронд̇и. сажз бана наанааван̣н̣з гаад̇угаамо ход̇и, гзжи батамаваяз гзжи маж̇жхимаваяз гзжи бажчимаваяз, д̇ат̇аа д̣̇ийгхагзсз убад̣дхамун̣д̣амун̣д̣з миссагагзсз убад̣дхарад̇д̇ажийварз бан̣д̣угажийварз бад̣̇абхаан̣ад̇хаммагат̇аасарабхан̃н̃абан̃хабужчанабан̃хависсаж̇ж̇анараж̇анабажанажийварасиб̣б̣анад̇хованаад̣̇ийни гаронд̇з, абарзби ваа наанаббагаарагз гаад̇угаамо ход̇и, д̇зна баад̣̇агаж̇жхаанад̇о вудтааяа ‘‘зд̇д̇агаа бхигкуу батамаваяаа хонд̇уу’’д̇иаад̣̇инаа наязна баригаммам̣ гад̇ваа буна самаабаж̇ж̇ид̇ваа вудтааяа ад̇хидтаад̇аб̣б̣ам̣. ад̇хидтаанажид̇д̇зна сад̣̇д̇хим̣ ижчид̇аббагаарааязва хонд̇ийд̇и. зса наяо ‘‘б̣ахуд̇хааби худ̇ваа зго ход̇ий’’д̇иаад̣̇ийсу. аяам̣ бана висзсо – иминаа хи бхигкунаа звам̣ б̣ахубхаавам̣ нимминид̇ваа буна ‘‘згова худ̇ваа жан̇гамиссаами, саж̇жхааяам̣ гариссаами, бан̃хам̣ бужчиссаамий’’д̇и жинд̇зд̇ваа ваа ‘‘аяам̣ вихааро аббабхигкуго, сажз гзжи ааг̇амиссанд̇и, гуд̇о имз зд̇д̇агаа згасад̣̇исаа бхигкуу ад̣̇д̇хаа т̇зрасса зсаанубхаавод̇и мам̣ ж̇ааниссанд̇ий’’д̇и аббижчад̇ааяа ваа анд̇араава ‘‘зго хомий’’д̇и ижчанд̇зна баад̣̇агаж̇жхаанам̣ самаабаж̇ж̇ид̇ваа вудтааяа ‘‘зго хомий’’д̇и баригаммам̣ гад̇ваа буна самаабаж̇ж̇ид̇ваа вудтааяа ‘‘зго хомий’’д̇и ад̇хидтаад̇аб̣б̣ам̣ . ад̇хидтаанажид̇д̇зна сад̣̇д̇хим̣язва зго ход̇и. звам̣ агаронд̇о бана яат̇аабарижчиннагаалавасзна саяамзва зго ход̇и.
102. Idānissa anekavihitabhāvaṃ dassento ekopi hutvātiādimāha. Tattha ekopi hutvāti iddhikaraṇato pubbe pakatiyā ekopi hutvā. Bahudhā hotīti bahunnaṃ santike caṅkamitukāmo vā, sajjhāyaṃ vā kattukāmo, pañhaṃ vā pucchitukāmo hutvā satampi sahassampi hoti. Kathaṃ panāyamevaṃ hoti? Iddhiyā bhūmipādapadamūlabhūte dhamme sampādetvā abhiññāpādakajjhānaṃ samāpajjitvā vuṭṭhāya sace sataṃ icchati, ‘‘sataṃ homi sataṃ homī’’ti parikammaṃ katvā puna pādakajjhānaṃ samāpajjitvā vuṭṭhāya adhiṭṭhāti. Adhiṭṭhānacittena saheva sataṃ hoti. Sahassādīsupi eseva nayo. Sace evaṃ na ijjhati, puna parikammaṃ katvā dutiyampi samāpajjitvā vuṭṭhāya adhiṭṭhātabbaṃ. Saṃyuttaṭṭhakathāyañhi ‘‘ekavāraṃ dvevāraṃ samāpajjituṃ vaṭṭatī’’ti vuttaṃ. Tattha pādakajjhānacittaṃ nimittārammaṇaṃ, parikammacittāni satārammaṇāni vā sahassārammaṇāni vā. Tāni ca kho vaṇṇavaseneva, no paṇṇattivasena. Adhiṭṭhānacittampi tatheva satārammaṇaṃ vā sahassārammaṇaṃ vā, taṃ paṭhamappanācittamiva gotrabhuanantaraṃ ekameva uppajjati rūpāvacaracatutthajjhānikaṃ . Tattha ye te bahū nimmitā, te aniyametvā nimmitattā iddhimatā sadisāva honti. Ṭhānanisajjādīsu vā bhāsitatuṇhībhāvādīsu vā yaṃ yaṃ iddhimā karoti, taṃtadeva karonti. Sace pana nānāvaṇṇe kātukāmo hoti, keci paṭhamavaye keci majjhimavaye keci pacchimavaye, tathā dīghakese upaḍḍhamuṇḍamuṇḍe missakakese upaḍḍharattacīvare paṇḍukacīvare padabhāṇadhammakathāsarabhaññapañhapucchanapañhavissajjanarajanapacanacīvarasibbanadhovanādīni karonte, aparepi vā nānappakārake kātukāmo hoti, tena pādakajjhānato vuṭṭhāya ‘‘ettakā bhikkhū paṭhamavayā hontū’’tiādinā nayena parikammaṃ katvā puna samāpajjitvā vuṭṭhāya adhiṭṭhātabbaṃ. Adhiṭṭhānacittena saddhiṃ icchitappakārāyeva hontīti. Esa nayo ‘‘bahudhāpi hutvā eko hotī’’tiādīsu. Ayaṃ pana viseso – iminā hi bhikkhunā evaṃ bahubhāvaṃ nimminitvā puna ‘‘ekova hutvā caṅkamissāmi, sajjhāyaṃ karissāmi, pañhaṃ pucchissāmī’’ti cintetvā vā ‘‘ayaṃ vihāro appabhikkhuko, sace keci āgamissanti, kuto ime ettakā ekasadisā bhikkhū addhā therassa esānubhāvoti maṃ jānissantī’’ti appicchatāya vā antarāva ‘‘eko homī’’ti icchantena pādakajjhānaṃ samāpajjitvā vuṭṭhāya ‘‘eko homī’’ti parikammaṃ katvā puna samāpajjitvā vuṭṭhāya ‘‘eko homī’’ti adhiṭṭhātabbaṃ . Adhiṭṭhānacittena saddhiṃyeva eko hoti. Evaṃ akaronto pana yathāparicchinnakālavasena sayameva eko hoti.
аавибхааванд̇и баагадабхаавам̣ гарод̇ийд̇и ад̇т̇о. д̇иробхааванд̇и бадижчаннабхаавам̣ гарод̇ийд̇и ад̇т̇о. аавибхаавам̣ бажжанубход̇и, д̇иробхаавам̣ бажжанубход̇ийд̇и буримзна ваа самб̣анд̇хо. д̇ад̇рааяам̣ ид̣̇д̇химаа аавибхаавам̣ гад̇д̇угаамо анд̇хагаарам̣ ваа аалогам̣ гарод̇и, бадижчаннам̣ ваа вивадам̣ гарод̇и, анаабаат̇ам̣ ваа аабаат̇ам̣ гарод̇и. гат̇ам̣? аяан̃хи яат̇аа бадижчанноби д̣̇уурз тид̇оби ваа д̣̇иссад̇и, звам̣ ад̇д̇аанам̣ ваа барам̣ ваа гад̇д̇угаамо баад̣̇агаж̇жхаанад̇о вудтааяа ‘‘ид̣̇ам̣ анд̇хагаарам̣ аалогаж̇аад̇ам̣ ход̇уу’’д̇и ваа, ‘‘ид̣̇ам̣ бадижчаннам̣ вивадам̣ ход̇уу’’д̇и ваа, ‘‘ид̣̇ам̣ анаабаат̇ам̣ аабаат̇ам̣ ход̇уу’’д̇и ваа ааваж̇ж̇ид̇ваа баригаммам̣ гад̇ваа вуд̇д̇анаязнзва ад̇хидтаад̇и. саха ад̇хидтаанаа яат̇аад̇хидтид̇амзва ход̇и. барз д̣̇уурз тид̇ааби бассанд̇и, саяамби бассид̇угаамо бассад̇и. д̇иробхаавам̣ гад̇д̇угаамо бана аалогам̣ ваа анд̇хагаарам̣ гарод̇и, аббадижчаннам̣ ваа бадижчаннам̣, аабаат̇ам̣ ваа анаабаат̇ам̣ гарод̇и. гат̇ам̣? аяан̃хи яат̇аа аббадижчанноби самийбз тид̇оби ваа на д̣̇иссад̇и, звам̣ ад̇д̇аанам̣ ваа барам̣ ваа гад̇д̇угаамо баад̣̇агаж̇жхаанаа вудтахид̇ваа ‘‘ид̣̇ам̣ аалогадтаанам̣ анд̇хагаарам̣ ход̇уу’’д̇и ваа, ‘‘ид̣̇ам̣ аббадижчаннам̣ бадижчаннам̣ ход̇уу’’д̇и ваа, ‘‘ид̣̇ам̣ аабаат̇ам̣ анаабаат̇ам̣ ход̇уу’’д̇и ваа ааваж̇ж̇ид̇ваа баригаммам̣ гад̇ваа вуд̇д̇анаязнзва ад̇хидтаад̇и. саха ад̇хидтаанаа яат̇аад̇хидтид̇амзва ход̇и. барз самийбз тид̇ааби на бассанд̇и, саяамби абассид̇угаамо на бассад̇и. абижа саб̣б̣амби баагадабаадихаарияам̣ аавибхааво наама, абаагадабаадихаарияам̣ д̇иробхааво наама. д̇ад̇т̇а баагадабаадихаарияз ид̣̇д̇хиби бан̃н̃ааяад̇и ид̣̇д̇химааби. д̇ам̣ яамагабаадихаариязна д̣̇ийбзд̇аб̣б̣ам̣. абаагадабаадихаарияз ид̣̇д̇хиязва бан̃н̃ааяад̇и, на ид̣̇д̇химаа. д̇ам̣ махагасуд̇д̇зна (сам̣. ни. 4.346) жа б̣рахманиманд̇анигасуд̇д̇зна (ма. ни. 1.501 аад̣̇аяо) жа д̣̇ийбзд̇аб̣б̣ам̣.
Āvibhāvanti pākaṭabhāvaṃ karotīti attho. Tirobhāvanti paṭicchannabhāvaṃ karotīti attho. Āvibhāvaṃ paccanubhoti, tirobhāvaṃ paccanubhotīti purimena vā sambandho. Tatrāyaṃ iddhimā āvibhāvaṃ kattukāmo andhakāraṃ vā ālokaṃ karoti, paṭicchannaṃ vā vivaṭaṃ karoti, anāpāthaṃ vā āpāthaṃ karoti. Kathaṃ? Ayañhi yathā paṭicchannopi dūre ṭhitopi vā dissati, evaṃ attānaṃ vā paraṃ vā kattukāmo pādakajjhānato vuṭṭhāya ‘‘idaṃ andhakāraṃ ālokajātaṃ hotū’’ti vā, ‘‘idaṃ paṭicchannaṃ vivaṭaṃ hotū’’ti vā, ‘‘idaṃ anāpāthaṃ āpāthaṃ hotū’’ti vā āvajjitvā parikammaṃ katvā vuttanayeneva adhiṭṭhāti. Saha adhiṭṭhānā yathādhiṭṭhitameva hoti. Pare dūre ṭhitāpi passanti, sayampi passitukāmo passati. Tirobhāvaṃ kattukāmo pana ālokaṃ vā andhakāraṃ karoti, appaṭicchannaṃ vā paṭicchannaṃ, āpāthaṃ vā anāpāthaṃ karoti. Kathaṃ? Ayañhi yathā appaṭicchannopi samīpe ṭhitopi vā na dissati, evaṃ attānaṃ vā paraṃ vā kattukāmo pādakajjhānā vuṭṭhahitvā ‘‘idaṃ ālokaṭṭhānaṃ andhakāraṃ hotū’’ti vā, ‘‘idaṃ appaṭicchannaṃ paṭicchannaṃ hotū’’ti vā, ‘‘idaṃ āpāthaṃ anāpāthaṃ hotū’’ti vā āvajjitvā parikammaṃ katvā vuttanayeneva adhiṭṭhāti. Saha adhiṭṭhānā yathādhiṭṭhitameva hoti. Pare samīpe ṭhitāpi na passanti, sayampi apassitukāmo na passati. Apica sabbampi pākaṭapāṭihāriyaṃ āvibhāvo nāma, apākaṭapāṭihāriyaṃ tirobhāvo nāma. Tattha pākaṭapāṭihāriye iddhipi paññāyati iddhimāpi. Taṃ yamakapāṭihāriyena dīpetabbaṃ. Apākaṭapāṭihāriye iddhiyeva paññāyati, na iddhimā. Taṃ mahakasuttena (saṃ. ni. 4.346) ca brahmanimantanikasuttena (ma. ni. 1.501 ādayo) ca dīpetabbaṃ.
д̇ирогудданд̇и барагуддам̣, гуддасса барабхааг̇анд̇и вуд̇д̇ам̣ ход̇и. зса наяо д̇иробаагаарад̇иробаб̣б̣ад̇зсу. гуддод̇и жа г̇зхабхид̇д̇и. баагаарод̇и г̇зхавихаараг̇аамаад̣̇ийнам̣ баригкзбабаагааро. баб̣б̣ад̇од̇и бам̣субаб̣б̣ад̇о ваа баасаан̣абаб̣б̣ад̇о ваа. асаж̇ж̇амаанод̇и алаг̇г̇амаано. сзяяат̇ааби аагаасзд̇и аагаасз вияа. звам̣ г̇анд̇угаамзна бана аагаасагасин̣ам̣ самаабаж̇ж̇ид̇ваа вудтааяа гуддам̣ ваа баагаарам̣ ваа баб̣б̣ад̇ам̣ ваа ааваж̇ж̇ид̇ваа гад̇абаригаммзна ‘‘аагаасо ход̇уу’’д̇и ад̇хидтаад̇аб̣б̣о, аагаасова ход̇и. ад̇хо од̇арид̇угаамасса, уд̣̇д̇хам̣ ваа аарохид̇угаамасса сусиро ход̇и, винивиж̇жхид̇ваа г̇анд̇угаамасса чид̣̇д̣̇о. со д̇ад̇т̇а асаж̇ж̇амаано г̇ажчад̇и. сажз банасса бхигкуно ад̇хидтахид̇ваа г̇ажчанд̇асса анд̇араа баб̣б̣ад̇о ваа ругко ваа удтзд̇и, гим̣ буна самаабаж̇ж̇ид̇ваа ад̇хидтаад̇аб̣б̣анд̇и? д̣̇осо над̇т̇и. буна самаабаж̇ж̇ид̇ваа ад̇хидтаанан̃хи убаж̇жхааяасса санд̇игз ниссаяаг̇г̇ахан̣асад̣̇исам̣ ход̇и. иминаа бана бхигкунаа ‘‘аагаасо ход̇уу’’д̇и ад̇хидтид̇ад̇д̇аа аагаасо ход̇иязва. буримаад̇хидтаанаб̣алзнзва жасса анд̇араа ан̃н̃о баб̣б̣ад̇о ваа ругко ваа уд̇умаяо удтахиссад̇ийд̇и адтаанамзд̇ам̣. ан̃н̃зна ид̣̇д̇химад̇аа ниммид̇з бана батамам̣ ниммаанам̣ б̣алавам̣ ход̇и. ид̇арзна д̇асса уд̣̇д̇хам̣ ваа ад̇хо ваа г̇анд̇аб̣б̣ам̣.
Tirokuṭṭanti parakuṭṭaṃ, kuṭṭassa parabhāganti vuttaṃ hoti. Esa nayo tiropākāratiropabbatesu. Kuṭṭoti ca gehabhitti. Pākāroti gehavihāragāmādīnaṃ parikkhepapākāro. Pabbatoti paṃsupabbato vā pāsāṇapabbato vā. Asajjamānoti alaggamāno. Seyyathāpi ākāseti ākāse viya. Evaṃ gantukāmena pana ākāsakasiṇaṃ samāpajjitvā vuṭṭhāya kuṭṭaṃ vā pākāraṃ vā pabbataṃ vā āvajjitvā kataparikammena ‘‘ākāso hotū’’ti adhiṭṭhātabbo, ākāsova hoti. Adho otaritukāmassa, uddhaṃ vā ārohitukāmassa susiro hoti, vinivijjhitvā gantukāmassa chiddo. So tattha asajjamāno gacchati. Sace panassa bhikkhuno adhiṭṭhahitvā gacchantassa antarā pabbato vā rukkho vā uṭṭheti, kiṃ puna samāpajjitvā adhiṭṭhātabbanti? Doso natthi. Puna samāpajjitvā adhiṭṭhānañhi upajjhāyassa santike nissayaggahaṇasadisaṃ hoti. Iminā pana bhikkhunā ‘‘ākāso hotū’’ti adhiṭṭhitattā ākāso hotiyeva. Purimādhiṭṭhānabaleneva cassa antarā añño pabbato vā rukkho vā utumayo uṭṭhahissatīti aṭṭhānametaṃ. Aññena iddhimatā nimmite pana paṭhamaṃ nimmānaṃ balavaṃ hoti. Itarena tassa uddhaṃ vā adho vā gantabbaṃ.
бат̇авияааби уммуж̇ж̇анимуж̇ж̇анд̇и зд̇т̇а уммуж̇ж̇анд̇и удтаанам̣, нимуж̇ж̇анд̇и сам̣сийд̣̇анам̣, уммуж̇ж̇ан̃жа нимуж̇ж̇ан̃жа уммуж̇ж̇анимуж̇ж̇ам̣. звам̣ гад̇д̇угаамзна бана аабогасин̣ам̣ самаабаж̇ж̇ид̇ваа удтааяа ‘‘зд̇д̇агз таанз бат̇авий уд̣̇агам̣ ход̇уу’’д̇и барижчинд̣̇ид̇ваа баригаммам̣ гад̇ваа вуд̇д̇анаязнзва ад̇хидтаад̇аб̣б̣ам̣. саха ад̇хидтаанаа яат̇аабарижчиннз таанз бат̇авий уд̣̇агамзва ход̇и. со д̇ад̇т̇а уммуж̇ж̇анимуж̇ж̇ам̣ гарод̇и сзяяат̇ааби уд̣̇агз. на гзвалан̃жа уммуж̇ж̇анимуж̇ж̇амзва, нхаанабаанамукад̇хованабхан̣д̣агад̇хованаад̣̇ийсу яам̣ яам̣ ижчад̇и, д̇ам̣ д̇ам̣ гарод̇и. на гзвалан̃жа уд̣̇агамзва гарод̇и, саббид̇зламад̇хупаан̣ид̇аад̣̇ийсуби яам̣ яам̣ ижчад̇и, д̇ам̣ д̇ам̣ ‘‘ид̣̇ан̃жид̣̇ан̃жа зд̇д̇агам̣ ход̇уу’’д̇и ааваж̇ж̇ид̇ваа баригаммам̣ гад̇ваа ад̇хидтаханд̇асса яат̇аад̇хидтид̇амзва ход̇и. уд̣̇д̇харид̇ваа бхааж̇анаг̇ад̇ам̣ гаронд̇асса сабби саббиязва ход̇и, д̇злаад̣̇ийни д̇злаад̣̇ийниязва, уд̣̇агам̣ уд̣̇агамзва. со д̇ад̇т̇а д̇змид̇угаамова д̇змзд̇и, на д̇змид̇угаамо на д̇змзд̇и. д̇ассзва жа саа бат̇авий уд̣̇агам̣ ход̇и, сзсаж̇анасса бат̇авийязва. д̇ад̇т̇а мануссаа бад̇д̇игааби г̇ажчанд̇и, яаанаад̣̇ийхиби г̇ажчанд̇и, гасигаммаад̣̇ийниби гаронд̇иязва. сажз банааяам̣ ‘‘д̇зсамби уд̣̇агам̣ ход̇уу’’д̇и ижчад̇и, ход̇иязва. барижчиннагаалам̣ бана ад̇иггамид̇ваа яам̣ багад̇ияаа гхадад̇ал̣аагаад̣̇ийсу уд̣̇агам̣, д̇ам̣ табзд̇ваа авасзсам̣ барижчиннадтаанам̣ бат̇авийязва ход̇и.
Pathaviyāpi ummujjanimujjanti ettha ummujjanti uṭṭhānaṃ, nimujjanti saṃsīdanaṃ, ummujjañca nimujjañca ummujjanimujjaṃ. Evaṃ kattukāmena pana āpokasiṇaṃ samāpajjitvā uṭṭhāya ‘‘ettake ṭhāne pathavī udakaṃ hotū’’ti paricchinditvā parikammaṃ katvā vuttanayeneva adhiṭṭhātabbaṃ. Saha adhiṭṭhānā yathāparicchinne ṭhāne pathavī udakameva hoti. So tattha ummujjanimujjaṃ karoti seyyathāpi udake. Na kevalañca ummujjanimujjameva, nhānapānamukhadhovanabhaṇḍakadhovanādīsu yaṃ yaṃ icchati, taṃ taṃ karoti. Na kevalañca udakameva karoti, sappitelamadhuphāṇitādīsupi yaṃ yaṃ icchati, taṃ taṃ ‘‘idañcidañca ettakaṃ hotū’’ti āvajjitvā parikammaṃ katvā adhiṭṭhahantassa yathādhiṭṭhitameva hoti. Uddharitvā bhājanagataṃ karontassa sappi sappiyeva hoti, telādīni telādīniyeva, udakaṃ udakameva. So tattha temitukāmova temeti, na temitukāmo na temeti. Tasseva ca sā pathavī udakaṃ hoti, sesajanassa pathavīyeva. Tattha manussā pattikāpi gacchanti, yānādīhipi gacchanti, kasikammādīnipi karontiyeva. Sace panāyaṃ ‘‘tesampi udakaṃ hotū’’ti icchati, hotiyeva. Paricchinnakālaṃ pana atikkamitvā yaṃ pakatiyā ghaṭataḷākādīsu udakaṃ, taṃ ṭhapetvā avasesaṃ paricchinnaṭṭhānaṃ pathavīyeva hoti.
уд̣̇агзби абхиж̇ж̇амаанз г̇ажчад̇ийд̇и зд̇т̇а яам̣ уд̣̇агам̣ аггамид̇ваа сам̣сийд̣̇ад̇и, д̇ам̣ бхиж̇ж̇амаананд̇и вужжад̇и, вибарийд̇ам̣ абхиж̇ж̇амаанам̣. звам̣ г̇анд̇угаамзна бана бат̇авийгасин̣ам̣ самаабаж̇ж̇ид̇ваа вудтааяа ‘‘зд̇д̇агз таанз уд̣̇агам̣ бат̇авий ход̇уу’’д̇и барижчинд̣̇ид̇ваа баригаммам̣ гад̇ваа вуд̇д̇анаязнзва ад̇хидтаад̇аб̣б̣ам̣. саха ад̇хидтаанаа яат̇аабарижчиннадтаанз уд̣̇агам̣ бат̇авийязва ход̇и. со д̇ад̇т̇а г̇ажчад̇и сзяяат̇ааби бат̇авияам̣. на гзвалан̃жа г̇ажчад̇и, яам̣ яам̣ ирияаабат̇ам̣ ижчад̇и, д̇ам̣ д̇ам̣ габбзд̇и. на гзвалан̃жа бат̇авимзва гарод̇и, ман̣исуван̣н̣абаб̣б̣ад̇аругкаад̣̇ийсуби яам̣ яам̣ ижчад̇и, д̇ам̣ д̇ам̣ вуд̇д̇анаязнзва ааваж̇ж̇ид̇ваа ад̇хидтаад̇и, яат̇аад̇хидтид̇амзва ход̇и. д̇ассзва жа д̇ам̣ уд̣̇агам̣ бат̇авий ход̇и, сзсаж̇анасса уд̣̇агамзва . мажчагажчабаа жа уд̣̇агагаагаад̣̇аяо жа яат̇ааружи вижаранд̇и. сажз банааяам̣ ан̃н̃зсамби мануссаанам̣ д̇ам̣ бат̇авим̣ гаад̇ум̣ ижчад̇и, гарод̇иязва. яат̇аабарижчиннагаалаад̇иггамзна бана уд̣̇агамзва ход̇и.
Udakepi abhijjamāne gacchatīti ettha yaṃ udakaṃ akkamitvā saṃsīdati, taṃ bhijjamānanti vuccati, viparītaṃ abhijjamānaṃ. Evaṃ gantukāmena pana pathavīkasiṇaṃ samāpajjitvā vuṭṭhāya ‘‘ettake ṭhāne udakaṃ pathavī hotū’’ti paricchinditvā parikammaṃ katvā vuttanayeneva adhiṭṭhātabbaṃ. Saha adhiṭṭhānā yathāparicchinnaṭṭhāne udakaṃ pathavīyeva hoti. So tattha gacchati seyyathāpi pathaviyaṃ. Na kevalañca gacchati, yaṃ yaṃ iriyāpathaṃ icchati, taṃ taṃ kappeti. Na kevalañca pathavimeva karoti, maṇisuvaṇṇapabbatarukkhādīsupi yaṃ yaṃ icchati, taṃ taṃ vuttanayeneva āvajjitvā adhiṭṭhāti, yathādhiṭṭhitameva hoti. Tasseva ca taṃ udakaṃ pathavī hoti, sesajanassa udakameva . Macchakacchapā ca udakakākādayo ca yathāruci vicaranti. Sace panāyaṃ aññesampi manussānaṃ taṃ pathaviṃ kātuṃ icchati, karotiyeva. Yathāparicchinnakālātikkamena pana udakameva hoti.
аагаасзби баллан̇гзна гамад̇ийд̇и анд̇алигкз саманд̇ад̇о ууруб̣ад̣̇д̇хаасанзна г̇ажчад̇и. багкий сагун̣од̇и багкзхи яуд̇д̇о сагун̣о, на абарибун̣н̣абагко луунабагко ваа. д̇аад̣̇исо хи аагаасз г̇анд̇ум̣ на саггод̇и. звамаагаасз г̇анд̇угаамзна бана бат̇авийгасин̣ам̣ самаабаж̇ж̇ид̇ваа вудтааяа сажз нисинно г̇анд̇умижчад̇и, баллан̇габбамаан̣ам̣ таанам̣ барижчинд̣̇ид̇ваа баригаммам̣ гад̇ваа вуд̇д̇анаязнзва ад̇хидтаад̇аб̣б̣ам̣. сажз нибанно г̇анд̇угаамо ход̇и, ман̃жаббамаан̣ам̣, сажз бад̣̇асаа г̇анд̇угаамо ход̇и, маг̇г̇аббамаан̣анд̇и звам̣ яат̇аануруубам̣ таанам̣ барижчинд̣̇ид̇ваа вуд̇д̇анаязнзва ‘‘бат̇авий ход̇уу’’д̇и ад̇хидтаад̇аб̣б̣ам̣. саха ад̇хидтаанаа бат̇авийязва ход̇и. аагаасз г̇анд̇угаамзна жа бхигкунаа д̣̇иб̣б̣ажагкулаабхинааби бхавид̇аб̣б̣ам̣. гасмаа? яасмаа анд̇араа уд̇усамудтаанаа ваа баб̣б̣ад̇аругкаад̣̇аяо хонд̇и, нааг̇асубан̣н̣аад̣̇аяо ваа усууяанд̇аа маабзнд̇и, д̇зсам̣ д̣̇ассанад̇т̇ам̣. д̇з бана д̣̇исваа гим̣ гаад̇аб̣б̣анд̇и? баад̣̇агаж̇жхаанам̣ самаабаж̇ж̇ид̇ваа вудтааяа ‘‘аагаасо ход̇уу’’д̇и баригаммам̣ гад̇ваа ад̇хидтаад̇аб̣б̣ам̣. абижа огаасз орохан̣ад̇т̇амби иминаа д̣̇иб̣б̣ажагкулаабхинаа бхавид̇аб̣б̣ам̣. аяан̃хи сажз аногаасз нхаанад̇ид̇т̇з ваа г̇аамад̣̇ваарз ваа орохад̇и, махааж̇анасса баагадо ход̇и, д̇асмаа д̣̇иб̣б̣ажагкунаа бассид̇ваа аногаасам̣ важ̇ж̇зд̇ваа огаасз од̇арад̇ийд̇и.
Ākāsepi pallaṅkena kamatīti antalikkhe samantato ūrubaddhāsanena gacchati. Pakkhī sakuṇoti pakkhehi yutto sakuṇo, na aparipuṇṇapakkho lūnapakkho vā. Tādiso hi ākāse gantuṃ na sakkoti. Evamākāse gantukāmena pana pathavīkasiṇaṃ samāpajjitvā vuṭṭhāya sace nisinno gantumicchati, pallaṅkappamāṇaṃ ṭhānaṃ paricchinditvā parikammaṃ katvā vuttanayeneva adhiṭṭhātabbaṃ. Sace nipanno gantukāmo hoti, mañcappamāṇaṃ, sace padasā gantukāmo hoti, maggappamāṇanti evaṃ yathānurūpaṃ ṭhānaṃ paricchinditvā vuttanayeneva ‘‘pathavī hotū’’ti adhiṭṭhātabbaṃ. Saha adhiṭṭhānā pathavīyeva hoti. Ākāse gantukāmena ca bhikkhunā dibbacakkhulābhināpi bhavitabbaṃ. Kasmā? Yasmā antarā utusamuṭṭhānā vā pabbatarukkhādayo honti, nāgasupaṇṇādayo vā usūyantā māpenti, tesaṃ dassanatthaṃ. Te pana disvā kiṃ kātabbanti? Pādakajjhānaṃ samāpajjitvā vuṭṭhāya ‘‘ākāso hotū’’ti parikammaṃ katvā adhiṭṭhātabbaṃ. Apica okāse orohaṇatthampi iminā dibbacakkhulābhinā bhavitabbaṃ. Ayañhi sace anokāse nhānatitthe vā gāmadvāre vā orohati, mahājanassa pākaṭo hoti, tasmā dibbacakkhunā passitvā anokāsaṃ vajjetvā okāse otaratīti.
имзби жанд̣̇имасуурияз звам̣махид̣̇д̇хигз звам̣махаанубхаавзд̇и зд̇т̇а жанд̣̇имасуурияаанам̣ д̣̇ваажад̇д̇аалийсаяож̇анасахассобарижаран̣зна махид̣̇д̇хигад̇аа, д̇ийсу д̣̇ийбзсу згагкан̣з аалогагаран̣зна махаанубхаавад̇аа взд̣̇ид̇аб̣б̣аа, звам̣ убарижаран̣ааалогапаран̣зхи ваа махид̣̇д̇хигз, д̇знзва махид̣̇д̇хигад̇д̇зна махаанубхаавз . бараамасад̇ийд̇и бариг̇г̇ан̣хаад̇и, згад̣̇зсз ваа пусад̇и. баримаж̇ж̇ад̇ийд̇и саманд̇ад̇о аад̣̇аасад̇алам̣ вияа баримаж̇ж̇ад̇и. аяам̣ банасса ид̣̇д̇хи абхин̃н̃аабаад̣̇агаж̇жхаанавасзнзва иж̇жхад̇и, над̇т̇зд̇т̇а гасин̣асамаабад̇д̇инияамо. свааяам̣ яад̣̇и ижчад̇и г̇анд̇ваа бараамасид̇ум̣, г̇анд̇ваа бараамасад̇и. сажз бана ид̇хзва нисиннаго ваа нибаннаго ваа бараамасид̇угаамо ход̇и, ‘‘хад̇т̇абаасз ход̇уу’’д̇и ад̇хидтаад̇и. ад̇хидтаанаб̣алзна ван̣даа муд̇д̇ад̇аалапалам̣ вияа ааг̇анд̇ваа хад̇т̇абаасз тид̇з ваа бараамасад̇и, хад̇т̇ам̣ ваа вад̣дхзд̇ваа бараамасад̇и. хад̇т̇ам̣ вад̣дхзнд̇асса бана гим̣ убаад̣̇иннагам̣ вад̣дхад̇и анубаад̣̇иннагам̣ ваад̇и? убаад̣̇иннагам̣ ниссааяа анубаад̣̇иннагам̣ вад̣дхад̇и. яо звам̣ гад̇ваа на гзвалам̣ жанд̣̇имасуурияз бараамасад̇и, сажз ижчад̇и, баад̣̇агат̇алигам̣ гад̇ваа баад̣̇з табзд̇и, бийтам̣ гад̇ваа нисийд̣̇ад̇и, ман̃жам̣ гад̇ваа нибаж̇ж̇ад̇и, абассзнапалагам̣ гад̇ваа абассаяад̇и. яат̇аа зго, звам̣ абароби. анзгзсуби хи бхигкусад̇асахассзсу звам̣ гаронд̇зсу д̇зсан̃жа згамзгасса д̇ат̇зва иж̇жхад̇и. жанд̣̇имасуурияаанан̃жа г̇аманамби аалогагаран̣амби д̇ат̇зва ход̇и. яат̇аа хи баад̇исахассзсу уд̣̇агабуурзсу саб̣б̣абаад̇ийсу жанд̣̇аман̣д̣алаани д̣̇иссанд̇и, баагад̇игамзва жанд̣̇асса г̇аманам̣ аалогагаран̣ан̃жа ход̇и, д̇ат̇уубамамзд̇ам̣ баадихаарияам̣. яаава б̣рахмалогааби гааязна васам̣ вад̇д̇зд̇ийд̇и б̣рахмалогам̣ барижчзд̣̇ам̣ гад̇ваа зд̇т̇анд̇арз анзгавид̇хам̣ абхин̃н̃ам̣ гаронд̇о ад̇д̇ано гааязна васам̣ иссарияам̣ вад̇д̇зд̇и. вид̇т̇ааро банзд̇т̇а ид̣̇д̇хигат̇ааяам̣ аавибхависсад̇ийд̇и.
Imepi candimasūriye evaṃmahiddhike evaṃmahānubhāveti ettha candimasūriyānaṃ dvācattālīsayojanasahassoparicaraṇena mahiddhikatā, tīsu dīpesu ekakkhaṇe ālokakaraṇena mahānubhāvatā veditabbā, evaṃ uparicaraṇaālokapharaṇehi vā mahiddhike, teneva mahiddhikattena mahānubhāve . Parāmasatīti pariggaṇhāti, ekadese vā phusati. Parimajjatīti samantato ādāsatalaṃ viya parimajjati. Ayaṃ panassa iddhi abhiññāpādakajjhānavaseneva ijjhati, natthettha kasiṇasamāpattiniyamo. Svāyaṃ yadi icchati gantvā parāmasituṃ, gantvā parāmasati. Sace pana idheva nisinnako vā nipannako vā parāmasitukāmo hoti, ‘‘hatthapāse hotū’’ti adhiṭṭhāti. Adhiṭṭhānabalena vaṇṭā muttatālaphalaṃ viya āgantvā hatthapāse ṭhite vā parāmasati, hatthaṃ vā vaḍḍhetvā parāmasati. Hatthaṃ vaḍḍhentassa pana kiṃ upādinnakaṃ vaḍḍhati anupādinnakaṃ vāti? Upādinnakaṃ nissāya anupādinnakaṃ vaḍḍhati. Yo evaṃ katvā na kevalaṃ candimasūriye parāmasati, sace icchati, pādakathalikaṃ katvā pāde ṭhapeti, pīṭhaṃ katvā nisīdati, mañcaṃ katvā nipajjati, apassenaphalakaṃ katvā apassayati. Yathā eko, evaṃ aparopi. Anekesupi hi bhikkhusatasahassesu evaṃ karontesu tesañca ekamekassa tatheva ijjhati. Candimasūriyānañca gamanampi ālokakaraṇampi tatheva hoti. Yathā hi pātisahassesu udakapūresu sabbapātīsu candamaṇḍalāni dissanti, pākatikameva candassa gamanaṃ ālokakaraṇañca hoti, tathūpamametaṃ pāṭihāriyaṃ. Yāva brahmalokāpi kāyena vasaṃ vattetīti brahmalokaṃ paricchedaṃ katvā etthantare anekavidhaṃ abhiññaṃ karonto attano kāyena vasaṃ issariyaṃ vatteti. Vitthāro panettha iddhikathāyaṃ āvibhavissatīti.
ид̣̇д̇хивид̇хан̃аан̣анид̣̇д̣̇зсаван̣н̣анаа нидтид̇аа.
Iddhividhañāṇaniddesavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / бадисамбхид̣̇аамаг̇г̇абаал̣и • Paṭisambhidāmaggapāḷi / 50. ид̣̇д̇хивид̇хан̃аан̣анид̣̇д̣̇зсо • 50. Iddhividhañāṇaniddeso
