| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
3-6. இணஸுத்தாதி³வண்ணனா
3-6. Iṇasuttādivaṇṇanā
45-48. ததியே த³லித்³தோ³ நாம து³க்³க³தோ, தஸ்ஸ பா⁴வோ தா³லித்³தி³யங். ந ஏதஸ்ஸ ஸகங் ஸாபதெய்யந்தி அஸ்ஸகோ, அஸாபதெய்யோ. தேனாஹ ‘‘அத்தனோ ஸந்தகேன ரஹிதோ’’தி. ‘‘பு³த்³தோ⁴ த⁴ம்மோ ஸங்கோ⁴’’தி வுத்தே ‘‘ஸம்மாஸம்பு³த்³தோ⁴ ப⁴க³வா, ஸ்வாக்கா²தோ த⁴ம்மோ, ஸுப்படிபன்னோ ஸங்கோ⁴’’தி கேனசி அகம்பியபா⁴வேன ஓகப்பனங் ரதனத்தயகு³ணே ஓகா³ஹெத்வா கப்பனங் ஓகப்பனஸத்³தா⁴ நாம. ‘‘இத³ங் அகுஸலங் கம்மங் நோ ஸகங், இத³ங் பன கம்மங் ஸக’’ந்தி ஏவங் ப்³யதிரேகதோ அன்வயதோ ச கம்மஸ்ஸகதஜானநபஞ்ஞா கம்மஸ்ஸகதபஞ்ஞா. திவித⁴ஞ்ஹி து³ச்சரிதங் அத்தனா கதம்பி ஸககம்மங் நாம ந ஹோதி அத்த²ப⁴ஞ்ஜனதோ. ஸுசரிதங் ஸககம்மங் நாம அத்த²ஜனநதோ. இணாதா³னஸ்மிந்தி பச்சத்தவசனத்தே² ஏதங் பு⁴ம்மந்தி ஆஹ ‘‘இணக்³க³ஹணங் வதா³மீ’’தி.
45-48. Tatiye daliddo nāma duggato, tassa bhāvo dāliddiyaṃ. Na etassa sakaṃ sāpateyyanti assako, asāpateyyo. Tenāha ‘‘attano santakena rahito’’ti. ‘‘Buddho dhammo saṅgho’’ti vutte ‘‘sammāsambuddho bhagavā, svākkhāto dhammo, suppaṭipanno saṅgho’’ti kenaci akampiyabhāvena okappanaṃ ratanattayaguṇe ogāhetvā kappanaṃ okappanasaddhā nāma. ‘‘Idaṃ akusalaṃ kammaṃ no sakaṃ, idaṃ pana kammaṃ saka’’nti evaṃ byatirekato anvayato ca kammassakatajānanapaññā kammassakatapaññā. Tividhañhi duccaritaṃ attanā katampi sakakammaṃ nāma na hoti atthabhañjanato. Sucaritaṃ sakakammaṃ nāma atthajananato. Iṇādānasminti paccattavacanatthe etaṃ bhummanti āha ‘‘iṇaggahaṇaṃ vadāmī’’ti.
கடக்³கா³ஹோதி கதங் ஸப்³ப³ஸோ ஸித்³த⁴மேவ கத்வா க³ஹணங். ஸோ பன விஜயலாபோ⁴ ஹோதீதி ஆஹ ‘‘ஜயக்³கா³ஹோ’’தி. ஹிரிமனோ ஏதஸ்ஸாதி ஹிரிமனோதி ஆஹ ‘‘ஹிரிஸம்பயுத்தசித்தோ’’தி, பாபஜிகு³ச்ச²னலக்க²ணாய ஹிரியா ஸம்பயுத்தசித்தோதி அத்தோ². ஒத்தப்பதி உப்³பி³ஜ்ஜதி பா⁴யதி ஸீலேனாதி ஒத்தப்பீ, ஒத்தப்பேன ஸமன்னாக³தோ. நிராமிஸங் ஸுக²ந்தி ததியஜ்ஜா²னஸுக²ங் தூ³ரஸமுஸ்ஸாரிதகாமாமிஸத்தா. உபெக்க²ந்தி சதுத்த²ஜ்ஜா²னுபெக்க²ங், ந யங் கிஞ்சி உபெக்கா²வேத³னந்தி ஆஹ ‘‘சதுத்த²ஜ்ஜா²னுபெக்க²’’ந்தி. ஆரத்³த⁴வீரியோதி பக்³க³ஹிதபரிபுண்ணகாயிகசேதஸிகவீரியோதி அத்தோ². யோ க³ணஸங்க³ணிகங் வினோதெ³த்வா சதூஸு இரியாபதே²ஸு அட்ட²ஆரம்ப⁴வத்து²வஸேன ஏககோ ஹோதி, தஸ்ஸ காயிகங் வீரியங் ஆரத்³த⁴ங் நாம ஹோதி. சித்தஸங்க³ணிகங் வினோதெ³த்வா அட்ட²ஸமாபத்திவஸேன ஏககோ ஹோதி. க³மனே உப்பன்னகிலேஸஸ்ஸ டா²னங் பாபுணிதுங் ந தே³தி, டா²னே உப்பன்னகிலேஸஸ்ஸ நிஸஜ்ஜங், நிஸஜ்ஜாய உப்பன்னகிலேஸஸ்ஸ ஸயனங் பாபுணிதுங் ந தே³தி, உப்பன்னட்டா²னேயேவ கிலேஸே நிக்³க³ண்ஹாதி. அயங் சேதஸிகங் வீரியங் ஆரத்³த⁴ங் நாம ஹோதி. படிபக்க²தூ³ரீபா⁴வேன ஸெட்ட²ட்டே²ன ச ஏகோ உதே³தீதி ஏகோதி³, ஏகக்³க³தா. தஸ்ஸ யோக³தோ ஏகக்³க³சித்தோ இத⁴ ஏகோதி³. படிபக்க²தோ அத்தானங் நிபாதி, தங் வா நிபயதி விஸோஸேதீதி நிபகோ. அஞ்ஞதரங் காயாதி³பே⁴த³ங் ஆரம்மணங் ஸாதிஸயாய ஸதியா ஸரதீதி ஸதோ. தேனாஹ ‘‘ஏகக்³க³சித்தோ’’திஆதி³.
Kaṭaggāhoti kataṃ sabbaso siddhameva katvā gahaṇaṃ. So pana vijayalābho hotīti āha ‘‘jayaggāho’’ti. Hirimano etassāti hirimanoti āha ‘‘hirisampayuttacitto’’ti, pāpajigucchanalakkhaṇāya hiriyā sampayuttacittoti attho. Ottappati ubbijjati bhāyati sīlenāti ottappī, ottappena samannāgato. Nirāmisaṃ sukhanti tatiyajjhānasukhaṃ dūrasamussāritakāmāmisattā. Upekkhanti catutthajjhānupekkhaṃ, na yaṃ kiñci upekkhāvedananti āha ‘‘catutthajjhānupekkha’’nti. Āraddhavīriyoti paggahitaparipuṇṇakāyikacetasikavīriyoti attho. Yo gaṇasaṅgaṇikaṃ vinodetvā catūsu iriyāpathesu aṭṭhaārambhavatthuvasena ekako hoti, tassa kāyikaṃ vīriyaṃ āraddhaṃ nāma hoti. Cittasaṅgaṇikaṃ vinodetvā aṭṭhasamāpattivasena ekako hoti. Gamane uppannakilesassa ṭhānaṃ pāpuṇituṃ na deti, ṭhāne uppannakilesassa nisajjaṃ, nisajjāya uppannakilesassa sayanaṃ pāpuṇituṃ na deti, uppannaṭṭhāneyeva kilese niggaṇhāti. Ayaṃ cetasikaṃ vīriyaṃ āraddhaṃ nāma hoti. Paṭipakkhadūrībhāvena seṭṭhaṭṭhena ca eko udetīti ekodi, ekaggatā. Tassa yogato ekaggacitto idha ekodi. Paṭipakkhato attānaṃ nipāti, taṃ vā nipayati visosetīti nipako. Aññataraṃ kāyādibhedaṃ ārammaṇaṃ sātisayāya satiyā saratīti sato. Tenāha ‘‘ekaggacitto’’tiādi.
அகுப்பா மே விமுத்தீதி மய்ஹங் அரஹத்தப²லவிமுத்தி அகுப்பதாய அகுப்பாரம்மணதாய ச அகுப்பா. ஸா ஹி ராகா³தீ³ஹி ந குப்பதீதி அகுப்பதாயபி அகுப்பா . அகுப்பங் நிப்³பா³னமஸ்ஸா ஆரம்மணந்தி அகுப்பாரம்மணதாயபி அகுப்பா. தேனேவாஹ ‘‘அகுப்பாரம்மணத்தா’’திஆதி³. ப⁴வஸங்யோஜனானந்தி காமராக³படிக⁴மானதி³ட்டி²விசிகிச்சா²ஸீலப்³ப³தபராமாஸப⁴வராக³இஸ்ஸாமச்ச²ரிய- அவிஜ்ஜாஸங்கா²தானங் த³ஸன்னங் ஸங்யோஜனானங். இமானி ஹி ஸத்தே ப⁴வேஸு ஸங்யோஜெந்தி உபனிப³ந்த⁴ந்தி ப⁴வாப⁴வேன ஸங்யோஜெந்தி, தஸ்மா ப⁴வஸங்யோஜனானீதி வுச்சந்தி. கீ²ணாஸவோ உத்தமஅணணோ கிலேஸஇணானங் அபா⁴வதோ. அஞ்ஞே ஹி ஸத்தா யாவ ந கிலேஸா பஹீயந்தி, தாவ ஸஇணா நாம அஸேரிவிஹாரபா⁴வதோ. சதுத்தா²தீ³னி உத்தானத்தா²னி.
Akuppāme vimuttīti mayhaṃ arahattaphalavimutti akuppatāya akuppārammaṇatāya ca akuppā. Sā hi rāgādīhi na kuppatīti akuppatāyapi akuppā . Akuppaṃ nibbānamassā ārammaṇanti akuppārammaṇatāyapi akuppā. Tenevāha ‘‘akuppārammaṇattā’’tiādi. Bhavasaṃyojanānanti kāmarāgapaṭighamānadiṭṭhivicikicchāsīlabbataparāmāsabhavarāgaissāmacchariya- avijjāsaṅkhātānaṃ dasannaṃ saṃyojanānaṃ. Imāni hi satte bhavesu saṃyojenti upanibandhanti bhavābhavena saṃyojenti, tasmā bhavasaṃyojanānīti vuccanti. Khīṇāsavo uttamaaṇaṇo kilesaiṇānaṃ abhāvato. Aññe hi sattā yāva na kilesā pahīyanti, tāva saiṇā nāma aserivihārabhāvato. Catutthādīni uttānatthāni.
இணஸுத்தாதி³வண்ணனா நிட்டி²தா.
Iṇasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
3. இணஸுத்தங் • 3. Iṇasuttaṃ
4. மஹாசுந்த³ஸுத்தங் • 4. Mahācundasuttaṃ
5. பட²மஸந்தி³ட்டி²கஸுத்தங் • 5. Paṭhamasandiṭṭhikasuttaṃ
6. து³தியஸந்தி³ட்டி²கஸுத்தங் • 6. Dutiyasandiṭṭhikasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
3. இணஸுத்தவண்ணனா • 3. Iṇasuttavaṇṇanā
4. மஹாசுந்த³ஸுத்தவண்ணனா • 4. Mahācundasuttavaṇṇanā
5-6. ஸந்தி³ட்டி²கஸுத்தத்³வயவண்ணனா • 5-6. Sandiṭṭhikasuttadvayavaṇṇanā
