| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
3. இணஸுத்தவண்ணனா
3. Iṇasuttavaṇṇanā
45. ததியே தா³லித்³தி³யந்தி த³லித்³த³பா⁴வோ. காமபோ⁴கி³னோதி காமே பு⁴ஞ்ஜனகஸத்தஸ்ஸ. அஸ்ஸகோதி அத்தனோ ஸந்தகேன ரஹிதோ. அனாள்ஹிகோதி ந அட்³டோ⁴. இணங் ஆதி³யதீதி ஜீவிதுங் அஸக்கொந்தோ இணங் ஆதி³யதி. வட்³டி⁴ங் படிஸ்ஸுணாதீதி தா³துங் அஸக்கொந்தோ வட்³டி⁴ங் த³ஸ்ஸாமீதி படிஜானாதி. அனுசரந்திபி நந்தி பரிஸமஜ்ஜ²க³ணமஜ்ஜா²தீ³ஸு ஆதபட²பனபங்ஸுஓகிரணாதீ³ஹி விப்பகாரங் பாபெந்தோ பச்ச²தோ பச்ச²தோ அனுப³ந்த⁴ந்தி. ஸத்³தா⁴ நத்தீ²தி ஓகப்பனகஸத்³தா⁴மத்தகம்பி நத்தி². ஹிரீ நத்தீ²தி ஹிரீயனாகாரமத்தகம்பி நத்தி². ஒத்தப்பங் நத்தீ²தி பா⁴யனாகாரமத்தகம்பி நத்தி². வீரியங் நத்தீ²தி காயிகவீரியமத்தகம்பி நத்தி². பஞ்ஞா நத்தீ²தி கம்மஸ்ஸகதபஞ்ஞாமத்தகம்பி நத்தி². இணாதா³னஸ்மிங் வதா³மீதி இணக்³க³ஹணங் வதா³மி. மா மங் ஜஞ்ஞூதி மா மங் ஜானாது.
45. Tatiye dāliddiyanti daliddabhāvo. Kāmabhoginoti kāme bhuñjanakasattassa. Assakoti attano santakena rahito. Anāḷhikoti na aḍḍho. Iṇaṃ ādiyatīti jīvituṃ asakkonto iṇaṃ ādiyati. Vaḍḍhiṃ paṭissuṇātīti dātuṃ asakkonto vaḍḍhiṃ dassāmīti paṭijānāti. Anucarantipi nanti parisamajjhagaṇamajjhādīsu ātapaṭhapanapaṃsuokiraṇādīhi vippakāraṃ pāpento pacchato pacchato anubandhanti. Saddhā natthīti okappanakasaddhāmattakampi natthi. Hirī natthīti hirīyanākāramattakampi natthi. Ottappaṃnatthīti bhāyanākāramattakampi natthi. Vīriyaṃ natthīti kāyikavīriyamattakampi natthi. Paññā natthīti kammassakatapaññāmattakampi natthi. Iṇādānasmiṃ vadāmīti iṇaggahaṇaṃ vadāmi. Mā maṃ jaññūti mā maṃ jānātu.
தா³லித்³தி³யங் து³க்க²ந்தி த⁴னத³லித்³த³பா⁴வோ து³க்க²ங். காமலாபா⁴பி⁴ஜப்பினந்தி காமலாப⁴ங் பத்தெ²ந்தானங். பாபகம்மவினிப்³ப³யோதி பாபகம்மவட்³ட⁴கோ. ஸங்ஸப்பதீதி பரிப்ப²ந்த³தி. ஜானந்தி ஜானந்தோ. யஸ்ஸ விப்படிஸாரஜாதி யே அஸ்ஸ விப்படிஸாரதோ ஜாதா. யோனிமஞ்ஞதரந்தி ஏகங் திரச்சா²னயோனிங். த³த³ங் சித்தங் பஸாத³யந்தி சித்தங் பஸாதெ³ந்தோ த³த³மானோ.
Dāliddiyaṃ dukkhanti dhanadaliddabhāvo dukkhaṃ. Kāmalābhābhijappinanti kāmalābhaṃ patthentānaṃ. Pāpakammavinibbayoti pāpakammavaḍḍhako. Saṃsappatīti paripphandati. Jānanti jānanto. Yassa vippaṭisārajāti ye assa vippaṭisārato jātā. Yonimaññataranti ekaṃ tiracchānayoniṃ. Dadaṃ cittaṃ pasādayanti cittaṃ pasādento dadamāno.
கடக்³கா³ஹோதி ஜயக்³கா³ஹோ, அனபராத⁴க்³கா³ஹோ ஹோதி. க⁴ரமேஸினோதி க⁴ராவாஸங் பரியேஸந்தஸ்ஸ வஸமானஸ்ஸ வா. சாகோ³ புஞ்ஞங் பவட்³ட⁴தீதி சாகோ³தி ஸங்க²ங் க³தங் புஞ்ஞங் வட்³ட⁴தி. சாகா³ புஞ்ஞந்தி வா பாடோ². பதிட்டி²தாதி பதிட்டி²தஸத்³தா⁴ நாம ஸோதாபன்னஸ்ஸ ஸத்³தா⁴. ஹிரிமனோதி ஹிரிஸம்பயுத்தசித்தோ. நிராமிஸங் ஸுக²ந்தி தீணி ஜா²னானி நிஸ்ஸாய உப்பஜ்ஜனகஸுக²ங். உபெக்க²ந்தி சதுத்த²ஜ்ஜா²னுபெக்க²ங். ஆரத்³த⁴வீரியோதி பரிபுண்ணபக்³க³ஹிதவீரியோ. ஜா²னானி உபஸம்பஜ்ஜாதி சத்தாரி ஜா²னானி பத்வா. ஏகோதி³ நிபகோ ஸதோதி ஏகக்³க³சித்தோ கம்மஸ்ஸகதஞாணஸதீஹி ச ஸமன்னாக³தோ.
Kaṭaggāhoti jayaggāho, anaparādhaggāho hoti. Gharamesinoti gharāvāsaṃ pariyesantassa vasamānassa vā. Cāgo puññaṃ pavaḍḍhatīti cāgoti saṅkhaṃ gataṃ puññaṃ vaḍḍhati. Cāgā puññanti vā pāṭho. Patiṭṭhitāti patiṭṭhitasaddhā nāma sotāpannassa saddhā. Hirimanoti hirisampayuttacitto. Nirāmisaṃ sukhanti tīṇi jhānāni nissāya uppajjanakasukhaṃ. Upekkhanti catutthajjhānupekkhaṃ. Āraddhavīriyoti paripuṇṇapaggahitavīriyo. Jhānāniupasampajjāti cattāri jhānāni patvā. Ekodi nipako satoti ekaggacitto kammassakatañāṇasatīhi ca samannāgato.
ஏவங் ஞத்வா யதா²பூ⁴தந்தி ஏவங் எத்தகங் காரணங் யதா²ஸபா⁴வங் ஜானித்வா. ஸப்³ப³ஸங்யோஜனக்க²யேதி நிப்³பா³னே. ஸப்³ப³ஸோதி ஸப்³பா³காரேன. அனுபாதா³யாதி அக்³க³ஹெத்வா. ஸம்மா சித்தங் விமுச்சதீதி இத³ங் வுத்தங் ஹோதி – ஸப்³ப³ஸங்யோஜனக்க²யஸங்கா²தே நிப்³பா³னே ஸப்³ப³ஸோ அனுபாதி³யித்வா ஸம்மா ஹேதுனா நயேன மக்³க³சித்தங் விமுச்சதி. ‘‘ஏதங் ஞத்வா யதா²பூ⁴தங், ஸப்³ப³ஸங்யோஜனக்க²ய’’ந்திபி பாளியங் லிகி²தங், தஸ்ஸ ஏதங் ஸப்³ப³ஸங்யோஜனக்க²யஸங்கா²தங் நிப்³பா³னங் யதா²பூ⁴தங் ஞத்வாதி அத்தோ². புரிமபச்சி²மேஹி பன ஸத்³தி⁴ங் ந க⁴டீயதி.
Evaṃ ñatvā yathābhūtanti evaṃ ettakaṃ kāraṇaṃ yathāsabhāvaṃ jānitvā. Sabbasaṃyojanakkhayeti nibbāne. Sabbasoti sabbākārena. Anupādāyāti aggahetvā. Sammā cittaṃ vimuccatīti idaṃ vuttaṃ hoti – sabbasaṃyojanakkhayasaṅkhāte nibbāne sabbaso anupādiyitvā sammā hetunā nayena maggacittaṃ vimuccati. ‘‘Etaṃ ñatvā yathābhūtaṃ, sabbasaṃyojanakkhaya’’ntipi pāḷiyaṃ likhitaṃ, tassa etaṃ sabbasaṃyojanakkhayasaṅkhātaṃ nibbānaṃ yathābhūtaṃ ñatvāti attho. Purimapacchimehi pana saddhiṃ na ghaṭīyati.
தஸ்ஸ ஸம்மா விமுத்தஸ்ஸாதி தஸ்ஸ ஸம்மா விமுத்தஸ்ஸ கீ²ணாஸவஸ்ஸ. ஞாணங் ஹோதீதி பச்சவெக்க²ணஞாணங் ஹோதி. தாதி³னோதி தங்ஸண்டி²தஸ்ஸ. அகுப்பாதி அகுப்பாரம்மணத்தா குப்பகாரணானங் கிலேஸானஞ்ச அபா⁴வேன அகுப்பா. விமுத்தீதி மக்³க³விமுத்திபி ப²லவிமுத்திபி. ப⁴வஸங்யோஜனக்க²யேதி ப⁴வஸங்யோஜனக்க²யஸங்கா²தே நிப்³பா³னே ப⁴வஸங்யோஜனானஞ்ச க²யந்தே உப்பன்னா. ஏதங் கோ² பரமங் ஞாணந்தி ஏதங் மக்³க³ப²லஞாணங் பரமஞாணங் நாம. ஸுக²மனுத்தரந்தி ஏததே³வ மக்³க³ப²லஸுக²ங் அனுத்தரங் ஸுக²ங் நாம. ஆணண்யமுத்தமந்தி ஸப்³பே³ஸங் அணணானங் கீ²ணாஸவோ உத்தமஅணணோ , தஸ்மா அரஹத்தப²லங் ஆணண்யமுத்தமந்தி அரஹத்தப²லேன தே³ஸனாய கூடங் க³ண்ஹி. இமஸ்மிஞ்ச ஸுத்தே வட்டமேவ கதெ²த்வா கா³தா²ஸு வட்டவிவட்டங் கதி²தந்தி.
Tassa sammā vimuttassāti tassa sammā vimuttassa khīṇāsavassa. Ñāṇaṃ hotīti paccavekkhaṇañāṇaṃ hoti. Tādinoti taṃsaṇṭhitassa. Akuppāti akuppārammaṇattā kuppakāraṇānaṃ kilesānañca abhāvena akuppā. Vimuttīti maggavimuttipi phalavimuttipi. Bhavasaṃyojanakkhayeti bhavasaṃyojanakkhayasaṅkhāte nibbāne bhavasaṃyojanānañca khayante uppannā. Etaṃ kho paramaṃ ñāṇanti etaṃ maggaphalañāṇaṃ paramañāṇaṃ nāma. Sukhamanuttaranti etadeva maggaphalasukhaṃ anuttaraṃ sukhaṃ nāma. Āṇaṇyamuttamanti sabbesaṃ aṇaṇānaṃ khīṇāsavo uttamaaṇaṇo , tasmā arahattaphalaṃ āṇaṇyamuttamanti arahattaphalena desanāya kūṭaṃ gaṇhi. Imasmiñca sutte vaṭṭameva kathetvā gāthāsu vaṭṭavivaṭṭaṃ kathitanti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 3. இணஸுத்தங் • 3. Iṇasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 3-6. இணஸுத்தாதி³வண்ணனா • 3-6. Iṇasuttādivaṇṇanā
