| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
33. இணாயிகவத்து²கதா²
33. Iṇāyikavatthukathā
96. இணாயிகோ நாமாதி எத்த² இணந்தி உத்³தா⁴ரோ. ஸோ ஹி யஸ்மா ஏதி வுத்³தி⁴ங் க³ச்ச²தி, தஸ்மா இணந்தி வுச்சதி. தங் க³ண்ஹாதி, தா⁴ரேதீதி வா இணாயிகோ. யங் வாதி ஜனங் வா ஆட²பெத்வாதி ஸம்ப³ந்தோ⁴. ஆட²பெத்வாதி ச பேஸனத்தா²ய த⁴னஸாமிகஸ்ஸ ஸந்திகே ட²பெத்வாதி அத்தோ². ஆகாரோ ஹி பேஸனத்த²வாசகோ. ஸோபீதி பிஸத்³தோ³ புரிமஜனே அபெக்க²தி. ‘‘தா⁴ரேதீ’’தி இமினா ஆயிகபச்சயோ தா⁴ரணத்தே² ஹோதீதி த³ஸ்ஸேதி. அஞ்ஞேதி மாதாபிதூஹி அஞ்ஞே. ஹீதி ஸச்சங், யஸ்மா வா. தேதி அஞ்ஞே ஞாதகா, தங் ஆட²பேதுங் யஸ்மா ந இஸ்ஸரா, தஸ்மா ந இணாயிகோதி யோஜனா. இதரந்தி நஇணாயிகதோ அஞ்ஞங். அஸ்ஸாதி ஜனஸ்ஸ. நந்தி தங் ஜனங். தேஸூதி ஞாதிஸாலோஹிதாதீ³ஸு. ததா²ரூபஸ்ஸாதி அத்தனோ ஞாதிஸாலோஹிதஸ்ஸாதி அத்தோ². ஆரோசேதப்³பா³காரங் த³ஸ்ஸெந்தோ ஆஹ ‘‘ஸஹேதுகோ’’திஆதி³. தத்த² ஸஹேதுகோதி ப⁴ப்³போ³. ஸோதி உபட்டா²கோ . படிபஜ்ஜதீதி படித³தா³தி. ஏதந்தி கப்பியப⁴ண்ட³ங். அஜானித்வாதி இணாயிகபா⁴வமஜானித்வா. பஸ்ஸந்தேனாதி இணாயிகங் பஸ்ஸந்தேன. ‘‘அபஸ்ஸந்தஸ்ஸ கீ³வா ந ஹோதீ’’தி இமினா பஸ்ஸித்வா அத³ஸ்ஸெந்தஸ்ஸ கீ³வா ஹோதீதி த³ஸ்ஸேதி.
96.Iṇāyikonāmāti ettha iṇanti uddhāro. So hi yasmā eti vuddhiṃ gacchati, tasmā iṇanti vuccati. Taṃ gaṇhāti, dhāretīti vā iṇāyiko. Yaṃ vāti janaṃ vā āṭhapetvāti sambandho. Āṭhapetvāti ca pesanatthāya dhanasāmikassa santike ṭhapetvāti attho. Ākāro hi pesanatthavācako. Sopīti pisaddo purimajane apekkhati. ‘‘Dhāretī’’ti iminā āyikapaccayo dhāraṇatthe hotīti dasseti. Aññeti mātāpitūhi aññe. Hīti saccaṃ, yasmā vā. Teti aññe ñātakā, taṃ āṭhapetuṃ yasmā na issarā, tasmā na iṇāyikoti yojanā. Itaranti naiṇāyikato aññaṃ. Assāti janassa. Nanti taṃ janaṃ. Tesūti ñātisālohitādīsu. Tathārūpassāti attano ñātisālohitassāti attho. Ārocetabbākāraṃ dassento āha ‘‘sahetuko’’tiādi. Tattha sahetukoti bhabbo. Soti upaṭṭhāko . Paṭipajjatīti paṭidadāti. Etanti kappiyabhaṇḍaṃ. Ajānitvāti iṇāyikabhāvamajānitvā. Passantenāti iṇāyikaṃ passantena. ‘‘Apassantassa gīvā na hotī’’ti iminā passitvā adassentassa gīvā hotīti dasseti.
புச்சி²யமானோபீதி ‘‘கிங் த்வங் இணாயிகோஸீ’’தி புச்சி²யமானோபி. தந்தி இணாயிகங். தத்தா²தி அஞ்ஞஸ்மிங் தே³ஸே. தந்தி இணஸாமிகங். ஸோதி இணஸாமிகோ. அயந்தி இணாயிகோ. அயந்தி வசனா. தத்தா²தி இணாயிகஸ்ஸ பப்³பா³ஜனே. ஸாமீசீதி அனுத⁴ம்மதா.
Pucchiyamānopīti ‘‘kiṃ tvaṃ iṇāyikosī’’ti pucchiyamānopi. Tanti iṇāyikaṃ. Tatthāti aññasmiṃ dese. Tanti iṇasāmikaṃ. Soti iṇasāmiko. Ayanti iṇāyiko. Ayanti vacanā. Tatthāti iṇāyikassa pabbājane. Sāmīcīti anudhammatā.
நந்தி இணாயிகங். ஸோதி இணஸாமிகோ. அஸ்ஸாதி தே²ரஸ்ஸ. கீ³வா ந ஹோதீதி ஸம்ப³ந்தோ⁴. அச்ச²தூதி ஆஸது உபவேஸதூதி அத்தோ². ஸோதி இணாயிகோ. ஈதி³ஸோதி ஸஹேதுகோ வத்தஸம்பன்னோதி அத்தோ². அதிஆராத⁴கோதி வத்தாசாரேன தே²ரஸ்ஸ அதிதோஸகோ.
Nanti iṇāyikaṃ. Soti iṇasāmiko. Assāti therassa. Gīvā na hotīti sambandho. Acchatūti āsatu upavesatūti attho. Soti iṇāyiko. Īdisoti sahetuko vattasampannoti attho. Atiārādhakoti vattācārena therassa atitosako.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 33. இணாயிகவத்து² • 33. Iṇāyikavatthu
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / இணாயிகவத்து²கதா² • Iṇāyikavatthukathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ராஜப⁴டாதி³வத்து²கதா²வண்ணனா • Rājabhaṭādivatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / இணாயிகதா³ஸவத்து²கதா²வண்ணனா • Iṇāyikadāsavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / இணாயிகவத்து²கதா²வண்ணனா • Iṇāyikavatthukathāvaṇṇanā
