| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
ইণাযিকৰত্থুকথা
Iṇāyikavatthukathā
৯৬. ন ভিক্খৰে ইণাযিকোতি এত্থ ইণাযিকো নাম যস্স পিতিপিতামহেহি ৰা ইণং গহিতং হোতি, সযং ৰা ইণং গহিতং হোতি, যং ৰা আথপেত্ৰা মাতাপিতূহি কিঞ্চি গহিতং হোতি, সো তং ইণং পরেসং ধারেতীতি ইণাযিকো। যং পন অঞ্ঞে ঞাতকা আথপেত্ৰা কিঞ্চি গণ্হন্তি, সো ন ইণাযিকো। ন হি তে তং আথপেতুং ইস্সরা, তস্মা তং পব্বাজেতুং ৰট্টতি, ইতরং ন ৰট্টতি। সচে পনস্স ঞাতিসালোহিতা ‘‘মযং দস্সাম, পব্বাজেথ ন’’ন্তি ইণং অত্তনো ভারং করোন্তি, অঞ্ঞো ৰা কোচি তস্স আচারসম্পত্তিং দিস্ৰা ‘‘পব্বাজেথ নং, অহং ইণং দস্সামী’’তি ৰদতি, পব্বাজেতুং ৰট্টতি। তেসু অসতি ভিক্খুনা তথারূপস্স উপট্ঠাকস্সাপি আরোচেতব্বং ‘‘সহেতুকো সত্তো ইণপলিবোধেন ন পব্বজতী’’তি। সচে সো পটিপজ্জতি, পব্বাজেতব্বো। সচেপি অত্তনো কপ্পিযভণ্ডং অত্থি, ‘‘এতং দস্সামী’’তি পব্বাজেতব্বো। সচে পন নেৰ ঞাতকাদযো পটিপজ্জন্তি, ন অত্তনো ধনং অত্থি, ‘‘পব্বাজেত্ৰা ভিক্খায চরিত্ৰা মোচেস্সামী’’তি পব্বাজেতুং ন ৰট্টতি। সচে পব্বাজেতি দুক্কটং। পলাতোপি আনেত্ৰা দাতব্বো। নো চে দেতি, সব্বং ইণং গীৰা হোতি। অজানিত্ৰা পব্বাজযতো অনাপত্তি। পস্সন্তেন পন আনেত্ৰা ইণসামিকানং দস্সেতব্বো। অপস্সন্তস্স গীৰা ন হোতি।
96.Na bhikkhave iṇāyikoti ettha iṇāyiko nāma yassa pitipitāmahehi vā iṇaṃ gahitaṃ hoti, sayaṃ vā iṇaṃ gahitaṃ hoti, yaṃ vā āthapetvā mātāpitūhi kiñci gahitaṃ hoti, so taṃ iṇaṃ paresaṃ dhāretīti iṇāyiko. Yaṃ pana aññe ñātakā āthapetvā kiñci gaṇhanti, so na iṇāyiko. Na hi te taṃ āthapetuṃ issarā, tasmā taṃ pabbājetuṃ vaṭṭati, itaraṃ na vaṭṭati. Sace panassa ñātisālohitā ‘‘mayaṃ dassāma, pabbājetha na’’nti iṇaṃ attano bhāraṃ karonti, añño vā koci tassa ācārasampattiṃ disvā ‘‘pabbājetha naṃ, ahaṃ iṇaṃ dassāmī’’ti vadati, pabbājetuṃ vaṭṭati. Tesu asati bhikkhunā tathārūpassa upaṭṭhākassāpi ārocetabbaṃ ‘‘sahetuko satto iṇapalibodhena na pabbajatī’’ti. Sace so paṭipajjati, pabbājetabbo. Sacepi attano kappiyabhaṇḍaṃ atthi, ‘‘etaṃ dassāmī’’ti pabbājetabbo. Sace pana neva ñātakādayo paṭipajjanti, na attano dhanaṃ atthi, ‘‘pabbājetvā bhikkhāya caritvā mocessāmī’’ti pabbājetuṃ na vaṭṭati. Sace pabbājeti dukkaṭaṃ. Palātopi ānetvā dātabbo. No ce deti, sabbaṃ iṇaṃ gīvā hoti. Ajānitvā pabbājayato anāpatti. Passantena pana ānetvā iṇasāmikānaṃ dassetabbo. Apassantassa gīvā na hoti.
সচে ইণাযিকো অঞ্ঞং দেসং গন্ত্ৰা পুচ্ছিযমানোপি ‘‘নাহং কস্সচি কিঞ্চি ধারেমী’’তি ৰত্ৰা পব্বজতি, ইণসামিকো চ তং পরিযেসন্তো তত্থ গচ্ছতি, দহরো তং দিস্ৰা পলাযতি, সো চ থেরং উপসঙ্কমিত্ৰা ‘‘অযং ভন্তে কেন পব্বাজিতো, মম এত্তকং নাম ধনং গহেত্ৰা পলাতো’’তি ৰদতি, থেরেন ৰত্তব্বং ‘‘মযা উপাসক ‘অণণো অহ’ন্তি ৰদন্তো পব্বাজিতো, কিং দানি করোমি, পস্স মে পত্তচীৰরমত্ত’’ন্তি অযং তত্থ সামীচি। পলাতে পন গীৰা ন হোতি।
Sace iṇāyiko aññaṃ desaṃ gantvā pucchiyamānopi ‘‘nāhaṃ kassaci kiñci dhāremī’’ti vatvā pabbajati, iṇasāmiko ca taṃ pariyesanto tattha gacchati, daharo taṃ disvā palāyati, so ca theraṃ upasaṅkamitvā ‘‘ayaṃ bhante kena pabbājito, mama ettakaṃ nāma dhanaṃ gahetvā palāto’’ti vadati, therena vattabbaṃ ‘‘mayā upāsaka ‘aṇaṇo aha’nti vadanto pabbājito, kiṃ dāni karomi, passa me pattacīvaramatta’’nti ayaṃ tattha sāmīci. Palāte pana gīvā na hoti.
সচে পন নং থেরস্স সম্মুখাৰ দিস্ৰা ‘‘অযং মম ইণাযিকো’’তি ৰদতি, ‘‘তৰ ইণাযিকং ত্ৰমেৰ জানাহী’’তি ৰত্তব্বো। এৰম্পি গীৰা ন হোতি। সচেপি সো ‘‘পব্বজিতো অযং ইদানি কুহিং গমিস্সতী’’তি ৰদতি, থেরেন ‘‘ত্ৰংযেৰ জানাহী’’তি ৰত্তব্বো। এৰম্পিস্স পলাতে গীৰা ন হোতি। সচে পন থেরো ‘‘কুহিং দানি অযং গমিস্সতি, ইধেৰ অচ্ছতূ’’তি ৰদতি, সো চে পলাযতি, গীৰা হোতি। সচে সো সহেতুকসত্তো হোতি ৰত্তসম্পন্নো, থেরেন ‘‘ঈদিসো অয’’ন্তি ৰত্তব্বং। ইণসামিকো চে ‘‘সাধূ’’তি ৰিস্সজ্জেতি, ইচ্চেতং কুসলং। সচে পন ‘‘উপড্ঢুপড্ঢং দেথা’’তি ৰদতি, দাতব্বং। অপরেন সমযেন অতিআরাধকো হোতি, ‘‘সব্বং দেথা’’তি ৰুত্তেপি দাতব্বমেৰ। সচে পন উদ্দেসপরিপুচ্ছাদীসু কুসলো হোতি বহূপকারো ভিক্খূনং, ভিক্খাচারৰত্তেন পরিযেসিত্ৰাপি ইণং দাতব্বমেৰাতি।
Sace pana naṃ therassa sammukhāva disvā ‘‘ayaṃ mama iṇāyiko’’ti vadati, ‘‘tava iṇāyikaṃ tvameva jānāhī’’ti vattabbo. Evampi gīvā na hoti. Sacepi so ‘‘pabbajito ayaṃ idāni kuhiṃ gamissatī’’ti vadati, therena ‘‘tvaṃyeva jānāhī’’ti vattabbo. Evampissa palāte gīvā na hoti. Sace pana thero ‘‘kuhiṃ dāni ayaṃ gamissati, idheva acchatū’’ti vadati, so ce palāyati, gīvā hoti. Sace so sahetukasatto hoti vattasampanno, therena ‘‘īdiso aya’’nti vattabbaṃ. Iṇasāmiko ce ‘‘sādhū’’ti vissajjeti, iccetaṃ kusalaṃ. Sace pana ‘‘upaḍḍhupaḍḍhaṃ dethā’’ti vadati, dātabbaṃ. Aparena samayena atiārādhako hoti, ‘‘sabbaṃ dethā’’ti vuttepi dātabbameva. Sace pana uddesaparipucchādīsu kusalo hoti bahūpakāro bhikkhūnaṃ, bhikkhācāravattena pariyesitvāpi iṇaṃ dātabbamevāti.
ইণাযিকৰত্থুকথা নিট্ঠিতা।
Iṇāyikavatthukathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ৩৩. ইণাযিকৰত্থু • 33. Iṇāyikavatthu
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / রাজভটাদিৰত্থুকথাৰণ্ণনা • Rājabhaṭādivatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ইণাযিকদাসৰত্থুকথাৰণ্ণনা • Iṇāyikadāsavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ইণাযিকৰত্থুকথাৰণ্ণনা • Iṇāyikavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৩৩. ইণাযিকৰত্থুকথা • 33. Iṇāyikavatthukathā
