| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৩৩. ইণাযিকৰত্থুকথা
33. Iṇāyikavatthukathā
৯৬. ইণাযিকো নামাতি এত্থ ইণন্তি উদ্ধারো। সো হি যস্মা এতি ৰুদ্ধিং গচ্ছতি, তস্মা ইণন্তি ৰুচ্চতি। তং গণ্হাতি, ধারেতীতি ৰা ইণাযিকো। যং ৰাতি জনং ৰা আঠপেত্ৰাতি সম্বন্ধো। আঠপেত্ৰাতি চ পেসনত্থায ধনসামিকস্স সন্তিকে ঠপেত্ৰাতি অত্থো। আকারো হি পেসনত্থৰাচকো। সোপীতি পিসদ্দো পুরিমজনে অপেক্খতি। ‘‘ধারেতী’’তি ইমিনা আযিকপচ্চযো ধারণত্থে হোতীতি দস্সেতি। অঞ্ঞেতি মাতাপিতূহি অঞ্ঞে। হীতি সচ্চং, যস্মা ৰা। তেতি অঞ্ঞে ঞাতকা, তং আঠপেতুং যস্মা ন ইস্সরা, তস্মা ন ইণাযিকোতি যোজনা। ইতরন্তি নইণাযিকতো অঞ্ঞং। অস্সাতি জনস্স। নন্তি তং জনং। তেসূতি ঞাতিসালোহিতাদীসু। তথারূপস্সাতি অত্তনো ঞাতিসালোহিতস্সাতি অত্থো। আরোচেতব্বাকারং দস্সেন্তো আহ ‘‘সহেতুকো’’তিআদি। তত্থ সহেতুকোতি ভব্বো। সোতি উপট্ঠাকো । পটিপজ্জতীতি পটিদদাতি। এতন্তি কপ্পিযভণ্ডং। অজানিত্ৰাতি ইণাযিকভাৰমজানিত্ৰা। পস্সন্তেনাতি ইণাযিকং পস্সন্তেন। ‘‘অপস্সন্তস্স গীৰা ন হোতী’’তি ইমিনা পস্সিত্ৰা অদস্সেন্তস্স গীৰা হোতীতি দস্সেতি।
96.Iṇāyikonāmāti ettha iṇanti uddhāro. So hi yasmā eti vuddhiṃ gacchati, tasmā iṇanti vuccati. Taṃ gaṇhāti, dhāretīti vā iṇāyiko. Yaṃ vāti janaṃ vā āṭhapetvāti sambandho. Āṭhapetvāti ca pesanatthāya dhanasāmikassa santike ṭhapetvāti attho. Ākāro hi pesanatthavācako. Sopīti pisaddo purimajane apekkhati. ‘‘Dhāretī’’ti iminā āyikapaccayo dhāraṇatthe hotīti dasseti. Aññeti mātāpitūhi aññe. Hīti saccaṃ, yasmā vā. Teti aññe ñātakā, taṃ āṭhapetuṃ yasmā na issarā, tasmā na iṇāyikoti yojanā. Itaranti naiṇāyikato aññaṃ. Assāti janassa. Nanti taṃ janaṃ. Tesūti ñātisālohitādīsu. Tathārūpassāti attano ñātisālohitassāti attho. Ārocetabbākāraṃ dassento āha ‘‘sahetuko’’tiādi. Tattha sahetukoti bhabbo. Soti upaṭṭhāko . Paṭipajjatīti paṭidadāti. Etanti kappiyabhaṇḍaṃ. Ajānitvāti iṇāyikabhāvamajānitvā. Passantenāti iṇāyikaṃ passantena. ‘‘Apassantassa gīvā na hotī’’ti iminā passitvā adassentassa gīvā hotīti dasseti.
পুচ্ছিযমানোপীতি ‘‘কিং ত্ৰং ইণাযিকোসী’’তি পুচ্ছিযমানোপি। তন্তি ইণাযিকং। তত্থাতি অঞ্ঞস্মিং দেসে। তন্তি ইণসামিকং। সোতি ইণসামিকো। অযন্তি ইণাযিকো। অযন্তি ৰচনা। তত্থাতি ইণাযিকস্স পব্বাজনে। সামীচীতি অনুধম্মতা।
Pucchiyamānopīti ‘‘kiṃ tvaṃ iṇāyikosī’’ti pucchiyamānopi. Tanti iṇāyikaṃ. Tatthāti aññasmiṃ dese. Tanti iṇasāmikaṃ. Soti iṇasāmiko. Ayanti iṇāyiko. Ayanti vacanā. Tatthāti iṇāyikassa pabbājane. Sāmīcīti anudhammatā.
নন্তি ইণাযিকং। সোতি ইণসামিকো। অস্সাতি থেরস্স। গীৰা ন হোতীতি সম্বন্ধো। অচ্ছতূতি আসতু উপৰেসতূতি অত্থো। সোতি ইণাযিকো। ঈদিসোতি সহেতুকো ৰত্তসম্পন্নোতি অত্থো। অতিআরাধকোতি ৰত্তাচারেন থেরস্স অতিতোসকো।
Nanti iṇāyikaṃ. Soti iṇasāmiko. Assāti therassa. Gīvā na hotīti sambandho. Acchatūti āsatu upavesatūti attho. Soti iṇāyiko. Īdisoti sahetuko vattasampannoti attho. Atiārādhakoti vattācārena therassa atitosako.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ৩৩. ইণাযিকৰত্থু • 33. Iṇāyikavatthu
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / ইণাযিকৰত্থুকথা • Iṇāyikavatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / রাজভটাদিৰত্থুকথাৰণ্ণনা • Rājabhaṭādivatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ইণাযিকদাসৰত্থুকথাৰণ্ণনা • Iṇāyikadāsavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ইণাযিকৰত্থুকথাৰণ্ণনা • Iṇāyikavatthukathāvaṇṇanā
