| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
೩೩. ಇಣಾಯಿಕವತ್ಥುಕಥಾ
33. Iṇāyikavatthukathā
೯೬. ಇಣಾಯಿಕೋ ನಾಮಾತಿ ಏತ್ಥ ಇಣನ್ತಿ ಉದ್ಧಾರೋ। ಸೋ ಹಿ ಯಸ್ಮಾ ಏತಿ ವುದ್ಧಿಂ ಗಚ್ಛತಿ, ತಸ್ಮಾ ಇಣನ್ತಿ ವುಚ್ಚತಿ। ತಂ ಗಣ್ಹಾತಿ, ಧಾರೇತೀತಿ ವಾ ಇಣಾಯಿಕೋ। ಯಂ ವಾತಿ ಜನಂ ವಾ ಆಠಪೇತ್ವಾತಿ ಸಮ್ಬನ್ಧೋ। ಆಠಪೇತ್ವಾತಿ ಚ ಪೇಸನತ್ಥಾಯ ಧನಸಾಮಿಕಸ್ಸ ಸನ್ತಿಕೇ ಠಪೇತ್ವಾತಿ ಅತ್ಥೋ। ಆಕಾರೋ ಹಿ ಪೇಸನತ್ಥವಾಚಕೋ। ಸೋಪೀತಿ ಪಿಸದ್ದೋ ಪುರಿಮಜನೇ ಅಪೇಕ್ಖತಿ। ‘‘ಧಾರೇತೀ’’ತಿ ಇಮಿನಾ ಆಯಿಕಪಚ್ಚಯೋ ಧಾರಣತ್ಥೇ ಹೋತೀತಿ ದಸ್ಸೇತಿ। ಅಞ್ಞೇತಿ ಮಾತಾಪಿತೂಹಿ ಅಞ್ಞೇ। ಹೀತಿ ಸಚ್ಚಂ, ಯಸ್ಮಾ ವಾ। ತೇತಿ ಅಞ್ಞೇ ಞಾತಕಾ, ತಂ ಆಠಪೇತುಂ ಯಸ್ಮಾ ನ ಇಸ್ಸರಾ, ತಸ್ಮಾ ನ ಇಣಾಯಿಕೋತಿ ಯೋಜನಾ। ಇತರನ್ತಿ ನಇಣಾಯಿಕತೋ ಅಞ್ಞಂ। ಅಸ್ಸಾತಿ ಜನಸ್ಸ। ನನ್ತಿ ತಂ ಜನಂ। ತೇಸೂತಿ ಞಾತಿಸಾಲೋಹಿತಾದೀಸು। ತಥಾರೂಪಸ್ಸಾತಿ ಅತ್ತನೋ ಞಾತಿಸಾಲೋಹಿತಸ್ಸಾತಿ ಅತ್ಥೋ। ಆರೋಚೇತಬ್ಬಾಕಾರಂ ದಸ್ಸೇನ್ತೋ ಆಹ ‘‘ಸಹೇತುಕೋ’’ತಿಆದಿ। ತತ್ಥ ಸಹೇತುಕೋತಿ ಭಬ್ಬೋ। ಸೋತಿ ಉಪಟ್ಠಾಕೋ । ಪಟಿಪಜ್ಜತೀತಿ ಪಟಿದದಾತಿ। ಏತನ್ತಿ ಕಪ್ಪಿಯಭಣ್ಡಂ। ಅಜಾನಿತ್ವಾತಿ ಇಣಾಯಿಕಭಾವಮಜಾನಿತ್ವಾ। ಪಸ್ಸನ್ತೇನಾತಿ ಇಣಾಯಿಕಂ ಪಸ್ಸನ್ತೇನ। ‘‘ಅಪಸ್ಸನ್ತಸ್ಸ ಗೀವಾ ನ ಹೋತೀ’’ತಿ ಇಮಿನಾ ಪಸ್ಸಿತ್ವಾ ಅದಸ್ಸೇನ್ತಸ್ಸ ಗೀವಾ ಹೋತೀತಿ ದಸ್ಸೇತಿ।
96.Iṇāyikonāmāti ettha iṇanti uddhāro. So hi yasmā eti vuddhiṃ gacchati, tasmā iṇanti vuccati. Taṃ gaṇhāti, dhāretīti vā iṇāyiko. Yaṃ vāti janaṃ vā āṭhapetvāti sambandho. Āṭhapetvāti ca pesanatthāya dhanasāmikassa santike ṭhapetvāti attho. Ākāro hi pesanatthavācako. Sopīti pisaddo purimajane apekkhati. ‘‘Dhāretī’’ti iminā āyikapaccayo dhāraṇatthe hotīti dasseti. Aññeti mātāpitūhi aññe. Hīti saccaṃ, yasmā vā. Teti aññe ñātakā, taṃ āṭhapetuṃ yasmā na issarā, tasmā na iṇāyikoti yojanā. Itaranti naiṇāyikato aññaṃ. Assāti janassa. Nanti taṃ janaṃ. Tesūti ñātisālohitādīsu. Tathārūpassāti attano ñātisālohitassāti attho. Ārocetabbākāraṃ dassento āha ‘‘sahetuko’’tiādi. Tattha sahetukoti bhabbo. Soti upaṭṭhāko . Paṭipajjatīti paṭidadāti. Etanti kappiyabhaṇḍaṃ. Ajānitvāti iṇāyikabhāvamajānitvā. Passantenāti iṇāyikaṃ passantena. ‘‘Apassantassa gīvā na hotī’’ti iminā passitvā adassentassa gīvā hotīti dasseti.
ಪುಚ್ಛಿಯಮಾನೋಪೀತಿ ‘‘ಕಿಂ ತ್ವಂ ಇಣಾಯಿಕೋಸೀ’’ತಿ ಪುಚ್ಛಿಯಮಾನೋಪಿ। ತನ್ತಿ ಇಣಾಯಿಕಂ। ತತ್ಥಾತಿ ಅಞ್ಞಸ್ಮಿಂ ದೇಸೇ। ತನ್ತಿ ಇಣಸಾಮಿಕಂ। ಸೋತಿ ಇಣಸಾಮಿಕೋ। ಅಯನ್ತಿ ಇಣಾಯಿಕೋ। ಅಯನ್ತಿ ವಚನಾ। ತತ್ಥಾತಿ ಇಣಾಯಿಕಸ್ಸ ಪಬ್ಬಾಜನೇ। ಸಾಮೀಚೀತಿ ಅನುಧಮ್ಮತಾ।
Pucchiyamānopīti ‘‘kiṃ tvaṃ iṇāyikosī’’ti pucchiyamānopi. Tanti iṇāyikaṃ. Tatthāti aññasmiṃ dese. Tanti iṇasāmikaṃ. Soti iṇasāmiko. Ayanti iṇāyiko. Ayanti vacanā. Tatthāti iṇāyikassa pabbājane. Sāmīcīti anudhammatā.
ನನ್ತಿ ಇಣಾಯಿಕಂ। ಸೋತಿ ಇಣಸಾಮಿಕೋ। ಅಸ್ಸಾತಿ ಥೇರಸ್ಸ। ಗೀವಾ ನ ಹೋತೀತಿ ಸಮ್ಬನ್ಧೋ। ಅಚ್ಛತೂತಿ ಆಸತು ಉಪವೇಸತೂತಿ ಅತ್ಥೋ। ಸೋತಿ ಇಣಾಯಿಕೋ। ಈದಿಸೋತಿ ಸಹೇತುಕೋ ವತ್ತಸಮ್ಪನ್ನೋತಿ ಅತ್ಥೋ। ಅತಿಆರಾಧಕೋತಿ ವತ್ತಾಚಾರೇನ ಥೇರಸ್ಸ ಅತಿತೋಸಕೋ।
Nanti iṇāyikaṃ. Soti iṇasāmiko. Assāti therassa. Gīvā na hotīti sambandho. Acchatūti āsatu upavesatūti attho. Soti iṇāyiko. Īdisoti sahetuko vattasampannoti attho. Atiārādhakoti vattācārena therassa atitosako.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೩೩. ಇಣಾಯಿಕವತ್ಥು • 33. Iṇāyikavatthu
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಇಣಾಯಿಕವತ್ಥುಕಥಾ • Iṇāyikavatthukathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ರಾಜಭಟಾದಿವತ್ಥುಕಥಾವಣ್ಣನಾ • Rājabhaṭādivatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಇಣಾಯಿಕದಾಸವತ್ಥುಕಥಾವಣ್ಣನಾ • Iṇāyikadāsavatthukathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಇಣಾಯಿಕವತ್ಥುಕಥಾವಣ್ಣನಾ • Iṇāyikavatthukathāvaṇṇanā
