| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
১০. যক্খসংযুত্তং
10. Yakkhasaṃyuttaṃ
১. ইন্দকসুত্তৰণ্ণনা
1. Indakasuttavaṇṇanā
২৩৫. অত্তনো পরিণাযকত্তেন ইন্দো নাম মহেসক্খো, ইন্দোতি সমঞ্ঞা অস্সাতি কত্ৰা ‘‘ইন্দকো’’তিপি ৰুচ্চতি, তস্স ইন্দকস্স। ইন্দকূটে পব্বতে নিৰসতীতি ইন্দকূটনিৰাসী, তস্স ইন্দকূটনিৰাসিনো। বলিকম্মেহি যজিতব্বতো পূজিতব্বতো যক্খো, তস্স যক্খস্স। ইন্দস্স নিৰাসট্ঠানভূতং কূটং ইন্দকূটন্তি যক্খতো কূটেন নামং লদ্ধং। ইন্দকূটো ইন্দো উত্তরপদলোপেন যথা ‘‘কেলাসকূটো কেলাসো’’তি। ইন্দো যক্খোতি কূটতো যক্খেন নামং লদ্ধং। ন চেত্থ ইতরীতরনিস্সযদোসো অঞ্ঞমঞ্ঞূপলক্খণভাৰতো যথা তং ‘‘কাযকম্মট্ঠান’’ন্তি। রূপন্তি সকলং রূপক্খন্ধমাহ, ন রূপাযতনন্তি। ইমং সরীরং পেচ্চ অযং কিন্তি পটিলভতীতি চোদেতি।
235. Attano pariṇāyakattena indo nāma mahesakkho, indoti samaññā assāti katvā ‘‘indako’’tipi vuccati, tassa indakassa. Indakūṭe pabbate nivasatīti indakūṭanivāsī, tassa indakūṭanivāsino. Balikammehi yajitabbato pūjitabbato yakkho, tassa yakkhassa. Indassa nivāsaṭṭhānabhūtaṃ kūṭaṃ indakūṭanti yakkhato kūṭena nāmaṃ laddhaṃ. Indakūṭo indo uttarapadalopena yathā ‘‘kelāsakūṭo kelāso’’ti. Indo yakkhoti kūṭato yakkhena nāmaṃ laddhaṃ. Na cettha itarītaranissayadoso aññamaññūpalakkhaṇabhāvato yathā taṃ ‘‘kāyakammaṭṭhāna’’nti. Rūpanti sakalaṃ rūpakkhandhamāha, na rūpāyatananti. Imaṃ sarīraṃ pecca ayaṃ kinti paṭilabhatīti codeti.
কুতো আগচ্ছতীতি পরাধাররূপে জীৰে অত্তনি মাতুকুচ্ছিমোক্কন্তে রূপস্স সম্ভৰোতি কুতো নাম ঠানতো আগচ্ছতি। তেনাহ ‘‘ইমানি চ অট্ঠীনি ইমা চ মংসপেসিযো’’তিআদি। কথং ন্ৰযন্তি অযং কুচ্ছিসঙ্খাতে গব্ভরে কথং সজ্জতীতি পুচ্ছতি। ‘‘সীহানংৰ নদন্তানং, দাঠীনং গিরিগব্ভরে’’তিআদিনা (থেরগা॰ নিদানগাথা) গব্ভরো চ কুচ্ছিৰাচকো আগতো। তেনাহ ‘‘গব্ভরস্মিন্তি মাতুকুচ্ছিস্মি’’ন্তি। পুগ্গলৰাদীতি অত্তৰাদুপাদানো। যথা হি মচ্ছমংসং ভুত্তং ফেণং ৰিয হুত্ৰা ৰিলীযতি, ন চ পঞ্ঞাযতি সত্তভাৰেন অপ্পৰত্তনতো, এৰমেৰং যদি মাতুকুচ্ছিস্মিং গব্ভভাৰেন উপ্পন্নং রূপং সত্তো ন ভৰেয্য নো ৰড্ঢেয্য, ৰিলীযিত্ৰা গচ্ছেয্য, পঞ্ঞাযতি চ তং রূপং, তস্মা জীৰোতি ইমায লদ্ধিযা। এৰমাহাতি ‘‘রূপং…পে॰… গব্ভরস্মি’’ন্তি এৰমৰোচ। পঠমন্তি এতেসং পঞ্চন্নং পঠমং। তেনাহ ‘‘পঠমেন পটিসন্ধিৰিঞ্ঞাণেন সদ্ধি’’ন্তি। ‘‘জাতিউণ্ণংসূহীতি জাতিএল়কায উণ্ণংসূহী’’তি ৰদন্তি। ‘‘গব্ভং ফালেত্ৰা গহিতউণ্ণা জাতিউণ্ণা। তস্সা অংসূহি তীহি কতসুত্তগ্গে’’তি সংযুত্তভাণকানং অধিপ্পাযো।
Kuto āgacchatīti parādhārarūpe jīve attani mātukucchimokkante rūpassa sambhavoti kuto nāma ṭhānato āgacchati. Tenāha ‘‘imāni ca aṭṭhīni imā ca maṃsapesiyo’’tiādi. Kathaṃ nvayanti ayaṃ kucchisaṅkhāte gabbhare kathaṃ sajjatīti pucchati. ‘‘Sīhānaṃva nadantānaṃ, dāṭhīnaṃ girigabbhare’’tiādinā (theragā. nidānagāthā) gabbharo ca kucchivācako āgato. Tenāha ‘‘gabbharasminti mātukucchismi’’nti. Puggalavādīti attavādupādāno. Yathā hi macchamaṃsaṃ bhuttaṃ pheṇaṃ viya hutvā vilīyati, na ca paññāyati sattabhāvena appavattanato, evamevaṃ yadi mātukucchismiṃ gabbhabhāvena uppannaṃ rūpaṃ satto na bhaveyya no vaḍḍheyya, vilīyitvā gaccheyya, paññāyati ca taṃ rūpaṃ, tasmā jīvoti imāya laddhiyā. Evamāhāti ‘‘rūpaṃ…pe… gabbharasmi’’nti evamavoca. Paṭhamanti etesaṃ pañcannaṃ paṭhamaṃ. Tenāha ‘‘paṭhamena paṭisandhiviññāṇena saddhi’’nti. ‘‘Jātiuṇṇaṃsūhīti jātieḷakāya uṇṇaṃsūhī’’ti vadanti. ‘‘Gabbhaṃ phāletvā gahitauṇṇā jātiuṇṇā. Tassā aṃsūhi tīhi katasuttagge’’ti saṃyuttabhāṇakānaṃ adhippāyo.
অনাৰিলোতি অচ্ছো, সুপ্পসন্নোতি অত্থো। এৰংৰণ্ণপ্পটিভাগন্তি ৰুত্তপ্পমাণসণ্ঠানসম্পরিচ্ছিন্নং। কললং সম্পৰুচ্চতীতি অত্তভাৰো ভূতুপাদারূপসঙ্খাতো সন্তানৰসেন পৰত্তমানো কললং নামাতি কথীযতি।
Anāviloti accho, suppasannoti attho. Evaṃvaṇṇappaṭibhāganti vuttappamāṇasaṇṭhānasamparicchinnaṃ. Kalalaṃ sampavuccatīti attabhāvo bhūtupādārūpasaṅkhāto santānavasena pavattamāno kalalaṃ nāmāti kathīyati.
কললাতি যথাৰুত্তকললরূপহেতু তং নিস্সায পচ্চযং কত্ৰা। মংসধোৰনউদকৰণ্ণন্তি ৰণ্ণতো মংসধোৰনউদকৰণ্ণং, সণ্ঠানতো পন ৰিলীনতিপুসদিসং।
Kalalāti yathāvuttakalalarūpahetu taṃ nissāya paccayaṃ katvā. Maṃsadhovanaudakavaṇṇanti vaṇṇato maṃsadhovanaudakavaṇṇaṃ, saṇṭhānato pana vilīnatipusadisaṃ.
পরিপক্কন্তি পরিপাককললভাৰতো পরিপাকং গতং সুপরিপাকং গতং। সমূহতন্তি সমূহভূতং সঙ্গতং। ৰিৰট্টমানন্তি পরিণমন্তং। তব্ভাৰন্তি করণে এতং উপযোগৰচনং, তব্ভাৰেন পরিণমন্তন্তি অত্থো। নিস্সক্কে ৰা উপযোগৰচনং, তব্ভাৰতো কললভাৰতো কললং ৰিপরিণমন্তং। অব্বুদং নাম জাযতি, অব্বুদং নাম সম্পজ্জতীতি অত্থো।
Paripakkanti paripākakalalabhāvato paripākaṃ gataṃ suparipākaṃ gataṃ. Samūhatanti samūhabhūtaṃ saṅgataṃ. Vivaṭṭamānanti pariṇamantaṃ. Tabbhāvanti karaṇe etaṃ upayogavacanaṃ, tabbhāvena pariṇamantanti attho. Nissakke vā upayogavacanaṃ, tabbhāvato kalalabhāvato kalalaṃ vipariṇamantaṃ. Abbudaṃ nāma jāyati, abbudaṃ nāma sampajjatīti attho.
ৰিলীনতিপুসদিসা সণ্ঠানৰসেন, ৰণ্ণৰসেন পন সিতা অরত্তাৰ হোতীতি ৰদন্তি। মণ্ডন্তি দারিকানং তথা পীল়নতো নিব্বত্তমরিচপক্কস্স সারভূতং রসং। সব্বভাগেহি মুচ্চতীতি সো মণ্ডো কপালে অলগ্গো হুত্ৰা তস্স সব্বভাগেহি মুচ্ছিত্ৰা পিণ্ডিতো হুত্ৰা তিট্ঠতি। এৰরূপা পেসি হোতীতি সা পেসি গব্ভাসযে কত্থচি অলগ্গা যথাৰুত্তমণ্ডো ৰিয পিণ্ডিতো হুত্ৰা তিট্ঠতি। তেনাহ ‘‘ৰিলীনতিপুসদিসা’’তি।
Vilīnatipusadisā saṇṭhānavasena, vaṇṇavasena pana sitā arattāva hotīti vadanti. Maṇḍanti dārikānaṃ tathā pīḷanato nibbattamaricapakkassa sārabhūtaṃ rasaṃ. Sabbabhāgehi muccatīti so maṇḍo kapāle alaggo hutvā tassa sabbabhāgehi mucchitvā piṇḍito hutvā tiṭṭhati. Evarūpā pesi hotīti sā pesi gabbhāsaye katthaci alaggā yathāvuttamaṇḍo viya piṇḍito hutvā tiṭṭhati. Tenāha ‘‘vilīnatipusadisā’’ti.
পেসি নিব্বত্ততীতি এত্থ পেসীতি নিস্সক্কে পচ্চত্তৰচনন্তি আহ ‘‘ততো পেসিতো’’তি।
Pesi nibbattatīti ettha pesīti nissakke paccattavacananti āha ‘‘tato pesito’’ti.
ঘনস্স সণ্ঠানং। নিব্বত্তং কম্মপচ্চযাতি তংসণ্ঠানং রূপধম্মনিব্বত্তিযা জাযতি। ‘‘জরামরণং অনিচ্চং সঙ্খতং পটিচ্চসমুপ্পন্ন’’ন্তি (সং॰ নি॰ ২.২০) হি ৰুত্তং।
Ghanassa saṇṭhānaṃ. Nibbattaṃ kammapaccayāti taṃsaṇṭhānaṃ rūpadhammanibbattiyā jāyati. ‘‘Jarāmaraṇaṃ aniccaṃ saṅkhataṃ paṭiccasamuppanna’’nti (saṃ. ni. 2.20) hi vuttaṃ.
পীল়কাতি পীল়কসদিসা মংসপিণ্ডা জাযন্তি।
Pīḷakāti pīḷakasadisā maṃsapiṇḍā jāyanti.
সত্তমাদীনীতি আদি-সদ্দেন অট্ঠমসত্তাহতো পট্ঠায যাৰ একচত্তালীসা চতুত্তিংস সত্তাহানি সঙ্গণ্হাতি। পরিণতকালন্তি গব্ভস্স পরিণতকালং। নৰমাসতো বহি পরিপক্কো নাম হোতি কেসলোমাদিনিব্বত্তিতো। তেনাহ ‘‘দ্ৰাচত্তালীসে সত্তাহে এতানি জাযন্তী’’তি।
Sattamādīnīti ādi-saddena aṭṭhamasattāhato paṭṭhāya yāva ekacattālīsā catuttiṃsa sattāhāni saṅgaṇhāti. Pariṇatakālanti gabbhassa pariṇatakālaṃ. Navamāsato bahi paripakko nāma hoti kesalomādinibbattito. Tenāha ‘‘dvācattālīse sattāhe etāni jāyantī’’ti.
তস্সাতি গব্ভসেয্যকসত্তস্স। মাতুউদরপটলেন একাবদ্ধো হোতি যতো মাতরা পরিভুত্তআহারো আমাসযে পতিট্ঠিতে গব্ভস্স নাভিনাল়ানুসারেন গব্ভগতস্স সরীরং সম্পত্ৰা আহারকিচ্চং করোতি। আহারসমুট্ঠানরূপং সমুট্ঠাপেতীতি গব্ভগতস্স কাযে ওজায পচ্চযো হোতি। সা চ তং পচ্চযং লভিত্ৰা ওজট্ঠমকং রূপং সমুট্ঠাপেতি। এৰং মাতরা পরিভুত্তআহারপচ্চযেন গব্ভগতো দস মাসে যাপেতি অত্তনো নাভিনাল়ানুসারগতেনেৰ তেন যাৰ আহারসমুট্ঠানসত্তাহো, ততো পট্ঠায আহরণতো। কেচি পন ‘‘মাতরা পরিভুত্তআহারো বাহিরৰগ্গো ৰিয তস্স কাযং অভিসন্নেতি পরিসন্নেতি, তেন সো যাপেতী’’তি ৰদন্তি। কুচ্ছিগতং উদরপটলেন তিরোহিতত্তা বহি ঠিতন্তি ৰত্তব্বতং ন অরহতীতি ‘‘কুচ্ছিযা অব্ভন্তরগতো’’তি আহ। মাতুকুচ্ছিগতো নরোতি মাতু তিরোকুচ্ছিগতো। এৰং খোতি ইমিনা যথাৰুত্তাকারেন অযং সত্তো…পে॰… নিব্বত্ততি, তস্মা রূপং ন জীৰো। ন হি দিট্ঠিগতস্স সত্তাহক্কমেন ৰুড্ঢিপ্পত্তো ইচ্ছিতো অনিচ্চতাপত্তিতো।
Tassāti gabbhaseyyakasattassa. Mātuudarapaṭalena ekābaddho hoti yato mātarā paribhuttaāhāro āmāsaye patiṭṭhite gabbhassa nābhināḷānusārena gabbhagatassa sarīraṃ sampatvā āhārakiccaṃ karoti. Āhārasamuṭṭhānarūpaṃ samuṭṭhāpetīti gabbhagatassa kāye ojāya paccayo hoti. Sā ca taṃ paccayaṃ labhitvā ojaṭṭhamakaṃ rūpaṃ samuṭṭhāpeti. Evaṃ mātarā paribhuttaāhārapaccayena gabbhagato dasa māse yāpeti attano nābhināḷānusāragateneva tena yāva āhārasamuṭṭhānasattāho, tato paṭṭhāya āharaṇato. Keci pana ‘‘mātarā paribhuttaāhāro bāhiravaggo viya tassa kāyaṃ abhisanneti parisanneti, tena so yāpetī’’ti vadanti. Kucchigataṃ udarapaṭalena tirohitattā bahi ṭhitanti vattabbataṃ na arahatīti ‘‘kucchiyā abbhantaragato’’ti āha. Mātukucchigato naroti mātu tirokucchigato. Evaṃ khoti iminā yathāvuttākārena ayaṃ satto…pe… nibbattati, tasmā rūpaṃ na jīvo. Na hi diṭṭhigatassa sattāhakkamena vuḍḍhippatto icchito aniccatāpattito.
ইন্দকসুত্তৰণ্ণনা নিট্ঠিতা।
Indakasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. ইন্দকসুত্তং • 1. Indakasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. ইন্দকসুত্তৰণ্ণনা • 1. Indakasuttavaṇṇanā
