| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) |
੧੦. ਯਕ੍ਖਸਂਯੁਤ੍ਤਂ
10. Yakkhasaṃyuttaṃ
੧. ਇਨ੍ਦਕਸੁਤ੍ਤવਣ੍ਣਨਾ
1. Indakasuttavaṇṇanā
੨੩੫. ਅਤ੍ਤਨੋ ਪਰਿਣਾਯਕਤ੍ਤੇਨ ਇਨ੍ਦੋ ਨਾਮ ਮਹੇਸਕ੍ਖੋ, ਇਨ੍ਦੋਤਿ ਸਮਞ੍ਞਾ ਅਸ੍ਸਾਤਿ ਕਤ੍વਾ ‘‘ਇਨ੍ਦਕੋ’’ਤਿਪਿ વੁਚ੍ਚਤਿ, ਤਸ੍ਸ ਇਨ੍ਦਕਸ੍ਸ। ਇਨ੍ਦਕੂਟੇ ਪਬ੍ਬਤੇ ਨਿવਸਤੀਤਿ ਇਨ੍ਦਕੂਟਨਿવਾਸੀ, ਤਸ੍ਸ ਇਨ੍ਦਕੂਟਨਿવਾਸਿਨੋ। ਬਲਿਕਮ੍ਮੇਹਿ ਯਜਿਤਬ੍ਬਤੋ ਪੂਜਿਤਬ੍ਬਤੋ ਯਕ੍ਖੋ, ਤਸ੍ਸ ਯਕ੍ਖਸ੍ਸ। ਇਨ੍ਦਸ੍ਸ ਨਿવਾਸਟ੍ਠਾਨਭੂਤਂ ਕੂਟਂ ਇਨ੍ਦਕੂਟਨ੍ਤਿ ਯਕ੍ਖਤੋ ਕੂਟੇਨ ਨਾਮਂ ਲਦ੍ਧਂ। ਇਨ੍ਦਕੂਟੋ ਇਨ੍ਦੋ ਉਤ੍ਤਰਪਦਲੋਪੇਨ ਯਥਾ ‘‘ਕੇਲਾਸਕੂਟੋ ਕੇਲਾਸੋ’’ਤਿ। ਇਨ੍ਦੋ ਯਕ੍ਖੋਤਿ ਕੂਟਤੋ ਯਕ੍ਖੇਨ ਨਾਮਂ ਲਦ੍ਧਂ। ਨ ਚੇਤ੍ਥ ਇਤਰੀਤਰਨਿਸ੍ਸਯਦੋਸੋ ਅਞ੍ਞਮਞ੍ਞੂਪਲਕ੍ਖਣਭਾવਤੋ ਯਥਾ ਤਂ ‘‘ਕਾਯਕਮ੍ਮਟ੍ਠਾਨ’’ਨ੍ਤਿ। ਰੂਪਨ੍ਤਿ ਸਕਲਂ ਰੂਪਕ੍ਖਨ੍ਧਮਾਹ, ਨ ਰੂਪਾਯਤਨਨ੍ਤਿ। ਇਮਂ ਸਰੀਰਂ ਪੇਚ੍ਚ ਅਯਂ ਕਿਨ੍ਤਿ ਪਟਿਲਭਤੀਤਿ ਚੋਦੇਤਿ।
235. Attano pariṇāyakattena indo nāma mahesakkho, indoti samaññā assāti katvā ‘‘indako’’tipi vuccati, tassa indakassa. Indakūṭe pabbate nivasatīti indakūṭanivāsī, tassa indakūṭanivāsino. Balikammehi yajitabbato pūjitabbato yakkho, tassa yakkhassa. Indassa nivāsaṭṭhānabhūtaṃ kūṭaṃ indakūṭanti yakkhato kūṭena nāmaṃ laddhaṃ. Indakūṭo indo uttarapadalopena yathā ‘‘kelāsakūṭo kelāso’’ti. Indo yakkhoti kūṭato yakkhena nāmaṃ laddhaṃ. Na cettha itarītaranissayadoso aññamaññūpalakkhaṇabhāvato yathā taṃ ‘‘kāyakammaṭṭhāna’’nti. Rūpanti sakalaṃ rūpakkhandhamāha, na rūpāyatananti. Imaṃ sarīraṃ pecca ayaṃ kinti paṭilabhatīti codeti.
ਕੁਤੋ ਆਗਚ੍ਛਤੀਤਿ ਪਰਾਧਾਰਰੂਪੇ ਜੀવੇ ਅਤ੍ਤਨਿ ਮਾਤੁਕੁਚ੍ਛਿਮੋਕ੍ਕਨ੍ਤੇ ਰੂਪਸ੍ਸ ਸਮ੍ਭવੋਤਿ ਕੁਤੋ ਨਾਮ ਠਾਨਤੋ ਆਗਚ੍ਛਤਿ। ਤੇਨਾਹ ‘‘ਇਮਾਨਿ ਚ ਅਟ੍ਠੀਨਿ ਇਮਾ ਚ ਮਂਸਪੇਸਿਯੋ’’ਤਿਆਦਿ। ਕਥਂ ਨ੍વਯਨ੍ਤਿ ਅਯਂ ਕੁਚ੍ਛਿਸਙ੍ਖਾਤੇ ਗਬ੍ਭਰੇ ਕਥਂ ਸਜ੍ਜਤੀਤਿ ਪੁਚ੍ਛਤਿ। ‘‘ਸੀਹਾਨਂવ ਨਦਨ੍ਤਾਨਂ, ਦਾਠੀਨਂ ਗਿਰਿਗਬ੍ਭਰੇ’’ਤਿਆਦਿਨਾ (ਥੇਰਗਾ॰ ਨਿਦਾਨਗਾਥਾ) ਗਬ੍ਭਰੋ ਚ ਕੁਚ੍ਛਿવਾਚਕੋ ਆਗਤੋ। ਤੇਨਾਹ ‘‘ਗਬ੍ਭਰਸ੍ਮਿਨ੍ਤਿ ਮਾਤੁਕੁਚ੍ਛਿਸ੍ਮਿ’’ਨ੍ਤਿ। ਪੁਗ੍ਗਲવਾਦੀਤਿ ਅਤ੍ਤવਾਦੁਪਾਦਾਨੋ। ਯਥਾ ਹਿ ਮਚ੍ਛਮਂਸਂ ਭੁਤ੍ਤਂ ਫੇਣਂ વਿਯ ਹੁਤ੍વਾ વਿਲੀਯਤਿ, ਨ ਚ ਪਞ੍ਞਾਯਤਿ ਸਤ੍ਤਭਾવੇਨ ਅਪ੍ਪવਤ੍ਤਨਤੋ, ਏવਮੇવਂ ਯਦਿ ਮਾਤੁਕੁਚ੍ਛਿਸ੍ਮਿਂ ਗਬ੍ਭਭਾવੇਨ ਉਪ੍ਪਨ੍ਨਂ ਰੂਪਂ ਸਤ੍ਤੋ ਨ ਭવੇਯ੍ਯ ਨੋ વਡ੍ਢੇਯ੍ਯ, વਿਲੀਯਿਤ੍વਾ ਗਚ੍ਛੇਯ੍ਯ, ਪਞ੍ਞਾਯਤਿ ਚ ਤਂ ਰੂਪਂ, ਤਸ੍ਮਾ ਜੀવੋਤਿ ਇਮਾਯ ਲਦ੍ਧਿਯਾ। ਏવਮਾਹਾਤਿ ‘‘ਰੂਪਂ…ਪੇ॰… ਗਬ੍ਭਰਸ੍ਮਿ’’ਨ੍ਤਿ ਏવਮવੋਚ। ਪਠਮਨ੍ਤਿ ਏਤੇਸਂ ਪਞ੍ਚਨ੍ਨਂ ਪਠਮਂ। ਤੇਨਾਹ ‘‘ਪਠਮੇਨ ਪਟਿਸਨ੍ਧਿવਿਞ੍ਞਾਣੇਨ ਸਦ੍ਧਿ’’ਨ੍ਤਿ। ‘‘ਜਾਤਿਉਣ੍ਣਂਸੂਹੀਤਿ ਜਾਤਿਏਲ਼ਕਾਯ ਉਣ੍ਣਂਸੂਹੀ’’ਤਿ વਦਨ੍ਤਿ। ‘‘ਗਬ੍ਭਂ ਫਾਲੇਤ੍વਾ ਗਹਿਤਉਣ੍ਣਾ ਜਾਤਿਉਣ੍ਣਾ। ਤਸ੍ਸਾ ਅਂਸੂਹਿ ਤੀਹਿ ਕਤਸੁਤ੍ਤਗ੍ਗੇ’’ਤਿ ਸਂਯੁਤ੍ਤਭਾਣਕਾਨਂ ਅਧਿਪ੍ਪਾਯੋ।
Kuto āgacchatīti parādhārarūpe jīve attani mātukucchimokkante rūpassa sambhavoti kuto nāma ṭhānato āgacchati. Tenāha ‘‘imāni ca aṭṭhīni imā ca maṃsapesiyo’’tiādi. Kathaṃ nvayanti ayaṃ kucchisaṅkhāte gabbhare kathaṃ sajjatīti pucchati. ‘‘Sīhānaṃva nadantānaṃ, dāṭhīnaṃ girigabbhare’’tiādinā (theragā. nidānagāthā) gabbharo ca kucchivācako āgato. Tenāha ‘‘gabbharasminti mātukucchismi’’nti. Puggalavādīti attavādupādāno. Yathā hi macchamaṃsaṃ bhuttaṃ pheṇaṃ viya hutvā vilīyati, na ca paññāyati sattabhāvena appavattanato, evamevaṃ yadi mātukucchismiṃ gabbhabhāvena uppannaṃ rūpaṃ satto na bhaveyya no vaḍḍheyya, vilīyitvā gaccheyya, paññāyati ca taṃ rūpaṃ, tasmā jīvoti imāya laddhiyā. Evamāhāti ‘‘rūpaṃ…pe… gabbharasmi’’nti evamavoca. Paṭhamanti etesaṃ pañcannaṃ paṭhamaṃ. Tenāha ‘‘paṭhamena paṭisandhiviññāṇena saddhi’’nti. ‘‘Jātiuṇṇaṃsūhīti jātieḷakāya uṇṇaṃsūhī’’ti vadanti. ‘‘Gabbhaṃ phāletvā gahitauṇṇā jātiuṇṇā. Tassā aṃsūhi tīhi katasuttagge’’ti saṃyuttabhāṇakānaṃ adhippāyo.
ਅਨਾવਿਲੋਤਿ ਅਚ੍ਛੋ, ਸੁਪ੍ਪਸਨ੍ਨੋਤਿ ਅਤ੍ਥੋ। ਏવਂવਣ੍ਣਪ੍ਪਟਿਭਾਗਨ੍ਤਿ વੁਤ੍ਤਪ੍ਪਮਾਣਸਣ੍ਠਾਨਸਮ੍ਪਰਿਚ੍ਛਿਨ੍ਨਂ। ਕਲਲਂ ਸਮ੍ਪવੁਚ੍ਚਤੀਤਿ ਅਤ੍ਤਭਾવੋ ਭੂਤੁਪਾਦਾਰੂਪਸਙ੍ਖਾਤੋ ਸਨ੍ਤਾਨવਸੇਨ ਪવਤ੍ਤਮਾਨੋ ਕਲਲਂ ਨਾਮਾਤਿ ਕਥੀਯਤਿ।
Anāviloti accho, suppasannoti attho. Evaṃvaṇṇappaṭibhāganti vuttappamāṇasaṇṭhānasamparicchinnaṃ. Kalalaṃ sampavuccatīti attabhāvo bhūtupādārūpasaṅkhāto santānavasena pavattamāno kalalaṃ nāmāti kathīyati.
ਕਲਲਾਤਿ ਯਥਾવੁਤ੍ਤਕਲਲਰੂਪਹੇਤੁ ਤਂ ਨਿਸ੍ਸਾਯ ਪਚ੍ਚਯਂ ਕਤ੍વਾ। ਮਂਸਧੋવਨਉਦਕવਣ੍ਣਨ੍ਤਿ વਣ੍ਣਤੋ ਮਂਸਧੋવਨਉਦਕવਣ੍ਣਂ, ਸਣ੍ਠਾਨਤੋ ਪਨ વਿਲੀਨਤਿਪੁਸਦਿਸਂ।
Kalalāti yathāvuttakalalarūpahetu taṃ nissāya paccayaṃ katvā. Maṃsadhovanaudakavaṇṇanti vaṇṇato maṃsadhovanaudakavaṇṇaṃ, saṇṭhānato pana vilīnatipusadisaṃ.
ਪਰਿਪਕ੍ਕਨ੍ਤਿ ਪਰਿਪਾਕਕਲਲਭਾવਤੋ ਪਰਿਪਾਕਂ ਗਤਂ ਸੁਪਰਿਪਾਕਂ ਗਤਂ। ਸਮੂਹਤਨ੍ਤਿ ਸਮੂਹਭੂਤਂ ਸਙ੍ਗਤਂ। વਿવਟ੍ਟਮਾਨਨ੍ਤਿ ਪਰਿਣਮਨ੍ਤਂ। ਤਬ੍ਭਾવਨ੍ਤਿ ਕਰਣੇ ਏਤਂ ਉਪਯੋਗવਚਨਂ, ਤਬ੍ਭਾવੇਨ ਪਰਿਣਮਨ੍ਤਨ੍ਤਿ ਅਤ੍ਥੋ। ਨਿਸ੍ਸਕ੍ਕੇ વਾ ਉਪਯੋਗવਚਨਂ, ਤਬ੍ਭਾવਤੋ ਕਲਲਭਾવਤੋ ਕਲਲਂ વਿਪਰਿਣਮਨ੍ਤਂ। ਅਬ੍ਬੁਦਂ ਨਾਮ ਜਾਯਤਿ, ਅਬ੍ਬੁਦਂ ਨਾਮ ਸਮ੍ਪਜ੍ਜਤੀਤਿ ਅਤ੍ਥੋ।
Paripakkanti paripākakalalabhāvato paripākaṃ gataṃ suparipākaṃ gataṃ. Samūhatanti samūhabhūtaṃ saṅgataṃ. Vivaṭṭamānanti pariṇamantaṃ. Tabbhāvanti karaṇe etaṃ upayogavacanaṃ, tabbhāvena pariṇamantanti attho. Nissakke vā upayogavacanaṃ, tabbhāvato kalalabhāvato kalalaṃ vipariṇamantaṃ. Abbudaṃ nāma jāyati, abbudaṃ nāma sampajjatīti attho.
વਿਲੀਨਤਿਪੁਸਦਿਸਾ ਸਣ੍ਠਾਨવਸੇਨ, વਣ੍ਣવਸੇਨ ਪਨ ਸਿਤਾ ਅਰਤ੍ਤਾવ ਹੋਤੀਤਿ વਦਨ੍ਤਿ। ਮਣ੍ਡਨ੍ਤਿ ਦਾਰਿਕਾਨਂ ਤਥਾ ਪੀਲ਼ਨਤੋ ਨਿਬ੍ਬਤ੍ਤਮਰਿਚਪਕ੍ਕਸ੍ਸ ਸਾਰਭੂਤਂ ਰਸਂ। ਸਬ੍ਬਭਾਗੇਹਿ ਮੁਚ੍ਚਤੀਤਿ ਸੋ ਮਣ੍ਡੋ ਕਪਾਲੇ ਅਲਗ੍ਗੋ ਹੁਤ੍વਾ ਤਸ੍ਸ ਸਬ੍ਬਭਾਗੇਹਿ ਮੁਚ੍ਛਿਤ੍વਾ ਪਿਣ੍ਡਿਤੋ ਹੁਤ੍વਾ ਤਿਟ੍ਠਤਿ। ਏવਰੂਪਾ ਪੇਸਿ ਹੋਤੀਤਿ ਸਾ ਪੇਸਿ ਗਬ੍ਭਾਸਯੇ ਕਤ੍ਥਚਿ ਅਲਗ੍ਗਾ ਯਥਾવੁਤ੍ਤਮਣ੍ਡੋ વਿਯ ਪਿਣ੍ਡਿਤੋ ਹੁਤ੍વਾ ਤਿਟ੍ਠਤਿ। ਤੇਨਾਹ ‘‘વਿਲੀਨਤਿਪੁਸਦਿਸਾ’’ਤਿ।
Vilīnatipusadisā saṇṭhānavasena, vaṇṇavasena pana sitā arattāva hotīti vadanti. Maṇḍanti dārikānaṃ tathā pīḷanato nibbattamaricapakkassa sārabhūtaṃ rasaṃ. Sabbabhāgehi muccatīti so maṇḍo kapāle alaggo hutvā tassa sabbabhāgehi mucchitvā piṇḍito hutvā tiṭṭhati. Evarūpā pesi hotīti sā pesi gabbhāsaye katthaci alaggā yathāvuttamaṇḍo viya piṇḍito hutvā tiṭṭhati. Tenāha ‘‘vilīnatipusadisā’’ti.
ਪੇਸਿ ਨਿਬ੍ਬਤ੍ਤਤੀਤਿ ਏਤ੍ਥ ਪੇਸੀਤਿ ਨਿਸ੍ਸਕ੍ਕੇ ਪਚ੍ਚਤ੍ਤવਚਨਨ੍ਤਿ ਆਹ ‘‘ਤਤੋ ਪੇਸਿਤੋ’’ਤਿ।
Pesi nibbattatīti ettha pesīti nissakke paccattavacananti āha ‘‘tato pesito’’ti.
ਘਨਸ੍ਸ ਸਣ੍ਠਾਨਂ। ਨਿਬ੍ਬਤ੍ਤਂ ਕਮ੍ਮਪਚ੍ਚਯਾਤਿ ਤਂਸਣ੍ਠਾਨਂ ਰੂਪਧਮ੍ਮਨਿਬ੍ਬਤ੍ਤਿਯਾ ਜਾਯਤਿ। ‘‘ਜਰਾਮਰਣਂ ਅਨਿਚ੍ਚਂ ਸਙ੍ਖਤਂ ਪਟਿਚ੍ਚਸਮੁਪ੍ਪਨ੍ਨ’’ਨ੍ਤਿ (ਸਂ॰ ਨਿ॰ ੨.੨੦) ਹਿ વੁਤ੍ਤਂ।
Ghanassa saṇṭhānaṃ. Nibbattaṃ kammapaccayāti taṃsaṇṭhānaṃ rūpadhammanibbattiyā jāyati. ‘‘Jarāmaraṇaṃ aniccaṃ saṅkhataṃ paṭiccasamuppanna’’nti (saṃ. ni. 2.20) hi vuttaṃ.
ਪੀਲ਼ਕਾਤਿ ਪੀਲ਼ਕਸਦਿਸਾ ਮਂਸਪਿਣ੍ਡਾ ਜਾਯਨ੍ਤਿ।
Pīḷakāti pīḷakasadisā maṃsapiṇḍā jāyanti.
ਸਤ੍ਤਮਾਦੀਨੀਤਿ ਆਦਿ-ਸਦ੍ਦੇਨ ਅਟ੍ਠਮਸਤ੍ਤਾਹਤੋ ਪਟ੍ਠਾਯ ਯਾવ ਏਕਚਤ੍ਤਾਲੀਸਾ ਚਤੁਤ੍ਤਿਂਸ ਸਤ੍ਤਾਹਾਨਿ ਸਙ੍ਗਣ੍ਹਾਤਿ। ਪਰਿਣਤਕਾਲਨ੍ਤਿ ਗਬ੍ਭਸ੍ਸ ਪਰਿਣਤਕਾਲਂ। ਨવਮਾਸਤੋ ਬਹਿ ਪਰਿਪਕ੍ਕੋ ਨਾਮ ਹੋਤਿ ਕੇਸਲੋਮਾਦਿਨਿਬ੍ਬਤ੍ਤਿਤੋ। ਤੇਨਾਹ ‘‘ਦ੍વਾਚਤ੍ਤਾਲੀਸੇ ਸਤ੍ਤਾਹੇ ਏਤਾਨਿ ਜਾਯਨ੍ਤੀ’’ਤਿ।
Sattamādīnīti ādi-saddena aṭṭhamasattāhato paṭṭhāya yāva ekacattālīsā catuttiṃsa sattāhāni saṅgaṇhāti. Pariṇatakālanti gabbhassa pariṇatakālaṃ. Navamāsato bahi paripakko nāma hoti kesalomādinibbattito. Tenāha ‘‘dvācattālīse sattāhe etāni jāyantī’’ti.
ਤਸ੍ਸਾਤਿ ਗਬ੍ਭਸੇਯ੍ਯਕਸਤ੍ਤਸ੍ਸ। ਮਾਤੁਉਦਰਪਟਲੇਨ ਏਕਾਬਦ੍ਧੋ ਹੋਤਿ ਯਤੋ ਮਾਤਰਾ ਪਰਿਭੁਤ੍ਤਆਹਾਰੋ ਆਮਾਸਯੇ ਪਤਿਟ੍ਠਿਤੇ ਗਬ੍ਭਸ੍ਸ ਨਾਭਿਨਾਲ਼ਾਨੁਸਾਰੇਨ ਗਬ੍ਭਗਤਸ੍ਸ ਸਰੀਰਂ ਸਮ੍ਪਤ੍વਾ ਆਹਾਰਕਿਚ੍ਚਂ ਕਰੋਤਿ। ਆਹਾਰਸਮੁਟ੍ਠਾਨਰੂਪਂ ਸਮੁਟ੍ਠਾਪੇਤੀਤਿ ਗਬ੍ਭਗਤਸ੍ਸ ਕਾਯੇ ਓਜਾਯ ਪਚ੍ਚਯੋ ਹੋਤਿ। ਸਾ ਚ ਤਂ ਪਚ੍ਚਯਂ ਲਭਿਤ੍વਾ ਓਜਟ੍ਠਮਕਂ ਰੂਪਂ ਸਮੁਟ੍ਠਾਪੇਤਿ। ਏવਂ ਮਾਤਰਾ ਪਰਿਭੁਤ੍ਤਆਹਾਰਪਚ੍ਚਯੇਨ ਗਬ੍ਭਗਤੋ ਦਸ ਮਾਸੇ ਯਾਪੇਤਿ ਅਤ੍ਤਨੋ ਨਾਭਿਨਾਲ਼ਾਨੁਸਾਰਗਤੇਨੇવ ਤੇਨ ਯਾવ ਆਹਾਰਸਮੁਟ੍ਠਾਨਸਤ੍ਤਾਹੋ, ਤਤੋ ਪਟ੍ਠਾਯ ਆਹਰਣਤੋ। ਕੇਚਿ ਪਨ ‘‘ਮਾਤਰਾ ਪਰਿਭੁਤ੍ਤਆਹਾਰੋ ਬਾਹਿਰવਗ੍ਗੋ વਿਯ ਤਸ੍ਸ ਕਾਯਂ ਅਭਿਸਨ੍ਨੇਤਿ ਪਰਿਸਨ੍ਨੇਤਿ, ਤੇਨ ਸੋ ਯਾਪੇਤੀ’’ਤਿ વਦਨ੍ਤਿ। ਕੁਚ੍ਛਿਗਤਂ ਉਦਰਪਟਲੇਨ ਤਿਰੋਹਿਤਤ੍ਤਾ ਬਹਿ ਠਿਤਨ੍ਤਿ વਤ੍ਤਬ੍ਬਤਂ ਨ ਅਰਹਤੀਤਿ ‘‘ਕੁਚ੍ਛਿਯਾ ਅਬ੍ਭਨ੍ਤਰਗਤੋ’’ਤਿ ਆਹ। ਮਾਤੁਕੁਚ੍ਛਿਗਤੋ ਨਰੋਤਿ ਮਾਤੁ ਤਿਰੋਕੁਚ੍ਛਿਗਤੋ। ਏવਂ ਖੋਤਿ ਇਮਿਨਾ ਯਥਾવੁਤ੍ਤਾਕਾਰੇਨ ਅਯਂ ਸਤ੍ਤੋ…ਪੇ॰… ਨਿਬ੍ਬਤ੍ਤਤਿ, ਤਸ੍ਮਾ ਰੂਪਂ ਨ ਜੀવੋ। ਨ ਹਿ ਦਿਟ੍ਠਿਗਤਸ੍ਸ ਸਤ੍ਤਾਹਕ੍ਕਮੇਨ વੁਡ੍ਢਿਪ੍ਪਤ੍ਤੋ ਇਚ੍ਛਿਤੋ ਅਨਿਚ੍ਚਤਾਪਤ੍ਤਿਤੋ।
Tassāti gabbhaseyyakasattassa. Mātuudarapaṭalena ekābaddho hoti yato mātarā paribhuttaāhāro āmāsaye patiṭṭhite gabbhassa nābhināḷānusārena gabbhagatassa sarīraṃ sampatvā āhārakiccaṃ karoti. Āhārasamuṭṭhānarūpaṃ samuṭṭhāpetīti gabbhagatassa kāye ojāya paccayo hoti. Sā ca taṃ paccayaṃ labhitvā ojaṭṭhamakaṃ rūpaṃ samuṭṭhāpeti. Evaṃ mātarā paribhuttaāhārapaccayena gabbhagato dasa māse yāpeti attano nābhināḷānusāragateneva tena yāva āhārasamuṭṭhānasattāho, tato paṭṭhāya āharaṇato. Keci pana ‘‘mātarā paribhuttaāhāro bāhiravaggo viya tassa kāyaṃ abhisanneti parisanneti, tena so yāpetī’’ti vadanti. Kucchigataṃ udarapaṭalena tirohitattā bahi ṭhitanti vattabbataṃ na arahatīti ‘‘kucchiyā abbhantaragato’’ti āha. Mātukucchigato naroti mātu tirokucchigato. Evaṃ khoti iminā yathāvuttākārena ayaṃ satto…pe… nibbattati, tasmā rūpaṃ na jīvo. Na hi diṭṭhigatassa sattāhakkamena vuḍḍhippatto icchito aniccatāpattito.
ਇਨ੍ਦਕਸੁਤ੍ਤવਣ੍ਣਨਾ ਨਿਟ੍ਠਿਤਾ।
Indakasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੧. ਇਨ੍ਦਕਸੁਤ੍ਤਂ • 1. Indakasuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੧. ਇਨ੍ਦਕਸੁਤ੍ਤવਣ੍ਣਨਾ • 1. Indakasuttavaṇṇanā
