| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
9. இந்த³கீ²லஸுத்தங்
9. Indakhīlasuttaṃ
1109. ‘‘யே ஹி கேசி, பி⁴க்க²வே, ஸமணா வா ப்³ராஹ்மணா வா ‘இத³ங் து³க்க²’ந்தி யதா²பூ⁴தங் நப்பஜானந்தி…பே॰… ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் நப்பஜானந்தி, தே அஞ்ஞஸ்ஸ ஸமணஸ்ஸ வா ப்³ராஹ்மணஸ்ஸ வா முக²ங் உல்லோகெந்தி 1 – ‘அயங் நூன ப⁴வங் ஜானங் ஜானாதி, பஸ்ஸங் பஸ்ஸதீ’’’தி.
1109. ‘‘Ye hi keci, bhikkhave, samaṇā vā brāhmaṇā vā ‘idaṃ dukkha’nti yathābhūtaṃ nappajānanti…pe… ‘ayaṃ dukkhanirodhagāminī paṭipadā’ti yathābhūtaṃ nappajānanti, te aññassa samaṇassa vā brāhmaṇassa vā mukhaṃ ullokenti 2 – ‘ayaṃ nūna bhavaṃ jānaṃ jānāti, passaṃ passatī’’’ti.
‘‘ஸெய்யதா²பி , பி⁴க்க²வே, தூலபிசு வா கப்பாஸபிசு வா லஹுகோ வாதூபாதா³னோ ஸமே பூ⁴மிபா⁴கே³ நிக்கி²த்தோ. தமேனங் புரத்தி²மோ வாதோ பச்சி²மேன ஸங்ஹரெய்ய, பச்சி²மோ வாதோ புரத்தி²மேன ஸங்ஹரெய்ய, உத்தரோ வாதோ த³க்கி²ணேன ஸங்ஹரெய்ய, த³க்கி²ணோ வாதோ உத்தரேன ஸங்ஹரெய்ய. தங் கிஸ்ஸ ஹேது? லஹுகத்தா, பி⁴க்க²வே, கப்பாஸபிசுனோ. ஏவமேவ கோ², பி⁴க்க²வே, யே ஹி கேசி ஸமணா வா ப்³ராஹ்மணா வா ‘இத³ங் து³க்க²’ந்தி யதா²பூ⁴தங் நப்பஜானந்தி…பே॰… ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் நப்பஜானந்தி, தே அஞ்ஞஸ்ஸ ஸமணஸ்ஸ வா ப்³ராஹ்மணஸ்ஸ வா முக²ங் உல்லோகெந்தி – ‘அயங் நூன ப⁴வங் ஜானங் ஜானாதி, பஸ்ஸங் பஸ்ஸதீ’தி. தங் கிஸ்ஸ ஹேது? அதி³ட்ட²த்தா, பி⁴க்க²வே, சதுன்னங் அரியஸச்சானங்.
‘‘Seyyathāpi , bhikkhave, tūlapicu vā kappāsapicu vā lahuko vātūpādāno same bhūmibhāge nikkhitto. Tamenaṃ puratthimo vāto pacchimena saṃhareyya, pacchimo vāto puratthimena saṃhareyya, uttaro vāto dakkhiṇena saṃhareyya, dakkhiṇo vāto uttarena saṃhareyya. Taṃ kissa hetu? Lahukattā, bhikkhave, kappāsapicuno. Evameva kho, bhikkhave, ye hi keci samaṇā vā brāhmaṇā vā ‘idaṃ dukkha’nti yathābhūtaṃ nappajānanti…pe… ‘ayaṃ dukkhanirodhagāminī paṭipadā’ti yathābhūtaṃ nappajānanti, te aññassa samaṇassa vā brāhmaṇassa vā mukhaṃ ullokenti – ‘ayaṃ nūna bhavaṃ jānaṃ jānāti, passaṃ passatī’ti. Taṃ kissa hetu? Adiṭṭhattā, bhikkhave, catunnaṃ ariyasaccānaṃ.
‘‘யே ச கோ² கேசி, பி⁴க்க²வே, ஸமணா வா ப்³ராஹ்மணா வா ‘இத³ங் து³க்க²’ந்தி யதா²பூ⁴தங் பஜானந்தி…பே॰… ‘அயங் து³க்க²னிரோத⁴கா³மினீ படிபதா³’தி யதா²பூ⁴தங் பஜானந்தி, தே ந அஞ்ஞஸ்ஸ ஸமணஸ்ஸ வா ப்³ராஹ்மணஸ்ஸ வா முக²ங் உல்லோகெந்தி – ‘அயங் நூன ப⁴வங் ஜானங் ஜானாதி, பஸ்ஸங் பஸ்ஸதீ’’’தி.
‘‘Ye ca kho keci, bhikkhave, samaṇā vā brāhmaṇā vā ‘idaṃ dukkha’nti yathābhūtaṃ pajānanti…pe… ‘ayaṃ dukkhanirodhagāminī paṭipadā’ti yathābhūtaṃ pajānanti, te na aññassa samaṇassa vā brāhmaṇassa vā mukhaṃ ullokenti – ‘ayaṃ nūna bhavaṃ jānaṃ jānāti, passaṃ passatī’’’ti.
‘‘ஸெய்யதா²பி, பி⁴க்க²வே, அயோகீ²லோ வா இந்த³கீ²லோ வா க³ம்பீ⁴ரனேமோ ஸுனிகா²தோ அசலோ அஸம்பகம்பீ. புரத்தி²மாய சேபி தி³ஸாய ஆக³ச்செ²ய்ய பு⁴ஸா வாதவுட்டி², நேவ ஸங்கம்பெய்ய 3 ந ஸம்பகம்பெய்ய ந ஸம்பசாலெய்ய; பச்சி²மாய சேபி தி³ஸாய…பே॰… உத்தராய சேபி தி³ஸாய…பே॰… த³க்கி²ணாய சேபி தி³ஸாய ஆக³ச்செ²ய்ய பு⁴ஸா வாதவுட்டி², நேவ ஸங்கம்பெய்ய ந ஸம்பகம்பெய்ய ந ஸம்பசாலெய்ய. தங் கிஸ்ஸ ஹேது? க³ம்பீ⁴ரத்தா, பி⁴க்க²வே, நேமஸ்ஸ ஸுனிகா²தத்தா இந்த³கீ²லஸ்ஸ. ஏவமேவ கோ², பி⁴க்க²வே, யே ச கோ² கேசி ஸமணா வா ப்³ராஹ்மணா வா ‘இத³ங் து³க்க²’ந்தி யதா²பூ⁴தங் பஜானந்தி…பே॰… அயங் து³க்க²னிரோத⁴கா³மினீ படிபதா³’தி யதா²பூ⁴தங் பஜானந்தி, தே ந அஞ்ஞஸ்ஸ ஸமணஸ்ஸ வா ப்³ராஹ்மணஸ்ஸ வா முக²ங் உல்லோகெந்தி – ‘அயங் நூன ப⁴வங் ஜானங் ஜானாதி, பஸ்ஸங் பஸ்ஸதீ’தி. தங் கிஸ்ஸ ஹேது? ஸுதி³ட்ட²த்தா, பி⁴க்க²வே, சதுன்னங் அரியஸச்சானங். கதமேஸங் சதுன்னங்? து³க்க²ஸ்ஸ அரியஸச்சஸ்ஸ…பே॰… து³க்க²னிரோத⁴கா³மினியா படிபதா³ய அரியஸச்சஸ்ஸ.
‘‘Seyyathāpi, bhikkhave, ayokhīlo vā indakhīlo vā gambhīranemo sunikhāto acalo asampakampī. Puratthimāya cepi disāya āgaccheyya bhusā vātavuṭṭhi, neva saṅkampeyya 4 na sampakampeyya na sampacāleyya; pacchimāya cepi disāya…pe… uttarāya cepi disāya…pe… dakkhiṇāya cepi disāya āgaccheyya bhusā vātavuṭṭhi, neva saṅkampeyya na sampakampeyya na sampacāleyya. Taṃ kissa hetu? Gambhīrattā, bhikkhave, nemassa sunikhātattā indakhīlassa. Evameva kho, bhikkhave, ye ca kho keci samaṇā vā brāhmaṇā vā ‘idaṃ dukkha’nti yathābhūtaṃ pajānanti…pe… ayaṃ dukkhanirodhagāminī paṭipadā’ti yathābhūtaṃ pajānanti, te na aññassa samaṇassa vā brāhmaṇassa vā mukhaṃ ullokenti – ‘ayaṃ nūna bhavaṃ jānaṃ jānāti, passaṃ passatī’ti. Taṃ kissa hetu? Sudiṭṭhattā, bhikkhave, catunnaṃ ariyasaccānaṃ. Katamesaṃ catunnaṃ? Dukkhassa ariyasaccassa…pe… dukkhanirodhagāminiyā paṭipadāya ariyasaccassa.
‘‘தஸ்மாதிஹ, பி⁴க்க²வே, ‘இத³ங் து³க்க²’ந்தி யோகோ³ கரணீயோ…பே॰… ‘அயங் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. நவமங்.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Navamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9. இந்த³கீ²லஸுத்தவண்ணனா • 9. Indakhīlasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. இந்த³கீ²லஸுத்தவண்ணனா • 9. Indakhīlasuttavaṇṇanā
